周圍揾好嘢食's Profile

呢間喺荃灣起家，長期排隊的拉麵店，相信好多人慕名而來，亦有更多係忠實粉絲，一食再食。而且價錢同6-7年前第一次黎食都仲係一樣拉麵師傅係日本黎的師傅，所以啲職員溝通都會講幾句日文，拉面就得幾款，亦無太多變化，唔怕有選擇困難。長頭髮的客人，店員會細心送上頭髮橡筋，令你可以食得舒適。椅下面有放袋的籃子，所以整體黎講，店長都係一個暖男黎。咁講返食物質素，首先面條係粗面，麥味都幾香，而且要留意份量係平常店的1.5倍! 小妹唔小心點左個正常份量，唔浪費食到尾，最後係飽到想嘔。黎到食沾面，配料有紫菜，香蔥，肉碎，好大塊叉燒，調過味的筍，仲有檸檬。豬骨湯汁點左正常，加左少少鮮檸檬汁令整體味道好豐富，有唔同層次，不過食食下，湯汁變冷，亦沾上面條的水份，令湯汁的味變淡了。下次食會點濃味。調左味的筍好好味，但可以改善的係叉燒，雖然大大塊好抵，但係叉燒如果外表燒一下令油脂溶化，會更香更惹味。湯汁可以保持加熱住的話，亦可以令沾面的味道更能發揮得好。食完面條再加魚湯，飲哂個豬骨汁，十分滿足。…Read More

即叫即整手卷，元朗食開，黎到荃灣食街，性價比更高，價錢比元朗食仲平。咁食物質素有無因為咁將貨就價呢？試一試就知。喺元朗食開辣味三文魚，所以點一樣的嘢黎比較一下，另外就點左芥末魷魚。辣味三文魚，2間的味道差唔多，荃灣呢間的辣味再香少少，而荃灣師傅小勝一籌，因為值得一讚的係切碎的三文魚，放喺紫菜同飯一齊的比例較多，令食的時候，頭幾啖唔會淨係得肉，而下面無哂肉得飯。而芥末八爪魚都係大路嘢的味道的芥末味都算平衡，唔太攻鼻或者太辣。…Read More

朋友話去大快活找食咖哩，味道同質量都還可以，咁就試下啦～去到未到2點，基本上午餐好多嘢已經賣哂，好在淨係想試下咖哩，仲有咖哩腩可以點，五十幾蚊無嘢飲，加埋杯紅豆冰變左60幾蚊，都唔平。等緊拎嗰陣，紅豆冰已經放左上盤，但咖哩牛腩竟然仲要整，白飯同紅豆冰喺出菜位足足差唔多10分鐘，杯紅豆冰變成紅豆汁，咖哩都未出到，加上又不斷有人排隊拎嘢食，而家疫情，都幾擔心衛生問題。終於拎到咖哩牛腩，薯仔有2大舊，牛腩細細粒大約5元硬幣的大細5至6粒，仲有3至4件牛筋左右。咖哩味比較甜，餸飯都幾開胃，但咖哩的香料唔算好突出，整體只係ok, 薯仔太多相對牛腩太少。朋友點左個新出的脆爆厚切吉列雞飯，呢個有啲驚喜，個飯等左好耐，應該係新鮮炸塊雞扒，咬落好香脆，雞扒厚切，有肉汁，但肉味老實講就平淡啲，食耐凍左的時候，啲雪味出返黎，而且有骨。而飯係配左日本咖哩，味道無阿活黃咖哩嗰種咁香，如果個咖哩牛腩的咖哩配呢塊雞扒應該正少少。…Read More

藍籌屋苑第一城，衣食住行都好方便，餐廳都有好多唔同選擇。唔算好講究，但至少唔同類型的菜色都有。今日食左台灣麵的下午茶，坐窗邊位，下午茶選擇都唔少，今次點左雞翼米線，同酸辣湯面。因為同老人家食，佢的米線特登叫師傅煮腍啲易入口，米線上仲有肉燥，幾開胃，而香煎雞翼都好香口，不過不失。酸辣湯面就比較係香港化左嗰種，同喺香港的上海店食的酸辣湯都一樣，味道都好大眾化，酸辣度適中，惹味開胃。而珍珠奶茶係港式台灣店的傳統口味，珍珠煙韌。…Read More

尖沙咀落堂順便行過去尖東食拉面，點左濃豬骨湯沾面。第一個最欣賞的地方，係沾面汁會，店而家係用火爐上，呎個細心點真係好重要。食沾面要冷面熱湯，熱湯令面質嫌為變軟而變成最佳食用的口感，但食食下好快湯唔熱，冷的面即使沾湯汁都仲係偏硬，而且湯汁亦失去左香氣。呢度熱住的湯可以保持住温度，令食沾面一直都喺最理想的狀態。濃湯的豬骨湯好香濃，口味食重啲的我覺得配沾面岩岩好，但直接飲就太濃嘅，要之後加魚湯先飲到。有一段時間無食，今日個面係扁面條，之前食好似係粗面條? 至於叉燒方面，肉就薄左啲，上碗已經散開，不過有燒過外皮，風味會突出啲。而筍就比較簡單，無另外再處理過。糖心蛋味道較淡，而且熟左啲啲。當面條沾上熱湯汁再食，沾上豬骨湯汁，滿足感十足。食完後，記得請店員加鏗魚湯，記得只係加少少先，淡左無得濃返。倒埋魚湯黎飲的時候，更加品嚐到豬骨湯同魚湯的味道同層次。滿足哂。…Read More

喺元朗要搭西鐵，留喺商場間間餐廳都至少八九十蚊，咁去Food court 望望，睇落環境都唔錯，都有各類型的選擇。喺助點餐機，跟風跟前面學生妹買呢間，自己又跟風先。選左牛肝菌意粉，估唔到40蚊內有交易喎。見到店員不停手不斷炒意粉，意粉都係即炒的。上碟賣相就好踏實，裝飾嗰啲就無乜，都係炒完直接上碟咁。食落牛肝菌醬的味都幾濃，意粉比較粗，比預期中出色，軟硬度因為較粗，所以都相對硬少少，而份量都好大份，足夠飽肚。Food court 有靚紙杯提供飲用水供應，大家飲多啲水健康啲。…Read More

蕃茄湯喺香港愈來愈多，但每間都各有唔同主打的菜色。呢間正品蕃茄湯特別在蕃茄湯底膽會配上5個不同的演釋方法，令本身平凡的蕃茄湯更多變化。今日試左個隊長肉餅要麻辣蕃茄湯公仔面，同墨魚腐皮卷黑椒蕃茄湯通粉。首先喝一口湯，接著就會再喝另一口湯，停唔到😂 呢間店稱湯底用豬骨餚成再加新鮮蕃茄湯煲，唔錯係幾鮮味，麻辣醬呢款就重味啲，多啲乾葱，味道複雜而刺激。肉餅比想像中大塊，而且仲有2塊咁多，肉餅厚而食到一粒粒冬菇碎，但肉就明顯係機攪的，肉質實但無乜口感。另外黑椒蕃茄湯，蕃茄味突出好多，而且有洋蔥帶出了甜味，黑椒就惹味，只係飲湯的話，黑椒呢款相對會好飲啲。而墨魚腐皮卷有4條，外皮煎香脆，墨魚膠口感好煙韌，亦有一粒粒墨魚肉。唯一不足是店內服務員的培訓，點菜後不會覆單，而且自己玩手機的喇叭調到極大聲，全店都聽到。…Read More

呢間手喺一個唔係好起眼的手卷店，但係光顧的人數都唔少。呢度啲海膽都幾出名，而且仲有其他平常好少就咁喺手卷店點到的手卷，例如係鵝肝手卷咁。我地點左個喺餐牌上無寫到明的，就係鵝肝軟殼蟹手卷($83)，其實都好貴下架🙈 成碗拉麵的價錢，所以都係2個人食一個多滋味。呢個手卷勁喇，就勁在成件又厚又大件的香煎鵝肝，加岩岩炸起的軟殼蟹，加少少沙律醬，用紫菜包住。一咬落去鵝肝度，充滿油脂香，今日略嫌煎熟左少少，質感實左啲，而軟殼蟹就脆香，啲油脂流汁哂落飯，每一口都好邪惡😈 勁回味…Read More

下午茶時間在沙田市中心揾嘢食，商場大部份都連鎖餐廳，中西日乜都齊。隨心睇下想食乜就行入去啦～ 黎到餐廳門口，因為好想知喺份量上下午茶同午餐會唔會差好遠，職員都細心講解，所以就入左去食。下午茶份量的丼同午餐只係相差少許，所以未食lunch 的小妹希望夠飽。帶著長輩去食，所以有熟嘢揀好緊要，於是點左鰻魚玉子丼 同 我點左三文魚牛油果丼。丼的份量唔細，碗夠深，鰻魚玉子丼，飯質軟香、玉子正常而鰻魚亦有四五件，飯有少許鰻魚汁，芥末係高級少少，唔係平價自助壽司好似泥膠嗰種，唔太辣但香。而三文魚牛油果丼，牛油果有約四分一個，切成薄片，而三文魚火炙至半熟，帶有油香。撈埋醬油級芥末一齊食十分滋味。…Read More

屋企人生日，想特別啲買個榴槤蛋糕慶祝一下，諗起平是食開啫喱的沛公甜品。首先好好彩，打電話問仲有1個，8吋 賣298蚊。拎到個外賣盒未打開，已經有一陣榴槤的香氣，到食完飯切蛋糕，店員好細心咁跟埋生日牌仔同蠟燭。8吋原來都好大個，而千層蛋糕中間的蛋皮好香蛋味，軟身好口感唔錯。而中間的忌廉有啖啖的香甜榴槤味，唔會太甜，質地適中，唔會變哂水咁。雖然298價錢本身覺得有啲貴，但實際真係大件，而且仲食到有榴槤肉，都對得住呢個價，屋企多幾個人一齊分享好開心。…Read More

諗住買啲外賣去公園仔野餐，呼吸一下新鮮空氣，叫左幾個餐外賣，有啲有沙律，有啲有薯條。基本上薯條、沙律、同飲品都係用返飲品個膠杯。睇落係幾靚嘅，但對保存食物的質素係反效果。首先我都肯定薯條放入膠杯時係熱的，不過見店員喺其他食物都未做起嗰陣已經放左薯條入膠杯，所以一直焗住。食嗰陣薯條俾啲倒汗水浸焗住，有層水氣濕濕地咁。到燒芝牛肉漢堡，個漢煲用紙包再放喺個紙盒度，打開張紙溶溶地，唔肯定油浸到爛定係汁浸爛。不過味道黎講，芝士、蕃茄、酸瓜、生菜同包夾埋一齊都幾好食嘅，但淨食漢堡的牛肉係瘦同無乜味，要一齊食先好味，車打芝士的味加左好多分。而烤雞都唔錯，外皮好多香料，雞脾的肉位滑，軟，多汁，但除左個脾位之外，胸肉就鞋、無味、乾身啲。外賣做85折，希望餐廳喺外賣的包裝用心諗下點樣保存到食物的味道同口感。…Read More

喺荃灣的豆腐花戰裡面，公平啲間鋪頭一次，今次食阿玉。同樣係3蚊一碗豆腐花，今次點左熱的薏仁白果白果豆腐花，繼續係用3蚊食得下已經好開心的心態。店員熟手將筒的熱豆花潷入碗，再加一勺薏仁白果喺面。 好，唔另加糖先食一口。下!? 咁樣都只係3蚊?? 食落豆腐花的軟滑度，豆香度真係完勝隔離喎，而且薏仁同白果都好香軟，用薏仁白果的糊的甜味，令本身無糖的豆腐花已經夠甜。呢碗豆腐花十分有驚喜。下次都唔駛諗，兩間揀邊間喇。…Read More

朋友介紹天空之城呢個位仲有其他好嘢食過黎試下，佢地特別推介咖哩同焗豬扒飯。黎到係下午茶時間，叫左個咖哩牛腩撈一丁，同朋友散點左焗豬扒飯加雞蛋。飲品就凍檸樂(+$5)，朋友散點的焗豬原來飲品加多啲錢先有，凍朱加左$10。 咖哩牛腩撈丁，黃咖哩超香，汁多，可以令每條面都撈到咖哩汁，薯仔腍，但牛腩真係好唔掂，肉硬，唔腍，首先係部位唔係靚牛腩，第丁炆得唔耐，真係令成個撈丁大打折扣。牛腩真係好俾心機整先得，商業環境如果唔容許 不如整返咖哩牛肉、豬扒、雞扒，作為食客，我寧願食塊好食的牛肉，好過夾硬食舊起咋渣的牛腩。到左焗豬扒飯，呢個豬扒要一讚，厚切好有咬口，肉質腍，而且仲保留有肉汁。而焗飯汁則茄汁酸甜適中，飯粒分明，炒飯底可以再炒香少少。…Read More

外賣左蛋糕返屋企食，打正旗號係日本嘢，加上上次食左雪條，今次件蛋糕都好期待，仲要係千層cake, 來吧，用忌廉來征服我的味蕾啦！食落第一啖，抹茶味甘香，濃厚，甜中帶少許茶的苦澀味。而紅豆就得幾粒，有啲失色，亦唔突出，好似路人甲咁。重要的薄餅皮就一般般，嫌佢唔煙韌，同食落有少少散，唔同係因為係我返到屋企雪左陣🤔🤔 ～總括黎講，抱住要品嚐到日本單道的期望，呢件餅就落地返少少，無日本食的咁甜，但相對無咁滑。…Read More

食物好，可惜服務一般。作為街坊酒樓嘢食都唔錯，所以吸引左附近幾條村的街坊黎食飯同飲茶。好多時街坊酒樓都有呢啲問題，例如要人到左叫飛等位、枱同枱好迫、唔夠樓面、成日都漏單呢啲，由細食到大的褔滿庭，或多或少都有會…今日就好啲，下午1點左右黎到，咁岩拎到張細枱唔搭枱，等左一陣就有得入。叫左滑蛋蝦人炒河，賣相好靚，蛋金黃色，蝦仁大大隻，而份量都幾大碟。 炒河粉選揀厚薄適中，炒底再加上滑蛋蝦仁濕芡撈埋食，調味濃啖亦岩岩好。牛肉腸粉，皮薄又軟滑，但變左新式的做法，預先分開成6件，坐大家唔係咁熟的，就唔駛擔心夾開條腸粉後，一件大啲一件細啲。鮮蝦餃，呢度似乎蝦係出色嘢，蝦爽口彈牙，蝦餃唔似預先蒸定，皮薄好煙韌，蝦味鮮甜。雪山叉燒飽，一般般，外面只係灑左糖霜，但雪山叉燒包外面唔淨係糖霜黎。鮮竹卷，正路嘢，似工場拎返黎加熱的味道，似層相識嗰啲。藥材雞腳，夠哂腍，湯底濃，食到好多骨膠原咁，但唔夠熱，有隻雞腳無俾湯浸到的部份係凍的。最後揾左阿姐叫加乳鴿，呢樣無紙寫，就咁拎住餐牌同阿姐落，等左20分鐘都無上台，走到出收銀check 單係無落過。補返落後5分鐘就上台。成個場得3個姐姐樓面，食完成枱碟都無人收，又無人路過可以加到水。而家好多餐廳都用每枱自助點餐，遙距拎飛攞位，真係有好有唔好，人情味可能少左，但係少左呢啲漏單的情況，食個飯都輕鬆啲。…Read More