roon0412的個人專頁

今日放半晝，同同事去咗中環月山食晏，尖沙咀日山長期full booking，中環反而較易訂位。月山環境非常優雅清幽，令人彷似身處喺日本竹林裡面。最初坐走廊位，唔太舒適，好好彩好快窗邊有吉枱，就調過去坐，闊落多了。我哋點咗Tasting Lunch Menu，$988未計加一，有七款精緻菜式。先付—松葉蟹茶壺蒸鮮味十足，蒸蛋嫩滑。向付—北海道雲丹金槍魚腩杯精緻味美，刺身鮮甜，加上紫蘇花，味道更具層次。揚物—吉列A5和牛肉味香濃，肉質鮮嫩，肉汁豐富。蒸物—慢煮北海道鮑魚鮑魚軟嫩，味道清甜。煮物—金槍魚山椒煮肉質軟嫩，汁料香甜。御食—特選海鮮丼多款刺身，令人垂涎欲滴。新鮮甘香，大滿足。甘味—日本菓子日本蜜瓜，未夠清甜。服務優質，職員十分專業殷勤，細心介紹每一款菜式，令客人有賓自如歸嘅感覺。…查看更多

夜晚同咗兩位好友去咗Elements嘅十里湘薈食中菜，門面十分有氣派，反而室內環境有少少🤏🏽令人失望，有少許擠迫。我哋叫咗菊花茶，點咗半份片皮鴨、冰鎮黑毛豬咕嚕肉、蜜糖淮山紫薯球及鮮肉小籠包。賣相吸引有心思，味道都不錯。特別鍾意鮮肉小籠包，皮薄煙韌，鮮肉嫩滑，湯汁有鮮味。片皮鴨都好味，皮脆肉嫩。麵粉皮皮薄軟滑，且有嚼勁。加入青瓜、大蔥同甜醬，滋味萬分。冰鎮黑毛豬咕嚕肉賣相吸引，乾冰視覺效果一流。不過略嫌醬汁唔夠，味道亦偏淡。蜜糖淮山紫薯球擺盤精美，味道則不過不失，食唔出有淮山，只有紫薯味。…查看更多

約咗個多年無見嘅朋友，因為佢在國外生活，所以梗係要去搵中菜食，始終喺外國，很難搵到好嘅中菜餐廳，因為好多酒樓都無位，所以最後去咗翡翠拉麵小籠包。我哋叫咗小籠包、蘿蔔酥及小食拼盤（鎮江肴肉、甜醋茄子、雞絲粉皮同川辣皮蛋豆腐）。小籠包皮薄多汁，今餐最好食的！上湯好有鮮味，肉香嫩滑，點上香醋更滋味，味道更有層次。蘿蔔酥就比較失望，酥脆感係有的，不過油味較重，調味比較寡，蘿蔔份量奇少，味道淡，唔清甜。小食拼盤中特別鍾意甜醋茄子，味道酸甜開胃。鎮江肴肉都唔錯，達標。但雞絲粉皮嘅粉皮則太厚同唔夠煙韌。整體嚟講都自唔錯，不過略嫌有少少貴。…查看更多

今朝約咗同事去敏華食早餐，因為特別欣賞佢哋嘅炒蛋同飲品。今日點咗炒蛋·腸仔·牛油多士配凍阿華田。炒蛋水準依舊，又嫩又滑，又有蛋香味。不過好可惜宜家佢哋唔係用廚X腸了。牛油多士不過不失，如果可以脆啲燶啲會好食啲。飲品永遠唔會令人失望，平時會叫凍奶茶，茶味香濃，同奶嘅比例控制得宜，口感順滑，甜度適中。今日想轉吓口味，揀咗阿華田，味道濃郁，飲落唔會好稀，絕不欺場。餐廳通風同抽氣做得比較差，食完出嚟通常成身油煙味，希望餐廳可改善一下。…查看更多

今日放咗工，同朋友行荃灣同食晚飯，咁啱經過湊湊火鍋，見無咩人，即刻衝入去，早啲食有著數，唔使等位。我哋叫咗鴛鴦湯底，分別係花膠雞湯同台式麻辣。因為大家都未肚餓，加上有大紅袍珍珠奶茶加持，叫咗三個配料已經飽。我哋叫咗美國特選牛小排、芝士魚腐同皇帝菜。最後埋單每個人都要差唔多$400，出街食飯真燒錢。兩款湯底都好出色，花膠雞湯滋潤補身，味道香濃，雞味濃郁。台式麻辣就唔使講啦，香辣惹味，中間有鴨血同豆腐，聞到已經流口水。芝士魚腐有驚喜，芝味濃郁，魚腐軟滑有魚味！美國特選牛小排都好食，肉香嫩滑，打邊爐必叫！皇帝菜翠綠新鮮，好味。大紅袍珍珠奶茶大大杯，非常吸引！整體還可，略嫌欠缺茶香味，奶味較濃。最後還奉上兩款甜品，圓滿的一餐！…查看更多

夜晚約咗朋友喺ELEMENTS食飯，距離仲有幾個鐘，所以去咗全港最靚嘅Starbucks坐低飲杯嘢，消磨下時間，思考吓人生。呢間Starbucks位於尖沙咀星光大道內，面向維港，景色一流。我特別鍾意一樓嘅室外座，吹住海風，望住美景，時間不知不覺就過去了。我叫咗熱鮮奶日式焙茶，講真，有少少失望。雖然飲落好舒服、順口、柔和，但整體味道就偏淡，唔係好飲得到焙茶應有嘅甘香味，鮮奶口感順滑，但奶味不夠濃郁。…查看更多

同朋友去九龍水塘遠足，行之前去咗我哋都好鍾意嘅南記食碗米線。我揀咗中麻酸辣辣豬肉魚肉春卷米線。麻辣好食，酸辣又好食，why not both? 兩款辣有齊晒，正！米線煮嘅時間啱啱好，軟硬度適中，有彈性但唔會硬。辣味香濃，又麻又酸，辣度適中。辣豬肉好好食，肉質嫩滑彈牙，甜甜哋，好惹味。魚肉春卷都係必食，口感Q彈，魚肉味香，酥炸味好香口。食完有少少口渴，不過我哋都無叫嘢飲，因為飲品無跟餐價，要原價買，唔捨得。…查看更多

老公要加班，於是自己一個去咗壽司朗享受吓MeTime。5點到，已經出現人龍，真誇張，等咗大概半個鐘就有位，好彩唔算好耐。一開始梗係要叫杯梅酒嘆吓，味道濃郁，清甜回甘，一酒解千愁。揀咗幾款壽司，大部分都好好食，魚生有鮮味，蝦清甜有彈性，不過略嫌飯無咩香味及欠黏性。之前有網民話壽司朗嘅甜品比壽司有過之而無不及，今晚第一次試吓佢哋享負盛名嘅卡達拉娜，口感同味道似冷凍過後的香濃烤布丁，真係好正，真心好好食😋。…查看更多

今日同兩位朋友去咗荃灣聚舊，我哋揀咗環境同顏色都十分文青嘅Peko Peko Eatery。蟹肉牛油果船 $98蟹肉同牛油果分別都係我哋嘅至愛，加埋一齊變成我哋嘅大愛！蟹肉鮮甜，牛油果軟滑，口味清新，好食！Peko拼盤 $168裡面有青口、葫蔴雞、廣島蠔同海苔魷魚。青口同廣島蠔欠新鮮，口感差少少。葫蔴雞同海苔魷魚則不錯。海膽三文魚子竹炭烏冬 $198必叫之選！海膽大件，鮮味豐富，醬汁鮮甜濃郁，調味一流。不過烏冬口感有點淋，煙韌少少會更好。香煎西班牙豬胺 $268肉質鮮嫩，肉汁豐富，調味得宜，只略嫌少咗少少豬肉香味，但整體都係好食嘅。個人覺得有少少貴，食物質素還不錯，環境舒適，值得一試。…查看更多

老婆放半晝，我就去接佢放工再一齊食晏。我哋揀咗哩間日本fusion餐廳，雖然有set lunch但其實都有少少貴，宜家出街食飯真係好奢侈。我哋叫咗和風博多明太子意粉$112同流心芝士和牛漢堡扒$138，每人另加$25配埋沙律、餐湯同飲品。老婆再加$20轉升級飲品：福崗八女抹茶紅豆白玉拿鐵。埋單每個人都要$175。不過食品質素係高嘅，意粉望落去雖然好寡，但味道係好食嘅，好鍾意明太子嘅鹹香味，加埋紫蘇葉，味道提升至另一境界。漢堡扒肉質非常鮮嫩，肉汁豐富，牛肉味香，中間嘅流心芝士溶入漢堡扒內，令味道同口層更有層次。福崗八女抹茶紅豆白玉拿鐵都好正，抹茶同牛奶味道濃郁，絕不欺場，白玉煙韌，口感Q彈，可以話係飲品甜品兩合為一，大滿足。…查看更多

晏晝游完水，朋友仔話想去九龍城食泰菜，咁即興？好！奉陪到底！上網搵到哩一間，好好彩我哋早到，所以好快安排到枱。我哋叫咗以下菜式：🎖️泰式拼盤份量十分驚人！每款都大大件！香口惹味，十分有泰國風味。🎖️柚子大蝦沙律沙律汁酸酸甜甜，十分開胃。柚子清甜多汁，好食！🎖️明爐青檸烏頭湯汁清新，青檸味甘香，可去除魚的腥味，魚肉有彈性。🎖️泰式金邊粉略嫌調味較淡，不過不失。🎖️馬拉盞椰菜苗椰菜苗翠綠新鮮，馬拉盞惹味！🎖️泰式青咖哩豬甜味比辣味重，辣返少少的話會更好味！…查看更多

幾經辛苦，終於成功網上訂到枱，一行四人開開心心去到期待已久的Billow。無論室內或室外都非常舒適，我哋揀咗室外近湖的一邊。有咁靚嘅環境，當然價格都會相對貴少少，同埋用膳時間比較短，未能好好享受美景。雖然有少少可惜，不過都明白宜家做生意唔容易。我哋點咗以下幾款菜式：🎖️黑松露薯條薯條新鮮熱辣辣，黑松露醬味道濃郁。🎖️波士頓龍蝦·茴香·雙色椰菜花·橙柳·芥末醬·吐司龍蝦肉香，調味出色，顏色及擺盤有心思。🎖️燒大虎蝦·龍蝦汁扁意粉龍蝦醬汁味道十分香濃美味，可惜意粉有少少煮耐咗，唔夠煙韌。🎖️海膽燴意大利飯·火炙北海道帆立貝·三文魚籽海膽汁味道非常濃郁，口感綿滑好creamy，帶子大大粒，焦香味吸引，三文魚籽新鮮可口。🎖️美國安格斯肉眼·椰菜絲沙律·太陽蛋牛扒有驚喜，口感軟嫩，肉汁豐富，配上蛋黃，肉變得更滑。最後，要讚職員態度殷勤有禮，親切有耐性。…查看更多

今日同老公去咗東涌，諗嚟諗去都唔知食乜好，所以最後揀咗去food court，包保有一款啱自己，費事煩。我自己叫咗海南雞套餐，有飯同滷水蛋豆腐。我老公叫咗日式蛋包飯配芝士漢堡。海南雞肉十分嫩滑有鮮味，肉質有彈性仲一啲都唔痴牙。美中不足係嗰三款醬汁都太稀，特別係個辣汁，無咩香味。另外飯亦未熟透，中間仲係硬嘅。豆腐份量多，不過亦係醬汁唔夠味，好稀同好淡。日式蛋包飯高質，特別欣賞漢堡扒，肉質超軟淋，肉香噴噴，加上芝士味道更出色，大愛❤️。…查看更多

上兩個星期同老婆去咗屯門VCity新開嘅千両食晏。本身諗住出尖沙咀食，點知一開app發現佢哋屯門開咗分店，試業期中，即刻轉軚去屯門分店支持吓。屯門哩間嘅設計非常富現代感，主要以灰色之主，極具高尚氣派，入口有一排竹作裝修，富有風格，予人一種悠閑嘅感覺。屯門分店無午巿套餐，我哋叫咗二人刺身、日式海鮮茶壺湯同兩客三文魚腩壽司🍣。質素一如既往嘅好，同其他分店比有過之而無不及。刺身非常新鮮，味道清甜，肉質肥美富彈性，每一款都好好食，令人難以忘懷。日式海鮮茶壺湯外型可愛，裡面有蝦、蜆、帆立貝同菇，味道鮮甜味美，不過略嫌蜆有少少沙。三文魚腩壽司，入口即化，魚油味香濃，味蕾大為感動！珍珠米晶瑩剔透，新鮮有口感，大愛！好開心，以後唔使出尖沙咀就可以享受到日本美食👏🏽！…查看更多

今日同兩個朋友去咗西貢，朋友上網搵咗間泰式餐廳，果然無介紹錯！去到嘅時候我哋都不禁話覺得去咗泰國旅行一樣，以前一路都唔知香港有個咁chill嘅地方，今次真係大開眼界。餐廳位於海灘上面，景色非常優美開揚。不過食物質素就普普通通，價格偏高，主要食環境吧。我哋點咗泰式拼盤、大蝦冬陰公、牛雞串燒、炒通菜同芒果糯米飯。每道菜都不過不失，唔會特別好食或難食。特別鍾意炒通菜，夠惹味，麵豉好好食😋。芒果糯米飯嘅芒果有渣，無乜芒果香味，但椰汁就好香。大蝦冬陰公嘅湯底似係用湯包開水，味道無層次，欠香料味。服務都係一般。…查看更多