happyduckling's Profile

見網上平台介紹這家位於中環半山的牛扒店”Picanhas” 好似幾吸引，bookmark 要試下。見星期二有半價T-bone, 星期四有半價斧頭扒….終於等到7月1日星期二公眾假期可以去試吓。早於兩周前在OpenRice 預約，沒有註明用餐時間，但是到店後告知用餐時間60分鐘！！ 話公司website 有溫書註明，但我經OpenRice book 都冇講。如果早知60分鐘一定唔會嚟，90分鐘我都可以接受，60分鐘實在難以接受！！難怪咁多人北上，不能怪香港人！！ 我order T-bone 男店員話要30分鐘，即是只有30分鐘食？！ 其實都唔Make sense! 這個T-bone 包了沙律及薯條，沙律菜幾新鮮上面灑上大量芝士特別美味，薯條幼身幾香脆。T-bone 幾大件夠3個人share. T-bone 將兩塊牛排合而為一：西冷牛排和牛柳。牛柳是是牛最柔軟的部分，肉味比較清淡。而西冷則口感有嚼勁，肉味濃郁。T bone 可以同時滿足2種口感。叫了Medium-rare，下次都係叫番Medium。Churros 傳統肉桂口味，幸好肉桂味不太濃伴上朱古力醬及Cream ，平時少吃因為怕甜，食一條ok 多一條就太甜。…Read More

睇完美食新聞報道就Bookmark 左呢間位於上環的雞蛋仔專門店「Chicken Egg Boy」從入門口一刻已經見到小店將香港本地文化結合街頭塗鴉作主題。店內主打香港地道小食雞蛋仔，款式特別，應該香港獨有味道。當中以Q版菠蘿包口味雞蛋仔最人氣。此款雞蛋仔定價$59不便宜，但係據報道cafe 為「許善慈善基金」最新慈善項目，所有盈餘將用作慈善用途，因此定價貴D就當做善事。雞蛋仔當然即場製作，非常open，可以看到店員即場製作。Q版菠蘿包雞蛋仔最人氣，包裝都好有誠意好有香港味道。店員先製好雞蛋仔，再逐粒鋪上菠蘿包皮之後再放入焗爐。每粒雞蛋仔都有迷你菠蘿包模樣，相當可愛創意滿分。Q版菠蘿包雞蛋仔口感酥脆，牛油味重，裏面都非常飽滿。…Read More

一年一度的聖誕節又來臨了，今年「萬麗海景酒店 Cafe Renaissance」的主題為《炫彩北歐佳節盛境》 — 更配合聖誕氣氛！原因？最具人氣、最多遊客朝聖的聖誕老人官方住址「聖誕老人村」正位於北歐芬蘭境內。酒店大堂佈置了不少充滿節日氣氛的聖誕裝飾，其中以這間北歐小木屋最吸睛⋯⋯ 壁爐及爐火雖然是假的，仍然洋溢絲絲暖意。自助餐美食區的佈局同往年差不多，最近門口是凍海鮮冷盤區。品種琳瑯滿目，有麵包蟹、凍龍蝦鉗、雪蟹腳、青口及海蝦，並且有多款 dressing sauce 添加味道。但點解缺少了開邊凍龍蝦？下文自有分曉。凍海鮮區旁邊是各式壽司及日式刺身，今年多了雜錦魚生丼。勝在細細杯、但又有齊刺身區的各款魚生，一次過滿足了胃納細，但又貪心的客人食慾！再往前走就係即煮即淥麵檔。每次來都有新花款，今年聖誕節就送上星馬風味喇沙。配料除了一般的豆芽、豆腐卜、炸魚片、溏心雞蛋之外，加入開邊龍蝦 ⋯⋯ 變成升級版喇沙！湯底微微香辣、但又滲出海蝦鮮甜，做到了喇沙湯底的特色風味。最愛中式原盅燉湯，今期係排骨圓肉燉螺頭，味道清甜唔肥膩；加上天氣已經轉涼，啖啖燉湯最滋補。餐廳的正中央自助區擺放了各款沙律、凍肉及芝士，同一個食物區的另一邊就是各款甜品。今年的凍肉款式較去年失色，缺少了巴馬火腿(parma ham) 及煙三文魚(smoked salmon)。以為節省成本？原來有驚喜！配合今年的北歐主題，特別炮製了醃三文魚配圓鰭魚子醬；厚切三文魚配鹹香味濃的魚子，味道超級濃郁。預制沙律同樣配合北歐主題，採用了多款北歐食材，其中以挪威龍蝦沙律最吸引。去年的聖誕自助晚餐，每位客人有一份主菜香烤和牛牛肩排、烤虎蝦及半隻蒸焗活龍蝦。今年落重本，共有三大重點項目，肯定係回本首選，不容錯過！第一款係任點任食蒸活龍蝦，每隻約350g，隻隻蝦膏滿瀉。新鮮龍蝦味道零舍不同，肉質鮮甜多汁、爽口彈牙；蝦鉗更加預先敲裂，唔需要用工具輔助，徒手已經很容易剝殼，廚師心思細密，抵讚！和牛腹橫肌牛扒（Roast Wagyu Flap Steak） 未必適合所有人的口味，不過，肉味的確香濃鬆軟，較一般自助餐的燒牛肉好吃很多；牛魔王一族一定要留肚一試。不能不提由開場到散場都有排隊人龍的越橘醬鴨肝配牛肝菌清湯。鴨肝即場炮製，表面煎得香脆，咬落內裏嫩滑；啖啖鴨油香味濃郁、又冇筋膜，接近入口即溶。鴨肝上面的一小撮越橘醬的微微酸甜固然中和了鴨肝的油膩，墊底的滑豆腐及清甜的牛肝菌清湯更加係畫龍點睛。實在太好味，最少食了四轉！其他西式燒烤美食有烤原條挪威三文魚及烤帶骨牛肋排。聖誕節自助晚餐當然不能缺少烤火雞及火雞餡餅。燒豬都有兩款口味：丹麥脆皮烤豬卷及原隻烤乳豬。前者有點似廣東烤燒腩仔；後者則有點似西班牙式烤乳豬，雖然沒有廣東沙皮燒乳豬的鬆化，但光皮燒乳豬的脆卜卜口感同樣好味。其他中西熱盤也不遑多讓，款式繁多：挪威羊肉燉椰菜、丹麥烤鴨、燴小椰菜；炒蟹、廣東燒味、小棠菜燴雙菇。除了必吃的「萬麗咖啡室」王牌蒜子豉汁蒸大鱔，今期多了荷葉奄仔蟹蒸飯。飯粒用雞蛋炒過，又有蟹汁滲入飯粒，好吃！有機會成為「萬麗咖啡室」的另一張王牌！最後輪到甜品及水果。雪糕選用本地知名品牌「xtc」，還有小朋友至愛的糖果及朱古力噴泉。完個切餅的造型及設計較去年更加吸引，全部顏色鮮艷兼且充滿聖誕特色！綠茶Tiramisu、蘋果焦糖脆面蛋糕、紅莓朱古力松露蛋糕、雜莓巴斯克芝士蛋糕 ⋯⋯ 全部不單賣相漂亮，味道也上佳。迷你甜品同樣賣相精緻，雖然細細件、細細杯，但同樣設計了吃得下肚的聖誕小裝飾。今年「萬麗海景酒店 Cafe Renaissance」的聖誕節慶自助晚餐質素更勝往年，但定價只同往年差不多一樣。聖誕前夕(11/25 - 12/30) 成人每位$910~954，小童每位$547~570（已含加一服務費）。至於聖誕節期間（12/24 - 25）及除夕夜就要成人每位$1100，小童每位$658，並分了兩個時段。提前訂位更有8折優惠，名額有限 ⋯⋯ 要搶位就快啲啦！…Read More

下午茶唔想食澱粉質，中式甜品就係我的comfort food. 在尖沙咀街上發現這間「甘の季節甜品」，估唔到這家甜品店是燒肉店「燒肉男」的副線。店內簡約的佈置，小清新風格，作為甜品店非常舒服的用餐環境。原本以為甜品店走新派創意路線，看看甜品餐牌不乏不少傳統中式糖水。炎炎夏日小編揀了清涼開胃的「椰汁芒果西米露 $42」 以前想食芒果甜品就會去「許留山」，自從結業後，要食芒果甜品就不太容易。這個椰汁芒果西米露 ，芒果肉粒多而且爽甜，加上椰汁及西米露越食越開胃，作為下午茶是個不錯的選擇。…Read More

調景嶺站的食店數目不多，味道也麻麻地⋯⋯今日試下間開業不久的【麵匠八】。【麵匠八】沒有什麼光環，加上兩間分店都位於將軍澳區，明顯是本土扮日式拉麵店，主攻街坊客人。【麵匠八】菜單簡單，只有小食丶6款丼飯及 8款拉麵。日本拉麵店一碗拉麵超過一百元非常普遍，但是【麵匠八】的食物價錢非常超值，一碗拉麵只不過五丶六十元！黑鬼叉燒拉麵($66)  手機下單，拉麵配料按個人口味加減。呈上的拉麵份量十足，不用加錢已經有紫菜及蛋。叉燒有三片，每片都有相當厚度，不過小編反而覺得太厚叉燒不夠軟淋影響口感。湯頭味道不太濃厚，入口竟然跟出前一丁的黑蒜味差不多，沒有期望下至少容易入口不伏。麵條不叫爽口彈牙，至少沒有鹼水味。咖喱吉列豬扒飯（$66） 一個字形容：「平」！尤其與日式吉列豬扒飯名店比較，動輒HK$200 以上一份、選用日本產名種黑豚炮製的吉列豬扒飯，一碟就已經等於3碟的價錢，味道當然不能苛求。麵粉 / 雞蛋 / 麵包糠脆皮同豬扒完全分離，麵包糠亦太零碎，完全沒有香脆口感。豬扒雖然腍身，但入口粗嚡、冇肉汁，太瘦、欠缺油脂及油香，更加沒有豚肉鮮味。咖喱汁味道亦很一般，顏色唔漂亮、太稀身；明顯沒有用上肉骨熬煮，欠缺肉味；至於日式咖喱汁特色的的蔬菜清甜味亦唔明顯。純粹計味道，只值1粒半星，論價錢就值五粒星。…Read More

講起香港街頭美食，車仔麵絕對係榜首。當然，有香港人會話係牛雜、碗仔翅或者其他，但絕大部份六七十年代非常普遍的推車美食已經絕跡街頭、未能成功入舖；惟獨車仔麵仍然屹立不倒兼入了舖頭，可說是奇葩。上個月，發現近兩三年的人氣車仔麵店【三不館車仔麵】原來在觀塘開了分店，今日就去試試。食過咁多間車仔麵，始終最鍾意都係灣仔【車仔麵之家】及元朗【永年士多】，也是不少香港人心目中的好味道車仔麵。【三不館車仔麵】作為後起之秀，大埔總店開業只有短短五年光景左右，如何突破重圍，吸引媒體及食客目光？首推其特色裝修。觀塘分店秉承其他分店的六七十年代裝修風格，甚至伸延到小店外牆 - 墨綠色門框配搭綠色主調紙皮石鋪切的外牆。這種今時今日被視為老土的顏色配搭及裝修物料，正正是六七十年代涼茶舖、冰室甚至唐樓家居的時尚裝修風格！室內裝潢充滿六七十年代風情。雖然並沒有一件真正屬於那些年的懷舊物件，但每一處地方的裝修用色、採用的字體、牆身的紙皮石及紅色燈罩加燈膽，成長於那些年的香港人一定會心微笑；80、90後一代就沒有那麼大的感覺了。全部都係那些年大排檔的摺檯摺凳，簡陋、地踎，但又有親切感。這兩塊招牌最抵死，用字生鬼又有趣。小店面積細小，但居然有四至五個伙記 ⋯⋯ 皆因枱凳擠迫、客人數量多、流量又快；其實，按照客人 / 夥計比例計算的話，並不算真的很多伙記。基本組合有兩餸麵（$37）及三餸麵（$46），如果每款車仔餸貴過 $10就要補差價。粗略計算一下，即係粉麵及湯底要收 $17 ?! 但如果只係揀凈餸(四款餸起)，湯底又唔需要另外計錢 ⋯⋯ 即係叫凈餸更抵食！有齊傳統推車檔的車仔麵餸款式，亦有近十幾20年才出現的雞翼、腸仔及各種急凍丸類 ⋯⋯ 很懷念那些年差不多全部用新鮮食材炮製的車仔麵餸，更懷念那些年只需要一個 $5大餅已經可以享用三餸車仔麵。車仔麵的清湯底少不了加入味精，但份量唔算多，飲多幾啖也沒有口渴舌頭嚡，甚至品嚐到少許豬骨雞殼的清甜鮮味。今次總共叫了 4款車仔餸，包括豬大腸、蘿蔔、豬紅及冬菇，揀最普通的清湯底（不用另外加錢），共計 $43。豬红（$10）首要條件就是不會一夾就散、變成碎濕濕，這一點做到了。咬落口煙煙韌韌兼且腍滑，又盡吸湯汁，非常入味。正！清甜蘿蔔（$10）上面的辣醬是「小小辣」份量。自家炮製的辣醬夠香夠濃，辣度唔算很高。蘿蔔雖然切得非常大塊，但炆得夠腍。味道清甜，蘿蔔皮又㓟得徹底，沒有渣滓及苦澀味。蠔油冬菇（$10） 夠厚身，炆得很腍，咬落亦爽口，但由於沒有剪走冬菇莖，硬身的冬菇莖影響了口感。味道方面，蠔油味唔夠香，冬菇本身又有一點點餲味（冬菇質素唔夠靚），影響了冬菇的味道。滷水新鮮豬大腸（$13）的內壁殘留了一點點脂肪，增加味道及口感。幼身大腸腸壁較薄，質感較軟腍、容易咀嚼；至於粗身大腸有標誌性的厚牆壁，質感腍滑中又帶點纖維性煙韌，需要較多的咀嚼。兩款大腸都係「有咬口」的質感，但又不是那種難以咀嚼的韌，口感很好。豬大腸的臊味漂得夠徹底，加上濃淡適中的滷水，味道很好。由踏入【三不館】一刻直至食完離開，整個過程大約只需 20分鐘，仍然維持傳統推車檔文化的速食特色。此店的最大特色係裝修風格，夥計服務態度搞笑是另一個優點。至於味道方面，屬於中上水平，勝過不少車仔麵店，但又未去到前列位置。總體而言，仍然值得一試。…Read More

今日午餐搵左間【T Club】，位於商業大廈內的西餐廳。唔係間普通餐廳，原來 T Club 即是 Teachers’ club，即是教聯會「教師俱樂部」。雖然餐廳屬於教聯會，但普通市民都可以入內用餐。【T Club】位於23/F ，可以望到維港景色，加上客人不多，只有兩、三枱客，因此用餐環境舒適。相比附近的工廠大廈內的餐廳，位置環境取勝。午餐有8款，價格$120～240，豐儉由人。午餐包括基本飲品、餐湯及沙律。雖然味道沒有大驚喜，只是普通午餐質素，但總算係有湯有沙律，都叫做OK啦！韓式柚子蜜糖燒春雞（半隻）($120) 這個蜜糖燒雞比另外兩個午餐味道好。雞皮香脆可口、又沒有太多肥脂。雞肉醃得入味，不嚡口、叫做嫩滑。飛魚籽蟹肉蟹糕炒扁意粉（$120）賣相麻麻地，好似普通港式茶餐廳的質素。介乎港式乾炒及西式醬汁意大利麵之間，炮製成半乾濕的意大利麵，有點奇怪。另外，將(日式)飛魚籽、(中式 / 日式)蟹膏及蟹肉混入醬汁之內，加上蟹膏 / 蟹肉份量唔多；這種勉強的中西日fusion 烹調手法並不協調，未能做到fusion菜式集合國家所長的優點，同樣係有點奇怪。大蝦忌簾汁意大利芝士菠菜雲吞（$120）刻意加入大蝦，似乎係想令到客人認為菜式更抵吃？醬汁味道普通，芝士及忌廉香氣唔明顯；菠菜雲吞的餡料同樣欠缺芝士味。午餐包括基本飲品，不過小編加 $17 轉了人氣飲品熊啤啤奶茶（原價$55）。雖然這類飲品不是什麼新產品，但是每次見到浮在杯上的熊啤啤就十分自癒。將預先沖泡好的奶茶倒入熊仔模具來凍結成為冰塊，保持奶茶原汁原味，又有賣相。不過，沖泡手法始終係西式奶茶，味道還是缺少了港式奶茶的那份特色。…Read More

【Thai Deer Factory】又係工廠大廈活化後的樓上餐廳，不過，《The Wave》的活化規模及樓面面積就沒有駱駝漆工廠大廈那麼大，餐廳數量也少很多。採用全開放式設計，一打開電梯門就差不多已經係餐廳範圍。不過，找了很久也找不到餐廳招牌。但是，也正因為這種全開放式設計，凸顯了餐廳的「露營風」裝修主題。一眼望過去，已經見到一個個營、及模仿野外露營專用可摺疊枱凳設計的餐枱及餐椅，已經相當吸引客人。至於天花，雖然只簡單用上布幕遮蓋，但配合昏黃暗淡的燈光；這種模仿室外宴會場地的簡單設計，既配合「露營」裝修主題，也充滿特色，香港其他餐廳罕見。午餐餐牌設計非常簡單：小食 + 主菜 + 飲品 或 主菜 + 飲品自由組合。主菜款式多元化、多選擇，以泰式風味為主，船麵、金邊粉、泰式咖喱都有得揀；唔鍾意泰國菜嘅話，亦有三款西餐風味，但價錢就比較貴。小食 + 主菜 + 飲品：紅咖喱蟹肉·軟殼蟹（$118）紅咖喱味道一般，唔夠香。雖然聲稱混合了蟹肉碎，但份量真的很少很少；用了咖喱汁掏著白飯一齊吃，吃不出任何蟹肉。軟殼蟹相對好吃，但表面就未能炸至香脆可口，影響了味道。小食香茅雞翼炸得夠乾身、夠香口，同時又保留了肉汁；不過，香茅味道未見得突出。主菜 + 飲品：牛丸·牛肉船麵（$86）賣相唔吸引。雖然食材加入了炸豬皮，湯底又已經加入香葉及芽菜，但顏色及清澈同正宗泰式船麵比較，有明顯分別。再試味道，帶甜，但欠缺泰式香料獨有香氣；似乎係經過調較後的港式口味，唔可以稱得上係正宗泰式船麵。追加薄餅（$20）及炭燒豬頸肉（$48）。薄餅並非最喜歡的印度式鬆軟煙韌油酥餅風味，而是偏乾身另一款口味，幸好不是最乾硬的那一款，仍算軟身有少許油潤。豬頸肉則太乾硬了，燒烤前的豬頸肉亦沒有塗上特別醃料，加上醬汁只是最普通的酸辣醬，並非自家調制、帶有泰式香料風味的醬汁 ⋯⋯ 唔係好食的燒豬頸肉。凍泰式香濃朱古力 味道其實同坊間其他普通餐廳的凍朱古力差不多，可可香氣未見濃郁，反而奶味有點偏重。用塑膠袋包裝係最大特點，有濃厚泰國夜市小吃風味。餐廳最吸引嘅地方一定係露營主題的室內裝修風格，食物味道就只是一般而已。…Read More

最近食左間質素唔錯的茶餐廳【四寶食堂】。今早去鰂魚涌搞文件後，搵間茶餐廳食份早餐。這𥚃的茶餐廳選擇多，最後揀左間門面有趣的【荷里活冰室】。跟剛剛經過的茶餐廳比較，這𥚃的室內環境寬敞而且佈置鮮明，小編覺得自己選擇正確👍早餐選擇豐富而且價錢合理。小編最近食左間質素唔錯的茶餐廳【四寶食堂】揀了沙嗲牛肉麵，今日同様要沙嗲牛肉麵比較一下！沙嗲湯底單看顏色就知道不太濃郁，而且沒有太多花生粒，口感打了折扣。麵條煮得未夠火喉有點硬爽。最大問題是牛肉，加入太多鬆肉粉，失去肉質彈性及纖維。不僅口感差，還打破了牛肉原來的酸鹼平衡，降低了牛肉的營養價值。非常失望的牛肉，小編食了一片牛肉就放棄。除了食物質素外。服務認真麻麻。這裡唯一好處地方大客少可以慢慢坐。…Read More

曾幾何時，其實也只是疫情前，每逢週六日的銅鑼灣時代廣場一定熙來攘往，商場內擠滿了香港人及國內自由行，餐廳食飯一定要排隊等位。估唔到疫情後的今天，風光不復再；不祗商場人流大為減少，甚至餐廳也少了很多客人。儘管今日接近兩點才來到，已經過了午飯黃金時間，但【上村牧場 】竟然只有一枱客人，實在難以置信！【上村牧場 】原來係「和民集團」旗下餐廳。講開「和民」，喺香港最出名當然首推旗下居酒屋連鎖店業務，分店曾經分佈香港各區大小商場，近年已經大為減少。至於【上村】這個品牌，則是「和民」海外業務的燒肉店分支。餐枱全部用半高屏風分隔以增加私隱度，模仿日式燒肉店的個室，但又可以節省真正個室的間隔空間，有效提升空間使用率；解決香港的昂貴商場租金之餘，客人又有私隱。餐牌內的牛肉選擇有兩款產地，如果標明日本產和牛，就會採用鹿兒島產薩摩牛，全部達到A4級以上！除了特價套餐（沒有額外折扣）之外，主餐牌單點全部有8折。簡單計算一下，其實價錢差不多；但套餐份量太豐富，又有自家製日式泡菜、沙律、牛肉丼，唔係太合適，最終揀了單點燒肉。自助飲品(任飲)($28 / 位) 有四款果汁及六款汽水，汽水採用 Pepsi 系列。豪華燒肉8種盛合（$598）有6款牛肉、1款雞肉及1款豬肉；六款牛肉之中有三款係薩摩牛（A4 級別以上的鹿兒島產和牛），雖然並非最靚部位牛肉，但始終係日本產名牌和牛，性價比高。食日式吉列豬炸豬扒要自己動手磨芝麻、再混入豬扒醬汁就試得多，第一次食日式燒肉要自己炮製專用「醃醬」。先磨芝麻碎，再磨蘋果蓉；之後按個人喜好混入芝麻碎、蘋果蓉、蔥花、蒜蓉，然後加入普通燒肉醬汁，即製成了「醃醬」。用新鮮水果醃肉其實有科學根據，果酸及果糖既可有效提升肉類鮮味，亦可使肉質變得更加鬆軟。薩摩牛里肌肉脂肪含量適中、又有肉味，味道平衡；如果不喜歡油分太高的和牛部位，此乃合適選擇。雞頸肉軟身、腍滑中帶綿韌質感，可以形容為雞脾肉及豬頸肉的混合口感。北海道豚里肌脂肪含量比較低，入口未至於粗嚡硬身，但始終油份唔高、肉質纖維又比較粗，味道一般。牛橫膈膜並非來自薩摩牛，因為橫膈膜屬於內臟部位，日本不能出口。肉質綿實、脂肪量較少；但有少少臊味，唔係好吃的牛橫膈膜。薩摩牛牛五花的脂肪 / 紅肉比例較薩摩牛里肌肉更高，入口滿腔油花、更加鬆軟；喜歡油分偏高的和牛部位，牛五花係合適選擇。厚切牛舌同樣並非來自薩摩牛。雖然油份低，肉汁唔算豐富；勝在爽口彈牙，都算好吃。最好吃的部位首推薩摩牛涮涮肉(yaki-Shabu)。雖然賣相未算最𧡘，油花分布未達到最頂級標準；但每邊只需要燒烤3至4秒，豐富的油份已足夠引起紅紅火舌，非常吸睛！可以媲美日本高級燒肉店吃過的yaki-Shabu；入口即溶，油花及牛肉香溢滿口腔。只嫌實在太過細片，有沒有雞蛋黃，吃得未夠暢快。套餐的6款牛肉部位中以鑽石紋牛小排的味道較差。有不少筋膜；幸好多肉汁，肉質亦未至於難以咀嚼，尚算鬆軟。結帳時問侍應有沒有燒肉午餐定食，才知道原來明天就是【上村牧場 】最後營業的一天！估唔到開業只有兩年多一點，又要面臨結業厄運 ⋯⋯ 香港餐飲業真的越來越難經營！…Read More

周末經過將軍澳中心的【四寶食堂】總是長長人龍，心想只是茶餐廳，唔知道有什麼吸引客人排隊等食。今日平日放假、仲要1 1點已經去到，依然有條人龍，真係要試下有什麼特別。茶餐廳室內設計，勝在清新。菜式選擇同一般茶餐廳分別不太，價錢也差不多，款式就少D。招牌早餐：沙嗲牛肉麵 、炒蛋、丹麥提士酥（$45）。以今時今日的香港標準，價錢算很合理，甚至可以形容為抵食。沙嗲湯底單看顏色就知道不太濃郁，而且沒有花生粒，口感打了折扣；不過勝在麵條煮得爽彈。牛肉份量多、醃得入味，而且嫩滑不嚡口。總括來說是一碗輕量健康版的沙嗲牛肉麵。沙嗲牛肉麵以套餐呈上，早餐包括滑嫩炒蛋及丹麥提子酥。滑蛋炒得夠金黃又夠滑；丹麥提子酥不夠鬆化，不過有甜甜的提子乾提升食欲。因為香港餐廳質素唔好又貴，令不少港人北上深圳搵食。難得【四寶食堂】質素佳、價錢合理，難怪吸引不少客人排隊。…Read More

銅鑼灣大部份都是連鎖食店，沒有什麼新鮮感。當遇見獨立經營的小店都要支持一下，今日就見到【潮仔館】。沒有堂皇的裝潢，卻有一份街坊味道。特別是中午時段，附近的工人坐滿小店，非常熱鬧。雖然食店不大，但食物選擇比預期多。以為只是潮州食店，但竟然有乾炒牛河、咕嚕肉飯這些港式茶餐廳菜式。叫得【潮仔館】，當然叫潮州特色： 潮州蠔仔泡飯 ($46)。潮州蠔仔粥是潮州食店中必有菜式。這款粥就像廣東泡飯一樣，於湯中加入了白米飯，配上了蠔仔、唐芹、芫茜、肉碎…等配料。這款粥的靈魂就是用了大地魚去煮出的湯底，不過味道不太突出。另外，蠔仔多但不夠鮮。整體味道不過不失。…Read More

上個星期來過一次，唔知什麼原因竟然冇開門營業，今個星期再來【新齋橋】，終於可以幫襯了！餐廳雖然位於一楝新建(或翻身改建)商業大廈一樓，偏偏升降機未能直達，要利用一條專用電動扶梯，實在浪費空間。上到一樓，暫時只有一間【新齋橋】。門面並不顯眼，沒有落地透明大玻璃，亦沒有大大個招牌。有見及此，餐廳老闆豎立了易拉架吸引客人。餐廳內刻意預留空間作為等候區，夠細心！唔似今時今日大部份香港餐廳，只會想盡辦法用盡空間佈置餐枱。座位區分成兩部份：一邊係拉麵區，另一邊係日式燒肉區。可能係新張優惠，全部燒肉午餐定食都有折扣。配合今時今日的大潮流，用QR code自助點餐兼即時結帳。餐飲並非一般的可口可樂，而係小編從來未見過的罐裝蘆薈果汁飲品。冇留意產地，但無論係菠蘿或士多啤梨味皆好「假」，總之係唔好味。極上牛小排燒肉午餐定食（$98） 牛肉真係切得好薄，加上賣相、肉色及脂肪分布，似非常普通水準的港式火鍋牛肉。牛舌芯燒肉午餐定食（$98）8片接近完美圓形的薄切牛舌，賣相有點奇怪，加上並未徹底解凍，視覺上打了折扣。牛舌軟身，有少少靱，只係最普通嘅牛舌，並非牛舌心；味道一般，當然更加談不上肉汁豐盛。極上牛小排有少許嚡口，牛味一般、肉汁少，亦沒有鮮甜的牛脂香氣。唯一賣點係夠平，味道好一般。…Read More

龍年大年初一同屋企人飲完茶之後，順道去 K11 MUSEA 逛逛。商場的室內設計秉承同系其他商場，風格獨特、帶有濃厚藝術氣息，有別於香港其他傳統大型商場。有些人好唔鍾意，又有些人非常欣賞，反應兩極。小編係後者。配合商場形象，管理公司銳意引入其他商場少見的店舖，包括食肆及餐飲店，【Gontran Cherrier】正是其中一間。麵包店來自法國，曾被華爾街日報評為巴黎最佳牛角包！糕餅廚師 Gontran Cherrier 自2010年於法國開創其首間分店後，於短短九年間已迅速擴展到世界各地，如日本、首爾、新加坡、澳洲等地；於 2019年9月落戶香港，選址尖沙咀K11 MUSEA插旗。直至今日，香港仍然只有尖沙咀一間分店。每次去K11 MUSEA 都想朝聖，但望見長長人龍，就會放棄。難得今日人龍稍短，戚起心肝排隊買牛角酥。香港分店佔地很大，承租商場內三個舖位：一個係開放式麵包工場、一個係糕點店兼餅房、最大的舖位就係麵包零售店兼餐廳。跟世界各地其他分店一樣，麵包店內供應不同種類麵包如法式麵包、鬆餅、蘋果批等；香港分店更自設麵包工場，每日新鮮製造，不停出爐，保證熱辣辣！多款麵包當中最主打的一定是牛角酥，口味多元化，一日銷售量可以超過1,000個，以其偏高定價，受歡迎程度可見一斑。每款牛角包都很吸引，本來想揀經典牛角包，但其他款式賣相更靚，揀了Strawberry Croissant ($42)。牛角包外型工整，清楚看見一層層的酥皮紋，表面又均勻地灑上了糖霜，加上外露的紅色士多啤梨，單單賣相已經引人垂涎三尺。牛角包出爐後，需要等待時間放涼，然後才能填入 custard。掰開牛角包，中心填滿了custard。一大啖咬下去，牛角包雖然已經放涼，但牛油皮仍然酥脆；中心的牛角包則非常軟綿、酥軟，牛油味超香濃。custard 甜度又剛剛好，口感綿滑，配搭香甜的士多啤梨，真係好美味！終於明白點解開業已經超過四年，仍然大排長龍。糕點店兼餅房人流相對減少。電子餐牌內有好多款飲品及法式甜點。飲品方面以咖啡為主，茶類款式較少，只有幾款。至於法式甜點，就要留意甜品櫃內的款式，餐牌內的款式未必每天供應。最愛吃朱古力甜點，揀了 Cocoa Nips & Chocolate Magnum ($66)。雖然沒有註明採用哪個產地或者哪個品牌的可可豆或可可粉，但定價如此高，應該都係名牌可可粉。賣相唔算特別吸引或者複雜，但整件都係用朱古力制作，朱古力控一定喜歡！甜點上面有朱古力cream、朱古力脆片及白朱古力製成的品牌「GC 小牌子」。甜點外層係極濃稠朱古力醬加朱古力脆粒，並非朱古力脆皮外殼；底層係朱古力味曲奇餅；中心就係濃稠黏口的朱古力 mousse 及軟滑的朱古力cream 造成的三文治。每啖皆是濃郁的、但不同質感的朱古力，加上非常香濃的可可味；很好吃的法式甜點！雖然今次沒有吃到最出名的基本款式經典牛角包 croissant ($27)，但即使已經放涼了的 Strawberry Croissant 也非常好吃，果然名不虛傳。法式糕點甜品同樣做得很好，賣相同味道兼備。唯一要投訴的地方就是價錢偏貴，但始終係名牌過江龍，價錢貴一點也沒有辦法。總結一句：雖然貴，但一定要試試！…Read More

隨着灣仔利東街項目幾年前重建完成，附近一帶舊樓也靜悄悄陸續拆卸重建或者翻新，轉型成為住宅樓宇或服務式住宅，直接帶旺了周邊的橫街，很多地舖也順勢轉手成為各式各樣的餐廳，其中的船街就是餐廳集中地之一。船街上，大部份都是西餐廳，【船記】應該是僅有的中菜館，而且是粵菜，網上評語亦普遍正面。2021年底開業，2023年版《香港·澳門米芝蓮》已授予「必比登推介」的新上榜餐廳之一；雖然根據過往經驗，《米芝蓮》對於中菜評價的可靠性未必高，但仍然有一定參考價值，今年的第二輪團年飯就選址【船記】。位於船街一楝舊式商住兩用大廈1樓，樓面面積本身已經唔大；當晚是年三十晚，靠近外牆玻璃位置用活動屏風間了幾個臨時包廂，餘下的大廳空間更顯得細小。由於是團年飯，大廳佈罝了六至八人枱為主，令原本已經侷促的空間變得更加擠迫，正中位置還有一條混凝土結構柱，視覺受阻，觀感更差。一如既往，香港的粵菜酒樓每逢過時過節的晚飯時段，通常會分兩個時段，又只做套餐或者減省了的散叫主餐牌，以求提升廚房效率，一晚做兩輪生意。【船記】也沒有例外，但仍然有部份精選預訂菜式，客人可以提前兩日落單。很多粵菜小館都有的餐前小食黃金豆腐粒（$68）做到了外皮金黃、咬落鬆脆、內裏滑溜的要求。蝦醬單骨雞翼（$88）的外層粉漿夠薄又鬆脆，而且混入蝦醬開脆漿，味道香濃。脆漿包裏的單骨雞翼同樣用了蝦醬醃制，濃郁惹味。稍嫌略為濕身，如果可以炸得乾身一點會更加好味。近年為數不少粵菜酒樓，不論高中低檔次，皆標榜自家出品金牌叉燒，【船記】也有和哥叉燒(6件)($110)。採用半肥瘦梅頭肉烤制，還做到了少許燶邊效果，吃下去多了一重香口。件件厚切，肉質鬆軟，又有恰到好處的脂肪油香，入口充滿滿足感；塗抹在叉燒表面的秘製醃料及蜜糖，調味絕佳。特色預訂菜式花膠爵士湯(6~8位)($788) 先奉上一大碟湯渣，以證明湯料十足：雞腳、排骨頭、乾瑤柱、響螺、沙參、玉竹，以及最重要的哈密瓜。喝一口，果然與普通螺頭老雞燉湯的味道不同；沒有火腿的鹹香，多了一份香甜清潤，亦有滋陰養顏功效。分了6碗湯，每碗都有一大塊花膠筒；厚薄度適合作為燉湯湯料，有口感、亦有骨膠原，男女老少都合適。不過，帶甜的中式燉湯未必人人啱口味。另一道特色預訂菜式鮮拆蟹肉釀蟹蓋（$198 / 個），可以揀三款炮製方法：葡汁 / 芝士焗 / 酥炸，揀了芝士焗。這道貴價中菜同美式煎蟹肉餅有異曲同工之妙，兩度菜式都是用鮮拆蟹肉作為主要材料。芝士焗鮮拆蟹肉釀蟹蓋表面呈均勻金黃色，兼鋪滿了麵包糠。用小叉輕輕敲破表面的芝士脆衣，內裏密密的填滿餡料：包括蟹肉、洋蔥粒及少許冬菇粒。洋蔥粒及冬菇粒切得非常幼細，主要為增強口感及香味。入口充滿蟹肉鮮甜，啖啖都係蟹肉，反而芝士香味並不濃烈，只是輕描淡寫；即使不太接受芝士味道也可以盡情享用。有幾道相當出名的雞菜式，點了紅蔥頭金柱走地雞(原隻)($698)。本來採用冰鮮雞，原價係 $388；但團年飯當晚，全店選用香港農場飼養的新鮮雞，所以價錢貴了一大截。這也難怪，有去街市買餸嘅話都清楚知道，今時今日買隻新鮮雞最少都要 $200～$300元。見到雞腎及雞肝，肯定係新鮮雞，冰鮮雞是不會有內臟的。表面鋪滿了炸香的瑤柱絲，雞皮又呈淡黃色，兩者在顏色及賣相方面很協調。雞隻經過精心挑選，雞皮下的脂肪很薄；入口雞皮爽滑，味道香濃，浸雞的上湯配方很出色。雞肉同樣入味，雞髀肉嫰滑有彈性，即使雞胸肉亦唔粗嚡。碟底鋪滿了紅蔥頭，雖然也見到很油膩，但吸收了雞汁之後實在很好味，忍不住口吃了幾顆 ⋯⋯ 真係很好吃！魚湯海味雜菜煲（$148）只係一個普通雜菜煲；所謂海味，只有冬菇絲、蝦乾及切幼條新鮮魷魚。整體沒有什麼特別，勝在湯底有魚味。籠仔三鮮蒸飯（$248）飯面鋪滿食材，有蝦乾、櫻花蝦、切絲土魷、小銀魚乾、乾瑤柱絲及少量蟹肉，用料好豐富！米飯粒粒分明，又用浸發海味乾貨的水去煲飯，海味的鹹鮮香滲入飯粒，飯粒也有鮮味。海味浸發時間稍嫌不足，尤其蝦乾及切絲土魷略為硬身；蟹肉份量亦少得可憐；有改進空間。位於舊樓樓上，樓底矮、沒有漂亮的假天花，亦沒有什麼精緻裝修。由於是年三十晚，大廳佈置了較多中大枱，令細小的室內空間更見侷促。服務水平方面，同一般粵菜小菜館差不多。至於味道，部份菜式中規中矩、部份算出色；整體水平中上。以這一個級數的室內環境及服務水平，定價略為偏貴。…Read More