蘋果爽's Profile

點解會有咁好味既片皮鴨架？真心，覺得好好味。上至包住隻鴨既白色皮，下至點填鴨既醬都好正。片皮鴨好香，有肉但唔怕肥。塊皮好薄，但唔會穿。小籠包超多湯汁，入面既肉都好有肉味，皮薄餡靚。生煎包啲汁都一樣多到標出嚟，超好食，意想不到既驚喜。上海粗炒就過油，偏甜，相對普普通通。萵筍絲好爽口，味道好淡，喜歡濃味既可以加豆瓣醬食。金華火腿鮮菌炒飯就炒到好乾身，d飯真係一粒粒，唔差既。依個前菜好正，我次次黎到都會清左佢。…Read More

見到openrice d野食相咁靚，d comment又好似幾好，就約埋個friend黎食tea。Espuma告白氣球tea set，D野食細細件，可以試到好多款唔同既野食，其實真係好岩兩個女仔黎食。奈何實在太難食，奉勸大家唔好因為見到佢靚，就走來食囉！第一層有野莓蛋糕、朱古力竹炭蛋糕、同伯爵茶意式奶凍。全部得個甜字。第二層係鹹點，但可以話上面嘅嘢食唔係全部都係鹹點，有啲係淡到完全食唔到係咩味。最後一層甜點，有檸檬撻、朱古力竹炭蛋糕配oreo餅，玫瑰鬆餅。我寧願去超級市場買包oreo餅食好過。依度只係一個黎打卡嘅地方，而唔係有好野食嘅地方。…Read More

約左三五知己，唔一定要去靚餐廳食野，有時食下food court 都幾好，多選擇，每個人都可以揀自己想食既菜式。超鰻魚定食（大盛飯）：個鰻魚真係好驚喜，拍得住喺日本食嗰d鋪頭。肥大肉厚，冇得輸。鐵板南蠻他他醬定食：個炸雞好juicy，個他他醬仲好夾件炸雞，件雞仲一啲都唔油。醬汁牛肉飯：呢個韓式牛肉飯，真係估你唔到，好味過好多韓國餐廳整出嚟嘅燒牛肉飯。博多屋豆腐花：個豆腐花加咗用桂花整既糖水，感覺好清新，唔太甜。日式滑蛋豬扒飯：比較下個滑蛋豬扒飯就冇咁好喇！因為個豬扒唔太脆。和風章魚丸：粒章魚丸唔錯，真係揾倒有章魚㗎。…Read More

新開張，緊係要試下啦！我不嬲都唔食芹菜，不過個店主係咁推介，我就惟有相信佢，叫咗一碗嚟試吓。大驚喜，估唔到又真係好鬼好味，完全冇嗰種臭青味，唔鍾意食芹菜嘅朋友，我都覺得應該要試吓。個粟米豬肉餃， 裏面係有芝士㗎！仲好味過八方雲集嗰個粟米餃，鍾意食芝士嘅朋友，不如黎試吓啦。個湯底係好濃嘅豆腐+魚味，超級鮮甜，最後我仲成碗飲晒，飲晒成碗湯之後，我都唔覺得口渴。順帶一提，佢間野嘅辣椒醬都好正，我少食辣嘅，都加咗幾滴黎食。…Read More

聞說釜之魂鰻魚肥大肉厚，忍唔住特登黎試下，結果...鰻魚係堅大件，好厚肉，但遇著失敗既廚師，幾好既食材都係無用架喇！條鰻魚俾個廚師整到燶哂，成條魚充滿燒焦味，好臭好難食。個飯仲要係濕漉漉，睇見都唔開胃。麵豉湯過鹹，沖粉開既，一d誠意都無。OMG，比較好既竟然係前菜，爽口，味道嘗可。完全明白點解日日派個職員企係度派coupon都無乜人幫襯。俾個門面呃左，完全有中哂伏既感覺。睇黎依間野約滿就會散band。…Read More

依間係一間會令我無限loop嘅餐廳，實在太好味啦！叫咗個煙三文魚蕃茄意粉，係厚切三文魚嚟㗎！一個番茄汁好特別，有好清新嘅香草味。另外叫咗個牛肉壽喜燒烏冬，得3大塊牛肉，仲有一束甘菇，幾條大䓤，一隻蛋。係幾好味嘅，但要$98，我覺得有啲唔抵食囉！加$28晚餐升級，多咗個餐湯粟米湯，同埋一杯迷你香蕉朱古力芭菲。粟米湯好滑，個甜品都一流。下次再食晚餐嘅話，我都會加錢升級。另一個餐，我加咗$48升級。多咗個飯、沙律同埋一個酥皮粟米湯。個沙律就一般，但個酥皮粟米湯就好有驚喜啦！我推介你哋要試。總括來講，呢度嘅甜品真係冇得輸，個酥皮粟米湯堅正添！…Read More

喺翠屏邨食嘢，真係冇乜選擇。不過唔代表喺翠屏邨住嘅人，就冇啖好食。富田依一間日本餐廳係唔錯嘅選擇。佢價錢唔貴，但有好多選擇。唯一要彈嘅，就係佢啲侍應態度唔係幾好。一家大細三個人，叫咗三個下午茶餐。個仔揀咗自選壽司，可以揀四款唔同嘅壽司，每款有兩件。我哋揀咗鰻魚、蟹子、蟹柳、玉子。四款都唔錯，我個仔食得好開心。老公揀咗雞扒烏冬，個湯底用豬骨湯熬，件雞排都好厚好大塊，不過無乜味。但只係$36，唯有忍下啦！我自己揀咗鰻魚飯，熱辣辣，有勁多鰻魚汁，我就覺得好好味好滿足啦！…Read More

食拉麵我最著重個湯，湯底一定要濃。依間樂拉麵，開正我杯茶。自己一個食下午茶，叫左個豚骨拉麵，個豬骨湯底香噴噴仲濃到爆，仲超滑，鍾意重口味湯底一定要黎試下。有兩塊叉燒，正常size，仲係淋既嫩既，如果大塊d滿足度會爆登。仲可以免費加多粟米，超開心，大部分拉麵舖都要加錢架嘛！個蓮藕都幾好味幾特別。隻糖心蛋係會流心嘅。個環境舒適，唔會迫，唔會有同隔離枱拖手仔情況。啲侍應服務都唔錯，會講解有啲咩多人叫，d拉麵質地有咩分別。總括來講，我係會再嚟幫襯嘅。…Read More

黎依度，若果為睇景同service既，攞滿分;但為食既，頂多叫合格。最好味既係碗中湯同豆腐花，但無必要收成千蚊位食依兩樣野。其次係冷盤，龍蝦青口都鮮甜大隻，但蟹腳好乾，蟹鉗仲要完全無汁既。刺身叫ok，但普普通通唔太差既日本料理舖頭都食到。件鹿兒島和牛咸到爆，仲以為會好好味。鵝肝叫唔錯，其他熟食不過不失。D甜品有好多款，我揀左4款，但都係食左一啖無食，造型好靚，但d味道唔夾。所以唔夠膽再拎。有杯welcome drink，揀左龍眼烏龍茶，無揀錯既。另外老公揀左菠蘿果汁酒，都幾好。適逢紀念日，酒店送左件朱古力蛋糕，依件送既蛋糕仔就係成餐飯最驚喜既，因為真係堅好味，唔係buffet bar枱可以揾到既。總括黎講，黎一次就夠，多謝哂。…Read More

今係黎到屋村食台灣風味既下午茶，舖頭細細，放左一d淘寶都可以揾到既擺設，睇得出係小本經營。試左「珍寶肉燥飯」，入面有3粒酥炸雞粒、一粒炸貢丸、一粒炸魚旦、一條炸春卷、一塊蝦餅、一塊魚餅、仲有隻滷水蛋。個雞粒唔算太厚粉，不過個人認為太細粒。粒炸貢丸好出色，但粒魚蛋就冇乜特別。塊蝦餅好食，魚餅就太鹹太辣。滷水蛋完全冇味。「肉鬆厚吐司」，塊多士一啲都唔厚，完全唔明點解叫厚吐司。就咁加咗啲肉鬆係上面，一啲醬都冇，好在塊吐司係脆嘅，如果唔係真係唔會食。「凍蜂蜜綠茶」，成杯綠茶同道地蜂蜜綠茶冇分別，不過加咗冰，起碼係好味嘅。「熱抺茶牛奶」，依杯野有啲嚇人，個牛奶似係用奶粉開嘅，上面淨係加咗少少綠茶粉俾你攪勻佢飲。我一定唔會再叫。如果你對食嘢冇乜要求，呢一間鋪頭都算坐得舒服嘅。我試過食其他野，好味好多，下次有機會再影俾大家睇。…Read More

已經有好幾年無上過樓上cafe，見到依間網上feedback唔錯，就約埋幾個朋友上左去。地方寬敞，睇得出店主有放心思係擺設上，愛影相既朋友可以到此一遊。叫左幾款食物同飲品，估唔到幾個後生囡整出黎既食物水準同賣相都唔錯。必試「蜜糖雞翼」，係單骨雞翼，預先切開一半，方便食，多蜜糖仲好入味。「Haagen-Dazs雪糕窩夫」，雪糕當然係有保證之選，加上即整窩夫，成個甜品口感upgrade 哂。有小朋友係度，店員姐姐送多球雪糕。 「Haagen-Dazs雪糕心大軟」，依個心太軟就一般，唔太流心，有d over cook，不過唔太甜，大人都岩食。飲品試左「凍咖啡」，朋友話正常咖啡一杯。「睡美人」，小朋友鍾意飲，但我無試過俾唔到comment。「玫瑰花茶」，讀書時代上親樓上cafe我都會叫，貪佢有淡淡玫瑰味，有消滯感覺。總括黎講依度係值得去既，我地5個人坐左4個鐘都無趕我地走。…Read More

「一杯」個人認為係觀塘區最好味嘅日本居酒屋。價錢偏貴，但份量同誠意都十足。一坐低，店員就會介紹是日廚師推介。今日嘅廚師推介係「A5和牛廣島蠔卷」，$280一份。和牛肉汁鮮嫩包住隻鮮甜廣島蠔。「南瓜沙津」，其實我唔太好南瓜，但依個南瓜蓉我又唔抗拒，上面既炸南瓜脆片仲好好味，個沙律汁仲好夾。「豚平關西燒」，入面既五花腩一d都唔膩，用鐵板炒，加埋個日式燒汁，食完可以再食。「東洋卷」，用班㦸皮包實牛油果、鰻魚、蟹籽，口味清新，另一必食之選。「三文魚茶漬飯」，相比其他食物遜色，不試也罷。「關西燒二品」，大大份，揀左雞肉、蟹肉做配料，有大量耶菜絲加日式燒汁，下次都會再食。串燒揀左「免治雞肉串」可以不食，「燒牛舌」太好味所以即時叫第二round，「雞肉京蔥串」配搭一流。「炸雞香蔥汁」雞炸得過熟同個汁少咸。「牛肉年糕串」口感特別。「廚師推介十件」件件壽司都很新鮮。…Read More

適逢小妹last day, 千挑萬選，最終揀咗派冬甩，無諗過d同事爭住搶，食完要再食，好在我預備多咗，唔係唔夠派，亦證明我眼光好，冇揀錯。大家若果要派散水餅，不妨考慮下派冬甩。依間鋪頭既冬甩有好多選擇，有迷你版或正常版，正常版一件$15，6件$88，12件$148。而盒裝24粒迷你版都係$148，都幾抵食，款式多，梗有一款啱你口味，就算買黎開party都啱用，完全無唔推介既理由。而小妹最鍾意既就係「Mr. Green Tea」。…Read More

用新城市廣場個app，攞定飛，排隊食飯無難度。第一次嚟Parkview食飯，估唔到有意想不到既感覺。最令我驚喜係佢個餐包，新鮮出爐熱辣辣㗎！食完想再食。羅宋湯味道濃郁，連啲渣都好味。西班牙海鮮飯，個飯質地唔錯，d海鮮出奇地多。軟殼蟹番茄意粉，軟殼蟹唔夠脆，但個意粉軟硬適中。另外仲追加個小食，菠菜煙肉薯餅，又係爆脆爆熱爆滋味。總括嚟講，點都要encore，環境舒服，地方乾淨企理，侍應有笑容，成家人都食得好開心。…Read More

夜晚唔知食乜，最好就係去茶木，多選擇、食物質素又keep到。今日食咗個地瓜燉牛坑腩，牛腩薯仔都好淋好入味。呵嗲肉碎泡飯係我嘅至愛，黎親一定食。我地仲叫咗個炸雞扒肉操飯，個雞扒超脆又鬆軟。仲飲左杯玫瑰花茶，正到暈。…Read More