Big Choi's Profile

妹妹一家請食自助餐， 提議近近地去機場食，從屯門過去都只係20分鐘車程， 順便喺客運大樓影下聖誕樹 。我從沒去過機場富豪酒店， 好在客運大樓一號落車後，沿路都有指示牌，大約幾分鐘路程。餐廳環境幾好，目測7至8成入座率，坐落位置唔擠迫， 最好係今日小朋友唔算多，而客人取食物都有禮貌有秩序。 食物種類雖然唔算超豐富，但係水準都在平均之上，有些甚至讓我有驚喜， 我一家食量唔大，只能傢蜻蜓點水式，樣樣嚐試一些。縱使如此，我只食咗一個Round已經飽曬🤣。我執左碟cold cuts送白酒👍，師傅即做的三文魚壽司及刺身都新鮮， 開邊龍蝦、蟹腳及青口例行必食，炸蠔脆口唔腥，其次是泰式炒菜及印度咖哩有驚喜，太太力讚海南雞同蘑菇湯， 我自己就飲咗個酸辣湯， 夠辣都唔錯， 最後侍應送上一個焗蟹蓋，事前唔知道原來呢期做緊蟹主題， 我已飽到上心口， 蟹蓋食唔曬有啲嘥，但食到滿口蟹味唔係講笑，食埋個movenpick嘅雪糕就完滿結束，除此之外，餐廳的服務也是值得一讚。服務員不僅殷勤有禮貌，對客人的需求都能迅速回應。整體來說這餐是滿意的，尤其是可以喺靜靜地在唔嘈雜嘅環境下，一家人享受一個晚餐。…Read More

這是一間只做廚師發辦的餐廳 ，而這是我第三次拜託師傅安排廚師發辦， 從前都是我跟太太夫婦二人獨自享受 ，這次我們邀請家人一起來共享美食。在之前，我總會先查閱餐廳菜單，了解他們的風格和特點， 嘗試體會每道菜背後的故事和料理技巧。我相信這樣的準備是對於一位認真的廚師的最大尊重。 當晚，我們五人準時入座後，點了一瓶辛口大吟釀。有趣的是，侍應還拿出多種風格的酒杯供我們自行挑選。我選擇了一款奢華又精緻的清酒杯，外觀散發著閃閃發亮的花紋，內部則是銀色光澤，讓整個開場就增添濃厚的儀式感。 接下來，師傅開始表演他的精湛技術，為我們呈現連續21道精美的料理。烹調的方式多種多樣，從傳統的日式料理到融合了日式和法式風格的創意佳餚。每一道菜肴都巧妙地搭配了精緻的陶瓷碟和餐具，令人不僅在口感上，更在視覺上一同享受了美食的美妙。 從整晚的品嚐過程到每道菜肴背後的製作過程，都讓我深深體會到飲食文化的博大精深和廚藝的奧妙，讓我更加珍惜每一次品味美食的機會。當然，口味的感受是莫大的個人體驗，我相信只有親身品嚐過一次，才能真正感受到這場美食之旅的獨特魅力。…Read More

在附近工作，同事介紹黎呢度食晏 ， 而且一定要試好味嘅炭燒豬扒飯， 豬扒大大件瀰漫著炭燒嘅香味，肥美多汁，蔥油及炭燒味充斥著嗅覺及味蕾， 雖然上菜比較慢 ，餐廳室內溫度比較熱而且比較多蚊，但係都值得你去一試👍。 如果你嫌豬扒飯太heavy， 都可以試下佢嘅海南雞飯都係唔錯嘅， 當然冇佢馳名嘅豬扒飯咁受歡迎。 今日試咗個冬蔭功蝦球意粉都唔差幾好味， 有興趣可以一試。 由於餐廳屬於村屋格局嘅關係，所以座位有限 ，每逢lunch time，一係訂位一係早啲去，如果唔係都要等位， 所以有同理心嘅我地，食飽咗自己都會自動自覺離座， 等在門外曬緊太陽嘅朋友可以盡早入內享用。 如想享受地道嘅泰式環境就選擇夏天去， 如果唔熱得就秋天後去🤭…Read More

想飲番杯咖啡又想食嘢飽下肚但又唔想咁貴，黎呢度都係幾好選擇， 主打漢堡包、焗薯、意粉同糙米飯， 叫埋杯嘢飲都係60至80蚊左右 ， 早餐午餐下午茶 ，大部分繁忙時間都差不多坐滿人， 好多街坊都鍾意喺呢度消磨下時間， 當然佢嘅咖啡又冇咖啡店做得咁Pro， 但係食個餐加少少錢 ，有杯過得去嘅咖啡你飲， 都算係咁呀。 我哋嚟呢度食野最鍾意都係食焗薯，意粉味道都OK至於漢堡包，自己就比較少食， 所以不作評論。 餐廳內餐桌大多是二人或四人座位，如果你入座人數太多， 要坐埋一齊傾偈就唔方便， 總括來說此處屬於三五知己， 飲杯野傾下偈的好去處。…Read More

公眾假期，食個晏都鬼咁多人四處都排隊，見佢條人龍唔係太長， 又未食過所以試下， 十分鐘左右後有位入座， 坐低叫咗肉骨茶、 海南雞飯、咖哩雞撈麵再加個咖央多士同雞翼尖。 我飲緊杯凍拉茶， 上網睇下呢間嘢啲食評，先發現好似好伏三粒星都冇， 心諗都係試咗先算， 反正啲人都係話佢服務差，冇話啲嘢食渣， 點知試完啲嘢食都係麻麻地，又唔係話難食都入唔到口嘅，不過真係嘥咗自己啲quota同金錢， 未食過肉骨茶只係得胡椒味， 試咗我女嗰碟海南雞飯， 雞肉真係鞋嘅重冇乜雞味， 咖哩雞撈麵啲咖哩ok，但啲雞同海南雞啲雞一樣死法， 反而最好食係嗰個戒央多士…… 如果有選擇嘅話，應該唔會喺呢度食， 至於服務又冇啲人講到咁差，不過我發現有個四眼哥仔，其實佢都好忙咁樣不停抹檯執檯，但係我見啲客問佢嘢，佢就好似唔識溝通咁， 人哋聽到個心裏面會唔舒服， 樓面都要識得分工合作，呢間嘢管理同食物上唔改善， 捱唔得耐。…Read More

每次喺附近食飽飯，必定要過嚟整番碗芋圓糖水， 有凍有熱大大碗價錢平靚正， 次次嚟到門口都要排隊，好在都叫入得快， 五個人食完都只係150蚊，係今時今日去邊度搵到呢啲價錢同質素， 幫襯嗰間乜乜仙真係同佢爭幾皮，仲貴人哋成倍，要食一得定嚟呢度食😋…Read More

再會豪師傅 隱藏式的Omakase細佬介紹，再次回味 豪師傅 嘅手勢， 師傅轉咗去新餐廳做，我同太太準時去到餐廳門外， 從店舖外表來看只是一間日式嘅 cafe， 完全唔似食日本料理 ，但原來裏面係別有洞天， 店內有一幅擺滿日本清酒嘅牆櫃， 牆中間有一道門將整間餐廳分開咗兩部分 ， 出面係 cafe裏面則是一個u型嘅壽司吧檯 ，吧檯嘅兩邊牆身都係一個大型嘅led螢幕 ， 隨時間會轉換畫面型做唔同嘅氣氛 ，整個晚上 ，睇住幾位師傅分工合作，為我哋打造每一道賞心悅目嘅菜式， 享受著滿載幸福感的美味👍， 聽住音樂坐在滿有特色環境， 感覺置身在另一個空間，每一道菜式都食得出師傅對料理嘅執著同心思。 一邊品嚐料理，一邊同師傅行話家常， 師傅介紹每道菜式嘅做法同材料，好似上咗一堂日本料理課，過程融洽輕鬆有講有笑，匆匆就三個小時， 飲飽食醉後抱住個大肚腩離去， 期待下一季再光顧，品嚐唔同季節嘅美食。…Read More

食物有質素，睇門外人龍你就知道你嘅選擇冇錯，老闆播80年代歌曲好啱feel🤭， 落單到食物上枱， 好有效率，見佢門市嘅情況，就令我諗起「客似雲來，貨如輪轉」兩句說話 🤣。 今次第二次幫襯，叫咗咖哩牛脷意粉及熱杏霜 ，太太則食常餐豬潤米粉， 牛脷整得好軟熟 ，咖哩中規中矩， 份量啱曬我，唔會食唔曬浪費食物， 太太個豬潤米啲豬飲潤都幾好食， 如果湯底再多少少薑絲又會咁加鍾意， 總括嚟講喺將軍澳站附近 ，要幫襯茶餐廳 ，一定揀首選呢一度👍 雖然要排隊，但等候嘅時間可接受。…Read More

最近熟人介紹，輝記小菜館新開張叫我去捧下場試下菜，咁啱同事想聚一聚啤一啤，，即時約埋一齊落去試新菜順便聚下舊。 提早一日，搵老友幫忙聯絡老闆，幫我哋book定位兼寫菜單， 我地五個大男人，預飲六七支啤酒其他餸菜廚師發板， 最緊要有湯😂。 最後老闆畀我哋個菜單如下：1. 海星螺頭燉豬展2. 金銀蒜蒸大元貝3. 碌鵝例牌 4. 津菜白花扎5. 鹽燒奄仔蟹 入座後等人齊之際 ，先叫大廚輝哥整幾個餐前小食我哋飲住酒先， 嚟咗碟雞雜， 青瓜脆腸同黃金魚皮， 碟碟都極度邪惡，雞雜新鮮，雞潤雞腎都好好味， 冰凍嘅生腸灼得啱啱好非常彈牙配埋wasabi食簡直一流，青瓜酸酸甜甜非常開胃， 碟炸魚皮就最離譜，非常唔健康但係食到唔停口，鹹蛋又香魚皮又脆， 差啲食曬冇留畀人😅等齊人之後，急不及待叫老闆起菜， 先嚟燉湯，眼見材料分量非常充足，幾條友飲完都直豎拇指， 湯色清澈味道濃沃而不漏， 冇得彈。 跟住上咗碟客家碌鵝， 都幾靚仔，皮肉分明肥瘦適中，呢味家鄉菜都幾個人口味， 我個人覺得味道夠濃 ，但朋友就返嫌佢鹹咗啲， 喜好與否因人而異。 之後又嚟咗碟大元貝， 比平時食嗰啲更加大隻， 師傅預先將唔食得嘅部位切除，然後用炸蒜同生蒜加粉絲墊底蒸到啱啱好 ，夠晒野味又食得方便，啖啖肉過足癮。 食咗咁多濃味嘢，黎返碟清著清清哋嘅， 師傅用津菜包住啲蝦滑灌上清湯， 我未食過，但覺得幾得意， 亦見到大廚嘅心思。 最後壓軸 ，我哋等咗成晚嘅主菜 -鹽燒奄仔蟹， 奄仔蟹蟹膏充足，而且非常大隻，好少見到有呢啲size，通常食嘅都係得佢三分之二咁上下， 一人一隻食完飽到上心口非常滿足，朋友都好滿意今晚嘅安排， 最後埋單驚喜價，每人四百蚊都唔使，真係性價比之選， 必定再嚟幫襯。😁…Read More