JoyceYiu9557的個人專頁

假期約咗朋友仔到深水埗chill下，佢搵咗呢間土耳其特色餐廳，裝修顏色繽紛，擺設用心，餐具都非常靚同精緻，非常適合幾個女仔傾下解飲下嘢。我哋兩個一坐低就忘晒形咁影相，最終只叫咗一個小食同各自叫咗一杯嘢飲，影下相之後再轉場去素年食正餐。Banana Fantasy, 好似係香蕉同菠蘿特飲，香蕉味好出，顏色又好靚。印度薯波配虎蝦冬蔭公，侍應細心話畀我哋聽食法，先將冬蔭公湯倒入薯波中，脆薯波中有沙律菜+虎蝦，加埋冬蔭公好特別又好好味。一啖一個剛剛好。…查看更多

呢日約咗女朋友到深水埗試下特色餐廳，女朋友推介咗Lonely Paisley 土耳其餐廳及素年fusion日式素食，因為假期怕人比較多，預算睇下邊間有位就試邊間，兩間位置相近就在斜對面，最後我哋兩間都試晒，先到lonely Paisley土耳其餐廳High Tea飲嘢試下小食影下相，再來素年食正餐，完全無諗過素食可以做到咁真實有驚喜，非常完美一次美食約會。日式咖喱吉列豬扒意大利飯，素豬扒非常鬆脆，意大利飯煙勒度適中，日式咖喱濃香而唔辣，仲有大量雞脾菇，車厘茄同蘆荀，份量非常足夠，真心好好味。不可能TM漢堡飽，火箭菜，厚厚漢堡扒加埋車打芝士好正，仲有牛味，完全食唔出係素漢堡扒，另外薯條應該用咗日本紅薯做，外脆內軟非常甜，必食非一般薯條。　Latte Coffee 哈哈，拉花欠操練，泡沬唔夠細緻，味道還可以。其間有一點員工唔夠細心，我哋都未食晒碟飯，佢問都無問就收咗，令人有點反感，完全明白佢哋要開始準備晚市客，但基本禮貌必須的，不過整體推介。…查看更多

位於鴻圖道尾一個非常不起眼既樓梯底下既一間咖啡店, coffee time取頭兩個英文字為店名COTI，It‘s time for coffee。店內坐位不多，但非常舒適，食物CP值極高，咖啡非常好飲，簡單拉花，再配上甜甜地既咖啡豆蛋糕仔perfect, 全日早餐哈密瓜清甜，雞扒完全唔會油膩非常香，滑蛋濃濃蛋香，沙律菜配上沙律醋非常開胃，薄薄牛油配烘脆麵包，非常香口，煙三文魚玫瑰花非常靚，非常用心既制作，係我lunch想hea時間既首選。…查看更多

南丫島一日遊回程決定喺中環搵食，我哋先去咗食印度餐，由於太晏有啲餐已經沽清，所以朋友推薦轉塲到沾仔記，我哋經過中環街道上見到好多壁畫，我忍唔住手影咗幾張真係好靚呀。疫情既關係遊客少咗，今次完全唔使排隊，朋友們都話以前都要排隊先食到架。由於我哋都半飽狀態，大家都決定叫淨雲吞，老實講我係九龍人，好少過海，沾仔記好出名，但我未食，唔好笑，雲吞大大粒，蝦肉彈牙爽口，加埋鹼水味既湯和葱花，最重要一定要加自制辣椒油，真係好正。…查看更多

假期約埋閨密一齊tea 一 tea，今次㨂咗呢間睇咗網上推介，好吸引，好少見有日式下午茶，提前預約，因為假期都full booking， 最終我哋book到呢一日。我提前來到，眼見只有兩，三枱客，可能大家都等下午茶，原先我哋坐喺門口位置，我個人怕熱，又唔太喜歡食嘢時有人喺身邊行來行去，決定問職員能否調其他位置，最後職員幫我哋安排坐喺一個只有兩枱客既小小空間，非常感激。日式簡約設計舒適。食物精緻完全與圖片相符，味道方面偏向清淡。可能夏天需要比較清新感，如果壽司同刺身分配多點，會更好。好似佢哋下午茶都會定期轉款，款式雖多，但食曬亦未算好滿足既感覺，日式甜品方面也是普普通通，沒太大驚喜。朋友話一定要點呢壺花茶，真心茶具非常高貴好靚，我哋㨂咗洛神花茶，酸酸地好開胃，美中不足係個蠟燭點咗好快熄，員工不厭其煩幫手點著，但轉頭又熄，幾個回合，好掃興，最終我哋放棄咗。總之女生好難抗拒呢個既下午茶。呃like之選。…查看更多

疫情後朋友都減少見面，今晚約咗一個認識多年，但一直都無約過飯既朋友見面，疫情後大家更珍惜見面既機會，我哋㨂咗牧羊少年咖啡館，朋友話呢度假期非常爆場，平日夜晚又有另一份優靜，好適合我哋坐低慢慢交流。地方寛濶，唔會有壓逼感。小食拼盤，上枱時我哋兩個都都嘩咁誇張，我心諗我哋兩個人食唔食得晒呀！不過味道真係唔錯架！呢個分量最好4個人一齊share，幸好朋友既食量都令我刮目相看，一邊傾佢一邊慢慢地食，最後除咗薯角外全部掃清😄牛油果香芒雞肉沙律，份量一樣嘩嘩聲，配埋芝麻醬剛剛好，水果新鮮，芒果出奇甜，再加煎雞扒，配合的非常完美。朋友呢杯應該係牛奶咖啡，遇到我哋夜麻麻都想飲咖啡既人，一定會問咁你今晚唔使瞓啦！我就㨂黑糖牛奶咖啡，黑糖又是另一番風味，推介畀愛甜食既人。個人覺得呢度好適合二人世界，談下心。…查看更多

端午節假期一個人想搵個地方chill下，網上有人推介九龍城rings coffee，就過來試下，中午時間門外有幾個人排隊，不過好快就安排到入坐，只要探熱無需登記，兩人一枱，保持一定既社交距離，大家可以安心用餐。鮮奶咖啡，好靚既玫瑰花令人不捨得飲，最適合呃like，感覺鮮奶若有蓋過咖啡既香味。全日早餐非常豐富，牛角包，厚厚既煙肉，紐倫堡香腸，炒滑蛋，新鮮牛油果及沙律菜，唯獨炸薯餅既油太雜味有點失望，整體都非常滿意。…查看更多

覆診後又係補充能量既時間，平日返工又邊可能咁優閒，今日特意來到葵芳新都會廣場呢間元氣壽司，自疫情後元氣既食物質素進步咗好多，或者因為壽司郎同爭鮮既競爭，做為食客不但有多個選擇仲可以食到更優質既食物都唔錯呀。元氣強調採用日本產米，粒粒晶瑩煙韌不鬆散，口感一流，單睇相都知食材亦不馬虎。壽司：炙燒珍寶皇帝蟹柳，玉子，燒汁牛肉，蒲燒鰻魚，炙燒三文魚，件件都大大件，最驚喜反而是珍寶皇帝蟹柳，配埋上面既芝士好鮮美，出乎意料之外。湯烏冬，烏冬都好煙韌，連湯都好好味。芝士薯條，香脆內軟配埋芝士令味道升級。總結午後之選，超值抵食，最適合me time。食飽再行下商場，shopping，仲有一個非常chill既地方畀放鬆下自己，Good呀⋯…查看更多

觀塘區返工快半年了，平日帶飯為主，因為新公司無飯腳，但耐唔食都想出街抖下氣，呢日我㨂咗呢間餐廳因為好奇心，自己對小寵物無特別喜愛或抗拒，純粹搵個特別既地方食下飯放鬆下⋯疫情下消毒必須的，餐廳為保護貓貓安全，設備俱全，入場前穿鞋套，消毒雙手，登記安心出行或填寫個人資料。坐低我即刻點咗黑松露卡邦尼意粉，配泡沫咖啡，餐湯粟米忌廉湯，午飯時間比較緊張。記憶中佢畀咗一份用餐注意事項，但我坐低無耐，由於隔離枱買咗貓糧喂食，吸引超多貓貓上咗我張餐枱，我完全被嚇著，手忙腳亂，為咗保護剛上枱既餐湯，原本想食個安樂午餐再同貓貓玩下，點知理想與現實總有出入，想換枱，但午飯時間都超爆滿，可能愛貓人仕求之不得，可以近距離同貓貓互動。但我就搞到好狼狽，狼吞虎嚥食飽，之後才可以放鬆防備與貓貓互動，其實貓貓唔同爭食真係超可愛。整體食物質素唔差，價錢合理，愛貓人仕朝聖之選。…查看更多

復活節假期既完結，帶爸媽試新嘢，壽司郎開到樂富已經有一段時間，其實我唔明白點解仲喺咁多人排隊，個人唔係太欣賞，不過好奇心驅使再畀機會試下。呢日我先過來攞籌，等足一個鐘先有位，差唔多先叫爸媽出來會合，限時食一個鐘，好彩我哋一家都少說話，食嘢快😂，講真唔使等先會再幫襯，連媽媽都話元氣好食啲，或者我哋唔識貨⋯自從疫情後元氣講明壽司米採用日本米，好食好多，相比之下，元氣勝，份量應該壽司郎優勢，當然有競爭有改進，大家為咗吸客都會各施各法，咁食客可以多受惠啦。其實我唔係食家，鍾意既亦好單一，三文魚，帶子，鰻魚，鯖魚，吞拿魚亦係2019年去東京先知吞拿魚係咁好食，但喺香港仲未能食返嗰個味道。呢款特選吞拿魚腩麻麻地。海胆有點腥，喺香港海胆為貴價嘢，所以一般都食唔到靚海胆。鯖魚押壽司，份量夠大，但鯖魚一般。極上鰻魚，鰻魚好厚，但無鰻魚油香。日本產帆立貝，感覺也太小氣了，鮮味不足。鹽醋漬鯖魚，醋味唔夠，有腥味。炙燒三文魚腩，正常油脂夠。芥末八爪魚，太有咬勁，少牙力都搞唔掂花之戀不過不失，生拌三文魚正常。炸蝦天婦羅拼盤，太油，味道都幾好。三文魚牛油果卷，味道啱啱好好味。三文魚腩叫畀爸爸食，睇樣都唔錯。總結平均$149/位算抵食，有改善空間。…查看更多

復活節假期，約咗朋友仔一齊去剪髮，放假都來到觀塘區，當然要搵間平時bookmark咗既餐廳同朋友仔一齊hea下。餐廳設計簡約，又有少許工業風，呢日我哋坐喺門口直入既嗰落位，可以望住水吧員工調制飲品。我哋都係咖啡控，當然都要整返杯咖啡插插電，我叫咗crispy sweet cappuccino, 厚厚的泡沫加焦糖表面，賣相非常吸引，咖啡極濃中帶甜，朋友嗰杯有酒味Photographer’s Signature，朋友話酒味過濃，放耐咗無咁好飲，咖啡都係要趁熱飲啦！北海道刺身帶子配15%黑松露意大利粉，帶子極鮮美，黑松露香味濃，朋友唔太喜愛黑松露都接受到，佢都話好味。all day waffles combo, 煙三文魚，黑松露滑蛋，雜菌，香草腸，焗豆，柚子醋沙律菜，窩芙，應有盡有，呢個份量令人非常滿足。食飽就行下觀塘海濱長廊，假期都不少朋友仔喺呢度hea⋯⋯感覺非常好👍🏻…查看更多

佛誕假期，朋友約埋一齊食下lunch，我哋㨂咗樂富呢間餐廳，地鐵站附近大家都方便，之前我有入過去視察環境，感覺空間感非常好，舒適寬敞，最適合大家坐低傾偈，享受美食，有慢活生活既感覺。因為假期原因，1點已經排晒長龍，好彩我哋一早喺Openrice 訂咗位，登記安心出行就直接入坐，幸運地安排咗坐喺閣樓位，好似只有4-5張枱，好安靜舒適，只是我哋太耐無見話比較多，呢日我哋足足傾咗5個鐘到晚市先走，疫情下真係難得有個咁好既地方，其間員工用餐休息都喺呢度，我哋可能佔用咗佢哋既用餐空間，感謝餐廳員工體諒畀我哋可以盡情享受。我哋叫咗lunch set share豬肉，雞肉，意粉，薄餅，樣樣都試下。餐湯為南瓜湯，濃而不膩，而且混合有麵包脆粒增添層次，再配埋兩細塊法包加黑醋欖欖油一流😋香烤豬里肌配薯條沙律菜，調味及醬汁一應俱全，好體貼，薯條外脆內食到薯仔原味，豬里肌不會過火，煙靭度剛好，加入檸檬汁中和肥膩感，沙律菜為火箭菜加蕃茄仔新鮮可口。辣肉腸芝士薄餅，個人不是薄餅愛好者，食咗一塊料足，餅底不厚不薄，一個人要食晒呢份薄餅真係有難度，一齊share就啱啱好。特色烤雞半隻上，對於刀工唔好既朋友，可能比較考功夫，如果獨食就可以粗爆點手撕，原汁原味，雞肉嫩滑唔會嚡口，讚！卡邦尼手工意粉，呢個份量一個你食可能啱啱好，我哋share只能每人細嚐，好濃厚既口感，檸檬汁可以中和肥膩，總覺得好貼心，再配少許烤肉條唔單調。餐跟百香果水果茶，忘記影相，因為我想試甜品，所以無加錢叫咖啡，留返下次。甜品我㨂招牌tiramisu 感覺餅底可以再多點，個人喜愛，cream cheese比例比較多，面頭既朱古力粉大家食時要小心點好容易嗆到，先用匙羹壓下再食會好點。極力推薦畀大家既一間餐廳，平日lunch set仲會再平啲哦，而且無咁多人哦😋…查看更多

突然諗起有時間可以去黃大仙既壽司郎朝拜下，睇下現場實況，踫踫運氣，到達現場攞咗飛10:56分，我攞咗90號籌，第一輪開始入緊場中，叫到最後52號籌第一輪已完。詢問職員用餐時間大約60分鐘，我諗第二輪大約12點，剛好午餐時間，順便喺商場既Aeon Living Plaza $12店同樓上海味店shopping下，時間好快就過。大約11:53就輪到我，一個人獨立位，因疫情關係加咗一塊白色膠板隔離，座位配套都非常齊全，完全自助式，左手邊筷子盒上有柑橘醋，醬油，鰻魚汁，最入面係子薑，中間平板，綠茶粉，熱水機，上方有醬油碟及茶杯，右手邊牙籤，紙巾同甜品匙羹，入座前仲畀咗個膠袋我袋口罩，真係好貼心。用平板點壽司或迴轉帶取壽司隨君喜好。我坐低就第一時間喺迴轉帶攞咗一件特選大吞拿魚腩，太心急了，感覺一般。之後我用平板點咗頭一輪，鹽醋漬鯖魚，太鯹了，完全失望，無網上的人推介咁好食囉！個人對鯖魚都情有獨鍾，再來厚切燒鯖魚，原味其實我覺得自己煎既比佢好食囉。另一件我加咗柑橘醋感覺好好多，佢既壽司分量的確唔細件，不過壽司飯都係一般。期間限定雪花和牛，睇相都覺得一般，不過不失啦！再來點第二輪期間限定三文魚腩配三文魚子，魚子分量好多足量，三文魚亦好肥美。極上鰻魚，落單時仲提醒吃嗰時要小心有魚骨，好貼心，完全感受到日本人既貼心，真係好大件，好幸運我呢件無骨，好好味。蟹膏軍艦，蟹膏的確好香濃，加埋三文魚子又係另一種層次。食埋醬烤日本產帆立貝結束呢次試食，鮮美不失所望。總結，唔好期望太高就不會失望，沒想像中既好味，不過就好抵食。期待樂富新店開張⋯⋯…查看更多

待業期間唔需要同人逼喺週未先來玩，平日約朋友一齊來長洲行下，最近日日都陰天落雨，搞到個人都無曬心機，趁住天氣好，出來抖下氣，到海灘吹下風睇下海景，非常療癒，唔駛屈喺屋企。來長洲當然要試大大粒魚蛋，墨魚丸，我每次必食，有時仲會打包添。炎炎夏日之下，來一杯水果沙冰，超涼爽。我哋邊行邊物色午餐既落腳點，無諗過2點的餐廳都仲係座無虛席，最後我哋㨂咗呢間和樂，首先被餐牌吸引，價格實惠，選擇又多元化既餐廳，餐廳細細坐滿曬客人，我哋等咗一小陣就有得入座。我哋兩個都想食咖喱，最後㨂咗日式咖喱芝士菠蘿雞扒飯同秘制咖喱牛腩配油酥餅餐跟珍珠奶茶。來一個日式咖喱同秘制咖喱大比拼，日式口味甜甜地，芝士焗飯配埋蘿菠有清新感覺無咁漏，雞扒切件上好細心。而我哋都偏向喜歡秘制咖喱既香料味道，完全取勝，牛腩分量非常多，油酥餅再加多件會更完美。珍珠奶茶都意外地好味，茶味香濃，珍珠煙韌度剛剛好，推薦來長洲可以來試下呢間，平價午餐。我非常論盡，臨尾倒瀉咗杯珍珠奶茶，員工即刻攞大量紙巾畀我，值得嘉許，完全無怪責，仲安慰我，我真係好尷尬，臨尾撻Q。…查看更多

幸好我哋一班同事都唔介意食貴嘢，今次我哋來試食繼既手握壽司定食，包括前菜野菜沙律及蒸蛋，主菜10件精心挑選既壽司，最後仲有麵豉湯同甜品，真心推薦。由師傅喺我哋面前即場手握壽司，至新鮮又食得安心，因為疫情剛開始大家都有點緊張。首先坐低師傅問我哋最想食咩食材，大家都話要食三文魚，哈哈⋯可能三文魚屬平價食材，餐廳無供應，最後由師傳幫我哋安排，師傳仲會慢慢講解每件壽司既食材，雖然有點未聽過添，但全部都好好味，每一件都好精緻。…查看更多