a0201776's Profile

本身抱住一定嘅期望去食佢酸辣湯麵+窩貼+豆漿，點知難食到…麵條生硬，酸辣湯稀…惟一安慰係杯豆漿同窩貼正常，但呢啲配角佔比低，主食唔掂係挽救唔到大局嘅。喺西九龍中心美食如雲嘅地方，勸大家避開呢間野。…Read More

三色魚生丼好出色，$98一份有三文魚、帶子同海膽，份量足，味道好（尤其三文魚真係勁厚切），超抵食！同場加映：芝士玉子燒、冷麵、芒果三文魚壽司同埋普通三文魚壽司。整體嚟講，味道佳！環境同服務方面都相當唔錯，一入鋪頭會同你講今晚有邊啲野已經售罄，俾你再次選擇嘅機會（唔排除部分人係為某啲菜式而光顧，無嘅話就轉場）。餐廳乾淨企理，枱與枱之間空間感足，唔會太逼。惟一一項缺點係茶味太淡，少少似同一個茶膽沖咗10次以上嘅感覺，但總括而言：喺銅鑼灣日本餐廳嚟講，都算高質，值得推薦！…Read More

石塘咀開左一間螺絲粉，未試過喺香港食螺絲粉嘅我當然要一試啦！去到門口見到大大個招牌寫住好螺記，仲要用紅色為門店主色，未食當堂都sharp醒哂！即刻對佢抱有好大期望！睇左一陣餐牌，決定試下佢個招牌鍋燒螺絲粉，結果大失所望......首先，小辣但淨係feel到咸味、無辣味；其次，鍋燒好似肥豬肉咁，口感非常之一般；再者，$52一碗螺絲粉但唔包野飲，性價比低。以上幾個原因，都令我對呢間餐廳蓋上一個Not Recommended嘅印章。…Read More

秘魯係一個神秘嘅國度，秘魯菜更加係從未食過，因此品嚐之前好興奮好期待。但步出餐廳嗰下覺得失望，因為整體嚟講，食物味道普通、價錢略貴；成餐飯入面令我最驚喜嘅居然唔係食物，而係餐廳嘅佈置！餐廳佈置十分有特色，牆身嘅圖畫似係油晝，直接用顏料油上去，畫中所描述嘅環境正正係我最嚮往嘅黃沙大漠！好有中國敦煌嘅既視感！講返食物，燒雞味道正路、無太大驚喜；芝士棒奶香不足，且份量太少；另外仲叫咗個秘魯特色餡餅，食落味道似中式糖糕，唔可以講係難食，但同好食一詞都相距甚遠。總結：呢間餐廳係典型嘅糖衣炮彈，名目係秘魯菜、佈置亦都相當養眼，但係就野食而言，實在係中人之姿；性價比亦低，故不推薦。…Read More

位於西環石塘咀嘅一間新開嘅譚仔雲南米線，目前已經食過2次；而2次都係平日午市嚟幫襯，第一印象就係門面好光鮮、開揚、乾淨企理；不過有一個好大嘅缺點就係：人手嚴重嚴重不足，好多時招手招5分鐘都無侍應理你，甚至有食客要走到收銀落order......雖然係午市時間，但都唔可以忽視食客忽視得咁誇張架.....另外，出餐速度都慢過其他譚仔分店好多，我第二次食，落單至上菜足足等左半小時，但一般上班族食飯時間邊任得你咁樣消耗法？所以，歸根究底都係人手太過唔夠，希望管理層正視下呢個問題！講完衰野到講下啲好野先~同其他分店相比，食物質素明顯高一班，份量足、米線硬度適中、辣度符合標準(唔會話嗌3小辣，跟住變左小辣咁款)。同埋有一樣額外嘅加分位，就係擺盤做得非常好！廚房員工雖然忙碌，但都好有心機地將碗出品米線做得好好睇睇，真真正正嘅「睇得又食得」！整體而言，係一間敗絮其外、金玉其中嘅譚仔分店，如果大家比較多時間，都可以嚟試下嘅；但若果你想限制食飯時間喺一小時甚至更短，我強烈不建議你嚟食。…Read More

今時今日想喺香港食碗$2x嘅麵，一定無可能？唔係！2023年都仲有$2x嘅魚蛋河、雲吞麵，呢個價錢其實真係無野可以彈㗎啦，基本上只要份量唔係細到2啖食完、啲味道唔係咸到入唔到口嘅話，已經係無敵！我當日係收工，大約6:15pm入去食，食客唔算多(5成左右)；環境四正企理；麵檔位置靠近皇后大道西，煮麵過程一覽無遺，透明度極高。出品快，落單唔使5分鐘即到。味道不過不失，正常雲吞正常魚蛋；不過雖然講到咁好，間鋪都有少少野唔係咁理想：就係啲阿姐幾有性格，如果你想問佢攞杯水，佢係唔會show你，所以：你一係自己出去拎、一係就唔好飲。整體而言，肥仔記麵家係一家平到爆嘅抵食中式粉麵檔，追求價錢大於質素嘅朋友可以一試！喺今日日本拉麵郁下就要100蚊嘅市道，對比返肥仔記嘅價單，我覺得真係要多多支持返本地麵食！…Read More

一早已聽聞七姊妹道有間幾好食嘅印度菜，終於有機會一試。因為比較少食印度菜嘅關係，自然睇餐牌嘅時間會比平常多啲(但事實上都只係睇咗5分鐘左右，而當時餐廳亦唔算多人)但嗰位疑似老闆嘅店員好似好唔耐煩，催我哋落單不特止，仲要串我哋：睇咁耐原來最後都係嗌返comboset dinner for 2，我心諗：關你咩事……佢嘅態度真係有少少offensive，好似取笑緊啲食客咁。不過，只係得佢有問題，另一位男waiter嘅服務態度非常好，會喺上菜前後問一問你，面帶笑容咁！食物方面，combo set for 2有：咖喱角、香燒雞、瑪沙拉羊及什菜咖喱、印度烤餅、印度炒飯同飲品2杯；全部食物味道都唔錯，佢個咖喱角好大件，入面夾咗一啲秘製餡料，唔會太油膩、香燒雞味道有少少似連鎖快餐店同款燒雞，但印度餐廳嘅份量大得多！至於瑪沙拉羊及什菜咖喱，佢係2款唔同嘅咖喱，個人覺得什菜咖喱嘅味道更加似平時嘅港式咖喱；而瑪沙拉羊嘅咖喱就深色水啲、無咩咖喱味。飲品方面嗌咗杯熱檸茶，味道同港式茶記相似，唔知係咪坐落香港太耐，部分食物同飲品嘅味道走向都偏「港化」。最後講埋環境，門口係圓拱門型，內籠燈光昏暗，但尚算整潔，啲佈置令到成間餐廳個氣氛幾有中古風情。整體嚟講，係一間值得嘗試嘅印度餐廳。…Read More

位處油麻地東方街城景國際入面嘅東南亞餐廳Amazing，食過之後真係覺得幾amazing！首先講講環境，餐廳採用日光透入嘅設計風格，俾人一種既自然又清爽嘅感覺，令鍾意光猛嘅我頓時對呢間餐廳產生咗一份好感；另外，餐廳亦加入咗唔少綠色元素，雖然未必係真植物，但係喺石屎森林入面搵到一絲森林元素都唔容易！食物方面，我嗌咗一份午市套餐：大蝦冬蔭功配海南雞飯，味道相當唔錯，個冬蔭功湯有辣味有鮮味，最得意係佢個大頭蝦浸入湯身，蝦頭連蝦腳外露，令個湯嘅賣相生色不少！！而個海南雞飯嘅雞肉都好嫩滑，份量亦唔少，加埋個「擸擸令」嘅油飯同甜品仔(應該係泰式糕點)，成個lunch真係令人好滿足！Juicy！不過亦有美中不足嘅地方：服務效率奇劣，上次嚟食嘅時候埋單時間等太耐，要催幾次先成功埋到單；而今次就係催佢上菜，又係催咗2次先嚟到，因此溫馨提示：如果趕時間就唔好嚟食，因為你預咗會等到燥底。…Read More

一個人食午飯嘅好處就係唔使等位， 一入餐廳就有位。不過餐廳空間極細，一張張圓枱排到密麻麻，預左唔會坐得舒服㗎喇，但求食物質素可以提升返個觀感啦！我叫咗一碗香茅豬扒湯檬，加$1有一杯熱飲，總共盛惠$54。最令人驚喜嘅係：豬扒係新鮮炸起嘅！送到入口仍然熱辣辣！呢一點非常值得讚許，因為時下好多餐廳嘅食材都係煮好哂攤喺度，最多烘返熱佢咁，好少會即叫即炸(仲要係中午繁忙時間)；份量方面，豬扒份量正常，但個檬粉份量略嫌少咗啲，好肚餓嘅朋友可以考慮加底/加小食。服務嚟講都算唔錯，繁忙時段做到踢哂腳都可以保持有禮、殷勤嘅態度，喺今時今日嘅香港嚟講算係難得㗎！…Read More

呢一間日式外賣店坐落喺西營盤皇后大道西，附近食肆林立嘅惡劣競爭環境下，佢都可以保持一貫嘅客量，證明出品唔錯！夏日天口熱，加上食店喺公司附近，所以最近我成日落去買外賣壽司食，喺食過10次以上嘅經驗，我絕對有信心講佢嘅食物質素係穩定地好食！我多數買佢$30/ 6件加州卷，加州卷嚟講算大件，而且餡料有些少唔同，有玉子餡加州卷；有乳酪餡加州卷；亦有吞拿魚餡加州卷；而且佢仲有分有沙律醬同無沙律醬，真係十分細心！三款我都食過，當中最吸引嘅就係乳酪餡加州卷，畢竟呢個配搭較少見，而且佢隻乳酪係難得嘅好食，同加州卷意外地夾！另外，佢亦有手卷同其他丼飯可供選購，細細嘅鋪頭賣嘅野一啲都唔少，加上佢價錢唔貴，喺西營盤嘅地段嚟講算中等價格，所以呢間日式外賣店咁受歡迎係有佢嘅道理嘅！…Read More

公眾假期下午茶時間(16:30)，餐廳唔算多人，可能因為沙角商場太多食肆，競爭太大。我地一行二人嗌咗3個餐，分別係：魚生飯、壽司拼盤同埋叉燒拉麵。先講魚生飯：份量好足，賣相好靚！味道正常，對得住佢$49嘅價格；壽司拼盤($33)就差啲，明顯係雪咗一段時間，毫無新鮮味，只可醫肚不可談論味道；最後叉燒拉麵($35)反而有驚喜，佢個叉燒味道淋甜，而湯底有少少咸味，拉麵硬度啱啱好。每份下午茶都係配一杯熱飲/冰紅茶/味噌湯，我地嗌咗2杯熱奶茶同1杯冰紅茶，熱奶茶奶味唔夠；冰紅茶就係康師傅罐裝飲品。服務方面十分良好，侍應反應迅速、殷勤。環境方面亦算中上，四正闊落，相信就算多人嘅時間都唔會話坐得好逼gip。呢一類平民日式餐廳買少見少，大家行過不妨支持下~…Read More

雖然已經食過好多次，但原來而家先係第一次寫食評，呢間茶記算得上係北角嘅名牌，當中最聞名嘅就係瑞士雞脾。但因為我本身唔太好雞脾嘅關係，我多數叫四川麻辣雞翼，今晚亦不例外。佢個menu堪稱係全港最多字嘅menu，啲文字密質質，唔係講笑，淨係研究個餐牌都用咗10分鐘，首先揀咗set formula先，之後再跟返所屬英文字母去揀菜式，我今晚揀咗A(四川麻辣雞翼)+B(草莓吐司)+C(魚肉春卷米線)，麻辣雞翼有3隻，味道一如以往地掌握得好好，十分惹味；草莓吐司其實就係一塊多士加一盒仔草莓醬，好似早餐會食嘅野味道正常，叫做過下口癮咁；最後係真正醫肚嘅主食：魚肉春卷米線，魚肉春卷好大塊，唔咸有咬口，味道適中；但美中不足嘅係米線太淋......呢個Set盛惠$51，跟一杯熱飲，食物質素絕對對得住呢個價錢。環境方面中下，始終茶記一間，又有返咁上下歷史，觀感上一定會有啲殘舊同暗沉。相信食開茶記嘅朋友唔會好介意呢一點。大家如果嚟呢間餐廳食野，記得留意貼喺牆上嘅餐牌，因為佢嗰啲係追加項目，有小丸子、玉子燒等等嘅小食可供食客追加，價錢都好吸引，啱哂嫌唔夠飽嘅朋友！…Read More

西環大叔 $60 秘製沙拉一口肉優點：肉質細嫩、唔un；入味；外賣拎到返office仍然熱騰騰缺點：份量太少、$60唔包野飲(餐牌上夠膽寫奉送砵仔蒸飯lol，飯都叫做送，唔通要客人齋食餸？)總結：味道好，但性價比低，物非所值…Read More

喺油麻地做完嘢，又到搵嘢食嘅時間，經過一間日本餐廳，透過門外落地玻璃望到佢入面個環境四正企理，決定入去一試。Lunch set有唔同選擇，胃口好啲嘅朋友建議你哋揀A系列嘅餐單，因為佢除咗有一份主食之外，仲有一碟壽司跟，再加埋小食一碟同埋味噌湯一碗，一定令你飽到上心口！但由於我今日胃口麻麻，所以只係選擇咗B系列嘅角切魚生飯，飯入面有吞拿魚同三文魚嘅魚生粒粒，亦有少量玉子同青瓜嘅點綴，齋睇賣相都相當吸引！味道方面，不過不失，佢好在無魚生片嘅腥味，但同時略嫌唔夠鮮味。份量方面啱啱好，係普通女仔嘅份量。服務方面就差啲，中午收人加一服務費之餘，但連杯水都要客人自己去斟，水機仲要離客人進食區好遠，呢一點有待改善。…Read More

中午時份，西環一帶嘅食肆都唔算多人，所以餐廳之間嘅競爭都幾大，而我今日食嘅呢一間都應該好快會被淘汰。首先，我揀咗一碗香茅豬扒冬蔭功湯檬。冬蔭功個精粹在於湯底，但係呢一碗湯粉味道只係得中式嘅辣味，連丁點嘅泰式酸辣味都無......我極其量只可以叫呢一碗湯粉係豬扒辣檬，個湯底徒擔冬蔭功虛名。價錢方面，當時落單我已經問店員係咪免費配埋野飲，佢話係；而餐牌亦係咁寫。但到最後埋單都係加咗我$3，真係無言。惟一可取之處係環境算企理闊落，白色裝修令人耳目一新。但追求味道為主嘅朋友，就唔需要嚟呢一間食店了。…Read More