朱古包's Profile

110202 星期三 | 年三十晚，屋企要收爐，出街食飯乾手淨腳，食完可以唔駛洗碗碟，仲可以跟住走去玩，一早有預謀，已電話訂座，揀選王家沙，因為這裡比較適合小家庭來開餐，是晚得爸、媽和我三人行，6點半來到便即時被安排入座了:)。滿以為新年期間，會有些特別的菜式應吓節，但點菜單依舊平日模樣，只是個餐前小食，由花生 ($10) 轉了做紅棗 ($15)，紅當當，算係應吓節啩，隨便揀選幾道菜，有些試過，有些未試過，總共點了5樣嘢，都咪話唔豐富。首先嚟個招牌蟹粉小籠包 ($48)，之前食過覺得唔錯，所以今回又再要，依樣皮薄餡料多，有豐富肉汁，味道保持水準，不過仍然覺得個摺口位厚咗啲囉。鮮拆蟹粉扒荳苗 ($148)，嘩，好多蟹粉喔，紅紅綠綠，賣相唔錯，荳苗亦煮得不過火，腍得嚟仍保持著鮮綠色，不過鹹咗啲嚕:(。無錫脆鱔 ($58)，第一次食，覺得幾得意，鱔肉炸得鬆脆無比，加上蘸滿了甜甜酸酸的糖醋醬，香口好食，但係無咗鱔肉的質感了。宋嫂魚羹 ($34x2)，這個也是第一次食，$34一碗都幾貴，所以只係要了兩碗3人分享，材料都幾豐富，有魚肉、冬菇、筍絲、薑絲、火腿茸和蛋花等，味道唔錯，如果要自己整都幾花功夫喔。最後來的京蔥爆羊肉(配薄餅) ($68)，之前都食過一次，OK唔錯嘅，羊肉炒得夠腍，很入味，但得四塊薄餅唔夠包，所以剩番啲京蔥羊肉要空口食，就覺得都幾鹹，要食番啲紅棗調和一吓至得。這個虎年最後的晚餐，帶有少許新鮮感，款式不多卻非常之飽肚，食完飯要去花市打個轉、散吓步，幫助吓消化至得了。…Read More

110129 星期六 | 早一個多星期前打電話book枱食團年飯，鱷魚恤中心那邊的食肆已full，轉攻APM，幸好家傳滬曉還有位，就訂了6點半8位，是日依時抵達，被安排入內，但原來只得張長枱，感到有點掃興，早知唔訂這裡啦，其實之前打過電話給另外一家在APM的食肆，他們就老實得多，說只剩得張長枱，問我介不介意，食團年飯，總覺得大家圍埋張圓枱食飯有意思啲嘛，平時日見呢間家傳滬曉多過六位的都是被安排坐圓枱的，估唔到佢哋為求多啲客，會作出這樣的安排:(。是晚提供的菜式不多，大家又懶得諗，就要了個六和菜 ($888)，其實都幾豐富，8個人食都好夠飽:)。先有滬式叁小碟：蔥油窩筍海蜇絲，凍食，都幾有麻香味，海蜇亦都幾彈牙:)。油炆小竹筍，熱食，甚少食竹筍，這個小竹筍都幾爽口，味道唔錯:)。前門店醬蹄，凍食，有點像平時食的薰蹄，但質感比較實，味道亦比較濃。主菜有捲蔥填鴨，由於地方狹窄，侍應姐姐跟我們說她會在後面給我們切好，其實都唔知即係邊度，雖然未有機會一看填鴨的全貌，但切出來的填鴨肉都幾多，共有兩大碟，皮脆肉嫩，很不錯啊。跟住來個湯，餐單寫著冰豆腐架子湯，架子其實是填鴨去了肉後的骨架，用來熬湯，不過唔見有豆腐喔，上海白菜就有幾條，都幾清甜嘅:)。鮮百合小唐菜，普普通通的一道菜，不過就畧為鹹咗啲囉。遊龍戲鳳(塔菜賽螃蟹)，這個就比之前的那個菜好啲喇，無咁鹹，而賽螃蟹混有蝦肉，腍腍的、淡淡的蛋白之中，夾雜爽口的、鮮甜的蝦肉，幾好食:)。麒麟桂魚，賣相不俗，都幾考功夫㗎，將桂花魚啲肉起咗出嚟，再加入雲耳和珍菌快炒，魚肉嫩滑，鹹甜適中，很感滿足:)。風生水起(鴨絲炒手打粉皮)，似乎依家興撈起菜式，這個就有鴨絲、粉皮和青瓜絲，倒入麻醬撈勻嚟食，如果大家圍埋張圓枱一起玩撈起，一定會開心啲，撈起之後都幾好味，係個鴨絲乾身啲，有啲硬，粉皮就有啲煙煙韌韌，口感好唔錯:)。還有點心，北京水餃，雖說水餃，但沒有湯水，就只得幾粒水餃放在碟上，有啲攪笑，不過都算係皮薄餡料多，味道都唔錯嘅:)。最後甜品有萬壽果銀耳，即木瓜雪耳，雪耳爽、木瓜腍，甜甜蜜蜜，就將這頓團年飯劃上句號了:)。…Read More

110115 星期六 | 媽媽躲懶唔煮飯，於是跟爸、媽出外覓食，隨便搵個地方開餐，就來到太興了:)，星期六晚7點幾，都坐不滿一半的人客，大概是給附近的APM和鱷魚恤中心吸取了大量人流啦，這裡都算乾淨企理:)，雖說是甚麼新世代，但打開餐牌，有中有西，都是一般的菜色，沒有驚喜，最後揀咗豆腐班腩煲、菜遠臘鴨比飯和豉汁蒸盲曹做晚餐。豆腐班腩煲 ($50)，都幾多料，除咗豆腐和班腩，還有枝竹和冬菇，最啱老人家食，樣樣都腍腍地又無骨，個汁撈飯唔錯的:)。菜遠臘鴨比飯 ($35)，本來個賣相都幾靚㗎，整隻臘鴨比切好放在飯的面頭:)，不過心急拔飯撈斑腩汁食，記得影相嘅時候已變成亂糟糟的模樣了，話說回來，個臘鴨比都幾腍，不太鹹，亦已切去大部分肥油，所以啲飯都不致於油淋淋，都唔錯嘅:)。豉汁蒸盲曹 ($52)，其實都有好幾種魚提供讓人客揀選的，不過原先想要的白鱔沒有，就揀了盲曹，另外煮法也可以任君選擇的，穩穩鎮鎮還是選了豉汁蒸了:)，由於是即時蒸，需時較耐，不過也只是大概15分鐘吧，條魚都幾新鮮，魚肉都幾嫩滑，差不多整條魚都給吃光了。簡簡單單幾道餸菜，不過不失，能夠跟爸、媽一起吃個飯已感滿足，又何需山珍海錯。…Read More

110115 星期六 | 好耐無食麥記嘅早晨套餐啦，依稀記得係相當豐富的，特別喜愛當中嘅脆薯餅:)，今回友人相約到這家麥記食早餐，當然要叫番個早晨套餐回味吓啦，未到9點已有不少人輪候購買早餐了，不過都駛等好耐，大概5分鐘度啦，第一次來這裡，原來這裡都幾大地方，除了入門口看到左右兩邊的桌椅外，轉過彎，入面還有不少座位呢:)，單邊還有落地大玻璃，可以一邊看著外面的行人匆忙趕路，一邊悠然自得地坐在這裡慢慢享受我們的早餐。早晨套餐依舊豐富，有豬柳、炒蛋、麵包、脆薯餅和熱咖啡，樣樣都唔錯:)，當然最得我心的還是個脆薯餅，外脆內軟，吃得滿口薯香味，吃得飽飽的早餐。…Read More

110114 星期五 | 又得一個人開餐，記得上次喺吉之島買過啲壽司卷好食:)，於是走去逛一逛，不過天寒地冬，都係食啲熱嘢好啲喎，所以最後都係轉汰，買咗韮菜豬肉餃 ($10五隻) 和牛肉餅 ($12兩個) 做晚餐:)。韮菜豬肉餃都幾OK，都幾多餡，但個皮相當厚，不過$10五隻餃子，這樣的貨色，都係咁上吓啦。至於個牛肉餅，食咗成半個都唔見餡嘅，個餅的質地，有啲似麵飽，但無麵飽咁腍身，少少甜甜地，再咬多幾啖，終於見到餡料啦，咦，點解唔似牛肉嘅，唔論顏色、口感，都似豬肉多啲喎，但明明同售賣員講我要牛肉餅，又明明見住佢喺寫著牛肉餅的盤子夾咗兩件餅俾我㗎，相信佢哋之前將唔同餡料嘅餅放在盤子上的時候已弄錯了:(，算啦，豬又好、牛又好，飽肚就算啦，我食嘅應該係榨菜豬肉餅，味道OK嘅，不過如果多啲餡料同埋唔好側埋一邊就好啦:)。…Read More

110108 星期六 | 潮流興食有機食物:)，走去點點綠 look 一 look，嘩，好多食品都好貴喔，比無機食品貴好多，買唔落手喎，但係一場嚟到，都係買番啲啦:)，好在啲零食價錢都算相宜:)，就買了幾款，有機雜錦果(美味果籽) ($30)、天然藍莓 ($22)、天然杞子 ($11) 和有機南瓜籽 ($12)，食落口都是果籽有果籽味、藍莓有藍莓味、杞子有杞子味、南瓜籽有南瓜籽味咁喇，跟無機嗰啲無咩分別，是否健康啲就見人見智喇，還是相信「均衡飲食身體好」這一套，管它有機定無機吧。…Read More

110104 星期二 | 走去吉之島逛逛，又想食壽司做晚餐喇:)，買盒雙條三文魚鰻魚細卷 ($22.9) 回家慢慢食，三文魚和鰻魚都很新鮮，不用蘸醬料也好味，雖然鰻魚有啲細骨，不過可以吞埋落肚，問題不大，就咁揸住食，連碗筷都慳得洗。…Read More

110103 星期一 | 是晚有事幹，要早點吃個飯，跑到吉野家，要了個和風牛肉飯下午茶餐 ($15)，一碗飯加一杯日本茶，牛肉依舊好吃，還夾雜了些洋葱和椰菜，好食兼抵食，美中不足的是只收現金，八達通也不行，雖不是個大問題，但如果可以給大家一個方便就更好喇:)，食飽便要趕工去了。…Read More

110102 星期日又到奇華買嘢食，見到出咗新口味，咖啡味嘅鳥結糖，隨即買啲嚟試吓，跟牛奶味同一價，一百克賣十四蚊，隨手揀咗十二粒，承惠廿一個四元。獨立包裝好衞生，唔講咁多食粒先，果然有啲咖啡味，但係唔夠香和濃，甜得嚟有少少苦，花生粒都幾脆口，整體口感略為硬，還是牛奶味嘅好:)。…Read More

110102 星期日 | 喺APM電影院買咗晨早場戲飛，睇戲前要食飽飽，走到KFC，8點幾，無咩人，要了個家鄉鮮魚柳早晨套餐 ($23.8)，除了主角家鄉鮮魚柳外，還有香蜜鬆餅、滑蛋和即磨咖啡，都幾豐富㗎。魚柳賣相唔錯，但咬落去一啲都唔脆口，腍啫啫，好在味道還可以啫。香蜜鬆餅都唔錯嘅，外面硬硬地、脆脆地，內裡少少鬆軟，如果搽啲牛油或果醬就更好食喇:)。滑蛋都幾滑，有些少部分還處於半生熟狀態呢。至於杯即磨咖啡，大大杯，咖啡味唔算好濃，不過都算幾香滑嘅:)。個早晨套餐都相當飽肚，食飽飽就去睇戲嚕:)。…Read More

110101 星期六 | 記得曾經來過煌城食晚飯，印象不錯，所以新一年的第一個與家人共聚的晚飯，就選了這裡，預早電話book枱，是晚未到7點來到便即時可以入座:)，酒樓提供的套餐都是六位或十二位，價錢昂貴唔抵食，我們總共八人，還是自己點小菜較化算，結果要了一個湯和六個菜，都幾豐富喇:)。鮮料燉螺頭湯 ($98)，所謂鮮料都是一般的煲湯料吧，雞腳、豬肉和瑤柱，當然還有螺頭喇，湯料分量都幾多，湯水就似乎唔夠分開八碗了，雖然只得半碗，都算清甜，螺頭亦夠腍:)。紅燒妙齡乳鴿 ($28x2)，燒得不大好了，皮唔脆、肉又韌，好似是隔夜貨咁。蟹肉扒嫩豆苗 ($88)，OK好食，一般酒樓貨色:)。醬爆澳洲鴛鴦蚌 ($78)，少少辣，都唔錯嘅，貴花蚌和珊湖蚌都幾爽口:)。塔塔鍋燒牛仔骨 ($78)，唔知甚麼是塔塔鍋，所以點了這個來試，其實是個石鍋吧，牛仔骨夠腍又入味，冬菇、洋葱索晒啲醬汁，好好味，好唔錯。薑葱豉汁蒸大鱔 ($88)，本來很喜歡這道菜的，但是晚的大鱔不夠肥美，亦畧為鹹了些少。竹笙野菌什菜煲 ($58)，清清地，清吓腸胃都唔錯，跟其它味道濃郁的餸菜調和一下剛剛好:)。最後酒樓還有個綠豆沙奉送，都幾足料，有海帶的，這亦將是晚家庭飯局劃上了句號。整體來說，餸菜都是普普通通，無甚驚喜，不過可以一家人聚首一堂吃個飯，總算難得:)。…Read More

110101 星期六 | 新一年的第一天，想到外面吃個午飯慶祝吓，可惜爸爸約了友人敘舊:(，只得我和媽媽撐枱腳了:)，APM 嚟過好幾次，呢間紅螞蟻倒是第一次，12點幾嚟到，雖然人客唔算多，但靠窗邊的卡位已坐滿，所以我哋被安排坐散座了，這些散座空間很狹窄，枱面又細小，跟隔離張枱相距唔夠一呎，椅背更是緊貼後面座位的椅背:(，好在周邊都未有人客啫，但可以想像繁忙時間的時候，會坐得很侷促的了。我哋只得兩個人，又想食多點不同嘅菜色，於是便專攻風味小吃一欄，打開餐牌看見有好幾款都很吸引，最後要了四款，其中三款是廚師推介的呢，分別是挪威煙三文魚火龍果雜菜沙律 ($52)、巴黎牛油田螺肉焗鮮白菌薯蓉 ($32) 和炭燒紐西蘭蜜糖羊扒 (兩件) ($50)，還要了個醬燒牛脷 ($30)，當然唔少得甜品喇，揀咗個即焗梳乎厘 (二人份量，朱古力) ($40):)。上菜都算快，差不多一個緊接一個，只是梳乎厘是即時焗，所以需時較長，餐牌已寫明大約要等20分鐘，邊吃邊等，不是問題吧:)。最先上枱的是挪威煙三文魚火龍果雜菜沙律，賣相很吸引:)，除了面頭有大大卷的三文魚魚生，下面還有不少煙三文魚粒混在雜菜裡頭，食起來有蔬菜的爽脆，又有腍腍的魚肉，有蔬果的清甜，又有煙三文魚的鹹味，口感非常豐富，加上千島醬是我最喜愛的沙律醬，實在感到很滿足。差不多食完沙律，巴黎牛油田螺肉焗鮮白菌薯蓉就送上來了，初時還擔心田螺肉會不會韌呢，但原來出奇的腍，薯茸亦很香滑，夾雜了白菌碎粒，都有些少咬口的呢:)。還在細嚼薯茸的時候，炭燒紐西蘭蜜糖羊扒和醬燒牛脷相繼出現了，羊扒肥瘦適中，燒得好香，一點羊羶味都無，肉夠腍，少少甜，但略嫌不夠味，或許醬燒牛脷的醬汁太好味啩，所以蘸點牛脷醬汁來吃，好似好食好多呢。醬燒牛脷雖不是廚師推介，但我覺得這個更值得推介呢，差不多整條牛脷上碟，賣相雖不大討好，但食牛脷好似食牛排，要用刀切來食，感覺好得意，好有口感又不韌，醬汁更是一讚。食完四個小吃，侍應姐姐清理枱面過後，即焗梳乎厘是時候出場了，餐牌寫明兩人分量，果然大大個，足夠兩人分享:)，其實還有好幾種味道可以選擇的，不過朱古力味係我和媽媽嘅 favorite，脹卜卜，面頭灑滿糖粉，好吸引，一羹戳落去，嘩，熱乎乎、軟綿綿，幾乎要跟媽媽爭食呢，不太甜，好好味，其實跟梳乎厘上枱，還有一小碟盛著相信是混有吉士的凍奶，想是讓我哋食梳乎厘嘅時候，蘸點來吃，可以減低熱度吧:)。不到一個鐘便吃完這個新年午餐，從媽媽臉上的笑容，可以知道媽媽今天吃得很高興，我也感到很滿足:)。…Read More

101231 星期五 | 買完餅，喺燕之家買咗支燕窩冬蟲夏草 ($23) 回家嘆下午茶，倒落杯飲，水汪汪無料嘅，飲落口就只像有少少甜的水咁:(，雖然瓶上的label寫著材料有水、冰糖、燕窩、松茸、北冬蟲夏草和冬蟲夏草，不知道後兩者有甚麼分別，但係是否真材實料，作為消費者，都不知道從何查究，唯有相信她的商譽吧了。…Read More

101231 星期五 | 路過恆香老餅家，買咗三個皮蛋酥和三個老婆餅回家嘆下午茶。皮蛋酥 ($5一個)，酥皮都幾鬆化，但餡料無咩皮蛋味，甜甜地，內裡只得一小塊好實的皮蛋，咬落好似食橡膠咁。老婆餅 ($5.5一個)，不愧是鎮店之寶，酥皮鬆化不在話下，餡料軟綿綿得來有少許煙煙韌韌，甜而不漏，一個好字:)。…Read More

101230 星期四 | 一直都想試試這家的烏冬，是晚上完最後一堂的夜課，便想到來這裡開餐了，差不多十點，還有幾位人客在進食，地方雖不算大，環境倒不錯，坐得幾舒服，打開餐牌，看見豬軟骨手打烏冬是人氣之選之一，於是就點了這個:)。坐定定，不多久，大大碗的湯麵就出現眼前了，豬軟骨跟麵條的分量，差不多是一半一半，心感滿意:)，好多時喺別家的食店都是餸少麵多，食到一半便變成齋食麵了。不過其實在這裡齋食烏冬也很不錯，手打的烏冬果然超好吃:)，質地軟滑，只要放在嘴邊，雪一聲便跑進口裡，好彈牙有口感，還滲透著湯的清甜味，實在不想那麼快便把它吃完呢。豬軟骨也值得一讚:)，腍得來有嚼頭，不覺鹹反而有少少甜，很入味，無怪乎豬軟骨手打烏冬是人氣之選，真想來多一碗，可惜只怪肚子容不下了。…Read More