艾美奇神的個人專頁

每年的年夜飯，總喜歡到母校嘅飯堂開餐，一來泊車方便，二來又近維園年宵巿場，食完飯，行過去都唔需要三分鐘，非常方便，但最重要的，當然係大廚梁師傅嘅功夫了得，永遠都不會令我們失望，每逢大時大節，這裡都坐無虛席，但梁師傅嘅手勢，絕對無因此而走樣，並不會好似坊間嘅酒樓食肆，每逢做節的日子，食物水平又差，服務水準又差:(。記得讀書時期，寧願俾多兩蚊食街外飯盒，都唔想喺飯堂食lunch，因為當時嘅飯堂，提供嘅，係無選擇嘅三款餸，雖然白飯、例湯任裝，但最唔喜歡就係三款無選擇嘅餸放係同一隻不銹鋼碟上，味道大兜亂，好似食大鍋飯咁，所以寧願俾多兩蚊食快餐店嘅飯盒；反而近幾年，總喜歡走返母校嘅飯堂食飯:)，可以緬懷一吓「那些年」，當然開心，但最重要嘅，係換咗承辦商，由梁師傅主理，水準之高，相信不必在此重覆，眼見現在的學生午飯餐牌，亦比當年改良了很多，再不是一碟三餸的大鍋飯了，如今做QC仔真幸福:)。因為只招待舊生，所以廚房都不會儲備大量食材，莫說walk-in，就算即日訂枱，梁師傅都無法找到食材，所以一定要預早訂枱，而梁師傅通常都會於席前兩、三日親自致電確認booking及訂菜單，親力親為，非常有誠意；今日的菜單，只要求兩道特別喜愛的菜式，桂花蜜餞加拿大桶蠔和百花西汁釀油條蝦膠，其餘菜式，都交由梁師傅發板。先來的，是桂花蜜餞加拿大桶蠔，蠔非常肥美、大隻，本身炸得脆口，但內裡肉汁仍可保持，而且蠔味不薄，難得，而且桂花芡汁做得出色，甜美清香，豐郁怡人，食多隻都唔會覺得飽滯，反而更加開胃，而且墊底的洋蔥絲，亦非常惹味，加上桂花芡汁，更加令人食指大動。跟著，就係百花西汁釀油條蝦膠，這款菜，備受我們一家人歡迎，係必食之選；芡汁係甜酸醬汁，近似咕嚕肉嘅醬汁，甜酸度平均適中，不太甜，帶微酸，非常醒胃、好味，蝦膠爽口彈牙，釀入油條中，再混和甜酸醬汁上碟，比咕嚕肉好食得多，除此之外，仲有青、黃椒和蜜桃伴碟，醮上了甜酸汁，同樣美味好食。湯品係原盅烏雞燉響螺，湯料十足，梁師傅更加足十三隻雞腳，一來更加有雞味，二來亦人人有雞腳＂啜＂，非常細心；味道非常鮮甜，因沒有花膠、鯊魚骨等材料，所以沒有＂膠＂的感覺，卻另有一番清甜鮮味。再來的是鮮蟹粉豆腐豆苗，一大碟豆苗，上面鋪滿金黃色的蟹粉，中間仲夾雜著一粒粒橙色的蟹黃，非常吸引，亦盡顯梁師傅的闊綽，蟹粉味濃，加上豆苗嘅質感和豆腐嘅滑溜，絕對係一組唔錯嘅配搭，而且豆苗亦沒有多餘的油份，令我們可以放心品嚐到蟹粉真正嘅味道，正！跟著，係花菇生菜扣鵝掌，賣相已盡顯梁師傅的心機，生菜置底，大花菇置面，鵝掌則一隻疊一隻，圍著碟邊，非常美觀，絶不馬虎；先講份量，大花菇、大鵝掌，絕無欺場，份量十足；花菇炆得入味，入口煙靱、彈牙，絶對唔靱；鵝掌腍糯，肉質離骨，膠質豐溢；生菜亦嫩口，不會過老；加上濃郁嘅芡汁，非常好食，並不遜色於坊間嘅頂級食肆。清蒸海斑，雖然只係普通海斑一條，但份量十足，足有兩斤半以上，非常大條，火喉恰到好處，剛好離骨不黐肉，肉質嫩滑，鮮味十足，喺蒸魚方面，無論幾大條魚，梁師傅都永無失拖，令人佩服。再來的是椒鹽陳皮蝦，蝦是海中蝦，並非大花蝦，所以唔算好大隻:(，但肉身爽甜彈牙，而且處理得非常仔細，蝦腸固然去掉，連蝦腳、蝦鬚亦已剪掉，非常細心；未食，已聞到一陣陳皮嘅香味，入口，陳皮味反而不重，只有一陣輕輕的幽香，唔錯:)，加上椒鹽嘅咸香和微辣，非常香口、惹味:)。最後，是當紅炸子雞，簡單嘅一句說話，足以容易這隻雞，就是「皮脆肉嫩」，皮薄香脆，唔肥，皮肉分離，不拖泥帶水，食得安心，肉質嫩滑，雞味亦足，好食。單尾係糯米飯及蝦子伊麵，梁師傅的糯米飯一向足料，正因為太足料，我們往往都叫梁師傅輕手些，放少些潤腸，嘻嘻，因為潤腸味道比較重，往往都蓋過其他臘味嘅味道，所以我們都會叫梁師傅放少些潤腸；蛋絲、蔥花灑上糯米飯面，更能吊出糯米飯香，入口香，但唔油膩，夠乾身，但唔靱；至於蝦子伊麵，亦乾身，唔油膩，有咬感，彈牙好食:)，但略嫌蝦子味道唔夠香:(，如果加多些少蝦子，相信味道更佳。甜品當然係梁師傅拿手嘅生磨腰果露湯丸，這個糖水，湯丸只不過係小配角，主角當然係又香又滑嘅腰果露，確實非常香，非常滑，除了西環源記外，喺坊間，都幾難找到如此真材實料，又香又滑嘅糊狀糖水，而且唔太甜，唔會令人有一種甜到漏嘅滯感，連一向不太喜歡食糖水嘅二家姐都添食，可以想象到梁師傅嘅腰果露係何等吸引。今天嘅飯後果，係甜柑，而非平時的橙和西瓜，一人一個，大家都食得非常開心，埋單連酒水都只不過$3,200，平均每人才$246，非常抵食。…查看更多

貴為新加坡著名法國餐廳集團Les Amis旗下之餐廳，加上米芝蓮一星的推介（雖然我仍然不太相信米芝蓮之評分，尤其是中菜，哈哈），再加上Joel Robuchon的總廚（Sebastien Lepino） 之加盟， 實在找不到任何籍口，不來一試，趁今日係我倆結婚紀念日，專程前來品嚐一吓:)。位於灣仔永豐街，其實一轉彎，就係星街，絕對不難找到:)；偌大的落地玻璃，中間印有CEPAGE的字樣，一定不會走漏眼；門口更放置一棵十呎高嘅聖誕樹，非常觸目，佈置不會過多，但仍然感受到一股聖誕氣氛。全幢三層高，地下右手邊，為Cepage嘅酒窖兼wine bar，取名bar cepage，地方並不是很大，但只放置幾張sofa及coffee table，加上極高樓底，空間感非常:)；除了這個酒窖外，一樓仲有一個酒窖，size當然比較細，兩個酒窖合共藏酒八仟幾支，超過二仟四佰個品牌，嗰本wine list，應該話wine book先正確，足足有近百頁，品種之多，年份之久，堪稱一絕，只可惜今晚揸咗車，無緣一嚐美酒:(。喺左手邊，就有一部專lift，直上一樓及二樓，main dining hall設於一樓，仲有兩間VIP房，二樓則為一間比較大嘅VlP房及廚房，至於天台，則為露天茶座，非常骨子精緻。Lift門打開，眼前係一套紅色sofa，茶几上擺放了一個雪茄盒，入面存放嘅，亦係雪茄名牌Cohiba和Montecristo等，是一個悠閒嘅角落，飯後與三五知己呷一口雪茄，飮一杯紅酒，絕對是人生一大樂事。沿著窄窄嘅走廊向左走，有三張小圓枱，張張都倚旁著落地大玻璃，雖然窗外並非無敵海景，但亦有一種舒服嘅感覺，再行前兩步，就係一樓嘅細酒窖，相比地下嘅酒窖，當然細了一截，但當中嘅兩幅牆，用上厚玻璃間牆，讓客人坐在dining hall，都可以欣賞到酒窖內嘅狀況，感受到酒窖嘅氣氛，觀感上亦大大減少了壓迫感:)。Dining hall嘅地方雖然唔算大，但只擺放六、七張枱，加上極高樓底，空間感十足，貴為一星級法國餐廳，空間上嘅安排，尚算合格；對著走廊嘅牆身，掛著一幅大油畫，不知作者是誰，但整幅畫呈藍色，一張烈燄紅唇，份外突出，作者更刻意唔畫一對眼睛，讓大家有更多嘅想象空間，紅唇下則有一撇水漬，令人覺得有一種delicious嘅感覺，真係「食到漏口水」咁。至於menu方面，唔計a la carte，有三個sets可以選擇，分別係$680嘅四道菜，$1,070嘅六道菜和$1,680嘅八道菜；$1,680嘅menu當然最精彩，當中最吸引嘅，當然係《black diamond》in parmesan bouillon, chives and veal ravioli啦，相信所謂《black diamond》，應該係指黑松露箘；至於$680嘅menu則比較失色，菜色無甚特別；至於$1,070嘅menu，有兩個前菜與$1,680相同，而且大部份菜色亦都有黑松露菌和魚子醬，都頗吸引，main course則有amadai (金鯛魚)和quail (鵪鶉)選擇；其實$1,070嘅menu最抵食，但我倆今晚又想食牛，正當我倆猶豫之際，服務員好像看穿了我們的心事，向我倆解釋嗰main course可以轉其他食材，最重要嘅係唔需要加錢，嘻嘻，我倆便決定選擇$1,070嘅menu，當然要求將嗰main course轉為和牛啦，再加一客西班牙黑毛豬風乾火腿，便是我倆今晚的晚餐:)。Cepage嘅風乾火腿，喺採用西班牙名牌Joselito嘅黑毛豬，經過48個月風乾，屬上品，$250一客，約25 grams，有六至八小片，呈紅色（總覺得48個月的風乾火腿應呈深紅色，但這幾片的顏色並不太深紅:(），帶光澤，雖然這幾片火腿的油脂分佈並不好看（油脂分佈不均，偏於一邊），但入口仍然非常甘香、潤滑，橡果味濃，確實係風乾火腿中嘅極品，當你品嚐過黑毛豬風乾火腿後，相信再不會對普通白豬火腿感興趣；有別於一般餐廳嘅配搭，隨風乾火腿奉上的，並不是蜜瓜，而是多士和鮮蕃茄粒，多士帶少少酸味，脆脆地，但個人還是喜歡配甜蜜瓜多一些；Cepage似乎對呢隻Joselito黑毛豬風乾火腿充滿信心，原隻擺放在dining hall中間，當客人點風乾火腿時，服務員就會即時片出來奉上，完全冇打算將隻火腿包裝存放起來，若非多人點食，餐廳又豈會讓一隻過萬元嘅黑毛豬風乾火腿大大方方地展現於人前，事實上，就我哋所見，當晚至少有一半客人都有點這個風乾火腿。第一道菜，喺Scallops maki with black truffle from Perigord，看一看嗰造型，絕對相信佢喺帶子壽司卷，仲連同壽司豉油和筷子一起奉上，但係就欠缺了wasabi，賣相非常精緻:)；但服務員向我倆講，壽司卷入面白色嘅食材，並非飯粒，係由西芹切碎再搓成，而黑色包著嘅皮，亦非紫菜，係由黑松露菌做的，至於嗰碟亦非豉油，係用黑松露菌做的醬汁；聽完服務員嘅講解，我倆目瞪口呆，完全無諗過大廚可以將黑松露菌舞弄得咁出神入化；一啖食入口，帶子味鮮:)，西芹爽甜:)，但最吸引的，係嗰種黑松露菌獨特嘅味道，味濃郁，非常香，與帶子嘅鮮味非常匹配，好好食，只可惜每人只有兩小卷:(。第二道菜，喺Caviar on cold angel hair，賣相吸引，一小撮天使麵放喺底，上面放了一羮魚子醬，仲有一小片金萡作裝飾，再加上黑松露菌吊味，呢一碟天使麵，真係非常矜貴:)；麵質尚算彈牙，魚子醬顏色呈啡黑色，可能燈光較暗，看不出光澤，味道帶鹹鮮兼持久，而且粒粒鮮明，相信係中上貨色，雖非伊朗產品，但應是俄羅斯Osetra Caviar，與Joel Robuchon同一品種；黑松露箘味道雖特出，但因份量不多，所以並無喧賓奪主嘅感覺，整體上嘅感覺頗特別，有驚喜；天使麵只不過係配角，主角當然係魚子醬，黑松露菌與魚子醬之間，雖然稱不上絶配，但就擦出另一種火花，的確特別。第三道菜，喺Langoustine ravioli on parmesan sauce with black truffle，與頭兩道菜相比，這道小龍蝦意大利雲呑，好似唔夠吸引，比較普通:(，縱有一片海膽置於雲呑頂及四週佈滿黑松露菌，亦難突顯其特色:(；醮了些parmesan sauce，咬了一口，才發覺這道菜之特色，原來源於這個parmesan sauce，非常濃郁嘅巴馬芝士味道，濃而不膩，非常幼滑，這個sauce的確煮得好，與一般灑上食物表面或經焗爐焗溶了的芝士，不可同日而喻，與黑松露菌嘅味道亦合襯，相得益彰，服務員更誇口話此parmesan sauce為水準之作，很多客人都要求配襯此sauce。第四道菜，喺Artichoke soup with petals of black truffle，「petals of black truffle」，聽到非常吸引，之前的幾道菜式，雖然都有黑松露菌，但都只能淺嘗其味，頂多都是幾條黑松露菌絲，如今，有petals of black truffle，當然相當期待；可惜，上枱時，只見幾條黑松露菌絲散佈在一小碗忌廉湯上，相當失望:(，並非menu所寫的petals，可能是我對petals嘅解釋有誤呱，哈哈；事實上，這個亞枝竹忌廉湯的質素亦非突出，稀杰程度尚可，顏色呈墨綠色，比一般嘅亞枝竹忌廉湯深色，但香味稍薄，而且食不到黑松露菌味道，比之前的菜式稍遜:(。第五道菜，喺今晚嘅主菜，Grilled Wagyu，份量唔多，估計只有兩安士份量左右:(， 不過係唔需要補錢嘅情況下，可以轉食和牛，我覺得ok啦:)；唔肯定係日本和牛，還是澳洲和牛，但牛肉味濃，肉汁豐富，油脂雖不及頂級水準，但亦豐腴，入口嫩滑，唔靱唔嚡，好食:)；至於配菜方面，比較簡單，只有露荀和蘿蔔。最後一道菜，喺甜品，Malaga wild strawberries on rice pudding and milk jam，這個西班牙野生士多啤梨，細細粒，而且比較扁身，並非豐滿圓形嗰種，而且顏色偏淡，及不上日本或美國士多啤梨的鮮紅，但味道唔差，甜且鮮:)，加上rice pudding and milk jam，更加香甜、滑溜:)，比一般嘅cream好得多；而且Cepage更加將一張野生士多啤梨嘅相過膠，跟隨甜品一同上枱，頗細心；而最窩心嘅，喺嗰塊寫上「Happy Anniversary」嘅朱古力牌，見到太太嘅笑容，是由心底裡發出來的。縱使現今科技發達，數碼相機隨處可見，但服務員仍然手持一部即影即有，為我倆拍下這一刻，更付上一張心意咭，上面寫著「We do not remember days; we remember moments. Your special moments, are ours too.」非常體貼、細心。喺奉上咖啡前，服務員端上Petits Fours，講不上好豐富，但都有六、七款選擇，我哋挑選咗曲奇餅和棉花糖，服務員強烈推介cannele，所以我哋都揀了一顆，但外層頗硬，完全唔脆，內裡亦不討好:(；至於曲奇餅和棉花糖，亦只是一般水準，沒有驚喜:(；咖啡尚算香濃，但亦非極品，始終都只不過是餐後咖啡，本應無甚要求，但以一間米芝蓮一星嘅法國餐廳來說，相信可以做得更好。今晩雖然是一頓法國餐，但感覺上又好似食日本菜，因為大部份菜式嘅造型和擺設都充滿日本風味，最驚喜的，就係幾乎每道菜都有黑松露菌，非常吸引。整體上來說，今晚是歡愉的一餐，兩位合共$2,700，即平均每人$1,350，價錢唔平，但亦算合理，尤其是服務水準，專業之餘，亦不失一份親切感，每位服務員都溫文有禮，笑容滿面，亦非常主動和樂意協助客人，每一道菜都主動地解釋清楚，並不馬虎，與客人亦保持一定溝通，令客人有賓至如歸的感覺，但又不會覺得佢哋太長氣，太多說話，實在難得，今晚並非一頓嚴肅的法國餐，是一頓輕鬆、親和的法國餐。…查看更多

銅鑼灣登龍街新翠華嘅炭燒煲仔飯，早已聞名，可惜一直都未有機會嚐試:(；至於北角渣華道市政大樓嘅新翠華，聽好友講，水準一般，樓面伙計雖與登龍街一樣，但聽聞廚房嘅主理人並非登龍街嘅明哥，所以一直都提不起興趣；今天，好友專程叫埋我去筲箕灣東大街嘅新翠華試菜，終於有機會一嚐明哥嘅手勢。雖然新翠華嘅地址喺筲箕灣東大街40A東興大廈地舖，但實際位置並唔喺東大街入面，如果你身處東大街中間嘅天后廟，只要背著天后廟向前行，穿過一個公園仔後，左手邊就係新翠華；如果你搭港鐵，就更加簡單，喺筲箕灣站B2出口，上咗地面後，再向前行兩、三個舖位就到，並唔難搵。眼見新翠華招牌上嘅「華」字，貼有一張紅紙，本以為此店剛開業不久，及後聽明哥講，原來此店已經開業差不多一年，登龍街店於2010年年中結業後，於同年年尾，明哥就喺筲箕灣東大街開咗此店，繼續其煲仔飯生涯，正如舖面所寫「煲仔飯返嚟啦」；至於點解個「華」字會貼上紅紙呢？原來新翠華收到翠華嘅律師信，要求改名，因其名稱類同，有盜用或影射之嫌，明哥為免麻煩，所以決定改名為「新翠雅」；其實新翠華與翠華都存在了一段長時間，正所謂「河水不犯井水」，大家各有各做，但為何時至今日，大財團就要欺壓小老闆，迫令其改名，否則將告其侵權，是否有錢嘅，就可以欺壓無錢嘅，又或是「可以共患難，唔可以共富貴」呢:(？講返今晚嘅菜色，全權交由好友發板；先來嘅係胡椒豬肚花甲（$78），當伙計奉上枱時，已有一陣濃烈嘅胡椒味，相當吸引:)，雖然賣相普通，但鍋內食材都頗豐富，湯底呈奶白色，呷了一口，除了胡椒嘅辣味外，仲有少少酸味，無錯，係酸菜嘅味道，大辣中帶少酸，胡椒辣味雖濃，但絕無蓋過酸菜嘅酸味，份量調配恰當:)；豬肚與花甲份量適中，豬肚爽而不靱:)，只可惜花甲偏細，唔夠咬口:(，若能用上大隻些嘅花甲，相信更能增加湯嘅鮮味；湯底仲有粉絲，盡吸湯嘅精華，唔錯:)；因今晚天氣頗冷，用不銹鋼煲上枱，所以好快就涼了，湯唔夠熱，就唔好飲，若轉用砂鍋或加個爐頭座熱，相信會更加滋味。鐵板八爪魚（$78），顧名思義，當然係用鐵板上，上枱時，熱騰騰，灑灑聲，烽煙四起，火喉十足:)，一大碟八爪魚夾雜著洋蔥和青蔥，頗惹味，急不及待，夾了一口八爪魚，咦，好似比較靱，再夾多一件試真d，都係靱:(，我哋相信八爪魚應該煮得過火，所以太靱，反而洋蔥和青蔥則沒有過火的情況，夠惹味，非常吸引:)。跟著，就來香辣雞煲（$100半隻），呢個雞煲就有爐頭跟上，老闆娘仲親自為我哋奉上，叫我哋唔好打開煲蓋，轉頭會幫我哋「翻一翻」，並強調此雞煲不需加水烹調，烹熟後，自然會有汁擠出來；轉過頭，老闆娘就過來為我哋「翻一翻」，一打開煲蓋，一片青綠，亦聞到一陣青蔥味，隱約中亦聞到一陣辣香，不過並唔強烈，老闆娘拿起筷子，翻了一翻，辣味頓然蜂擁出來，非常吸引惹味，老闆娘再次將煲蓋蓋上，叮囑我哋等多兩分鐘才可食；我哋一邊傾，一邊等，不經不覺，過咗兩分鐘都唔知，老闆娘見我哋仲未打開煲蓋，專程走來看過究竟，煲蓋打開，果然非常惹味，一陣濃烈嘅辣香，隨著熱氣湧出，見煲底的確有d汁，唔覺得太乾身；夾了一件，入口惹味，除了辣味外，仲有一點沙嗲味，夠香口，只可惜雞肉唔夠滑，有些嚡:(，可能剛才焗得太耐所致:(；因為我哋選擇少辣，所以明哥刻意加多些沙茶醬，我個人覺得唔錯，幾香口惹味，但同行友人則比較喜歡原本嘅辣味，相信會比較爽勁，可以食到真正辣雞煲嘅風味。今晚嘅主角出場啦，一個係新出品，南瓜墨魚餅飯，另一個係最傳統嘅鴛鴦腸飯；伙計先後放低兩個煲，打開蓋後，淋上明哥秘制黑醬油，再蓋上煲蓋，焗多兩分鐘就食得，今次我哋睇準時間，搭正兩分鐘就打開煲蓋，避免「過火」情況再次發生；明哥秘制嘅黑醬油，呈深黑色，比一般嘅豉油杰身，鹹度適中，微甜，與煲仔飯非常匹配；至於米，係採用青靈芝泰國香米，明哥話多年來都係向同一米商訂米，曾經試過向其他米商訂米，就算係同一牌子，但始終都不及原本嗰間米商交來的香軟，呢一份係明哥嘅堅持:)；新翠華嘅煲仔飯，另一特色，當然係炭燒，意思係以瓦煲盛米，再以炭爐將生米煮成熟飯，瓦煲嘅特點在於煲面多氣孔，受熱均勻兼通氣，加上炭爐嘅炭火，令煲內嘅白飯，加添一份炭燒味，至於飯焦嘅效果，則要視乎師傅嘅功力啦。先試鴛鴦腸飯（$50），潤腸、臘腸各三條，幾乎把整個煲面遮著，哈哈，新翠華嘅臘腸和潤腸，均非自家制，但絕非一般貨色，兩者都是粗身短少，不油膩但極香，有嚼頭但唔靱，好食；至於飯身，夠乾身，夠飯香，粒粒分明，加上臘腸嘅油份和秘制醬油，令飯更香、更滑，非常好食。至於南瓜墨魚餅飯（$55），係明哥今年嘅新作，聽聞明哥不時都會諗些新菜色，令食客百吃不厭，呢一份創新嘅心思，實在令人欣賞，值得嘉許；今年除咗南瓜墨魚餅飯之外，仲有上海黃鱔飯，但我哋人今晚人數唔多，所以只試食南瓜墨魚餅飯；相比之下，南瓜墨魚餅飯嘅飯身唔夠乾，連飯香都有所不及:(，相信是缺少了臘腸嘅油香的關係，至於乾身嘅問題，好友相信是由於墨魚餅本身有水份，所以於燒飯過程中，令煲內水份增加，所以影響了飯粒嘅乾身程度，若果可以加長些少燒飯時間，相信必定有所改善:)；至於墨魚餅，明顯地見到白中帶黃，但南瓜味側欠奉，而且唔夠彈牙:(，未知是否加了南瓜蓉的關係，令原本應該彈牙嘅墨魚餅欠缺應有的彈性，咬感不足，頗失色:(。兩煲飯，高下立見，不消五分鐘，鴛鴦腸飯已給我哋四人一掃而空，飯焦更加是兵家必爭之地，由於是炭爐瓦煲煮的關係，飯焦擁有一種獨特的炭燒味，加上明哥功夫了得，令飯焦焦而不燶，入口香而不苦，醮上明哥嘅秘制醬油，簡直係極品。最後，明哥送上嘅，並唔係什麼甜品，反而係一碟黃金涼瓜，我哋四人，八目交投，大家都未敢輕舉妄動，只因大家都已有八成飽，望著一碟炸物，大家又豈會食指大動:(；傾吓，坐吓，又傾吓，終於有人夾起一件涼瓜，吃了一口，「好食喎」，突然間，大家都被這一句「好食喎」吸引，每人夾了一件，戰戰兢兢地放入自己的嘴巴裡，果然好食，入口並唔油膩，亦沒有苦澀味，仲非常香口，涼瓜相信係泰國涼瓜，所以並唔覺苦，帶有少少甘味，明哥用牛油推開鹹蛋黃，再落鍋炸香，外脆內軟，鹹蛋黃嘅外皮，微鹹、香口，入面嘅涼瓜唔太稔，有咬感，少少爽，的確好食，有點似食天婦羅青瓜嘅咬感，分別只在於前者是醮鹹蛋黃，而後者則醮炸漿；一件又一件，大家由當初你眼望我眼，至今食過不停，足以證明此碟小食確實吸引好食，絕對值得推介。我哋四人與明哥和老闆娘邊食邊傾，不經不覺已坐咗兩個鐘，向明哥和老闆娘謝過後，我們亦告別離去:)；席間，見不少客人都係熟客，明哥和老闆娘亦忙於招呼，可想而知，新翠華嘅水準應有一定水平:)。今晚最大的驚喜，就是黃金涼瓜，至於煲仔飯，尤其是鴛鴦腸飯，亦有一定水準，友人更謂絕對不遜色於登龍街時:)，而且價錢相宜，大部份煲仔飯都只賣$50，最貴的，都只是$65，其他小菜亦大部份索價$50一碟，海鮮類則索價$68至$78，平均每人消費應不會超過$100，經濟實惠。…查看更多

聞名而久的香港大學校友會，一直都未有機會品嚐，今日係搞手嘅悉心安排下，終於有機會一試。準時八點鐘，到達中環德己笠街，同時亦攜同一份小禮物，準備交換禮物之用。電梯門一打開，已見很多食友已經入座，我跟隨大隊，放下禮物後，亦快快入座，以免耽誤大家時間。地方唔算好大，呈L形，但足夠延開十席，相信搞手今晚應該已包下全場。先看看今晚的菜單，連糖水，足有十道菜之多，非常豐富；餐具並非金雕玉砌，反而是非常平實的白瓷器，只簡簡單單地加上港大logo和一條綠缐及黃線，充滿港英政府時代的色彩。第一道菜，係鳯尾蝦多士，賣相唔錯，金黃色，中間加上一點紅（雲腿）和一點綠（芫茜），倍見心思:)，夠乾身，唔油膩，原隻蝦肉加上少量蝦膠緊貼在薄薄的麵飽上炸脆，比例恰當，入口香脆，多士脆口鬆化，蝦肉、蝦膠彈牙爽口，好食。第二道菜，係杏汁白肺湯，湯呈奶白色，杏汁香味撲鼻，湯料亦十足，除了白菜、豬肺外，還有紅棗、南北杏、陳皮等，喝了一口，香滑怡人，並沒有一粒粒嘅粗糙感覺:)，只可惜陳皮味略重，有些少宣賓奪主嘅感覺:(；純以質素而言，與陸羽相比，當然略遜一籌，但若加上價錢嘅因素考慮，港大校友會絕對超值抵飲:)。第三道菜，係椒鹽鮮魷，夠鹹唔夠辣，略有所失:(，但用料新鮮，鮮魷咬落爽口，而且切得比坊間細件，一口一件，方便入口:)，但略嫌脆皮不夠酥脆:(，未知是脆漿問題，還是功夫問題，感覺一般。第四道菜，係蝦醬啫啫唐生菜煲，原隻砂鍋上枱，但唔夠火喉，上枱時，完全感受唔到砂鍋嘅熱力:(，冇煙:(，冇灑灑聲:(，可以話冇聲冇色地上咗枱都唔知，而且份量其少，每人只得一小撮，其實菜又唔係貴，唔明校友會為何不替我們加大；菜尚算嫩綠，雖然望落唔覺得熱，但入口仍熱騰騰:)，而且蝦醬味濃，味道尚可，但汁太多，令菜身偏腍帶膩:(，其實只要砂鍋夠熱，汁自然地會揮發，就唔會呈現太多汁嘅情況，而且香味會更突出，亦同時間有煙有聲，相信整碟菜都會生色不少。第五道菜，係古法鹽焗雞，皮呈褐色，肉質嫩滑:)，鹹味適中:)，唔錯，雖無炸子雞之脆皮咬感，但亦夠惹味，夠鹹香，夠嫩滑，與坊間一般白色嘅鹽焗雞相比，簡直係天淵之別，確實係名菜之一。第六道菜，係菠蘿咕嚕肉，橙紅色，頗吸引，仲有青椒、菠蘿伴碟，賣相不錯:)，而且醬汁份量恰到好處，稀杰程度適當，均勻地掛在每一塊肉上:)，並沒有多餘醬汁留在碟上，影響賣相之餘，又影響味道，味道則取中庸之道:)，唔過酸，亦不太甜，肉當然係脢頭，炸功一流，有咬感之餘，尚保存肉汁，好。第七道菜，係羊腩煲，雖然無連石油氣爐上枱，但都夠熱，份量唔算多，但亦足夠一枱十二人食用，羊腩炆得不錯，唔太腍，有咬感:)，可惜醬汁太杰:(，而且欠缺羊肉應有的羶味，有點兒失望:(。第八道菜，係臘味煲仔飯，原煲蒸熟後，待應先將臘肉、潤腸和臘腸搯起切件，盛載於另一碟上，再為各人搯飯；可能臘味味濃，覺得飯香不足，不過水份控制得怡，不太硬亦不太軟，ok啦:)；至於臘味，香味十足，有嚼頭之餘，又不會過份靱，絕非劣質臘味。第九道菜，係生炒臘味糯米飯，饀料豐富，臘味、蝦米切碎，香味濃郁，蛋花亦是切碎混入糯米飯內，並非鋪於飯面的蛋絲，只可惜整體上唔夠乾身:(，雖然未至於一嚿嚿，但始終比較失色:(。第十道菜，係甜品，蛋白杏仁茶，杏仁味香，不會過份濃，亦不太甜，ok，當中加了蛋白，增加了質感，但質地有點杰，個人比較喜歡稀，對女仕而言，絕對係養顏滋潤佳品。不經不覺，已嚐盡今晚十道美食，當中以鳯尾蝦多士、古法鹽焗雞及菠蘿咕嚕肉最為欣賞，不過以每位$210來計算，的確非常超值，若非搞手的一番心機和功夫，又豈能以此超值價錢嚐盡如此美食，不得不在此再次多謝搞手的安排:)。…查看更多

今日路過元朗鳳群街，見到一個大招牌，上面寫著「火鍋料理」，又寫著「新張期內九折」，我哋就膽粗粗，走上去試吓。行到招牌下面，才知道呢間新開嘅火鍋店，叫「優豪方」，中文名就冇咩特別，英文名叫YOHO FONG，原來係食YOHO TOWN嗰名，哈哈，又幾有噱頭，其實佢嘅位置同YOHO TOWN又真係幾近，徒步行過去，都唔駛三分鐘，快過淥杯麵。優豪方有一個獨立樓梯出入，大量射燈和光管，照射在兩邊白色嘅牆身上，非常光猛，牆身刻意造成凹凸粗糙表面，地下則鋪上深啡色木紋地磗，再加上少量生鐵雕花裝飾，有一份優雅嘅感覺；再行入d，就會見到一幅大油畫和一盞大吊燈，吊燈喺三層二十一頭，可以想象到樓梯喺何等闊落，樓底喺何等高。上咗樓梯轉右，就係優豪方所在，感覺與剛剛條樓梯截然不同，一室深啡色裝潢，天花掛滿不同大細嘅吊燈，除咗廚房及魚缸位置外，全店都是採用黃色燈光，氣氛頗有情調，與樓梯的光猛白色截然不同；而且優豪方用上大量卡位，只有中間幾張圓枱，不論卡位梳化，還是餐櫈，都採用深啡色彷皮窩釘款式，非常歐洲風格，加上牆身上的掛畫裝飾，有如置身西餐廳，而非火鍋店。湯底選擇不少，特色鍋底有象拔蚌、青班、豬骨、花甲魚頭、花膠魚肚、陳皮老鴨、花雕醉雞、麻辣雞或海鮮等等，索價由$108至$198不等，至於普通鍋底，有清湯、芫茜皮蛋、粟米、蕃茄薯仔、沙嗲、豬肚等等，索價由$48至$68，另加$10則可選擇雙拼；至於麻辣湯底，亦可選擇大、中、小辣。我當然選擇花膠魚肚雞鍋啦，湯呈奶白色，相信是豬骨湯底，非清雞湯底，與樓下的名人火鍋不同，湯料亦較名人豐富，除咗魚肚和雞件外，仲有豬筒骨、豬手仔、煲得極腍的雞腳、粟米和紅蘿蔔，雞件則另碟上，足有半隻雞之多，至於花膠，哈哈:(，幾經辛苦，才搯到一小件，係細細隻嘅花膠筒，相信份量唔多；湯料雖豐富，但味道並不濃郁，亦唔覺膠，普普通通，我則比較喜歡名人嘅湯底多一點:(。但優豪方有一點做得比較細心，就係加多一塊不銹鋼墊，放喺鍋底，避免湯料黐底，抵讚；至於隔油舀就更加係必備之一。醤料嘅選擇，一盤放下，有九個膠杯，滿以為有九個選擇之多，原來生蒜和辣椒絲喺重履嘅:(，所以只係得七種醬料，除咗生蒜和辣椒絲外，仲有熟蒜、蔥花、芫茜、沙茶醬和花生醬，我至愛嘅XO醬和麻油都欠奉，比較失望:(，而且醬料每位需$10，以這樣的選擇，覺得有點不值:(。火鍋配料嘅選擇不少，亦有海鮮可以選擇，不過今晚只得一條紅瓜子，索價需七佰多，而且今晚我哋只得兩人，所以冇揀紅瓜子，至於青班，亦非我所好，所以只點了半碟生魚片；牛肉方面，我哋點了特選和牛拼盤，雖然索價$468，但可一次過品嚐四款牛肉，所以我哋都忍痛叫了一客；另外再點了兩碟丸，一碟蝦丸拼墨魚丸和一碟土魷豬肉丸，再加上鍋內的雞件、豬骨和粟米，相信我哋兩個人都未必食得哂。和牛拼盤，賣相非常精緻，用上兩層嘅不銹鋼茶點碟，用紫色生菜墊底，再將四式肥牛放上去，非常西化，與裝修環境非常相襯；放於上層嘅，喺美國安格斯肥牛，一眼望落去，白色多過紅色，的確係肥牛，哈哈哈，灼一灼，入口果然肥美，油脂十足，但不覺膩，牛味唔重，ok；下層則有澳洲M4和牛、本地手切肥牛和牛肩胛肥牛，先嚐澳洲M4和牛，雪花均勻，紅白有序，賣相已攞滿分，入口不及美國安格斯肥郁，但牛味稍濃且滑，唔錯:)，但索價$188一碟，唔知份量有幾多，而美國安格斯肥牛則為$158一碟，細size更只需$108，相比之下，美國安格斯比較抵食；至於本地手切肥牛，味道最濃郁:)，價錢亦最貴:(，大嘅$238，細嘅$168，唔多抵；牛肩胛就最平，大嘅$128，細嘅$88，牛味當然不及另外三款，油脂亦不及美國安格斯及澳洲M4，但唔韌，唔騷，可以一嚐:)；試勻四款牛肉，始終都覺得美國安格斯肥牛最抵食，而且事後諗吓，呢個和牛拼盤索價$468，其實都唔平，若果叫齊四款牛肉（只叫細碟），都只需$552，但份量相信會比拼盤多，笨咗添:(！至於生魚片，份量唔少，雖然厚切，但都有十多片，大大片，新鮮，爽口，甜美，魚皮更是煙韌彈牙，魚頭魚尾亦有跟隨上碟，絶無欺場，$68一碟非常抵。蝦丸、墨魚丸皆是手打，兩者味道皆偏淡，而且打得唔太膠，咬感略削:(，唔夠彈牙:(，老闆卻說這是因應客人要求，因為有些客人比較喜歡散身，唔喜歡太實，但我個人則比較喜歡彈牙:(，不過優豪方嘅蝦丸和墨魚丸都混入了馬蹄粒，食落有d爽口，索索聲，增加咬感，幾好:)。土魷豬肉丸，丸身一樣唔夠彈牙，但比蝦丸和墨魚丸好少少，豬肉新鮮，土魷味濃，有嚼頭，但唔會過份韌，唔錯:)，但印象中，似乎名人嘅土魷豬肉丸比較出色:(。至於湯底食材，豬筒骨最正，確實喺筒骨，非一般嘅豬骨，夠粗夠大，內裡骨髓自然多，絶對喺極品；粟米亦非常鮮甜:)；但雞件雖多，但雞味欠奉，已且唔夠滑，比較失望:(。埋單折實$860，每人$430，所謂九折，其實是加一後再九折，簡單而言，就等同免加一，似乎比名人火鍋貴，但主要是由於碟和牛拼盤比較貴，否則每人約$300已可食得飽飽:)。…查看更多

點一龍分店，終於開幕了，位於荃灣如心廣場一樓，面積比尖沙咀店細少許，樓底亦不及尖沙咀店高:(，雖然沿用同一系列的裝修及餐具枱櫈，但氣派的確及不上尖沙咀店，而且欠缺了大紅燈籠，與一般點心店無大分別，未能突顯點一龍嘅氣勢:(。一入門口，左手邊係廚房，右手邊係用餐區，用餐區中間又有一道矮牆，分隔開前後兩部份，每部份都擺咗十張枱左右，分別只在於前半部貼近櫥窗，與商場走廊貼近，比較開揚:)，而後半部則有一道矮牆相隔，比較隱蔽:)。裝修與尖沙咀店同一風格，簡約時尚，牆身貼滿淺木色圍身，中間藏著幾部電視，天花亦沿用六角形設計；枱櫈亦是同一系列，擺位上亦算寬敞，毫無半點壓迫狹窄感覺:)；餐具擺設亦與尖沙咀店無異，辣椒醬、豉油、胡椒粉及牙籤，都精緻地擺放喺白色嘅器皿上，上面清楚印明各種醬料嘅名稱，中英對照，非常清楚:)；唯一分別，就是餐牌，第一，這裡的選擇大致上與尖沙咀店差不多，但我發覺這裡沒有木瓜杏汁糕（因為我喜歡食，才發覺這裡冇提供）:(；第二，這裡沒有套餐供應:(；第三，招牌菜，雪影飽冇優惠，每兩個$20或$22，沒有買六個送兩個嘅優惠（執筆時，並沒有查証尖沙咀店是否繼續提供此優惠）；第四，尖沙咀嘅餐牌，係中、英、日三文對照，但這裡的餐牌則只有中英文對照。以一間新開嘅食肆，仲要開喺如心廣場咁「旺」嘅地方，連一向提供開嘅優惠都冇，的確幾難做，anyway，既來之，則安之，今日就一試究竟。茶位一樣係$4一位，與尖沙咀店一樣，服務員會手持暖水壺幫客人斟茶，並沒有茶壺提供:(；服務員話呢d喺鐵觀音，但對唔住，我飲唔出:(，茶色偏深，並非一般鐵觀音嘅金黃色，味道薄，莫講餘香欠奉，連基本茶香亦不足:(，其實據我所知，好多點心舖都冇收茶錢，如要收茶錢，就應提供一些質素較佳的茶葉。雪影叉燒飽，原以為要等最後先到（因為餐牌上寫明需時20分鐘），豈料最早登場，唔知是否預早已經準備好，但上枱時仍然熱烘烘:)，與尖沙咀店無異，飽皮帶微甜，軟熟，唔厚身，至於叉燒饀料，夠味，份量亦似乎比尖沙咀店多，好食。跟著係馬拉糕，深褐色，比一般嘅馬拉糕深色，味道偏淡，不太甜，糕身太鬆散，冇軟熟嘅咬感:(，與尖沙咀店同出一轍，不推薦:(。叉燒腸，皮唔夠薄:(，及不上尖沙咀店，但饀料十足，夠惹味:)，可惜剁得唔夠碎，若然可以將叉燒剁得幼細一點，咬口會更好。黑松露鮮蝦燒賣，一籠一粒，非常精緻，亦予人非常矝貴的感覺，一上枱，已經聞到一陣黑松露嘅香味，雖然唔太濃烈，但已足夠令人垂涎，喺黑松露與燒賣中間，更置有一隻蝦，蝦肉爽口，亦令整粒燒賣嘅蝦味提升，與黑松露嘅味道合襯，反而豬肉嘅味道相形見絀，被蝦嘅鮮味與黑松露嘅香味所掩蓋，但保持豬肉嘅彈牙咬感:)。棉花雞，味道與尖沙咀店相近，一樣以花雕與紅棗調味，但賣相則差一截:(，第一，尖沙咀店嘅棉花雞，每碟都有半粒紅棗置於碟中，予人真材實料嘅感覺，但這裡只有紅棗味，不見紅棗影蹤:(；第二，尖沙咀店嘅魚肚墊底，雞件置面，好讓魚肚盡吸食材精華，但這裡則「求其」將魚肚及雞件放上碟上蒸，完全忽略個中真諦。百花蘿蔔糕，就是將蝦膠鋪係蘿蔔糕上一齊煎，煎得不錯，金黃色，蝦膠薄薄的，有蝦味；但蘿蔔糕則完全唔掂，質地極削:(，好似比較杰的漿糊咁，根本唔可以稱之為糕，再者，糕內亦食唔到任何饀料或味道，難道就只係食蝦膠嘅味道，那倒不如改為煎蝦膠吧！最後是招牌菜龍蝦湯三皇餃，打開蓋，發覺湯底變為龍蝦清湯，我哋正在盤算是否改良咗配方，於是問一問經理，經理連忙賠過不是，並替我們換掉，經理及後向我們解釋，因為大廚忙著處理蒸品，所以由師傅仔代勞，只可惜師傅仔一時大意，沒有把龍蝦湯攪勻，就搯上盅內蒸，所以湯底變得稀薄；不一會，經理為我哋奉上龍蝦湯三皇餃，這個就正常得多，打開蓋就有一陣濃烈的香草味，兩粒三皇餃就半浮沈咁置於橙紅色嘅龍蝦湯中，賣相的確吸引:)；湯濃但唔鮮，與尖沙咀店一樣，絕非新鮮熬製:(；三皇餃，則蟹肉味較突出，蝦味次之，龍蝦味偏薄（可能龍蝦味與蝦味相近，幾乎食唔出龍蝦味），但肉身爽口，好食，只嫌餃皮略厚，不喜歡，而且㚒上來時，餃皮底部亦穿咗，情況與尖沙咀店一樣，未有改善。兩個人食咗七籠點心，好似唔多夠，所以加多個鮑魚片雞球飯，原個砂鍋上，相信亦係原個砂鍋蒸，飯粒鮮明，唔太軟，有飯香，唔錯:)；但餸嘅份量則比尖沙咀店少，印象中，尖沙咀店嘅份量係鋪滿整個飯面，幾乎見唔到白飯，但這個就清楚可見；雞件尚算嫩滑，但雞味不足，兩片鮑片，就當然係素鮑片啦。埋單$318，每人$159，唔平:(，但喺荃灣區，想搵間有質素嘅酒樓，印象中，好似冇嘜選擇；但始終都係新開分店，有好多方面都需要改善和跟進，而且價錢與尖沙咀店一樣，至少都不應差過尖沙咀店，但是次幫襯後，只覺得有不足之處，但未發覺有那些地方比尖沙咀店好，應多加注意。…查看更多

位於元朗雞地的爽爽麵店，以醉雞及豬扒馳名，今天又來造訪。舖子不大，只有五、六張小圓枱，經常要在舖外攞籌等候，不過流轉量都頗快，依家係星期日下午兩點幾，我等咗7分鐘就有位啦。原來爽爽喺後面，仲有個舖位，不過冇枱櫈，喺廚房重地，眼見有位大叔，手持一雙長筷子，監控著兩隻鑊，正在忙碌地煎豬扒，見他細心地煎將豬扒兩面煎香，再蓋上鑊蓋，不一會，就端上一隻大碟備用，睇見都漏口水。一坐下，就點了半隻醉雞，再加一碗豬扒米粉，豬扒有肥有瘦，可事先要求，十分窩心。醉雞先到，一上枱，已聞到一陣酒香，但入口又唔會太重酒味，酒嘅份量適中，所用嘅酒，應以花雕酒為主，再混和少量其他酒，所以香味突出之餘，又不太濃；雞嘅size唔算大，半隻索價$120，份量唔算好多，兩、三個人絕對可以食哂；入口嫩滑無比，就算雞胸位置，都絕不嚡口，處理手法了得，而且雞味重，冇雪味，相信爽爽喺用活雞，非常好食；加上入口涼快，不一會，已經被我食了半碟。豬扒米粉登場，豬扒並非整件上，而是剪開一條條，份量似乎不足一整塊:(，但味道依然，入口鬆化，有肉味，非雪藏貨色，而且醃得入味，咬落又唔韌，相信老闆事前必定做了不少功夫，最重要，就是唔油膩，唔錯；至於米粉，雖然唔算爽口彈牙，但亦唔太腍，ok啦，略嫌蔥花偏少，唔夠香，若然灑多些少蔥花，相信會更香。加多罐汽水，埋單$153，若非我貪食，要半隻醉雞，相信一個人消費唔駛一佰蚊。…查看更多

今個月是大姐夫及二姐夫的生日（因為他倆只相距十多日，所以通常都一起慶祝），見仲有張萬豪半價coupon未用，所以決定喺萬豪食飯慶祝。一行十人，先寫菜單，頭盤只取燒味拼盆，不需乳豬全體，因為萬豪的乳豬，並非絕頂好食，無需花費在此；湯，只取燉湯，不要翅，我並非環保，只是覺得佰零蚊一盅燉湯，真材實料，大大碗，相比之下，更加抵食，因為萬豪的翅，最平都要四佰蚊一位，而且質素一般般，所以寧取燉湯；魚，則保留原條星斑，因家人喜歡食蒸魚；最後，當然要加壽飽啦，生日酒嘛；一席十人，$6,300，半價即$3,150，計埋茶水、加一，合共$4,000，每人平均$400，以酒店級嘅質素，絶對超值，可惜今日大廚嘅水準有d失準:(，希望只是偶一失手，並非換咗大廚。今日人多，叫了兩壺茶，一壺香片，一壺鐵觀音；鐵觀音，茶色金黃清澈，茶香但不濃，入口甘香，且有餘香；香片，茶色偏綠，香味清幽，但比鐵觀音強烈，而且餘韻悠長，比鐵觀音更好；萬豪的香片的確係好茶，加上有蠟燭座，暖著茶壺，唔需要擔心茶凍。第一道菜，係一品燒味拼盆，有乳豬、叉燒、豉油雞及燒鵝；乳豬只食其皮，脆但唔夠香口，肉更加冇味，一般貨色:(；叉燒，夠焦，但偏瘦，肥位唔夠，而且唔夠糖，好淡味，唔夠甜:(；豉油雞，可能喺脾位及翼位，所以肉質嫩滑，唔肯定是否活雞，但冇雪咪，可惜豉油味亦淡:(；至於燒鵝，屬胸位，多肉，但比較嚡，皮尚算脆，味道則是幾款燒味中最對辦的:)。第二道菜，係葡汁釀響螺及蛋白蒸蟹拑；唔知係我秘書攪錯，還是酒店弄錯，居然來了一客百花炸釀蟹拑，因為呢嗰蛋白蒸蟹拑喺特別為二家姐嘅小朋友（兩歲大）而設，所以我要求酒店更換，經理亦非常樂意為我哋安排:)，只不過需要一點點時間準備，我哋當然欣然接受，其實我哋都只是邊食邊等，哈哈。一隻焗得金黃色嘅響螺，放置喺一堆藍色嘅鹽上面，賣相都頗吸引，好奇之下，我哋向服務員查詢，究竟d鹽嘅藍色，是否人造色素，對健康會否影響，服務員聲稱藍色喺來自酒精，廚房將d鹽嗦上藍色嘅酒，造就藍色嘅效果，絕對可以食用，只不過味道較鹹；表面焗成金黃色，上枱時，仍然熱騰騰，香味濃郁，搯了一口，香口微脆，非常惹味，入面釀有響螺肉粒、肉碎、洋蔥等等，加上葡汁混和，有香味，有嚼頭，係我嘅至愛之一:)，可惜今晚有d失準，表面確實香脆可口，內裡饀料味道尚可，但卻較平日稔口，入口有一點過份漿著嘅感覺，食唔到螺肉應有嘅爽口咬感，失敗。當我哋接近食完隻釀響螺之際，蛋白蒸蟹拑已準備妥當，白滑的蛋白，中間放上一隻已拆殼的大蟹拑，再灑上幾粒蔥花，唔錯；試了一口蛋白，香滑中略帶鮮味，加上少許蔥花嘅青綠味，味道清新可人，蟹拑亦覺新鮮，我偷吃了一口，果然新鮮，蟹肉彈牙，與味濃的釀響螺相比，剛好相反，清甜鮮。第三道菜，係翡翠螺片蝦仁，西蘭花墊底，上面鋪滿泡香嘅螺片及蝦球，再加兩片紅椒，賣相普通，唔覺突出:(；但份量十足，有十一人份量（因為訂枱時，留咗十位加一位小朋友，廚師都頗細心，亦頗鬆手）；油份唔多，唔油膩；螺片有嚼頭，唔韌，但味道偏淡；蝦球頗大隻，彈牙爽口，而且蝦味濃，好食:)。第四道菜係湯品，花膠響螺燉雞，一人一盅，好大碗，其實平時兩個人共享一碗亦足夠，冇諗過今日一圍菜，份量與平時的一樣，哈哈哈；食材真材實料，有一件厚花膠、一隻雞腳、螺片、雞件、瘦肉、椎山、杞子、龍眼肉等等，絕無欺場；由於喺燉雞的關係，點都有d油，但絕對唔多，只見有極少量油浮面；呷了一口，鮮甜無比，我個人覺得鹽灑得太少，味道略淡，但家中各人均感滿意，覺得鹹度適中，可嚐到湯嘅鮮味；花膠，厚身，彈牙，但膠質不重，係萬豪一貫貨色；雞腳，並唔大隻，但非我喜好，冇食；螺片，咬感煙韌，雖然味道淡，但醮些豉油來吃，亦冇妨；而且此燉湯亦只不過賣佰三、四蚊一盅，比起翅，來得經濟實惠。第五道菜，係清蒸東星斑，非常大條，相信有三斤幾重；魚肉剛離骨，火喉剛剛好，只可惜喺養魚，並非海魚:(，坦白講，若果有咁大條海東星，價錢都唔平，亦唔會到酒店手；以養魚來說，魚味雖不重，但尚可接受，魚肉都算滑:)，加上薑絲、蔥絲及豉油，都絕不失禮。第六道菜，係北菇鵝掌扒芥菜膽，亦有十一人份量，北菇size普通，唔講得上大隻，但肉厚，而且味香，亦炆得夠火喉，有咬感:)；但鵝掌則炆得唔夠腍，食落膠質亦唔重，有d失準:(；至於芥菜膽，腍身，雖然有少許澀味，但盡嗦茨汁精華，味道不差:)。第七道菜，係炸子雞，亦喺失準之作，皮不及平時的脆，肉不及平時的滑，鹹度亦偏淡，可能預算大家可醮點淮鹽吧，幸好雞味尚在。第八道菜，係福建炒飯，雖然今日大廚有d失準，但份量十足，未食飯，大家已經有八、九分飽肚，所以特意叫服務員搯半碗飯，淺嚐一吓，已經滿足；飯粒，粒粒鮮明，唔會一嚿嚿，炒得香:)，略嫌蛋花份量偏少；食材份量不少，有蝦仁、帶子粒、肉粒、瑤柱絲、冬菇粒、菜心粒等等，而且所有食材都切碎成粒粒狀，方便食用:)，亦不會形狀不一，賣相古怪；茨汁味道不錯，鹹甜度適中，份量亦適中，唔會太多汁，以致飯粒過濕，唔錯:)。最後，當然唔少得壽飽啦，一籠十二隻，並非大大隻嗰種，一人一隻剛剛好，麻茸饀料，冇蛋黃，所以麻茸夠香，唔夠滑，但飽皮軟熟，而且麻茸份量唔太過份，整體上都可以接受:)。我哋仲特別喺COVA訂咗一個mango dome俾兩個壽星仔，雖然只係一磅，但已足夠有餘；其實揀COVA嘅mango dome，一來因為近萬豪，唔駛行咁遠；二來mango dome冇咁滯:)，飯後食，都冇問題；而且呢個cake唔太甜，cream唔太多，中間仲有層鬆軟嘅蛋糕，一樣唔太厚，仲有濃郁嘅芒果味，又有d芒果肉粒，簡單而言，樣樣都有d，又唔會太多，一口咬落去，每樣材料都食到，非常豐富、滿足。不經不覺，我哋已經食咗兩個幾鐘，亦係時候結賬走人。今日廚房有d失準，樓面亦然，我哋並無要求分菜，但作為一間五星級酒店嘅中菜廳，理應為客人分菜而上，至少都要問一句是否需要，但今晚就察覺唔到；再者，服務員確實有禮:)，亦有主動加水，但席間卻有數次沒有為我哋換碟，唔知喺因為服務員太忙，還是其他原因，但我相信服務員應於每道菜上枱前，為客人換上新碟，這是應有的服務水平；所以今晚的服務，我覺得需要扣分。…查看更多

火鍋舖越開越多，成巷成市，加上自己已搬入元朗，所以都有一段時間，冇來尖沙咀火鍋館了，今日舊地重遊，一於睇吓有冇退步。唔知由幾時開始，火鍋與刺身，好似結下不解之緣，形影不離，其實一凍一熱，一中一日，唔知點解會走在一起，哈哈哈。我哋亦順應潮流，先點了一條活鱆紅刺身，三佰幾蚊，有斤零重，都唔算貴；魚的確係新鮮活魚，上咗枱，仲眼仔碌碌，不時亦張口魚咀，幾生猛；肉身尚算通透，非薄切，但亦不太厚，咬落彈牙爽口，有嚼頭，冇腥味，只可惜沒有新鮮手磨wasabi，但火鍋館提供的wasabi亦夠味，有少少搶鼻感覺，都ok。湯底則是我喜愛的花膠螺頭雞湯，只需$128，睇落好抵，但細心看一看，搯一搯，就會明白一分錢一分貨的道理；湯，當然是滿滿的，但料嘅份量，就非常「精緻」:(；雞件，數一數，最多十件，而且件件「的骰」:(；花膠，都有十件，但全部都是超「迷你」嫌薄身嘅花膠筒仔，冇咬感，冇膠質，唔講都唔知係花膠；螺頭，更加「珍貴」，更加「精緻」，幾經辛苦，才找到兩小片，切得非常細片，份量又少，滾兩滾，隨時影都唔見；至於湯底，味道算鮮，但偏淡:(。至於調味醬料，亦有八款選擇，有辣椒絲、生蒜、熟蒜、蔥花、芫茜、沙茶醬、麻醬及XO醬，不過賣相就比較「街坊」，只用八隻膠杯放在一個透明啞膠力架上，再放入八支膠匙羮，非常方便，但並美觀:(。先來一碟頂級手切肥牛，$338一碟，價錢唔平，而且份量唔多，眼見牛脂唔多，有d失望；但夾了一塊灼一灼，嘩，好好食，嫩滑，有味，雖然唔可以話入口即溶，但牛脂份量足，並非眼見咁少，所以入口香滑，唔韌，鬆軟，而且牛肉味濃郁，果然係極品，難怪火鍋館斗膽索價$338一碟，仍然不乏捧場客。丸類點了潮州魚蛋及墨魚丸，潮州魚蛋，一碟八粒，非常彈牙，比一般嘅潮州魚蛋彈牙，咬感冇咁實:(；墨魚丸則打得幼細，亦爽口彈牙，惟味道略嫌不足:(，而且一碟只得六粒，唔平；反而墊底嘅粉絲，質素唔錯:)，雖然份量唔算好多，但每碟少少，加上來都夠我哋三個人食，唔駛另外叫烏東或麵。仲叫咗水魷鬚、魚肚及桂花蚌，水魷鬚size唔細，條條都有一定粗度，灼熟後，唔太韌，有d煙韌，有嚼頭，唔錯:)；魚肚則經油泡，吸水力比較弱，比預期差:(；至於桂花蚌，新鮮爽甜，好食:)。海鮮方面，我哋都冇再加碼，只係張條鱆紅斬件放湯，已足夠，雖然已經起肉做刺身，但仍有不少邊位及骨位，有骨有肉，滾一滾，非常鮮味，連湯底都增添少少魚味，不過又唔會有一陣腥味:)。最後，加多個唐蒿菜，未食，已經感覺到新鮮，非常翠綠，而且唔會壓實一撮咁，賣相已經吸引，灼一灼，果然新鮮爽脆，正。Sake嘅選擇唔多，所以我哋選擇飲啤酒，連酒水埋單$1,300，平均每人$433。唔算平，但碟肥牛確實好食，比以前，有進冇退；但其他方面，則無甚驚喜，以這個價錢，應該可以有更多選擇:(；當中嗰湯底最失敗，絕對要改善，只要足料、好味，一個花膠螺頭雞湯，索價$180至$200，都唔過份。…查看更多

砵仔糕，顧名思義就是用一個砵仔蒸嘅糕，主要材料係粘米粉和黃糖，所以係啡色，至於白色砵仔糕，則用砂糖代替黃糖，所以白色；蒸熟後，仍然盛載係砵仔內，等到有客人買，才用兩支竹籤戳起來給客人。但如今，大多數舖頭都改用白色瓷碗（即茶樓用的白色碗仔）代替砵仔:(，有些更是從工場購入大量生產的，要尋找真正的砵仔糕，就只好去鴻發。位於深水埗基隆街的鴻發，一室古舊裝潢，地板鋪著傳統紙皮石，天花掛著白色吊扇，老闆黃伯六十多年來風雨不改，每天都坐在大門口坐鎮。鴻發除了糕品外，仲有粥品油器，選擇不少:)，當中仲有好多喺幾近絕跡的糕點，每件售價都是兩、三蚊，非常經濟，但我獨愛它的砵仔糕。記得兒時住係太子的時候，老爹有空就會徒步走到鴻發，買幾個砵仔糕返來，給我做早餐，那種溫馨的感覺，直到現在，還歷歷在目。鴻發的砵仔糕，非常的骰，每個直徑只有兩吋闊，有啡色、有白色，圓形細細隻，中間凹咗少少:)，顏色偏啞，冇咩光澤，賣相並唔討好:(，但咬感一流，煙韌之餘，又唔會太黏口:)，質地幼滑，挺身，唔易散:)，四邊比較軟身，中間則比較硬身，軟硬有序，內裡亦有紅豆，但唔多，不過煮得稔，唔硬，大大增加嚼頭，甜美適中:)，但香味始終不足:(。$1.50一個，買咗十個返公司食，重拾一吓兒時的味道。…查看更多

1999年6月5日，喺台北敦化南路，開咗一間小店，名為「乾杯」；至今，整個集團喺台灣，已經開設咗十五、六間分店，分開四個品牌，分別為充滿活力和氣氛嘅「乾杯」，高檔典雅嘅「老乾杯」，放工後鬆一鬆嘅「乾杯bar」，和以紅酒代替啤酒嘅「紅酒乾杯」；係短短嘅十一年間，可以由一間寂寂無名嘅小店，發展至十多間分店嘅大集團，不得不佩服創辦人嘅熱誠和魄力。喺香港，就有人本著同一份精神和毅力，將「乾杯」嘅神髓從台灣帶了過來香港，喺尖沙咀漆咸道南開始。由外至內，都充滿著「乾杯」的影子，一室深褐色木器，紅磚格仔牆，昏黃的燈光，簡單大圓鐘，加上無數親親照片，簡直就像是置身台北「乾杯」一樣，唯一不同的，就是你身邊的人所操的方言，並不是國語而已。其實老闆同我哋講，佢哋同台北「乾杯」並冇任何關係，亦非同盟店（事實上台北「乾杯」並沒有同盟店，包括台灣本土及海外），只不過見香港並未有類似食肆，所以就希望將台北「乾杯」嘅精神和氣氛帶來香港；台北「乾杯」以燒肉為主，而香港「乾杯」則以串燒為主。至於台北「乾杯」至出名嘅「親親五花肉」及「八點乾杯」，老闆就作出少少更改，改為「親親sake」及「挑戰3.5L」；「親親sake」，顧名思義，只要親吻10秒，再用即影即有相機拍下，就可獲贈sake一杯；至於「挑戰3.5L」，就是要係10分鐘內，飲完一杯3.5L嘅Hoegaarden，如果女仕，則可以飲少d，2.5L嘅Stella Artois就可以過關，過到關嘅朋友，當然由老闆請客，否則的話，就要盛惠$350；除此之外，飲Asahi生啤，一樣有優惠，星期一，買一送一，星期二，買二送一，如此類推，一直到星期日，就買七送一，所以逢星期一飮Asahi就最著數，簡直就係半價酬賓。老婆與友人未到，先來一杯Hoegaarden及一碟雞泡魚乾，Hoegaarden夠凍，泡沫有成寸厚，而且非常幼滑，唔錯；至於雞泡魚乾，唔韌，有嚼頭，可惜燒得唔夠焦:(。當我飲完杯Hoegaarden之際，老婆與友人剛到，因友人懷有身孕，唔飮酒，所以叫咗杯乳酸梳打，而老婆想飲sake，所以要咗支獺祭50割，其實「乾杯」提供嘅清酒，主要係男山和獺祭，老闆話呢支有果香，易入口，所以我哋就點咗呢支，但飲落，比較搶喉，唔夠醇滑，有果香味，但不濃烈，普普通通:(。先來乾杯特式串燒蝦，一杯滿載辣椒、蒜茸、豆豉嘅香料，上面插著九隻海蝦，蝦唔係好大隻，但非常入味，連蝦殼都炮製得香脆，可以連殼食，味道非常惹味香口，但頗辣，佐酒不錯。跟著就來鐵板鍋燒秘汁煮翡翠螺，一鍋上，有六隻，汁唔辣，有少少酒香，仲有少少蔥香，螺肉有嚼頭，煙靱，都ok，但始終都覺得凍食，比較過癮。燒雞翼，燒得乾身，焦焦哋，雞皮燒得香脆，肉質依然嫩滑，皮脆肉嫩，正。燒雞軟骨，應該係來貨問題，太大粒，肉多過軟骨，無論點燒，都唔脆口，唔好食:(，與南亭或燒鳥亭無得比。原條燒茄子，將茄子在中間劈開，原條燒，燒好後，灑上蒜茸、蔥花及木魚絲便可；燒起後，只要用筷子輕輕一挑，便可夾起茄子肉來食，非常簡便，入口夾雜著蔥蒜味，香口好食:)。燒白鱔，及不上南亭咁厚身和大件，一件燒得金黃，另一仲則欠缺火喉:(，入口算彈牙，但略嫌調味不足，腥味頗重:(。再來冰鎮芥蘭，$45一碟，但只得區區九條，仲要係短小的九條，覺得有d貴:(，不過的確清爽、新鮮，而且食落冇渣:)，可惜冇隨芥蘭送上wasabi，有d失敗。跟著就係鹽燒大蟹鉗，有三隻，剛好一人一隻，唔駛爭，哈哈:)；似乎師傅喺燒烤途中，已將蟹鉗剪開，所以非常入味，但因此，蟹肉卻燒得太乾身，冇咗蟹嘅鮮味，肉汁亦揮發得七七八八，所剩無幾:(，鹹味喺發自蟹肉本身，並非來自灑鹽，唔錯:)。燒芝心丸及免治雞肉棒，芝心丸，一串三粒，標準貨色，不過燒功略差:(，第一，三粒中又係有一粒過焦，另外兩粒唔夠焦:(，問題與燒白鱔一樣，可能要看看師傅嘅手法有問題，還是嗰爐有問題，第二，芝心丸直接燒完就奉上給客人，並無加任何醬料去燒，比較失望:(，記得喺紅磡有一檔串燒，佢哋嘅燒芝心丸，會掃一層秘製醬油去燒，食落味道更豐富、更有層次，值得學習；至於免治雞肉棒，入面亦混入剁碎咗嘅雞軟骨，增加嚼頭，又唔會過韌，味道亦香口:)。燒台灣香腸，有四種味道選擇，分別為飛魚子、黑墨魚、芥末和原味，我哋揀咗芥末味，一啖咬落去，確實有一種搶鼻嘅辣味，好過癮，表面焦焦地，幾香口，腸衣有少少煙韌，腸心則腍糯彈牙:)。汁燒雞扒，賣相唔討好，一件雞扒，切成八小件，雞皮焦且黑，但唔香脆，可能由於汁燒嘅關係，所以雞皮濕且腍，嗰汁亦唔夠惹味，雞肉亦比較嚡口，唔多好食:(。燒生蠔，雖然落咗蒜茸，但份量唔多，冇掩蓋咗d蠔味，但唔明白點解要放d木魚絲，與生蠔唔多夾:(。燒雞皮海蝦，蝦唔細，比南亭大及長，但冇包紫蘇葉，所以欠缺咗一份紫蘇葉嘅香味，但燒得唔錯，雞皮燒得乾脆、香口，蝦肉亦彈牙爽口，加上雞皮嘅油脂，更加突顯到蝦嘅鮮味，值得推介。鹽燒龍蝦，一開二，唔係好大隻，冇咩膏，鮮味反而不及雞皮海蝦，但龍蝦肉尚算爽口，但與蟹鉗一樣，太乾身，冇肉汁:(。最後來客燒菠蘿，唔夠甜:(，如果掃一層薄薄嘅蜜糖，再燒一燒，效果可能會更好。埋單$1,800，每人$600，唔平:(，就算唔計支sake，每人都要$424，以呢個價錢，我寧可選擇南亭。依我個人愚見，噱頭就有，但氣氛唔夠；價錢唔平，但食物質素參差，老闆需要喺呢幾方面入手，改善一吓，否則，都好難突圍而出。…查看更多

都唔記得幾時開始，南蠻亭改咗名為南亭，亦冇深究為何，唔知係轉咗老闆，還是與日本總店關係有變，總之食物水準冇變，我哋都繼續幫襯。南亭現在有四間分店，分別係中環、銅鑼灣、跑馬地及尖沙咀，對於我哋d新界人或九龍人來講，當然首選尖沙咀店，但今晚之後，恐怕要過海才可以食到啦，因為店長同我哋講，由於大幅加租問題（聽聞由八萬加到二十幾萬），下星期六（即11月12日）後，尖沙咀店將會暫時停業；真是豈有此理，地產霸權當道，居然加三倍租，叫人如何經營下去，只有名牌店或是大財團，才有足夠實力係廣東道立足，混賬。Anyway，激氣都冇用，今晚一於不醉無歸，先叫一枝真澄七號，$700一支，中價貨色，一向對sake都冇認識的我，好奇地問我身邊的朋友，點解要飮七號，我哋三個人，大號都飮得哂？（我好無知咁以為好似拔蘭地嘅size咁分大號、二號、三號，哈哈哈）朋友解釋俾我聽，七號係代表七號酵母，係真澄酒莊於1946年發現，並屢奪殊榮，係日本有名嘅酵母之一，而且係用山田錦米，以傳統山廢技術釀成，係一支唔錯嘅清酒；先聞一聞，酒香怡人，唔會搶鼻，再呷一口，酒味濃郁芳香，甘醇易飲，不辣喉，不幸口，比起上次係秋田飲嘅淡麗吟釀，更有層次感，更有衝激，果然係好酒一支。前菜係椰菜、西芹、青瓜和甘荀，全部都新鮮、爽脆，可醮南亭自製醬汁或青海湖鹽，南亭標榜自己為青海天然湖鹽專門店，其鹽粒比較粗，但鹹味不重，而且顏色偏向純白冇雜質，用來食用比較健康，而且食完亦唔覺口渴。二話不說，先來一客枝豆和雞泡魚乾，枝豆暖暖的上枱，一大碗，份量唔少，亦唔會煮得太腍，有咬感，加上少少青海湖鹽調味，食得份外開心；雞泡魚乾，呈啡黑色透明狀，燒得好，焦焦地，夠香口，有嚼頭，但唔韌，非一般卡拉ok所能做到。牛肉唔需要燒太耐，所以通常都係牛肉先到，蒜香燒牛肉，有少量蒜茸及大量蔥花鋪喺牛肉面，入口有一陣濃烈嘅蒜香及蔥香，並冇喧賓奪主嘅感覺，反而蔥蒜嘅清新感覺，更能把牛肉嘅肥膩口感冲淡，與燒牛肉味道相襯，而且牛肉並冇燒得過火，內裡肉汁仍然豐富，好食:)；不過印象中，跑馬地燒鳥亭嘅蒜香燒牛肉，比南亭更出色:(，有時間的話，真係要再去尋味一番。再來的，就是燒鵝肝，雖然索價$98一件，但份量十足，鵝肝內亦冇血管、血筋，絕對係法國鵝肝，非平價貨色，外表燒得香脆可口，內裡卻軟腍味濃，雖然鵝肝本身不需任何醃製，但師傅嘅燒功就絕對重要，否則又點可以燒到外脆內軟呢。燒雞翼，很喜歡日式鹽燒雞翼，雞皮燒得脆卜卜，冇哂雞油，冇哂皮下脂肪，乾身香口，雞肉則依然嫩滑多汁，真正皮脆肉嫩。燒雞軟骨，係全港最好食，好食不只燒功了得，仲要食材上乘；南亭嘅雞軟骨，細細粒，粒粒都係軟骨，帶少少肉，係真真正正嘅少少肉，絕對唔係坊間嗰d大大粒，肉多過軟骨嘅呃秤貨，加上燒得乾身，非常惹味香口，咬落唔硬，有嚼頭，脆脆的，難得；如果雞軟骨太大粒，就算燒功有幾了得，都冇法將軟骨燒得香脆好嚼，所以坊間大大粒嘅雞軟骨，唔食都知唔好食。雞皮蝦卷，哈哈，又係雞皮，冇辦法，雞皮確實燒得好，其實雞皮蝦卷，係先用紫蘇葉包著一隻海蝦，再喺外面包一層薄薄嘅雞皮，包得非常扎實，絕對唔會散開；雞皮當然燒得脆皮香口，蝦亦有少許鮮味，肉爽，唔梅，加上紫蘇葉嘅香味，係唔錯嘅配搭，值得encore；不過，南亭仲有淨燒雞皮，記得多年前曾經食過，印象麻麻哋:(，因為雞皮串疊一起燒，並不是攤開整塊雞皮來燒，燒得不夠徹底，所以有些雞皮部位唔夠脆，而且食入口，感覺亦好似食豬油咁，所以並唔推介:(。再來軟骨雞肉棒，就是將雞軟骨剁碎，混入免治雞肉內，再搓成棒狀，加上秘製醬汁燒；軟骨及雞肉都剁得幼細，入口絶冇實崩崩嘅感覺，腍糯之餘，又有軟骨嘅嚼頭，亦係一個唔錯嘅選擇。三個人，輕易地將整支真澄七號飮清，本來想要支北海道男山，可惜全店只得一支，剛剛被第二枱客要了:(，店長親自來賠過不是，但又豈是他的錯呢？根本我哋都冇示意店員為我哋留酒，我哋只好開多支真澄七號；但店長非常好客，亦相當健談，仲話有支獺祭二割三分，係早兩天跟朋友飲剩三分一，如果我嘅唔介意，就請我們一起飲，我哋當然卻之不恭，友人仲話呢支二割三分絶對係極品，二割三分係代表精米度23%，即係一粒米，會將77%外層磨走，只剩低23%嘅米心來釀酒，係日本清酒中，幾乎係最低精米度嘅清酒之一，友人記憶中，就只有龜之甲二十二及壹十四嘅精米度喺低過二割三分，一般嘅純米大吟釀，精米度都只不過是介乎40%至50%左右；店長小心地將支二割三分倒入個sake壺中，再斟俾我哋，香味不足:(，相信是由於已開了兩天之故，但香味優雅，非常清新，呷了一口，順滑圓渾，一種好柔和嘅感覺，你會感覺到d清酒好溫柔咁係你口腔中，行來行去，遲遲都唔捨得離開咁，非常幼細，餘韻悠長，果然係極品；但正正由於佢淡淡嘅優雅，友人覺得清飲或伴以一些比較清淡嘅食物，才可欣賞到二割三分嘅優點，若以濃味食材佐酒，只會糟蹋好酒一支，我亦有同感。享受完二割三分嘅溫柔，我哋又再次投向串燒嘅懷裡，串燒大虎蝦，非常大隻，肉質爽嫩，亦有鮮味，蝦膏唔算多，ok啦，鹹度亦適中，止於蝦殼，惹味之餘，唔會令蝦肉變質。燒廣島蠔，有蠔味，略嫌唔夠肥美:(，不過一啖一隻，亦食得過隱:)。燒鵪鶉蛋，雖然並不是什麼名貴食材，但偏偏就不是隨處可以食到，鵪鶉蛋嘅膽固醇份量比雞蛋低，食多一、兩隻都無妨，正因為鵪鶉蛋比較細，受熱部份比較多，所以當師傅把鵪鶉蛋嘅表面燒得焦焦地，加上秘製醬汁，一啖咬落去，蛋黃及蛋白份量唔會過多，掩蓋了醬汁嘅味道及焦皮嘅香口，正。再來燒白鱔，都算厚身，外表燒得亁脆，加上青海湖鹽調味，把腥味辟走，而且咬落唔會鬆散，少少彈牙，唔錯:)。燒粟米亦隨後而至，唔知是否潮流興食得健康，粟米燒完好似冇燒咁，仍然係黃色一枝，所以我哋冒昧要求燒焦一點點；三數分鐘後，我哋與粟米再回面，今次就好得多，明顯地見到有d焦焦地，非常吸引，唔似係日本粟米，但亦非常清甜，粒粒肥大飽滿，好食，自己總是燒不到這種效果。最後，友人叫了一個梅子燒飯團，而我哋兩口子就要咗個蕎麥冷麵；燒飯團賣相吸引，整個飯團都燒得脆卜卜似的，講真，望落似炸飯團多d，哈哈。至於我哋個蕎麥冷麵，用一個竹盤，放咗一撮冷麵，上面灑咗幾粒芝麻和紫菜絲，而個竹盤嘅作用，就係用來隔開d水份，令到d冷麵唔會水汪汪，亦方便醮麵汁，除咗一碗麵汁外，仲有wasabi、蔥花、蘿蔔茸，冋一隻鵪鶉蛋，呢隻鵪鶉蛋嘅作用就大囉，簡直起咗畫龍點睛嘅作用，令嗰麵入口滑得多；我習慣先將wasabi放入麵汁攪溶，因為wasabi需要壓溶，所以先處理，再將隻鵪鶉蛋放入麵汁打勻，最後就將蔥花和蘿蔔茸一起放入麵汁，這樣的麵汁，有酸有鹹有辣，有蔥花嘅清香，又夠滑，加上一陣冷冰嘅感覺，非常正；即刻夾了一撮冷麵，醮上精彩嘅麵汁，加上麵條嘅煙韌，絕頂嘅美食。經過一輪衝刺後，我哋三人都捧腹大飽，但為食的我，又點會放過綠茶雪糕呢？可惜南亭只提供雪米糍，雖然店長已為我哋一添再添，但始終都及不上雪糕球那麼好味和吸引:(。食得豐富、飲得滿足的一餐，盛惠$2,800，每人平均$933，多謝好友請客；其實兩支sake已佔了半張單價錢，如不飲酒，每人只需四佰多，絶對唔貴。可惜11月12日過後，如要品嚐南亭的功架，非要過海不可，實在有點婉惜:(，希望南亭早日係九龍另覓地址開舖，免卻我們過海之苦，謝謝:)。…查看更多

係元朗食火鍋或者打邊爐，其實選擇頗多，但我唔食辣，所以什麼辣雞煲、四川火鍋，並唔係我杯茶，我獨愛小肥牛及名人火鍋。坦白講，兩間火鍋店所提供食材款式都差不多，一樣新鮮，除咗肥牛及一般火鍋配料外，仲有刺身供應，不過名人火鍋有更多海鮮選擇，而且賣相比較精緻，食材亦略為高檔；兩者分別主要在於價錢，小肥牛比較經濟，平均每人二、三佰，名人則比較貴:(，每人需四、五佰。因為今日心情特別好，所以食豪d，去咗名人火鍋。其實名人火鍋嘅位置都幾偏僻，雖然近YOHO TOWN，但入夜後，人流稀疏:(，如果唔熟悉元朗的話，要搵名人都有d難度，不過名人嘅食材新鮮，就算位置稍偏，都有唔少人幫襯，大枱細枱加埋都有十幾張枱，但黃金時間來到，如果冇訂枱，隨時冇位。雖然名人火鍋已經營運差不多一年，但裝修仍然新簇，一室雅緻裝潢，沒有半點花巧，以舒服、光猛為主，選用黑木枱、黑木櫈，大方得體，而且擺位闊落，絶不焗促，冷氣亦十足，仲加有掛牆扇，以防炎夏唔夠涼快，果然細心。我哋揀咗個冬瓜瑤柱螺頭湯底，$68，唔算好貴，中等價錢，但勝在湯底清甜，而且材料十足，雖然螺片係急凍螺頭，但份量不少，而且切得厚薄適中，有嚼頭之餘，又唔韌，加上打完邊爐嘅豐郁湯底味道，確實唔錯，只可惜今日嘅湯底，好似缺少了瑤柱絲，未知是否大廚一時忘記，還是其他原因，但見老闆與伙計都頗忙碌，算吧:(！一籃八款醬料，任君選擇，有辣椒絲、蔥花、芫茜、生蒜、熟蒜、沙茶醬、麻油及最吸引的XO醬，呢個XO醬係老闆自家調製，冇油，微辣，最適合用來混和豉油，作打邊爐用，當中嘅材料有蝦米、瑤柱絲、辣椒粒、金華火腿、蒜茸等等，味道鹹香，帶微辣，非常惹味，每次都要勞煩伙計們添完再又添，不過大家唔駛覺得唔好意思，因為老闆會收大家$14一位，哈哈哈。先來一碟手切頂級肥牛，$248一碟大嘅，份量與小肥牛差不多，但價錢則比小肥牛貴近百元一碟，貴在那裡呢？貴在平均，名人火鍋嘅肥牛，確實碟碟平均，每次來都有一定水準，絶不欺場，反之，小肥牛嘅質素就比較反覆，偶爾都會有些唔靚嘅肥牛出現:(；先睇賣相，件件雪花，油脂分佈平均，亦冇一大嚿肥膏，的確吸引；夾了一件，放入湯，一、二、三，灼三秒就食得，唔駛醮豉油，可以食到牛嘅鮮味，味濃而不膻，有嚼頭，唔韌，係上等牛肉。丸類叫咗墨魚丸、蝦丸及土魷豬肉丸，全部都係手打，大大粒；墨魚丸，非常白滑，有彈性，煙韌，不過墨魚味稍淡:(；蝦丸，白中帶橙，打得夠膠，咬感類似墨魚丸，非坊間一般咁鬆散，而且蝦味重，好食；至於土魷豬肉丸，更加係名人特色之一，豬肉丸新鮮手打而成，絕對唔似一般豬肉丸咁實，富彈性，加上土魷粒嘅香味和咬感，令呢粒土魷豬肉丸更加好食，更有嚼頭，豬肉味混和土魷味，就係土魷蒸肉餅嘅味道，難得；除咗土魷豬肉丸之外，名人仲有梅菜豬肉丸和芝心牛肉丸，一樣係手打，值得一試。魚唇，份量唔算多，但勝在夠厚身，亦切得大件，屬優質貨色，不過由於魚唇厚身，需要煲耐d，才夠腍，夠膠，所以要早d放落湯，否則有排都冇得食，哈哈。因同行友人對鵝腸甚有興趣，就算老闆聲明唔係新鮮鵝腸，友人仍然趨之若鶩，叫咗一碟，咬感尚算爽，但冇鮮味，而且細看之下，只有肥油，冇肥膏，劣作。海鮮方面，今晩冇東星班:(，只得大油杉和沙巴躉，而且價錢不菲，所以我哋棄新鮮活魚，只取一碟白鱔片，$88一碟，價錢雖平，但質素唔差，重質不重量，雖然成碟只得八件，但件件呈長條形，每件約四寸長，絶非一般貨色；灼熟後，入口爽脆，冇咩腥味，佳品。仲有一碟廣島蠔，雖然係急凍，但食落冇雪味，亦夠蠔味，一碟八隻，唔講得上好大隻，但都可以接受，灼熟後，亦唔會大縮水，比桶蠔好食。另外，仲叫咗碟薯仔件，薯仔切成一嚿嚿:(，滾唔耐，就唔夠軟身，唔好食；滾得耐，則太腍，散哂，夾唔起；所以薯仔應該切片，唔好切嚿。最後加多碟菜，已覺得非常飽肚，非常滿足；名人火鍋仲提供樽裝汽水，我哋三個人，一共飲咗十支汽水，每支$8，淨飲汽水都要$88，哈哈哈。滾吓:)，食吓，傾吓，不經不覺就食咗兩個幾鐘，埋單剛好一仟大元，每人$333，因為今日冇食刺身，亦冇食生劏活魚，所以比較平，否則，每人需約四佰至五佰蚊。因為我哋經常都會來幫襯，老闆特意送上花膠凍，落單計，每個都要$25，真係要多謝老闆；其實花膠凍，本身冇咩味道，食落有d似大菜糕，入面有幾粒杞子調味，仲有d切成幼條狀嘅碎花膠，增加了咬感，咬落有d煙韌；反而，名人嘅龜苓膏則未曾試過，因為每次都會取花膠凍，而棄龜苓膏，哈哈；其實同老闆唔熟都唔緊要，只要同Citibank熟，一樣有花膠凍或龜苓膏送（用Citibank簽賬，每人消費滿$200就可以啦）。…查看更多

當你步入劉森記，好難想象劉森記已經有半百年歷史，由最初嘅手推車仔麵檔，到後來嘅大排檔，及至現時嘅舖位，都寸步不離深水埗。劉森記以竹昇麵馳名，用加拿大高筋麵粉加鴨蛋，以竹昇用人手打造，亦由於自家製麵，鹼水分量落得少，所以麵條亦不可放存太耐，換句話說，麵條都非常新鮮。今日我哋兩公婆，就叫咗一碗黑柏葉麵$21和一碟蝦子牛筋撈麵$33，再加兩支細樽裝可樂，每支$6，合共$66，非常抵食。麵未到，當然先食自家醃製嘅酸蘿蔔，夠酸、夠爽，除咗蘿蔔，仲有靑椒、紅椒，唔太辣，幾好食，只可惜冇青瓜，否則會更加吸引:(；其實如今，已經冇幾多家麵舖有酸蘿蔔提供，雖然唔係什麼珍貴食材，但偏偏就冇人有心機做，真係買少見少。黑柏葉麵先來，呷一口清湯，味唔濃，有一陣大地魚嘅香味，但蝦子味欠奉，似乎退了步:(；再咬一口麵，唔爽、唔煙靭，完全失準，可能煮得太耐；黑柏葉則爽口，食落嗦嗦聲，有嚼頭，唔韌，保持一貫水準，可惜份量偏少，而且蔥絲亦偏少，與尖沙咀蘭香比較，咬感與味道都ok，但份量則少了一截:(，而且豉油亦是蘭香勝一籌:(，價錢方面，蘭香則需$25一碗。跟著，蝦子牛筋撈麵，有四、五嚿牛筋，放咗喺碟邊，蝦子則鋪滿整碟麵，絶不吝嗇，再加一小碗清湯，功架十足；湯雖小，但味足，比剛才嘅黑柏葉麵，多咗一份蝦子味，好飲得多；麵條非常幼細，冇鹼水味，而且爽口、彈牙，煙靱度十足，好麵；至於牛筋，非常入味，夠腍穤，夠膠，極品；蝦子雖多，但味道唔夠濃，雖然係用斗門蝦子，入口幼滑如沙，但味道偏淡，唔夠鹹香，有d失望:(。整體上，撈麵嘅質素保持，但湯麵則唔掂:(，可能由於放湯太耐，希望下次再來時會有改善。…查看更多

不經不覺，曼聯吧已經開咗年半，身為曼聯嘅die hard fans，當然要捧場，不過來過幾次，都只係飲啤酒，今日都冇例外。記得舊年年中開幕時，仲請咗効力曼聯13個年頭嘅「神奇隊長」白賴仁笠臣（Bryan Robson) 專程來港主持開幕，以正視聽，哈哈。當時，香港嘅曼聯餐廳，係全亞洲第十間，至今，已經開到第十五間，聽聞第十六間，將於我們的祖國---上海開辦。一個紅魔鬼logo，隱藏係黑色玻璃中，發出紅色嘅光芒，好搶眼，好突出，樹立係樂道中間。餐廳位於一樓，佔全層，地方絕對唔細，地下則佔用一個舖位，只得數百呎，闢作精品店，全部都是曼聯官方紀念品，有球衣、運動袋、杯、文具等等，選擇唔少。沿著樓梯上一樓，就係餐廳嘅位置，第一眼見到嘅，係一張曼聯嘅賽車桶櫈，即係球員席嗰d櫈，話唔定，呢張櫈當年係碧咸（Beckham) 坐過；係隔離嘅牆身，就掛有一件曼聯球衣，只可惜呢件並冇曼聯球星簽名，比較失色:(。既然係曼聯餐廳，當然係以紅色為主調，而且並非油乳膠漆，而係包紅色玻璃，加上整間餐廳嘅燈光都比較暗，並冇任何主燈，用上大量射燈，格調頓然高咗幾班。大致上，全層餐廳可以分為三個部份，係樓梯附近，擺放咗幾張coffee table，和一些矮櫈，感覺比較輕鬆，舒閒；近窗位置，仲放有一部飛標機；係另一邊嘅角落，就係曼聯嘅威水史---曼聯歷年榮耀，足足攞咗19次英格蘭頂級聯賽冠軍，仲有4次雙料冠軍及1998-99年度嘅三冠王，隔離就貼咗幾個曼聯殿堂級球星，有舒米高（Schmeichel)，簡東拿（Cantona)，傑斯（Giggs)，碧咸（Beckham)，李奧費廸南（Ferdinand)和朗尼（Rooney)，咦，點解冇C朗（Cristiano Ronaldo）嘅？係威水史隔離，行入少少，就可以見到奧脫福球場（Old Trafford），哈哈，係一幅好長嘅牆紙，以奧脫福嘅看台做背境，好壯觀，前面係一排卡位，一排過可以坐十幾人，真係好長，喺呢排卡位前，仲有一個不銹鋼架，上面仲掛著不銹鋼網，好似龍門咁，非常有特色，呢個不銹鋼網將奧脫福球場劃分成一個半獨立嘅包廂咁，有少少私隱之餘，又可以感受到餐廳嘅氣氛。喺奧脫福球場對出中間嘅位置，就係水吧所在，沿著吧枱，放咗一排高吧櫈，方便客人坐吓飲杯嘢，係吧嘅背牆，仲掛咗一部大電視，我就最喜歡坐在這兒，可以對正部電視，非常寫意；雖然水吧嘅範圍唔係好大，但係非常骨子，吧背嘅下半部，係一列矮身雪柜，入面放滿好多唔同牌子嘅啤酒，大部份都係英國入口，而且坊間比較少見，大部份都係$78一支；係雪柜頂，就放滿唔同牌子嘅啤啤酒杯，俾客人飲生啤，生啤除咗一般比較多人熟悉嘅生力、健力士、嘉士伯、Boddington和Stella Artois之外、仲有奧地利Edelweiss和法國Kronenbourg 1664和Kronenbourg 1664 Blanc，$58至$63一杯；其他牌子嘅樽裝啤酒，則一律索價$48一支；除此之外，仲有好多唔同嘅酒類，如紅白酒、香檳、白蘭地、威士忌、vodka、gin、rum、tequila等等；當然仲有幾款以紅魔鬼為題嘅雞尾酒，如Fred the Red、the King Cantona、Babyface、David Beckham等等，全部雞尾酒都係$58一杯。再行入d，就係用餐區，中間有十幾張方枱，兩邊就係卡位，係中間嘅最遠處，就設置咗一部一百吋大電視，冇錯，係電視，唔係投射影幕，投資不菲，但係一間以足球體育作為主題嘅餐廳，呢項投資係絕對唔慳得，其實整間餐廳，大大話話，都裝有十幾、二十部電視，真係坐係任何一個位置，都可以睇到紅魔鬼嘅入球。係左手邊，有一個比奧脫福球場細一半嘅廂房，呢個廂房，我稱之為費格遜廂房，因為呢個範圍，貼滿費格遜（Sir Alex Ferguson）嘅英雄事跡，由1986開始，費格遜（Sir Alex Ferguson）帶領曼聯奪取咗無數嘅錦標，更於1998-99年度勇奪三冠王，包括英超冠軍、足總杯和傳奇性地反勝拜仁的歐洲聯賽冠軍杯，成績斐然。係廂房兩邊嘅牆身，則掛滿好多球星相片，有新有舊，好多都係歷史性時刻，非常珍貴；置身其中，就好似去咗曼聯展覽館一樣。坐返埋位，叫咗杯Edelweiss，杯身好高，但杯口不大，泡沫有一寸厚，滑，但唔夠厚身，略稀，味道甘香，唔澀，比Hoegaarden味濃:)。八點前係happy hour，買一送一，飮完Edelweiss，轉咗杯Kronenbourg 1664，法國釀製，其實法國人嘅强項，當然係紅白酒、香檳，至於啤酒，就⋯⋯一望嗰杯，一定以為好冰凍，因為嗰杯好似有一層簿簿嘅霧氣，但當你一手握著隻杯，就會發現，原來唔係霧氣，係磨砂玻璃設計，予人一種凍冰冰嘅感覺，俾法國佬呃咗:(；Kronenbourg 1664嘅杯口比Edelweiss闊，所以泡沫都冇咁厚，哈哈，仲有d生果香味，而且有少少甜嘅感覺，幾特別:)。一個人飲咗兩大杯，當然有生理需要，但係曼聯未開記錄，正在攻緊，點算:(？唔通要等完場先去解決？原來男廁入面有電視，唔怕睇漏眼，仲係安裝係尿兜內，一定唔會睇唔到，只怕曼聯入球時，一時過度興奮，射咗過隔離，哈哈哈。埋單$70有找，兩杯啤酒，唔貴，如果唔係happy hour，$70一杯，就比較貴。…查看更多