maleolhc的個人專頁

當晚上8點多身處在九龍城，我哋行左好幾條街，係唔想食泰國菜下，跟住openrice揀左呢間餐廳！點知食落實在有驚喜！呢間雖然叫潮洲餐廳，但都好多港式野，我哋叫左碟西檸雞、花生豬手、豉椒炒蟶子同蒸扇貝。西檸雞係當中最令我驚喜！佢份量夠，炸粉薄脆，重點係個汁！一入口檸檬香撲鼻！個汁唔係杰撻撻，係傳統做法加左少少吉士粉，食完好清香好好味！花生豬手，其貌不揚，但係豬手有口感，味道剛好，紅衣花生好好味，算個人口感啦，豬手略嫌有啲毛未清乾淨。豉椒炒蟶子又係好有鑊氣，4隻蟶子大大隻，肥嘟嘟，入口爽脆。最失色係扇貝，無端端一粒靚扇貝，開半蒸，原隻蒸好啲囉，仲有個豉油汁好咸，粉絲好少，始終係潮洲菜店，豉油唔似港式咁用甜。失策，無影到相，得碟豉椒炒蟶子。…查看更多

難得入黎西貢 見到呢間食評唔錯 貿然一試 伏已中 雞絲涼拌麵 瀝麵唔夠乾 撈起一灘水係碟底 麵汁係香辣加麻醬 唔夠汁 唔夠味個手工麵係幾好食 但配料處理求其 雞絲非雞絲 而係一舊雞肉拆出嚟 一舊舊咁 撈唔入碗麵 雞肉鞋另外芹菜豬肉餃 皮雖然手工打 但內餡咸而無口感 唯一可取係碟木耳 個汁調得開胃間店份量係大 要食飽可以揀呢間 但要味道就揀其他啦 原來呢間有分店 早知睇埋分店食評先揀啦西貢其實咁多好野食 希望店主從善如流 入西貢唔係個個都要cafe 海鮮 茶餐 麵店都有市場…查看更多

原本要去寶石戲院睇雷神，結果戲院播影機壞左，要退票散場….黑仔如我行去附近食個甜品降下火。店舖風格簡約，無現金付款係一大敗筆！叫左碗豆漿底芋泥紅豆仙草，額外加左10蚊芋圓，我期待佢足料架！碗野上枱用匙羹一攪，真係好夠料，紅豆軟綿但有口感，芋泥好impressive，唔太甜成大舊好滿足，芋圓呢，仲好食過鮮芋仙、康瑞，痴線越咬越有蕃薯、芋頭味！豆漿底唔甜，正！同行叫左碗黑糖沙冰，相反無咁好食，最主要係個黑糖太多太甜！…查看更多

利用一程地鐵打呢篇食評荃灣廣場對出舊樓地舖一排排茶記食店，差唔多食勻哂，呢間係第一次食，講真又幾驚喜。睇門面佢好普通，俾人解決三餐嘅地茂店，打開餐牌個設計又係好平平無奇，見佢有即燒牛脷飯就叫黎試試，等左15分鐘，差啲以為漏單，一上枱食一啖先知真章，牛脷厚切燒得好軟綿無羶味，唔使點燒汁都夠味，五件厚切都好夠食，而佢個例湯無味精，熱飲杯野同凍飲一樣大杯，抵食呀。同行叫左碗咖喱豬扒飯，好crazy，勁厚切勁大塊豬扒，有咬口又無雪藏味，生炸黎講好掂！咖喱汁上面有一個完整嘅薯仔，咖喱汁椰香味重，出街最怕食肉食到唔新鮮嘅雪藏味！呢間會翻撻架！…查看更多

同朋友行山行左成日，上水我哋唔熟，純粹睇食評想搵間餐廳醫肚，咁見呢間又唔差咪膽粗粗去食。嘩！真係唔錯喎，叫左碟牛腩雲吞撈麵，一碟雞翼牛腩撈麵，淨豬手一細碟。所有食材都新鮮，唔似個d滷左好耐滷到爛，呢度雞翼皮彈牙肉嫩，無冰鮮味，呢點好緊要，好多粉麵檔雞翼處理唔好，又炆到皮爛肉鞋，牛腩就略嫌唔夠牛味，豬手又係好正，無咩毛，而且有咬口。餓到無留影😂😂😂如果有機會再黎上水食粗野，我會再黎，希望佢開多間分店係荃灣，荃灣欠呢種有心經營嘅粉麵檔，充斥太多高納米線。…查看更多

屋企係無飯煮食，有人腸胃炎要食粥，睇完急症上6樓醫院餐廳，好寬敞，叫了個南瓜豆腐蛋花粥，清清地無味精，夠一個病人醫肚食藥，臨走仲外賣多一個白粥，留返做晚餐食藥。…查看更多

路德圍不嬲都好多餐廳，但食極都係個幾間，呢晚想食好野賀一賀present完畢…見到呢間舖面有日本野就膽粗粗入去，一開頭係俾佢店外個黑板價錢嚇左嚇，唔平要二至三百蚊一個丼飯，同區丼飯店都無咁貴，但好彩有揭下門外嘅餐牌，依…原來係丼飯兼備嘅居酒屋，牌內嘅價目反而係正常，甚至都叫抵。我哋叫左幾樣野，無食丼飯，下次再幫襯先食。刺身散叫，三文魚腩、油甘魚各三片厚切，四片帆立貝，赤蝦2隻，入口爽甜新鮮，驚喜！叫左兩串串燒，燒牛舌同雞頸肉，燒得剛好，牛舌嫩口有汁，雞頸肉都好惹味，調味夠哂，唔使再沾醬食。另外，仲有罕見嘅炸迷你池魚，粉醬薄口，條魚炸得岩岩好，肉嫩，整啖吞落口唔使吐骨，相信呢間嘅天婦羅應該都唔錯，下次再食。叫左啤酒飲，順便叫左碟燒明太子食，味道不過不失，唔會太咸，食一啖明太子，飲一口啤酒，正！最後仲有一碟玉子小卷，用嚟填肚，又唔想叫丼飯，驚食唔哂…另外呢間無收加一費用，日式餐廳黎講叫少見，收銀仲話時令食品係飛機貨，一星期飛兩轉黎港，叫我哋下次食，間餐廳無咩大宣傳，開左一年都唔覺眼，希望佢繼續長做長有啦，始終呢區好食嘅居酒屋無兩間。…查看更多

同朋友由北潭涌麥理浩徑一段，行經萬宜水庫東、西壩，遊完浪茄灣再上山下山，直至西灣亭，歷經6個幾鐘，餓住肚皮搭番的士去西貢覓食。晚上嘅西貢遇上萬聖節，好多店舖人山人海，惟獨呢間無咩人，我哋都掙扎左陣，入左去再叫埋野食，先知無錯，呢間好掂好食！好過那兩間米芝蓮一星店。價錢明碼實價，海鮮鮮味十足，好好食😋加上侍應好好態度，環境又乾淨，我哋食左個半鐘，侍應就幫我地換左幾次碟，好貼心！臨食完仲有碟水果送上，我同朋友都一致認為會再返撻黎食。…查看更多

周日雨天，走在繁華鬧市，總想找個地方hea下，享用美食佳餚😋男友帶我到呢間樓上咖啡餐廳，甫一入門口，迎來一個開放式水吧，旁邊的廚房雖小，但裝備齊全。叫了兩個晚餐，前菜溏心蛋沙律伴酸瓜，好開胃，自家製麵包鬆軟，沾點蘑菇餐湯，已覺飽意，係很用心準備的前菜、餐湯！主菜呢，我地叫了油封鴨脾，惹味非常，鴨肉肉質軟滑不過火，配菜還有粟米、菇類、荷蘭豆、甘筍同蘆筍，有營晚餐黎😍另外叫了慢煮牛面脥，牛味濃郁，咪睇佢細細舊，切開一片片後，配埋個薯仔食，正！飯後甜品送上精緻嘅焦糖燉蛋，好完滿😍話得係咖啡餐館，我哋當然試埋佢嘅焦糖咖啡，咖啡我唔太識評價，但入口係順滑，餐廳用上一部咖啡機，質素保證。我哋又試埋糖漬橙皮茶，解膩得黎香氣撲鼻！…查看更多

荃豐舖位細但容納唔少自家餐廳，每次去好似尋寶咁。原定係食另一間叫和食快餐，但行街等人路經此店，睇到外面裝潢新穎，裡頭乾淨企理，咁細嘅舖位但個廚房設備一點都唔馬虎，落足本搞廚房，自然對呢間新開餐廳有了信心。友人到步，左望右望，俾佢個意粉菜色吸引左，最後大家就抱住試下心態，叫了個鮮牛肉芥末焗意粉同芝士無骨豬扒焗意粉，大概每碟70蚊連埋餐湯同飲品。一般黎講，焗意粉中伏機會遠超焗飯，意粉受熱快又易淋，焗耐少少都發漲。焗意粉上枱，好香好鮮，用叉撩起意粉，嘩！驚喜個意粉焗得剛剛好，咬落仲係爽口！由法式芥末醬汁配鮮牛肉，好食！以70蚊一個餐黎講，好抵食！值得一試！至於無骨豬扒焗意粉，豬扒略厭偏咸，味道一般，下次可以試其他。而是晚餐湯係雜菜湯，飲落都不過不失。整體來說，70蚊有餐湯、高水準焗意粉同一杯飲品，呢個聚餐同拍拖食飯去得過。…查看更多

今年信和之友轉左玩法，生日食自助晚餐由以往二人同行一人免費，改為三人同行一人免費。無奈我地得兩個人，打算用信用卡碌有7折，點知咁岩有65折優惠，兩個人食都係7百幾蚊，每人三百幾。三百幾食到嘅自助晚餐，一點都唔馬虎，對比起聆渢咖啡廳同柏景餐廳，呢度除左無景色同少選擇外，呢間嘅食物、服務、來客質素印象都好過以上兩間。先講食物，由冷盤到熱食以至甜品，佢嘅牛肉、羊脾、羊架，仲有限時出爐嘅澳洲和牛，食落都唔蟹口，和牛仲係即場煎好，上碟七成熟，咬落好juicy! 海鮮蒸扇貝又是美味。至於冷盤，西班牙風乾火腿、沙律等都唔差，甜品更是令人驚艷！Macaron、焦糖燉蛋、小蛋糕等唔會甜過頭，哈根大師有專人整到靚靚雪糕杯，pancake皮都煎得薄薄剛好。再來係服務質素，呢間客流量無咁多，空間無前提兩間咁大，師傅卻好親近，話說限時牛扒好多人排隊，有個女人拎到一件7成熟嘅牛扒，未食就行去排緊隊嘅老公講，一陣要個全熟，自己食唔到有血嘅。此時，壽司站師傅聽到，主動話幫個女人拎入廚房煎熟它，女人拒卻了三兩次，不抵師傅熱情，由師傅幫手煎好。另又見甜品站人員幫忙抱起小朋友，好等佢地看清楚高枱上嘅甜品。呢d細微位真係好令人印象深刻。自助餐嘅賓客質素好，其實會大增好感。坐左個幾粒，周邊一係本地人，一係外國人，無人會高聲闊論，拎野食唔會爭先恐後，怕蝕底。…查看更多

1. 芝士咖哩蛋飯2. 咖哩蛋飯3. 台式滷肉飯以上就係呢間士多餐單，沒有其他！專注只做三樣食，果然樣樣都好滋味⋯⋯咖哩係港式咖哩咁微辣微甜，而個蛋煎得好有誠意，起碼用2-3粒蛋先做到咁效果，豐厚滑嫰用匙羹劃開蛋面，裡頭嘅飯更加不得了！除左啖啖咬到肉，仲有飯粒鮮明唔黏。至於跟餐送野飲，冷熱同價，叫杯檸汁特飲，可以解解咖哩重口味，同場叫了杯奶茶，又真如食評咁講，好夾個咖哩飯黎食呢日正是周日假期，客似雲來，好多人等叫外賣。…查看更多

正在變天嘅九龍城，老舖逐一不在，新樓林立。每隔幾個月黎九龍城，就會多一個地盤打地樁，趁現在黎呢度食多d老舖。呢間男友介紹，外面望入去頗有90年代風格，坐底就開茶叫餸。燦記招牌食雞，兩個人叫例牌，夠食，雞胸肉好滑嫰！另外叫左鼓汁蒸鱔同紅燒山水豆腐，應濃味則濃味，應淡味則淡味，份量唔少，蒸鱔剛好熟度，吃起來好肥美，東菇爽滑！呢間火喉好夠，樣樣上碟熱辣辣。眼闊肚窄，好想試埋海鮮小菜 同 蜜糖煎肥牛粒，有機會再戰…查看更多

黎到黃大仙食友記車仔麵，唔小心放太多辣咖哩汁，要食下甜野紓緩下個胃....食過深水埗康瑞嘅芋圓，先知道真正芋圓唔止有口感，仲越咬越滲透芋圓香味，食雞有雞味，食芋圓有芋頭味、蕃薯味....呢間我點佢黑糖芋圓加忌廉奶，芋圓得咬口但無咩味道、而黑糖味呢？頭啖飲落有陣怪怪的藥水味....唔知黑糖係咪一時煮過頭.....不過佢勝在夠材料豐富，仙草同小丸子都好食！賣相都吸引！另外我地仲叫左下午茶，黑朱古力心太軟加雪糕，配一杯飲品。個雪糕係黑炭味，但食落似乳酪酸酸地，而心太軟就好正！流心、夠朱古力味、再加杯野飲解渴，好抵食！港式甜品黎講，呢間都好唔錯！…查看更多

男友生日想食鐵板燒，係openrice茫茫大海中，搵到呢間日式鐵板燒。套餐形式上菜，我同男友分別揀左燒海鮮同厚燒和牛。圍住鐵板爐邊睇廚師燒 ，邊享受美食！所有食材都好新鮮，龍蝦、鮑魚活生生咁呈上，不得不提是晚Teppan head chef 鐵板燒技術一流，樣樣都燒得岩岩好，由頭食到尾非但無油膩感覺，用簡單嘅調味就帶出食物的鮮味，好幸運趕上呢程尾班車。聽聞鐵板燒做到十月中就唔做，轉做其他菜式，有點可惜，因為係香港要食到好食嘅鐵板燒，唔係易事，尤其 好廚師難求。做餐飲，除左客服，靈魂所在都係廚師同食材品質。題外話，餐廳自製咖哩雪糕係好味特別嘅。…查看更多