PatrickYuen1636的個人專頁

幾年前去泰國曼谷旅行，其中一個景點就係去食水門雞飯。果時第一次食，覺得同海南雞飯個感覺好唔同，唔錯唔錯。近年就打入香港，分店仲要唔止一間，方便左好多。幾間分店我都食過，食得最多就係銅鑼灣店。今次終於的起心肝寫篇食評講下。我叫左個牛肉湯船河，一個椰青。太太叫左個水門雞飯加雞雜。牛肉湯船河，牛肉湯好甜好入味，係泰國船河既味道。水門雞飯有雞味，點左醬超好食。椰青好清甜。要讚下員工既服務態度，由等候入座，坐低，叫野食，到上菜，埋單都好好禮貌，值得一讚。…查看更多

好耐無試過食到成肚氣，所以點都要寫篇文，提醒其他人唔好俾間餐廳呃左入去。話說果日中午係深水埗搵餐廳，我同同事例牌行入福榮街睇下有咩好食。果頭好多餐廳，但維記、文記車仔麵，燒鵝大皇等等間間都爆滿要排隊。天氣好熱，我地唯有繼續搵。我地行過見到呢間泰國菜既餐牌，寫住話慶祝十週年，海南雞飯38蚊，心諗幾抵wor，甘就入左去歎冷氣了。間餐廳貼滿同藝人既合照，又貼晒米芝蓮推介既字，以大大個米芝蓮筋肉人作招徠。但奇怪既係，間餐廳坐得3-4成滿，明明周圍間間都要排隊要等位。我同同事都叫左個海南雞飯。佢地好快就送上湯同沙律，我就問個男侍應"咦38蚊跟埋湯架？"。跟住個男侍應就黑面，話"果個下午茶2點後先有架。"。我地以為係自己睇漏左，甘就無再出聲。個男侍應之後全程態度都好差。結果海南雞飯要58蚊，凍飲另加6蚊。碟海南雞飯好一般，大把餐廳既海南雞比佢滑。58蚊一D都唔平，但唔係話接受唔到。最難頂就係個侍應既態度。最後我地臨走係餐廳門口影番個十週年餐牌，完全無寫下午茶先用得。根本就係呃人入去。總括黎講，價錢唔平，食物一般，態度極差，希望大家要小心，唔好俾佢呃左入去。…查看更多

女朋友鍾意食泰國野，所以今次係西環搵左呢間餐廳黎試。呢間顧名思義係食東南亞菜，越南菜同泰國菜都有。初頭我地到達果時只係7點，間餐廳坐左一半都無。但後尾越黎越多人，有好多學生，坐到滿晒。我叫左碗火車頭湯粉，女朋友叫左香茅豬扒飯。個豬扒飯既賣相好吸引，好香，煎得好好味。我幾鍾意個火車頭湯粉。河粉軟硬度啱啱好，唔會散收收爛曬或者痴埋一舊甘。最鍾意既就係個牛肉湯，比好多越南餐廳好味。唯一係個湯底偏鹹，如果唔係我一定飲晒佢。…查看更多

情人節當天想試呢間，不過係無預先book檯既情況之下，餐廳只能安排吧檯既高凳俾我地。再加上當天比本身高超過一倍既價格，我地最後決定轉場。過左2個星期心思思都係想試一次，有日甘啱人在灣仔收工，就過黎呢間餐廳。呢間餐廳係合和中心斜對面，距離地鐵站有點距離。個格局佈置得幾有心思。我叫左個Siu Wan Rice (黯然銷魂飯)。女朋友叫左個Black Truffle Fettuccine(黑松露扁意粉)。個扁意粉個味都ok，偏硬，不過我都接受到。女朋友就覺得硬過頭。黯然銷魂飯就真係令我好意外。呢款叉燒有少少蜜糖甜味好好味好餸到飯，係另類既蜜汁叉燒，一定要試！…查看更多

夜晚既西環好平靜，因為唔係遊客區，D餐廳都比較平民化。我地係香港大學站出口出發，沿住皇后大道西向西行，想搵下睇下有咩好食。來回都行左一次，到最後決定入黎呢間食拉麵。女朋友叫左碗赤香辛豚骨湯拉麵，我就叫左香黑豚骨湯拉麵，2碗都係佢地店鋪推介的。赤香辛豚骨湯拉麵唔算太辣，對我女朋友黎講啱啱好。我叫既香黑豚骨湯拉麵，湯底幾香，唔會太鹹。鍾意淡D，唔鍾意出面有名既拉麵太鹹既朋友仔應該會鍾意呢個湯底。叉燒略嫌實肉既地方有點韌。價錢叫過得去，西環黎講唔算太平。…查看更多

我地6個人，夜晚想食大排檔，就揀左長沙灣既大中華。大中華飯店同普通大排檔有少少分別，佢係以特色小菜做賣點。普通既煲仔菜唔算好多。好幸運地，我地8點鐘去到，即刻就有位。我地叫左土匪雞，南乳吊燒鱔，臘味煲仔飯，黑椒鐵板豬手，豉椒炒蜆，豉汁炒聖子同埋蒜蓉油麥菜。油麥菜略嫌太淡，下次唔用蒜蓉黎整。炒蜆同聖子好入味，南乳吊燒鱔外脆內軟，黑椒鐵板豬手熱辣辣好好味。最正就係個臘味煲仔飯，又香又好味。臘味飯係大中華入面係必定要食的。…查看更多

每逢自己生日，我都會搵個best friend黎小菜王食小菜，剩食餸唔叫白飯。今年都唔例外。星期五夜晚黎到接近8點，外面等候既食客仲有幾十人，我地等左接近半個鐘先可以入去。我地2個人，叫左4樣餸。豉椒炒蜆，4隻扇貝，4隻聖子皇同避風塘九肚魚。炒蜆係最正既，有少少牛油味，D肉大粒又入晒味，無沙，唔會好似出面既餐廳甘得殼無肉。扇貝略嫌唔夠濕同埋蒸老左。聖子皇都好正，同炒蜆一樣有少少牛油味，D肉好爽。避風塘九肚魚係餐牌上面係無既，餐牌上面得椒鹽九肚魚。不過須知道呢類交換配搭經常有，出黎既結果都好正。炸蒜包住既九肚魚，外脆內軟啱啱好。可惜就係食左頭3樣已經夠晒飽，碟九肚魚格硬食都食唔晒。…查看更多

過時過節，一家人一係係屋企打邊爐，一係去酒樓食飯。今年就試下新款式，叫盤菜。問過幾個朋友，美心太興大家樂都有人推介。因為我想試下D正宗既，朋友就介紹左呢間48年老字號既盤菜俾我。我地全家9個人，叫細盤就唔夠食，大盤就食唔曬。但由於大盤先可以送貨，我地又唔想食食下唔夠食，最後都係叫左大盤。我地另外仲加左250蚊10隻鮑魚同埋120蚊蠔豉。送貨到馬鞍山另加150。總共加埋都係1550。9個人食每人都係170。大盤係12人份量，12個人食既話每人130。平過落酒樓食。盤面既腩肉肥瘦軟林啱啱好，鮑螺片好爽，燒鴨油雞都唔錯。鮑魚蠔豉食到lamlam脷。盤底D料仲正。豆卜，冬菇，枝竹，豬皮同蘿蔔，係盤底吸晒D味超好食。最估唔到係魚蛋夠晒彈牙。缺點係D蝦霉霉地，芋頭太硬，呢2樣有待改善。總括而言，值得再幫襯。…查看更多

我係10月食銅鑼灣果間越男仔之前，其實我係未食過旺角果間既越男仔的。果時食完銅鑼灣果間越男仔，經驗唔係甘好，但果時無諗住寫食評。但係12月食完旺角果間越男仔，發覺2間分店既質素實在有點距離，所以先決定就算隔左2個月都要寫番呢篇食評。當日我係夜晚7點左右去。我叫左個招牌越式火車頭湯河。第一，D牛丸未熟曬，好似未完全解凍甘。D牛柏葉就痴埋成舊甘，都唔係一塊塊，食到最尾都係仲係成舊甘。最大問題係個河粉。D河粉又係痴埋成舊甘。好似好求其倒晒落個碗度就拎俾個客人食甘。我同女朋友食完，2個都話唔掂。12月去旺角果間，我一樣係叫番同一款越式火車頭湯河。牛丸係熟透既，牛柏葉ok，河粉唔係林既，亦唔係成舊甘。2間分店質素真係相隔太遠了。…查看更多

平時食黎食去一係就殿大喜屋一係就千兩，呢間同事介紹，確實係唔錯。環境幾好。我地主要係食壽司，野食我覺得都ok。400幾一個人去食殿大喜屋都係呢個價。但質素差好遠。應該唔會再去殿大喜屋。…查看更多