ccf's Profile

曾經在國內品嚐過正宗的老鴨湯，這幾年封關冇辦法再一嚐滋味，慶幸在香港也有一間專門製造老鴨湯的火鍋店，而且味道絕對拍得上國內知名食店。前菜先來一個椒鹽粟米，炸得乾身之餘可以配上一杯冰凍啤酒，又或者一面喝湯一面來一件也是絕配。如果係熟客仔又響OpenRice出過食評，記住問店員攞優惠，大大條活魚刺身立即奉上。火鍋料也絕不失禮，安格斯牛頸脊肉質亂畫有牛味，比得上有評級的牛肉，如果不怕肥的朋友，脆炸午餐肉是必點的項目，正式或是放湯同樣美味。唐生菜也絕不欺場，每一棵都有揀過，絕對無壞菜在其中。除此之外，雖然打邊爐很少會叫丸類，但鵝肝墨丸一定要必點，內裏包含着切粒的鵝肝，貨真價實。…Read More

若大家食開百零蚊位的自助餐韓燒,強烈建議可以三餐當一餐,試試名家的正宗韓燒水準一定要試的是五花腩肉,雖然看見那半塊肥肉已怕膽固醇過高,但煎好後的味道絕對不是一般肥肉可媲美除此,正宗韓式鍋亦是這裡的主打所在,海鮮鍋一般但牛肉鍋卻味美非常,大量的蔬菜令湯底愈煮愈甜(當然本身是泡菜湯底),牛肉份量不多,但吃配料亦十分足夠,記緊要白飯撈湯,兩三碗飯輕易完成也小食除了大家推薦的牛肋骨外,喜歡吃煎餅的朋友可試試泡菜煎餅,然而此菜的水準不甚穩定,要撞手神清淡一點可試試海帶年糕湯,味清而且絕無多餘調味,作為韓燒前的暖胃熱身菜十分恰當…Read More

一個人的午餐，決定一吃Triple O's的BC Burger combo,不知是否新人的關係，櫃面的兩位哥哥仔招呼熱情卻生硬，反而看似經理級的高大姐姐則有大將之風。個人不喜歡比較，所以不和另外幾間的當紅漢堡店相提並論了。BC Burger有牛肉一大塊、煙肉兩塊、芝士、生菜加蕃茄，還有一大片酸瓜放在包身之外(不明為何這樣放)，此外再加5大塊另加洋蔥(強烈建議要加，好好食)。牛肉有豐富肉汁，其餘配料亦十分搭配，尤其那兩片煙肉的香味及脆脆的口感更十分特別，吃時要千萬小心，因為那片牛肉的肉汁會順著流下，當吃完時可以發覺包裝紙裡會盛著一灘餘下的肉汁(本來想影一張札餘下肉汁的相，可是感到有點奇怪，還是丟掉了)。那兩片麵包有D失色，也許是因為我take away的關係，顯得濕濕的，留待下次eat in再評。最敗北的地方是那杯薯條，對粗身薯條一直有偏好，吃來卻立即肯定已炸起一段時間，不脆，而且不熱(我一買完立即試吃薯條，故無關take away的事)，可能是客人不多所以來不及有即炸的薯條吧，但這個價錢卻奉上這種貨色，確實大失所望。我會再試多一回,目標是Chicken supreme burger，因為要炸得好的雞胸不簡單，希望可以有所驚喜吧。值得一提，味道的四分是只給漢堡的，薯條....一分也嫌多了。…Read More

本身響cwb返工，所以三兩日就一定會食新記做午餐，如果食得辣既朋友，一定要加辣汁，不過都真傢伙的辣，要自量才好。麵就無咩特別，因為都係外來貨，不過料就真的出色非常，當中有幾款是必食無疑~~1.)辣豬紅---連豬紅入面都入味，試過未？2.)蘿蔔---唔好以為普通野，又係無筋之餘連入面都有味，唔講得笑。3.)雞翼---個樣鹵到變左黑色，不過佢濃烈既味道會令你一食再食。4.)鹵水蛋---雖未至於入面都入味，不過因為佢地既鹵水較濃，所以都好夠。5.)翼尖---唔好諗住食完雞翼算數，因為翼尖煮到透晒，係另一種更深既滋味。6.)魚蛋---魚蛋就算唔係最好既貨，不過個汁已經值80分，我平時起碼食兩份。一般我黎，六料兩麵走唔甩，不過真係好貴......飲埋野五條野無咩剩。…Read More

早兩日去榮華買老婆餅，要一打即係兩盒，姐姐特登摺盒然後響爐櫃夾出黎，即係唔係賣一早夾定落盒個D，臨走問起原來呢個係佢既習慣，而其他人就唔知，因為一早入盒個D雖然都熱，不過個櫃開開關關會有機會令D餅俾倒汗水整濕，所以佢寧願賣新鮮D既，大家都開心D喎~~一番對話果真令我感到溫暖，D餅都特別好食~~不過話又得說回頭,呢間分店好似無元朗咁多野賣。…Read More

提起南記，一定係春卷啦，其實入面係D咩黎我真係食左咁多次都唔知，應該係有魚有肉又有D粉咁啦，不過最重要係好食者。鍾意淡口味既可以叫招牌米/麵/米線，不過就唔多飽，俾多少少錢，整個春卷小鍋米線，好多豆芽、蔥之類既配菜，不過就因為係雲南風味，所以就又酸又辣，岩濃口味既朋友。如果想食大碗而又濃味D既，可以食雜錦大配米/麵/米線，叫D姐姐幫你加腩汁，然後自己加冬菜，夠晒味~~…Read More

即使好多人排隊，都一定要試一次，因為佢地既料同湯底都好正好正，好少食到車仔麵既料係咁入味，因為好多都係靠個沙嗲醬，而佢地則係煮到咁入味，真係唔講得笑。例牌跟油麵，要左好甜既蘿蔔，煮到變晒色既翼尖，仲有牛筋同魷魚，鍾意食濃味既我好岩胃口，因為唔係得個咸字，而係有好多層既香味、同埋甜味，好難形容0個種口感，最後連湯都飲左大半，埋單都係廿五蚊！當然要彈既係環境真係好迫，而且落單D姐姐愛理不理，不過一向係咁，都慣左了。…Read More

唔好期望係Delifrance般的熱狗，因為佢地幾十年黎都完全無改過個熱狗做法。將條腸放落油炸，人少就幫你煎一煎香個飽，人多就係咁意整一整熱佢，不過都ok既~~~唔好太睇少個熱狗份量，一個大男人食完就六至七成飽，以咁既價錢有咁既份量，仲可以要求咁多咩？千祈唔好放學時間黎，因為好多學生仔排隊。仲有~~~收錢個姐姐ok好禮貌~~…Read More

在銅鑼灣返工，故常常選擇金雀作為食飯地點，午餐收38蚊位，以銅鑼灣水準來說已很平，而水準就不能太有期望，相信大部份都已經整定再照單執藥，反而夜市除左個湯外就一定係即整，整體水準比日頭高，建議食常餐而唔好叫特餐，因為特餐除左多舊魚同雪糕多少少什果外，其餘都一樣。典型既舊式西餐廳，因為王家衛效應而多左好多人，食物其實有中級水準，但建議餐湯要加濃D，同埋鍾意飲奶茶的朋友一定要叫熱，因為佢地雖然都係用茶包沖，但就係用左兩款茶包溝出黎，D味寧捨唔同。仲有，一定想應受下花樣年華同2046feel的話，最好忍一忍煙癮，因為非吸煙區全部係卡位！…Read More

由出世開始已居住了在牛頭角廿多年，食日月星也已經食了十多年，日月星由十年前大家歡關門大吉後已成為此區的快餐龍頭大哥，出名料多味夠好，生炸雞髀聞名全港，值得一提的是連廚房野一樣有水準，乾炒牛河較味一流，雖然難以避免地有落鬆肉粉，但問題不大。值得推介的還有快餐，牛扖或豬扖+蛋+火腿+餐肉+腸仔+伕飯或意粉+飲品，勁大碟包飽肚，次次我亞爸都叫黎食！…Read More

介紹一位不大喜歡吃肉的朋友到九記，12:45去到仍未需要排隊，由於當日不大舒適所以叫了一碗清湯筋腩河，而友人則叫了一碗咖哩，湯底極正，完全飲得出牛肉的清甜，而且一定要叫伊底，因為其他麵會有鹼水味，河粉同米粉又會索走晒D湯，所以大家一定要叫伊底。友人之咖哩十分容易入口，但可能始終喜歡較清淡之口味，所以去到最後仍一人叫多一碗淨湯，極之滿足地離開。…Read More