pscon's Profile

中秋節正日無時間煮飯，就同屋企人嚟呢度食串燒飲酒做節，順便支持一下小店。舖頭裝修好有特色，老闆同員工都好nice. 再加上唔限時，可以邊食邊飲酒邊傾計👍🏻6個人叫左唔少嘢食，大部分都好食特別係椒鹽墨魚咀，雞皮蝦超好食荔枝煙肉卷，燒雞皮，牛舌，雞肉，豚肉蘆筍卷，茄子都唔錯。海鮮類嘅話，蒜蓉燒蠔，扇貝，白鱔都好好食。鮑魚燒得唔韌，都好食。可惜鹽焗魚冇晒寶石魚，就叫左烏頭，烏頭本身肉質無咁爽。芝士焗蠔如果入面有少少汁，應該會好食啲。有sake同生啤飲👍🏻…Read More

平日中午放飯，兩個人食，叫咗啲點心，仲有一個細雲吞麵。7樣點心+細雲吞麵，600蚊。知道IFC食野貴，貴唔係問題，但要俾返應有嘅食物質素先得囉！炸兩-超難食，入面舊油炸鬼淋到變咗靭燒賣，蝦餃，蒸排骨-正常普通蘿蔔糕-又係超腍，一夾就散蝦仁蒸腸粉-啲腸粉好厚雲吞麵- 正常，唔係話特別出色炸腐皮卷-又係唔脆嘅，腍嘅坐到最入，仲要好似無冷氣咁，邊食邊滴汗，真係可一不可再，衰啲講句，唐記都好食過佢。。。。個侍應仲識叫個熟客坐出啲，入面好熱，但就安排我地坐到最入果張枱，真係熱到出晒汗…Read More

特登同朋友嚟依度試吓呢間漢堡，星期六1:30左右，都多人，去到都要等一陣位。等到位嗰陣個職員會過嚟噴消毒同埋抹枱，感覺好乾淨。有吧枱位，又有table位，買嘢食可以揀喺counter買，或者自助售賣機。招牌炸雞漢堡- 之前睇過其他食客嘅食評，見到個招牌炸雞漢堡睇落去好似偏乾，冇乜汁咁，所以我一落單嗰陣已經order左多醬。個炸雞漢堡大過個Bobby漢堡，舊炸雞好脆，啲肉好嫩好Juicy. 一咬開仲見到個雞啲汁流出嚟🤤同埋一定要叫多醬！多醬！多醬，重要嘅嘢講3次。個芥末醬同個雞好夾！Bobby漢堡- 朋友話塊漢堡好嫩，好有牛味，但個醬係好似千島醬咁，同唔係好夾牛，但整體都係好食。爆谷雞- 咁餐加咗個爆谷雞，食第一粒都覺得好食，但食多幾粒就覺得好鹹，如果冇咁鹹其實係幾好食嘅。幼薯條- 有薯條就係好普通嘅幼薯條，冇乜特別…Read More

終於都比我排到法式布甸麵包啦！想食好耐但一直都夾唔到時間嚟排隊，咁啱今日下晝放假，又咁啱三點幾喺附近，就諗住過去碰吓運氣啦。我3:55去到，已經見到條人龍排到去地鐵站出口，法式布甸麵包每日有兩輪，第一輪出爐係4:00，第二輪係7:30，問咗職員姐姐佢話每次出爐賣200個，由於每人最多只可以買四個，所以都係頭50幾個人買到，我好好彩係臨尾嗰幾個✌🏻因為一早知道買其他嘢食係唔使排隊，所以我哋就一個人負責排隊，一個人就入去買Q餅。Q餅之前有同事買過俾我食，因為好好食所以今次就再買。Q餅- 基本上同台灣嘅Q版冇乜分別，唯一分別就係外型，台灣嘅會係扁啲，呢間嘅Q餅就係一個立體嘅圓形，Q餅上面有黑白芝麻，內涵就會有紅豆蓉，麻薯，蛋黃同埋肉鬆。甜度算少甜，好值得讚賞嘅係呢個甜度，食唔到好甜嘅人應該會鍾意。麻薯唔係煙煙韌韌嗰隻，係偏林嘅，我鍾意呢隻麻薯多個煙靭嘅。肉鬆偏小，蛋黃¼粒，但呢個價錢食到呢一個質素，已經超晒班，我覺得仲好食過台灣嘅Q餅。法式布甸麵包- 今次呢一批好似係焗燶咗少少，但食唔到有燶味，只係個皮睇落好深色。剛買嘅時候仲係暖嘅，過咗大概一個鐘返到屋企就即刻試食，喺室溫嘅狀態食，個布甸係好滑好香蛋味同埋奶味，甜度都唔算太甜，個包皮係煙煙韌韌嘅，單食個包係唔好食嘅，但個包加埋啲布甸就好好食。到第二日喺雪櫃拎出嚟，雪左一晚嘅狀態下，個布甸冇乜分別，但個包皮就好大分別，雪左一晚個包皮變脆左，咁樣反而好食過尋日室溫嘅狀態👍🏻…Read More

已經食過好幾次呢間餐廳，見成日都好多人，所以有一段時間冇黎食。今日晏晝五點幾肚餓諗住早啲食晚餐，見到beans冇人排隊✌🏻見到個Menu多咗啲新菜式，有魚香茄子意粉，北京填鴨漢堡😂好有創意。我哋兩個人叫咗兩個main course，一個係北京填鴨漢堡，有薯條有沙律，但個包就細個咗少少，個包係中式嘅蒸包，搽咗一層北京填鴨醬，入邊有兩大舊鴨肉，味道唔錯，鍾意食北京填鴨嘅人應該都會鍾意食呢一個。跟住另一個主菜係大蝦龍蝦汁意粉，加咗錢叫咗個薯條配黑松露醬。大蝦龍蝦汁意粉- 兩隻蝦就唔係好大隻，個龍蝦汁都唔係好濃，但整體上都OK，只係見到隔離枱叫嘅黑松露軟殼蟹意粉，同埋蟹肉蛋黃意粉好似吸引好多咁😂有啲後悔叫咗呢個大蝦龍蝦汁意粉😂個薯條配嘅黑松露醬超好食，好濃嘅黑松露味嘢飲就叫咗一杯特濃朱古力同埋伯爵茶。特濃朱古力上面有好厚嘅朱古力粉，飲嗰時小心濁親，朱古力味好濃。伯爵茶飲完可以re-fill熱水落茶壺度。伯爵茶唔算好濃都唔係好淡隻。…Read More

公司Team lunch, budget 人頭$300，老細就揀咗呢間餐廳，餐廳個環境係好靚，我哋分咗三張枱，每枱四個人，喺窗邊位。邊食邊睇個view真係加分好多。我哋叫咗每人一個set lunch，有頭盤主菜同埋甜品，$198都ok.頭盤我叫咗個煙三文魚拼鮮三文魚他他，好好食，好開胃主菜我自己就食香煎銀鱈魚柳，都唔錯，好厚肉，同埋魚肉唔鬆散，唔錯，但可能對某啲人嚟講份量會偏少。另外兩個主菜就係其他同事食嘅，分別係牛柳同埋大蝦意粉，同事就話個牛柳普普通通但都OK嘅，但我就冇試過啦。甜品我就揀咗燉蛋，我自己本身唔係太食得甜，我覺得呢個都好甜，唔太食一個，但個賣相就唔錯有同事就揀咗芝士拼盤做甜品，佢就話後悔冇揀燉蛋😂整體來講lunch set呢個價錢食到依啲嘢，再加埋個景其實都值嘅，我覺得相比起尖東嗰間分店，呢間嘢食同埋個景略勝一籌。…Read More

我本身真係好鍾意食小籠包，成日周圍去試唔同舖頭嘅小籠包，終於有機會試吓呢間咁多唔同顏色嘅小籠包。餐廳環境正正常常，冇乜特別。小籠包個皮算幾薄，我個人都係鍾意食完美多啲。有啲口味其實係食唔出果陣味，黑松露同埋蒜味係算食得出，其他嘅味都係淡淡然咁。松子桂花魚。呢條魚又整得幾好食，炸得夠脆，同埋條魚都幾大條好多肉，個汁又唔會太酸又唔會太甜，適中。呢個炒飯就一個好普通嘅炒飯冇乜特別，正正常常都OK唔錯呢個油麥菜卷就真係好騎呢，開頭睇相以為啲菜係煮過同埋有調味嘅，點知一嚟到原來係生勾勾嘅菜卷埋一齊，跟住就點嗰啲麻醬嚟食，個感覺有啲奇怪。我都唔知點解我會叫呢碟菜😅😂😂春卷都唔錯，幾大舊嘅，偏油少少…Read More

之前喺荃灣廣場嘅美中鴨子食完lunch之後佢俾咗幾張coupon,見到啲coupon可以用喺呢間喺element嘅魚塘鴨子, 所以就嚟呢間試吓。呢間環境真係靚好多，望出去個view都幾有情調,同埋啲枱唔會好迫，坐得都幾舒服。龍蝦湯不過不失，都係普通嘅龍蝦湯小籠包唔錯，個皮好薄，但個蒸籠長條型，好難夾起個小籠包，搞到一夾起上嚟個皮就穿北京填鴨被想像中差，正常北京填鴨應該係佢嘅招牌菜，但係個皮唔係特別脆，同埋青瓜京蔥蘿蔔嘅配料唔夠，平時喺其他餐廳食北京填鴨，通常係1塊皮包兩舊肉都仲有肉剩，呢間餐廳係餅皮多個肉😂 脆皮口水雞有驚喜，個脆皮都真係幾脆，唔算太辣，但就偏鹹少少呢個餡餅好好食，睇Menu見到張相OK所以叫嚟食，食第一啖已經覺得幾好食，但就偏油膩少少香蕉高力豆沙都係咁普普通通，佢伴碟嗰舊嘢係一舊棉花糖so far呢間餐廳都OK嘅，嘢食同環境都唔錯…Read More

同朋友兩個行完山，特登搭車去柴灣食呢間黃店茶餐廳，餐廳位置有少少難搵，因為係喺個屋村入邊，餐廳門口見到有好多告示板，係一啲領養動物嘅資訊，好有愛心嘅餐廳估唔到門口會擺一啲待領養動物嘅資訊俾人睇。行完山好肚餓，見到生炸雞髀四個字就即刻好想食，我同朋友兩個人叫咗兩碟蔥油生炸雞髀飯加紅豆冰，因為我哋兩個女仔食唔到好多飯，所以叫哥哥仔比少啲飯我地，個蔥油加埋啲飯真係無敵，好好食，同埋這生炸雞髀入邊仲好嫩好Juicy。唯一可惜嘅係紅豆冰啲紅豆煲得唔夠林，如果啲紅豆再煲耐啲再煲爛啲就完美！…Read More

次次去親Outback都係為咗個黑糖包而嚟嘅，其實都好耐冇去outback食飯, 今日收工就去咗荃灣廣場呢間度食，可能因為我早食啦六點幾就入咗去，餐廳入面冇乜人，佢俾咗張卡位我哋錯，個卡位係好舒服好闊好大，同埋係窗邊可以望街所以都幾舒服。黑糖包一如既往都係幾好食跟住我叫左個香煎蟹餅，炸蘑菇，燒豬肋骨個炸蘑菇超級好食，好Juicy, 咬落去會有汁流出來，比想像中好食好多呢個香煎蟹餅都幾好食，但係奇怪嘅係蟹餅上面嗰啲蕃茄係凍嘅，佢應該係類似凍蕃茄沙律嗰啲嘢，一開頭食落有少少怪怪地，但食食吓又覺得OK喎燒豬肋骨以前都成日食，但係覺得今次好似冇以前咁好食，但係都唔差嘅，都係啲肉好林好入味一咬就離骨。整體來講啲嘢食係好食嘅，但真係比以前貴咗好多。咁樣呢一餐就六百幾蚊啦…Read More

同老公結婚周年紀念日，嚟咗呢間餐廳食lunch，一個月之前就book定，本身都好鍾意食中菜所以諗住嚟試吓呢間有米芝蓮一星嘅餐廳。首先講吓環境，話晒都酒店餐廳咁梗係坐得舒服啦，服務都梗係幾好啦，個氣氛其實好靜，嚟食嘢嘅人講嘢都好細聲，唔會好嘈。一如既往，酒店嘅中菜廳飯前小食都係琥珀合桃我哋拎住個Menu睇咗好耐都見唔到OpenRice其他食客食嘅嘢，跟住有個經理就行過嚟問使唔使佢介紹吓餐廳嘅嘢食，咁跟住佢就改原來OpenRice嗰啲嘢食呢係冬天嘅Menu，咁要冬天嚟先有得食。我哋叫咗黑毛豬叉燒，龍蝦春卷，娘惹鹹水角，百花釀蟹鉗，三文魚子帶子燒賣。整體來講啲嘢食都好好食，係個鹹水角就真係好普通，個經理同我哋推介呢個鹹水角係佢哋嘅出名菜色，識落係好食但係就係真係普通鹹水角咁囉，個帶子燒賣就其實就真係一粒好普通嘅燒賣囉。黑毛豬叉燒，春卷同埋個蟹鉗都係好好食嘅。黑毛豬叉燒有個個伴碟扭紋醃製蘿蔔，個侍應收碟之前特登叫我哋試下，又真係幾好食。食完主菜就試吓甜品，我哋叫咗葡撻，仲有番石榴西米露，葡撻唔錯，個番石榴西米露勁好食，我本身唔係好食得甜野，呢個西米露唔係太甜，同埋好清新，好好食本身餐廳都有送甜品，係曲奇餅同埋桂花糕，普普通通啦，我老公話個餅好硬，但我就冇食啦。呢餐飯都幾好食嘅，埋單$1800兩個人，但係就唔覺得有米芝蓮一星嘅感覺，之前食過其他酒店嘅中菜廳都差唔多水評，反而覺得hotel ICON嘅中菜廳天外天,好似仲好食😂個人感覺…Read More

星期五同朋友兩個一早已經諗住夜晚嚟呢度食飯，因為我同朋友都想食大排檔小菜，我哋好難先喺附近搵到一間黃店係食大排檔小菜，本來諗住慢慢食，但因為趕時間返學所以就拿拿臨食完就走。我哋叫咗一個小炒王，一個豉椒炒大硯。兩碟餸都幾好食，特別係小炒王，好大碟，同埋好香口，小炒王入邊有啲炸魷魚超級脆，好好味。個豉椒炒大硯都唔錯，有好多隻，都入味，$98嚟講幾抵食。可惜唔夠時間食其他嘢，下次有時間會再嚟試其他嘢食。整體來講都唔錯。…Read More

星期五下晝day Off，同朋友兩個人去呢間餐廳食lunch，因為朋友喺網上睇到話呢間餐廳環境好靚，好適合兩個女仔去影相。本來諗住上網book定先，但網上訂枱系統顯示嗰日係full Booking，所以我哋就walk in入去. 我哋大概一點幾左右去到，唔使等位，個場都唔係full晒，仲有啲吉枱。講吓食物先，我哋兩個嗌左兩個lunch set share食，叫咗一個腐皮壽司set，一個鰻魚滑蛋飯。兩個配菜都幾好食但係就偏鹹少少。先講吓個腐皮壽司set，呢個應該係呢間餐廳嘅主打食物，但講真其實真係好普通，嗰個北寄貝沙律其實係食唔出北寄貝，即係覺得好似食好多沙律醬同埋飯咁樣。吞拿魚嗰舊腐皮壽司，我朋友食落口話覺得怪怪地跟住俾咗一啖我試，我一食一粒吞拿魚就覺得呢舊魚好唔新鮮，好梅同埋有陣唔新鮮嘅腥味，但我朋友都係照食晒，另外嗰三舊都係好普通嘅咋冇乜特別。跟住講吓個鰻魚滑蛋飯，食呢個真係食到好嬲，首先舊鰻魚好多骨啦又好薄啦，好似係比較cheap嗰啲鰻魚，跟住嗰個滑蛋真係一啲都唔滑，舊蛋係就係好厚嘅，但係呢就太熟啦overcook,我同我朋友都唔太鍾意食太熟嘅蛋，呢舊滑蛋真係熟到好唔滑，重點黎啦，拎開咗舊蛋嗰度係白飯嚟㗎，係一滴汁都冇嘅白飯，本身個返嚟嘅時候蛋上面都已經冇乜汁，拎開啲餸嗰個飯竟然係白雪雪嘅，成個飯嘅感覺就係食一舊好多好多骨嘅鰻魚，好嚡嘅一舊蛋同埋一堆無汁嘅白飯，我哋以為鰻魚滑蛋飯應該係最易整最普通啦，是但一間日本餐廳都整得好食，點知原來係可以唔好食嘅。食物就講完啦，環境真係幾靚嘅，有個位係俾人影相，同埋成間餐廳嘅裝修啊，啲燈都好靚，真係來一次就夠啦，影完相下次就唔使再嚟啦，因為嘢食真係一啲都唔好食，純粹打卡。…Read More

本身都唔係好鍾意食放題，因為通常食物質素麻麻地，同事話做晒research，話呢間放題高質，咁19號果日紅日去食lunch啦。12-3時段。首先講食物，就真係唔係高質，刺身有正常質素都有d係好腥嘅，普通放題咁嘅質素，不過都預咗。再嚟講環境，地下油林林，d枱呀，卡位梳化都唔係好乾淨，都算！我地一行4人坐卡位，食食下有中size嘅曱甴，個身長長果種，喺我個位果幅牆度行，勁驚！即刻叫侍應捉咗佢，佢用佢果塊藍色用嚟抹枱嘅布捉咗佢，成餐飯已經食得好不安，跟住無幾耐，又一隻！！跟住就同個侍應講又有一隻啦，佢好似無乜野咁又用佢張抹枱布捉咗佢。侍應俾我嘅感覺係應該成日都好多曱甴周圍行，佢地都見怪不怪果個感覺，仲要連唔好意思呀，對唔住呀果種感覺都無。捉完曱甴一句野都無講就行開。我明白放題任食係不能要求高，但都唔係咁樣同d曱甴一齊食飯都覺得係正常卦。真係好差囉！…Read More

真心有驚喜，本來同朋友去深水埗諗住試下「素年」，因為好多人推介，點知兩間都超超超多人又勁勁勁迫，所以就喺openrice隨便睇下附近有咩食啦。咁見到呢間好似唔錯，行過去又見到唔係好多人，咁就入左去試。用QR code落order, 落完好快有得食。我叫左個人氣嘅芝士唐揚炸雞飯，有驚喜，諗住個面有咁多芝士可能會整到舊雞林啦，點知雞肉好嫩，雞皮仲係脆嘅，芝士好多好濃，仲要係勁多舊雞，有兩層雞，起碼有6大舊，$76蚊我覺得真心值同埋抵！份量都多，下次再去深水埗都會再黎食。唔錯！但朋友話佢果個燒雞扒烏冬就普普通通，另一個朋友話鰻魚烏冬好食。…Read More