燦燦的滋味's Profile

譚仔有個好神奇嘅魅力：無論你食過幾多山珍海味，都會好想返去再食佢；無論你感受過幾多熱情嘅招待，都會好想返去再聽下啲譚仔話。今次「清清地」叫個竹笙冬菇魚腐中辣米線。味道依舊。最享受嗰種一路食，一路五官都好似通晒既感覺！真係食咩都做唔到呢個效果！🤣…Read More

呢個世界，真係never say never。Rise Kitchen 開咗幾年。啱啱開張嘅時候，去食過。印象麻麻。覺得都係持住明星效應。嗰時食完，覺得以後都唔會再返嚟食。早兩個月心血來潮，無啦啦又想去多次。去完嗰一次，接着又去多咗幾次。原因好簡單，真係進步咗好多。以前覺得Rise Kitchen 裝修OK，食物正常，無特別，侍應生靚仔靚女，但係似黎行catwalk多過做餐廳。不過佢哋真係成長啦！笑容多咗，又醒目左。都不枉我再嚟幫襯。畀likes!!!!! 👍🏻至於食物方面，亦都進步咗 。以All Day Breakfast 為例，食材冇改過，但係處理方法進步咗，調味好咗，食材之間既交流多咗。係一啲幾微細既改變，但就已經令整碟食物精彩咗好多。最推薦嘅係佢既麵包，尤其是係牛角包。😋😋😋 佢嘅其他麵包，例如法飽等，都好好味，仲可以外賣返屋企慢慢食。佢有好多唔同嘅飲品。燦燦照舊叫齋啡。咖啡淡咗啲。如果佢再有啲靚啲嘅咖啡，襯返個牛角包，咁會吸引好多。…Read More

一開張嘅時候，有去過食。當時覺得好唔錯，日本米+日本蛋，好吸引。最近去返，發覺退步咗... 失望啊🥺🌈食物叫咗個早餐，有北海道薯餅、厚多士、牛乳炒蛋、同埋鰹魚烏冬。份量係正常嘅，賣相都好正路。不過食落去，就知唔係嗰回事。北海道薯餅⭐️： 做法係北海道。係有個外表，但個食落去，真係唔北海道。本來係想回味一下日本既味道，一解思念之苦。但當燦燦每食一口呢個薯餅嘅時候，只係令我更想念日本.........鰹魚烏冬⭐️： 真係無乜味喎⋯⋯鰹魚游走咗？游咗返日本？等我去日本捉返佢返黎先！牛乳炒蛋⭐️⭐️⭐️ & 多士⭐️⭐️⭐️：正常。…Read More

好很正既香港人啤酒屋。🍻🍻 黎過好幾次啦！黎食嘢又有，淨飲又試過。每一次都好有氣氛。唔知點解，入邊嘅人，由工作人員到食客都係，個個都笑得好開心。搞到燦燦都覺得，係囉，一場黎到，開心下，飲啦！🍺今晚係soho食完飯，意猶未盡，仲想搵個地方飲吓嘢。呢幾日咁熱，最啱飲啤酒。想靜啲傾吓計，所以坐咗係室外。無入面咁嘈，但開門閂門，都感受到入面嘅氣氛。香港人既啤酒屋，當然有好多唔同既local taps。口味不同，但都係come from Hong Kong! 今次叫咗個限量版嘅Be Water DDH。好！好！飲！Fruity 得黎又Floral。贏晒！ 👏🏻…Read More

知道銅鑼灣有呢一間Cafe，已經係好耐之前嘅事。不過一直都冇機會試。今日機會終於黎啦！作為一個出色既貓奴，又點可以放過呢？🌈環境餐廳主題係貓，餐廳嘅裝修當然配合主題啦。由正門到餐廳入面 （甚至乎個洗手間），周圍都係貓嘅畫同擺設，書架上又有好多關於貓嘅書。餐廳中間仲有個位置，賣一啲同貓有關嘅紀念品同文具。除咗裝修同擺設，餐廳入面仲有幾隻真貓招呼大家。餐廳入面嘅小朋友見到貓貓，都非常興奮。貓奴們置身於咁嘅場景，應該情不自禁心心眼晒，同埋不停影相！😍🌈食物 / 飲品 食物同飲品既賣相相當不錯，亦都非常配合主題。鍾意影相同打卡嘅朋友，見到都會好開心。但係講到食物嘅質素，唔難食，但就真係有好大嘅進步空間啦。🌈 整體整體而言，如果你係想見下貓星人，同佢哋hea 住咁過一個悠閒下午，唔介意畀自己嘅味蕾都放下假，呢度絕對係一個好好嘅選擇。但係如果你一心想食好東西，飲杯靚咖啡，咁就可能去錯地方啦！…Read More

冇得去旅行，想念台灣風味，點算？去咗將軍澳中心嘅老媽拌麵，一嚐傳統台灣味道。🌈食物叫咗碗擔擔麵。麵嚟到嘅時候，香味撲鼻，好吸引。食落去，口味唔係好重，味道唔會太濃，以台灣食品來講，佢算口味清淡。 最值得讚嘅係佢嘅糖心蛋。唔知係唔係用咗酒調味呢，好甜喎！其他配菜例如紫菜，都好新鮮同埋慳香。🌈飲品因為擔擔麵冇湯，叫咗杯冬瓜檸檬。燦燦一向唔like 啲特飲得個甜字。好彩呢杯冬瓜檸檬，好味得來唔會太甜。啱晒!🌈服務 / 衛生 係呢啲非常日子，衛生當然非常重要。呢度嘅衛生可謂跨啦啦！ 除咗入去基本要探熱之外，服務員不斷咁樣自我搵消毒藥水搓手，同埋不斷咁樣抹枱，都令我嘆為觀止。🤣🤣🤣 點解我會知？因為佢哋不斷喺我面前搵消毒藥水抹手，同埋喺我隔離枱搵消毒藥水抹枱，甚至乎將啲消毒藥水噴到我隻腳。但係為咗衛生設想，我都寧願佢哋咁做嘅！😂😂😂仲有一樣野要讚嘅就係，呢間餐廳超級老實！例如佢會話，因為細麵供應不足，其他麵改用刀削麵。換轉好多餐廳，佢哋可能會搵其他好好聽嘅藉口，或者純粹唔交代。但係呢度竟然好清楚直接咁同你講，唔俾細麵你嘅原因純粹因為供應不足，而唔係「刀削麵更加好食」一類市場推銷經常講嘅嘢。呢種老實真係好純樸，好可愛！！！😊👏🏻👏🏻👏🏻…Read More

喺港大畢業既人，對西環都總係有個情意結。離開西區一段日子，好耐無返過嚟。成個堅尼地城真係變咗好多，開咗好多又新潮又有型嘅食肆。難得重遊故地，最想嘅都係回味當年嘅good old days。祥香喺我未出世就已經屹立喺堅尼地城，可謂見證住呢個地方嘅轉變。燦燦通常都會選擇「樓上雅座」，貪佢靜啲傾偈舒服啲。鋪頭裝修冇乜變過，係加咗幾幅餐廳嘅舖頭同食物既相，旁邊仲有文字解釋相片內容，簡單解釋下祥春既歷史。照舊叫咗個特餐，沙嗲牛肉米熱奶茶，仲係舊時既味道。現代社會日新月異，食物款式千變萬化，祥春依舊做返自己。唔會賣弄花巧，亦都唔會隨波逐流。遺憾太飽，食唔到佢馳名嘅蛋撻。Ok啦！有遺憾，就會想起，會想起、就會再黎。❤️…Read More

夜收工唔知食咩好，佬一佬去觀塘打個冷先。🌈食物食物質素整體好唔錯，入味得來又唔太鹹。🥢花生雞腳：雞腳夠入味，如果再多啲就好啦！⭐️⭐️⭐️⭐️🥢燒味併盤：一次過滿足晒n個願望既選擇。⭐️⭐️⭐️⭐️🥢煎牙帶鹹魚：自己平日少食，但經常食打冷嘅朋友話做得好出色喎。⭐️⭐️⭐️⭐️🥢蠔仔粥：大碗、足料。⭐️⭐️⭐️🌈環境正常潮州檔嘅裝修，舖面尚算乾淨。繁忙時段係有啲迫，會同後面批下踭，同埋鬥大聲。洗手間環境有點恐怖，食飯前喺第二度去定廁所，冇咩事唔好入去。🤣…Read More

呢間LQV，燦燦間唔時都會同朋友過嚟飲酒。貪佢細細間，但係酒類又多，價錢又好合理。 喺灣仔Happy hour 或者食完飯仲想飲番杯，如果一心想飲wine, LQV可以話係燦燦既不二之選。舖頭唔係好大，大部份嘅顧客都係外籍人士。牆上全是一支支超級靚酒既酒樽。一睇就知主打賣紅白酒。佢個wine menu 成本字典咁厚，可以慢慢揀。如果有選擇困難症，都可以請佢哋幫你揀。你可以話比佢哋聽你想飲嘅風味、地區、提子種類、budget等，就會有專人幫你挑選靚酒。佢嘅酒類選擇多，價錢都豐儉由人。由三百幾蚊到幾千蚊一支嘅都有。食物方面，選擇唔多，有ham platter, cheese platter 一類送酒既食物。大大份都係統一價$160，平過係d高級超市買！早兩日同幾個朋友食完飯，意猶未盡，去LQV飲番杯。叫咗一支酒，一個cheese platter, 平均人頭消費唔洗$200埋單，抵喎！…Read More

知道銅鑼灣利舞台附近有間樓上Cafe既手沖咖啡好出色，但從來都冇去過，亦都唔係好記得叫咩名。不過緣份嘅嘢，有時真係好奇妙！喺銅鑼灣行街，買完野又未夠鐘食晚飯，於是想搵個地方飲杯咖啡先。一行出muji, 抬頭就望到coffever個logo。緣份到喎，咁梗係唔好擋佢啦！🌈環境：地方細細，灰白色主題既牆，簡單又有taste。地方好乾淨衛生。🌈手沖咖啡：⭐️⭐️⭐️⭐️⭐️係重點！真係超有誠意既作品！！！我哋想叫手沖咖啡，侍應即刻叫咗老闆嚟親自介紹咖啡豆嘅選擇。老闆好有心機咁介紹，除咗解釋唔同既豆沖出嚟有咩唔同味道同口感之外，仲好有心機咁講解畀我哋聽唔同風味嘅由來。因為地區嘅唔同，氣候同土壤都唔同，加上發酵過程有不同嘅處理方法，唔同嘅豆就會有唔同嘅風味。最後我哋選咗兩款豆比較一下，分別係來自埃塞俄比亞 （牧羊人 厭氧日曬），同埋巴拿馬嘅咖啡豆。跟住老闆又有follow up question: 想要「茶」d定「balance」d?乜個問題咁深嘅？原來手調咖啡嘅時候，熱水嘅流速、方向、溫度，以致配用邊款filter paper,都會影響成杯咖啡沖出嚟嘅成果。咖啡師會視乎我哋嘅口味，調出更適合我哋飲嘅咖啡。換言之，要有一杯好嘅手沖咖啡，咖啡豆固然重要，但調咖啡嘅人就更加緊要啦！！！我哋先飲咗一款比較有「茶感」既，再飲另一款balance d既。兩款各有特色，都好好飲！ 燦燦覺得，喺coffever飲手沖咖啡，唔單止係味覺嘅享受，更加係一場心靈上面嘅愉快交流。當你飲緊個杯手調咖啡嘅時候，唔單止係享受緊咖啡嘅味道，更加係感受緊咖啡師用心為你調配嘅嗰份誠意同埋專業精神！❤️…Read More

同朋友聚會，有人話想食四川嘢，又有人怕辣。呢個時候就最麻煩，有咩地方又可以食到美味嘅川菜，唔食辣嘅朋友又啱口味嘅呢？最後我哋揀咗喺灣仔嘅川流，過咗一個愉快嘅晚上！🌈環境：餐廳係用咗現代嘅裝修風格，好似入咗間好有情調嘅酒吧咁。事實上，佢真係有一個好大嘅吧枱，而且仲有唔少四川特色嘅 cocktails。係幾好玩喎！枱同枱中間嘅距離都唔係太迫，絕對比到足夠嘅空間你同朋友傾偈。經理話仲有party room, minimum charge 都係$8000，可以容納十幾人。下次試吓先！😎🌈食物：今次無叫餐，散叫。反而叫多咗唔同嘅款：🥢前菜 - 有四款。枱枱都有既。燦燦覺得最有特色嘅係辣椒味爆谷。淡淡的辣椒味，令到個爆谷好惹味。⭐️⭐️⭐️🥢家鄉燻臘肉胡椒餅 - 外脆內軟，超有胡椒味，又juicy。必食！！！⭐️⭐️⭐️⭐️⭐️🥢酸菜魚 - 味道好balance, 魚片好滑。佢哋嘅湯經過特別處理，真係可以就咁當湯飲。⭐️⭐️⭐️⭐️🥢黑豬黑毛豚酥肉- 調味超好，而且一啲都唔覺得肥。完全唔食辣嘅人都會食得好滋味！⭐️⭐️⭐️⭐️🥢五十二度慢煮樟茶鴨胸 - 煙熏味好出色。用52度嘅溫度去煮嘅鴨胸，肉汁都被鎖住，口感非常好！呢個都係必食推介！⭐️⭐️⭐️⭐️⭐️🥢豆酥桂魚 - 同酸菜魚嘅魚片一樣，好滑。佢嘅調味都唔錯，好balance，又係唔辣嘅人都可以係咁食既一道菜！⭐️⭐️🥢鍋貼 - 入口juicy。雖然唔係招牌菜，但係都無hea你!⭐️⭐️⭐️🥢千絲蘿蔔酥 - 水平都ok既。咁當然啦，如果冇咁大個胃，建議食返佢其他特色野先！⭐️⭐️⭐️🥢玫瑰吐司抄手 - 賣相非常吸引。燦燦本身唔太好炸嘢，但係佢呢個炒手有啲玫瑰味，感覺又幾清新喎！⭐️⭐️⭐️🥢沖繩黑糖糍粑- 唔會太甜，而且食落好煙韌。食埋個黑糖糍粑，真係飽晒！⭐️⭐️⭐️⭐️🌈飲品：川流既drink menu 好豐富，有酒、雞尾酒、啤酒、清油、茶、果汁...你諗得出嘅都有。最有特色嘅，一定係佢哋嘅雞尾酒。燦燦同朋友都各自叫咗。燦燦叫咗杯chilli margarita。本來諗住試一試，對杯野都不存厚望，而佢竟然比我想像中好飲好多，甚至比我係出面酒吧飲既margarita調得更加好。⭐️⭐️⭐️⭐️😋😋😋🌈整體：川流整體嘅菜式同格局都好現代fusion feel, 每一碟都比較精緻。整體食物質素唔錯，有辣有唔辣，最適合嗰啲又想食下四川嘢，又怕辣或者太油膩嘅人。另外，要讚下餐廳經理呀！我哋留意到佢由介紹菜單、落單、上菜、收碟、埋單...都親自出馬，一手包辦。🤣🤣 真係要畀多幾個like佢！！！辛苦晒！👍🏻👍🏻…Read More