vivian1214的個人專頁

琴日下午同朋友行街見到有間泰國餐廳，諗起平時都比較少食泰國菜，就去試試。大家都叫左唔同野食試下，而我就叫左泰式魚蛋肉碎湯河。呢個湯河睇落冇咩特別，好普通既一碗河粉，但食落發覺味道好特別，魚蛋又彈牙，肉碎亦好多，材料十足。湯底味道亦夠濃郁，而且唔太肥膩。另外，值得一提係員工服務，員工好有禮貌對待客人，而且笑容十足。加上地方較寬闊又寧靜，令人有舒適既感覺，可以慢慢享受午餐。今次我同朋友都好滿意呢間泰國餐廳既野食同員工服務，下次有機會都會再黎呢間餐廳試下更多唔同野食。…查看更多

今日去完拜山，就去左流浮山食海鮮。我地就揀左瀨尿蝦、鮑魚、奄仔蟹和蘇鼠斑呢幾樣海鮮。另外再叫左兩樣小菜 - 生炒排骨和蒜蓉炒菜心。野食方面就一般般啦，不過員工服務態度就好好，好有禮貌對待客人。當客人碟上都放滿了蟹殼、蝦殼，員工會主動替客人換碟，而且環境方面都較乾淨，令人都有舒適既感覺。椒鹽瀨尿蝦就十分彈牙，椒鹽味道剛剛合到好處，而且唔會過咸，亦唔會太辣。鹽焗奄仔蟹方面鹽焗味道夠甘香，蟹肉夠新鮮又鮮甜。果皮蒸鮑魚就一般般啦，唔夠軟腍，而且味道唔夠濃郁。清蒸蘇鼠斑就不過不失，可能魚比較大，有一斤以上，肉質就唔夠嫩滑，不過由於蘇鼠斑係深海魚，所以魚味都比較濃郁。生炒排骨方面，糖醋過酸，而且排骨又大又肥膩，唔太適合怕酸既人食。蒜蓉炒菜心方面，菜心就比較老，對於老人家就比較難咀嚼。…查看更多

我一家人都好鐘意食壽司，經常都會去日本餐廳食野，元氣係其中一間我經常光顧的日本餐廳。元氣既壽司真係唔錯，定期會轉換款式，例如一些季節時限推出既壽司 - 松葉蟹卷。呢款壽司賣相都好靚，味道特別，而且味道配合效果亦好好。壽司定食方面，價錢又唔算太貴，又多款式可揀，一個人都食唔哂，可以同大家share食，再叫一些小食配搭。刺身方面，叫左一碟三文魚刺身，每一件都好厚，叫一碟都唔夠食，因為太中意食三文魚啦。灸燒左口魚壽司係我近排都好中意食既壽司之一，一咬落去就融化，感覺好特別。另外，三文魚頭湯亦好吸引，湯既味道好濃郁，亦有三文魚頭和配料在湯內讓人進食，中意食三文魚既人可嘗試這湯。甜品方面，芝士蛋糕同朱古力蛋糕都好好食，而我個人中意食較冰凍既芝士蛋糕。另外，元氣既環境地方都好寬敞和整潔，令人有舒適既感覺，值得大家去嘗試。…查看更多

前幾日夜晚，我同細佬2個人諗緊食咩好個陣，細佬突然諗起去周記食野。黎到周記一定叫佢最出名既豬油揸麵。我地兩個會識食豬油揸麵係爸爸細個帶我地去食。細細個既我係唔太鐘意豬油揸麵，因唔太鐘意食咁肥膩既野。但依家再食豬油揸麵又有唔同既睇法，反而變得鐘意食，耐唔耐就想去食。周記最出名既就係豬油揸麵，雖然好普通既一碗麵，但又會令人好回味。另外，枱面上有好多配料可以自己添加，但我個人比較鐘意原汁原味，所以唔加任何配料。係豬油揸方面，每條豬油揸既脂肪都較平均，入口感覺唔錯，而係麵條方面，每條麵都較長和較硬，質感都好好。湯底就係用清湯煮，可以突出豬油揸既味道，令人一試難忘。…查看更多

今日下午同爸爸去左屋企附近間餐廳食晏，我地叫左一個西班牙風情薄餅同煙三文魚蔬菜忌廉燴飯。間唔中我都有係呢間餐廳食早餐，但午餐係第一次。由於呢間餐廳地方較細，所以餐枱就擺放得較狹窄。不過環境都好乾淨整潔。員工服務態度就一般般，因為員工數目唔多，所以叫餐時要叫多幾次先有人理。今日午餐其中一樣叫左西班牙風情薄餅，一開頭諗住薄餅應該係一人份量，比較細既薄餅。點知薄餅一黎到，見到分左8件，午餐兩個人食一個薄餅都足夠。西班牙風情薄餅好薄好脆，而且芝士好黏韌，份量又大，十分抵食。而煙三文魚蔬菜忌廉燴飯味道獨特，煙三文魚和蔬菜都好細細粒混合係飯，賣相亦比較色彩，吸引人嘗試。…查看更多

早前朋友有港麗酒店 - 樂聚廊既優惠，就請我去食下午茶，大家都叫左個tea set食。Tea set d 小食好精緻，分左3層擺放小食，而且樣樣野食都好唔同，有麵包，肉，餅，甜品等等。雖然等待時間較耐，但小食黎到見到賣相都好滿意。我係唔飲酒的，除左有酒類小食，我覺得其他小食都好好味和好吸引。飲品方面，我叫左杯熱檸茶，茶既味道唔會太濃太淡。地方環境方面十分寬闊和寧靜，而且可以一邊欣賞風景一邊享受下午茶，好適合朋友相聚既地方。另外，員工服務態度亦好好，好有禮貌，十分細心。…查看更多

早前同屋企人去左尚點到食晚飯，叫左5樣野食 - 火腿津白、上海粗炒、上海小籠包、蟹粉炒年糕和蟹粉炒飯。屋企人對呢間餐廳都好滿意，覺得野食同環境都唔錯。我覺得呢間餐廳既野食都好好味，地方都好整潔和寬闊，而且員工服務態度都唔錯。我個人就最中意食蟹粉炒年糕，真係用新鮮既蟹整，而且非常多蟹粉，味道十分入味，食完都想再食，屋企人都好中意食。當蟹粉炒飯黎到個陣，係見唔到炒飯。蟹粉佈滿係炒飯面上，有好多蟹粉可以撈飯食，味道亦好好味，蟹粉味道唔會太淡太咸。 上海小籠包味道都好入味，一咬就有好多汁，而且小籠包皮亦唔太厚。 上海粗炒十分入味，配菜和肉亦好多。 火腿津白都唔錯，味道較淡，適合老人家口味。…查看更多

前幾日同朋友食完野去行街話好想食甜品，咁岩經過滿記，就走左入去食。叫左3樣甜品 - 芝麻糊、雪山綠茶雪糕涼粉和芒果豆腐花。大家一齊share食，我個人比較中意食芒果，所以我覺得芒果豆腐花比較好食，不過芒果冇想像中咁甜。芝麻糊就一般般，同平時食既差唔多。雪山綠茶雪糕都唔錯，食材配搭唔錯，味道亦唔會太甜。…查看更多

平時間中都有食開紅蔥頭，今日中午又去左呢到食晏，叫左個板煎黑椒雞扒煎蛋飯。咁野食好快就到，當我一切雞扒個陣已經有d切唔開，起初以為係有筋切唔開，點知再切睇原來係唔熟，雞既肉仲係紅色既。之後就同員工講，員工好有禮貌咁答我話換一份新既比我。新既一份餐黎到，員工又行過，我見到佢望住我份新既餐就同佢講今次雞扒熟哂，冇問題。而個次員工就好好話如果有問題記得再話佢知，佢再反映下。不過新既雞扒雖然熟哂，但今次真係有筋。野食方面可以有進步空間。平時對呢間餐廳感覺都冇咩特別，但冇咁深刻印象，因為野食水平我覺得普普通通，但今次發生呢件事我覺得員工服務態度好好，令人唔會覺得唔想再黎，雖然野食上水平就一般，但今次員工服務真係一流。另外呢間餐廳環境同衛生方面都唔差，好少見到有垃圾係地下，同埋比人感覺都舒服。…查看更多

我已經食過好幾次呢間餐廳既野食，今次帶朋友去嘗試下，結果朋友都好滿意，對野食讚不絕口。雖然價錢頗貴，但食物水準亦唔差。呢間餐廳環境亦好適合朋友相聚，而且好寧靜，加上地方寬敞，可以係餐廳入面好好享受午餐或晚餐。服務和衛生程度很高，服務員亦十分有禮貌對待客人，令人感覺舒適。 餐廳有唔同種類既熱狗比人選擇，我最中意食既就係和風熱狗，熱狗內的芝士腸味道十分好味，有好多芝士，一咬落去會有芝士流出黎。沙律味道唔錯，好清新，蔬菜亦好新鮮，好爽口。而且沙律醬汁十分好食，食完下次都想再食。意大利飯雖然份量較少，但味道好好食，而且飯好軟熟。餐湯既味道亦唔錯，好入味，而且經常轉換唔同款式的。可以叫套餐或單叫加錢要餐湯，大家可嘗試一下。小食方面，我係第一次食。我覺得小食炸得好脆卜卜，而且都有好多選擇可揀，適合大眾口味。…查看更多

聖誕節第一次同朋友黎呢間餐廳食放題，2個人叫左好多野食試下，當中好多野食都好好味，適合大家既口味。雖然環境比較狹窄，但餐廳內員工態度都唔錯，我同朋友book了8點15分，但我地早左15分鐘到就同員工講姓名、時間，員工就叫我地8點15分再黎。咁8點15分再到，當員工見到我地就記得我地姓名、時間。只係好小既事，就令人覺得好細心。有座位後就即刻order野食，最快黎到既係刺身，味道鮮甜，而且賣相都唔錯，我特別中意三文魚＆帶子。燒羊架賣相吸引，味道亦唔錯，而且沒有太大既羊羶味。當手卷(迷你)黎到個刻，覺得好細、好得意，讓人一口一件。炙燒壽司賣相不錯，而且醬汁＆壽司味道十分配合。小卷壽司賣相亦好得意，細細件。總結：呢間餐廳有好多野食可選擇，又有好多飲品，雪糕可選擇。野食既味道亦不錯，適合大眾口味。…查看更多

昨日同朋友慶祝聖誕節，朋友帶我去左呢間韓國餐廳食野。第一次係呢間韓國餐廳食野，頭盤既泡菜十分入味，味道唔算太辣，適合大部分人食。另外，好多食物都有芝士在內，好適合中意食芝士既人去試！而且每款食物份量都好大，4個女仔叫左3樣野食就食到好飽了，好滿足！ 我地4個女仔叫左蜂蜜蒜香炸雞、香甜芝士排骨和芝士泡菜炒飯呢3樣食物試下。結果不負眾望，呢3樣食物都好好食，特別係香甜芝士排骨，味道真係好正，有機會一定要試下！！蜂蜜蒜香炸雞好卜卜脆，而且仲有好多薯條伴菜。最後，芝士泡菜炒飯都唔錯，有芝士配泡菜炒飯令到味道唔會剩係食到辣味。下次再去呢間餐廳一定會再嘗試更多其他特色食物。…查看更多