chanheii's Profile

星期六夜晚係尖沙咀搵食，諗住好難搵位。見呢間門口嘅人都book晒位，本來都打定輸數，點知好好彩有位！入到去裝修真係好日本，彷彿去咗轉黑門市場一睇餐牌，就決定要叫我最鍾意食嘅蟹膏甲鑼燒，我係叫咗有海膽嗰款，因為好少見出面餐廳有呢個配搭。呢度啲侍應好識做，系Siu之前擺低俾我哋影張相，然後再攞去燒。暫時係我喺香港食過最好食嘅甲羅燒超級香，配埋塊梳打餅，一流。另外我哋再叫咗刺身飯同埋卷物，刺身都幾新鮮，不過拍份量偏小。整體來講唔錯…Read More

石門商場好多野食，多到眼花撩亂。星期日男朋友話想食點心，而沙田區之前係新城市有間點心鋪，佢執埋之後以為冇晒專食點心嘅鋪（除咗酒樓）已經諗住要出旺角/太子搵食。點知google發現原來石門就有間！老實講，本身對於良心鋪頭冇咩期望，好多都名過其實，點知呢間又幾有驚喜！點心種類雖然唔係好多，估唔到係佢啲份量咁多！燒賣蝦餃大大粒流沙包又真係好流！！仲有個蒜茸蒸蝦荷葉飯好香我地仲叫咗個煎腸粉，佢係所有點心最先黎嘅，但食到最後仲係脆卜卜好香蝦味。美中不足係個黑椒金錢肚，味通普通得黎都有啲貴。…Read More

平時好少出佐敦，今日難得出到嚟梗係要搵好嘢食。舖頭位置係一條好唔起眼嘅巷到，而佢個門面都非常日本。男朋友話見到覺得呢間拉麵好似幾吸引，但係個人來講幾鍾意食重口味野，平時基本上係食沾麵多過拉麵，見到佢嘅湯底全部都係白雪雪，一直都冇咩期望😂我哋兩個人叫咗一碗金鶴雞白湯沾面同埋一碗蟹肉拉麵。先講過沾麵，望住啲湯，吖！又估佢唔到係咁濃郁嘅雞味，超級香。除咗兩塊叉燒之外，佢另外再有兩塊雞胸，肉質好嫩，唔似平時出面食嘅好「鞋」雞胸！🤪再嚟就係個蟹肉拉麵，本身想要有櫻花蝦嗰款，不過店員推介蟹肉咁就信佢啦！而佢蟹肉份量唔少，而且湯底亦有蟹味，不過個人來講就鍾意沾麵多啲喇！😋…Read More

見到咁多人推呢間餐廳，經過新城市就好想去試吓。閒日嘅夜晚7:00，未係好多人等位，入到去邊位都算坐得幾舒服。見到餐牌好似好多嘢都好好食，但係最後都係決定叫Aburi-en 豚肉丼同埋宮崎和牛芝士黑咖喱飯！豚肉丼好快就到左，個樣同埋我期望嘅有啲出入，但係一聞到佢，有陣好熟悉嘅味道，係好似屋企煮飯會有嘅肉味😅而且食落又冇想像中咁香，都幾失望。之後咖喱飯都到咗，望落去都幾豐富，而且薯條熱辣辣唔錯。到戲肉，啲咖喱唔係好夠熱，味道就係平時食嘅冇咩分別，係咖哩黑色😂而啲牛都OK嘅。…Read More

未去到咖喱屋，一踏入條街已經聞到好香嘅咖喱味。應該有成年冇嚟過食飯，記得之前一到放飯時間，附近啲學生都會坐滿晒！但係而家就有啲冷清了。唔肯定佢有冇加到價，不過一個lunch set來講都仲係好抵食！ $45包嘢飲同湯仲有飯、薄餅同埋薯條食，一次過滿足晒三個願望記得之前佢啲牛脷唔錯，所以今日決定照舊。果然冇令我失望，牛脷好「淋」跟住咖喱又好香，今日食嘅時候薄餅唔會話好燶正！如果硬係要講美中不足，覺得今日咖喱唔夠熱，不過呢一個價錢有齊晒咁多嘢食覺得已經好抵下次嚟就想試吓佢個咖喱羊！…Read More

男朋友之前係大埔返工，佢同啲同事成日都叫蕃滿門外賣，佢成日都同我講超食，叫我一定要試。今日終於有機會啦！我本身係個芝士控，見到有蕃茄芝士湯米線就梗係試試佢啦，我就叫咗餃子做餸。佢餃子份量都算多，但味就普通啦。之後戲肉就嚟啦，最期待嘅蕃茄湯，再加芝士係上面！！！極邪惡，蕃茄味其實唔係話好出，但係加埋芝士冇得輸一啖蕃茄一啖芝士，令到個湯唔係好稀，不錯。不過唔知係味溝埋咗芝士，茄湯陣味唔夠重，但整體而言都可接受。不過到埋單時先見到要加一，承惠$61，都唔平。…Read More

同朋友出咗尖沙咀，就搵附近有咩食，見到呢間好多好評，所以試下。嚟到咁啱就tea time，一睇menu覺得好抵食！我就叫咗雞翼雞絲湯金邊粉、青檸梳打，另外再同朋友share咗小食，炸豬皮同炸蝦卷唔洗等好耐，啲野就陸續黎到青檸梳打拎咗個碗咁嘅杯裝住好cute!之後到個麵，以為下午茶份量少啲啦，點知又唔係一試個湯，好濃好夠味，正呀！！！下午茶仲有個餐係可以有齊晒3碗迷你麵，試晒唔同餸，下次一定試！最後就要講下小食，炸豬皮最怕有陣「益」味，佢就唔會，又脆卜卜。到個蝦卷都好正，外面層炸薯都好食又香，最重要係唔會食到佢口油淋淋！…Read More

疫情日日過百，真係諗到都驚呀！😫想食好野都係叫外賣安心啲。同事話之前經過過呢間鋪，見好多人食，咁啱deliveroo 又見到有，就決定一齊叫lunch！我就叫咗個水煮魚菜飯，再加咗個雞絲粉皮，本身以為額外加雞絲粉皮$15，唔會好大兜。嘢食一到，咦又唔少喎！😮仲要好食！到戲肉，就係個水煮魚菜飯！先講個飯，覺得可以多啲菜，不過食水煮魚配菜飯非常夾，感覺上仲好似可以均衡飲食啲。😋至於個魚，開頭會擔心東北菜嘅水煮魚會唔會唔同，或者會唔會好辣，點知都好好味！味道唔會太辣，分量幾好，啲魚幾滑仲有少少薯粉！😻😻…Read More

早排揸車經過先知呢到開左間泰國嘢，裝修幾靚幾eye catching。但係呢個location 都幾唔起眼！可能位置有啲偏僻，唔係專登行入嚟都真係唔覺眼，所以lunch hour 人唔多！我哋叫咗一個牛肉船麵同埋豬手飯個麵湯底超級濃同香呀仲有幾舊炸豬皮好好食，而個麵我就叫左河粉，佢隻粉同平時河粉唔同，係闊身啲，不過我就覺得淋左啲，美中不足啦，會為個湯再過黎，下次應該叫金邊粉！個豬手飯就大大份，仲叫咗個紅咖喱雞翼，唔錯！…Read More

KFC 話就話主打食炸雞，不過個人認為，佢其他嘢好食過炸雞，例如蘑菇飯、葡撻同埋鬆餅。而佢嘅下午茶，除咗「抵食」兩個字之外，諗唔到點形容， 20幾蚊包埋一隻雞同埋飯仲有葡撻。但係我覺得，kfc 食物水準比較飄忽，包括新港城呢間分店。例如今日叫咗呢個葡撻，凍冰冰都唔好食嘅。跟住今日呢個蘑菇飯，本身汁唔多，之後佢啲飯又好濕咁，一pat pat嘅...所以食咗三份一就冇食。反而今日食過蜜糖鬆餅幾好食，佢個面已經睇得到有好多蜜糖，不過真係睇彩數，先買到一個咁多蜜糖嘅鬆餅…Read More

經過路德圍諗住好多嘢食，但係原來佢晏晝先開始旺，朝早嘅路德圍死城一樣，想搵間餐廳食下都唔多選擇。咁啱見到呢間平時夜市好旺嘅泰國菜，原來佢都有早餐㗎喎，跟住就入咗去食啦。見佢有一個餐係有埋蝦餅，話跟一碗細粉，盛惠$35。首先多士、蛋同埋蝦餅嚟到，佢個多士唔係平時啲方包烘底，本身塊包都幾好食。等咗好耐，碗粉終於到，開頭我以為係細細碗嘅粉，點知個份量同平時一個公仔麵差唔多（可能仲多啲添），湯底幾好食，而且都好足料，食完飽到喊…Read More

旺角除咗人多車多，最多就緊係野食係附近打完邊爐，就當然要一條龍食埋糖水先返屋企架啦！廣華街呢頭有幾間糖水舖，全部都超多人排隊我地4個人食，就揀咗間最少人嘅（咁當然都要等位啦）之後叫咗呢個芋圓，平時都係食開凍嘅西米露，真係第一次食熱嘅！有啲驚喜！首先要講吓佢真係超級足料，而佢嘅芋圓，質地唔會太粉，好「煙銀」，番薯同埋芋頭嘅味好出。而且佢入面仲有啲涼粉同埋西米，又唔會太甜，好食！食完之後即刻成個人暖笠笠呀！見到好多人叫窩夫嚟食，如果下次再嚟都想試吓。…Read More

除咗大埔超級城個邊，近大埔火車站個邊其實都唔少野食！呢間居酒屋唔推薦唔得！單睇裝修已可以呃住自己去咗轉日本！入面位唔多，但好多選擇，我地兩個人叫咗一個炒麵、一份明太子芝士玉子燒同埋一份串燒牛舌。先講炒麵，炒得好乾身，麵就好好食，不過雞肉就有啲「鞋」身，俾佢80分啦。到明太子芝士玉子燒，呢個不得了，超正呀！入面芝士真係拉絲㗎！加埋明太子醬，唔會太「流」，份量好夠！至於個牛舌都係正，好厚但好夠淋，不過就貴咗啲$58得4舊。…Read More

一田減價掃完貨就梗係要去醫肚啦！但係商場太多人，所以都係去周圍搵食算數。見到呢間台灣野唔多人等位，但價錢唔貴，都係$40幾$50仲要包埋台式嘢飲，好似幾抵，所以就食呢間。入到去啲位有啲迫，不過二人限聚令，影響都唔大，但係如果多幾個人應該就坐得唔太舒服。因為我唔係好肚餓，所以叫咗個米線，再加咗個炸豆腐小食。米線就咁睇好似有啲頹，但係個湯底，又出奇地好食喎！而個炸豆腐就熱辣辣，再加埋佢個汁，不得了下次嚟要叫多年啲佢啲炸嘢，講完都已經掛住個汁…Read More

個人來講，都好鍾意食東南亞菜，越南嘢當然就係其中之一啦。見到呢間越南菜好似大推牛骨湯底咁，咁就想試試佢啦。我就揀咗最大路嘅生牛肉湯河加一杯凍檸茶。個面嚟到，超級大碗，一見到就知道唔會食得晒。佢仲有超多芽菜。既然推薦得個湯底，第一啖梗係咩都唔落就飲湯啦，不過一飲覺得比想像中淡（可能我食得太重口味）不過lunch來講，佢份量都對得住價錢嘅。而佢杯凍檸茶，片檸檬係用青檸，比平時港式茶餐廳嘅檸茶好飲，有一陣青檸嘅香味。…Read More