consiew's Profile

店內裝潢簡潔，晚餐時段坐無虛席。松葉蟹天丼$158期間限定，選用時令當造松葉蟹腳，連續七屆榮獲日本全國天丼金獎，當然要試一試！金子半之助使用傳統做法，重現江戶時代風味，新鮮炸起嘅天婦羅都適量均勻地沾上古早秘傳天丼醬汁。雖然唔似一般天婦羅咁脆口，但味道一定比坊間嘅天婦羅更美味！酥炸松葉蟹腳，肉質鮮美，嫩滑飽滿多汁。配上鬆脆的外衣炸皮，沾上特製醬汁，份外滋味，而且胡麻油香芳香撲鼻。除咗松葉蟹腳，其他食材都好高質。海老好彈牙爽口，小柱魷魚天婦羅餅有驚喜魷魚細切好爽滑！莢豌豆、海苔雖然係配角都十分美味！沾滿醬汁嘅飯加埋溫泉蛋流心蛋黃撈飯好正。迷你天丼, 稻庭烏冬$118 店員送上各款配料嘅盒子，裡面有溫泉蛋、蔥、木魚、海苔等。可以自行為烏冬添上配料。稻庭烏冬湯頭清甜，麵條粗而扁，入口細滑，頗有彈性。另外，迷你天丼份量也不少！有海老、菇菌、南瓜、豌豆、溫泉蛋。赤金鯛$28 菇菌$18追加嘅赤金鯛幾大條，抵食！菇菌爽口juicy ，推介！美味嘅天婦羅同軟熟嘅飯，大滿足！…Read More

Menu 提供極多選擇，由有主菜、小食到甜品都有。西式有Burger、台灣菜、韓國菜、四川菜。晚市套餐，點一個便當/主食，可以優惠價追加小食，包埋罐裝汽水，二人套餐$98好抵食。以後唔想煮飯一定幫襯買外賣。鐵路滷排骨便當 滷排骨好入口味，口感軟稔。滷蛋做到溏心好出色！白飯軟綿份量多，兩個人食都夠。滷肉青菜（+$20）滷肉份量不計成本，冇味精味道偏清淡好啱我口味。炸地瓜丸 （+$20）外脆內軟，芋泥餡微甜，可以當飯後甜品。涼拌芝麻菠菜 $28 菠菜煮得剛好，口感爽脆，調味清淡配油炸食物能中和一下。夜市蒜香辣味大雞排 （$30）大雞排已切件方便食，好酥脆，炸得乾身唔會覺得好油膩。芝士肉鬆蛋餅 （+$30）薄餅version 嘅蛋餅，冇沾醬嘅地方脆脆的，蛋餅中間有啲煙韌，下午茶食呢個份量剛好。紐約時代Burger $78 牛肉漢堡扒用料不錯，目測有一吋咁厚，煎得好香。煙肉好厚切，用靚料。沒有其他醬汁，簡單以芝士已經好好食。$265可以一次過滿足曬所有願望，份量多夠三個人食，性價比高，以後都會成日幫襯🫶🏽…Read More

天氣凍凍地，最愛打邊爐，成日都見到鍋處排晒隊，今日終於試到！店內環境寬敞，枱與枱距離夠闊落。醬料十分齊全，有齊我嘅至愛生蒜蓉、炸蒜、芫茜、蔥。雪櫃裏面嘅前菜有醃蘿蔔同味付螺肉。飲料方面除咗汽水之外，推介玫瑰冷泡茶，同埋荔枝紅茶都好好飲。任食邊爐配料，有十幾款新鮮蔬菜、丸類、拉麵、烏冬、豆腐等，食物高質冇伏。我哋兩個人揀左美國極黑和牛，任食放題套餐$285/位。選擇左壽喜燒湯底同埋飛鳥牛乳湯。第一轉先上一碟美國豚肉同埋四碟美國極黑和牛。美國極黑和牛油脂比例恰到好處。豚肉爽口。甜品主打當然係食Movenpick雪糕啦！今日有雲呢拿味同埋士多啤梨Panna cotta。另外，仲有韓國蜜瓜味雪條、紫米雪條。雪櫃裏面有原味芝士蛋糕、黑糖糯米糍、芒果布甸都好高質，唔好錯過！由前菜到甜品都高質，大滿足！…Read More

環境好適合打卡，少女心爆發。荔枝梳打特飲 $46 白桃烏龍茶 $32荔枝梳打好清香，有大大粒果肉。白桃烏龍有好多白挑蓉，好足料。兩杯都甜度剛好，微甜。燒烤BB豬肋骨配日式薯仔沙律$118肉質嫩滑，BBQ燒烤汁十分惹味，另上一小碟燒烤汁，十分細心。薯仔沙律好綿，沙律味清爽平衡味道濃郁既ribs。黑松露雜菌春雞會意大利飯$98鷄脾不得了，皮脆肉juicy ，意大利燴飯份量大，夠creamy黑松露味香濃，飯質唔會太硬，推介！檸檬忌廉班㦸卷$68幾年前第一次食Hesheeat食到呢個檸檬班㦸卷一試難忘。忌廉偏酸十分醒神，配以honeycomb 碎味道好夾，多年來仍然保持水準！宇治抹茶黑芝麻梳乎厘班㦸$108有驚喜！梳乎厘班㦸有蛋香，口感充滿空氣。最驚喜係mochi 同蕨餅超煙韌，高水準之作！主菜同甜品同樣出色，下次可以再來Xmas 小派對。…Read More

每星期都食一次台灣野，平時叫滷味多，今次試吓其他，好有驚喜！Shake shake海苔鹽酥雞$48燈籠推介shake shake鹽酥雞 ，炸粉好薄，鷄肉嫩滑，紫菜粉另上自己shake ，唔會過咸，值得推介！燈籠古早滷肉飯小碗$35有適量肥肉，多汁好味。飯軟硬適中。人氣蔥抓蛋餅奶油泥肉鬆起司$56蔥抓餅鬆脆，餡料勁多，芋泥餡質地厚實，快速飽肚之選。 麻辣鴨血野菜冬粉$52超級推介！粉絲好入味，吸晒麻辣湯汁味道好刺激。台式香蒜腸$32香蒜腸切薄片夾埋生蒜片一齊食。台灣直送蘋果西打$20 食鹽酥雞最好配汽水，蘋果西打甜度適中。期待下次試埋多啲其他菜式！…Read More

尖沙咀The Grill Room 環境適合朋友聚餐、happy hour飲野同約會。重點係記得book 枱，每次晚飯時段都座無虛席。如果經 SevenRooms book枱，仲可享有 7折優惠㖭。是日餐湯忌廉磨菇湯$58。以新鮮蘑菇打碎加入忌廉，十分香滑，再加上幾滴黑松露油點綴簡直係畫龍點晶，用心製作！前菜忌廉牛油蒜香雜菌$58。牛油同蒜蓉絕配，麵包鬆脆。鹽味焦糖汁燒豬腩肉配青蘋果沙律$218豬腩肉肥瘦適中，皮脆肉嫩。配以蘋果沙律十分清爽。香煎北海道帶子龍蝦汁扁意粉配三文魚籽$208北海道帶子新鮮，好大粒，香煎火候剛好。扁意粉質地剛好，龍蝦汁好香濃，加上三文魚籽鮮味十足。朱古力布朗尼配法式馬卡龍$88熱辣辣布朗尼配以雲呢拿雪糕，簡直係完美嘅飯後甜品。…Read More

秋風起，係時候打邊爐食麻辣火鍋! 打邊爐枱分佈有距離，冷氣夠。自家製XO醬超足料 $128 超級足料，懇求店員賣兩罐俾我哋 ，用嚟撈麵或者炒菜都好正，因為係自家製所以數量有限。自家製香茅檸檬薏米水 $20, 自家製竹蔗茅根水 $20甜度適中，食麻辣火鍋咁辣最啱解辣，好過飲汽水。前菜開胃小食 黑醋雲耳 $18清爽嘅雲耳、微酸嘅醋味好開胃。風沙椒鹽粟米 $68鮮甜嘅粟米以椒鹽炸過，十分惹味。自家製黃金炸魚皮 $88簡直係鎮店之寶級嘅小食，好多鹹蛋黃，魚皮勁鬆脆。鴛鴦湯底: 四川麻辣鍋辣杏汁豬肺菜乾湯底 $108+$68麻辣湯底小辣剛好，裏面有豬皮腐竹，好入味。杏汁豬肺湯湯頭奶白色，裏面有好多豬肺，未打邊爐先飲碗靚湯。花雕滑牛 $98肉質靚，花雕醃過充滿酒香。西班牙黑毛豬 $138肥瘦適中啱啱好，入口爽滑。自家製手釀芝士蝦丸 $58爆汁芝士丸，蝦肉彈牙新鮮。自家製芹菜帶子餃 $58芹菜好香裏面有完粒小帶子，好鮮甜。皮蛋芫荽餃子 $58餃子好大粒芫荽皮蛋好足料。雜菜盤$58份量足，蔬菜新鮮。沙包豬皮$48食麻辣火鍋最好就用豬皮同支竹吸湯汁精華。食物高質，服務周到，十分滿意。…Read More

垃圾洋蔥湯 勁稀又味精，拌碟喺芝士toast 好脆，芝士味香濃。Avo sour dough個麵包又淋又濕。應該因toast 完塊包即刻放碟，蒸氣令到麵包濕濕地，入口質地好嘔心。牛角包冇特別。結論係，去隔離買包返屋企食好過。…Read More

今晚omakase 選了$1,880 set N，共19款廚師精選美食。前菜是清甜北海道白粟米、秋葵配蒓菜、赤身吞拿魚醬油漬。配以梅酒加冰，十分開胃。油甘魚片以松露醬加添油潤感，配以新鮮無花果片，配搭十分清新。北海道帆立貝，以生紫菜作點綴，使用竹炭鹽調味，簡單調味令人品嚐到高質新鮮材料的鮮味。精美水晶杯裏面係深海池魚，配上淡雪鹽。池魚於夏季盛產，肉質細緻爽口，脂厚油香。響螺切薄片味道有柚子皮香味，口感爽脆，鮮甜無比！ 北海道仙鳳趾生蠔，肉質柔軟豐富，味道濃厚，鮮甜飽滿，以醋味沙冰提升鮮味。煙燻伊佐木係夏季當造嘅白身魚，柔軟多脂，煙燻後味道更多層次。池魚以北海道鄉土料理三升漬以及京蔥調味，味道濃郁。Sawara燒鰆魚以酸酸的青檸汁，肉質嫩滑。火炙梳子魚壽司，自製柚子汁蛋黃醬味道特別，令味道更昇華。北寄貝壽司肥美厚實，甘甜鮮美。中場休息，廚師準備了神秘果及龍珠果refresh 一下味蕾。間八喺日本被認為是最高級壽司食材中的前三名之一。魚腩部位非常肥美，口感相當濃郁香醇。牡丹蝦，以蝦膏做調味口味香濃，肉質棉密。火炙赤陸加柚子胡椒，最喜歡火炙後微焦的獨特香氣。白海膽質地濃稠，口感濃郁，甜度高。鮑魚包著以鮑魚肝醬茴香調味的壽司飯，味道濃郁，鮑魚爽口但不韌，賣相十分特別。煙燻大拖羅加蔥，魚油比例極高，拖羅佈滿精緻的魚油花紋，入口即化。魚湯使用京蔥，真材實料，非常鮮甜。自家製芒果沙冰及青蘋果，是日晚餐以清爽不膩嘅甜品作結。整體食材新鮮高質，廚師以傳統調味帶出食材鮮味，加上廚師詳細講解，我和友人兩人過了愉快的一個晚上！…Read More

性價比極高嘅Dinner Omakase，今晚選擇了17道菜嘅薰Kaori $1800 。同友人大快朵頤，吃得十分盡興。前菜有微酸水雲（海髪菜）、酒煮榮螺、新鮮生食北海道粟米及宮崎番薯豬煙肉夾雪梨片中和其油份。漬物係送嘅。自家醃製有薑、大頭菜、柚子醋蘿蔔、wasabi山藥。最愛酸薑十分開胃。鱸魚壽司及刺身，壽司嘅烏魚子令魚鮮味更突出。北海道真蠔灑上柚子汁，入口順滑肥美，有點海水咸味。北海道帆立貝，裡面有紫海膽，味道豐富濃郁。間八喺日本被認為是最高級壽司食材之一，好榮幸今日食到。魚肉口感帶有少許的脆感，非常獨特。池魚肉質緊實而爽口、味道鮮甜，配以自家製無花果酸汁。北海道白海膽味道濃郁，口感較豐腴，入口即溶。竹籤魚魚皮有焦香味，再加上特製薑醋汁，味道驚為天人。透明鮮美的富山灣白蝦有『富山灣的寶石』之稱，以及北海道甜蝦配豉油及柚子皮，每一口都散發出鮮甜味道。金目鯛魚經風乾五日，魚的油份透過火炙加熱後帶出更強烈的香味，加上海膽和橡木煙燻，視覺同味覺同樣享受。北海道紫海膽在6至9月期間最當造，紫海膽味道十分鮮美，甘中帶甜，原隻上原汁原味，真興奮～拖羅加紫蘇葉及南高梅醬，酸甜味配魚油香，簡直係完美嘅配搭。胡麻鯖魚用發酵米糠去醃製一個月，吃落有啤酒味，做法好特別。稻草燒鰹魚，薑蔥及蒜片，帶點中式嘅調味幾惹味。鱈魚魚蛋麵豉湯，湯頭清甜真材實料冇味精。橡木煙燻茶配綠茶蛋糕，清甜蜜瓜。為今晚嘅omakase畫上完美句號。店員服務殷勤，不得不讚廚師對食物配搭嘅心思和巧手製作，將各款新鮮名貴嘅食材錦上添花，發揮得淋漓盡致。期待下次再嚟過！…Read More

特登帶亞媽去青衣美登利，因為之前去日本覺得美登利係超級平靚正。喺日本要排大隊，但青衣哩間，我去兩次都唔多過三枱客。第一次去食嘅時候，喺日本都係食哩個set ，唔好諗咁多就要呢個乜都有，好抵食，都算新鮮，拍得住喺日本食嘅質素，不過紫菜淋左嘅。第二次帶亞媽去食就出事。五色刺身價錢吸引，諗住大件夾抵食，不過質素強差人意。玉子好甜，而且凍到牙都痺。我最期待嘅吞拿魚極瘦，仲變埋色，咁都仲俾人食。其他刺身正常。天婦羅蝦卷令人超失望。成條蝦唔熱不特只，仲係淋左過左氣。一定係午市炸多左，晚市照用。我覺得哩間分店簡直係陀衰家有損美登利嘅品牌。好在服務加番少少分，退左個天婦羅蝦卷，經理有禮貌地道歉，希望佢哋會改進，因為我真係好鍾意食壽司。…Read More

今日同個牛魔王朋友嚟到野郎stone，店內好似日式居酒屋小店。菜單十分簡單，只需要選擇你想食嘅主菜，加$30 轉套餐有味噌湯、沙律、薯蓉/飯/意粉。朋友超讚個飯係日本米超煙韌，配牛扒一流。我點左西冷sirloin 200g $138，朋友選擇左牛柳tenderloin 200g $148。上菜時有紙巾蓋住，待30秒後就可以開動了。我嘅西冷大概有2cm 厚，切開剛好是我喜歡的medium 。如果喜歡medium rare嘅話，推介牛柳，好厚身有4cm 厚，十分juicy。旁邊有蒜蓉同埋曰式燒汁，沾少少醬風味更佳。二百蚊有找好抵食！…Read More

Set Lunch 好抵食。$88有磨菇湯，8隻鷄翼，可選兩隻味。我哋3個人3個set，可以試6個味，仲有炸蕃薯條同普通薯條，正。Tandoori Spice印度唐杜里烤鷄味，真係好有印度風味，個調味粉係homemade，配香草醬中和番個辣味。California style係香濃嘅巴馬臣芝士蒜蓉味，好乾身，唔會覺得油淋淋。Honey wasabi蜂蜜芥辣味，用左柚子蜜好清新，最正係個酸薑。Thai sweet chilli泰式甜辣醬味比較普通穩陣之選，唔辣嘅。Singapore Zing 新加坡辣蟹味，嘩，好辣好醒神，好濃味，混合左辣汁、茄汁、薑同蒜味，兩粒星辣已經好刺激。Hoisin glazed, honey black sesame朋友推介黑芝麻海鮮蜂蜜，味道係似叉燒醬，肉味多好juicy。食得好開心，期待下次試其他味。…Read More

因為太耐冇得去日本，太掛住日本嘅關係，今晚想同朋友食日本菜，喺銅鑼灣一定諗起漁獲浜燒。日式裝潢小店加上店員殷勤服務令人感覺置身喺日本居酒屋一樣。梅酒 $65梅酒甜度適中，加左冰好易入口。沖繩風沙律 $138沖繩風沙律當然唔少得沖繩特產海葡萄同苦瓜。海葡萄晶瑩通透，苦瓜切薄片味道回甘，仲有肥美嘅三文魚、吞拿魚及油甘魚，配以醋味醬汁十分清爽宜人。刺身盛合5款 $428牡丹蝦豐腴甘香的蝦膏，口感細綿帶爽。三文魚鮮美甘甜，肉質柔軟。吞拿魚脂肪平均分佈，放進口裡散發濃郁魚油芳香。今日我哋有幸嚐到赤鯥刺身！赤鯥魚與喜知次同為日本高級紅皮魚，魚皮被輕微炙燒，肉質細膩，難怪更被日本人視為刺身中極品。馬糞海膽味道濃厚甘甜，極其鮮美。二人前浜燒盛合 $698來自愛爾蘭嘅蠔肉質嫩滑而且味甜，配以高湯更突出蠔嘅鮮味。帆立貝肉質細嫩，清甜爽滑，清酒及牛油煮各有風味。松葉蟹腳肉質柔軟富彈性，而且蟹味鮮甜。南非鮑魚肉質鮮嫩彈牙，沾上自家秘製海鮮醬汁非常美味。大蝦新鮮彈牙，燒香嘅爆羔蝦頭不能錯過。活日本北寄貝浜燒 $198我朋友極力推介必食，肉質果然爽滑，味道清甜，湯汁鮮甜無比，我同朋友都飲到一滴不留。橙雪葩 $68，白桃雪葩 $68清甜新鮮生果製成冰涼美味雪葩，糖份含量較雪糕低，非常清爽無負擔嘅餐後甜品。埋單每人大概$915，一千蚊都唔洗，抵食。…Read More

份量多，一個女子會吃不完一碗。於是點了個比較貴的E餐特上牛角次男坊定食$129，再點幾款小食，還有追加美國草飼牛腹肉$29和牛角飯$32。這樣兩個人吃份量剛好呀。結果我們覺得平價們追加牛肉比較好吃，因為比較薄還有一點脂肪的肥牛片容易咀嚼。貴價的和牛因為沒什麼脂肪而且厚切點，相對比較乾。對溫野菜$9沒有要求，純粹要吃點蔬菜，甘筍片意外地清甜。溏心蛋$12 味道很好，而且很流心，不過溫度太冷，可惜。整體十分滿意，這個價錢能夠快快品嘗牛角美味牛肉！滿足！…Read More