sharon1010's Profile

今日同朋友嚟到品嚐呢個“世味人生”套餐⋯從第一道甜椒醬蟶子皇開啓美味序章，爽脆蟶肉包裹住微辣甜椒醬，清爽開胃，瞬間喚醒味蕾。前菜三弄各有風姿，百香梅茄酸甜解膩，三絲海蜇脆嫩，20年古越龍山花雕浸鮮蝦，酒香滲入蝦肉，層次豐富。杏汁肆菓燉螺頭湯，杏香撲鼻，同螺頭鮮味交融，暖胃又滋養。蟬衣玉帶，創意十足，肥美帶子，搭配酥脆芋絲嘅蟬衣，脆與嫩、鮮與香碰撞，再搭上鮑魚汁，鮮味無比！珍寶珠 ，sorbet 作為清口環節，為下半場美食騰出空間⋯海苔蔥燒銀鱈魚，銀鱈魚先經深炸，外皮微脆鎖住油脂，肉嫩得輕輕一抿就化開。海苔嘅香氣同蔥香交融，每一口都匯聚海嘅鮮、蔥嘅脆、酥皮嘅輕脆，層層疊疊，非常好食！荷香子薑欖豉醬蒸雞，雞肉鮮嫩，子薑提鮮。魚香手功寬麵，魚香汁裹著勁道寬面，咸香微辣，非常惹味。最後，以香芒雪燕烏豆花作結，豆花滑溜溜，芒果清甜，襯上輕盈嘅雪燕，每一啖都清爽又養顏！為今餐畫上清雅嘅句號⋯整套菜單喺傳統粵菜基礎上融入現代詮釋，味道層次豐富⋯係一場值得細品人生之味⋯…Read More

今日特別想食燒肉，而老公就想食火鍋，咁啱經過呢間「一喜·燒肉」，而家做緊promote $198燒肉&火鍋放題！正好一次過滿足晒我哋嘅願望⋯火鍋我哋揀咗豬骨湯底⋯牛肉紋理分明，入口軟嫩；豚肉肥瘦相間，輕灼即熟。搭配特調蘸料，鮮味加倍⋯燒肉日本黑豚肉原味純粹，油脂喺高溫下滲出，香氣濃郁。牛舌厚薄適中，燒至微焦，彈牙有嚼勁。澳洲安格斯牛板腱肉質緊實，鮮嫩多汁，每一啖都係滿足。雞中翼咸香入味，皮薄酥脆，忍唔住要繼續encore！多春魚肚子里滿滿嘅魚籽，烤過後外皮酥脆，魚籽喺口中爆開，鮮香四溢。墨魚仔Q彈爽滑，口感鮮嫩⋯出面自助區仲有飲品、小食、蔬菜同甜品⋯最後我揀咗榴槤雪糕，榴槤味香濃清甜，口感綿滑，榴槤控必食！…Read More

今日嚟咗呢間「蕾」，餐廳主推串燒同清酒，食物種類款式豐富，每一款都有獨特風味⋯ 枝豆豆粒飽滿，鹹香清新，瞬間喚醒味蕾。味醂魚乾，魚肉乾香，醬香同魚鮮融合，越嚼越香，係送酒嘅好配搭。 炸雞軟骨炸得金黃酥脆，鹹香適口。雞皮烤至金黃，油脂被逼出，入口酥脆不膩。鹽燒手羽火候精妙，外皮焦香，內裡嫩滑多汁！雞胸軟骨脆嫩兼備，嚼起嚟趣味十足。 牛舌芯串牛舌處理得極好，口感細膩彈牙，肉香濃郁。 豚肉生菜卷豚肉香嫩，搭配新鮮生菜，清爽解膩。豚肉泡菜卷泡菜嘅酸辣為豚肉增添咗另一番風味⋯雞腎口感彈牙，味道醇厚⋯墨魚汁香腸咬開後墨汁嘅鮮香喺口中四溢，推介！ 翠玉瓜烤得軟嫩，清甜依舊。秋葵保留咗脆感，鮮味十足。 燒飯團外層微微焦香，米香濃郁。盤城壽口感輕柔，帶有一點新鮮同清新嘅餘味⋯ 餐廳從食材選取到烹飪技藝都頗具水準，同朋友過嚟小酌一番，係一個唔錯嘅好去處！…Read More

喺繁忙嘅生活中，偶爾需要刺激一下味蕾，而泰國菜無疑是最佳選擇之一，每當胃口唔好時，總能勾起食慾⋯今日嚟到位於尖沙咀嘅Luna Bar & Restaurant⋯泰式燒豬頸肉 肉質緊實而富有彈性，燒烤後嘅外皮呈現出誘人嘅焦香，而里面又可以保持住鮮嫩多汁⋯搭配上特製嘅泰式醬汁，微辣中帶住一絲甜味，讓人欲罷不能！泰式燒雞全翼 雞翼皮香肉嫩，色澤金黃誘人。輕輕一咬，外皮酥脆同內里多汁嘅肉質形成鮮明對比，真係滿滿嘅幸福感⋯粉絲肉蟹煲 無疑是成餐飯嘅重頭戲！打開煲蓋嘅一瞬間，濃濃嘅香氣撲鼻而來⋯肉蟹肉質鮮美無比，粉絲喺煲中充分吸收晒蟹肉嘅鮮味同精華，真係十分之好食！令人食慾大開，一啖一啖咁停唔到口⋯ 餐廳除咗提供泰式美食之外，仲提供咗多元化嘅娛樂選擇，包括掟飛鏢、唱K等等⋯啱晒成班朋友食飯、飲酒、唱K直落⋯…Read More

今日我個深水埗通帶我嚟到福華街食好西！餐廳裝潢充滿港式風味，牆上嘅霓虹燈曾經係香港夜景一大特色…老闆娘推薦我哋食精選二人套餐，套餐入面已經包含咗餐廳招牌食物…另外，如果湯底/肉類唔啱心水，仲可以加錢upgrade，夠晒彈性！我哋揀咗胡椒味菜豬肚湯底，自家熬製，無味精，正！黃金炸魚皮新鮮即炸，酥脆唔油膩，呢個鹹蛋黃炸魚皮超有罪疚感，難怪係餐廳嘅signature，必食之選！肉類我哋2個牛魔王，打邊爐點少得牛呢！除極品封門柳外，仲額外order多個安格斯牛小排…牛小排，油花分佈均勻，肉質柔軟甘香，綿滑嫩口；而封門柳肉味濃厚而獨特，肉質有質感。我個人偏愛肉質柔軟甘香，綿滑嫩口嘅牛小排，而朋友就超鍾意肉味濃厚嘅封門柳，2者皆有特式，視乎個人喜好。招牌手打鴛鴦滑（蝦滑拼墨魚滑）足料又新鮮，口感爽滑彈牙，而且味道夠鮮。自家製餃子雙拼（韭菜餃拼鮮蝦雲吞）皮薄肉多，做工精細，餡料豐富…二人餐亦包咗主食、蔬菜同飲品。雖說打邊爐都係大同小異，要與眾不同就只能喺食材方面著手，餐廳呢方面真係做得好好，食材新鮮之餘，牛肉種類都好多選擇；而且老闆透露佢仲收埋咗隻極品，真係唔怕你嘴刁，就怕你唔識食！雖然價錢上未必最平，但佢哋畀到顧客多一份人情味…上至老闆，下至員工都時不時主動過嚟加湯、收碟…甚至吹水，講下牛肉來源地，其他牛肉嘅特質、口感等等。點餐時老闆娘仲介紹個羊腩煲，但偏大份，人多會比較合適，下次嗌多2個朋友過嚟試羊腩煲先！…Read More

今日約咗朋友食飯，朋友想食日本放題，最近天氣凍凍哋，最啱就係食燒肉放題！今次我哋嚟咗屹立於尖東多年嘅燒肉放題餐廳 - 燒魂⋯星期一至四成人價$338加一就可以食足2個鐘，而且食物種類相當豐富！除咗燒肉外，仲有壽司、刺身、揚物等等，真係應有盡有！飲品方面，除咗平時放題餐廳嘅汽水同韓式飲品外，仲有啤酒供應；而且仲好貼心咁準備咗部分室溫飲品，照顧埋一班養身嘅客人！刺身方面，最有驚喜係珍寶赤蝦，足足有5-6寸長，大大隻，啖啖肉，非常滿足。燒肉呢⋯豬頸肉、骰仔豚、和牛、牛舌同雞翼都係唔錯嘅選擇；而且有幾款肉類有多種口味選擇，好啱鍾意試新嘢嘅你！不得不讚嘅係呢度嘅揚物同小炒都係即叫即做，熱辣辣好新鮮！由於食物種類太多嘅關係，我哋未能逐一去試都已經食到飽飽，就連甜品都食唔落⋯…Read More

今日放工，朋友帶咗我嚟位於荃灣嘅「𤅗燒居酒屋」，餐廳環境舒適企理，牆上佈滿日本海報，令人置身於日本居酒屋一樣⋯酒盜冷豆腐鹹鮮嘅酒盜配上清甜嘅豆腐，兩者味道相互配合，感覺唔錯⋯三點盛合（三文魚、油甘魚&赤身）單睇賣相件件新鮮又厚身，而且食落鮮甜。串炸（鵪鶉蛋、年糕魚餅、煙燻芝士竹輪&三文魚親子串）炸得酥脆，配上醬汁，外脆內軟，咬落十分鬆化。自家手作雞肉棒表面燒到焦香，肉質軟腍，且咀嚼起嚟有口感，蘸上蛋黃醬汁，香口滑溜。阿波尾雞翼肉質鮮嫩、可口，外皮燒得燒得香脆，而內裏非常juicy，推介！味噌廣島蠔鍋味噌味道唔算太濃，啱晒我口味！配上鮮甜可口嘅廣島蠔，十分滿足。而且配菜同粉絲索晒湯底嘅精華，好好味。特色燒飯團飯團外層燒得香脆，內層Q軟，咬落去外脆內軟嘅口感，感覺幾特別！黑白啤容易入口，口味較柔和、爽口。白桃特飲白桃味香濃，清甜爽口，幾好飲！…Read More

今晚約咗朋友出尖沙咀，經過利時，見到呢間Thailand King嘅餐廳，上網一search，評價唔錯，就決定一試。餐廳唔大，環境開揚，靜靜哋喺度食個dinner或者同朋友happy hour感覺好chill！泰式生蝦生蝦無論是外型、味道、口感都十分良好，肉質爽口彈牙，配上生蝦酸辣汁，酸酸辣辣，十分醒胃！炸蝦餅香脆彈牙嘅蝦餅配上酸酸甜甜嘅泰式醬汁，令人一件又一件，停唔到口⋯香茅煮花蜆簡單煮法，帶出花蜆嘅鮮味！蜆肉肥美，隻隻飽滿⋯花蜆融入咗香茅獨有嘅香味，感覺唔錯。泰式豬頸肉肉質爽而軟腍，肥瘦均勻，配上泰式醬汁，酸酸辣辣，十分清爽惹味！咖喱軟殼蟹 配蒜蓉法包酥脆軟滑嘅軟殼蟹，配上香濃嘅咖喱汁，非常有風味！食淨咗嘅咖喱汁唔好浪費，再配上蒜蓉法包，又係另一個食法！泰茶 / 荔枝沙冰泰茶茶底香濃，入口醇厚，唔錯！荔枝沙冰，味道清新，而且唔太甜，解暑又開胃！…Read More

豐業大廈我嚟過好多次，但通常都係食中菜多，之前發現呢間Cuisine Culture，今次就過嚟探店！店舖裝修簡潔，舒適；有別於高級法國菜，呢度感覺更casual。今日嗌咗5道菜，而且晚市house wine、啤酒、汽水做緊買一送一優惠⋯為配合法國菜，就嗌咗2杯白酒⋯焗法式地道古也芝士洋蔥湯味道濃郁，洋蔥蕉糖化使洋蔥原來嘅味道更濃郁，更香甜！配上古也芝士同芝士法包，軟腍、咸香加上拉絲嘅芝士，令整個口感、味道更有層次⋯焦糖鵝肝醬配法包本身我好鍾意鵝肝醬配法包，焦糖鵝肝醬真係第一次試！脆脆焦糖下嘅鵝肝醬口感細膩、醇厚，配上果jam，中和咗鵝肝醬油膩嘅感覺，食落更清新，推介！慢火煮紅酒和牛面肉配法包牛面肉煮到軟腍，牛味香濃，肉質嫩滑，骨膠原非常豐富！食落軟腍，而且有口感，唔錯！法包蘸上紅酒汁嚟食，味道亦唔錯。日本鮮帶子檸檬汁初榨橄欖油意粉呢道菜比較清新，帶子鮮甜，口感細嫩⋯意粉口感煙韌彈牙，配上香草汁，味道都已經好好⋯但由於係檸檬汁意粉嘅關係，就略嫌缺少檸檬清新舒爽嘅感覺，但整體都係好味的！朱古力心太軟雪糕朱古力味道濃郁，熱熱嘅朱古力漿再配上冰凍嘅雪糕，感覺一流！House Wine白酒味道較為fruity，果香濃郁，清新易入口。整體體驗唔錯，下次再過嚟試吓其他菜式先⋯最後，要讚一下餐廳嘅服務，侍應一切以客人為先，主動斟水、收碟，令整個用餐感覺非常滿意！…Read More

上星期同閏蜜食飯，佢哋極力推介位於美麗華廣場嘅一間泰國菜 – Mue Mue。話食物質素好之餘，環境又好，啱晒約會或同閏蜜聚會…講到咁，梗係叫埋老公一齊去探店啦…餐廳以清雅象牙白色為主調，結合柔和舒適嘅光線，仲擺放咗啲翠綠植物作點綴，呈現出摩登氣派！坐喺度，感覺真係好chill，好舒服！炭燒沙嗲雞串雞串除咗醃得入味之外，肉質鮮嫩，又多汁，再配上沙嗲醬，夠晒香口惹味，讚…摩登海鮮冬陰功作為泰國經典菜，用料點可以馬虎呢！除咗蝦之外，仲加入青口、蜆、魷魚等，湯頭鮮甜無比，十分清爽惹味。金沙麥皮蝦呢道菜簡直係必食之選！餐廳以去殼嘅巨型新鮮大蝦球，配上鹹蛋黃、麥皮快炒，鹹蛋黃包裹住每一嚿蝦球，鹹香惹味，令人無法抵抗！菠蘿炒飯味道遍甜，而且配料都幾特別；喺菠蘿炒飯嘅基礎上加入臘味、肉鬆、海鮮等，估唔到臘味同菠蘿炒飯都夾到，真係估佢唔到！Songkran飲品方面，我就揀咗呢杯“Songkran”，酸酸甜甜，清新之餘，仲帶有淡淡百香果同荔枝香氣…原來呢間餐廳仲設有戶外酒吧區，等天氣無咁熱，約埋班friend再嚟happy hour先！…Read More

同同事吹開水，知道牛摩而家做緊promo，A5和牛放題買一送一！咁筍，梗係立即通知老公，放工一齊去食啦！原來呢個A5和牛放題係會員優惠，入會費只需$100，仲會回贈返$100電子現金卷添！不過就未能同今次（$518）買一送一優惠一齊使用，可以留返下次⋯咁著數，我哋立即入會，揀埋個A5和牛放題，每人加$30包埋飲品同甜品⋯湯底係一人一鍋, 唔使打交, 各自揀自己鍾意嘅湯底；我哋揀咗人氣豬骨湯同養生蟲草花雞湯，2款湯底都相當夠味！基本上所有肉類、海鮮等都係手機落單，而飲品、前菜、蔬菜、丸類、甜品⋯都係喺出面自助區任君選擇，選擇非常豐富。我哋係為牛而嚟，當然習中火力喺「牛」度啦！今次主力食2款牛肉 – A5和牛同極尚牛小排，以任食嚟講2款都算高質，嗌多幾round都keep住個質素，抵讚！除咗牛肉之外，腐皮蝦寶真係有驚喜，估唔到咁好食⋯除此之外，響鈴都係誠意之作，用上自家炸響鈴，脆卜卜之餘仲特別好食！蝦、帆立貝、廣島蠔、墨魚圈⋯都唔錯⋯食到飽飽，出面仲有甜品可以繼續搏殺！甜品有雪糕、泡芙⋯最surprise係仲有大大部嘅爆谷機任你𢳂，而且焦糖勁多，十分滿足！呢個優惠做到月中，下星期有時間再嚟食多餐先⋯…Read More

每次經過又新街呢間「野川拉麵の深燒食堂」都好旺場，今日lunch決定過嚟試下！餐廳設有室內、外用餐區，寵物友善之餘，仲係大夥兒聚會嘅好地方⋯刺身（三文魚、油甘魚、甜蝦&帶子）一上枱，我哋都被2款厚切魚生吸引住！刺身質素不俗，非常新鮮！我哋仲忍唔住encore多round添！油甘魚肥嫩，肉質口感幼滑細膩，食落淡淡甘甜，每啖都充斥住魚油香氣，具獨特清爽口感。三文魚油脂豐富，味道濃郁甘香⋯甜蝦、帶子都好好食！味道鮮甜，入口質感嫩滑，正！炸魷魚鬚酥脆香口，十分惹味⋯粉漿唔會過厚，恰到好處。芝麻雞翼外皮金黃酥脆，咬落肉質嫩滑，juicy，非常香口！自家製豬軟骨拉麵自家製拉麵係餐廳嘅主打，湯底濃郁，拉麵彈牙有口感，豬軟骨軟腍入味⋯值得一試！綠茶雪糕配綠茶紅豆冰綠茶茶香濃郁，配上絲滑嘅紅豆，夏天必飲！加埋綿滑嘅綠茶雪糕，非常滿足！…Read More

同老公經過寶石餐廳，俾佢個新裝修所吸引咗⋯餐廳前身係寶石餐廳，係一間港式懷舊扒房，主打鐵板餐；而家餐廳改名為The Diamond，經過全面裝修，由懷舊脫變成時尚優雅嘅西餐廳⋯我哋今日揀咗個2人set dinner，包括:-餐包麵包質地既鬆軟又有彈性，食落有啲甘甜味同麥香，感覺唔錯。餐湯羅宋湯非常足料，酸甜濃郁，令人食慾大開！前菜胡麻核桃煙肉羅馬生菜沙律，沙律菜新鮮，爽脆清甜，配上沙律醬、核桃同煙肉，口感層次豐富。自家醃製刁草挪威三文魚，三文魚質感同煙三文魚類似，比煙三文魚少咗個煙熏味同埋冇咁鹹，但味道卻比煙三文魚更有層次⋯主菜炭燒西冷PS頂級牛肉眼扒肉眼扒烤至五成熟，油脂香氣四溢，仲有陣陣炭燒味添！牛肉肉質鮮嫩，咬落牛味香濃，非常juicy！牛肝菌松露醬芝士意大利飯其中一款招牌菜，牛肝菌同黑松露味道完全融入，非常濃郁！意大利飯粒粒分明，軟硬適中，連埋芝士碎一齊食，好食到不得了⋯甜品意大利奶凍，帶有濃郁雲呢拿奶香，絲滑嘅質感，配上酸味味嘅紅桑子醬，配搭得恰到好處，一啲都唔甜膩⋯令我哋嘅晚餐畫上一個完美嘅句號！總括而言，食物質素以呢個價錢嚟講都唔貴，性價比高，值得一試！…Read More

媽咪生日，梗係要同佢好好慶祝啦！之前經朋友介紹一間位於尖沙咀嘅高級私房菜，餐廳由廣州大同酒家創辦人後人經營，糅合傳統粵菜並加以改良，務求令新一代可以品嚐昔日嘅味道。順德撈魚生又名「撈起」，餐廳以深海𩶘魚代替傳統淡水魚生 ，魚生片新鮮清甜，配上紅椒、花生、蔥、薑絲等等，食嘅時候仲可以用生菜包住魚生、飯同辣椒醬，味道層次更加豐富。燕窩鷓鴣粥呢道懷舊菜需以粥為名，實際卻無米⋯配上金華火腿、鷓鴣同燕窩，鮮味十足，既滋潤又養顏⋯當紅炸子雞皮脆肉嫩⋯雞皮薄薄一層，一啲都唔油膩；雞醃得入味，而且肉汁豐富，口感一流！廣州荔灣豉椒炒蟹薑蔥炒蟹、避風塘炒蟹就食得多，豉椒炒蟹真係第一試，估唔到都咁好味！以豉椒大火炒蟹，味道鮮美，辣辣哋非常惹味！清炒涼瓜先將苦瓜啤水兩個鐘，沖走苦瓜本身嘅苦澀味，再以清炒方式烹調⋯口感清爽，味道帶有少少回甘，連平時唔好苦瓜嘅我都能夠接受。蜜汁火方其實呢度係浙江嘅傳統菜，餐廳以菠蘿代替傳統嘅蓮子，配以火腿，再夾喺方包裏面去食，鹹香嘅火腿同清甜嘅菠蘿帶嚟一種獨特嘅鹹甜口味。咖喱牛腩、大同荷葉飯濃郁嘅咖喱同牛腩嘅軟嫩完美結合，簡直係米飯嘅殺手！配合埋荷葉飯，風味獨特，更添特色！蟹油撈麵以剛才辣椒炒蟹嘅蟹油嚟撈麵，辛辣香口，極之惹味！二十年陳皮紅豆沙紅豆沙香甜可口，伴隨着陳皮嘅醇香，令人回味。總括而言，每道菜都非常出色，令大家都十分滿意！餐廳只有2間廂房，仲有1間K房；另外，餐廳只接受訂座，六位起訂。菜單方面可以搵老闆娘幫你寫，或者叫佢俾啲建議都得⋯…Read More

餐廳裝潢以韓式機舖為主題，地方寬敞⋯將霓虹燈、跳舞機、籃球機等等融入餐廳，營造出充滿遊戲風格嘅環境！餐廳主打新派韓式下酒菜，份量十足，好適合同朋友聚會飲酒。蕃茄韓式辣海鮮配中華麵蕃茄湯底濃郁、鮮甜，海鮮份量都好充足，有蜆、蝦、青口等⋯中華麵口感煙韌彈牙，索晒湯嘅精華，酸酸哋，一啲都唔膩，推薦大家試試！大發！芝士鐵板泡菜炒五花肉勁多芝士，非常邪惡，連埋五花肉一齊食，感覺唔錯。實現五花自由烤盤呢個簡直係必叫之選！將五花肉煎到香脆，配上韓式醬料，非常好食！加$30仲可以無限refill，真係不容錯過！RED無骨炸雞份量非常充足，酥脆嘅炸雞配上甜辣醬，十分滿足⋯呢度嘅氣氛相當唔錯，7點左右已經座無虛席，建議大家預先book枱⋯…Read More