vickyyiiii's Profile

工廠大廈嘅日式餐廳，聽到都覺得抵食。平日夜晚嘅8點幾，就上去試試佢。去到見到餐廳門口，發現入面就喺廚房，以為只得外賣嘅時候，原來座位喺對面，但對面又有另一間餐廳嘅餐牌，所以我同友人都猶豫左一陣。有個員工見我地咁迷惘，就出嚟同我地介紹一下，原來喺一間自助形式既餐廳，自己斟茶同拎餐具。睇睇個餐牌，非常簡單易明，我同友人不約而同揀左三文魚玉子蟹籽飯，店員幫我地落單、收埋錢，我地就坐定定等食。呢個時間唔喺好多人，可以慢慢坐下，再細心睇下放餐具嘅位置附近仲有Board Game同Card Game放咗喺到，唔知喺咪可以玩架呢。三文魚玉子蟹籽飯 ($60)排列得好整齊嘅三文魚同玉子，仲要好有日式風味嘅碗，襯埋簡單嘅木枱、木凳，打卡日式簡約風！三文魚切得好厚啖啖肉，玉子食落甜甜地、蟹籽嘅份量都好足。最緊要喺飯量超級多，果然喺工廈嘅食堂，岩哂需要飽肚嘅打工仔。不過，飯就冇好大嘅醋味，所以如果唔夠味可以自己落豉油。咁大碗，食哂真喺好滿足。…Read More

周未喺尖沙咀搵野食，記得 iSQUARE 入面都幾多餐廳，就行上去覓食。去到中層商場中央見到一間文青感覺嘅餐廳，又唔洗等位，就入左去食。餐廳入面空間感唔錯，感覺幾舒服。雖然喺周未，但餐廳入面都仲有位，所以叫完野食之後，等咗一陣就送到。香酥排骨湯麵 ($73)一碗熱辣辣嘅香酥排骨湯麵送到，香酥排骨同湯麵分開上，唔洗驚湯麵會浸淋左香酥排骨。香酥排骨炸得好鬆脆，睇見都流哂口水。咬落啖啖肉，少少脆口嘅外皮，加上嫩滑嘅肉感，就咁食都好惹味。雖然話喺排骨，但唔算好多骨，岩哂我啲懶人。湯麵嘅份量好足，麵質都少少彈牙，不過湯底就唔算特別。香蔥魯肉拌麵 ($68)去到台式餐廳，我最鐘意就喺食拌麵，因為貪佢有醬汁夠惹味，可以即上即食。有香蔥、魯肉同青瓜絲，聽落好似好簡單，但食一啖就會忍唔住想繼續食落去。撈埋左嘅青瓜絲非常清新，相反香蔥就冇太強烈嘅味道，同湯麵一樣咁有咬口嘅麵質，性價比之選。招牌忠考生果茶 ($38)最後仲叫左一杯招牌忠考生果茶，落單嘅時候我想叫走冰，但店員話都少冰同走冰唔得。店員冇同我講解點解唔得，正當我少少失望之制，杯野飲就送到。原來因為生果茶入面嘅冰粒都喺用生果茶雪成一粒粒，好驚喜！所以就算生果茶溶左冰郁唔會變淡味，非常貼心。生果茶入面有士多啤梨、藍莓、香橙等等，超級多水果，飲落好清新，果然喺台式小風味。…Read More

觀塘駱駝漆大廈3期呢到好多野食，平時好多人等𨋢上去。平日嘅夜晚我就同朋友去到，餐廳入面唔算好多人，但店員叫我地喺出面等一陣，之後就喺門口幫我地量體溫，再用消毒酒精幫我地噴全身消毒。當日落緊雨，上到去嗰陣個身本身有少少濕，再噴完都有啲凍，不過好彩餐廳入面冷氣都唔算好大。入到去見到餐牌都覺得好吸引，樣樣睇落都好想食。落單之後我地就傾住計先，話到明慢煮屋，咁當然要慢慢煮，不過當晚唔算好多人，所以都唔喺等左好耐。慢煮三文魚配牛油果丼 ($82)嚟到見到都好開心，好豐富嘅材料，有半熟三文魚、牛油果、溫泉蛋、青瓜絲、紫菜、蟹籽、火龍果、小蕃茄，另外仲有跟麵豉湯。三文魚煮到半熟所以咬落好嫩滑，啖啖肉。牛油果同火龍果份量都好足，食落好有滿足感，配埋落左橘子醬汁嘅飯有清新嘅感覺。一碗丼飯有咁多材料點綴簡喺視覺同味覺嘅享受。慢煮火炙牛腹扒烏冬 ($91)慢煮火炙牛腹扒，淨喺睇相都已經流哂口水，嚟到都好有日式風味。火炙牛腹扒配醬汁分開上，可以食到醬汁嘅香味。牛腹扒慢煮到半熟，肉質有咬感又鲜甜。加左$3轉烏冬，好煙韌彈牙。最驚喜喺烏冬上面嘅蘿蔔片，造型感滿分，咬落好爽口，加埋半隻半熟蛋，食完好滿足。…Read More

之前見到相已經心心念念想去食嘅一間cafe，一行多人，當日打電話去Book左位。去到門口已經少女心大爆發，好多花花草草嘅擺設，加上門口玻璃窗設計，望到其他食客枱面上嘅野食已經急不及待。但鋪頭入面座位唔多，所以都等左一陣。晚餐時間叫左幾個set，所以有餐湯跟－忌廉湯，味道不錯，個碗嘅外型好可愛。餐牌入面好多有玫瑰花嘅食品，當然要試下啦。玫瑰花梳打 ($38)見到好多人都有叫，一定要試下。玫瑰花、火烈鳥飲管，再配上圓碌碌嘅杯，淨喺外觀已經俘虜左我個心，飲落香香甜甜仲有梳打嘅清新，非常爽快。玫瑰花茶 ($48)繼續都喺玫瑰花系列，不過呢杯喺熱飲，岩哂養生人生。同樣配上玫瑰花裝飾，好養眼。一壺玫瑰花茶，蜜糖另上，甜度可以自己調節。草莓乳酪冰沙 ($56)粉粉嫩嫩嘅草莓乳酪冰沙，夏天飲好涼快，不過草莓味唔算好濃。玫瑰醬爆谷雞 ($52)見玫瑰醬咁有特色，就試下呢個小食。好香脆嘅炸雞粒，本身雞粒味道唔會好濃，所以配埋玫瑰醬岩岩好。玫瑰醬有啲似沙律醬，但有少少甜味，非常特別，果然喺少女嘅美食，連個醬汁都咁精美。脆薯餅配黑松露醬 ($38)早餐薯餅，我晚餐都要食！薯餅本身已經炸得金黃香脆，咬落軟綿綿，夾起嘅時候要小心會散開。配上黑松露醬，聽落平平無奇嘅薯餅引發出獨特嘅味道，好有驚喜。試完飲品同小食之後，就開始食主菜啦！黑松露香煎比目魚松子仁燉飯 ($148)香噴噴黑松露配上煎得非常香脆嘅比目魚，簡直喺食指大動。條比目魚切片橫跨成隻碟，好誇張，同中間嘅松子仁燉飯相映成趣，比目魚嘅份量睇落更似主食。聞落好香黑松露味，反而食落又唔算好濃味，岩岩好。比目魚咬落啖啖肉，唔會煎得好乾、肉質細膩。燉飯入面加左松子仁，除左聞落有果仁既香味之外，咬落仲有少少爽口，好特別。香蒜忌廉汁烤雞燴扁意粉 ($138)聞到香蒜汁嘅香味已經流哂口水，烤雞、雜菌同扁意粉都掛滿醬汁，每條意粉都食到香蒜同忌廉汁嘅味道，有香蒜嘅惹味，又有忌廉汁既滑膩，味道一百分。不過可能烤雞烤得太熟，咬落有少少硬。而份量方面，相比起烤雞同雜菌，意粉嘅份量就相對比較少，不過少女嘅胃口又點可以咁大呢？香草忌廉三文魚意粉 ($128)同樣精美嘅意粉，碟上仲用三文魚砌成玫瑰花形狀，真喺好唔捨得食。三文魚好濃味而且份量好足，忌廉味唔算好濃郁，不過食落都好香滑。BLT豚肉竹碳漢堡 ($118)黑色嘅漢堡代表住一種態度！雖然竹碳漢堡同平時嘅漢堡口感差唔多，不過食落就覺得自己特別型格。漢堡夾住超厚豚肉扒、煙肉、蕃茄、生菜，所有配料加埋超級厚，好難相信一啖可以咬到哂，更何況呢一刻嘅我咁型格，慢慢食再話你知。豚肉扒咬落好嫩滑，厚身嘅漢堡肉扒食落總有一種特別滿足嘅感覺，忍唔住內心吶喊「我要食十個！」然後默默偷食側邊嘅薯條，喺比較厚身嘅薯條，一定要襯熱食，因為薯條攤哂喺塊板到特別易凍，凍左就冇咬落熱辣辣、暖笠笠嘅薯仔口感。嚟到全晚最重要嘅環節，就喺食甜品啦！相信好多少女都喺因為呢到嘅甜品慕名而來，我都係！士多啤梨班戟 ($108)打卡必點士多啤梨班戟，見到士多啤梨同班戟玩層層疊都玩得咁精緻就唔捨得食，碟邊仲有士多啤梨醬點綴好有心思，一定要喺鋪入面嘅打卡位同佢地影番幾張靚相先得。班戟食落非常鬆軟，不過士多啤梨就唔喺好甜，適合夾埋中間嘅 cream 一齊食。梳乎厘班戟 ($98)近期大愛梳乎厘班戟，每次諗起都回想緊果份美味。三塊超級鬆軟嘅梳乎厘班戟，好似郁一郁隻碟佢地都會震一震咁，好想掂下佢地。食落超級軟滑，每塊都好圓好厚，真係唔簡單。我個人就鐘意食原汁原味，友人就鐘意加埋蜜糖一齊食，少女都是比較喜歡吃甜的。伴碟仲有幾粒杏仁，連甜品都食埋到尾聲，滿足到大家都忍唔住一路咬住杏仁一路 move 呀！…Read More

適逢節假日諗住去食大餐，朋友就推介觀塘呢間韓式咖啡餐廳。到達餐廳果然十分熱鬧，我哋六人同行，等左45分鐘先入座。餐廳屬於半開放式設計，一邊排隊一邊聞到韓式美食嘅味道，未入座已經流哂口水。入座分配到餐廳內嘅梳化枱，位置都幾寬敞。望到餐牌上嘅食物都已經心心眼，看得出嘅韓風味～板燒烤肉combo ($158) (特選美國牛板腱&牛小排)嚟到韓式餐廳，忍唔住就想食烤肉，加上人多就會想叫啲又食得又玩得嘅野。呢個combo有好精緻嘅爐板、三色醬汁同木盤上擺放得好整齊嘅特選美國牛板腱同牛小排。喺可愛嘅板燒放上烤肉，就好似細細個嘅時候玩煮飯仔咁，慢慢燒～好治癒。薄切嘅牛板腱同牛小排燒烤嘅時候香氣四溢，烤肉嘅質感好嫩滑，不過數量唔算多，一行六人一人一塊，只為過過手癮，仲可烤埋配菜。不過燒到一半，爐入面嘅藍色小火焰就熄左，比較突然，要由店員幫我哋重新放一個小火焰。估唔到配菜放落去烤嘅時候超級誘人，板上面留有肉香味嘅薄薄油層沾上配菜，再加上少少醬料，烤出嚟嘅配菜非常美味。拉絲芝士BB豬肋骨伴泡菜炒飯 ($88)芝士控聽到個名已經流緊口水，將泡菜炒飯同醬料拌勻，芝士好濃稠不過拉唔到長長嘅芝士絲。熱辣辣嘅泡菜炒飯好醒胃，香濃嘅芝士加上紫菜同粟米，口感細膩得嚟又清新，而豬肋骨嘅味道相對之下就被蓋過，唔算特別出色。泡菜肥牛炒粉絲 ($78) 非常韓式嘅泡菜肥牛炒粉絲，碗中鋪滿酸辣嘅泡菜，肥牛炒得好惹味，咬落肉感軟嫩。粉絲喺碗入面閃閃亮亮，引誘我一啖一啖咁送入口，粉絲吸收左醬汁嘅味道，入味又煙韌彈牙。石板韓風魷魚 ($88)色彩豐富嘅石板燒魷魚，魷魚佈滿濃郁嘅醬汁，睇落好鮮嫩好想咬一啖，食落都好爽口。而配菜沾有魷魚同醬汁嘅味道，非常入味。韓式甜辣年糕炸雞 (半份) ($88)又有年糕又有炸雞，簡直喺一次過滿足兩個願望，韓式嘅配搭﹐韓式嘅辣度，好過癮！年糕煙靱有咬口，味道方面就辣味比較重，甜味唔算好出。炸雞咬落好多肉汁，當下嘅感覺好似置身韓劇入面咁。蜂蜜提子脆米炸雞 (半份) ($88) 另外叫左蜂蜜提子脆米炸雞﹐岩哂唔食得辣嘅朋友，偏向甜味嘅炸雞，超鍾意！炸雞一樣喺咁鮮嫩多汁﹐加埋少少提子，配搭出意想不到嘅鮮甜度，值得一試。食完正餐點少得食甜品點綴，加上餐牌上嘅甜品咁韓式咁吸引。爐板燒布朗尼($68)呢個布朗尼見到已經好興奮，連埋爐一齊上已經滿足左相機嘅胃口，一邊食一邊有小火焰喺爐板加熱，保持到布朗尼嘅熱度同濕潤度，暖笠笠岩哂冬天食。布朗尼上面仲有一球蛋糕，蛋糕加布朗尼又凍又熱咁送入口，冰火交融，百般滋味。糯米糍3.6牛乳雪花冰 ($58)最後以一個牛乳雪花冰作結，份量滿碗好有冰天雪地嘅感覺。綿綿嘅雪花冰入口即融，配以糯米糍又軟又韌甜滋滋，好滿足。…Read More

聽聞呢間丼飯好足料好大碗，不過成日經過都好多人，難得今次經過唔係好多人排隊，等左一陣就有得入座。餐廳入面既空間唔算好大，枱同枱之間既距離有少少近。餐牌入面既款式唔算好多，不過款款都非常吸引好想食。點完餐之後就會送上味噌湯，睇落平平無奇既湯原來内有乾坤，湯入面好足料，有魚有肉非常鮮甜，令我更加期待黎緊既菜式。見店員送丼飯既時候都會配上兩包紫菜，都係獨立包裝，可以自由配搭食法。北海豐盛丼 ($198)鋪滿海膽、三文魚籽、帆立貝、赤蝦、火炙左口魚裙邊。見到兩隻好似碗咁長既赤蝦已經食指大動，非常綿滑既蝦身，充滿鮮味。一粒粒晶瑩剔透既三文魚籽咬落非常多汁，配搭白飯一同送入口腔產生非常奥妙既感覺。帆立貝同左口魚裙邊都好嫩滑。海膽既份量唔算好多，不過以種類黎講都好優勝。火焰盛丼 ($155)三文魚、帆立貝、左口魚裙邊同松葉蟹棒都火炙過，仲有一隻蛋點綴。睇落個碗唔算好大，但非常足料堆到好高，要小心將魚生搬開先見到飯。三文魚又厚身又大片，望住都好滿足，咬落啖啖肉。超大粒帆立貝輕輕炙過，又新鮮又爽身。一片片白色條紋既左口魚裙邊非常誘人，質感又嫩又滑。松葉蟹棒本身已經鮮甜至極，再配上醬料，帶出不一樣既濃厚味道。一啖飯一啖魚生，十分滿足，真係唔好睇少個碗好似好細咁，絕對令肚皮滿載而歸。…Read More

牛角係我幾鍾意既一間日式燒肉專門店，之前有係其他分店食過燒肉放題，難得旺角有一間專食放題既牛角，當然要試一試有咩分別。有經過幾次都知呢間放題店特別多​​人，特別係晚飯時間，所以一早打電話訂左位，去到即刻就入得。坐底揀好食邊個等級既放題之後，就可以開始揀食物。入面空間都幾大，有一邊係美食自助區，有前菜、沙律、飯、湯品、甜品同飲品自取，另外再可以任叫唔同既肉類同其他食品。前菜既選擇都好多，有前菜四味(芝麻八爪魚、中華沙律、帶子裙邊同味付海蜇)、日式凍豆腐、辛辣雞絲沙律、青木瓜絲沙律、紫洋蔥和風蕃茄。每樣都細細碟可以每樣都試下，日式凍豆腐就唔算好濃味，但豆腐質感嫩滑。紫洋蔥和風蕃茄就味道酸酸甜甜，好醒胃。蔬菜有鮮冬菇、洋蔥、粟米、生菜、泡菜、青椒及紅椒條。友人想食得清新拎左沙律，見到沙律櫃入面仲有可麗餅，再望一望牆上有教學自製牛角卷，非常有趣。自助區既空間都幾大，唯一有排過隊拎既野就係飲品。一部自助飲料機，一般既汽水都有，Coca cola、Coca cola zero、Fanta、Fuze tea、Sprite、橙汁、蘋果汁、芒果汁、梳打水等，不過就冇平時牛角有既特色飲料。食牛角最緊要就係要食牛角飯，呢間放題非常特別，可以自製牛角飯。裝適合自己份量既白飯，加入蔥花同紫菜，超鍾意食紫菜可以落紫菜山，再淋上塩醬或者燒肉汁，就完成一碗度身訂造既牛角飯。側邊仲有熱湯包括牛肉昆布湯同牛肝菌忌廉湯。拎完自助區就番埋位，當時店內唔算好多人，叫左既野好快就送到。美國見島特選和牛肩脊肉 ，有一絲絲既雪花紋理，口感油而不膩。美國見島特選和牛一口牛，切成三角形狀好精緻，肉身較厚，咬落好有嚼勁，一口一口回味無窮。海鮮類包括青口、石斑魚柳同多春魚。燒烤上比較需要多花心機既食物，魚柳食落好軟滑，燒既時候都要小心啲，好易整爛。青口好肥美大隻，乾淨冇咩海水味。係我最鍾意食既牛舌，薄切得黎又爽嫩，一如以往咁好食，簡直係舌尖上的味道。牛油金菇係懶人至愛，又方便又好食，燒起上黎牛油味香濃，仲可以再跟自己既口味加調味料。即食既味付魷魚、味付牛舌同炸薯角(4件)。薯角既外皮有少少厚，薯仔質感綿綿配以沙律醬香脆可口。日本熊本縣豚肉眼超級大塊，豐厚既肉感，咬落好滿足不過略嫌肥肉較多。丹麥雞胸肉就比較上清爽，透徹既雞胸肉烤出溫和既口味。仲有，燒牛肚真係好難我唔識。食到咁上下就開始食甜品，去左自助區拎甜品同雪糕。甜品有窩夫、迷你甜蕃薯、銅鑼燒、芒果慕斯餅、迷你宇治抹茶紅豆杯、泡芙、椰果、荔枝同菠蘿，全部都好迷你。一口泡芙好鬆​​軟，配以細膩既奶油，甜度岩岩好。迷你宇治抹茶紅豆杯既抹茶味道唔夠濃郁，不過勝在非常精緻。見到有兩部雪糕機，兩部都有唔同既口味，當日有雲呢拿雪糕、西瓜雪糕、扭紋雪糕，心大心細唔知揀咩味就試下扭紋雪糕，有齊兩種口味。不過雪糕食落冇咩奶味，比較上似雪糕冰。雪糕配料區亦有更多DIY既選擇，朱古力醬、士多啤梨醬、迷你朱古力豆、迷你心形棉花糖、七彩熊仔糖等，自製七彩繽紛既雪糕，食埋甜品真係好滿足。店員提醒差唔多100分鐘既用餐時間，我地就捧住個肚係個牛角尖鑽番出黎。…Read More

食串燒通常就係街邊食，一係就自助串燒。友人突然間想食串燒，就搵左旺角一間串燒店，預早一日訂左位。店鋪門面有各式各樣既酒瓶裝飾，店內座位不多，如果一行多人建議提早訂座。本身好擔心食完串燒會成身一陣味，不過行入店內雖然空間不大，但都冇好濃烈既油煙味。坐底之後就可以自行填寫串燒落單紙，即叫即燒，所以我地叫左少少串燒，再一邊等齊人一邊再加單。落單既時候心入面都有個疑問，有部分串燒冇標示份量，所以上菜既時候見到一個碟只有一串串燒，一行多人都虎視眈眈。炸雞軟骨 ($38)炸物既上菜速度比較快，一碟佈滿粒粒既炸雞軟骨送到面前，一口雞軟骨，香酥既外皮，咬開仲有少少肉汁，各人你一口我一口，唔洗幾分鐘，碟內就只剩炸物粒粒。松露薯條 ($36) 新鮮炸好熱辣辣既薯條，條條都金黃色，咬落好香脆，仲可以配搭香味濃郁既松露醬。牛六笠 ($40)一串有幾粒既牛肉，好方便食，咬落牛肉味香濃，非常惹味，好有係街邊食緊串燒既感覺。燒雞中翼 ($22)已經切開既雞中翼，燒得岩岩好，表面既顏色好均衡，不過雞肉咬落有少少硬。芝麻雞翼(2隻) ($28)香甜既芝麻雞翼，呢隻雞翼相對燒既比較有肉汁，好惹味。蒜蓉茄子 ($32)蒜蓉同茄子以燒烤方式呈現簡直係絕配，茄子柔軟又易入味，配以大量蒜蓉非常惹味。不過呢個烤茄子主要以咸味為主味，比較上單調既味道。燒帆立貝 ($25)幾串調好味又排列得好整齊既帆立貝，咬落啖啖肉，味道唔算好特別。四式燒蠔 ($65)蒜蓉燒蠔 ($18)四式顧名思義有四款口味，包括燒窰蠔、蒜蓉、芝士同松露燒蠔。蠔身好肥美，配上各種味道，岩哂唔同口味既朋友一齊分享。清酒煮蜆 ($40)一碗清酒煮蜆，全部蜆都已經打開哂，好誘惑呀~咬落蜆肉好彈牙，海鮮味道比較重，相反清酒味道就唔突出。原條鰻魚定食 ($112)超級巨型既鰻魚放係圓碌碌既白飯上面，真係好誇張，鰻魚既份量大概可以一啖鰻魚一啖飯咁送入口，份量超足。鰻魚既味道少少甜，睇落冇咩醬汁，但食落鰻魚都好入味。芝心玉子燒 ($38) 芝心明太子玉子燒 ($45)呢兩款芝心燒都好好食，外面烤完又好嫩滑既蛋，中間係超濃郁既芝士，配搭得非常恰當，一啖一口芝士，好滿足。蟹膏蟹肉煲 ($58)一舊飯 ($24)好精緻既熱辣辣蟹肉煲，有隻好迷你既蟹係面，蟹肉味相當不錯。特意叫左飯焦黎配搭，不過飯焦唔算好脆，等候既時間亦較長。茶碗蒸 ($22)非常熱辣辣新鮮蒸好既茶碗蒸，有好多材料，不過雞蛋唔算好嫩滑。秋葵 ($20)因為唔知一串秋葵既份量，所以叫左幾串秋葵，沾有甜甜地既醬汁，秋葵肥厚多肉，咬落好有質感。日本番薯仔 ($16)細細粒既番薯仔，十分可愛，但食落就唔算好多汁。bb露筍 ($18)非常清新既bb露筍，烤得岩岩好，咬落好爽脆。表面灑有調味粉，清爽得黎又香口。一口芝士 ($18)兩粒圓碌碌燒到金黃色既一口芝士，咬落非常煙韌，甜甜地芝士味不錯。蒜蓉焗野菌 ($48)超級多蒜蓉佈滿係野菌上面，食落非常可口，有多種野菌選擇。見到有幾粒辣椒仔，但辣椒仔味唔係好出。笑哈蝦(虎蝦2隻) ($58)兩隻燒得好金黃色既虎蝦，細細隻，望落好吸引，不過食落就唔係好多肉汁，有少少燒過左火。海鮮鍋定食 ($74)顏色非常豐富既海鮮鍋，有好多配料，蝦、蜆、青口、豆腐、蟹柳、菇、菜。新鮮熱辣辣，連配料食落都好重海鮮味。店內冇水提供，食完咁多串燒就叫左野飲解渴。玫瑰花茶 ($24)玫瑰花茶杯上浮住幾粒玫瑰花非常俘虜一眾少女心，飲落都好重玫瑰花味，岩哂食完串燒飲，好解渴。士多啤梨奶Shake ($26)士多啤梨味奶昔，有好綿密既泡泡，不過略嫌奶味不夠濃。Strawberry Mojito ($38)外觀非常吸引，有切粒士多啤梨加薄荷葉，士多啤梨味非常香濃，但甜味唔夠重。不過可能因為食串燒太濃味，就想飲濃味飲料中和一下。Kyoho Mojito ($40)巨峰葡萄味呢杯比較士多啤梨味嗰杯更重酒味，不過呢杯就冇切粒果肉。眼見店內有兩三個店員密密燒，上菜既速度唔算太快，但咁亦都係一個好時機同朋友傾計飲酒食串燒，聚餐本該如此悠然。…Read More

銅鑼灣呢座大廈經常都好多人排隊上去食野，今日突然想食泰國菜。入到去餐廳安排左一張二人枱，好闊落，同隔離枱亦有空間，可以兩個人傾下計。餐牌入面好多選擇，兩個人四個胃但樣樣都想食。生菜肉碎包 ($88)食泰國菜好多時都會食生菜包，方便又好食。一籃好翠綠既生菜葉，肉碎味道酸酸甜甜微辣，見到餡料仲好有肉汁，不過略嫌有少少肥肉。泰式蛋包炒金邊粉 ($108)好特別既蛋包炒金邊粉，金黃色既紗罩掩蓋住金邊粉，加上兩隻大蝦係菜式既中央，一齊黎揭開佢既神秘面紗。雞蛋整得好薄不過食落淡味，外面有炸過既大蝦，肉質不算爽身，而金邊粉堆入面都有一隻剝左殼既蝦，我就偏好呢隻蝦，食起黎比既有質感加上又有醬汁調味，不過金邊粉要襯熱食。柚子鮮蝦沙律 ($88)清新既柚子肉配上鮮蝦，鮮蝦入口爽滑，柚子肉咬落爽甜多汁，啖啖肉。沙律味道甜甜地配搭少少酸味既柚子，仲有口感爽脆既腰果，開胃之選。見到餐牌上既飲品款款都好吸引。青檸梳打 ($28)酸溜溜既青檸加上冰涼梳打，味道好清新。柚子梳打 (28)蜜甜柚子加上氣泡梳打，滋潤得黎又刺激，一個字「爽」。平日既夜晚去食，食完仲可以慢慢坐慢慢傾計。…Read More

中午時間鰂魚涌附近好多餐廳都要排隊，見到呢間日本餐廳次次都排左一條隊係門口，木門口趟上，神神秘秘，今日就排隊試下。都唔算等左好耐，不過要齊人先可以入座。入到去，燈光環境都好有氣氛，中間餐桌有個綠洲，天花有好多小燈泡仔，加上頭先係門口完全睇唔到入面既情況下，裝飾好有驚喜。食品既選擇唔算太多，但款款都好吸引。冇夾過既情況下，一行四人都揀左同一款菜式。海寶丼(上) ($115)紅肉、白肉、章魚、穴子、蛤蜊、小扇貝、真雪蟹、鮭魚子、青瓜。一整個木盤送上，有一碗昆布湯，一杯茶，一件茄子，一碗壽司醋果凍同芥末，好精緻。一碗滿滿既丼飯，採用日本米，佈滿各種魚生，種類多到數都數唔哂。呢間餐廳有個特色係壽司醋果凍，好可愛既亮晶晶果凍。小心翼翼撥開配料，加入壽司醋果凍，酸酸地好開胃。配料既份量絕對係夠一啖飯一啖魚生，每一口都是美味又新鮮既魚生。食完飯之後，服務員好快就收拾好餐桌，加上出面仲排緊隊，氣氛都比較緊張，我地快快手飲埋杯茶，等更多人入黎品嚐呢個美味啦！…Read More

一直都好想試既自動轉轉串燒，平日夜晚同朋友兩個人去食。去到都已經好多人，我地當日預訂左位，所以去到等一陣就可以入座。一入門口見到有自助飲料，有日本梅酒、日本清酒同檸檬水，岩哂貪新鮮既我可以每樣斟少少黎試。另外仲有枝裝飲品同罐裝飲品既雪櫃，非常多選擇，不過如果有埋唔凍揀就好啦。入座之後，串燒係雪櫃自取。主要有兩大個串燒櫃，一邊擺放蔬菜同丸類，另一邊擺放肉類同海鮮類。肉類同海鮮類：雞柳、牛柳粒、雞軟骨、豬頸肉、雞翼、魷魚翼、豬柳、雞腎、多春魚等。蔬菜、丸類：豆卜、秋葵、蜂巢豆腐、腸仔、仿平貝燒、菠蘿、栗米、車厘茄、翠玉瓜、芝士腸、龍蝦丸、茄子、黃金丸、台灣腸、黑椒牛丸、獅子狗等。另外再有一個雪櫃，放冷盤、沙律同烏冬，最開心係見到有棉花糖！我行開左去拎串燒時，店員放左一隻開左邊既龍蝦、蒜蓉醬同計時器比我地。好驚喜有海鮮送，後來見到原來四個人係會有海鮮拼盤送。隻龍蝦好厚肉，肉質彈牙，加少少蒜蓉醬點綴，美味至極。放串燒原來都好有學問，因為唔係每串都一樣大細，如果兩串都好大串放埋一齊就會卡住，轉唔到！ 所以最好拎大小適宜既串燒，因為太重都係會好難轉。於是執好串燒位打算坐享其成之制，大鍋了！幾時熟？燒幾耐熟？你估呢串熟未？我同友人腦海漂浮全都是問號。發現救星有枱角！原來枱角有貓紙，建議唔同食品既燒烤時間，非常貼心，拯救左唔識燒既我地。望住串燒轉下轉下真係好治癒。燒到差唔多熟，就可以加入醬汁，有蜜糖燒肉汁、地獄韓燒醬同秘制沙嗲醬，不過醬汁味道都唔係太強烈。所以重口味人士可以再添加其他調味粉，包括岩鹽、孜然粉、七味粉、味椒鹽、淮鹽同紅椒粉，簡直多選擇到以為自己係大廚。不過，其實有部分串燒本身已經調好味，燒完直接食都好原汁原味。燒到一半，見到人地張枱有個火鍋淥下淥下，即刻問下店員，原來除左燒烤之外，仲可以打邊爐，有清水同辣味既湯底選擇。正呀！即刻淥啲蔬菜黎食，自我感覺良好。如果讚好 Facebook Page 再五星評論，就有一杯 Häagen-Dazs 雪糕送，作為餐後甜品，好滿足。最後值得讚既係店員收盤既速度非常迅速，我地問佢地問題都好詳細解答。雖然燒烤限時120分鐘，不過夠鐘我地都冇再燒，但我地繼續坐係到都冇趕我地走，可以同朋友慢慢傾下計。…Read More

之前經過見到呢間餐廳好靚已經想入去食，望落有好多花花草草，小清新既感覺。餐廳主要既佈置以綠色植物為主，雖然唔知係咪真既植物，不過都多看有益。打開餐牌就會發現，花花會係多項食品入面呈現。愛吃花的女孩感到莫名興奮！首先登場既係五顏六色既飲品，外觀非常精美，影相打卡一流。蝶豆花青檸茶（$ 32）紫色紅色漸變層效果，加上一粒浮浮沉沉既小青檸，飲落酸酸甜甜有少少青檸味，展開我既尋花之旅。蝶豆花椰子奶蓋（$ 42）中間藍色白色相隔有少少似雲層既感覺，唔捨得攪拌，面層椰子奶蓋綿密，中間飲落似椰子奶既味道，不過味道偏淡。鮮熱情果梳打（$ 36）一個熱情果殼配上小綠葉浮面，望住熱情果皮飲熱情果汁，唔通我置身左係熱情果園。呢杯亦都係三杯之中最好飲，熱情果味道非常清新，好有熱帶森林既感覺。一邊飲一邊望住別致既裝潢護眼，其他菜式亦陸逐送上。炭燒豬頸肉‧椰糖芫茜辣汁（$ 118）炭燒豬頸肉堆配上小花生粒，豬頸肉肉質細嫩，配上椰糖芫茜辣汁，先一口甜味，後感辣味，食得好過癮。大蝦冬蔭公（小）（$ 92）叫左細碗既冬蔭公，湯面出現多隻長蝦腳同蝦鬚，想必一定是很大的蝦哈哈。果然不出我所料，很新鮮調皮既蝦肉質感。入面有酸酸甜甜既蕃茄同蘑菇，同平時飲冬蔭公有少少唔同，偏酸既一款冬蔭公。馬蘇里拉芝士條‧是拉差蛋黃醬（$ 92）強迫症看得很治癒既芝士條堆，一條條肥嘟嘟可以拉絲絲既芝士條，一定要趁熱食，再同友人黎個拉絲比賽。泰式肥豆兒醬炒芥蘭（$ 68）人黎，上菜！ 咦~真係菜喎，同其他菜式相比之下係有少少遜色。外觀似家常菜，醬汁味道不重，不過仍須綠葉扶持吧，芥蘭炒都得好青綠。香草牛油龍蝦‧冬蔭芝士耳型粉（$ 158）戰鬥格龍蝦鉗係上枱時已經非常突出，有成隻碟咁大。配埋好可愛既耳仔粉，多重口味既感覺，有少少冬蔭功既辣味，又有芝士既味道，不過有耳仔粉黎到已經有幾片疊埋。泰式大蝦炒金邊粉（$ 138）後來登場既主食，原隻大蝦配金邊粉。有一對蝦，哈哈，來吧，掀起一場大蝦爭奪戰！金邊粉炒得偏乾身，味道亦不突出。芒果糯米飯（$ 78）最後再叫左甜品，芒果糯米飯賣相非常吸引，特別系加入蝶豆花既藍紫色既糯米飯，加上椰子脆片一口脆一口香甜軟糯，雖然芒果少少酸，不過亦很滿足。總結呢餐飯，觀賞左90分鐘綠色植物 (用餐時間為90分鐘)，數數有6朵花與菜式相伴，仲好多融入左菜式既花花，食得心曠神怡。…Read More

平日既夜晚去食，餐廳有好多燈牌裝飾，氣氛幾好。見到餐牌上都有幾多既食品選擇，一行多人可以叫多款小食一齊分享。三文魚栗米pizza ($88)已經切好八份既pizza，方便分黎食，餅底唔算太厚，焗得都幾脆。黑松露蕃薯條 ($58)黑松露醬 ($5)蕃薯薯條，外表烤得熱辣辣好脆口，咬落香甜，好滋味，就咁食都好好味。本身黑松露蕃薯條配有黑松露醬，但友人尤其喜歡醬汁，另外加多黑松露醬，黑松露配搭酸甜醬汁。美式搖搖盤 ($168)服務員拎左個碟同一袋食物係我地面前搖搖然後倒入碟，青口、粟米、帶子、蝦、薯仔等等，都有幾多種類。醬汁濃度適中，不過唔係特別入味。龍蝦餐 ($198)聽落好吸引既龍蝦餐賣相都好吸引，好大隻龍蝦鉗配上頂級安格斯西冷牛扒同薯條。龍蝦面加芝士烤過，肉質口感不錯。西冷牛扒啖啖肉，不過脂肪較多。薯條好有質感，趁熱食好好味。脆豬手 ($198)脆皮豬手配上脆薯角，豬手表面烤得好脆，輕輕一咬有清脆聲音，而咬落有肉汁仲好入味。大大隻既豬手切開既時候要花點功夫。薯角更是出色，表面香脆，內裡質感豐富，好有薯仔香味。溫泉蛋卡邦尼意粉 ($78)濃郁既卡邦尼醬汁配上溫泉蛋，非常喜歡掛汁既意大利粉，味道岩岩好。溫泉蛋切開有流心，好誘人既質感呀！10支雞翼 ($68)雞翼炸得好脆身，不過脆皮有少少厚，雞翼有輕微辣味好過癮。雖然配有醬汁，但我個人覺得唔加醬是原汁原味，加醬是別有風味，因為本身雞翼食落都好入味。炸芝士條 ($38)熱辣辣既一杯芝士條送上，先發現餐廳既小心思，原來好多菜式都有一張毛筆字寫住慢煮工業既隔油紙，配以金屬既既杯呈配就特別有特色。芝士條肥嘟嘟，可以拉到好長既芝士絲。溫泉蛋大啡菇 ($38)一大粒菇披住溫泉蛋送上，好想就咁一啖放入口，不過太大粒，同友人切開大家品嘗。岩岩一切開溫泉蛋漿就傾出黎，視覺享受呀！大啡菇非常厚肉，不過就偏淡味。香蒜大蝦意粉 ($38)好大隻既蝦蝦，放係好多色彩既蔬菜上面。睇落非常多汁又好入味既意粉，醬汁好惹味，配上香草同雜菌，香氣四溢。飲品方面都有好多選擇荔枝接骨木梳打 ($38)荔枝味好清新，同梳打配搭得好夾。黑牛 ($38)一球雪糕配可樂，好耐冇飲過，唔知點解有懷舊既感覺。凍朱古力 ($35)呢杯係比較淡味，朱古力味不夠濃，但甜味又比朱古力味重。餐廳空間好大，我地食既時候亦冇限時，非常適合一大班朋友傾計聚餐。…Read More

陽光普照既中午，一行多人係37樓嘆semi-buffet。一行入餐廳已經見到好開揚既景觀，安排坐係自助沙拉吧附近。沙拉吧每邊都有唔同既選擇。壽司和冷麵壽司選擇都算多，熱門既款式都比較搶手。沙拉菜和配料有不同沙拉菜、烤雜菌、煙鴨胸、三色螺絲粉。冷盤和海鮮青口、熟蝦、有我最愛既煙三文魚。甜品各種類既水果、芝士蛋糕、鮮果撻、曲奇餅質感較硬、黑森林蛋糕柔軟而且味道豐富。沙拉吧每樣食少少其實已經有滿足既感覺，但加main course 價錢不是差太遠。所以加點了日式鰻魚飯，有溫泉蛋、青瓜、黃蘿蔔配料，非常精緻。鰻魚汁濃郁味美，魚肉亦好肥美，加上一口滑蛋，十分滿足！最後配上一杯茶或咖啡，實在是很豐富的午餐。…Read More

星期六係中環覓食，經過見到唔洗排隊就入去試下。安排左上二樓座位，樓梯有小盆栽牆裝飾，很有特色。安坐之後就給遞上了一杯水，飲落甜甜地甘甘味，大概是羅漢果水，好清新既感覺。每枱都擺放左辣椒醬、魚露同海鮮醬，方便食客隨個人口味添加。越南牛肉粉 ($68)叫左兩份越南牛肉粉, 可以揀各兩份配料，就揀左生牛肉、金錢腱、牛筋肉以及牛腩。芫茜、洋蔥和蔥花等配料亦可預先選擇要定唔要，好方便唔同口味既人士。見到越南粉免費續加，落單既時候直接加左一碗。三點幾時間，同行友人太肚餓，黎唔切影相，已經食緊碗粉。隔左一陣，一小碗既續加越南粉亦都黎到。呢段時間比較多人，我地其後添加羅漢果水和越南粉都要再次提醒才送上。香茅烤豬頸肉春捲撈檬 ($68)一黎到見到好多配料，顏色好繽紛，撈檬汁亦另上，可根據自己口味隨意添加。豬頸肉烤的好香，亦有蔥伴食，春捲岩岩整好熱辣辣，撈檬汁酸酸甜甜，甜得非常美味。下次黎會再叫呢個撈檬，好岩我口味。食完之後落一樓埋單，有小驚喜，服務員話店舖週年慶祝，食滿指定金額就有蔡瀾編寫既書籍贈送。《蔡瀾眼中好吃的女人》岩岩食完野就收到本書，不禁聯想起自己，哈哈！…Read More