Jhcc09's Profile

早排同朋友去咗食午市火鍋放題，仲要最長可以食4.5小時，星期一至五2pm後入座仲有88折~ 叫咗Level 3嘅餐只係$218/位，超過60款火鍋配料任食，因為想食海鮮所以加埋$40升級~ 湯底揀咗胡椒豬肚雞同芫荽雞，朋友好鍾意佢個胡椒湯底，味道濃厚，豬肚軟腍，朋友堅持要encore一碟豬肚加料~ 🤣肉類encore得最多係Prime Grade美國安格斯牛肩胛肉，薄切大大片，油花均勻，另外西班牙伊比利亞黑毛豬都好食，肉味香濃~海鮮最鍾意海蝦同墨魚仔，火鍋配料全部都係QR code落單，夠衛生，冇漏單，食咗以下呢啲都唔錯: 手工三寶丸、炸魚皮、生根、八吋長蟹棒、爆漿貢丸、牛柏葉、腐皮、香菇雞軟骨餃等等…我覺得呢度最正係可以食4.5小時，坐卡位又舒適，成餐飯食得好鬼慢~ 😋…Read More

餐廳名改得幾好，顧名思義係主打大排檔小炒，星期日大約六點到達，已經九成滿但唔使等位，食完門口已經有好多人了，比起酒樓會坐得迫少少，有大排檔嘅熱鬧感覺~🔘蠔仔粥 $168好抵食，超多蠔仔，而且都大隻肥美，一啲都唔腥，個湯有鮮味，加埋脆米，香蔥、芫荽同肉碎，口感層次豐富~🔘拔絲咕嚕肉 $148其中一款招牌菜，外層酥脆，肉質鬆軟帶少少肥肉，酸甜味道平衡，個汁收得幾乾身~🔘海虎蝦蒜蓉蒸粉絲 $180 叫咗兩隻虎蝦開邊蒸，仲有好多其他煮法同海鮮選擇，餐牌寫得好清晰，蒜頭係鋪滿晒成隻蝦，非常香，蝦肉鮮甜爽彈，粉絲可以再多啲~🔘椒鹽豆腐 $98外脆內軟，炸粉夠薄，調味以椒鹽同炸蒜為主，香口惹味~…Read More

落地玻璃窗，裝修雅緻，平日夜晚都幾多人幫襯，枱與枱之間有距離，唔會太嘈，最緊要食物質素好，大家食得開心~🔘蒜泥白肉賣相同味道兼備，將青瓜同五花肉切成薄片，淋上辣油，再加埋超香嘅蒜蓉醬，口感細緻棉密，非常加分~🔘X.O.醬粉絲蝦煲好大隻蝦，蝦肉鮮甜，粉絲吸晒啲精華最好食，忍唔住一口接一口~🔘招牌酸菜魚 (例）例牌份量都超多，3-4個人食都冇問題，魚肉切薄片保持嫩滑口感，酸辣味道平衡，但竟然見唔到一粒紅色辣椒，食落感覺相對清爽啲唔油膩~🔘三希樓吊燒雞 （半）果然係招牌菜，非常出色，外皮酥脆，肉質鮮嫩多汁，店員話要用三日時間吊起滴油，所以個皮先咁香脆，必點呀~🔘啫啫唐生菜煲簡單又好味嘅菜式，唐生菜超級爽脆，加上蝦醬同蝦米帶出鮮味~🔘香滑蛋白杏仁茶上枱嘅時候已經幫我哋一開二，又香又滑仲好有杏仁味，濃稠度啱啱好~🔘棗茸千層糕味道清甜，口感煙韌，唔會黐牙~…Read More

成日心思思想回訪嘅西班牙菜，食物依然高質，仲係咁多人幫襯，都係一件好事~🔘松露蘑菇/蟹肉/墨汁魷魚可樂餅 $60每款味道叫咗一件嚟試吓，私心推介最濃味嘅松露蘑菇口味，外脆內軟，中間嘅薯仔泥好香松露味~🔘傳統蕃茄多士 $42一咬落去有滿滿嘅橄欖油味道，麵包香脆得嚟有嚼勁~🔘西班牙封門柳 $168叫咗五成熟，先煎香外圍鎖住肉汁，口感軟嫩，有濃郁肉味，仲要唔肥，配搭香滑鷹嘴豆泥~🔘魷魚墨汁飯 $258一煮好即刻上菜，非常熱辣辣，米粒軟糯，吸晒醬汁嘅精華，除咗魷魚仲食到魚肉同蝦肉，加上檸檬汁，味道更有層次，發現好多枱都係食西班牙紅蝦飯，下次要叫嚟試吓~🔘Iced Americano $38🔘Aqua $58顏色配搭好夢幻同夏天，味道酸酸地，幾清爽，唔會太甜~食到最尾先醒起佢嘅蒜油蝦好好味，留返下次~…Read More

身邊有個火鍋buddy，同親佢食飯都係打邊爐，好彩我都鍾意🤣揀咗火鍋放題120分鐘/Set B/$318朋友推介芝士牛奶湯，果然冇介紹錯，肉類加上鹹香芝士味係好正，另外仲揀咗芫荽皮蛋湯，貪佢清清地~肉類叫得最多係以下呢幾款🔘澳洲M7牛胸腹-油花細緻均勻，口感軟嫩🔘澳洲M7大米龍-肥瘦適中，比起牛胸腹更有咬口🔘精選牛板腱-脂肪少重牛味🔘日本鹿兒島茶美豚梅肉-爽口彈牙，冇腥味蔬菜同丸類都夠齊全，擺放得乾淨企理~雖然呢個餐冇海鮮，但勝在熟食、甜品同飲品都好豐富多選擇~我哋都叫咗唔少台式小食，榴槤炸彈、花枝丸、鹽酥雞、台灣腸、麻辣鴨血等等~另外甜品都好多款式，食咗火龍果雪花冰、杏仁豆腐、朱古力雪糕，仲有一人一杯牛奶布丁(呢款唔係任食)，滿足晒食甜品個胃~最後仲叫咗兩杯額外收費嘅台式飲品，Chill芝芒芒同火龍果綠茶，超級飽~ 😋 …Read More

約咗朋友去中環街市食晚飯，撞啱啤酒節，地下嗰層非常熱鬧，最後揀咗食日本菜，坐吧枱睇住師傅製作，頭頂嘅壽司豉油吊燈幾有趣~🔘三味吞拿魚丼 $248齋睇賣相都覺得好食，非常厚切，赤身、中拖羅、大拖羅各三片，，大拖羅當然最正，入口即溶，充滿魚油香，完全食唔到有筋~🔘廚師特選壽司（10貫＋手卷1件） $398由師傅精選最新鮮嘅食材，當日有金目鯛、油甘魚、赤身、魷魚、海鰻、牡丹蝦、蟹肉蟹膏、海膽等，整體新鮮同高質，特別係魚類，可能冬天肥美啲，海膽都好正，夠晒creamy同鮮甜，最後食埋吞拿魚腩蓉手卷，魚蓉多過飯，口感綿密~🔘岸浪園黒糖梅酒 $78🔘岡山梨酒 $68日本酒嘅款式都幾多，果實酒口味好獨特，揀咗兩款容易入口嘅，另外對咖啡酒同辣椒梅酒都有興趣，留返下次~ …Read More

位於圓方嘅中菜，卡位為主，粥粉麵飯、點心同小菜都有提供，服務唔錯，店員成日過嚟斟茶~🔘蜜椒薯仔牛柳粒醬汁甜中帶辣，有濃郁黑胡椒香味，夠鑊氣，牛柳粒相當嫩好好食，就算老人家都覺得好容易咬開，仲有外脆內軟嘅薯仔同大量洋蔥青椒，推介~🔘豆腐火腩煲燒腩肉份量都幾多，偏肥少少，充滿油脂香，炸過嘅豆腐吸收咗醬汁之後好啱送飯~🔘黑椒茄子魚腩煲天氣涼返少少，好適合食熱辣辣嘅煲仔菜，魚腩有驚喜，點做到炸完又炆之後啲魚肉仲咁滑，有少少大骨都容易食，茄子都唔錯，食落唔會太油膩~🔘夏日百香🔘青瓜蘆薈爽做緊推廣，加$8有第二杯，百香果個杯味道酸啲，更解膩~…Read More

呢晚突然想食炒金邊粉，醒起屋企附近嘅呢間泰國菜，由泰國人主理，第一次食覺得性價比幾高，價錢親民而味道又唔錯~🔘泰式燒牛肉沙律 $88食到好多爽口嘅菜，好似洋蔥、青瓜、西芹等等，燒牛肉嫩口，泰式酸辣醬非常開胃~🔘豬頸肉炒金邊粉 $88夠鑊氣同足料，鍾意佢個金邊粉有嚼勁，調味偏酸，每啖都食到芽菜同蛋絲，口感豐富~🔘泰式燒大蝦 $78有驚喜，蝦幾大隻，口感爽彈鮮甜，食到蒜蓉加牛油香~🔘芒果糯米飯 $38做緊堂食優惠價，糯米飯軟糯帶嚼勁，淋上味道濃郁嘅椰奶醬汁，好味又抵食~🔘原個鮮椰青 $35係大size嘅椰青，味道清甜，超多椰子肉~…Read More

又去韓國街食韓國菜，主要係見佢個菜單有豬手，成日睇韓劇見人食豬手，想試吓呢~🔘韓式豬手&五花肉 $318燜煮過嘅豬手好入味，五花肉肥瘦相間，肉質軟腍，唔會好乾，包生菜或者就咁食都好味，想講伴碟嘅雜菜沙律好好食，主要係椰菜絲、生菜絲、洋蔥等等，非常爽口又解膩~🔘韓式石頭飯 $120 可揀豬/牛/雞/素菜，最後揀咗牛肉，口感有啲似免治牛肉或者係牛肉餅，有牛嘅脂香，牛肉好食已經加分，但最加分嘅係超級香脆嘅鍋巴，整體係好好食嘅Bibimbap，我俾超過90分，尤其鍾意食鍋巴嘅朋友一定要試吓~🔘Apple Soda $15🔘Korean Sweet Coffee $18飲品定價唔算進取，咁大杯咖啡先收$18，仲要幾好飲，如果平日17:30-19:30點米酒嘅話仲有HH價錢，米酒嘅款式都幾多架，用米酒嚟Happy Hour真係未試過~ 🤣🤣總結兩個主菜都幾好食，感覺係正宗嘅韓式料理，可以回訪有下次~ …Read More

幾鍾意呢間餐廳嘅裝修，藍白色為主，有格調又俾到人relax嘅感覺，似一間法式小餐館~晚餐揀咗兩個小碟加兩個主菜 (2A + 2B)，已經包咗餐湯同麵包，都幾豐富~🔘蟹肉牛油果他他賣相精緻，多蟹肉，蟹肉鮮甜，牛油果口感順滑，加咗檸檬汁特別清爽開胃~🔘法式烤黃雞呢晚嘅亮點，朋友覺得每個part都好好食，薯蓉非常綿密滑順，同松露野菌汁好夾，未開始食燒雞已經K.O.晒啲薯蓉，燒雞多汁，肉質嫩滑，雞皮香脆，推介~🔘阿根廷安格斯肉眼牛扒叫咗五成熟，切開肉質粉嫩，口感軟嫩，靚油花，簡單調味已經好好食~🔘火焰橙酒可麗餅講起法式甜點一定會諗起可麗餅，店員會即場燒一燒橙酒再淋上可麗餅，食到橙酒嘅餘韻，加咗橙皮絲作為點綴，餅皮柔軟，冰火交融~🔘Peach Sunrise🔘TropicoladaOrder晚餐可以八折加點Wine & Bar List嘅飲品，兩杯都試咗，自己鍾意Tropicolada多啲~…Read More

真正隱世嘅餐廳，正常唔會路過，跟佢社交平台有個post講點樣嚟，咁就好容易搵到~餐廳裝修時尚幾elegant，尤其鍾意吧枱設計同兩邊大窗對住綠油油嘅植物，令人可以喺放鬆嘅環境下用餐，今次食嘅High Tea Set係為咗慶祝餐廳開業13周年而推出，$368/2位，價錢其實幾抵，仲送紀念杯墊~🔘Savoury Bites總共有四款鹹點，最鍾意迷你鮑魚撻，鮑魚爽口，撻皮香脆~另外幾款鹹點分別係雞肉漢堡、火腿蜜瓜卷同鮮蝦鵪鶉蛋串，size偏迷你，但幾精緻，味道都唔錯 ~🔘Sweet Bites首先想讚吓個鬆餅，幾好食夠鬆軟，配搭玫瑰士多啤梨醬同Clotted Cream~另外都推介抹茶馬卡龍同草莓蛋白餅，兩者口感有啲似，薄脆帶有咬勁，唔會黐牙，又唔會太甜~咖啡奶凍，咖啡味香濃，口感順滑~芝士蛋糕香滑，正常發揮~🔘Provence Moonlit好靚嘅淺紫色，幾鍾意面頭嘅檸檬蛋白泡，主要係薰衣草同Gin的味道，餐牌有標示Alcohol/Sweet/Sour Level，方便客人揀到心水飲品~🔘Peaceful青蘋果同青檸嘅配搭，小清新好refreshing，冇酒精~總結鹹甜點都出色，環境同服務都好好，大加分，呢個Tea Set係期間限定，供應期直至10月31日~…Read More

裝修有異國風情嘅西餐廳，坐得舒服，除咗食晚飯，都有人嚟Happy Hour~🔘Tuna Chunks炙燒過嘅吞拿魚肉，外圍包裹住超多芝麻，面頭灑上芒果莎莎醬，口感豐富~🔘Prawn Mango Avocado Salad通常都會揀有牛油果嘅沙律，話晒都係Super Food，份量好足，有大蝦、芒果、牛油果、雜菜、黃椒、蕃茄仔等等~🔘Crab Linguine意粉彈牙，多蟹肉，充滿蒜香同橄欖油香味，調味啱啱好~🔘Surf & Turf豐盛的海陸餐，牛柳叫咗五成熟，外層有炭燒風味，一切開相當粉嫩，肉質細緻，唔會太肥，大蝦用牛油煎香，肉質爽彈，配菜一啲都唔馬虎，有大啡菇、蕃茄仔、原個蒜頭同火箭菜沙律~🔘Tiramisu手指餅偏濕潤，咖啡味出過酒味，忌廉比例比較多，入口順滑~🔘New York Cheese Cake芝士蛋糕口感綿密，有濃厚嘅芝士香，可揀配雲呢拿或朱古力雪糕~ …Read More

去完馬灣1868諗住搵晚餐食，嗰邊啲食肆似係輕食同埋好多人，最後返嚟沙灘呢邊食飯，揀咗呢間西餐廳，裝修係度假風幾chill~🔘Mixed Mushroom Salad好少見到沙律會加蘑菇，凍蘑菇好爽口，加埋蕃茄乾，配搭油醋醬汁，好清新嘅前菜~🔘Baby Pork Ribs用濃郁嘅燒烤醬醃製，又甜又辣夠晒入味，肉質軟嫩，輕易離骨，幾肥美多肉，配菜係偏粗身嘅薯條，仲有三款醬汁，總有一款啱口味~🔘Seafood Risotto傳統嘅意大利飯，帶有咬勁，要讚吓個醬汁，質地濃稠，仲好香蝦嘅鮮味，飯裏面加咗魷魚粒，口感豐富~🔘Pineapple Lemonade🔘Fruit Punch呢晚坐近窗位置，對住青馬大橋，望出去幾靚，唔少得要叫返杯Mocktail慢慢飲，如果天氣涼返啲，坐Outdoor枱應該仲正~ …Read More

極近朗屏站嘅一間酒吧餐廳，一出地鐵站喺天橋度仲睇到個靚日落，餐廳有個輕鬆愉快嘅氣氛，斜陽照射落嚟幾chill，適合聚會飲嘢~叫咗Set Menu for 2 ($698)，竟然可以揀三個主菜，食完都幾飽，大滿足~🔘Stuffed Chicken Wings釀雞翼飽滿多餡料，外皮香脆，點埋佢個秘製醬汁更惹味~🔘Ceaser Salad沙律菜新鮮爽脆，食到芝士嘅鹹香同香脆嘅麵包粒粒~🔘Chicken Yuzu Carbonara賣相吸引，加咗勁多parmesan cheese，醬汁creamy偏濃厚，整爆隻溫泉蛋，意粉撈勻啲蛋黃一齊食非常正~ 🔘Lamb Shank羊膝大隻，肉質軟嫩有肉汁，輕易同骨分離，冇咩羊羶味，肥瘦適中，啖啖肉~🔘Truffle Mushroom Risotto飯嘅口感煙靭有咬勁，醬汁充滿松露菇菌味~🔘Tiramisu自家製甜品，有兩層手指餅，濕潤度剛好，酒同咖啡味都平衡得唔錯~平日星期二、星期三都分別有steak同wine嘅promotion，幾抵~…Read More

呢間Cafe好有空間感，多綠色植物，俾人感覺好舒服，嚟到先知佢同悅和醬園做緊Crossover，作為荃灣街坊梗係有聽過悅和醬園，係僅有嘅香港品牌，門市喺荃灣街市街，佢哋嘅醬料都好出名~🔘悦和米酒糟漬車厘茄配蕃茄果凍有層次感嘅果凍杯，米酒糟加車厘茄呢個配搭幾特別，充滿酒香，蕃茄果凍好好味，酸甜開胃~🔘自家製炸雞可樂餅配悦和極品甜醋香脆可樂餅嘅外層，包裹住雞肉，甜醋醬相當有存在感，好加分~🔘悦和潮式辣椒油炒煙鴨胸貓耳朵粉估唔到用辣椒油炒貓耳朵粉咁好食，個粉煙靭有咬口，又麻又辣好惹味，仲好香蒜味，鴨胸肉質柔軟~🔘烤悦和混醬日本豚飯.蒜香醋紅椰菜.泰露筍顏色鮮艷，五花肉肥瘦適中，日本米飯先係呢個菜嘅重點，口感飽滿彈牙有黏性，撈埋悦和混醬同半熟蛋就更加正~🔘盤鹽梅子咖啡漸變色好靚呀，一開始七喜同梅味會出啲，飲到尾會慢慢飲到咖啡同鹽味，味道層次豐富~🔘Guava Oasis最鍾意飲芭樂汁，清甜解膩~🔘開心果意大利芝士蛋糕杯個cream嘅質地比較輕盈，食晒成杯都唔會覺得太邪惡，開心果味濃郁，中間嘅芝士蛋糕唔會太濕啱啱好~總結呢個Crossover做得幾出色，中西fusion菜，又好能夠突顯出中式醬料嘅特點!!臨走見到有個corner display咗好多悅和醬料，俾枝芫荽豉油吸引咗眼球，仲要係香港製造，搵日去買先~…Read More