小島料理

Open Now

Now Closed

睇網上訪問認識呢間人氣小店，本身都鍾意食慢煮牛所以決定去試吓。平日下午12點到達門口，已經有約10人排隊，12:15開門，啱啱好入唔到第一輪。等到大約12:50入座，和牛丼同埋慢煮牛板腱丼都已經賣晒，嗌咗牛小扒丼（大盛）、慢煮西冷牛丼（大盛）、北海道牛乳蛋捲同埋朱古力味鬆餅，另外2罐汽水。等咗大約5分鐘前菜、飲品同湯都上咗，湯係普通嘅昆布湯，前菜係日式小碟，味道正常。貼心嘅係老闆比汽水我哋嗰陣，每罐都會附有一張紙巾，提醒我哋抹一抹先飲。等多15分鐘左右牛丼都到齊，份量非常足，慢煮西冷有咬口唔會太靭，牛小排油脂豐富但唔會太肥膩，調味亦都適中。另外老闆請咗我哋食一小碟和牛，和牛嘅油脂更加豐富，三種牛各有特色。甜品方面冇乜特別，就係正常預想到嘅味道。最後埋單$290 ，以呢個味道同份量嚟講非常抵食，會想再嚟試吓其他嘢食，唯獨係想食嘅話就真係要早啲嚟排隊喇。