Jin's Profile

堂食終於放寬到12點喇！終於可以出返來食餐好既，今晚放工約左BB黎旺角一間勁多好評既燒肉放題。餓左咁耐，點都要食返餐好既！所以我地揀左最多$$既「店長推薦」——頂級澳洲和牛海鮮放題！全程都係掃碼ORDER，落單1分鐘第一樣野就到左——M8和牛牛板腱，M8和牛封門柳，極品小牛排。M8和牛牛板腱 (原味)我覺得係全場最正既單品，雪花均衡，每面燒20秒就剛好，食得出高級和牛既味道，質感鮮嫩，絕對唔係一般「食到飽」既放題貨色，點少少燒汁更惹味，用鹽調味就更突出原味。當然我地有ENCORE啦。車海老聽講呢度既蝦係招牌。既然放題我地就唔客氣咁狂點！果然佢啲蝦好大隻而且望落好飽滿。我地PREFER燒到佢外殼有少少燶，一隻蝦既蝦肉已有兩隻手指公既SIZE，彈牙不失鮮味，不過我都建議點鼓油食，鮮味會更突出。牡蠣要讚既係呢度既貝殼類都相當出色，當中有RAW既生蠔、有錫紙兜咁上既牛油廣島蠔肉，北海道帆立貝，前兩者蠔味都極重，生蠔燒完仲有陣海水既味道，好正，唯一SIZE唔算大。牛油本菇放題唔叫蔬菜？唔一定架。呢個牛油本菇好值得叫，牛油同菇本身就係PERFECT MATCH！而且一道菜兩種食法，可以喺個兜內加熱，又可以直接放喺網上燒，我就PREFER後者，有燒烤風味！呢個放題絕大多數ITEM都係無限追加，品種太多，本人會推薦以下幾款小食︰章魚小丸子、泡菜、枝豆。甜品有MOVENPICK雪糕，BB都好滿足！…Read More

之前其實都已經幫襯過間餐廳，食材新鮮，而且份量好大。叫左個最常見既鴛鴦鍋，一人揀一個自己中意食既湯底。個人好中意沙嗲湯底，味道非常濃郁，食材放落去一陣就吸曬湯底既味道。黑豚肉净係睇賣相就知道新鮮，食落入口即溶。四寶餃餡料非常飽滿，皮係薄到睇到入面既餡料，名正言順既皮薄餡靚。而且餛飩係鮮蝦餛飩黎，咬落去啖啖都係彈牙既蝦肉。 蟹子墨魚油炸鬼墨魚味道好重，加埋上面d蟹子食落口感好豐富。水魷魚好滑，好新鮮。而且而家只要like FB,就可以全單打8.8折，真係抵！…Read More

店鋪以簡約中式風格為主，成間舖比人一種乾净整齊既感覺，d檯凳亦都闊落既。點餐非常方便，除左一般既劃紙之外，仲可以scan佢個qr code點餐，有齊圖片價錢，會員仲有折扣優惠。口水雞菜式賣相精緻，而且份量適中。雞肉非常滑嫩，麻辣既味道又唔會完全蓋過原本雞肉既味道，而且即使小辣都食到麻既果種味道。招牌酸菜魚 用3種不同既酸菜熬製而成，如果叫小辣的話酸味有少少打過個辣味，不過呢d都係睇個人喜好。魚質嫩滑，而且仲去左骨，d菇同菜等配料都吸收曬個湯底既精華。冰粉 冰粉非常清爽滑溜，而且仲有股淡淡既菊花味。嫌味道淡既可以咬個提子乾，非常地夾。  …Read More

行過比個店面吸引，周圍都有恐龍既元素，同店名一樣，非常有趣。食物份量同恐龍既食量都差不多，非常大份。爆汁肥牛丼同吉野家差不多，連個味道都係差唔多。腐皮系列我地叫左黑松露帶子粒、鰻魚玉子燒絲、蔥吞拿拖羅蓉、名太子三文魚，腐皮非常清甜，令d飯粒都有少少甜既感覺。黑松露帶子粒既帶子係非常大粒，黑松露都係一d都唔吝嗇。鰻魚玉子燒絲鰻魚汁非常香，亦帶有少少甜味。蔥吞拿拖羅蓉d拖羅雖切左粒，但都食得出係好肥美。黃金魷魚飯糰飯糰有淡淡既washabi味，完全岩曬中意食washabi既我！魷魚切到一條條咁，口感非常特別。蟹膏飯糰一咬落去係好香好濃烈既蟹膏味，之後飯粒既香甜味慢慢滲出黎。總括而言，食物份量同恐龍既食量都差不多，非常大份，而食物質素都唔錯。另外值得一提既係，餐廳無座位，只能外賣或立食。  …Read More

係廟街附近的一條小巷發現到一間日本餐廳，覺得有d日本小店既特色，於是就留左係度食晚餐。吞拿魚海膽爆丼個丼飯配料非常豐富，有吞拿魚海膽吞拿魚玉子。海膽睇個色澤就知道係新鮮，食落有微微既海水味，完全唔苦。吞拿魚夠曬肥美。磯燒岩蠔生蠔上面係滿滿既芝士，拎去燒完之後有少少焦，果d先係最好食。生蠔非常新鮮，海水味較重。牛仔骨肉味濃郁，個汁甜甜地好開胃，而且非常入圍。清酒煮蜆清酒味道好濃郁，d 蜆完完全全索曬d清酒既味，略嫌有少少沙，不過其實都好難避免。…Read More

喺中環返左好多年工，最近一年先搬離此地，但依然掛住呢區既美食。話說中環美食選擇多，但價碼同地價成正比，要搵到CP值高既餐廳並唔易。近日同女友返來行下，發覺X華條街多左間幾有趣既茶餐廳。近年好多茶餐廳都愈來愈注重裝潢，但好多食物水準一般，好多都係得個樣！但呢間就完全唔同，係從內涵上convince到我。呢間野既舖位以前係一家佔地3層既餐廳酒吧，冇做後原址全部變成呢間茶餐廳，所以淨係講面積都大過人。懷舊得過份既裝修好似帶我返去80、90年代黃金時期既香港，倍感親切；更值得表揚既係連餐牌上所有食物都彷彿時光倒流咁，我可以食返果陣時周街都係、但依家近乎沒落既鼓油西餐。經典之一係果時好興既鐵板牛扒餐——女友叫左一份香煎西冷扒5成熟，厚切既西冷用鐵板上，Waiter會喺你面前淋黑椒汁，即時煙冒瀰漫，塊扒腍得來質感很好，濃郁既肉汁非常入到塊牛扒，肉香亦不俗，絕對高質過以前既扒X之王，薯條係用舊酒樓食到既扭紋粗薯條，炸得香脆可口。整體對得住個價錢。另一經典係小弟叫既肉絲炒面，同樣係用鐵板上！面餅炸到脆一脆，正！令我驚喜既係啲銀芽全部都搣得乾淨，呢點好多高級餐廳都做唔到。肉絲、冬菇、韮王等材料都好傳統，如果有芥辣醬就Perfect。要講懷舊，呢度既飲品更有Feel。我試下嗌左杯「薄荷朱古力」相信依家好少地方有得飲。睇賣相已非常IGable，飲啖真係不得了，平時唔係太好薄荷既我都覺得好飲，兩種帶苦既野沖出來既飲品，竟然完全唔苦，而係衍生出另一種甜。從來唔知薄荷同朱古力可以咁水乳交融！…Read More

如果你問我太平館餐廳水準係咪好L高？我可以寫包單話唔係。但係！我覺得所有食過瑞士雞翼但未去過太平館既人，一定至少要黎一次。原因好簡單，因為呢度既瑞士雞翼，唔只係一個標竿咁簡單，而係真正發明瑞士雞翼既原創者。為左呢樣野，我帶女友黎左尖咀分店。呢度既裝修好懷舊。我唔知屬於邊個年代，但原來孫中山先生當年都係捧場客，大家應該略知一二。兩人每人嗌左個SET，一個係瑞士雞翼+海龍皇湯+焗豬扒飯+甜品餐飲；另一個係焗蟹蓋+煙槍魚籽蝦仁炒飯+羅宋湯+甜品餐飲。逐樣講下︰海龍皇湯賣相一般啦，但聞落係好香既，湯質地唔會好稀，裡面有蝦同魚肉，飲落係有鮮味但唔算太出色，唔會咸亦唔覺有味精。合格但唔高分。羅宋湯反而幾好。當然佢都係用茄膏，但飲落甜、酸同辣既平衡算係適中，一定比大部分茶餐廳好飲，菜同甘荀都煲到好淋，不過就唔見任何肉。跟住兩個飯，SORRY，係全晚既污點。首先講焗豬扒飯。豬扒係炸過既，粉漿幾貼唔厚，肉質淋唔會好柴唔會乾，但略嫌切得太薄，即使本身JUICY咬落都唔太有口感，上面淋左一層整得唔差既燒汁。如果唔計啲飯會幾高分，但啲飯真係幾大問題！第一，根本唔似炒過，冇蛋香亦幾乎搵唔到蛋既縱影；第二質地上實在太淋身，甚至可以話有啲碎，再加上焗朱最緊要既一樣野，就係唔應該用兜上而係用碟上。佢當然冇做到，所以本身唔挺身既飯俾上面啲汁整到更淋。另一碟煙槍魚籽蝦仁炒飯更失望。同樣一個問題就係啲飯，話明係炒飯都係淋過林青霞，加上煙槍魚籽同蝦仁都係淡味既，所以呢碟野係食得有啲辛苦。所以建議黎到唔好嗌飯類。不過咁，有彃亦有讚既。個蟹蓋整得相當精緻，入面釀左既蟹肉估計有兩隻蟹以上，而且鮮味非常突出，就咁食已經好正，點埋少少李派林喼汁，又係另一種風味！蟹蓋上碟時係熱辣辣既，足足十五分鐘食完都仲係暖既。最後上碟既招牌，瑞士雞翼絕對係全晚高潮。可以話輕鬆KO出面任何食到既瑞士雞翼！鹵水雞全翼色澤好靚，肉質非常之淋非常JUICY。個瑞士汁——我當然唔知個配方——但真係好L正。微甜得來可以有幾個層次，同死甜完全唔同，有種難以形容既特別風味，最特別既係，竟然食到有陣香濃既咖啡味！當你咬開隻翼再隊落個汁度，即食，個種感覺太滿足了！重點係，第度係永遠食唔到！…Read More

聽友人講呢間Homemade意粉係Hidden Gem，終於有機拜訪下喇。2個人上到來，空間不大且幾乎坐滿食客，稍等左5分鐘先入到座。整個格局平民貼地，CASUAL舒服，開放式廚房睇到曬師傅點整意粉PIZZA。但呢啲都唔係重點，從來我都係食物質素先決。龍蝦湯鮮味濃郁，啖啖鮮蝦肉爽脆，質素中上。龍蝦蛋黃醬菠羅大蝦PIZZA個名出現左兩次蝦，可以想像幾有蝦味！材料貴精不貴多，餅底脆薄帶小麥味及微微焦香，大蝦鮮甜肉爽，菠羅清新甜美，最欣賞個龍蝦蛋黃醬同Mozerella芝士既絕配，享用前再灑數滴檸檬汁~WOO!正到無朋友。整PIZZA真係一種俐落既藝術，值得我俾滿分。煙肉豌豆巴馬臣芝士手製薯糰明明呢度招牌係意粉，唔知點解我地最後揀左呢個。可能貪佢夠特別。手製薯糰外表有微焦，咬落質感相當AL DENTE，好香薯味又無食薯仔既飽滯感，而且同微焦既巴馬臣芝士同忌廉完全融和，你中有我我中有你，根本唔駛任何配料已經好食到暈，所以煙肉豌豆都變成BONUS！喺呢度我食左人生第二好食既PIZZA(第一果次喺意大利)，同埋第一好食既薯糰。而且係咁既價錢，夫復何求？完。…Read More

係每日都要煩惱食咩既情況下，有app既出現真係幫我呢d有選擇困難既人唔少。是日見到呢間餐廳有75折，所以就揀左呢間。餐廳地方唔大，但都有放d心思係decoration上面，而且都幾整齊。雖然有eatigo既加持，但人都唔多。叫左個水牛雞翼、黑醋汁香煎黑毛豬柳同雜錦海鮮pizza，果時個waiter有提醒我地食物比較細份，但我地都不為所以。黎到我終於明點解了，因爲d食物真係細份到好離譜，果塊黑毛豬柳基本上係叫肉片，連旁邊既薯仔都差點大份過佢。$198！真係當自己FINE DINING？ ！Pizza同手掌差不多大，但味道唔差既。水牛雞翼幾辣幾惹味，但係就好似營養不良咁，一樣係超細隻。食完後個waiter好自動自覺比個menu我，好明顯佢都知係無可能會飽。但我地決定唔會再俾佢搶$！食完成餐飯感覺係好似無食過野咁，仲要折完都要比成4舊幾水，係咪用Eatigo就縮曬水先？服務態度亦認真差。真心嬲。…Read More

係旺角行街既時候見到間類似道頓堀既餐廳，望落同道頓堀價錢差不多，而且又唔洗排隊，所以就入左去試下。原來呢度得豚肉燒同特盛海鮮大阪燒係可以自己DIY，有別於道頓堀咁多選擇。最後揀左特盛海鮮大阪燒係同廣島燒，一個自己整，一個廚師整，諗住自己整得唔好食都可以食廚師整果款。咁係等緊既同時，當然係要睇下點煮啦，點知原來一個大阪燒要整成12分鐘，會唔會耐左少少。整緊既時候發現個火應該無道頓堀咁大，所以整既時間會比較長。原本諗住可能係怕d人唔識整會好容易整燶，點知原來廚師整果個一樣要咁耐，真係好無奈。不過呢度好就好在無限時，無咁大壓力。食物方面由於都係自己整既，都無咩好評價。…Read More

每年聖誕佳節老闆都會請一眾同事食飯，今年亦唔例外。唯一唔同既係今次係食私房菜，成間餐廳得自己一枱，想玩到幾盡興都得。雖然餐廳唔大，但勝在地方整齊企理。香煎金蠔蠔既表面呈現金黃色，真係煎得好靚。蠔身非常肥美，而且蠔味非常重，非常新鮮。XO醬蘿蔔糕煮蟹我都係第一次食XO醬煮蟹，但意外地好好食。首先隻蟹係好新鮮，蟹夠新鮮其實都已經贏左一半，食落去啖啖蟹肉既感覺真係好正。XO醬又辣辣地刺激到你既食欲，同時令隻蟹更惹味。蘿蔔糕完全索晒XO醬同蟹既鮮味，令人食到完全停唔到口。黑松露滑蛋大蝦球滑蛋媲美d有名氣既冰室， 滑蛋入口滑溜，有微微既黑松露香氣，但又無喧賓奪主。蝦球有半個拳頭咁大，肉身爽口彈牙。古法炆羊腩羊腩炆到好淋好入味，但因爲前面已經食到好飽，所以都無乜點食。但不得不提既係d竹笙同冬菇，索晒湯底同羊腩既味，就算飽都忍唔住要食多2舊。桂花蜜脆麻花同事話呢個係好傳統既甜品，可能我太後生，所以未見過，哈哈。麻花非常脆，但要靠桂花蜜先有味道，個人覺得係個幾得意既甜品。其實觀塘工廈識搵真係有好多好野食，呢間亦係其中一間令我好驚喜既餐廳。…Read More

講都冇人信 我第一次食樂天皇朝 之前好HIT所以一直好多人，身邊又唔多人推薦，諗住隨緣啦。點知呢日來到青衣分店，依然見到好多人。 奇怪既係我地一埋去竟然即刻有位，雖然坐門口附近，仲話限時個半鐘交枱，但都冇所謂啦！首先，想讚下枱上一早已擺放果碟花生，真係10級正，雖然唔知咩汁，但非常非常入味！呢度既招牌 - 8色小籠包 真係久抑大名8款唔同味 原來有食用次序指引架！我地2人每人試4款，我試左人參、黑松露、芝士同麻辣。其實唔同顏色小籠包個皮、餡既肉味道都一樣，只係裡面湯汁唔同喇！皮方面係厚度適中，口感Q彈，但8隻裡而其中兩隻有出現滲漏，一半湯汁就咁付之流水餡肉係好食既，有肉味又滑，唔會有任何雜質。湯汁方面全部都水準以上，清甜不油膩，我覺得「人參」同「黑松露」係比較出色既，前者人參味相當突出又夾到個餡；黑松露味道濃郁，都係非常好食既。芝士係最冇味既，麻辣亦係0%麻又唔辣，合格咁啦。建議每一個小籠包都再加埋醋一齊食，會更帶出本身味道。至於佢個次序，個人覺得唔駛跟。芝麻青瓜油墨菜一向鐘意食油墨菜，但未試過生食！呢碟幾特別既，包左塊青瓜，咬落清新脆卜卜咁，不過要點好多芝麻醬，會更好食。佢仲有一個好重要功用，就係解辣！酸辣湯又係我至愛，但個人覺得佢既酸辣湯本身醋味比較重左，冚左其他味道了，除左辣味外！裡面既料係高質既，木耳脆，豆腐有質感又掛湯，但小心呢個湯係相當辣架，唔食得辣唔好叫。紅油鮮蝦抄手相當高質，辣而香，蒜味、辣味平衡，蝦肉新鮮爽脆既，係上碟時唔夠熱，要快食。最後耍講下黃魚煨面，亦係呢度招牌之一。湯汁好濃夾雜黃魚味，但面條林好索湯，又係要快食。魚塊一咬落去魚味超級濃，係黃魚好獨特既味，鐘意既人會瘋狂愛上，但我個人覺得有點腥 (本身唔LIKE蒸魚)。個人認為呢間係幾高汁既  菜色選擇多 有辣有唔辣  無咩伏既食物  而且好適合一家大細來但收費也不便宜 花生茶位都同你計 …Read More

係Facebook見到銅鑼灣有間食Pancake既餐廳，比佢既賣相吸引之下就同女朋友一齊黎左。黎到睇menu先知Pancake既選擇係一千零－款，蜜瓜Pancake，但睇賣相同description的確好吸引，仲要限量50份，以香港人對pancake既瘋狂度，有啲驚食唔到。好彩呢件事冇發生到。我地只為pancake而黎，最後係好滿足甘離開。pancake一到已經聞到密瓜果種香味，好清新好甜美，已經即刻令我食欲大增。蜜瓜咬落好甜，食完d蜜瓜味仲依然係口腔縈繞三日甘上下。再食一啖Pancake。嘩！口感鬆軟得過份。Pancake上面仲有一球蜜瓜雪糕，無蜜瓜咁甜，係偏向清新可以中和飽膩感。暫時係個人pancake排行榜no.1，比我去日本食Grxx更出色。不過價錢方面係略貴，仲要貴過grxx最貴果款一半。…Read More

因為我地6:30就黎到，所以唔駛排隊就有位，仲要係卡位！餐牌上既選擇唔多，基本上ABCDEFGH餐，除左一羊一魚，全部都係牛，唔同位置唔同煮法咁解。我地揀左SET D 吉列炸牛扒，員工幾好禮貌咁介紹唔同位置牛肉有咩特質，咁我地揀既其實係來自板腱牛扒，係肉質比較軟腍既位置。賣相絕對整齊靚仔，同MENU幾乎冇違和感。上餐時爐上已奉上一片牛油，個火來自底下既蠟燭，火力不算太猛，但燒牛就剛好。牛切得厚度適中，每件牛只需一分半至兩分鐘已達8成熟，咬落外面吉列還有少少脆，肉質頗為軟腍既，牛味亦算濃郁而且不油膩，不過間中有一兩件筋比較多，想食得輕鬆啲可以叫澳洲穀飼牛。份量黎講，唔算好大份但夠一般人食啦。個SET 仲包左一碗飯，撤滿芝麻同埋類似七味粉的東西，齋食都不會怕乏味(有點咸)；一碗有柚子味既沙律同一碗麻醬豆腐，兩樣都合格既。另外我地嗌左一客紫菜粉薯條，啱啱炸起既，脆得來亦有薯味，正過「牡丹樓」，紫菜粉更係大大加分。利申：我大部分時間吾食牛，但一個月會俾自己一個quota，甘呢個quota都俾得抵既。]]]…Read More

今日温完書近９點. 想casual食個車仔面, 來到登龍街經常幫襯果間, 點知竟然甘晏都要排隊🙄呢世人最憎排隊, 尤其一個人食野更加吾會有耐性, 索性沿街走到尾, 差不多每間食店外都有人龍😤, 直至見到呢間連名都吾識讀既拉麵店, 冇人在外面等店內亦吾爆滿即刻入去坐.可能太肚餓冇乜意識到吾爆滿既原因, 當我睇到餐牌就明曬. 一碗鹽味拉麵講到明得一塊叉燒, 索價百一, 未計加一. 好, 既然入左黎就不如食豪啲, 於是嗌左碗鹽味叉燒拉麵. 首先要講有樣野吾太好. 就係bar台居多. 坐得較逼. 可能店舖都有九成滿, 見人手（開放式kitchen）又吾多, 碗面都等左15分鐘先上菜.不過, 論質素又抵返既. 凈係個擺盤都elegant過人, 湯頭味道非常特別, 鹽味濃郁但又吾厚身（後來先知混合左沖繩海鹽同蒙古岩鹽）, 最令我印象深刻係一陣細膩而subtle既黑松露香, 伴隨碎洋蔥粒同一小撮辣醬, 仲有些微類似九層塔既味道加上清新既lemon味, 整體味道細膩豐富, 好符合日本個性.麵質方面, 冇得揀粗幼軟硬, 個人認為硬度適中, 再硬少少同幼啲更合囗味. 至於叉燒, 係我覺得最吾抵之物. 應該係肩胛肉, 韌度頗高, 鐘意既人覺得有囗感, 但我比較喜歡酥軟質地. 仲要我尊登揀左多叉燒版本🤦🏻. 總括而言, 呢間米芝蓮一星🌟拉麵可以一試既(呢條街有吾少拉麵舖, 我幾乎都幫襯過, 食物質素呢間可以排no.1或2既), 拉麵控或者自認哈日族就應該去拜訪下既, 建議吾好係糧尾果期去🤣 …Read More