pakupaku's Profile

除左闊條烏冬，佢嘅自家製烏冬同埋蕎麥麵都值得一試。我叫咗一份竹崙天婦羅澆汁自家製冷烏冬，一份炸王餃子，呢間舖頭嘅賣點，係每一碗烏冬都用心準備，唔係大量生產嘅味道，果然等候時間係有啲耐，但係服務生態度非常好，而且嘢食一嚟到令人眼前一亮，我覺得等幾耐都值。味道方面無乜可以挑剔，個汁濃度適中，烏冬夠煙韌，食材新鮮，天婦羅炸得好鬆化，仲有泡菜同小黃瓜開胃，簡直係越食越想食，唯一嘅缺點就係價錢稍微偏貴，如果份量多啲就perfect！…Read More

有一日喺附近開工，放飯時間早咗，大概11:30，求其搵間茶記食，經過呢間嘢，發覺嗰個鐘數都幾多人，我心諗咁多人幫襯應該唔差得去邊，因為嗰邊其實好多選擇。咁我見個門面都唔錯，所以就入咗去食。坐低叫咗個蒲燒鰻魚蛋包飯，本來我都唔係好肚餓，直至碟嘢上枱，個賣相實在出色，胃口即刻返晒嚟，勁多木魚花鋪面，鰻魚又厚又大件，隻蛋係有蛋汁㗎，絕對係有心機做嘅蛋包飯，最後，一個鐘前先食咗份早餐既我，成碟飯食哂😛不過唯一唔好嘅地方就係，唔知係咪我坐嗰個位嘅問題，電話係上唔到網🫣…Read More

朋友介紹我嚟食，話係香港食過最好食嘅串燒，我試完覺得佢無誇張，真係冇得輸。好入味，調味好好食，分部得好均勻，而且燒得恰到好處，d肉唔會乾晒，特別係個爸B串燒，外脆內軟，雞牛豬都好出色！連韭菜都好新鮮，條條都係翠綠色！以後想食串燒都會第一時間諗起佢！…Read More

我好鍾意食米線，特別係最鍾意食濃烈味精湯底，夠酸夠鹹夠辣我就開心。出街食嘢係咁㗎啦，要健康不如自己煮～但係我又懶得煮，又唔識煮，聽人講呢間春城有個椰子雞湯底米線，即管嚟試吓，不過我聽到椰子雞湯其實都掙扎咗陣，因為多數都好淡，最多擺兩片海底椰喺入邊冇味又硬，所以本來都好想叫酸辣米線算數，但係呢一晚我真係好想健康啲，最後就叫咗碗椰子雞。賣相有驚喜，一睇個湯底杰撻撻就知有料到，絕對唔係好似清水咁樣敷衍你嗰隻，仲有椰絲喺面㗎，啲蟲草花雲耳啊多到呢，正！冇估錯，食落係濃味嘅，佢唔係味精嗰隻濃味，係食到有椰子味，又有雞湯味，係濃濃健康嘅味道，呢碗米線，我食哂係完全係冇罪惡感，連個湯我都飲咗一半。講吓啲小食，叫咗個炸蝦膠豆卜同埋爆漿紅糖糍粑，兩個都好好食，蝦膠豆卜炸得靚，紅糖糍粑甜度適中，攤凍咗都仲係流心嘅，絕對有心機！…Read More

以前食開天水圍頌富個間，但近排係元朗開左分店，貪近就來食晚飯。首先叫左個菠蘿咕嚕肉，睇賣相就唔錯，似乎係原個菠蘿切出嚟，不過就功高蓋主，個咕嚕肉係麻麻哋，雖然係細細粒容易食，但係就炸得唔夠酥脆，食菠蘿開心過食咕嚕肉。跟住就係個金蠔煲，唔錯，金蠔粒粒都好大粒，雖然份量就少咗啲，但係蠔呢d食得多都漏啦，所以我係OK嘅。最後就係金銀蛋浸時蔬，估唔到呢味最簡單反而做得最差，我見佢用咗白菜都已經有少少失望，雖然時蔬都係好似開盲盒咁，但係舊幾水俾白菜人食，真係有人會高興咩？重點係味道真係唔得，唔知係啲鹹蛋問題定係點，我食到有浸酸味，當然酸得來係接受到，唔係即時要投訴嗰隻。總括成晚最唔滿意係呢味。…Read More

個日做野甘岩要入打鼓嶺，晏晝要喺入邊搵嘢食，因為入去嗰條路有經過呢間九記士多，就沿路搵返入去食。本身都係抱住醫肚嘅心態，好又一餐唔好又一餐啦，同埋都預咗貴㗎喇，因為入到去咁偏僻嘅地方，選擇又唔係多，都焗住食佢㗎喇。一坐低，入面嘅姐姐又幾好禮貌招呼，好親切甘問我哋想食乜，我睇一睇餐牌，價錢又唔貴喎，叫咗碗火腿太陽蛋公仔麵都只不過係$25，加$3仲有得轉我最鍾意嘅豬骨湯出前一丁麵底。價錢同服務方面就滿意了，至於味道如何呢？碗麵一嚟到我就嘩咗一聲，唔係誇張，因為啲蔥花啊，係好明顯好新鮮好翠綠，而且切到細細粒，並唔係平時茶餐廳hea你個隻，跟住隻太陽蛋流心得來有少少燶邊，至於個麵都真係煮得恰到好處，無論麵嘅質地定係湯嘅濃度，我都非常之滿意。可能原本抱住嘅心態真係做到身水身汗為求有啖飯落肚，所以最後竟然食到一碗咁高質嘅公仔麵我係超級咁開心，忍唔住要俾個好評！希望你哋舖頭越做越有，有機會再入打鼓嶺一定嚟幫襯！…Read More

試左兩款班戟：火焰牛油果同埋榛子香蕉火焰牛油果係有炙燒既味道，吱左沙律醬同埋類似燒汁，好香，成件事好夾，成完係想encore個隻！榛子香蕉就普通d，可能平時都係食開甜既班戟，唔算好有驚喜，但都好食既。…Read More

天水圍啲茶記嚟講，呢間算出名，不過佢搬咗嚟天一之後就冇再食過。今日見早咗起身，決定返工之前嚟食個早餐。叫咗個沙嗲牛肉麵配煎蛋火腿厚多士，再叫咗份豬扒包，加杯凍咖啡，精神！沙嗲牛肉麵真係算幾有質素，俾好多牛肉好多沙嗲汁，一啲都唔孤寒。加少少辣椒油，成碗麵又昇華左，濃厚得來又唔會食到好漏。煎蛋火腿配多士就唔使講，不嬲都係最佳配搭。重點係個煎蛋係流心，非常juicy。最後就食埋豬扒包，$28一份，夾住新鮮嘅蕃茄青瓜，講真澳門啲豬扒包我就唔識欣賞，乾爭爭得塊豬扒菜都無條…反而香港茶餐廳啲豬扒包真係冇得輸。今日食完呢個早餐，簡直叉足電，做嘢都落力啲。…Read More

因為就腳，其實雲川我已經食過唔少次，豬頸肉出名好食就唔再多講啦，好多人都分享過，今次想比較下「酸辣湯底」同「酸麻金湯」。食開米線既朋友都一定有自己既偏好，「麻辣」同「酸辣」各有一班捧場客，食開邊樣就通常唔會轉。但當「酸麻金湯」出現左，就令唔少人有選擇困難，一個湯底滿足哂兩種味覺，好似抵食d喎，而我亦都唔例外，食開酸辣既我今次一於叫左碗酸麻金湯試下。平時食開既酸辣好香酸菜味，而且好香濃，小辣都唔會無料到，係幾高質既湯底。今次試呢個酸麻金湯，雖然有酸有麻，但有少少兩頭唔到岸，酸唔夠酸、又唔算好麻，而且無左個浸好香既酸菜味，我叫左中辣，夠辣不過唔夠濃味，同酸辣湯比爭幾級。總結，貪心無好結果，想兩樣都要，結果反而兩樣都滿足唔到，都係繼續做我既「酸辣」捧場客了。…Read More

突然想食台灣菜 諗起呢間野門口成日排哂隊等位 見時間尚早就等下位啦 滿心歡喜一路睇住個menu 樣樣都好想食好想飲 不過 可能期望太大 食物既質素同我預計有d落差…首先講下個紅燒牛肉麵 係無咩特別 湯底唔濃 d牛肉算多 但略嫌切得太大舊 同埋唔淋 又唔係幾入味 唔多岩我口味然後講下個蚵仔煎 其實又唔算差 普通啦 粉多左d 變左好厚 食多幾啖就好濟蛋餅我揀左鮪魚餡 大獲 乾爭爭 早知揀返普通肉鬆/粟米 可能無甘差…份台灣腸算幾好食 但$36泥講份量太少了 合返埋唔知有無兩條！？最後飲品 同出面比都係偏唔好飲 雖然跟餐唔算貴既總結 唔明點解甘多人等位 我都唔會再排第二次了 除非無人等位 又甘岩想食台灣菜 都會再入去食既…Read More

週末去咗澳門玩，除咗試咗豬扒包同埋葡撻等等地道小食，亦都上網睇到呢間金利食店，聽人講最出名係咖喱雞米粉，一場嚟到梗係要試吓。去到門口見排晒長龍，就知道一定有返咁上下水準。好彩都好快有位，雖然地方比較淺窄，但係咁先至夠地道風味㗎嘛。坐低就叫咗個咖喱雞湯米，當然要大辣啦，碗野嚟到見到咁多辣椒油喺面就心諗冇死啦，就算唔夠味都起碼夠辣。食咗第一啖之後，我就知道自己諗多咗，除咗夠味之外，仲好好味，香濃嘅咖喱湯底配埋嫩滑嘅雞，食完一啖又一啖，好快就食晒，如果唔係見咁多人等緊位，又要趕住去賭場，我一定嗌多碗嚟食，而家有啲後悔，返到嚟香港都仲係念念不忘。…Read More

成日喺天水圍食嚟食去都係果幾間，無意中見到喺天水圍Wetland Seasons Bay樓下開左間日本菜叫東屋台，就去試吓新嘢，點知真係有驚喜喎～一見到個餐牌，就叫咗個大阪燒，除咗有得揀餡同要咩汁之外仲有得加辣，啱晒無辣不歡嘅我😍一嚟到個賣相已經贏咗，因為超多木魚花同埋紫菜，係大阪燒嘅重點！入邊嘅章魚亦都唔吝嗇，唔係嗰d得成口椰菜嘅貨色。鰻魚丼配玉子燒都好出色，鰻魚夠大條，配埋飯素夠惹味，好快就食晒成碗。另外飲品都好多款式，特別推介宇治抹茶珍珠鮮奶，雖然冇得揀甜度，但係一啲都唔漏，好重抹茶味，杯蓋仲寫住日文香港人頑張れ，非常窩心🥰以後係天水圍食飯又多個選擇啦！…Read More

陳通記沙嗲牛肉米食是一家位於長洲的受歡迎小店，它主要提供精緻及美味而價錢又合理的沙嗲牛肉米。店舖裡傳來香郁的香味，可以由遠處聞到。當我走進當中，就被地道的裝潢和令人振奮的menu引起興趣。他的沙嗲牛肉米味道特別，花生碎混合沙嗲醬汁始終讓人狂歡，肉質飽滿，鮮嫩多汁。此外，當中的米粉也十分特別，正好配合美味的牛肉搭配而成完美的配套。總而言之，陳通記沙嗲牛肉米食是一個值得一試的受歡迎小店，在那裡可以品嘗到滿足及味覺享受，定能令到大家可感受到完美饕餮。…Read More

住元朗嘅我第一次食呢間，自己一個人嚟食，淨係叫咗碟紅油炒手同孜然大蔥牛肉，其實兩樣都唔錯，份量都夠大，不過有少少美中不足。紅油抄手$48就有成9隻定10隻，其實好抵食，我一個人幾乎食唔晒！不過問題係唔夠辣，對我嚟講係幾乎唔辣😅，唔夠辣咁不如食餃子，冇咁油，更加健康，下次我會試佢哋嘅其他餃子。孜然大蔥牛肉雖然夠濃味我鍾意，但係略嫌太油，碟野稍為無咁熱嗰陣已經鯨晒油漿住個口，食到好膩，所以一定要趁熱食，最後要飲杯熱茶燒燒滯。…Read More

我好鍾意食譚仔，基本上去到邊區都會食，所以香港新界九龍嘅譚仔都俾我食均。雖然同樣都係譚仔，但係每一間分店都總有少少唔同，有啲分店會比較淡，好似溝咗水咁，有啲又唔夠辣，叫中辣都冇乜料到，有啲啲米線又煮得太淋。長沙灣廣場呢間就係我食過最穩定，質素最高嘅一間，因為以前公司喺長沙灣，所以成日幫襯，但係去到其他分店總覺得冇呢間煮得咁好食，湯底每一次都夠濃味，特別係泡椒酸菜魚湯底同埋重慶酸辣，水準真係穩定㗎。…Read More