lady_blue's Profile

藍妹好少比負評，首先講明先，負評唔係比食物既，食物係唔差既。食物既評價會放係最後，因為想重點講返負評既部分。—藍妹同朋友睇Menu 果陣，因為怕小食係店鋪送既其他野，所以有特登問侍應，午餐送既小食係咪揀最尾「小食」果部分，自己揀？佢話係，於是我地先放心叫。點知去到另一個後到既朋友點餐果陣，見個侍應冇問朋友要咩小食，問多句，個侍應先話可以叫，加錢就得。個朋友最後冇加到，但叫左既我地幾個，就一路食一路研究個 Menu，愈諗愈嬲，始終覺得個 Menu 誤導消費者。Menu 小食果部份有寫＄18 加配，但前面寫明「套餐奉送自助沙律吧，小食及麵豉湯」，最後全部人既自助沙律吧同麵豉湯的確係送既，唔洗錢，咁點解中間既小食係要加＄18 呢？要加$18 先送既小食，仲係咪叫送呢？想講唔係錢既問題，本來要加錢先有既話係冇問題，問題係實在唔應該寫奉送，然後又係後面話加錢，咁樣就係誤導消費者。我地3個叫咗3樣小食，黑松露薯條、唐揚炸雞同雞軟骨。黑松露薯條同唐揚炸雞(2 件)，份量 OKAY 既，但雞軟骨……只能講只要你唔覺得有問題，就冇問題。$18咁樣一條，實在有太多更好既選擇。最後講一講侍應既態度，由我地係門口話5位，佢地明明聽到見到，都冇理我地，隔左一陣見佢行入去，我地跟埋入去，佢地先求其篤一張枱示意我地坐。係間鋪得2-3張枱同佢地好得閒既情況下，我地舉左手叫幾次，佢地又係見到聽到，都唔回應一下，又隔左一陣先慢慢行過黎。朋友未食已經有啲火氣，唔想再幫襯。—好，最後講返佢既食物啦，其實係唔錯既。吉列蝦洋蔥牛肉丼藍妹叫既呢個份量好足，蝦細細隻，炸得香脆，洋蔥牛肉好多，牛肉有少少老，但味道搭救，醬汁多，撈飯一流。—另外朋友叫左既刺身飯，三文魚飯，綠茶蕎麥類，柚子豚肉丼，幾樣野大家都話幾好食，份量亦算大份。—總括黎講，對藍妺黎講，服務同餐飲體驗相當重要，尤其是呢間唔係連鎖快餐店，基本既野藍妹都希望店舖做返足。呢篇食評都係想提醒大家有呢個收費問題，如果大家唔介意呢樣同服務態度麻麻，咁單為左野食去食，都係可以的～…Read More

一直以黎好少食韓國炸雞，於是遲遲都冇食過呢間過江龍，今次決定要一試！7點去到冇乜人，任坐咁濟，環境非常舒適，座位，寬敞，2個人坐哂4人枱。😆同平時啲韓國舖一樣，播住韓國歌，電視播住韓國MV。野食種類應該有既都有，烤雞炸雞、年糕、PIZZA、飯等等，絕對夠食嫁啦。🥰—🥢香蒜豉油脆雞🥢脆雞可以揀半份，兩隻味混合同埋轉無骨，今次我地怕食唔哂，揀左一隻味，半份無骨。佢好快已經上枱，熱辣辣，勁香既豉油味。🤪成日覺得係炸雞上面淋汁，會搞到啲雞皮唔脆，但真係好神奇，呢間做得好好，舊舊雞都比充分既汁包住，但係完全唔會淋左，雞皮依然好香脆！😳一路食，淡淡既蒜味會湧出黎，唔會好難頂，豉油應該係甜豉油，始終都係偏甜，好彩未去到死甜，同蒜味夾埋一齊非常惹味！🤤不過始終偏甜，所以keep住食都係會漏，要間中飲啖野飲中和返。—🥢黑松露卡邦尼炒年糕🥢就咁睇已經見到好多汁，好正。一上枱已經聞到濃濃既黑松露香氣。好Creamy，每一條年糕都沾滿卡邦尼白汁，好香，不過略嫌淡左啲，如果加返啲鹽就完美啦。😚—🥢MANGO ADE🥢野飲不過不失，係正常既芒果梳打咁，唔好太甜。不過應該係漏左單，我地差唔到食哂啲野食，佢都未黎。要我催，等左一陣先整到比我。😖—成餐都食得好滿足，野食質素唔錯，份量亦十足，兩個人食好夠，如果多個人，應該叫一隻雞都可以。如果下次再想食炸雞，應該會再返黎食個夠本！😁…Read More

呢間係近日去既第2間既日本餐廳，藍妹覺得成個感覺都好唔同。呢間入到去即刻有位，雖然未夠7點，但都已經有人係到食緊，感覺都旺場。2個人坐哂4人卡位，好寬敞，坐得舒服。雖然環境偏暗，但頭頂有一盞燈照住，整體氣氛都唔錯。👏野食種類唔算好多，正常日本餐廳有既野佢都有，佢仲有我燒和牛同和牛鍋，不過果日比較想食其他野，如果下次再黎，會試下個和牛。野食黎得超快，係超快！基本上係10分鐘內，下面見到既所有野都已經上哂枱。😱—● 蟹籽海膽炒飯 ● 炒得幾好，唔會太油，食到海膽既味道，蟹籽增添左口感，藍妹覺得如果再乾身啲會更好。—● 三文魚明太子串 ● 呢個有啲驚喜，三文魚燒到岩岩好，唔乾，魚油夾埋有啲辛口既明太子，正好中和左油膩感，幾啖已經食哂落肚。—● 德島雞皮餃子 ●雞皮餃子好難伏，最緊要皮薄，炸得好。呢個薄皮炸到勁酥脆，食到lam lam脷。🤭略嫌裡面既肉唔夠多，不過藍妹估都係來貨，唔係自己整。🤔—● 吉列黑豚 ●呢個不得不讚！🥰上左枱一陣我地先食既，但依然好脆，佢既炸粉好好，唔係脆到硬果種，係似天婦羅咁，有啲酥脆，絕對唔杉嘴。豬扒炸到剛好，仲保留到肉汁，肉質唔鞋。🤤🤤—● 油甘魚腩壽司 / 醬油七味燒左口魚邊壽司 ●油甘魚腩食材味道新鮮，肉質偏實，少左啲魚腩既油份。醬油七味燒左口魚邊好好食，比起入口即融，藍妹更鐘意呢種有少少咀嚼感，油香十足之餘，魚既味道可以係口腔停留一段時間，令人回味無窮。😍—● 三文魚腩刺身 / 海膽刺身 (細板)三文魚腩合格既，厚度適中，唔算多油脂位，入口鮮嫩唔會有筋位。海膽有分細同大板，細板已經夠2個人食，唔腥，可以夾係紫菜到食，亦可以撈埋個飯一齊食。—成餐飯好滿足，冇邊樣野食係要彈既，係出菜快得嚇人，如果可以慢返少少比人認真細味就好啦。😜有樣有趣既野，Waiter話佢地落單係唔會用筆寫低，都係用腦去記，希望比到一種同朋友傾計既感覺，而唔係做緊交易咁。呢樣野第一次聽，有趣既想法！😬…Read More

近來真係好耐冇食過日本菜啦，出開屯門，搵左間小店試下。我地6點幾就去食，所以冇乜人，可以任揀位，正！😆環境舒服，座位寬敞，成餐飯都食得舒服。野食種類其實都唔少，除左主Menu之外，仲會有啲當日有既款式，揀左一段時間先諗好食咩。🤣—● 鮟鱇魚肝 ●藍妹一直都超鐘意食 鮟鱇魚肝，鐘意佢好粉又結實既口感，比起鵝肝少左油膩感，味道亦更濃郁。😍呢間既鮟鱇魚肝有3塊，唔會腥，口感正，醬油唔會太咸搶左佢個味。欣賞佢落左少少飛魚子，令到食落去果陣冇咁漏。✌️—● 三文魚腩 ＆ 劍魚腩 ● 三文魚腩唔算好厚，油份充足，偏林身，有三文魚味既。劍魚腩比預期好食，厚身，唔會雪到死實，同樣食到魚味。兩款都新鮮，合格有餘。👏— ● 火灸平目魚邊 ● 燒得岩岩好，油香十足，因為油脂多，基本上入口即融。—● 黑松露鵝肝炒飯 ● 上到枱真係嚇親，冇諗過塊鵝肝咁大塊，兩個人分，每個人都可以分一半鵝肝就咁食，另一半就撈埋個飯一齊食。鵝肝煎得好好，唔會太熟，但個心又唔會未熟滑潺潺。就咁食已經覺得好正！🤤黑松露都唔少嫁，同埋啲鵝肝一齊撈埋落個飯到食，真係好香好好味。🥰飯粒係細粒既日本米，軟硬度適中。—● 蟹膏蟹肉厚燒玉子 ● 藍妹最鐘意食玉子，雖然只係一舊蛋，但係都好考功夫去煎。蛋唔算好厚，最入面都仲食到有啲蛋汁。蟹肉好多，蟹膏有少少似罐頭既，有少少腥味，整體都接受到。勝在餡料同蛋汁都多，如果蛋再厚啲就更好！—成晚食得好滿足，無論環境、食物同服務都好滿意，唯一要注意既係佢地上菜真係好慢，唔知係咪得一個廚師，平時藍妹食野都快，一個鐘內乜都食完，果晚食左至少半個鐘，有9個字都係等緊野上菜。不過Waitress都有講唔好意思，如果唔趕時間，鐘意慢慢食既人，呢個可能唔係缺點。🤨…Read More

去開尖沙咀行街，見到the one裡面有間幾靚既台飲鋪，忍唔住又想試下啊！-佢既選擇唔算多，藍妹對佢既焦糖系列同水墨風系列都幾有興趣，水墨風應該係佢地招牌？畢竟佢叫「茶墨」，就咁望落去，都覺得好有意境勁有feel。😌不過最後都係冇叫到，始終想叫番啲普通啲嘅嘢。😜-喺counter叫完嘢飲或者嘢食，就可以去旁邊嘅座位坐低慢慢等，座位唔係多，但都坐得算舒服。-我個friend唔太鍾意飲甜野，難得見到佢有人蔘烏龍茶，佢就即刻叫咗。😆人蔘烏龍茶：味道甘香，有一條好細條嘅人蔘，味道都算唔錯，如果唔鍾意飲甜野嘅人都可以試吓。❤️黑糖珍珠鮮奶鐵觀音：藍妹覺得佢嘅黑糖唔算好甜，珍珠都煮得夠軟糯，奶味唔係好重，茶味一般，不過整體來講都合格嘅☺️見到佢有芝士蛋糕賣，又忍唔住口想試吓啦！梳乎里芝士蛋糕：疏乎厘嘅效果冇乜，但係芝士味好濃，口感似一般嘅紐約芝士蛋糕，鍾意芝士嘅藍妹相當滿意！😍-價錢唔算好平，但性價比還好啦，有機會經過都可能會再買來飲下🤔…Read More

今次係藍妹第2次飲NETTEA，記得第一次飲果陣覺得佢好特別，但一直冇機會再試。今次同幾個朋友一齊去開旺中，行開先發現原來呢到開左間，即刻拉埋幾個朋友一齊試。－佢個Menu睇到我地眼花繚亂，太多選擇啦，樣樣都想試下。可惜佢既蘋果脆脆楓糖堅果奶蓋茶冇哂，本身幾期待。最後我地幾個揀左繽紛火龍果奶蓋茶、檸好堅果奶、朱古力榛果堅果奶、黑芝芝堅果奶。－老實講，四十蚊一杯其實真係好貴，但係飲完會覺得佢真係真材實料既。等緊既途中望下佢既門面，貼左好多同路人既野，令人有窩心既感覺。－唔算等左好耐，５分鐘左右就有得飲啦。藍妹每樣都有試下，最鐘意既應該係繽紛火龍果奶蓋茶。去過好多間台式茶飲店，絕大部分既奶蓋整得幾好味都好，始終好快都會變稀，最後溶哂。但係呢間真係例外，佢既奶蓋係藍妹飲過唯一一間飲到最後奶蓋都完全冇溶，仲愈飲愈傑。應該係佢地用堅果奶既原因，同動物奶既成份唔一樣，所以效果都唔同。咁樣令杯野好飲好多，因為飲到尾啲奶蓋都仲係會到，可以飲到啖啖都有，味道一直好濃郁。另外三杯略略點評啦。檸好堅果奶：檸檬味唔會好重，只係略略既酸甜味，夾埋堅果奶有啲奇怪，但係唔會太衝突既。朱古力榛果堅果奶：朱古力味相比起榛果味較淡，整體味道做得好平均，甜度適中。黑芝芝堅果奶：呢個芝麻味幾重，整體偏稀，甜度偏低。－整體藍妹覺得唔錯，不過認真，如果唔太好堅果奶既味道，真係未必岩你地。佢既味道係相當特別，而且全部都唔會好甜，同其他台飲唔同，呢間飲完反而會覺得健康左咁。…Read More

自從疫情爆發之後，都好耐冇食過雞煲，有咩開心得過一班人一齊恰下恰下。不過今次同朋友2個人食，早早去到，唔洗等位。可能因為新開，環境非常乾淨，裝潢幾特別，好光鮮。2個人坐卡位，好闊落，坐得好舒服！今次勁方便，坐正係野飲櫃對面。野飲選擇唔多，不過都夠飲啦。—藍妹唔食得太辣，所以揀左微辣。雞煲兩個人食，淨係食雞真係都好易飽。微辣其實係近乎唔辣，香味十足，超級夠味。雞滑嫩，肉都入味，好滿意。食到咁上下，又係加湯打邊爐既時間啦。佢好似係加雞湯／豬骨湯，但講真真係好淡，加第一次湯已經覺得冇乜味，再加多次直情冇味。我地後尾頂唔順，拎左碗豉油倒哂落去，咁先叫做有返啲味。—藍妹一概冇食魷魚，不過聽朋友講都唔差。藍妹好鐘意食佢既蟹籽墨魚滑，超滑超重墨魚味，加埋蟹籽口感同味道都一流。—我地淨係食左牛肉豬肉，牛肉不過不失，薄薄的，有肉味。我地唔係食肉獸，所以淺嚐就冇再encore啦。—脆魚鯇真係可以好好食，亦可以好難食。呢間既還好，口感爽口既，但煮耐左就好易散哂。—自家製響玲，呢個係藍妹成晚最鐘意既！呢個真係好值得一試！未浸湯之前已經好鬆脆，係鬆脆！唔係又軟又實果啲。浸完湯依然保持到入口化開既感覺，而且吸湯能力都好強，食到我地兩個lam lam脷。—最後食乳酪係指定動作，乳酪一定好食既，至少一人兩杯。—兩個人食左好耐，食到勁飽，埋單都係200蚊一個人，性價比真係唔錯。…Read More

藍妹唔知點解對沾麵情有獨鐘，比起一般湯拉麵，見到有沾麵食會更開心！入呢間鋪頭既時候，冇諗過佢有哂藍妹鐘意既雞白湯同沾麵！😱拉麵店通常都係得幾款麵嫁啦，不過唔洗多，最緊要好食！既然藍妹鐘意食雞白湯同沾麵，冇理由唔食啊。😁－蘆薈提子梳打冰好似冇蘆薈？佢就係普通既有汽提子汁，勝在夠大杯。－櫻花蝦沾麵一碗係麵同腩肉，另一碗係蝦湯。麵係自家製既，口感唔錯，偏煙韌，雖然未去到令藍妹好鐘意既程度，但掛湯效果唔錯呢。腩肉一啲都唔硬呢，唔會柴皮咁，厚厚一層肥膏，真係有啲嚇人。😬一大啖咁食落去，油香好重，不過唔可以食得多，太肥膩啦。櫻花蝦湯，蝦味真係好重，就咁飲一啖試下，超咸！😵用麵條沾湯去食，即刻冇咁咸，好惹味呢。整體黎講比藍妹預期出色，如果冇咁咸會好好多。😯－濃厚雞白湯拉麵藍妹係日本食過雞白湯拉麵，覺得好特別，香港亦比較少拉麵店有。呢間既雞白湯拉麵，一定冇日本既咁好食，湯頭清淡，有淡淡既雞湯味，唔錯。😋不過好奇怪，愈食就會愈淡，去到後面直頭覺得冇乜味了。但係雞件值得一讚，唔會老，雞味好濃郁，好好味。😍－胡麻冷菠菜菠菜份量唔少，麻醬超級多，多到酸啊。菠菜唔會好老，凍食好開胃。😉－整體呢餐比藍妹預期好食，兩個麵都有進步空間，但係藍妹食得都幾滿意。…Read More

好耐冇去過熊貓食野啦，幾個女仔久違既一聚，簡簡單單食一餐吧。呢間野好耐之前已經食過午餐，不過不失。今次姊妹話食，即管試埋晚飯啦。😊—門口有隻大大隻叮噹，十年如一日，已經係呢間鋪既象徵物。—唔係專食拉麵既日式拉麵店，有飯同各樣小食。今次唔太想食麵，於是決定叫個飯試下。🤗—等左一陣，好快就上菜有得食。😉賣相唔錯呢，有個蒸蛋，沙律同味蹭湯。—溫泉蛋牛肋條飯溫泉蛋做得相當唔錯，流心效果一流呢。原本好怕牛肋條得好少，驚唔夠食，點知都好多喎。😲牛肋條都算林身，未做到好軟身既質地，但好入味，藍妹幾鐘意。🤗不過整體個飯唔夠熱，扣左少少分。😫—蒲燒鰻魚飯鰻魚大大條，幾厚身，能夠滿足到食慾，對得住個價錢啦！🤣—札幌螃蟹拉麵呢個相對冇飯咁好食，湯頭偏咸，拉麵中規中矩，唔係特別出色。螃蟹肉有點兒失色，質地有啲散。🤔—北海道南瓜炸薯餅南瓜炸薯餅永遠都唔會令人失望，炸得香脆。裡面好足料，滿滿都係南瓜，味道香甜，超鐘意！😍—全熟桃味梳打汽水／富士山柚子梳打口乾乾點可以唔搵啲野飲下啊，見佢有啲日本既飲料，好似幾正。兩隻味都比預期正好多呢。😱桃味梳打比較甜，但唔會覺得好假既糖水味，係好清新既甜桃味。至於柚子梳打，藍妹鐘意佢帶點微酸，令人胃口都好啲。😊—野食唔係好高水準，但勝在整體ＯＫ，而且環境幾舒服，唔會太多人。幾個人小聚一下，都唔錯啊。😋…Read More

而家人人自危，盡可能都唔出街，但有時真係唔可以唔出。😢今日同朋友去紅磡果頭，諗住求其食飽就快快返屋企。「龍門冰室」，呢個名好似成日都見到。7點去到，已經有唔少人食緊野，茶記真係幾時都好多人。🤣一坐低侍應已經比左個紙袋我地放口罩，幾貼心。－野食唔係平時茶記果啲，冇炒河炒飯果啲。係偏西式果種，我地兩個女仔唔係特別肚餓，諗住叫啲小食食下就算。😬－3.6特濃牛乳黑松露雜菌芝士玉子燒估唔到會有玉子燒食，一見到就好想試下。就咁睇好似蛋捲，藍妹以為會係厚果種玉子燒，同幻想有啲出入呢。😲未切已經有好濃既蛋香同野菌味。切開見到好多雜菌，真係雜菌多過蛋好多，鐘意雜菌既一定要食！黑松露味唔算好濃烈，淡淡地，有啲比野菌既汁蓋過左。😫藍妹幾鐘意整體既味道，野菌味好正，蛋亦煎得唔錯。不過藍妹認為蛋餅面唔需要再落燒汁，果種甜味有啲唔夾。🤔－薯蓉焗青口冇諗過青口會咁大隻😱熱食幾正薯蓉同青口一齊食，好味。😜－蜜糖雞翼雞翼有啲細隻，唔肥美，蜜糖好似落得唔夠，可以更進步。－黑松露薯條薯條分量適中，新鮮炸起，一定要熱辣辣食。個醬勁多黑松露，味道自然好濃，藍妹忍唔住點哂咁濟。🤣－檸檬利賓納最鐘意野飲大大杯，唔洗就住飲。😁－想食個平既快餐，但又唔想食普通茶記，真係不妨黎食下。成餐點左幾樣野，都係200蚊埋單，性價比唔錯啦！…Read More

T.O.P.開左咁耐，都冇係果到食過野，今日決定去試一試呢間「LAB EAT Restaurant & Bar」。比正常晚飯時間早左少少，人未算好多，唔洗等位，太好了。😉果到既燈光比較昏暗，座位好寬敞，撐下枱腳不錯呢。－野食選擇都唔少喔，兩個人傾左一陣終於決定到食咩。－首先黎左個包先。通常價格中上，有啲情調既餐廳，個包都會比較特別。有時藍妹認為食個包就會知道間野得唔得。🤔呢間既包唔錯，表面雖然唔係好脆，但係都幾鬆軟呢，微甜既麥味，熱食唔錯。😋－Cranberry Poire Iced Tea（左）；Narcissus（右）Cranberry Poire Iced Tea係蔓越莓汁，西洋梨，檸檬汁，紅茶，梨子汁。Narcissus係荔枝汁，檸檬汁，玫瑰，雪碧。藍妹比較偏向鐘意Narcissus，酸味出啲，比Cranberry Poire Iced Tea少左苦澀味。😯－法式黑松露焗砵酒田螺平時好少食田螺，亦唔係間間都有得食呢。賣相相當好喔！黑松露多到突哂眼，心諗咁重本？一食就知原因啦，黑松露係比較Cheap果種，味道超級淡，落再多都冇用。😖藍妹唔肯定係田螺都係咁定點，但藍妹覺得有啲苦澀味呢，所以上面既田螺真係麻麻。😵不過講到下面既薯蓉同多士，真心好岩藍妹口味。薯蓉調味一流，好香好滑，而多士烘到岩岩好，脆卜卜又香，超正。😍－玉桂脆煎法國鴨肝係咪所有肝類都係一樣味嫁呢？藍妹真係唔係好分得到個分別。鴨肝既份量適中，不得不讚煎得好好，生熟度岩岩好，口感好之餘，味道亦唔差嫁，油脂既香醇keep住係口腔徘徊，好想食多幾塊。😜－西班牙極品橡菓飼黑毛豬相比起牛，藍妹覺得豬反而更難煮得好，因為好易煮到老，肉質就會好差。🤦‍♀️呢到既豬令藍妹相當喜歡，大廚既功力真係唔錯。煎得超級好，一切開係好淺好淺既粉紅色，唔係完全10成熟，Good!😍食落口一啲都唔乾，竟然仲有啲肉汁，配佢既黑松露芥末黎食，滋味無窮喔！佢會配埋紫薯蓉，藍妹食哂。😚－低溫烤焗智利鱸魚柳及烤半熟帶子鱸魚同鱈魚一樣，其實只要唔係煮到熟哂，基本上唔會伏。😊因為呢種魚既魚油好多，所以食落口會好juicy，又香又滑。皮脆肉嫩，呢到既鱸魚合格有餘！不過係落鹽太重手啦，魚皮好咸呢。😫帶子煎得唔錯，表面係金黃色既，肉質仲係滑既，食得到鮮味。－蘋果批佢地話呢個係餐廳自家製既，藍妹幾期待呢。😍嗯.....現實通常都會有啲落差。賣相唔錯，藍妹認為構思唔錯，上面係蘋果蓉，下面係類似千層酥既酥餅。不得不說，蘋果蓉真係好苦，藍妹食左兩啖就放棄左，如果佢地可以加啲糖去中和一下，應該會好好多。😭但下面既千層酥好正，好鬆化。旁邊應該係Vanilla雪糕，食得出係自家製既味道，唔會好甜，好味。😌－呢間野講真都幾貴下，性價比可能低少少，但係講氣氛情調，野食質素，真係唔錯。如果想豪一次食下西餐，可以一戰既。…Read More

距離上一次食呢間「Running燒」，都有相當長既時間啦。香港出現抗爭之後都好少出旺角食飯，今次6點左右就去左食啦。😅—野食唔係好多，不過絕對夠食。豬牛羊雞海鮮，有埋飯麵同小食，總有野岩食。😲—同前菜一齊上枱既有一大片白蘿蔔，唔好以為比你食嫁，其實佢係用黎清潔鐵板。只要你用白蘿蔔去擦塊鐵板，啲鑊「撈」就會一塊塊咁起哂，非常有趣呢。🤔—上次好似冇叫到魷魚鬚，又幾好味啵，大大條又脆。不過始終都係好鐘意佢既煎餃子，煎得好香口，裡面既韮菜同粉絲好好味。😍—呢個冷麵真係好岩藍妹口味，酸酸甜甜，超級冰凍。就算食到飽飽地，再食呢個都唔會濟，甚至令你有返胃口繼續食。😵—咁多款肉，藍妹覺得牛係最好食。佢既肉大部份都冇乜調味，唔會好似其他燒肉放題咁，勁重口味，要不停飲水。呢到既肉燒完可以就咁食佢原本既肉味，亦可以選擇自己點醬汁去食。😀藍妹就選擇食原汁原味。佢既醬汁牛五花肉真係超正，勁大塊薄薄一片，油脂好重，食落口真係甘香到爆！🤤另外，雞腎同烤肥牛都好正，藍妹一叫再叫。😬—藍妹好鐘意食杏鮑菇，不過唔知點解今次燒出黎有啲苦澀味。不過佢上面既燒字好有趣。😬—佢既多春魚好味，多春，燒完食一流！😜—300蚊一個人，可以話貴可以話唔貴，放題任食黎講，藍妹覺得水準唔錯。至少食得飽，食得滿意，環境亦算舒適。😊…Read More

近來成日都係大埔食野，冇計，近近地，又真係幾多野食。😅近來食左西餐，日本菜，今次食下泰國野啦。—佢既Menu好有趣，菜式名同描述都幾好笑，頭兩頁仲會有一啲泰國字既講法，好正。😂我地兩個人睇左勁耐，有好多個都幾好笑。😝不過野食種類真係唔多，唔洗揀好耐。—青木瓜沙律呢個沙律都幾大盤，青木瓜絲好爽脆，加埋酸辣汁。😮作為一個冷盤前菜，真係好Fresh好開胃，兩個人食其實都幾多。如果鐘意酸甜既朋友，呢個會幾岩胃口。😊—Combo小食拼盤（小）兩個人食細既小食拼盤，4款野，每人一舊，岩岩好！墨魚餅、蝦球、春卷同豬肉丸，全部都好好食。😍每樣野都炸到岩岩好，脆又不老。4樣野，藍妹特別鐘意春卷同墨魚餅，無論口感同味道都一流。🤤—招牌菠蘿炒飯配虎蝦食泰國野，點可以唔食菠蘿炒飯。上到枱有啲愕然，真係好大個菠蘿，同幅圖一模一樣。😵插住既一串菠蘿燒過，食得嫁。虎蝦有兩隻，炸到個殼好脆，不過炸得耐得濟，蝦肉有啲老。☹️炒飯味道唔錯，有菠蘿既香甜味，但唔會好重生果味。如果調味重手少少，會更好。😁—泰國巧克力巨人呢個巧克力巨人真係好巨。😱Oreal餅，Kit Kat，百力滋，三兩下就食哂。😬平時苦既朱古力藍妹唔飲既，呢個朱古力藍妹覺得好甜。佢裡面仲有啲朱古力醬，撈混左既話真係超甜。如果好鐘意好甜既朱古力，一定要試呢杯！😜唔好睇佢好似唔大杯，一個人分分鐘飲唔哂嫁！—兩個人最後都唔係食得特別飽，叫做岩岩好。野食既水準係合格既，當然有改善既地方，但賣相好得。小食拼盤亦值得一讚！…Read More

呢個野係出哂面支持香港人既小店，我咁岩經過見到佢貼住既Poster。—金莎朱古力格仔餅新鮮熱辣辣咁食，好正。格仔餅非常脆，金莎朱古力都唔少，唔會太甜。😊—聽講間野既野飲唔好飲，但係藍妹冇試所以唔知啦。格仔餅就唔錯既，不過唔會成日比30蚊食個格仔餅。😢作為香港人，最後都講句，We are HongKongers，香港人加油！❤️️…Read More

好耐之前係荃灣食過一間牛吉列，覺得好正，近來諗起想搵另一間再試。尖沙咀呢間「琥酌」好似電視有介紹過，決定去試下係咪真係正。🤔—果到冷氣幾大，但燒完牛吉列既話又會岩岩好。燈光昏暗，座位尚算坐得舒適。 —話明要試牛，一定要叫啦。佢會上左個石爐先，再加3種調味。由上至下分別係(?原諒藍妹真係記唔住第一個係咩，佢個味似鹽焗雞既蔥油)，海鹽同他他醬撈芥末。藍妹3樣都試哂，覺得第一個最好味，因為蔥油味好香。😍但鐘意食到更濃既肉味既話，用海鹽就最岩啦。至於他他醬撈芥末，味道係幾新穎既，不過唔太夾。😣—頂級安格斯牛吉列御膳和牛幾貴，都係試下安格斯牛算。睇牛既顏色唔錯，紋路都唔錯。侍應話燒大約30-40秒就得，不過我地唔知係每邊30定2邊加埋30秒。😂最後我地每邊大約30秒，唔會熟哂。肉質唔錯，軟熟，牛味唔係太濃，有肉汁。😃藍妹好鐘意佢既表皮，炸過既麵包糠緊緊咁貼住牛肉，少少既脆度令成個口感更好，味道亦更豐富。😋—明太子蛋卷呢個真心好食，好多明太子，啖啖都有明太子充滿住個口。蛋香加少少咸香既明太子，唔會太濃味，但令人好想食多幾舊。🤤—琥酌丼佢既介紹係寫「和牛同安格斯牛肉粒配上自家製醬汁」。我地要左個大Size既，2個人食夠哂。個飯黎到，賣相好似好乾咁。😅食落去出奇地OK喎，整體啲肉冇乜肉汁，但係佢調既醬汁相當惹味。因為係偏甜，其實個味道真係有啲似吉野家既牛肉飯。😕不過最唔同既佢落左菇，所以好香既松茸味。😬飯量同肉量岩岩好，撈哂成碗飯！飯濕度剛剛好。—成餐飯，比起一開始想食既吉列牛，藍妹反而最鐘意個蛋。整體水準唔錯既，但價錢偏貴，如果有興趣想試，都可以一戰既。…Read More