白方包's Profile

今天叫了一個砂鍋西施豆腐，紙張菜單和網上菜單 都寫材料有嫩豆腐，青豆，蝦仁，韭黃。 上枱之後，發覺內裏有些深色物體，看清楚及嘗試之後，發個竟然是豬油渣。我們問服務員的時候，他的表情 告訴我，這個材料是一直都在這味餸的!豬油渣，對某些人來講，可以是美食，但對其他人， 不論從健康或者宗教角度，都是魔鬼。如果一個看來健康的餸有豬油渣，似乎食肆應該有責任寫清楚，等顧客可以作出正確選擇。更憂心的事， 不只有多少其他餸，內藏有豬油渣而未有寫清楚。。。…Read More

這間綠茶餐廳已經光顧了幾次， 都頗為滿意。上幾次坐的位置看到用來準備上菜的枱，也看見服務員準備食物時都很有條理，例如都會帶上新手套才剪燒雞。但今天坐的位置向另外一面，就見到些需要改善的地方。圖中通道旁位置本來有一架裝載已經洗好的碗碟車。食飯途中架車被推開了，清潔工就把已經洗好的碗碟放在地上算數，中間大約有十分鐘，很多服務員行過都沒有理會。在我舉機拍攝之後，才有人取走，相信是放回碗碟車上。之後，碗碟車被推回這個位置。但我又開始見到有人將用過的碗碟放在這車上最上格，而不是放到另一邊有架用來裝載食過碗碟的車。 似乎有些衛生流程都要留意下。另外，今次點了白菜仔，但賣相沒有以前好(不太新鮮)，而且是苦的。 希望可以留意一下。…Read More

今天叫了一個甜酸陳醋燴肉排飯，一盒飯一盒餸。 本身不過不失， 只係比想像中油咗啲， 一盒餸入面有排骨同菠蘿片。但係一打開之後，個心就沉咗一陣 ，因為見到一塊都幾大嘅膠袋片， 睇落應該係食材膠袋嚟，因為膠袋要剪開先倒到嘢出嚟，剪完之後就跌咗落啲食材嗰。 我個心諗，今日係膠袋片，聽日唔知係乜嘢。呢啲情況，只可以話，要靠每一位準備食材同食物嘅員工，都要以心比心做嘢， 做嘢唔好太求其， 唔好畀人哋食一啲你自己唔想食到嘅嘢。。。…Read More

這裡服務員態度很好，但可能訓練及經驗不足。 例如我們不小心倒瀉水，他們會幫忙抹抬，但不懂把 濕嘅布由枱邊拎走，而係把濕布由食物上方拎走，由得啲濕布水滴返喺食物上面。。。我們三人訂了枱，但可以比兩張唔同高度的細枱拼埋一齊畀我哋， 其中張摺枱勁輕 ，搞到我哋 一係跌筷子，一係倒瀉水， 最後連個碗都跌埋落地下。。。食物質素方面，以咁嘅接近大連鎖店價錢， 唔算合格。 以肉碎生菜包為例， 無論口感同味道，都唔似一個食過越南菜嘅人煑出來的，比較似茶餐廳味道。法包就係淋嘅，又係好似由一個從未食過越南法包的厨師做出來的。但係我見到呢間餐廳係非常之受有寵物嘅客人歡迎的。 永遠有主人同寵物喺度排隊， 走嘅時候聽到門口嗌:「兩個人，三隻寵物」入座。 相信有寵物嘅客人，如果可以同寵物一齊開心食飯，對食物要求唔會好似我哋咁高吧。…Read More

呢幾個禮拜，好多時喺一點鐘嚟到嘅時候，都話所有蒸飯賣曬， 跟住就一班排緊隊嘅人就調轉頭走。 都明知多人買，點解唔識得入多啲貨？目測大部份人喺選擇去其他地方買而唔係改買其他嘢。所以入少貨只會做唔到生意，而唔係賣到其他貨。。。…Read More

下午三點鐘去，叫了一個藍莓pancake。 食品質素就跟其他 Phi 一樣， 不過不失，沒問題。通常我下午茶都飲 coffee latte。 但今日實在太熱，所以叫了ice coffee latte 。朋友就叫了焦糖ice coffee latte。 兩杯來了之後就感到疑惑。雖然在網上查過 coffee latte 不一定有泡沫，但為什麼朋友的焦糖ice coffee latte 有泡沫，我的就沒有呢？我相信兩杯的分別就只是有沒有焦糖🤔。但以下兩點，就會令我不想再來。 如果話經營食肆， 吸引客源困難， 點解仲要取消下午茶餐 ？結帳時問過佢，話全線都取消了。另外就是叫了的 pancake，加了20蚊要多個雪糕 ，但估唔到係得一啖嗰種，性價比都相當低。…Read More

唉，啲人成日講要支持小店又話好有人情味。 但我一般嘅體驗係，呢啲摺埋嘅無論店舖或者食肆，都係冇招呼冇表情冇反應(有嘅就係身體語言叫你唔好煩我)。 當間店舖開始溶溶爛爛，衛生情況唔係咁光鮮時，招呼同人情味有時都可以救得返。 但如果你有得佢自生自滅，諗住成日做無回頭嘅遊客生意，可能唔係捱得好耐。。。講返食物，個包啲質地係好好嘅，外脆內軟。當然攞到返屋企已經凍曬。但係都唔係好明白點解唔畀個膠袋我( 前面買兩個自動有得畀膠袋，到我就唔畀，咁即係買得太少唔會有啦)。我其實係去之前都上網睇過，最初以為可以揀唔同嘅肉， 去到問佢嘅時候，佢就一輸嘴話唔知幾多種肉同埋啲菜都有( 其實聽唔到好清楚，但係唔敢再問)。 所以其實我而家食完都唔知有啲咩嘢用喺入面。。。…Read More

第一次試這間K11的韓燒，雖然是星期日，但中午仍有套餐。套餐有韓燒和韓式定食，兩者都會包前菜，紫菜飯和飲品。免費嘅飲品基本上就係罐裝汽水，加8蚊可以改為柚子茶或者蜜桃茶，加18蚊可以轉做特飲。目測店舖入面有四分一 地方是闢作韓燒的。星期日中午一時左右到達，基本上不用等位。入到舖頭之後，都尚見有空座。入門口嘅時候，有問我哋食韓燒定韓食。坐低咗喺韓燒區嘅時候都見有其他枱並非食韓燒的。我所認知嘅韓燒有兩種，就係有醃製同冇醃製。佢哋供應嘅中午套餐係冇醃製的。我就選擇了 148蚊全牛式套餐。有三種牛 : 牛腱 ，牛橫隔同霜降牛。根據menu 係每樣60 grams。我覺得冇醃製有個好處，在上枱嘅時候，質量同分量都可以一目了然。感覺上180 gams係應該比其他同一級價錢嘅燒烤份量係比較多少少嘅。前菜有四小碟，分別係芽菜，醃菜，酸蘿蔔同沙律醬蟹肉西蘭花。食完四碟之後問佢哋，原來係可以不斷添食的。雖然食過幾次韓燒，但係都係唔係好明白，點解有時係一塊鐵板，有時又係網燒。呢一間係基本上一塊鐵板嘅。牛肉旁邊有三舊類似牛油嘅物體 ，初時唔知道點煮，淨係放咗嚿牛喺塊鐵板上面燒，發現都好快熟，但就比較乾。調味方面，枱面就有雪花海鹽 ，原粒芥辣同 wasabi。食完第一塊之後，醒覺應該搽少少牛油先至煮，之後煮就好好啦。基本上 三種肉都有足夠嘅牛味，加少少鹽就已經可以好足夠。 當然煮得靚唔靚，就要靠自己道行同手勢。另外枱墊上面有教點樣煮，跟足就一定冇失手。感覺上呢個係非常之抵食嘅套餐，因為目測霜降牛嘅份量係肯定多過三分一。霜降牛本身，無論牛嘅味道同口感，都非常之好。對於我嚟講，唯一美中不足就係唔夠蔬菜，所以都叫咗兩三輪前菜嚟補足。服務方面亦都算係唔錯。雖然有個小插曲，坐低之後，侍應就畀咗張QR code我哋自助落單。所以落完單之後幾本menu仲喺枱面，過咗一陣侍應攞兩碟牛上嚟嘅時候，可能太忙嘅關係，就咁將其中一碟放喺幾本menu上面。我即刻請佢攞收走menu，佢都即刻做咗。之後問返同一個侍應啲前菜係咪可以再攞，佢都好樂意答同埋幫手，完全畀足服務。基本上今餐都係好滿意  。…Read More

疫情之後，通常午餐都係買外賣。喺屋企附近搵到呢間小店茶餐廳，外賣大件夾抵食。通常十次有七次，返去打開個發泡膠外賣盒嘅時候，啲飯餸係拱起咗，貼住咗個蓋嘅形狀。今次呢個豉椒牛河午餐，就畀咗個大嘅外賣盒。份量，質素同味道，都係值得再幫襯嘅。外賣仲有九折添。另外，感覺倒都係好有人情味嘅小店，唔係口黑面黑，淨係係道打工個嗰種。 呢啲少店茶餐廳，其實係要幫襯多啲嘅。如果唔係，可能買少見少， 最後冇著數嘅，都係街坊。…Read More

退休之後，冇得旅行 ，有人教我去摘星。 於是由米芝蓮三星開始食落去。 今日食到Amber午餐。 選擇咗 Amber extended experience， 即係四度菜。未講菜式之前，可以講下服務，當然係5星級酒店嘅服務，無械可擊。但有個小插曲 ，我哋早咗13分鐘到，唔畀入住，但會提示我哋去下洗手間 ，同有地方坐下，而且喺8分鐘之後，都畀我哋入去。正餐之前，當然有麵包，同兩款 amuse bouche前菜。麵包係熱嘅。 唔知amber嘅菜式係唔係法國南部多，所以麵包就只係畀法國南部嘅橄欖油。橄欖油嘅味係濃嘅，但感覺上好似冇三星意大利餐廳嘅香。麵包方面亦感覺比三星意大利餐廳簡單同冇咁香。第一款前菜應該係魚籽，好佩服其他寫食評嘅人，雖然侍應有詳細解釋每一道菜係乜嘢，但係聽完已經唔記得咗一半，食緊嘅時候再唔記得多一半。。。我淨係記得最底係菠菜汁，最頂係炸薯仔。但係呢個前菜係一流，配料同醬汁好味得嚟並無喧賓奪主(魚籽)，完全食到魚籽嘅味道。第二款珍寶珠，其實中間就係鵝肝，外面有 beetroot醬包住。 我唔係對鵝肝瘋狂嘅人，但係呢個無論分量同埋均衡嘅味道，都係一流。侍應有提醒，要 一啖食落去。但係之後記住要慢慢喺口裏面咀嚼，奇味無窮。之後第一道菜我揀咗yellowtail魚生，再加上青番茄塊。 呢個又係一流。 食呢啲餐嘅時候我成日唔知道 ，應該係逐個ingredient 食，定係一齊食。 呢碟因為份量夠 ，所以最初係逐件食，之後又撈埋啲鹹魚露一齊食。發現兩種食法，都各有滋味同驚喜。第二度菜，侍應提醒咗我哋，如果係文華會員，今期可以免費畀我哋升級其中一款菜式，於是我哋就揀咗 blue lobster。呢味又係一流，龍蝦相信應該係八成熟，脆卜卜。再加上一些 應該係醃製嘅日本蘿蔔，同埋魚子醬汁，又係奇味無窮。主菜我揀咗 pigeon 。侍應提醒，正常會係四成熟，提我如果接受唔到，可以轉七成熟。我向來對半生熟嘅都唔係好有興趣，所以都欣然接受咗提議。出嚟嘅時候，份量比想像中多，而且亦煮得非常之好 。有少少外脆內軟。伴菜除咗青豆之外，澱粉質方面亦都有用牛油煮嘅 類似risotto。最後甜品(其實唔係最後) ，我揀咗牛奶朱古力。實際上係parfait 上面有一個菊花，再上面係牛奶朱古力。侍應提醒，呢個要一羹包曬所有嘢食，味道同口感，亦都非常之好。話咗唔係最後，因為之後仲有咖啡。又要值得一讚既係， 呢度嘅 cappuccino 係咁多間餐廳飲過嘅，係拎到嚟加埋糖之後，仲係夠熱嘅。Petition four 方面，絕對係驚喜。因為絕對唔係petit。每一味都好似正餐飲咁大。有poppy seed的madeleine，朱古力，台灣水果同「 鴛鴦。其中鴛鴦基本上喺淡嘅咖啡再加淡嘅 Earl Grey 即時好似雞尾酒咁搖出嚟。而madeleine 就係啱啱焗起嘅。但係好可惜，當擺曬出嚟，再等佢表演搖鴛鴦之後，當我食嘅時候已經唔再熱。但係仍然係外脆內軟，淡淡幽香。總括而言，今次係非常滿意。食過咁多間星級餐廳，Amber絕對係每一味都有性格有驚喜。好可惜呢句說話未必係間間星級餐廳都可以咁講。以往有限嘅經驗之中，其他星級餐廳總會有一味半味有色有香但無味。但係Amber就可以做到，每一味都有自己嘅性格同色香味，廚師絕對有心。真係唔明白點解得兩粒星。。。…Read More