叫咩名好's Profile

啱啱返嚟香港，趁放假入梅窩行吓食吓嘢，見呢間喺OpenRice都有幾多好評，即管入嚟試吓。老闆娘安排咗海邊座位，加上天氣唔太熱，所以望住個海景食嘢都幾舒服。自己一個嚟食，所以冇叫海鮮，嗌咗個咖喱牛腩飯，5分鐘左右已經送到，叫咗少飯但都俾得非常足料牛腩牛筋各佔一半，都炆得好腍好入味，洋蔥青椒等等嘅配菜都好多，咖喱汁調味方面唔係一般茶餐廳嗰種，而係偏向似星洲炒米嗰種咖喱味，幾有特色總括而言，食物質素同埋餐廳環境都好好，價錢亦相宜，下次同屋企人嚟梅窩嘅話會再試埋啲海鮮…Read More

睇網上訪問認識呢間人氣小店，本身都鍾意食慢煮牛所以決定去試吓。平日下午12點到達門口，已經有約10人排隊，12:15開門，啱啱好入唔到第一輪。等到大約12:50入座，和牛丼同埋慢煮牛板腱丼都已經賣晒，嗌咗牛小扒丼（大盛）、慢煮西冷牛丼（大盛）、北海道牛乳蛋捲同埋朱古力味鬆餅，另外2罐汽水。等咗大約5分鐘前菜、飲品同湯都上咗，湯係普通嘅昆布湯，前菜係日式小碟，味道正常。貼心嘅係老闆比汽水我哋嗰陣，每罐都會附有一張紙巾，提醒我哋抹一抹先飲。等多15分鐘左右牛丼都到齊，份量非常足，慢煮西冷有咬口唔會太靭，牛小排油脂豐富但唔會太肥膩，調味亦都適中。另外老闆請咗我哋食一小碟和牛，和牛嘅油脂更加豐富，三種牛各有特色。甜品方面冇乜特別，就係正常預想到嘅味道。最後埋單$290 ，以呢個味道同份量嚟講非常抵食，會想再嚟試吓其他嘢食，唯獨係想食嘅話就真係要早啲嚟排隊喇。…Read More

平日下午茶時段經過，想飲杯嘢食件cake就入去試吓。嗌咗一件栗子朱古力蛋糕，一份疏乎厘 (抹茶雪糕)，兩杯咖啡。蛋糕係好食嘅，栗子同朱古力味都好濃，而且唔會太甜，疏乎厘同其他食評所講嘅一樣，入面係比較濕，但尚算可以接受，抹茶雪糕有茶香及澀味，Cafe嚟講算係幾好食。咖啡都不過不失，正常級數。唯一想講吓服務問題，當時舖頭客人唔算多，大約10位，但幾位店員除咗準備食材/煮食以外，都係全程望住個電話，行出行入都係碌住電話，可以我哋舉住手5分鐘都係冇人望過嚟，要出聲嗌先有人發現我哋原來一直舉住手，食物好食，但呢個位一下就扣晒分。…Read More

見係新開嘅burger，價錢又唔太貴，就入去試下啦，諗住叫一個”魚魚漢堡”同埋”經典牛肉漢堡”，點知落單嗰陣個阿姐話”魚魚漢堡”係鯪魚肉，而唔係一般快餐店嘅炸魚柳，個吓當堂嚇一跳，然後得啖笑，最尾都係叫返”經典牛肉漢堡”穩陣。2個都有轉套餐，一個要薯條一個要水牛城雞翼(3隻)，飲品要2罐coke zero，另外再嗌咗3隻豉油雞翼。個餐嚟到，一開個包，比一般漢堡包細少少，個包有烘過，幾脆，不過牛肉味道略咸，薯條係粗身無紋嗰隻，份量合格。重災區嚟喇，2款雞翼。2款都係用炸雞翼加啲杰撻撻嘅醬，有小學午餐供應商嘅影子，啲醬完全冚過哂啲雞翼，搞到雞皮淋鬼哂水牛城雞翼唔辣，豉油雞翼唔重豉油味(其實個人覺得用炸雞翼加啲豉油醬嚟做豉油雞翼，都算係創意料理)，總之個感覺就好似一早整定哂啲有醬嘅雞翼，然後用微波爐叮翻熱佢咁，最攞命係3隻雞翼盛惠$38。值得一提，服務員有禮貌，全間舖最有水準應該係啲服務員同埋罐coke zero.埋單 2個包$43x2 + 2個轉套餐$18x2 + 3隻雞翼$38 = $160，下次寧願行過少少食添福。…Read More

諗住老字號實冇死🥲晏晝大概12點去食，一入去，可能因為落雨，勁大浸怪味，罨罨地咁，已經唔太開胃，餐廳衛生情況都麻麻，不過都係俾幾廿蚊食碗麵，所以環境都勉強接受到到。嗌咗一碗墨鬚麵(聽講係招牌嘢)，一碗牛腩撈麵，一碟炸魚皮。墨鬚麵普普通通，牛腩過咸，似車仔麵牛腩，牛筋酸酸地😟麵鹼水味太重，炸魚皮夠脆，但唔知係咪食完牛筋嘅關係，魚皮食到有少少苦。。。最後埋單$16X總括而言，所謂粉麵老店，試過就算，下次經過都唔會入去…Read More