長島鐵盒的個人專頁

今日朝早喺尖沙咀上堂，下晝half day off！落堂後約左朋友一齊食個lunch, 傾下計～～今次間餐廳係朋友揀嘅，係K11附近嘅棉登徑。呢度提供semi buffet lunch, 揀個main course, 就有齊餐湯，麵包，飲品， 仲可以去mini buffet bar攞嘢食...Buffet bar雖小，但都有cold cut, 各式沙律菜，鹹點同甜點！沙律菜好新鮮爽脆，個黃色沙律醬好好味迷你撻都唔錯，有3款餡料，撻底酥脆...餐湯係蕃茄忌廉湯，蕃茄味好濃，濃稠度適中！主菜揀咗呢個酥炸米蘭式西班牙黑毛豬，豬扒炸得好香脆，而且肉味濃又唔"鞋" ～同個三色椒醬汁好夾...呢度環境舒適，有情調，跟朋友慢慢歎個lunch, 吹下水， 好relax啊:)…查看更多

早排喺Facebook見到有人介紹老闆娘，當時齋睇相已經覺得好吸引，所以趁今日放假，專程入咗荃灣搵食，順便行街。去到街市差唔多12點，仲未開門，但係已經有人排緊隊。呢度係先點餐，後安排入座。由排隊等開門到米線上枱，都等咗半個鐘左右。我同朋友分別點咗炸雞球金錢肚酸辣湯同魚肉響鈴野菌腐皮卷麻酸湯。米線上枱時，真係嘩一聲好大碗囉！！！米線份量多到食唔晒！個酸辣湯好香濃，酸同辣嘅比例啱啱好，而且飲多兩啖都唔會覺得口渴！！！湯底整得出色，配料都唔輸泄喎！！！鍾意魚肉響鈴同金錢肚，響鈴好香脆，金錢肚又腍又入味老闆娘雖然係小店，但水準絕對比連鎖店優勝，值得再次支持…查看更多

goobne喺將軍澳開分店喇！！！因為工作關係，間唔中都要去將軍澳，以後食goobne就唔使一定要出尖沙咀，旺角喇…分店開喺天晉匯2期, 由地鐵站行過去，都係5-10分鐘。我喺商場入面行，有指示，所以唔算難搵。今次點咗蜜糖咖喱烤雞！！！外皮烤到好香，沾滿蜜糖，好好味點埋個咖喱醬，咖喱味更濃！！芝士炒年糕都係必點之一。好鍾意呢度嘅幼身年糕，雖然細細條，但好煙韌，而且食多兩條都唔怕滯。撈勻拉麵同芝士辣醬又係好味到不得了食烤雞，唔一定要飲啤酒嘅，其實配沙冰都唔錯㗎！！！呢款柚子沙冰夠冰凍又酸酸地，解辣一流！…查看更多

適逢好朋友生日，梗係要約佢出嚟食餐飯，慶祝一番喇!!!生日係壽星話晒事嘛，所佢話要試新餐廳，我當然話好喇~~呢間岩鹽新開無幾耐，主打日本料理。刺身，壽司，燒物，串燒，磯燒樣樣齊，最難得係連少見嘅釜飯都有得點。朋友係吞拿魚腩愛好者，見到menu有，二話不說點咗一客試試。吞拿魚腩超級厚切，而且非常肥美，咬落滿口甘香魚油一場嚟到，當然要點返個釜飯試試喇~~我地點左個北海道海鮮釜飯，一打開個蓋，已經聞到好香。釜飯表面怖滿唔同海鮮，仲有野菌栗子蛋絲，用料都幾足。啲飯索晒海鮮嘅鮮味，唔使加醬汁，已經好滋味食到最尾，仲可以加埋紫菜同茶，變成茶漬飯添宜家晚市有優惠，98蚊有半打海膽生蠔。雖然生蠔較細隻，但都幾鮮甜不可不提呢杯特飲---菠蘿青檸梳打!!好fresh好醒胃，仲好多菠蘿肉最後，店員提示我地只要同枱一人like and share facebook專頁，就送每人一杯haagen dazs。Yeah!!!有得食我最愛嘅抹茶雪糕做飯後甜品…查看更多

同班中同好耐無見，難得夾到時間，於是出嚟食餐飯聚聚舊~~今次揀咗呢間係諾士佛臺嘅泰燒遙開餐，估唔到呢度嘅泰菜都做得唔錯。先嚟個頭盤開開胃先~~呢度嘅泰式生蝦刺身擺盤都幾特別，一杯一隻生蝦，每隻生蝦都沾滿泰式甜酸汁，又夠凍夠爽口，食兩隻當堂胃口大開~~食泰菜少不免會點串燒，平時多數都喺點下豬牛雞，今次朋友就點埋燒火雞腎，估唔到有驚喜喎! 呢度嘅火雞腎燒得好爽脆，好入味，推介另外，點咗一份泰式蟹粉炒飯。個飯炒得幾乾身，食落一啲都唔覺油膩，而且真係食到粒粒蟹膏~臨尾梗喺要叫返個最愛嘅芒果椰汁糯米飯作結喇…查看更多

繼上星期食完台式涮涮鍋，今個星期再接再勵，搵埋好姊妹去食返個雞煲火鍋。吞POT喺彌敦道726 嘅23樓，景觀都唔錯，環境乾淨企理，枱與枱之間唔會好迫，坐得舒服。餐廳門口仲有個好大嘅觀賞魚缸。講返雞煲先，今次叫咗個重慶麻辣雞煲(小辣)。唔算食得辣，所以呢個辣度對我啱啱好。雞件煮得夠入味，而且肉質夠嫩。兩個人叫半隻雞食，份量夠晒，仲有quota加點啲配料打邊爐。推介爆芝響鈴新鮮即炸，沾上雞煲醬汁，香脆又惹味呢個響鈴仲有個特別之處喺食到半溶芝士，好香濃。打邊爐最鍾意食特色丸，所以點咗份十全大寶丸，一次試晒5款手工丸。個黑松露墨魚丸，好重黑松露香。除咗麻辣雞煲，呢度仲有藥膳雞煲同花膠雞煲，好似好滋補~得閒再嚟吞pot下先…查看更多

港式邊爐同日式shabu shabu就食得多，今日帶埋媽媽去試下台式手工涮涮鍋。101涮涮鍋有2間店，總店係尖沙咀厚德街，之前都聽聞過水準唔錯，但一直未有機會試。至於銅鑼灣分店就係最近新開，見出開銅鑼灣，一於同媽媽去試一試。銅鑼灣分店空間頗大，環境舒適，而且因為位處高層，所以景觀一流。呢度提供手工涮涮鍋套餐，每人388，包晒前菜，主菜，無限追加配料，飲品同甜品。主菜揀左冬瓜卜卜蜆海鮮鍋，湯底很鮮甜，卜卜蜆同配料非常多。套餐仲包埋精選肉類同特選手工火鍋拼盤。牛頸脊肥牛厚薄適中，油脂分布平均，簡單淥2下食，夠晒嫩滑。聽店員講呢個拼盤係每日新鮮人手製作，每款都幾有特色，最鍾意個墨魚丸好彈牙其實食到呢度，我同媽媽已經飽咗大半，所以最後只係追加少少菜同魚皮餃就收手。食台式涮涮鍋，當然要點返杯珍珠奶茶喇。呢度其中一樣吸引地方，就係可以任飲台式特飲，連紅白酒，啤酒同cocktails都可以任點㗎!呢度嘅夜景真係好靚。坐喺落地玻璃前，望住個靚景，品嘗美食，好幸福啊…查看更多

話說之前去開長沙灣食晚飯，諗起想試好耐嘅糖水舖就喺無幾遠嘅深水埗，於是飯後同朋友去咗食個飯後甜品。之前網上有好多人推介呢間嘅台式芋圓地瓜圓，話好多人排隊試食,好好彩當晚咁啱有人走，唔使等位即入。呢度主要喺中式糖水配芋圓地瓜圓，如果唔鍾意，可以改配湯圓都得。天氣咁熱，所以我點咗特式仙草百配，配料好豐富。芋圓，地瓜圓嘅份量好多，都幾煙韌，但芋頭或蕃薯味比較淡。仙草好滑溜，紅豆夠腍，唔會好甜。混合各種配料一齊食， 口感好豐富。難得大大碗足料糖水，都只係25蚊，抵食…查看更多

夏日炎炎，放假梗喺要揀啲消暑活動喇！有咩舒服得過喺商場嘆住冷氣shopping,再食返嗰靚靚甜品啊！同朋友喺朗豪坊行咗一圈，就鎖定咗呢間cafe，嘆返個下午茶。呢度啲甜品選擇好多，款款都好吸引最後，因為我同朋友都係抹茶忠實粉絲，所以二話不說就揀咗日本宇治抹茶輕食tea set。Tea set包抹茶芝士蛋糕，紅豆，蜜餞栗子，白玉丸子，配自選雪糕及飲品。雪糕揀咗抹茶mix牛奶，貪可以一次試晒兩種味。雪糕好幼滑，牛奶味夠濃郁，抹茶又夠甘香，正慢慢嘆完杯雪糕，輪到品嘗芝士蛋糕。件蛋糕細細件，芝士味唔算好濃，帶點甘香抹茶味，兩個人share食啱啱好，唔會覺得好溜最後飲埋杯冰凍抹茶拿鐵，成個人爽晒…查看更多

放假出油麻地搵個朋友拎野，順便食個午飯。因為落雨，唔想周圍行，所以去咗呢間係佢屋企附近嘅cafe食lunch。lunch set選擇幾多，飯粉沙律扒樣樣齊，有平有貴，仲可以加錢叫其他小食，甜品。因為起身後連早餐都未食，所以叫咗份重量級lunch set ---安格斯西冷牛扒配意粉。嘩塊西冷都幾大塊喎！我揀咗6成熟，雖然咁大塊，但煎到岩岩好，肉質夠嫩，夠juicy,配埋個酒香燒汁，正朋友叫嘅蟹肉露筍忌廉汁天使麵都唔錯，幾creamy,但味道唔太濃，所以食落一啲都唔覺膩~~另外仲叫咗份蒜蓉炒雜菌同英式炸魷魚圈，兩款都唔錯，尤其係魷魚圈，外層炸到脆卜卜，魷魚又夠彈牙套餐仲包餐湯同飲品兩個人兩個set,加2個小食，真係食到好飽，好滿足…查看更多

同事之前去過呢間餐廳，話幾有特色，所以今日約埋朋友去試一試。餐廳地點唔算難搵，從地鐵站行過去，大概10分鐘路程，同朋友傾住計行，好快就到。一行入去，就見到個好搶眼嘅燈牌，地方不大，但都幾舒適。餐廳以火車為主題，環境設計成火車車廂一樣，兩邊牆上有扮成車窗嘅螢幕，不斷播放風景畫面。一路欣賞風景，一路食飯，似足置身係火車上用膳。講返食物，餐牌選擇唔算好多，但款款都似幾吸引。最後朋友點咗泰式軟殼蟹羅勒葉墨魚麵，我就揀咗牛肩胛配露筍黑松露波特菇，再每人加一碗餐湯。餐湯係甘筍南瓜忌廉湯，香甜幼滑，份量很多，兩個人share飲一碗會好啲。軟殼蟹夠香脆，墨魚麵軟硬適中，唔會食到成口黑晒。而且墨魚麵蒜味濃郁，少少香辣，十分惹味。牛肩胛五成熟剛剛好，波特菇厚肉多汁，連埋蒜片、黑松露一齊食，味道一流我同朋友都幾滿意今餐飯，食物好味，氣氛唔錯，店員又夠細心…查看更多

身邊有班識飲識食嘅同事，成日都會跟住佢地四圍去搵食，而今次目標就係日式放題。同事話一係唔食，一係就食好啲，所以就book咗極尚大喜屋。未到6點，門外已經有人排緊隧等入座,好彩嚟得早，好快就安排好座位，準時6點入場。坐低即刻望一次啲點菜單，款式都幾多喎，足足有10頁紙。唔諗咁多，即刻order放題嘅重點之一刺身先。呢度有齊晒我鍾意食嘅刺身，帶子，北寄貝，甜蝦，赤貝，連松葉蟹腳都有得點。落單前後都係5~7分鐘，刺身已經到，估唔到快到咁，仲要點嘅刺身種類同數目都齊晒。刺身件件都好新鮮，仲要大大件。最鍾意係甜蝦，鮮甜肥美。前菜沙律點咗呢3樣，意式黑松露帶子沙律酸酸甜甜，開胃之選壽司都好多選擇，的的骰骰，試多兩，三件都唔怕晒quota炸物，天婦羅，串燒都整得幾好推介北海道脆皮奶同北海燒帆立貝去到尾聲，每人仲有一杯限量movenpick or haagen dazs雪糕，食得好滿足啊成晚上菜快，無漏單，店員都好主動幫忙收碟。唔錯…查看更多

是日返半晝，可以收1點，所以約咗朋友食下午茶。朋友住係觀塘，成日都係工廈捐窿捐罅搵食，今日佢就帶我嚟，話呢度啲麵包好好味。原來呢間小店主打係手工無添加bagel。之前未食過bagel, 唔知咩嚟，睇牆上黑板上介紹，先知bagel係經水煮完才烤焗，所以口感煙韌。睇完介紹同知道係每日新鮮製作，都想試下, 所以點咗煙三文魚忌廉芝士bagel配set B。Set B 係一份bagel跟低脂忌廉蔬菜湯同甜品。蔬菜湯好足料，每啖湯都食到唔同蔬菜同雞肉，味道唔太濃。呢件bagel賣相一流，而且用料足。啖啖都食到煙三文魚同忌廉芝士，連埋青瓜生菜蕃茄食，都幾fresh。而Bagel一如介紹，口感煙韌且紮實，完全唔似連鎖麵包店啲空氣感麵包。除咗Bagel出色，估唔到連甜品都有驚喜。呢件74% truffle chocolate cake, 朱古力味好濃，甜中帶微苦，食晒成件都唔覺溜。朋友今次介紹得幾好, 環境舒適，聽住音樂，品嘗手工bagel, 都幾寫意架! 另外，睇得出老闆好用心製作每一樣食物，單係堅持手工製作同無添加，已經值得再嚟支持。…查看更多

之前係facebook見過有人介紹呢間，今日路過廣華附近，見有少少餓，一於買返碗綜合芋圓加仙草底試一試。綜合芋圓可以揀仙草底或者剉冰底，一碗入面包含多款配料，有3色芋圓，紅豆蓉、芋泥同抹茶凍，仲加埋黑糖蜜。呢間嘅芋圓比平時見開嘅較為大粒。因為每粒都包住芋蓉或蕃薯蓉，所以相對芋頭味同蕃薯味會較突出，但係食落唔夠煙韌，少咗啲QQ嘅口感。仲有碗糖水只係比室溫凍少少，如果可以冰凍啲，會比較好食。其他方面，紅豆蓉同芋泥甜度還可以，抹茶凍茶味都夠。以廿幾蚊一碗嚟講，一試無妨嘅。…查看更多

之前聽過同事推介食呢間既和牛burger，今日終於搵到機會去大角咀試一試。呢度menu有勁多款漢堡，個個都好吸引，仲有小食同意粉可以揀。本來一心黎係試個和牛漢堡，最後畀牆上個poster吸引左，點左個飛驒牛漢堡set。呢度既漢堡係即叫即整，落單後十分鐘左右就送到。個漢堡份量十足，配埋咁大份即炸薯條，一個人食真係飽到上心口。講返個飛驒牛漢堡，簡單既調味，充分帶出佢濃郁既牛味，而且肉質夠細嫩juicy, 食落一啲都唔鞋。超正另外幾鍾意個塊夾起漢堡入面既流心煎蛋，食到中間既時候，飛驒牛沾上蛋汁，又係另一番滋味仲有厚身薯條即叫即炸，熱辣辣食，十分香脆可口。跟餐飲品揀左呢支綠茶，微甜，帶少少蜂蜜味，幾fresh, 配漢堡唔錯:)以小店黎講，呢度既burger水準幾好，店員都幾nice，幾好笑容。下次再有機會黎，要試埋個必食推介先…查看更多