or#Tm65363716的個人專頁

三個星期內食過兩次晚飯，兩次都好食。叫餸跟一碗白飯，叫餐跟白飯同嘢飲，加錢可以跟燉湯。第一次：燉湯：好足料好味，木耳湯好有膠質但個木耳食落口仲好爽口，冇話淋晒爛晒。椒鹽鮮魷：脆口，鮮魷大大舊，調味啱啱好，正！粗齋煲：味道都係南乳味，整體都好食嘅，只係但佢啲料有少少得意，好似雜菜煲咁，又白菜仔又粟米仔又茄子又雜菇。食素嘅話，呢個唔錯，多種蔬菜幾均勻。第二次：金湯酸菜魚（晚市套餐）：估唔到幾好味喎，黑魚片好滑，冇骨，酸菜食落口仲有味，金湯好濃味，撈飯一流。不過，佢冇泡椒嗰隻味所以唔係話好正宗，介意嘅話就唔好叫。欖菜四季豆：超好味，啲豆乾身但唔太油，欖菜同肉碎好足，好夠味，比上海姥姥或者附近嘅餐廳都好食。呢個有五星。餐廳整體都算乾淨，餐具有用熱水熨過先俾我哋，枱冇油冇水。間中有啲小飛飛，我諗呢啲好難避免。啲侍應做嘢好爽手，任何時候我都覺得佢哋有照顧緊我哋，坐低唔會催你叫嘢，會靜靜哋隔遠少少等你叫佢，但你一舉手就九秒九衝過嚟。聽到我哋話上住一碗飯先，佢哋會自動拎兩隻吉碗俾你。上個湯會提你少少熱唔好心急飲。我有少少估唔到呢間普普通通嘅茶餐廳，服務有五粒星咁周到。啲侍應有時仲會陪啲阿婆傾偈，呢part真係好正。…查看更多

晚上19:45左右嚟到，門口要排隊大約10個人。以前未有YouTuber介紹之前，冇見過有人排隊，好多時候都只係得1-2枱，而家真係紅咗。等咗15-20分鐘就有位。有枱係自己入座，自己去收銀處落單，自己拎餐具。1. 雞油馬友配薯條$128：炸魚薯條嚟講，唔算好食。好食嘅炸魚個皮會脆（用脆漿），塊魚會好滑有魚味；佢呢個馬友係吉列硬皮，有魚味但唔係話好突出好加分，食落少少鞋口但可以接受。舊魚就咁食會有少少腥味，噴咗花雕個腥味會冇咗，會好食番少少，但唔稱得上係好食。佢俾兩隻叉你，係因為佢個吉列皮好硬，用刀一切舊魚就會散晒，而佢塊魚皮有時又會切唔斷，所以好難好完整咁食佢塊魚。跟咗個綠色白色嘅醬，冇乜味少少草青味，點魚或者薯條都唔夾，唔知想點。沙律同薯條就正常發揮。2. 手打騸牯牛堡$112：等咗好耐先上，即刻整，個包面仲脆，點知一啖咬落去就出事。。。點解係羊味嘅？係一陣羊騷味。我同老公都好疑惑，騸牯牛我哋打邊爐成日買啦，幾時會有騷味騷到好似食羊咁？而且羊同牛味都唔同，都分到㗎？由於出菜嗰陣同時出咗兩個包，我哋就懷疑係咪搞錯咗，老公去問完，佢哋話可能同一個扒爐煎，所以沾咗啲羊味。佢可以重新整一個俾我哋。由於佢20:30已經last order咗冇接新客，所以今次5-8分鐘左右就上到個包。今次都係有羊味，只係比之前淡咗。我哋費事煩，快快食完就走了。第二個包比第一個熱好多，食落好食啲，如果$70-80蚊嘅話連一罐汽水咁其實都ok嘅，但$112就唔值呢個價啦。真心我覺得MOS Burger仲好食啲。3. 叫包/主食有汽水送，要自己去雪櫃攞，或者可以半價轉啤酒。$34咁大杯啤酒，呢part係抵嘅。呢間網紅店食過一次我唔會想再返轉頭。佢好明顯係cafe人少少就ok，人一多佢根本搞唔掂。唔會帶位，執完枱又唔抹枱，order咗嘢要整好耐，如果中間有外賣又會整咗外賣先。啲食物要即整我哋明呀，杯啤酒要等15分鐘先上，個職員眼望望明明冇嘢做，都唔會落完單就上杯啤酒俾你先，叫佢過嚟抹枱要叫兩次，抹完枱先記得未上杯啤酒。兩份餐又分開20分鐘先上齊，成個用餐體驗都唔好。我由等位到食完餐飯，全程75分鐘左右，我冇乜見到邊個食客係食得好開心，覺得好好食嗰種好滿足嘅表情。睇得出好多都係睇完YouTube過嚟試新嘢，好興奮咁落單，然後冇乜表情咁食完出番去。我第一次，食完餐飯係會想上番個YouTube channel去小個YouTuber。泰安樓好多好嘢食，唔好嘥錢食呢間喇，名過其實。…查看更多

功夫茶：餐前個茶味道很淡，我過往飲過的功夫茶有生津開胃的作用，呢度個茶就冇特別生津，而且唔熱。我哋兩個人佢上咗四杯，有少少奇怪。餐後個茶就好飲好多，好香，有茶味，而且熱。小食：原本係俾咗花生，我換咗做鹹菜。鹹菜好好食，爽口新鮮，唔會太鹹，味道啱啱好。滷水鵝片（例牌）：一般，食落比較鞋口，鵝太瘦，食唔到油香味。個滷水有少少奇怪，就咁食又唔夠味，一點咗汁又太鹹，而且唔夠香。西灣河嗰間滷水鵝好食好多。墊底有啲豆腐，豆味濃郁，幾好食。鹹菜花蛤湯：淡淡地胡椒味，仲有啲蕃茄，味道偏清新。花甲好新鮮，鮮甜。但係個蕃茄有陣怪味，唔知係咪備料嗰陣黐咗其他嘢，有陣油耗味。水瓜烙：煎得夠時間，好香煎蛋的香味，但係水瓜切片就唔突顯到水瓜烙應有嘅外脆內軟口感。呢味餸如果做得好，係難整過蠔烙，所以先會標價更貴。但係呢度唔值呢個價，建議叫番蠔烙。胡椒鹹菜豬肚湯：好濃嘅胡椒味，夠晒香，豬肚好乾淨，冇壓味，食落有咬口，好食。鹹菜味都好夠。推薦！不過我哋叫兩個湯，佢前後隔咗成半個鐘先嚟，仲要係我哋追先有，懷疑漏單。禾香鴿：冇諗過竟然有功夫菜，而且仲唔使提前預訂。佢係原隻鴿起咗骨架，然後釀糯米料。糯米本身炒咗味，好似糯米卷嗰陣味。上菜嘅時候已經分好咗兩邊，由於起咗骨，食嘅時候都好方便。鴿肉生熟度啱啱好，食落好嫩，仲有汁，連埋啲糯米飯食真係好香甜。呢個值五星，超級推薦。不過，由於鴿身嘅肉係有少少厚薄的分別，一人食半邊會好好食，但如果四個人每人食四份一咁樣，可能食到偏瘦嗰舊就會唔夠油份冇咁好食。所以我建議係按一人半隻咁叫會好啲。整體餐點味道唔錯，座位同裝修都幾舒服，只係價錢偏貴。下次會想試吓其他功夫菜式。…查看更多

好精美嘅糕點，望落好有食慾，買咗四樣甜點加兩杯咖啡堂食。葡撻係好食嘅，酥皮好脆，有層次感，蛋味好足。唯一缺點係凍，佢連室溫都唔係，係凍！所以食落去唔會有香味。我會俾4粒星。閃電泡芙我覺得好把鬼。底下嗰條餅，又唔鬆又唔脆又唔軟，有少少似鬆餅濕完再乾番咁樣，唔係好知佢想表達啲咩口感。法式布蕾食落去有陣吹波膠/藥水味，好難食。杧果味食落去完全冇杧果味，淨係食到中間條香草嘅味。雖然望落好靚，我係完全唔推薦食呢個，俾2粒星。牛角包超級大個，好鬆，咬完一啖佢識自己彈番開，啲酥皮層次感同空氣感都好夠。但係，冇任何香味。如果旁邊唔係有杯咖啡，我會有少少懷疑係咪我個鼻廢咗？同埋佢個牛角包好似完全冇調味？少少甜或者少少鹹都冇，個感覺都幾神奇。呢個俾3粒星。整體嚟講，酥皮類嘅嘢都可以食嘅，如果買走翻熱食應該都唔錯。但係閃電泡芙就麻麻地。咖啡正常發揮，不過個latte好似唔係用full cream milk，飲落好薄身。最後，堂食有三張圓枱，兩張枱有餅碎冇人清理，其實係咪趕客㗎？(少少唔好意思，啲相有啲對唔到焦）…查看更多

咁啱去柴灣做嘢，响Google地圖搵吓有咩好嘢食，見到呢間餐廳幾高分就訂位食個lunch。Lunch時間餐廳大約一半滿。我揀咗望海的座位。Lunch set我揀咗餐湯、慢煮牛腩排、熱Latte，另外加個Tiramisu。餐湯係磨菇湯，磨菇幾足料，細細粒有少少咬口，唔知係咪我偏重口味，我覺得好似落唔夠鹽。餐包係普通嘉頓餐包，有焗番熱，甚至有少少燶/脆皮面添。主菜慢煮牛腩排，上菜個樣都幾好，雖然將兩塊扒疊起嚟上菜我覺得有少少怪。切開舊扒，中間有一條好粗嘅牛血管我唔係好切得斷。佢配俾我嘅係普通餐刀，所以問佢有冇扒刀，結果佢話冇。如是者，我每切一吓都要同嗰條血管搏鬥。牛扒調味係鹽同黑椒，味道唔錯。我係order medium，本來切開我覺得都ok，但食食吓發覺有啲奇怪，因為一碟扒切開有三個唔同嘅熟度，中間流晒血，最邊嗰度煮到變咗全熟。本來煎扒熟度唔均勻係可以理解嘅，畢竟牛扒都有厚薄唔均勻。但係，佢自稱「慢煮」咁就有問題喇。慢煮嘅medium係應該浸到塊扒變粉紅色，唔滲血，再輕輕煎番個牛扒表面，增加番個煎嘅香氣。所以慢煮嘅扒應該係成塊都差唔多熟。如果唔打算用慢煮嘅方法，其實menu唔寫嗰兩個字唔會影響個presentation嘅？伴碟嘅蔬菜落咗醋同蒜蓉汁，比較特別。個薯蓉最好食，牛油味好香，真係用薯仔嚟推，唔係薯蓉粉開。Tiramisu味道係正常嘅，不過食落仲係太凍，有少少未退冰嘅感覺，如果提早少少拎出嚟放室溫會比較好。同埋咖啡味可以再重啲，感覺上啲餅未浸夠咖啡。杯Latte有少少震驚到我，雖然我都估佢係咖啡機出嚟，但個奶泡面好似生嘢咁一撻撻真係好樣衰。飲落冇問題嘅，正常味道。响柴灣工廠區收得$248+10%，評分又咁高，本來有少少期望。可能柴灣區嚟講佢係好頂尖？食完我唔明點解會係4-5分。非常普通嘅港式西餐，材料係靚嘅但煮法有待改善。值得一提兩點：1. 預訂一位係比較困難。網上訂位只接受兩位或以上，我嘗試打電話去訂位，接電話嗰位男士叫我WhatsApp 番同一個電話號碼訂位。我下午6.30pm send咗message 過去，結果佢2:15am先send番confirmation俾我。2. 坐窗口位嘅時候，個冷氣吹到正我個頭同後頸，餐廳話因為廚房嗰邊好熱，所以唔可以熄細個冷氣。之但係，你裝咗個冷氣檔板，係可以調節個吹風角度㗎？點解你要較到吹住個客個頭呢？可唔可以吹高少少，高過個頭呢？同埋其實吹到啲嘢食凍晒，全餐飯基本上係凍食，除咗杯咖啡啱啱上嚟有兩口係暖嘅，唔夠5分鐘都凍晒。所以，响呢間餐廳食飯，揀個可以熱食嘅位似乎係比較重要。…查看更多

3.45pm，店舖冇落場，只有1-2枱客，俾我哋坐卡位。叫咗醃篤鮮、紅燒肉同鍋貼。三樣嘢差唔多同一時間上枱，呢一點幾驚喜。醃篤鮮料好足，料仲多過湯，個湯好有鹹肉香味，啲鹹肉同瘦肉一樣咁多，切到大大舊。個人覺得鹹肉可以少啲，切細舊啲，煲番耐少少，咁同樣出到味而唔會食嘅時候太鹹。筍好新鮮，爽脆清甜。百頁結煮得夠淋，但唔太入味。紅燒肉啲肉好靚，係五花腩肥瘦相間，味道正宗係甜口嘅醬油味，但係煮嘅時間唔夠，未係好入味。筍同冬菇好味。鍋貼煎得好靚，但係個餡偏乾身，唔夠油香同肉香。整體都係傳統上海菜嘅口味，師傅啲材料切得好豪爽，係好街坊嗰種唔係走精緻路線。如果俾少少時間再煮番入味少少會更好。餐廳內部都乾淨企理，老店嚟講係好難得。…查看更多

網上見到呢度好靚，訂咗位嚟食Afternoon Tea set $458+10%。下午三時才開始，由於早咗十五分鐘到，佢話可以提前order個茶飲住先，到夠鐘先上個tea set。由於我哋想飲咖啡，所以都冇提前叫茶。Waitress有主動俾兩杯水我哋。我見隔離枱個tea pot 都好大，可以裝到3-4杯茶。一到三點個waitress 已經幫我哋落咗單，隔咗十分鐘左右就上菜。大部份食物都係放响行李箱入面，scone放外面。一大開係覺得好靚，又有鏡面，好適合打卡。一開始見到行李箱個底係放唔同嘅豆，已經覺得好唔衛生。我唔太相信佢每個set都會換新豆。就算佢真係每次都換，啲豆本身响原產地都係周地擺，除非餐廳買番嚟會洗完再焗番乾，否則啲豆都係唔乾淨。啲三文治同埋macaron都係直接放响豆上面，蛋糕就放响塊餅先放豆上面。三文治一拎起已經黐住晒啲豆，側面都說明啲麵包好濕，好明顯係整好放過入雪櫃先再上碟。我哋跟番佢個menu嘅次序去食，鹹食再到甜食最尾食個scone。三文治如之前提到，麵包好濕，食落凍，味道普普通通，感覺唔係好新鮮。Shortbread 好食，但好細粒，似係跟咖啡嗰啲小點心咁。甜點個strawberry mousse cake 同passion fruit cake都好食，唔甜而個果味好濃郁。Vanilla ganache 一般。甜點有個比較疑惑嘅點，就係到底墊底塊餅係要食定唔食？因為嗰塊餅本身有啲味道，我覺得唔食塊餅會好食啲，但食埋塊餅又會有個脆脆口感，所以見仁見智。但嗰幾塊餅有啲潮潮哋，我諗如果啲餅唔放入雪櫃會好啲。Scone咬落唔鬆，食落都唔香，個餡係紅棗味我個人就麻麻地，換轉搽佢俾嘅士多啤梨jam都唔見得好食咗。主要係個scone焗唔起，實得得個口感真係唔得。整體嚟講係好失望，只有1-2件餅算好食，咖啡唔香偏淡口，加埋一成五舊水，銅鑼灣其實都有好多其他選擇。另外，佢呢度目測除咗個經理，其他侍應都只係識講英文，如果安排約會就睇吓適唔適合啦。佢啲梳化位好似要提前book，如果遲book就會俾窗口位，介意嘅就早少少預訂。我見如果係慶祝生日，餐廳會安排影相，訂枱時要預先講埋。…查看更多

食咗個$298的tea set，估唔到都幾精緻喎！第一層有龍蝦沙律，三文魚卷同埋鵝肝多士，有啲估唔到，雖然細細舊，都幾好食。第二層有炸蝦生菜卷，焗蔬菜撻，迷你牛肉漢堡同炸蝦。佢呢度係做東南亞菜，所以個牛肉漢堡有啲薑味，估唔到都幾驚喜喎。第三層係甜點，朱古力brownie正常味，士多啤梨mousse cake同奶凍都係椰子味嘅，嗰啲蜜糖珠珠有陣香味連埋椰子奶凍食都幾特別，但奶凍太實，口感差咗少少。藍色嗰舊估唔到係綠茶蛋糕，呢個淡口番少少都幾好食。馬卡龍係焦糖同另一舊疑似cream味，正常發揮。整體甜點偏甜，所以要提早叫定咖啡/茶，邊飲邊食比較好。咖啡都好飲，有層crema，好香。熱茶係breakfast tea。下午茶時間冇乜人，很清靜，就算叫杯嘢飲傾吓偈都唔錯，肯定舒服過Starbucks或者Pacific Coffee。我哋响Openrice app預先訂位，仲有七折，超抵！我哋都係即興去食，所以都係半個鐘前訂咋，方便。…查看更多

約咗朋友兩個人食lunch，叫咗兩位點心餐。可能即叫即蒸啦，點心都要等十幾分鐘先上第一個腸粉。上到嚟個樣已經怪怪哋，一夾成舊散開咗，而其餘三舊都係一夾就散開。腸粉味道一般，啲皮太淋直頭爛，啲蝦正常都大隻，旁邊條菜淋到無牙都食到，都幾明顯係蒸過咗龍。蝦餃啲蝦係大隻爽口嘅，有筍不過冇豬肉，香味唔夠。個皮又係一夾就爛。燒賣正常。牛肉球正常。三個蒸點普普通通，唔算特別好食。菠蘿叉燒包，可能夠熱啦，呢個好好食。煎粉果外脆啲餡食落好爽口，好食。海鮮酥入面係全蟹肉，呢個好驚喜，全日最佳，對得住米芝蓮一星。主食揀咗薑蔥撈麵，我唔睇番個餐牌都唔知原來全名叫「叉燒薑蔥撈麵」嗰啲叉燒細粒到你以為係炸豬油炸完撈漏咗幾粒豬油渣咁。佢個麵食落就唔係太重蔥油味，個碗底有啲淡豉油浸住，咁我就唔明咁仲係咪算合格嘅撈麵喇？同埋啲豉油浸住都幾咸吓。甜品係紅棗糕同竹葉角（紅豆糯米糕？）。紅棗糕係交嚟嘅貨，竹葉角好食。服務其實麻麻哋，得3-4枱客，3個樓面都成日搵唔到人。經理上籠點心俾我，幫我拎開咗隻碟，樓面姐姐收番個籠又唔會放番隻碟埋嚟。上點心drop低即刻走咗去，想問佢拎辣椒醬都要叫一陣。叫埋單仲離譜，嗰兩個女職員見到窗邊兩枱客都舉緊手，直接擰轉面背住啲客。點心餐$358/位， 茶位$30/位，我諗銅鑼灣有好多更好嘅選擇。不過如果你想中午搵個一定有位嘅酒樓，呢度大推。…查看更多

任何時間經過都有條人龍，排隊10-15分鐘到。滷水好香，夠味但唔會死咸。滷水鵝好嫩滑，皮好入味，有一層薄薄的脂肪，食落有陣油香味。由於個鵝太好味，再食雞翼就覺得差咗啲，所以我啲雞翼留番第二日翻熱食。豆腐正正常常。店家俾咗醋汁同滷水汁，如果鍾意食濃味可以點番滷水汁。價錢參考：我買左下庄，四份一，按重量$188。上庄$163。…查看更多

買咗兩個外賣沾麵返屋企食。原本睇咗上兩個食評，有啲驚驚哋。但我哋打開個外賣已經聞到個沾麵湯好香。叫咗一個龍蝦一個魚介。個龍蝦湯好似西餐啲龍蝦湯，真係有幾粒龍蝦肉，有啲燉豬肉粒好入味。魚介似有啲煙燻味的忌廉魚湯，都有豬肉粒。兩個湯沾麵都好夠味。每個麵有兩片日式叉燒、兩片筍、半隻溏心蛋。叉燒好入味，入口即化，好正！整體我同老公都覺得好好味，會再食，下次試吓堂食湯麵。…查看更多

Carnival food court 入面，睇賣相好靚，但食落好普通，唔值呢個價錢。塊漢堡扒好似放响個爐慶住，所以佢表面已經乾晒，入面over cook咗，就算塊肉係靚食落有肉味，但就係太熟冇肉汁。個蛋係好食，亦都係即煮。個飯都有心思嘅，入面有啲磨菇，有啲汁炒過。個飯啲汁都俾得多嘅，就算個飯本身調味淡啲，加埋外面個汁都夠味。成個飯有一點好奇怪，望落去好似樣樣都熱，仲有少少煙添，但食落口唔熱。…查看更多

晚上7.30路過，大約15人排隊。雖然佢店面見唔到蛋撻，但佢其實將啲蛋撻收响入面啲枱面同埋店面最左邊的隱藏麵包架，所以只要排隊其實都買到。$12/個，買6個有盒，紙袋$1。我哋買咗兩個現場食，暖暖哋，好脆，有蛋味，唔會太甜，佢啲甜味係突然中間有一啖特別甜，但邊邊係唔甜。整體都好食，太古城嚟講算賣得平，唔使排隊排好耐嘅話，都會再買嚟食。…查看更多

呢間餐廳好多侍應都係韓國人，亦有好多韓國人嘅客，門口係韓國超市，幾有期待。兩個人普通晚飯，叫咗一個豆腐泡菜湯，一個烤韓牛肉餅（配飯）。豆腐湯用咗新鮮泡菜和老泡菜，少少豬肉片，好濃味，係正宗的韓國口味。烤牛肉餅第一次食，估唔到係成舊都係牛肉，佢有啲似中式嘅蒸牛肉餅，但佢唔係碎牛肉，啲肉小片小片撈埋洋蔥，調味甜甜哋，佢煎到個面有少少香口，幾好食，好濃牛肉味，夾埋啲蔥花食又係另一個味道。小菜俾咗五個款，幾有心思，仲可以添食，正！見隔離枱啲菜式幾好樣，有機會再試吓燒韓牛同豬手。…查看更多

Fashion Walk行街見到間餐廳幾靚，又有正餐同甜品食，咁啱又唔使等位就入咗去食。叫咗門口推薦嘅蟹粉烏冬，同埋menu推薦嘅杧果拿破崙。個烏冬$208，自動跟咗沙律，餐湯同飲品，可以揀焙茶或者咖啡。沙律啲菜好新鮮好甜，跟芝麻醬食幾好味，味噌湯就正正常常。蟹粉烏冬用個蟹型碟裝住，旁邊有花雕酒同蟹醋提供。撈勻咗啲蟹粉同烏冬，第一啖食番佢冇落醬料嘅原味。一言難盡。。。唔熱，冇味，好似食緊白烚涼伴烏冬咁，啲蟹粉都冇味但有陣腥味，如果專登夾條蟹肉嚟食，會食到少少甜味嘅，但係由於份量太少，同啲烏冬一夾埋就淨係食到腥味。見佢個花雕酒咁靚，就噴少少落去睇吓佢味有冇好咗啦？結果係冇嘅，多咗陣酒味，但由於我對酒精嘅苦味比較敏感，所以而家變咗又苦又腥，仲衰。之後落埋蟹醋，好好多，因為終於有味。所以，$208我食咗一碟蟹醋撈烏冬，加少少蟹殼碎。好彩之後嚟個甜品好好好好好味，咁先開心番。個拿破崙啲酥皮焗到好脆好脆，就算有好多cream都冇變軟。我哋分開一層一層嚟食。第一層係杧果同cream，啲杧果俾得夠多，好香甜，啲cream 打得好靚，好挺身，好順滑，但又唔會太甜。第二層係杧果同mochi，mochi有啲花生碎，煙煙韌韌，又係另一個味。第三層係雲呢拿雪糕同cream，食到第三個口感。呢個甜品係大推薦！！最後個咖啡我哋要咗Americano，正常日式有陣炭火味，比UCC濃味啲，幾好飲。如果食甜品都會再嚟呢間。…查看更多