黃泥頭貓貓's Profile

已經係第N次到訪嘅餐廳，一向都覺得佢係啟德區性價比之選。因為家人住得近，有時想食泰菜又唔想專登去九龍城，都會選擇呢度！坐得舒適之餘，品質穩定，價格仲好合理，所以點解成為我心中的飯堂之一！每次食完晚餐都會喺呢度食埋甜品，奈何今日實在食得太飽，唯有再留返下次啦～除左食物，餐廳裝修帶住東南亞較chill嘅氣氛，坐位與坐位之間有一定距離。秋冬時嘅筆者仲會專登要求坐露天位，可以一邊食飯，一邊欣賞啟德景色，冬天戶外會有暖燈供應，冬天拍拖去食飯，感覺應該幾浪漫…Read More

因為要去宜家就順便喺MegaBox食埋個late lunch. California Pizza一直喺我心目中都係性價比高嘅存在。平日3點到達當然可以直入，原來呢個時間仲可以叫lunch menu. 揀左肉醬溫泉蛋意粉同西西里薄餅兩個人share!先講意粉，一如印象中的好。肉醬醬汁混合住蛋香，意粉亦能做到al dente口感。呢個價錢包飲品，份量偏細亦係意料中事。女士一定夠飽，但如果男士作為午餐的話可能就要追加小食才能滿足。西西里薄餅-可能因為午餐關係無得揀薄底，但即使係傳統餅底其實都好好食。有餡料部份嘅餅底都好薄脆，唯一分別就係比薄底多左條厚邊。但唔知係咪新鮮出爐關係，平時唔食厚邊嘅我，居然將全條邊食晒！雖然係厚邊，但一咬落去就聞到濃濃嘅麵粉香，真係好好味喎！餡料亦非常豐富，醬汁微酸同帶微辣，以呢個價錢得來的食物質素，個人覺得係抵食嘅！…Read More

呢間係喺我個wish list好耐嘅一間餐廳！其實自己耐唔耐都因為個人需要會去跑馬地。今日終於可以慕名而至，估唔到最後會係一個咁差嘅結局🥲先說環境：目測只有10+個座位，喺平日2點非繁忙時間入座，店內得2位用緊餐顧客。上餐嘅時候，睇見所有食物都係由門口處送嚟。見有食評話估計食物係隔離fine dining 姊妹餐廳制作，但不知真假。食物質素：食評上嘅兩大名物都試叫左，因為想叫多一款pasta可以share, 所以就問左餐廳內唯一男店員有無咩推介。而因為我地準備叫嘅Bolognese已經係茄汁底，所以佢都合理地推介左Homemade Scialatielli(芝士汁底）比我地試埋白汁。1. Fresh Focaccia熱辣辣再加上表面微脆口感，小小一件無論作為餐前或送酒小食都係唔錯嘅選擇！2. Homemade Pappardelle Bolognese呢個真係非常推薦！寬闊而薄身嘅麵條，軟滑之餘，保持到少少咬口仲要掛汁效果亦非常好。肉醬採用豬牛肉混合，但仍保留到適合嘅牛肉香味。怪不得食評上能夠做到一面倒好評！3. Homemade Scialatielli 用上意大利腸而造成肉碎再加Pecorino Cheese作為醬汁。粗粗嘅麵條比一般的麵條更有咬口。而芝士醬汁帶住類似藍芝士嘅騷味。老實講，無論麵條同醬汁都唔係我杯茶。🥲如果係藍芝士控可能會比較合胃口價錢：坐落於跑馬地區仲要標磅手工意粉，其實本身餐飯價錢都尚算合理。坐低後其實店員有特別推介佢地有個$398嘅summer lunch bundle，可任點餐牌中嘅任何1款appetizer+2款pasta. 因當時我地仲研究緊個餐牌，只是念頭閃過唔想因為相差少少價錢而貪便宜令自己限制左食物嘅選擇，所以佢講完我都無放喺心。到結帳時看到價格同預算差不多亦不以為意。結果離開後因為想提交食評，始發現店員收左$398嘅套餐價錢。而我一計之下先發現，套餐其實比A La Carte嘅價錢仲貴左幾十蚊😱其實如果顧客無特別意願要求點套餐，店員係咪唔應該用個比散叫更貴嘅套餐價錢去收錢呢？老實講，慕名去食嘅亦唔會志在一百幾十蚊，但因為自己對餐廳嘅信任而自覺被當傻仔，心裡面少不免對餐廳印象大打折扣❌❌…Read More

第一次去啟德體育館，原來除左concert同球賽，入面仲有大型shopping mall又有餐廳，商場環境闊落舒適，旁邊仲有海濱長廊。唯一唔好就係餐廳普遍較早關門（當天9天last order)，所以食晚餐就唔可以太晏。第一次到訪去左朋友推介Go Nuts, 原來係Hey So Nuts同Once You Go Craft嘅聯乘店。食物水準中上，已經無睇價錢想食咩就叫咩，估唔到賣單人均只係$200！絕對有下次！！…Read More

住喺土瓜灣咁耐, 居然今日先第一次試呢個土瓜灣名物！一次過試左韮菜餅、芫荽餅同芫荽燒賣，即叫即煎，全部都好好味，真正皮薄餡靚，有返咁上下厚度所以好有口感，個人最鍾意芫荽燒賣有返啲咬口，但其實係3樣都好味。無論韮菜定芫荽，一咬落去啲獨有菜味即刻湧出嚟。韮菜餅-$20/3隻芫荽餅-$18/2隻芫荽燒賣-$18/4隻作為一個韮菜同芫荽迷，一個人居然可以清晒9隻，真正高性價比之選！以後又多個食下午茶的理由了…Read More

幾年前喺胡志明食過阿根廷菜，印象深刻，牛扒又香又juicy, 而家先知原來香港都有阿根廷餐廳，6:00入座仲有6折，抵成咁當然要即刻試下。斧頭扒原價$888，既然有6折就諗都唔洗諗揀呢個（加左炸蘑菇嘅sides)原本想叫medium rare, 但老闆話最好食係medium，我地當然聽從意見死跟。牛扒上檯已經好吸引，有肉香之餘內裡保持到juicy, 有少少口感完全係我杯茶，唯一美中不足係塊扒中間有條筋，唯有進食時自行切走。斧頭扒之外仲叫左老闆推薦嘅血腸拼豬肉腸，3個人有2個鍾意血腸多啲，另一個就鍾意豬肉腸，各有各喜好，下次再嚟都會encore呢個。留意6折不包括wine, 叫左枝中價嘅阿根廷紅酒，好飲噃！3個人埋單每人$500，以食物質素再加埋開酒，仍然覺得value for money, 會再回頭…Read More

土瓜灣區好飲嘅咖啡店真係唔多，難得屋企附近有間所以都幫襯過幾次飲啡。今次第一次試佢地嘅午餐，以咖啡店嚟講食物水準中上，咖啡好飲，環境舒適，會繼續捧場！如果佢地可以考慮做埋手沖就更perfect! …Read More

最近沉迷於自己手作酸種包，都想買啲其他品牌嘅包返屋企試食比較一下，從而可以改善下自己啲手勢。原本首選係去附近嘅Bakehouse買包，原來灣仔店重新裝修，8/15-31關門，咁就唯有移師去另一酸種包名店Sour Dough。既然招牌都講明自己嘅signature，仲要用上30年老酸種，就分別買左半個White 同半個Basil口味嘅sourdough試下。好欣賞佢有半個嘅選擇，咁我就可以食多款口味。White Sourdough Bread酸種白麵包Basil Sourdough Bread羅勒酸種包$20/半個 $36/個每款外賣帶回家後，先試一片凍食，之後再用airfryer輕焗2分鐘做toast，再點olive oil+vinegar當下午茶。白麵包酸味較重，而羅勒包除左加入羅勒香草外，仲食到淡淡嘅olive oil味道，估計羅勒酸種包麵團有加入olive oil，每咬一口都帶住香草同olive oil嘅香味！兩款包烘前口感煙韌，包肉鬆軟。而輕烘後都做到外脆內軟，包皮薄薄一層不會過厚做成硬皮，裡面口感保係鬆軟，而以外觀看，羅勒包嘅open crunch更大更靚。總括而言，兩款包都值得推薦!…Read More

因為有事要過中環，相約朋友1:00在中環午飯。呢個時間係中環區最繁忙時間，都頭痛邊度比較容易搵食。OpenRice見度呢間好多好評，啲點心又好趣緻，最難得係中午飲茶都接受訂檯!  雖然寫住有限時75分鐘，平時嚟講得75分鐘嘅酒樓我就未必會揀，不過反正我本身都有事唔可以坐得耐，真係一拍即合!  訂左1點檯去到都要等一陣，大約等10分鐘左右就有檯，可以接受。攤開點心紙，見大部份造型點心都係包點，已經警剔自己要克制啲唔好叫太多，點知最後都係失手，3個人叫左12個點心，飽到一個點！1. 一籠八戒（=叉燒包）$49🌟🌟🌟🌟2. 鴿吞鳳梨 （=鳳梨酥）$49🌟🌟🌟略嫌偏甜3. 初嚐禁果 （=蘋果批）$59🌟🌟🌟🌟🌟驚喜4. 粉紅蝦餃 $59🌟🌟🌟🌟5. 透明波波 $49🌟🌟🌟🌟6. 香茅牛肉球 $49🌟🌟🌟無咩香茅味不過本身個牛肉球都唔錯嘅7. 羅宋湯鮮竹卷 $59🌟🌟個羅宋湯好稀好淡8. 糖不甩丸(6件） $45🌟千祈唔好叫，勁甜，漏到食完一件所有人都唔想再食9. 沙薑豬腳 $69🌟🌟🌟10. 紅油抄手（5件）$59🌟🌟🌟11. 五柳炸鮮蝦雲吞 $59🌟🌟🌟比個名誤導左，完全無料嘅五柳汁，中間得一粒喬頭12. 炒蝦腸粉 $69🌟🌟🌟🌟黑醬油好夠味，腸粉炒得好香口整體其實啲點心都唔錯嘅，食得出全部用靚料，用心之作，又多打卡點心，環境亦坐得舒服。但可能我對某啲點心期望過高，所以有啲失望。有人話呢間嘅點心賣相比味道好，我都認同。而且正常情況下，如果飲茶只限時75分鐘就好似短左啲囉～…Read More

一行4人，星期六晚尖沙咀區臨時搵地方食晚飯真係唔容易，優質少少嘅餐廳門口都企滿人。突然諗起都一段時間無去妹記，非常好彩上到去剩返最後一張4人檯，真係一拍即合。好奇怪店家每檯係提供一壺熱水，大排檔食物提供熱水比客人飲用，唔知點解即刻令我諗起食神其中一段戲言歸正傳，食大排檔就梗係要配大啤。啤酒係用雪過嘅碗serve，夠傳統大排檔feel，讚！另外叫左杯特飲-百香果檸檬烏龍茶，酸酸甜甜有茶香夠清新，配炸物飲都唔錯，感覺上好似比飲汽水健康啲-椒鹽八爪魚咀：🌟🌟🌟🌟椒鹽味同炸粉適中，墨魚咀爽口，讚👍🏻-椒鹽雞翼：🌟🌟🌟比墨魚咀再香辣啲同粉厚啲，個人會鍾意墨魚咀多啲-蠔餅：🌟🌟🌟🌟傳統廣東炸蠔餅做法，雖然粉漿偏厚，不過蠔仔算多，同埋我鍾意佢個餡加埋芫荽。因為自己係芫荽怪，因為呢點所以呢個菜式係私心推介😂 -西蘭花帶子：🌟🌟🌟普普通通，急凍帶子加西蘭花，預計中嘅味道。-銅煲雞：🌟見menu有段報章介紹寫用泰國香料煮（香茅、南薑、檸檬葉），好似幾特別就叫嚟試下。結果係全晚唯一食剩嘅小菜。雞件過熟嚡口，味淡，完全食唔到任何香料嘅味道，失望！-肉絲粉麵：🌟🌟🌟麵底都炸得脆卜卜，味道不過不失不過妹記搬左嚟呢個新地址，咁大間食店女廁得一隔，飲多兩杯成日要去洗手間的話，女士會幾唔方便囉。…Read More

原本想搵間coffee shop輕食下午茶，見有評語話呢間係pasta世一咁誇張，好奇下就叫左個pasta red + long black試試。先講long black: 選左Fruity口味，入口濃滑有choco味之餘又帶果香，繼續保持一貫優質水準。輪到個pasta: 用Impossible植物肉做嘅肉醬螺絲粉，上檯賣相唔錯。pasta茄汁香濃夠杰身，蕃茄酸度適中，加上螺絲粉嘅獨特結構，啲汁完全掛到上pasta，第一啖入口酸微微嘅感覺令我食慾大增！而且煮螺絲粉時間掌握得恰到好處，保持Al Dente口感，咬落有嚼勁，值得一讚。講返植物牛肉，質感同香氣同真牛肉可以幾可亂真。本身係食肉獸一名，一向對植物肉、新豬肉都有啲抗拒。但食完呢碗pasta，我甚至懷疑自己係咪睇錯menu，再攞個餐牌確認一次先相信佢係beyond beef。加埋festa cheese食，呢碟pasta居然可以令我對植物肉有少少改觀，可算係意外收穫！星期日下午茶時間人流唔多，唔洗擔心驚阻住人做生意，慢慢享受一個寧靜嘅下午同美食，大滿足！…Read More

土瓜灣新樓盤啟岸1號開多左好多日本餐廳，有日式咖啡店、串燒、鐵板燒、居酒屋等等，呢區又多個新蒲點，對住土瓜灣嘅人嚟講真係好消息！之前試過串燒店質素都好好，今次相約友人去Kaku happy hour. 記得上次嚟時kaku都仲未開業呢～下午3點鐘午餐已過，呢個時段係happy hour 時間所以主力係小食同飲品。小食選擇唔多，我點左薯條配蛋黃醬同埋炸池魚bb送酒。炸薯條同池魚嘅火候控制得恰到好處，兩樣都做到面少少脆口而入面保持淋身，送酒一流。飲品方面我就叫左杯Prosecco而朋友就叫左黑啤。平日下午茶時間環境清靜、人流稀少，同朋友靜靜傾下偈就過左一個寧靜嘅下午。…Read More

星期日滑完水, 鬼咁肚餓但又怕食太多影響晚餐, 最好就係去食西貢名物-菠羅包啦!  4點落船未係西貢繁忙時間, 條隊唔係太長, 大約等左10分鐘左右就買到.  到排到隊時都係受唔住內心魔鬼嘅誘惑, 買左菠蘿油!  正如好多人所講, 店家真係長期好生意, 所以佢啲包真係買親都係新鮮出爐熱辣辣.  菠蘿包都係一貫咁好味, 麵包鬆軟, 菠蘿皮厚身夠脆口, 仲鋪滿晒成個包面.  但有得就有失, 因為個包真係好熱辣辣嘅關係, 所以夾喺中間嘅牛油已經係咁溶, 所以我影完相之後(其實張相都見牛油已經溶緊) 就快吞轟咁食晒成個包.  雖然我仲比朋友笑問我係咪好肚餓, 但食完都係滴左好多牛油喺膠袋底, 變相個包嘅牛油香味會淡左.  所以下次我諗我都係會食返菠蘿包就好了.…Read More

已經好耐無嚟過漢發，今日去合舍睇完展覽就順便過隔離食個late lunch.  估唔到平日下午2:30嘅時間都要排隊，不過好彩只係等8張檯，大約10分鐘左右已經可以入座。嚟到漢發，一定係叫我至愛嘅豬潤丁。因為始終內臟高膽固醇，年紀有返咁上下都好少食呢樣野。當個麵送上檯，嘩！咁多豬潤嘅？！仲要件件都大大塊又厚切。可能因為對上一次食漢發可能已經有好幾年，只剩下些微印象漢發嘅豬潤麵係比維X好食, 所以見到呢碗麵即刻喺心裡面對漢發再暗暗加分！先試湯底，鮮甜得嚟帶上濃郁嘅薑味，完全係我杯茶，食到底時基本上我係連埋湯一切清晒。帶砂豬潤果然不負所望，有返咁上下厚度而帶來爽脆質感之餘，入面又juicy又滑，而且丁麵底淥到剛剛好唔會過淋，老實講再訪漢發, 就更加唔會再去維X！除左豬潤麵，第一次試飲紅豆咖啡。因為本身飲開齋啡走甜關係，所以特意要求少甜少奶。紅豆起沙又夠淋，咖啡夠濃又唔酸，估計佢只係靠煮紅豆嘅甜而無再額下加上糖水，居然比我想像嘅更少甜，好飲，值得推薦。如果真係要彈，唯一係如果紅豆可以再加多啲最更正喇！😜…Read More