Nacolina's Profile

今次同朋友來urban cafe，一路以嚟都覺得佢嘅嘢食都唔錯，夠晒抵食，啱晒我哋四個朋友一齊聚會！今次我哋嗌咗四人套餐，裏面可以嗌4份前菜、兩個主菜再加兩個飯或者意大利粉。我哋叫咗：四碗餐湯-餐湯大推！有少少忌廉加埋南瓜蓉去煮，果然係世上最邪惡嘅配搭！芝士黑松露野菌忌廉意大利飯-呢個夠晒香，芝士味都好重，正常就係黑松露味唔會好假，加埋野菌就一流。挪威煙三文魚拉絲水牛芝士手工薄餅-Pizza上桌嘅時候已經切好4份，上面鋪滿一塊塊挪威煙三文魚，而佢個base就係水牛芝士！仲可以有少少拉絲嘅效果🥰西班牙黑毛豬肋骨配扁意粉- 燒烤醬配上豬肋骨，果然係最正嘅享受，肋骨與肋骨之間嘅肉肥得來又唔會好油膩，而且佢嘅貶意粉係用橄欖油煮，真係勁香飲品方面，最鍾意就係佢杯朱古力沙冰，飲飲下仲可以食到有朱古力脆脆，而且配合埋沙冰，成杯朱古力都唔會好甜，啱晒我呢啲減緊肥嘅人…Read More

很久沒有吃雞煲，見到IG有啲post介紹呢間人和月雞煲+打邊爐， 價錢二百幾蚊一位，有得食雞煲同埋高質牛肉火鍋，見今日路經尖沙咀，就決定去試一試。餐廳位於海防道，地鐵站附近，一入到去餐廳，感覺好企理， 同埋應該係新開張嘅。首先坐低就要點前菜（雞煲/酸菜魚），食完雞煲之後就選擇你想要嘅湯底。我哋兩個人點左雞煲+麻辣湯底打邊爐，辣度係小辣。雞煲份量唔算多，但夠香又夠辣， 而雞件亦算嫩滑冇雪藏味， 讚！食完雞煲之後，就嚟打邊爐，個麻辣湯底唔知點解有少少羊蘇味， 只係小小！ 我哋兩個人點呢個餐包左牛下肩、牛板腱， 呢兩個牛就只能夠叫一次，非常高質，牛味好重，肥瘦適中！另外我哋亦都點左金錢展、牛胸爽、雪花肥牛、黑豚肉、墨魚滑等等肉類。其實唔使$298 一位嘅價錢有以上嘅肉類選擇，而肉類質素亦十分之高質，選擇多，所以價錢非常之合理！而公家地方有一個位係比大家去令蔬菜、丸類、同埋甜品等等嘅食物。而飲品方面有各類汽水、和自家製嘅冷泡茶，非常之有誠意。呢個價錢可以食到唔同種類嘅高質肉類，雖然甜品選擇唔算多（冇雪糕），但價錢依然都係性價比高，一定會再幫襯！…Read More

雖然身在銅鑼灣鬧市，竟然比我同朋友揾到間裝修得好懷舊用哂烏絲燈既泰國餐廳。由於燈光柔和，令人可以放下煩惱同放鬆心情享受美食。除此之外，餐廳老闆仲用左好多老爺火車仔同零件做裝飾，火車迷既你，肯定你見到會好開心同興奮。估佢唔到呢度有咁多選擇，未計食物，淨係飲品都用左我同朋友成5至1O分鐘先決定到要龍眼冰，芒果沙冰，青檸菠蘿冰同菠蘿冰。淨體賣相就已經令人流哂口水，最勁係杯杯都真材實料，味道天然，唔會太甜。至於食物方面：-滷水豬手煲 ～夠淋同好入味，成咀邊都比骨膠原粘住，必食推介。海南雞半隻~夠大隻，但肉質好嫩滑，加埋個汁簡直係絕配。泰式拼盤 ~有魚餅，蝦餅，春卷同扎肉。包羅萬有，各式其式，樣樣足料。我好鐘意，勁好味，必試。泰式馬拉盞椰菜苗~熱刺刺，非常野味。泰式乾炒牛海鮮米粉 ~乾炒得來容易入口。幼身米粉唔會被碎上，同埋有彈牙大蝦，夠驚喜。…Read More

天氣凍咗少少🤏，約朋友食飯又多咗選擇～今晚就約咗兩個朋友去彌敦道嘅緣味小聚食海鮮蒸鍋！呢間餐廳喺ladder dundas 嘅9樓，上到去～環境唔錯！今次我哋就試佢哋嘅［星級大鮑魚-海鮮蒸鍋套餐］，套餐有一人一盅燉湯；8款海鮮～鮑魚、蟶子、大帶子、大刀貝等等，而且食完呢啲海鮮～仲有任點任食嘅手切牛頸脊、手打牛丸、各種蔬菜、馬拉糕等等，十分豐富！等咗一陣侍應就拎咗個燉湯出嚟，嘩！好多料㗎！我覺得好好飲！好想再飲😆然後啲海鮮嚟啦，侍應們十分細心，將唔同海鮮分別放入蒸鍋！然後再分俾我哋～不得不讚嘅就係，佢好細心咁幫我哋將鮑魚唔食得嘅部分，幫我哋拎走😍😍食晒海鮮之外，就叫咗牛頸脊、手打牛丸、娃娃菜、芋頭，我最鍾意食牛丸好似食緊牛肉球咁，好好味❤️仲有一個八寶飯，任你揀配料，食晒其他嘢之後，食一個飯，十分完滿❤️今次食得好開心，對我嚟講都係個新體驗～海鮮好味又新鮮，份量有足夠，員工服務又唔錯！我諗我會再同屋企人嚟呢到食☺️…Read More

行完apm去咗駱駝漆搵食， 今日幫襯呢間cafe喺一期， 對比另一邊， 完全唔使排隊等lift, 正！ 入門口有齊酒精消毒，同埋鞋套，食得安全又放心！兩個人唔太肚餓就叫咗Buffalo Wings, 墨西哥餅，千層麵同埋兩個嘢飲（美式黑咖啡、菠蘿雲朵沙冰）。 Buffalo Wings 同出面食到嘅完全唔一樣， 呢間餐廳嗰醬係似肉醬意粉嘅蕃茄醬， 唔酸唔辣， 完全同水牛城雞翼係兩樣野， 但係個味道非常之好食， 極力推介！墨西哥餅個份量睇落就細咗小小， 但個餡料好豐富， 配埋個芝士食， 確係唔錯！ 千層麵分量好多， 芝味濃， 上枱時仲熱辣辣，切開嘅時候有芝士拉絲， 好正！咖啡亦都要讚一讚，唔會有酸味，好好飲！呢間餐廳好坐， 位置闊落，空間感足夠，呢個價錢亦都唔貴，可以再返嚟試埋其他食物！…Read More

約咗好耐冇見嘅中學同學，諗住出嚟食下飯聚舊，諗嚟諗去唔知食咩好～佢就提議去太子食慢煮工業！ 喺地鐵站行過去都方便， 去到餐廳， 佢啲氣氛環境都唔錯，靜靜地可以傾下計！睇咗餐牌一陣，我哋決定叫2人慢煮套餐～有安格斯西冷牛扒，燒豬仔骨、豬仔髀各2支！ 西西里肉醬芝士焗意粉，仲有墨西哥辣粟米溫泉蛋沙律！ 呢個套餐好豐富，啱晒鍾意食肉嘅我哋～跟餐仲有兩個飲品，我揀咗黑牛，朋友就飲荔枝接骨木梳打～黑牛 👉🏾 好好味呀！！！我好喜歡雲呢拿雪糕撞落可樂果到而得到嘅泡泡，總覺得特別香滑～荔枝接骨木梳打👉🏾香香甜甜，都唔錯啊！！溫泉蛋沙律👉🏾菜好新鮮，配埋個特製沙律醋，令我哋胃口大開～牛扒👉🏾啲肉好嫩，好新鮮，煎得啱啱好，唔會overcook!燒豬仔骨、豬仔髀 👉🏾又係好食，肉質鮮嫩， 但個醬汁重味咗小小， 但可以接受！肉醬芝士焗意粉👉🏾個意粉面好大塊芝士呀，意粉焗得乾濕適中配埋肉醬，超好食😋！！ 餐廳環境好適合同朋友聚會，而家價錢亦都非常合理， 會再幫襯！…Read More

疫情下好耐冇同朋友聚會，於是我地揀咗一間有好嘢食又好坐嘅餐廳，可以慢慢傾計。餐廳雖然主打任食雞煲/鴨煲/火鍋，但舖頭唔會好大油煙，坐位亦比一般雞煲店闊落。飲品同雪糕可以免費追加，仲係自助模式可以慢慢揀。我地先試雞煲，店員將雞煲上枱後會再加熱炒一炒，成個雞煲即刻有哂鑊氣。除咗主要材料雞肉同雞腳，仲有紅葱、大葱等等嘅配料。雞肉有少少燶邊好香口，雞腳亦都好入味，但我最鍾意食嘅反而係配料，吸收哂醬料嘅精華。值得讚嘅係醬料香得嚟感覺唔會好重味精，食完唔會覺得好口渴。之後店員仲推介我地試埋鴨煲，今次唔止炒一炒，店員仲同鴨煲灒酒點火，實行有得食又有得睇。灒咗酒嘅鴨煲風味同雞煲截然不同，雖然冇雞煲咁惹味，但酒香好提升到鴨肉嘅香味。本身鍾意食鴨肉嘅朋友，一定唔可以錯過呢個鴨煲。本身諗住食完雞煲/鴨煲，再試埋舖頭嘅任食火鍋。不過個胃已經冇位喇，雖然見到隔離枱啲火鍋料好靚，唯有下次再嚟挑戰啦！…Read More

又搵到一間好食嘅日式餐廳喇！舖頭防疫措施做得好足，一入門口即刻為食客探熱同提供酒精搓手液。入座後店員推介咗我地試唔少菜式。值得回味嘅有:小樽丼 - 集合咗小蟹鉗、蝦、帶子、三文魚刺身、玉子於一身，而且好新鮮，冇腥味，想一次過試多種食材嘅朋友絕對要一試。清酒煮蜆 - 舖頭提供嘅係中型蜆，唔係港式日本餐廳嗰種細蜆。蜆肉有充分吸收到清酒嘅味道，而且一粒沙都冇食到，睇得出舖頭花咗唔少功夫。日式炸雞翼 - 呢款可以話係必食嘅小食，仲一定要趁熱食。舖頭除咗將雞翼醃得好香口惹味，炸粉亦舖得好薄。除咗做到炸物嗰種香脆口感，亦保留到雞肉嘅鮮味。燒物 - 豚肉金菇卷 + 汁燒帆立貝豚肉同帆立貝燒起之後都好juicy，值得一提係配搭帆立貝嘅醬汁好能夠提升海鮮嘅鮮味，值得encore。燒物 - 翠玉瓜 + 車厘茄 + 燒BB甘薯蔬菜一啲都冇比肉類失色，尤其係翠玉瓜，舖頭可以做到面頭有啲燶邊，但食落依然水份充足。喺食咗刺身同肉類之後品嘗，感覺好refresh。有水準嘅料理加埋店員嘅悉心照顧，實在係一間好有誠意嘅小店， 一定會再幫襯！…Read More

經朋友大力推介，今日特登去普慶坊試咗呢間小店。一到門口已經覺得裝修好有特色，燈光好柔和舒服。店員安排我地入座之後，俾咗兩張主菜/小食，手工啤/咖啡或茶嘅餐牌我地。我地叫咗士多啤梨特飲同西檸薑啤特飲，飲落好清甜開胃，亦都好香生果味。之後我地揀咗個芝士忌廉菠菜苗做頭盤，芝士啱啱好焗到金黃色，滑滑嘅忌廉亦好香口，配埋菠菜苗食一啲都唔油膩。主菜我地叫咗蜜糖香草烤雞槌，雞皮啱啱少少燶邊好香口，配埋蜜糖好野味，只係有少少辣，怕辣嘅都可以一試。另加嘅小食有芝士溫泉蛋大啡菇，真係要讚讚廚師時間上嘅控制，芝士溶得嚟溫泉蛋都保持嫩滑，一切開蛋黃舖滿喺大啡菇上面真係好滿足。食咗一輪肉類同芝士，店員好細心咁幫我地清理碗碟餐具等我地可以慢慢食甜品。必食推介有慢煮白酒菠蘿配意大利雪糕。一啖咬落浸滿白酒嘅熱菠蘿，油膩嘅感覺一掃而空。再加埋冰凍嘅雪糕，為呢一餐畫上完美嘅句號。用親民嘅價錢食到咁高質嘅嘢食，店員又親切細心，一定會再返嚟幫襯同介紹俾朋友。…Read More

今日有朋友生日， 除咗買禮物，我都仲想去買蛋糕同佢哋慶祝。 但係其實香港有好多專係買西餅嘅舖頭， 而家間都真係好好食嘅，根本唔知選擇邊一間好。  跟住去商場行下，見到有間專門賣西餅嘅舖頭，好多人排隊，我就走去睇下。見到d餅好吸引， 跟住我就選擇咗一個佢地出名既特濃朱古力蛋糕一磅裝。其實， 呢個蛋糕唔大個，所以我開頭有啲擔心唔夠食，我地仲將個餅切到細細粒咁樣， 一人一啖。 至於個蛋糕好精緻、好靚，但係實在太甜。 如果切得太大嚿， 會好飽同好漏。…Read More

今日去左間好耐冇嚟過既麵檔，呢度出名用魚淆 湯。 除左魚，炸豬扒亦都係佢哋嘅鎮店之寶。如果你唔想單一樣餸，你可以揀車仔麵餐。 仲有呢度除咗下午茶餐有飲品送外，其他要另加。今日既我嗌咗個炸豬扒米線， 不過我加咗錢 轉咗冬陰功湯。米線同豬扒分開上， 冬陰功湯唔係泰式飲開嗰隻， 好大分別的。 佢有洋蔥同埋啲香茜 可能個湯係用魚湯淆， 而又辣辣地，所以超級好飲。 至於個米線唔係蠟口嗰種，同個湯好匹。塊豬扒無乜炸粉，有好多汁同鬆軟。呢碗米線40蚊有找，又好味，值得推介。…Read More

屋企樓下商場開咗間稍為有名氣嘅酒樓， 佢似小廚形式去經營，所以唔算大間。我同朋友大約十一點去到，門口已經企滿人等位。首先，去門口撳機攞飛等位， 好彩我們只有兩位， 等唔夠五分鐘就已經有枱入座。眼見大枱數量不多，主要以 四至六人為主。 *提示如人多最好提早派代表攞位或訂枱先*食物方面鮑汁糯米雞; 好細隻，一人分量，裏面有一隻鮑魚仔、肉碎、冬菇等……好味，但價錢貴左小小。櫻花蝦煎蘿蔔糕; 冇蘿蔔味、 唔夠鬆軟、可能太多麵粉，口感好硬。鳳城湯水餃; 湯清清地，有幾條生菜。 水餃饀多， 有冬菇、 豬肉、 筍……皮薄，好味。日式煎釀三寶; 釀冬菇兩隻、 釀秋葵兩條、釀紅椒、青椒各一。 可能係用蝦膠釀，所以唔膩。 配埋個日式燒汁，出奇好味。 西米焗布甸; 小小白蓮蓉餡，再配上熱辣辣嘅西米。 真係好食。侍應招呼非常一般， 先講我2張枱，上手碗碟已收好。但未抹枱，已給我2坐下。等左一陣間，無人理會，唯有自己揮手揾侍應。其實等待期間，眼見有一位侍應明顯見到我們的枱需要清潔，但就手旁觀。跟住，旁邊一台食客不停追問關於自己order的一碟小炒， 侍應沒有跟進，只說廚部需要時間處理。最後食客發覺原來落漏單，唯有埋單結帳。可能旁邊食客因等食物座耐左， 我竟然聽到侍應在旁邊竊竊私語話人家唔願走。最後，我2查實坐下不到一個鐘，已經食飽和準備埋單。 可能由於外面多人等位， 侍應以急不及待， 沒有理會我2感受下收拾我2的碗筷，還差點倒瀉在我朋友身上，感覺被趕走，不知所謂。* 溫馨提示* 就算食物有好質數，但侍應招呼態度惡劣， 也是不會受歡迎的。…Read More

同朋友今晚去咗D2 Plaza 一樓嘅一間西餐廳，我同朋友2人被安排咗坐喺近門口嘅一張六人枱。可能係長枱既関係，比平常坐開較闊，坐遠左，傾計時大聲少少音量。今晚唔算多人，又或者可能無訂位，所以被安排同兩個陌生人一齊坐。雖然環境算乾淨但感覺怪怪地。同埋佢張櫈太硬，有d唔舒服。至於食物方面……我哋係叫咗兩個套餐; 一個就係 龍蝦汁大蝦意粉，另一個就係鵝肝意大利飯。 跟住係有餐湯同埋餐飲送。龍蝦汁意大利粉; 好好食呀！隻蝦入哂味，超新鮮。意大利粉配芝士，好香，好彈牙。至於鵝肝意大利飯都係做得非常之好，鵝肝煎香咗、 同過意大利飯係好配合。 唔會 太肥膩，接受。 餐湯係粟米忌廉湯，罐頭湯feel, 無驚喜。跟住我哋另外再叫咗份三文魚凱撒沙律， 沙律菜新鮮算做得唔錯，三文魚算多。…Read More

油麻地榕樹頭附近， 有一間好細間、好細間嘅西餐廳。外面望落去會唔敢入同覺得可能好似好。入去你見到淨係得細枱，大約可以坐到二十個人左右。 我地今日入去係食早餐， 因為地方太細，所以係坐滿人。侍應見我地坐底即刻攞咗個餐牌過嚟畀我，好有禮貌咁問我地想食乜。跟住我叫咗個蘋果沙律、 牛油多士、 凍檸茶。 朋友就叫咗吞拿魚三文治、熱咖啡。 蘋果沙律，好多蘋果再加椰果、青瓜等配料。 蘋果超新鮮及爽口，沙律做得相當出色。 牛油多士係厚身嗰隻， 好似無乜特別又唔夠燶但食起上來脆卜卜的。 凍檸茶就淡咗少少。 吞拿魚三文治、 冇乜特別。 反而杯咖啡就好好飲，好香、好濃。 最後，見到有花茶，我地就叫左嚟試下， 足料花茶， 夠香， 又解渴。最估唔到係向呢間西餐廳竟然有花茶飲。唔錯！…Read More

今晚做冬，例牌一家人出去食飯。唔知想食乜下，最後揀左食上海嘢。 呢問有接近過百年歷史，我覺得價錢唔算平個隻，但都有好多客人幫襯。平時最好訂位先。至於環境，今晚雖然做節，當然多客人，不過可能呢度地方大，就算擺滿大枱坐得密麻麻，都會接受。待應殷勤招待，隨傳隨到，值得讚賞。 雖然係大節日，但沒有勉強我哋叫圍餐，散叫也可以。食物方便…前菜炸鱔條 : 脆卜卜，甜甜地，小朋友至愛。燻蛋 : 唔夠熱，燻味不夠，價錢便宜。醉豬手 : 皮爽，夠酒味， 豬手入味。涼伴海蜇頭 :  好重麻油味，夠爽口。小菜紅燒元蹄 : 需多人分士，否則太肥膩。 其實個汁都好好味， 可以加碗白飯。樟茶鴨 : 呢道出名菜。 鴨肉舊嫩口， 不過乾咗少少。火腿津白 : 雖然唔係上湯，但火腿味勁濃。超級好味。炒鱔糊 : 細細碟、多配料。清炒蝦仁 : 味道清清地，份量勁多。主食……小籠包 : 熱辣辣、皮薄、入面仲有勁多湯汁、好好食。煎鍋貼 : 個皮煎得脆卜卜，入面有肉與葱做餡料。  生煎包 : 其實同鍋貼差不多， 只不過係個面不同。所以可以2揀一。炒年糕 : 加菜一齊炒， 夠入味，一定要叫。甜品高力豆沙 : 紅豆餡好似多咗啲， 有點兒太甜。酒釀丸子 : 桂花味、酸酸甜甜。…Read More