ceopollianna's Profile

如果唔係去開附近做嘢，真係唔知道離開地鐵站咁遠嘅地方有間AEON，而AEON入面又有幾間餐廳，就決定行個街食埋野先走啦。由於今日冇着低胸針織衫，所以決定唔食薩利亞，而試咗佢旁邊呢間泰國菜。六點去到，應該剛剛開始晚市，我哋係第一枱客人，地點都算寛敞舒適。荔枝梳打，賣相平平實實，我鍾意佢唔算太甜，但又有荔枝嘅香味，仲有大大粒嘅荔枝肉。生菜包係其中一樣我最鍾意食嘅泰國菜。佢哋用嘅生菜好新鮮，而且係生菜鮮嫩嘅部份。肉碎酸酸辣辣，辛辣程度比較親民，應該大部份香港人都食得到。後來老闆娘過咗嚟同我哋傾偈，原來佢哋使用嘅豬皮係佢地泰國廚師自己鮮炸，仲要一共炸兩次先保持到香脆同冇油益味。豬皮炸走晒d肥油，所以一d都唔油膩。青咖哩羊腩咖哩好香口，茄子係先烤過嘅。羊腩炆得好淋，而且冇乜騷味，加埋蒜蓉包就最襯。佢地嘅招牌船麵湯底都好足料，我叫咗嘅牛肉船麵，肉類有肥牛、牛腩，仲有牛丸。大大碗，如果有叫其他嘢食，一個人真係未必食得晒。芒果糯米飯嘅芒果好多，用嘅係泰國水仙芒，清甜得來又唔膩，芒飯比例同響泰國食嘅好相似（芒果多糯米飯少）。少少暖嘅糯米飯，大份量嘅芒果加埋椰汁，咁樣麗完結一餐，實在無敵。呢度嘅地點唔算就腳，店面都有少少隱蔽，不過勝在超級市場旁邊，行完街正好可以食啲嘢休息吓，而且價錢唔貴，性價比高，座位亦算舒適，值得一試。…Read More

響銅鑼灣新開左東京米之蓮星級餐廳金色不如歸香港嘅姊妹店。比IFC金色不如歸似乎更有特色，除咗佢哋招牌拉麵外，呢度其中一個主題係牡蠣，即係𧐢。晚飯時間經常大排長龍，今日星期五晚七點前到達有時竟然有位。呢度食嘅𧐢都係煮熟嘅，第一道似係壽司形式嘅，用味付紫菜包住壽司飯同漬左既𧐢，𧐢嘅香味好濃烈，鮮味留在口內久久不散。牡蠣野菜天婦羅有兩隻𧐢同3塊野菜。除咗𧐢之外，其中一件野菜係明太子釀秋葵，感覺好驚喜。雖然未比未必比得上高級既天婦羅專門店，但一啲都唔失色。呢未沾左醬汁嘅𧐢串燒，可能因為我哋冇飲酒，感覺就鹹咗一啲。吉列芝士一口豚都非常唔錯，不過冇比較冇傷害，相對來講附近申子居酒屋嘅吉列芝士豚就實在出色太多。牛舌丼細細個，適合唔係食太多飯嘅OL。滿滿嘅蛋汁令人好開心，白松露油亦都冇蓋過牛舌嘅香味，不過我就覺得牛舌太韌，唔係太咬得開。華味鳥都好食，雞肉鬆軟有香味豚肉餃子就普普通通不過不失反而佢嘅招牌拉麵，慢煮叉燒同湯底都唔錯，但就覺得冇乜特別，可以專注吃牡蠣🦪菜式。座位唔算好舒服，但食物質素唔錯，如果唔使排隊，整體來講係令人滿意嘅一餐。…Read More

以五星酒店粵菜來講，紫粵軒嘅價錢相對經濟實惠。地方舒適，坐得闊落。兩個湯羹都做得出色。呢個焗蟹蓋係相當抵食。有唐閣八成水準但四成價錢，洋蔥同好多蟹肉，好creamy，脆口得來唔乾身。黃金蝦球好大份，有八隻咁多濕濕地口嘅上湯蘆筍，蘆筍唔算好大條但同個野菌配合得好好，仲有杞子，望落去顏色好豐富已經好開心。最後嘅柚子吊燒雞佢嘅吊燒雞同普通嘅冇乜分別，不過加咗柚子醬竟然感覺份外清新，有啲驚喜。Download 佢哋個app做埋會員可以儲分同埋仲有野送。…Read More

作為一間唔係好大嘅精品酒店，早餐以半自助形式實屬合理。自助部份包括有唔同種類嘅麵包、水果、果汁同cold cut，款式唔係好多，但質素都算幾好。主菜我哋選擇左Egg benedict，好鍾意佢嗰塊加拿大厚煙肉，配合水波蛋、荷蘭醬同埋muffin，係令人有充沛元氣嘅早餐。蛋汁沾滿左多士本身先至攞去煎，面頭嘅橙醬同忌廉味道一唔會太甜，當然可能對於其他朋友來講有機會唔夠甜。不過我自己就好鍾意。其實相對一個好多嘢俾你揀嘅自助早餐，我反而會喜歡即叫即做嘅選擇。唔係要食好多，味道好才真正令人滿足。…Read More

位於灣仔同銅鑼灣中間新開嘅Hari Hotel，原本應該係主打會展客嘅精緻商務酒店，酒店有兩間餐廳分別係日本菜同意大利菜。今次就試吓佢嘅意大利午餐。餐廳屬於C類，所以一定要安心上路，而最多一台六人。午餐時間唔算少人，所以都係要一早預訂。午餐可以揀兩道或三道菜書麵包同餅乾片都做得好好，而我最喜歡嘅係佢俾我哋點麵包嘅陳醋，來貨真係好好好出色，點點下唔夠都要叫佢加。前菜我選擇咗鵪鶉蛋沙律，佢嘅油醋同樣出色，沙律都好新鮮，鵪鶉蛋佢用poach，可能太細隻，雖然有少少糖心，但卻冇我想像中嘅流心。而且可能太細隻，poach完後蛋味走咗。羊肉好大份而且幾嫰滑。主菜我叫咗ribeye，medium rare做得剛剛好冇血水，面頭係燒得香嘅。配菜沙律同蕃茄質素都好好。春雞都好滑，但面頭嘅herbs就鹹咗少少。甜品tiramisu，好大份，mascapone cheese同lady finger嘅比例好好，雖然好飽但都忍唔住要食。以佢嘅質素同環境呢一個價錢絕對交足功課。…Read More

簡簡單單食個小炒晚餐，見到招牌主打係少鹽少油嘅住家菜就去試咗。價錢算幾唔錯，晚餐每位大約$100就已經有湯、主菜、白飯，仲送甜品。雖然豆豉鯪魚油麥菜本身都算係多油嘅菜式，但如果主打少鹽少油，呢道菜嘅鹽同油又真係多咗啲。沙拉骨份量唔算真係好多，但一定夠食，味道都唔錯。老火湯都幾入味，而且應該都真係冇落味精。反而送嘅清補涼糖水唔會太甜而且味道都幾好。撇除佢唔係佢自己所講咁少鹽少油，呢度嘅食物性價比都算係唔錯嘅。…Read More

香港仔一向唔多好嘢食，特別係想坐得好啲，或者食非中式嘅食物，好嘅選擇喺香港仔唔多。不過呢間位於香港仔工廈內嘅精品小店食品質素同環境都相當唔錯。小店座位唔多，大概都唔多於20個，呢度嘅主打係茶，茶單來有好多唔同嘅選擇。餐廳嘅食具基本上都係資助同選用即棄嘅，即棄來講嘅餐具質量都算唔錯。玫瑰山楂梳打好適合夏天飲，微酸微甜再加埋氣泡，熱熱地嘅日子好有透心涼嘅感覺。午餐包括小食、主菜同飲品。Portobello炒意粉炒得好香脆皮三黃雞既皮又脆又薄，雞肉又嫰又多汁，而且由於我減少食澱粉質，佢都可以選擇沙律而唔一定要選擇飯。小食係三文魚刁草撻，味道就普普通通，不過都尚算唔錯。以後響香港仔搵朋友食飯傾偈又多一個好地方。小店座位唔多，要上去食飯最好都要訂位。…Read More

之前一路好鍾意睇Viu TV嘅煮食真人騷，其中一位真人騷大廚就係祥仔。大廚開咗呢間茶餐廳已經一段日子，食品係有高級餐廳質素嘅茶餐廳食物，例如通粉佢會做carbonara、蕃茄豬扒飯係升級版、就連午餐肉都有自家製、常餐炸魚柳亦係極之精美，座位亦都寛敞舒適，所以呢度真係一個升級版嘅茶餐廳。好多年前大廚經營灣仔嘅餐廳我已經好喜歡呢道卡幫尼長通粉，佢用嘅煙肉好靚，長通粉嘅軟硬度剛剛好，面頭嘅芝士脆脆梗係香口。估唔到做茶餐廳佢亦都保留左呢度菜式，而且味道比以前佢經營嘅高級餐廳都絕對冇失色。蕃茄炸豬扒飯係我嘅最愛，一睇豬扒嘅炸粉已經知道不得了，用料一流，你切落去果下已經知道豬扒鮮嫩多汁，蕃茄飯亦都好正，完美配搭！另外我哋都叫咗紅酒燒豬扒，兩款豬扒嘅用料應該係一樣，所以味道都好好。兩款唔同豬扒嘅煮法各有特色，都值得嘗試。…Read More

雖然呢度叫做居酒屋，裝修頗為精美寬敞，但其實冇乜居酒屋嘅感覺，反而似一間普通餐廳。午市套餐嘅價格大概百零蚊左右，甚至有啲幾十蚊嘅選擇，套餐跟埋麵豉湯、蒸蛋同沙律，每一樣嘅質素都相當唔錯，沙律夠新鮮，蛋都蒸得滑。銀雪魚係即燒嘅，所以等候時間比較耐少少，大約15分鐘左右，但冇乜令人失望。魚皮燒得脆魚肉都滑，魚骨清得好乾淨，擺盤亦都做得好精美。唯一係我同朋友分別叫咗兩個唔同套餐，但我食完之後朋友嘅套餐都未到，兩個套餐上菜時間相差太遠，如果朋友唔熟實在會造成尷尬。座位同座位之間都算係寬敞，呢個價錢呢個質素，絕對冇投訴。…Read More

響點心界當中，其中有一款我好鍾意食但係又冇乜地方做到嘅就係灌湯餃，我講緊嘅唔係一盅盅用湯浸住嘅浸湯餃，而係肯點心籠蒸出，皮薄，篤穿左入邊就有湯汁流出黎嘅正宗灌湯餃。之前飲食男女有一個灌湯餃特輯，但由於俾人接埋咗都已經睇唔到，反正其中一間就係留家廚房。灌湯餃嘅皮做得好薄，湯汁味道好好，餡料亦都好足，一人一隻，好有滿足感。蝦多士除咗黑膠仲有蝦肉，雖然唔係好大隻，但查完之後一啲都唔油膩，喜歡食香口野嘅朋友一定好鍾意。劉家廚房老闆劉翁師承江太史一系，其中一道特色菜係太史戈渣，係用雞湯蒸做底左一個糕點，然後再拎去炸，最後點少少糖食，喺呢度嘅其中一款招牌菜。另一道有名嘅小菜係苔條九肚魚，香口而入邊嘅魚肉好滑身，不過我就覺得個燒汁多咗少少。蝦子百花釀豆腐嘅蝦子味道好充足，多口味龍嘅嘢，食少少清淡嘅菜式中和一下。蔥油撈麵睇落好簡單，但越簡單嘅菜式月考功夫，面唔可以太乾唔可以太濕，蔥油要夠味之餘又不能太濃烈，平衡需要做得好好，而呢個絕對做得到。甜品蛋散都好夠鬆軟，有蜜糖同椰絲，不過個人就認為蜜糖唔係好夠啦。呢度嘅環境坐得舒服，侍應服務都唔錯，食物水準更加係一流。但如果要食灌湯餃記得記得記得一定要預訂，唔係係唔會有得食嘅。…Read More

要講風景靚嘅酒店，其中一間最能居高臨下睇盡維港美景嘅就係Ritz Carlton酒店。位於酒店嘅118樓，號稱全世界最高嘅酒吧，酒吧有環迴270度嘅維港靚景，樓層極高，係酒店咁多間餐廳入邊睇風景最好嘅。餐廳有室內同室外兩部份，如果要講景觀就當然要坐室外，七月中天氣好熱，但可能又位於高層通風好好，所以就算陽光普照嘅夏天，坐喺度都唔會覺得好熱。118樓corner位嘅風景，絕對比得上$5000一晚嘅酒店套房。我哋選擇左望向太平山方向嘅維港同汲水門方向嘅位置，打卡影相都好靚。餐牌好有特色，其中以五行創作左金木水火土五款雞尾酒，餐牌亦都用咗五款唔同材質。由於我本身屬餓金命，所以我冇睇到未到就選擇左metal。味道都唔錯。另外小食我哋叫咗爆谷雞，味道不過不失，不過嚟呢一度其實主要都係食靚景啦。…Read More

一直好喜歡太古廣場嘅dim sum library，新穎得來味道又唔會奇奇怪怪嘅新式中菜。今次第一次去圓方的Dim Sum LibraryOpenrice訂位仲可以選擇特價套餐九道菜連嘢飲每人都係三百幾蚊，都好抵食。Cocktail餐牌都成$100一杯，包左係個每位$330嘅套餐入邊，真係好抵。擔擔湯包係我其中一個最愛，少少香辣嘅味道，但又唔會過分濃烈，皮薄，而且味道真係有食上海擔擔麵嘅感覺。龍蝦菜苗餃嘅龍蝦好爽口，但味道唔係好重黑松露蝦餃味道唔錯，其實唔落黑松露已經好香。雖然我覺得多咗少少，但亦冇違和感。魚香鹹水角比一般嘅香口，黑色睇落去好特別，仲有暗暗嘅閃光，黑椒和牛酥係另一個呢度必點嘅點心，外皮有啲似出面食開嘅蘿蔔酥，但入邊係用黑椒炒香左嘅和牛做餡，分外香口。煙燻筍嘅味道好特別，牛肋條口感同味道都唔錯，香而不辣。我本身比較鍾意食硬身嘅蔬菜，羽衣甘藍平時當沙律食已經好鍾意，啫啫咗之後更加香口，熟食別有一番風味。鹹魚帶子炒飯都好足料，飯炒得夠乾身，不過鹹魚味就真係冇乜。烏龍蛋其實係烏龍茶味嘅焦糖燉蛋，呢道甜品嘅味似伯爵茶多過似烏龍茶，不過蛋身都好滑。呢度嘅服務冇太古廣場咁貼心，但食物水準同太古廣場分店相若，而且套餐抵食，值得推薦。…Read More

響我嘅資料蒐集當中，瑰麗酒店Butterfly Room嘅下午茶其中一個非常難預訂嘅嘅下午茶。金蘭預訂我相信佢一定有佢嘅道理，無論點都好試一次先。由於冇預早太多book，所以只係book到下晝一點嘅時段，而一點已經開始Server下午茶了。飲品我選擇咗凍咖啡，下午茶套餐嘅飲品都係無限添飲。鹹點有四款，三文魚卷、無花果鵝肝mousse泡芙、蕃茄芝士菠菜麵包三文治同埋黑松露火腿蛋三文治。鹹點嘅擺盤好精緻，見到都好開心。Scone真係不得不提。入口鬆化，麵粉同牛油香夾得剛剛好，而佢跟想來嘅橘子將亦都非常之好，配合埋clotted cream真係冇得頂，每一件都係新鮮出爐，不經番熱 。至於其他甜品會由甜品車推出，基本上係任食，所以呢個可定義為一個甜品自助餐。呢度嘅mille feuille好出名，酥餅比較硬身，夾層嘅忌廉都好香。焦糖芝士蛋糕味道都相當唔錯甜品好多款，全部嘅質素都好好加上佢舒服嘅環境，值得一試，不過就要提早預訂啦。…Read More

久不久我都會睇吓有咩新餐廳，睇雜誌見到呢間餐廳，以木為主調嘅裝修感覺清新舒服，雜誌介紹嘅菜式睇相都非常唔錯，所以就去咗試。可能由於餐廳限聚問題，座位相當寬敞，感覺清新舒服，同朋友傾偈亦都好方便，唔會太逼夾。晚市有套餐，我哋分別叫咗三個套餐，主菜係龍蝦蟹肉卷粉、烤豬胺同油封鴨。跟餐嘅嘢飲我哋改咗叫特飲，我叫嘅香茅茶好清新舒服，喺炎熱嘅夏天飲落去更加開心。個樣亦都好靚。未到齊人之前，我哋額外叫咗一份鵝肝多士，鵝肝唔算特別香，但煎得好好，以$98來講算好大份同抵食。然而問題就出現了，當我哋叫咗三個主菜後，等咗一陣，第一道上台嘅竟然係甜品！我哋同服務員表示我哋甚至未食主菜，然而服務員應該係跟系統執單，表示應該冇錯，我哋叫佢拎返入去。跟住上嚟嘅就係主菜，咪住，乜我哋唔係有湯嘅咩？我哋三個人share三個主菜，結果係食完第二道菜先至有湯飲，呢個安排完全唔合格。上菜次序完全錯晒，作為一間西餐廳呢件事情不能接受。講返食品，龍蝦蟹肉卷粉，卷粉質感al dante，卷喺粉入邊嘅蟹肉都好香，龍蝦鉗炸過，稍為太乾，但都可以接受，算係三個主菜入邊最好嘅。燒豬安嘅醬汁其實好好，豬本身嘅質地亦都唔錯，但overcook左，太乾唔Juicy，呢個係廚房嘅問題。最差係呢個油封鴨，油封鴨嘅重點係鴨肉夠林，基本上刀一切落去，肉就會自動離骨而皮係要吼得脆身。呢隻油封鴨，乾過美心雞髀，薯仔亦都係乾爭爭嘅，完全唔合格！由於覺得冇啖好食，我哋再加左一個野菌pizza，散又幾好喎，皮烤得好，高亦都夠香，到底廚房發生乜事？甜品係芒果cheese cake，正正常常咁啦。買單超過$500一位，餐廳位置唔算係好好嘅地方，環境尚算舒適雅緻，但以咁樣嘅食品質素完全唔收貨。總體來講彩色嘅設計其實幾靚，亦都好吸引，但廚房做出嚟係完全失敗，到底只係當日嘅問題，定呢個係佢哋嘅正常水準？我都好想知。…Read More

晚上嘅海港城，經過之前嘅強檢事件，靜得似死城。所以好容易都攞到海景枱。麵包籃既麵包唔算好突出，但係餅乾同酥條就好好食。作為一個偏好食熱氣野嘅人，炸魷魚圈無論係小炒店、意大利餐廳、酒吧我都好喜愛，呢度嘅炸魷魚圈炸粉唔算厚，沙律配菜都好新鮮，而我最喜歡嘅就係佢嘅炸zucchini，香口得來唔油膩。龍蝦湯嘅龍蝦肉唔算多，但味道好濃郁，在冷清嘅晚上暖一暖胃都係一件好事。平時食意大利飯我喜歡偏硬身，但今次因為同屋企人去，佢哋唔習慣al dante嘅口感。服務員都好細心問我哋習唔習慣比較硬身嘅口感，咁我叫佢煮軟身少少，出到嚟屋企人都覺得好好。當然，我自己就覺得太軟身，但餐廳了解到香港人口味同傳統口味有一定區別而特別問一問客人，都係一件貼心嘅事。和牛千層麵並唔難煮，平時喺屋企都有做，不過呢度嘅黃牛千層麵無論質料軟硬度，芝士嘅多少都做得好好。黑毛豬豬扒嘅調味就冇乜特別，但豬扒好多肉汁，味道夠香，主要都係肉嘅香味，調味就普普通通，冇乜特色之餘亦冇喧賓奪主。芒果拿破崙嘅芒果酸甜適中，酥皮就唔夠酥啦，最好食嘅反而係個開心果雪糕，好香開心果味。作為今餐嘅完結都算好滿足。…Read More