louis_1127's Profile

真係好多年無試過食得咁開心,滿足,很久沒有嘗過一頓由心做出來既晚餐,喺香港已經好難得可以品嘗到一間咁用心去經營既餐廳,香港好多餐廳為左降低成本,增加利潤,無所不用其極,一碟同垃圾無分別既食物都可以攞出黎賣俾客人吃.呢間餐廳雖然絕對唔起眼,如果唔係有女朋友介紹,我絕對唔知道上環有一間咁出色既餐廳,餐廳裏絕對無豪華既裝修,店鋪既面積亦有限,但店鋪俾人有一種"家"既感覺,坐落去都感到壓力一掃而空.癈話唔多講喇,講返食物,我地二人叫左一個149既二人套餐,包括燒春雞一碟,是日例湯2客,芒果乳酪飲品兩杯,pizza同意粉各選一款,我地點了千層麵同印度燒雞pizza.其實149呢價錢食到咁多野真係已經覺得物有所值,雖然上菜時碟燒春雞只得三大塊,但那種叫道真叫人一世難忘,味道香濃,雞肉鬆軟,加少許lemon汁更加可以帶出雞既香味,三塊真係太少了,下次一定要叫成隻黎食.而是日例湯係兩碗不名例湯,但味道真係好特別,有我兒時吃過既味道,但我又講唔出佢係咩味,可能未必每位都會欣賞,但絕好過出面飲果啲加左超多水既罐頭湯.到果兩杯芒果乳酪,初時覺得味道有點怪怪,但一邊吃正餐時一邊飲先發現呢杯野可以中和口控中既油膩感,絕對係同各菜色絕配,佢唔可話係一杯好唔好飲既飲品,但佢絕對係整個套餐中既靈魂,不單真材實料,而且口感特別,佢地所用既乳酪同我地香港所飲到既完全係兩回事,人地成杯都係由乳酪溝出黎,而香港果啲真係假到唔假.到主菜pizza,一睇就知道好吸引,pizza 上佈滿雞肉,真係令我想大口大口咬落去,香趣既批邊真係令人一試回味,每款材料都好新鮮,味道好match,令人回味.最後到千層麵,真係我平生有史以黎食到最好味既千層麵,面頭係厚厚既芝士,下層係香味濃郁既肉醬,中間夾著一塊又一塊既麵塊,一口咬落去,每層既口感都帶俾人幸福既感覺,雖然麵塊係少左啲,但厚厚既芝士都係令我畢生難忘.據我所知呢間係一間主打fusion菜既餐廳,係青真同西式合併,看似很奇怪,但出黎既效果真係出奇地好好味,其實最重要係廚師既心機係絕對可以令人品嘗,好快我又會去果度品嘗新菜色.…Read More

一間好難街又有名氣，又不失傳統同食物質素既快餐店，雖然已經係第三次黎，每次都係食呢兩款包，但係每次食都唔會覺得厭，因為真係實在太太太好味，每次一咬落去，肉汁都會喺個口度彈出黎，包既鬆軟加汁秘製沙律汁，真係每次食都想大叫＂好味到喊呀＂今次終於有機會食到炸雞脾，雖然雞脾無咩特別，但佢平凡在佢有炸雞脾應有既味道，平凡既味道已經足夠了，食落去皮脆肉滑，炸既時間配合得啱啱好，唔會生，但亦唔會過熟，真係只想過一個字＂perfect＂炸薯條都一樣好好色，總之一個字＂正＂。…Read More

配搭係由女朋友提議的，因為佢曾經光顧另一間ＸＸ府試過呢個口味，所以今日專登介絕俾我試下，其實佢店鋪都有推介，不過不論名字或配搭總是怪怪的，加上價錢都係有啲貴，要成40蚊先可以食到一個，加上女朋友推介，實唔會食到嘔，所以唸都唔駛唸就叫左呢個perfect match。石榴冰底＋乳酸魔珠 ＋粟米片＋百香果汁（女朋友選擇）＋一個唔記得咩珠（我選擇）　每個配料＄３其實呢個配合真係好夾，乳酸魔珠完全特顯到石榴冰既味，百香果汁又可以襯托成個冰既味道，不過只係我揀果個唔知咩珠真係有點兒。。。有破壞無建設，真係都幾難食，所以以後咩都聽女朋友話實無錯呢隻海棉冰早喺Ｎ年前已經開始喺台灣盛行，不過唔知道今年先正式喺香港登陸，其實香港既冰，無論係質素或配搭或價錢，簡直係蚊比同牛比，香港既冰唔夠人地滑，配搭唔夠人地好味，價錢簡直貴到不知所謂，不過要明白香港地租貴，人工又貴，咩都貴，無辦法，但點解要學又唔學好啲呢？學一成又唔學九成，香港既冰真係不及台灣的半成，人地台灣正宗既冰都無咩多選擇無咁多配料都可以好味過我地既十幾二十萬倍，其實唔係多選擇先至係好，好味既，一種配搭已經足夠；無錯，多可以俾人自由配搭可以俾客人配出自己口味，但試問一個普通既人又點會知道點配先至最好味呢？所以選擇是重要，但教導客人點先可以配出一個啱心水既組合先至最重要。台灣選擇唔多，但人店鋪給你既每一個選擇，都係店鋪精心調配出黎，所以每次見到每位食完既客人，都會自自然有一個滿足既笑容。做食店既唔係只係為左錢，唸住為左吸引顧客，就狂推出新口味冰底或新口味配料，食物質素跟本同選擇多與少完全無關係，質素是應該由心機造出來，金錢只是一個數字，得到客人既讚賞先至係一間食店應該所追求既東西。…Read More

行街行到攰，見到美心MX有抵食下午茶餐，於是就唸都唔唸就跑左落去，嘆下冷氣。唸住美心咁大間集團都應該唔會呃人架啦，以為張相既大小都應該同實物相差不大，但點知，一睇到個套餐真係想喊，19蚊點值呀？薯條得果三四條，塊西多細得可憐，碗烏冬細得一啖就吃完，其它野都費事講，自己睇相啦，真係唔相信一個十九元正既套餐會少成咁。…Read More

雖然已經去過五六次，但每次去到都有新發現，新產品推出，今期就推出左比薩熱狗，十分惹味，真係好似食緊pizza咁，好香口，熱狗腸大大條，好傳統好香口好好味。吉列雞堡，每次見到佢都好自然會叫佢，因為雞肉既香甜，加上生菜絲清爽，千島醬既惹味，真係百吃不厭。下次想試下吉列蝦漢堡，因為見到好多食訐都有介紹呢個漢堡，睇黎應該好好味。雖然一個套餐40-50蚊,比起一般套餐貴,但由於佢既美味，所以即使再貴我都想再食。…Read More

成間鋪頭細到得一百尺到，十個位都唔夠，雖然係下午茶時間，但都差唔多坐滿人，可想而知呢間鋪頭食物質素都唔差，於是我地就叫左個芥末豬扒漢堡加汽水薯條，等左五六分鐘個包已經整好，熱辣辣，香氣撲鼻，我已經等唔住一口咬落去，個包好味到講唔到野，塊豬扒肉汁豐富，麵包熱辣鬆軟，芥末汁加生菜，美味非當，個芥末汁將成個包既鮮味帶到去極點，真係唸返都流哂口水，２５蚊個包又唔算貴，真係抵食過麥ＸＸ多多倍。薯條，雖然都係好香口，但可能炸得太耐，好乾水好似咬柴咁，不過整體黎講都好味過麥ＸＸ，所以真係好期望快啲再去食。…Read More

初初入到去都好緊張，因為唔知道伊斯斯蘭既特色菜係咩，又唔知睇唔睇得明個餐牌，又唔知我地呢啲本地人入到去會唔會好奇怪，但係一入到去，咩唔知咩疑問都一掃而空，不過我就立刻想問一個問題，呢間夠竟係伊斯斯蘭餐廳定係中式酒家？裏面食既野全部都係中式酒樓食到既點心，蝦蛟，燒賣，叉燒包，炒飯，我食到既野都係中式酒樓食到既野，不過價錢就差好多喇，喺果度既點心都係６蚊起最貴都好似係１５蚊，我地叫左蒜香炸春卷，大蝦腸粉，紫菜蝦巻，同咕嚕雞球飯。先唔講其它，只係講下紫菜蝦巻，本來以為係美心酒樓既外脆內軟既炸蝦巻，但點知係蒸既蝦巻，裏面包住既係豬肉，外相真係麻麻，但食落都接受到，同有小小好味。其它點心都唔錯，同中式酒樓差唔多，但價錢真係好抵，而且味道真係唔錯，同同區既酒樓相比，呢個質素同價錢真係令我好想再去多幾次。但係個咕嚕飯就怪怪地，雖然都係酸酸甜甜，但係碟飯仲多左啲辡味，奇奇怪怪咁。但其實果度無論係香港人定係伊斯蘭人都叫炒飯食，唔知啲炒飯係咪好好食呢？下次一定要再去試下。…Read More

一聽到健康，初初都有少少卻步，以為健康一定係小糖小油小鹽咩都少，但係其實佢只係用左橄欖油，同每份餐都有好多蔬菜。味道依然咁好味，我叫左個羊肉紅糙米飯，而我女朋友就叫左個吞拿魚巻配沙律，兩個set lunch都可以配指定飲品一杯，我地都要左芒果汁，酸酸甜甜都唔錯，到主菜黎喇，個吞拿魚巻裏面包左啲蔬果同青蘋果，味道不流，雜果沙律都係選用新鮮既蔬果唔係罐頭雜果，新鮮又好味；至於個羊肉紅米飯，啲黑椒汁配紅米飯，味道簡直一流，羊肉又好好味，無咩骨，不過份量就真係太少喇，我一舊女朋友一舊，食唔夠兩啖就無哂，雖然午餐選擇唔多，但係樣樣都好吸引，見到佢既晚餐有好多選擇，應該仲吸引，所以下次一定要黎試下啲晚餐。…Read More

好耐都無寫食評,今日重出江湖係因為,呢一間完全唔起眼既湯圓店.本來入去之前都無帶咩期望,只係想坐低休息下,但係女朋友極力推薦呢間湯圓鋪,就一於試下佢既黑芝麻湯丸,同埋一個涼粉西米露.老闆應該係一個大陸人,當我落完單後佢同我講左一句話,但我真係唔係幾聽到佢講咩,可能佢亦都聽唔清楚我叫左啲咩,好彩最後都搞錯到.其實我真係無唸過湯丸可以有幾好食,因為平時只會吃呀媽喺超市買既特價湯丸,跟本食都食到厭,但係食完呢間既湯丸之後,令我對湯丸有新既體會,原來湯丸都可以好似小籠包一樣,啲皮好薄,黑芝麻又磨得好滑,真係皮薄涵靚.湯底係薑味極濃既濃湯,我埋單時見到佢係一直用電飯煲煲住啲薑湯,所以薑味濃厚,我本身好少食啲咁有薑味既食物,本身以為第一啖飲落去一定好難頂好辡,但飲落肚又覺得好舒服,同湯丸既味道又配合得好好,食完之後真係感覺好幸福,成身都暖笠笠,所以我冬天一定會多啲黎幫親,大熱天時就真係要考慮下,不過咁好味既湯丸,辛苦少少熱少少,點都會忍唔到口要黎食返碗.ps.可能因為碗湯丸太太太好味,所以碗涼粉西米露就變得無咁特別,下次一定要試下佢其它既湯丸系列.…Read More

由於呢度係半自助形式，只要你點左一個熱狗之後，你就可以去到收銀台旁既自助調味區，裏面有數十款既配料任君選擇。只要細心留意一下旁既人，就可以知道佢貪心與否，因為果度啲配料任攞，通常啲人都係加到成座山咁高，但最後都係食唔到，因為會跌哂落枱面或者地下，所以喺果度坐返半個鐘就可以觀察人生百態。講返食物質素先，其實做熱狗既都好難唔好味，本來都覺得佢好抵，但係因為搵到第二間更加好味同抵食既餐廳，變相覺得其實都唔係好抵，而且仲有啲貴，一隻普通熱狗要成近40元一隻，雖然話配料任攞，但係佢地啲配料又唔夠特別，又唔算咩貴野，又唔係新鮮，所以間唔中去食下都可以。碟著條就好似細碟左啲，加上又唔夠粗，炸完之後成條柴咁，上面既芝士都好多，不過最好就俾我地之前撈下佢，唔好成舊野咁撻上去，咪食食下凍左就好難整開啲著條黎食。其實著條好難唔好食，而且佢地啲著條都係普通行貨，周街都有得賣，所以無咩特別。…Read More

每次去到都有一種做皇帝既感覺，因為每次去到都唔駛我出口點野食就有人服侍，每次都係由女朋友發牌，有時啲野食黎到，我都唔知果啲係咩，只知道佢叫既野食都好啱我胃口，實在太好味喇！小籠包雖然唔及果間？泰豐既皮薄，但係佢既豬肉＂涵＂真係好新鮮，蒸出黎之後皮裏充滿肉汁，但皮依然唔穿，值得一讚！一舊一口，啱啱好，唔會太大又唔會太細，唔似得啲酒樓咁，大到食都食唔到，啲皮又厚過我啲臉皮，但一夾起，啲汁就溜哂出黎，真係食到＂把鬼火＂，喺香港要食到又好味又抵食既小籠包真係只有呢度，我唸絕無第二間。到食花素蒸餃，雖然無濃濃既肉汁或者特別既材料，但係蒸餃裏面既唔知咩菜真係好新鮮，可以食得出係即日包出黎，雖然只有菜，肉都無一舊，但係店鋪既調味調得好好，味道同蔬菜既味道互相配合，絕對係清淡之選。再值得一提既係豆漿都好好飲，甜味適中，豆味濃郁，又唔會有濃味，可以飲得出店主用左好多豆黎磨豆漿，所以絕對要試。…Read More

厚厚既漢堡肉，加上芝士同沙律醬，完全係完美既組合，雖然個包外表不及那間McD....同Mos B.... 或burgerki..又或freshness bur...好，又或者無特別既材料或醬汁，但係我敢講，呢個漢堡包比起以上那幾間快餐店既包好味一千倍，越簡單既食材同越簡單既煮法先能夠煮出最美味既食物，價錢又大眾化，大家都食得好開心，真係又抵食又好食，難以以三言兩語可以講出夠竟有幾好味，要知幾好味，真係要自已好試下先知。…Read More

今次專登遠道而來，當然係因為呢檔雞蛋仔好出名既關係啦，雖然地點有少少遠，但都不畏長途跋涉跑來一嚐呢檔雞蛋仔。原來呢檔雞蛋仔，日日都係下午先開，但一早黎到，結果失望而回，好在無放棄食完午飯返黎之後再黎過，今次終於搵到佢喇，實在太開心，遠望過去已經好多人圍住觀看同買雞蛋仔，真係好熱鬧，排左十至十五分鐘左右已經買到一個，我地已經急不及待攞黎食，粒粒雞蛋仔都好飽滿，攞上手彈力十足，不過略嫌名面唔夠脆，雖然食落去味道唔錯，但係正宗炭爐雞蛋仔應該係外脆內軟，好可惜可能佢用既麵粉唔夠靚，所以外皮唔脆，只做到內軟。不過能夠再次食到炭爐雞蛋仔已經好開心，因為普通用電黎整既雞蛋仔，無可能做到那麼香口，內裏飽滿，就算係那間北Ｘ雞蛋仔都唔夠用炭爐雞蛋仔好味，因為炭爐既溫度成２００－３００度，雞蛋仔唔駛一分鐘已經做好；但北Ｘ雞蛋仔用既機點改裝都只會去到１５０度，所以絕對無得比，希望下次好快就有機會可以試埋佢既格仔餅。ｐｓ　其實我更加想試下大嶼山果間炭爐雞蛋仔，聽人講，果間更加好味，真正做到外脆內軟。…Read More

見到啲食評都唔錯，所以今日專程黎試下，但給我的只有失望二字，入到去一個人都無，（可能）因為係午飯過後。叫左一個定食同一個初吻sushi，個定食未黎店員已經話無哂三文魚，只好改做吞拿魚，都算喇，無都無辦法，但個定食黎到之後，先發現完全貨不對辦，個定食明明係話有中華沙律，但結果得兩舊蘋果，仲要係正宗大陸入口富士蘋果，個定食炒雜菜一大堆，個飯只得半碗份量，味噌湯一世人第一次飲到咁難食既味噌湯。不過寫食評係唔應該俾憤怒蓋過事實，雖然個定食真係令我失望到無野講，但個初吻sushi真係唔錯，可見設計者既心思，青瓜既味道同芒果既味道好新鮮，真係好有初吻既味道。如果你問我呢間日末餐廳抵唔抵，值唔值值黎食，我只可以話無得選擇既時候咩都係咁好食，要唔要黎試下，請自行決定。…Read More

其實一直就想黎呢度試下，但遲遲都未有機會，今日拍拖偶然地經過蘭芳園，但本來plan去食日本料理，但我堅持想入去試下，最後呢一次偶然，令我發現唔少驚喜。一入到去發現店裡超級多人，但經店員巧妙安排坐位後，不用三分鐘已經有位。本身只係唸住食咖央，因為想留肚去食日本野，但入到去發現香味充斥全店，最後決定叫一個咖央，一碗心多多撈丁，一杯香滑奶茶。食物黎到之後，我地先發現原來我地坐左喺個廁所出面，但可惜已經恨錯難返，全店都係人，我唸想換個位都幾難，最後只好忍氣吞聲繼續食野。但當我地正介懷緊個廁所時，我無意咁將塊咖央放入口中，發現原來加入左奶黃既西多士真係好好味，奶黃既甜味同西多既味道係勁match，我再將心多多撈丁放入口中時，我已忘記個廁所喺我地後面，因為個心多多撈丁實在太好味，無論係啲材料定醬料都同成碗撈麵味道好夾，真係好好味；到本奶茶，真係又香又滑，同其它茶餐廳完全無得比，茶味香濃，奶味香滑，構成左一杯一百分既奶茶，下次有機會一定要黎試下其它野食。…Read More