BoKee's Profile

自從上環港澳碼頭開咗呢一間明谷之後，我都冇食過其他鋪頭嘅早餐。早餐基本上都係來來去去嗰啲嘢，火腿通粉，炒蛋，沙嗲牛肉公仔麵等等，我嚟明谷咁多次都喺食3號餐，沙嗲牛肉公仔麵配炒蛋多士，不過今日屎忽痕，見人哋食7號餐，我自己又試，香茅豬扒留心蛋撈公仔麵，呢個餐係冇炒蛋同多士，幾好食。豬扒肥瘦適中，香茅味道濃烈，蔥油香口。留心蛋溫度適中，小小過火。撈麵汁鹹甜平均，使用出前一丁麵底。價錢$38，凍飲加$3，共銀$41…Read More

當兩個懶人放工返到屋企，又唔想煮飯諗住去大街行個圈，求其食個小炒算數，點知嗰間好有水準嘅張記排晒隊，打消左食小炒呢個念頭。。。其實住喺鴨脷洲，去親大街來來去去都係食嗰幾間野，張記，食記，同埋市政大樓嘅熟食檔，今晚行行吓就比我發現左呢一間越大哥，先喺門口睇咗餐牌有咩食，發現價錢同埋食品(餐牌上面嘅相片)都唔錯，入咗去一試，兩個人唔係叫咗好多野，三食一飲。香茅豬扒碎米飯豬扒夠厚身，半肥瘦有骨香，味道啱啱好唔會太咸，碎米飯簡直得不得了，我相信佢煮之前打碎左，細細粒又有口感，飯上面仲有蔥油，送飯一流。牛油雞翼雞翼算大隻，炸到好香口，食到有牛油味，唯一唔好嘅就係面頭炸蒜蓉唔脆，淋嘅。。。其實唔落都可以，可能仲好食。蒸粉包上枱熱辣辣，好好食，不過有啲油，材料有木耳絲，肉碎，紅蘿蔔絲等等，一碟有四件啱啱好。最後埋單一百七十幾蚊，價錢相當合理，比得開心…Read More

今日先講蛋牛冶，個靈魂蛋牛已經唔再係即叫即煎，整定。落柯打30秒左右已經放係你面前，好在仲熱嘅，如果唔係做乜事要食？味道呢就一如以往。標題上面寫住潤牛麵都係維記好食，冇錯，維記真係好食啲，當然，兩間喺無得比嘅，新香園個潤牛麵都喺隔離堅記整過嚟，個湯普通嘢太鹹，麵爽，牛肉都喺沙嗲牛肉啲朋友，只不過無咗沙嗲汁咁解，豬膶切得太大塊，有啲腥。餐牌上面好有好多嘢食，當然有列明招牌菜等菜式，都喺蛋牛治，西多，豬手麵，紅豆冰等等，如果下次再嚟，都只喺蛋牛治。…Read More

又喺我第一次食嘅餐廳，之前太太同朋友食過話OK，今日都我同佢一齊去食。強調一點！其實我唔算係一個食家，不過我對食真喺好有要求。餐廳業者們，你個餐牌寫啲乜嘢出嚟，唔該你哋要做返啲乜嘢出品出嚟比客人食！麻辣萵筍/涼菜無味道，得個辣，萵筍尚帶有微溫，我覺得不算是涼菜。夫妻肺片/涼菜(第2段內容講咗我想發洩嘅嘢。)呢個完全唔知係啲乜嘢嚟，傳統夫妻肺片(我做過上海菜京菜侍應略懂一二及網上資料。)內有牛肉，牛肚，牛肺，牛舌，牛心，牛柏葉，豬耳等等。。。。用料唔夠嘅唔緊要，你可以唔好賣，話賣曬都得，點解要整碟牛肚鴨腎出嚟？錯曬！咩嚟？又唔喺片又大嚿。牛肚淋身唔爽口，無味，至於鴨腎唔使講，錯曬。乾煱田雞粉腸花菜紅薯粉/小辣辣度十足，薯粉煙銀有咬口但係厚身比較頂胃，田雞及粉腸新鮮，我最欣賞個花菜，不得了。呢間野可唔可以再去仲考慮緊，因為有其他野可以試，不過，首選老川皇，又好食，又平啲。PS:廚房佬A大模廝樣係個廚房行嚟行去食煙。廚房佬B大模廝樣喺廚房行出黎從後攬住個入緊單嘅女士應，睇嚟應該喺情侶。…Read More

今日同太太睡到自然醒，出銅鑼灣買嘢食個Tea，太太帶我去食新嘢。呢間嘢門面ok，仲有紅紙寫住新試業，食京川滬菜，客量有一半，餐枱格局有少少似大家樂。入門口冇人招呼，收銀同埋經理掛住傾計，自出自入，自己行埋去自己想坐嘅枱。。。印象唔好。餐牌上面算係多嘢食，京川滬菜嚟講佢應有盡有，全部都係熟悉嘅食物。點菜:1，皮蛋豆腐$38味道可以接受，皮蛋太少，入面加左大頭菜啲朋友。2，香蔥海蜇頭$48海蜇爽脆，麻油過多，略欠味道，鹹味不足，內有青瓜，不過青瓜好明顯喺未處理出水個程序，好臭青味。3，香脆豬扒麵$58豬扒鬆脆，湯底好清，普通嘅一碗豬扒麵。4，招牌鮮肉小籠包$36皮薄，涵唔靚，無咩湯汁，食唔出喺咩肉，好多豆粉喺入面，多過平時自己喺屋企蒸肉餅，最愛食小籠包嘅太太話無下次。特色煎餃$32好食，菜做餡，不過上枱喺完全唔熱。喺咁多。員工做嘢好粗魯，啲杯杯碟碟好鍾意大大聲聲放落枱，仲有個女侍應掟蒸籠，廚房同事傾計大聲到廳面都聽到。改善嘅地方實在太多，不能盡錄。…Read More

九點半放工，泊好車喺黃竹坑，南朗山道熟食中心都開始關門，冇嘢好食，唯有坐地鐵返屋企食老麥。呢一餐喺呢間麥記開咗咁耐最好食嘅一餐。收銀妹妹是新手，有啲手忙腳亂。叫咗個蘑菇安格斯漢堡餐，正常餐，冇加大，本人習慣性先食薯條後食包。點解要寫呢一篇食評？因為打開咗個盒之後，個漢堡包係非常完整嘅，係完整到不得了嗰隻，食任何一間麥當勞都未見過打開個盒之後有一個咁完整嘅漢堡包出現係你眼前，講真，＄37個餐唔好期望太高，唔好期望有任何服務，唔好期望阿姐講嘢冇鄉音，但係呢一餐真係不得了，重複講多次:個漢堡包係好完整嘅。…Read More

早排喺Facebook上面見到雜誌去咗呢間金源麵家做訪問，心血來潮搵地址，搵位置，睇吓我自己方唔方便泊車(當然泊唔泊車唔係重要因素)，睇吓有無機會可以食到。今日終於有機會可以一試，結果有啲失望，並唔係我想像中咁好食。。。------------------------------買外賣時間下晝大概兩點半，入到鋪頭現場入座率唔高，四位客人，老闆正在開餐。先講金牌炸醬撈粗麵:訪問之中老闆講過話係用豬頸肉，冇錯！我食得出係豬頸肉，有咬口。炸醬汁唔夠多(可能我唔記得左同佢講多汁)，撈吳起個面，結果我個麵有三分一係冇汁嘅，吃乾麵。。。醬汁方面比較淡口，感覺好水，唔夠杰身，帶出唔到一種食緊撈麵嘅感覺(醬汁係要香濃先可以撈起個麵架嘛)。內附芥蘭兩條麵底淥得啱啱好，爽口彈牙附上嘅撈麵湯香濃，我飲晒------------------------------另外叫咗個雲吞併水餃淨食，兩者都OK好食。總括嚟講如果個炸醬會改良，我會再食，如果唔係就冇乜吸引力，我會選擇佢鋪頭其他出品。…Read More