大儒俠's Profile

媽子決定剝牙前，為了減輕她的擔心和驚青，於是提出要同佢撐檯腳，剝完牙後再同佢食好野！ 食乜好呢，撇除她幾乎日日食的連鎖快餐店，最後決定坐丁丁去康怡的茶木。客人唔多，地方闊落整潔，坐得都幾舒服。 媽媽要了鹵蛋肉燥飯 (竟然有 2 隻蛋咁多) ，我就要了牛肉麵 (本來想試芝士雞翼+炸雞件，但見台灣牛肉麵好出名，來台式食肆冇理由唔試下)。等左一陣開餐啦！ 碗牛肉麵 D 麵好似刀削麵，煙韌彈牙。舊牛肉係筋+腩的結合，好入味好林。 仲有紅蘿蔔和白蘿蔔，同埋芫荽和蔥以伴，夠晒香口。 成碗麵比我預期中大碗 (下午茶時段竟然有咁大碗 )，而且個湯底又好入味。餐飲方面我倆都要了熱的黑糖珍珠奶茶，又係比我預期的大杯！溫度唔會熱到熨口飲唔到，真抵讚！:) 味道方面唔太甜，珍珠煙韌，成杯飲得出好香的黑糖味。…Read More

仲以為爐爸打係中上價錢的居酒屋，原來佢價錢親民，感覺親民 (好多街坊一家大細去食，亦有一支弓的男或女去 "一人前"！絕無尷尬，氣氛和諧！) ，平靚正之餘，仲係性價比的一間街坊食肆！睇餐牌已有多樣心水，$18 小食又好吸引。 不過因為打完波想食D飽肚野，又想有D飯氣落肚，所以要了個咖哩豬扒飯，同埋雞肉炒烏冬，跟餐仲有碗麵豉湯添！ 論份量，呢度唔算大碟，不過镬氣搭夠，因為佢係落完柯打即炒的！ 好似個烏冬咁，D烏冬索晒D醬汁味，雞肉嫩滑，略嫌配菜 (洋蔥，紅蘿蔔絲同埋椰菜) 多左D唧。個咖哩飯唔太辣，調較得幾好味，豬扒鬆化有咬口，仲有幾舊薯仔紅蘿蔔，如果D汁多D仲好送飯！呢間可以再番炒，下次試下佢D串燒同 SAKE 先得！…Read More

行過東海堂見到岩岩出爐，醒起老爸早幾日先講過話想食鮮奶撻，真係橋，今勻整定大家有食神！(點解當時諗唔起東海堂有鮮奶撻賣...) :) 睇睇牌佢仲要做緊買４送２，計計數先！一個＄８．５，而家＄３４有六個，除番開即係＄５一個咋喎，嘩，岩晒！回家後D鮮奶撻仲係熱的，急不及待即與父母開餐！個牛油皮好鬆化，又唔膩。主角鮮奶餡 (係用澳洲 3.6 牛乳製造) 則口感香滑，味道不慍不火充滿奶香又唔羶。 整體黎講真係性價比，加上熱辣辣出爐再加分，賣 $5 一個真係抵食又好食。…Read More

兒時食過的大蛋糕，顧名思義 SIZE 真係好大個，小朋友如果可以一人食晒，真係超勁！ 最經典的製作模樣就係上有瓜子片，底有蓮蓉餡，仲有一塊紙黏著 (細個成日忘記先搣開塊底紙，次次都會咬了一口紙才恍然！)。說真的，而家好少餅舖會出呢種大蛋糕，就算有，底下都沒有那像 "BINGO" 和海底撈月的蓮蓉餡。早幾日偶爾行過蓮香樓，見到有呢款大蛋糕，不得不買回家緬懷一番。:)獨立袋裝，有膠紙封口，時代變遷也要與時並進講究衛生。個袋子是透明膠袋，上以大紅色印出店名等資料，沒有多加的設計和誇飾，一切如昔的規矩踏實！雙手捧著這大蛋糕，兒時往事及舊香港情懷登時湧上心頭。:) 蛋糕溫度仍然微暖，瓜子不致 "UN" 牙，與軟熟的蛋糕質感相映成趣。吃著吃著，最最最期待的一刻終於來臨，就係：快要食到最底下的蓮蓉了！ 可是，我又係一貫的大頭蝦，要咬了一忽的底紙才恍然食前沒有將之搣走......口裡食著這大蛋糕，不變的是那種溫熱人情味，以及食者老是忘了的習慣。…Read More

喺面書度睇到雜誌報導，話 MOS Burger 為慶祝 11 周年，於 18/10 至 21/10 一連四天，吉列八爪魚漢堡只賣 $13，睇片都已經流口水！之前我只係食過佢嘅黑醋雞包，如今有八爪魚堡，真係岩晒我呢個魷魚控，嘻嘻！今日下午就速速動身去食。Tea Time 唔太多人，都算唔駛排隊唔駛等，同埋易搵位。我要左一個吉列八爪魚漢堡 (一心黎食就係為左佢)，另外加$20 配餐，包括：熱咖啡，同埋炸南瓜薯餅。俾完錢拎住個號碼牌就埋位，坐住等食！約5分鐘左右，職員就將個餐捧來了，開餐！拎上手個包係微暖嘅，而包裝紙就有官方貼紙封住，幾衛生。 打開一睇，咦，咁少椰菜絲嘅？ (雖不至於雜誌入面條 PROMO VIDEO 成座山咁高…但都未至於少到一茶匙左右呱！……) 除左椰菜絲失蹤，連VIDEO 入面提到嘅”南蠻燒汁”都失蹤左囉！ 我手中呢個包，丁點啡色醬 (南蠻燒汁) 都冇，極其量只有少許，係真係少許白色醬 (沙律醬) 囉，伏味勁濃！……至於內餡主角：塊吉列八爪魚漢堡，外皮幾暗色加 ”火農”，而且同內餡的食材”甩離”嘅，睇怕怇都已經炸左一定時間吧！…入面嘅八爪魚粒的確大大粒，而份量不過不失，不過就冇乜味囉…話晒，個包減左價都要成 $13 一個，咁樣樣算唔算偷功減料呀？！……唉，成個餐叫做安慰D嘅，就係個南瓜薯餅，多餡香甜。其實，MOS BURGER 不嬲D包都偏貴，SIZE 比麥記細個，而且要另外加錢先有野飲、先配到一個餐 (今日，我堂食嘅 30 分鐘入面，已親眼見證左有 3 位顧客以為職員收多佢錢；事緣佢地估唔到原來一個包成廿幾蚊咁貴，仲要係散嗌價，要額外加錢先有小食+野飲) ；可唔可以做好少少？俾得呢個價錢食個包 / 食個餐，客人都想食到性價比嘅食物囉！ 我諗，我都係要歇一排先會再食 MOS BURGER………Read More

食過阿華田和焙茶系列，尤其前者簡直齒頰留香！超群今期又有新攪作，就係新嘅士多啤梨系列，今次媽媽買來士多啤梨芝士蛋糕 ($30)，另外要多兩個紫薯紙包蛋糕 (每個 $13)。***今次冇出黃金糕，有D失望！好似之前一樣，蛋糕不太甜，好軟熟。不過士多啤梨好似同芝士唔太夾，我覺得唔太吸引！反而個紫薯紙包蛋糕有D瞄頭，甚具水準，唔太甜但充滿鮮甜的紫薯味，輕怡愜意。食物方面超群真的不賴，睇埋個蛋糕盒設計又見出佢好體貼顧客！超群的紙盒幾有趣，驟看像其他品牌的揭蓋，但它細心之處就係正面位置有一個die cut懾入位，將兩隻 "耳仔" 懾入，拎起上黎又好似穩陣D喎。…Read More

Movenpick 雪糕好好食，你又試過佢D咖啡未？喺 BreadTalk 買麵包，無意中見到個 promo：加錢可以有杯 Movenpick 咖啡。咦，我又真係未飲過呢個牌子的咖啡喎，反正全日放蚊，的確要來番一杯 "回魂啡" 叉叉電，一試無妨！咪住，唔好妹仔大過主人婆，先講講個南瓜方包先！麵包內有南瓜籽同埋少連紅蘿蔔粒，夠晒健康！味道唔太重牛油味，輕輕的南瓜清新遍滿整塊包中。至於杯咖啡，就像去一般西餐廳柯打的即磨咖啡，香濃苦澀有齊。我反而歡喜它的外賣袋子，躡埋包糖和攪攪棒，抽住手挽咁樣拎，十分到位！(唔似連鎖果D，要自己拎塊紙皮套上來隔熱；兩杯或以上先有一個紙抽，難拎之餘隻手唔可以騰空地拎其他物件！)…Read More

近排推仲嘅 "平靚正拉上補下" 之選，莫過於大家樂嘅雞扒 / 炸豬扒湯烏冬！點解？因為佢大大碗，熱辣辣，湯底入味唔膩又夠飽，連餐飲都係 $27 咋！ (有 COUPON 再減 $2) 手上有 COUPON，佢甫推出不日之間，我已經試晒兩款！首先講炸雞扒烏冬：大大塊的雞扒，醃得勁入味！味道好似台灣夜市果種，令人食完一啖好想快D食第二啖！雞扒濃香剛剛同湯烏冬一凹一凸，味道好夾！配料有椰菜，黑木耳，紅蘿蔔絲，仲有日式太陽魚肉片添！至於炸豬扒湯烏冬：又係大大碗，豬扒則是吉列款，炸漿厚薄適中，肉質彈牙，醃料方面猜雞扒咁重手！佢仲附有沙律醬俾你點黎食！配菜方面同雞扒一樣！WEEKDAY 多野做要 LATE LUNCH？不妨等 2:30 下午茶時段，喺燒味鴨瀨之外的另一飽肚選擇！…Read More

十五，難得父母主動說跟我食齋，仲叫我帶佢地去舊公司後街那間；又好，難得你地肯 "出城"，一於 TEA TIME 三人行去啦！閒日下午茶時段冇乜人，輕易搵到位，鐘意點坐都得！TEA TIME 黎講這裡餐牌入面都算好多選擇，而且凍飲唔駛加錢之餘仲 FREE 加大！真係好抵！睇完一輪媽媽揀了超級火腿奄列餐拼多士！我和爸爸要了雜菌時蔬酸辣淮山麵餐，跟奄列多士。嘩，個超級奄列真係唔可以睇少......加埋我和爸爸果D，真係食唔晒要打包回家！(*PS：晚上將呢D蛋用黎炒飯，份量之多簡直綽綽有餘！) 食完結帳離開，我和媽媽仲抽了 "靜思語" 添！…Read More

睇面書 promo 見到 "＄１１包類" 又多個選擇，佢就係呢個牛油果芝士炸雞包！唔記得幾耐之前推出過，只記得味道唔錯，今次再推梗係要捧場！柯打左等左一陣就有得食。咦，今次有d唔同，就係個包皮唔係 "足球型" 果種軟包，而係豬柳漢堡果隻乾身包！不過成個包都好 match，牛油果同炸雞好夾，仲加多塊芝士添，整體味道唔錯。話時話如果Ｄ牛油果醬可以再多Ｄ就好啦！牛油果輕怡健康，其實呢款包，可以作長期銷售，整埋套餐款式都得！…Read More

突然好想食湯丸，途經翠苑，見都好耐冇食過糖水，不如入去食碗啦，仲可以加湯丸添！本來都冇咩期望，因之前堂食經驗中伏幾次，除左唔同地區分店價錢唔同之外 (呢方面十足十3第二D大牌連鎖食肆咁)，食物水準方面都覺得翠苑名過其實，今時今日的翠苑實在不敢恭維……不過見附近又冇其他糖水舖，不如俾多次 "機會" 佢啦！如是者我一入去，唉，又係一貫的廁所味 (唔知點解銅鑼灣、北角書局街、北角北角道分店，都總係有陣廁所味，UP濕味和霉味？！…定還是所有翠苑都係咁呢？！)。我要了一碗熱的合桃糊 ($18)，加芝麻湯丸！呢度D湯丸係加 2 粒的 (+$8)。味道方面，糖水本身唔太甜，合桃味欠奉。湯丸皮冇味 (連麵粉味都冇？！)也唔太煙韌、冇咬口；D芝麻餡又係冇乜味的……可能岩唔太好甜人士吧！(笑了！~連基本的食材味都冇……) 又伏了！睇黎，翠苑暫時都仲未可以平反到...喺我個 FOOD LIST 入面的黑名單位置......…Read More

見有 STARBUCKS COUPON (FREE DRINK)，不如去食野兼換埋月餅都好喎！食物黎講，媽媽對 STARBUCKS 的 CAKE 尤其鍾愛，細細件好精緻又唔太甜；而我就鍾情它的芝士菠菜撻！去到就近一間，咦，仲有芝士菠菜撻喎 (未必間間都有)，於是問媽媽想食咩，媽媽睇中左開心果紅莓蛋糕，OK，再用券換埋 GREEN TEA LATTE，等左一陣就開餐。熱辣辣的芝士菠菜撻，點唔點茄汁都好好食，芝士早已與菠菜混和，個撻皮有清香牛油味，口感豐富。呷一口甘香的抹茶，真係偷得浮生半日閒！至於件開心果紅莓蛋糕，賣相一流之餘食落唔太甜，蛋糕質地夠輕軟。咁岩今天是七夕，食完過對面球場行左個圈，因為有七夕嘉年華舉行。行行下好似落雨，於是就和媽媽設上樓玩月餅，呀唔係，應該係玩月餅盒燈籠先岩！我覺得今年 STARBUCKS 的月餅盒設計幾靚，而且仲可以變成投影燈添！設計上都好 USER FRIENDLY，拆盒換上預先準備的燈連電池底板，開啟掣後就可以投射兔仔，星星，或星巴克字樣出來。名副其實有得食又有得玩！月餅成長條形，一盒 6 個，有 3 款味道 (每個味道有 2 個月餅)，分別係：奶皇，伯爵茶，咖啡焦糖流心！三款都唔太甜，比之前出過的純咖啡味 (有點苦澀) 更好食。最驚喜反而係伯爵茶味，香滑馥郁，好 ELEGANT。STARBUCKS 今年月餅禮盒，整體上味覺，視覺，成個造型的感覺都好好！…Read More

小二經歷人生第一次搬屋，記得初初裝修時，由於新屋內烏煙瘴氣，我們姐弟三人一起床後便會走出屋外天井位置空地坐，玩，食......那時候女麻女麻準會買定樓下某舊式老牌茶餐廳的公司會意粉俾我食。那種蕃茄汁底，那種食到一咀都係污糟貓，那種滿載童年回憶的味道而家好難食得番啦！......某夜，一個人由灣仔尾行落老銅搵食，行至英皇，突然醒起都好耐冇食過華星冰室了，不如就去食啦！當時人唔多，所以有卡位坐。由於唔係太想食常餐果類食物，赫見有蕃茄會意粉 (單拼$44，雙拼$47，仲要唔跟野飲)......雖然貴，反正坐左入黎，試一次咁多啦！打下機睇下面書，等左一陣，就開餐了！呢度嘅會意粉同餸料係分開上的！煎雙蛋自己一碟，而碟意粉就有蔥段和洋蔥在上，蕃茄原個切件，似係舊式茶仔果種。唔知，佢個蕃茄汁係咪自己調較架呢？眼前溫熱的意粉，似曾相識，我急不及待叉一注意粉入口，嗯，係呢種味呀！就係細個女麻女麻外賣俾我食果種蕃茄會意粉嘅味呀！個蕃茄汁不慍不火，酸甜度適中，不會過份黏稠，食著食著，充滿親切感。邊食著不無感動......更令我憶起昔日與祖母的日常。…Read More

唔知佢幾時裝修，又唔知佢已裝修完。有晚經過想食海皇，行過龍之餘，裝修後又真係靚仔左好多，初時認佢唔出，仲以為已執笠 / 搬舖添...…裝修後更見明亮，樓底又高，感覺光鮮左新潮左乾淨整潔左好多！食物依然多款，睇左一輪最後我都係食個夜貓套餐，$30 有粥有炒麵有燒賣 (由本來的豬肉燒賣，變左魚肉燒賣。以及由本來得一粒，但因冇左韮菜煎餃而變左 4 粒)，岩晒心多的我。唔好睇佢好似份量細細，其實食落都好飽！…Read More

裝修重開，格局 HIGH END 左，但睇勻全 MENU ，其實全部都加左價！...明嘅...不過貴左之餘，係咪都應該俾番少少誠意，至少，更新下餐牌，整D新款式都好啦。望住個餐牌真係冇咩想食，於是就揀了個 "最平" 的餐---吞拿魚碎蛋豬仔包餐，連餐飲 $27......(諷刺，已是全店最平的一款餐！)啡色的吞拿魚，得幾粒 (約 3 至 4 粒左右)，D碎蛋又唔多。餡料方面如此，咁個包呢？我本身唔太喜歡食豬包，因為又乾又硬，此包遇上此餡，真係......成個餐，像白烚食物，冇味的！份量又細件頭喎，杯奶茶又澀......呢次經驗我學到：唔抱有期望，就算失望都唔會太大！......…Read More