為食小花's Profile

現烤三黃雞燒得皮脆肉嫩，十分香口，肉汁豐富，但略鹹，配菜的焗薯角酥脆可口，車厘茄新鮮香甜。忌廉煙肉意粉都好食，偏甜，加啲芝士粉同Tabasco啱啱好。一人套餐包杯嘢飲，仲有小食，我哋揀咗兩條肉腸。牛油果奶昔用料十足，好 rich，好 creamy ，好飲。食到咁上下，差唔多食完嗰陣，服務員拎咗兩件四川麻辣香腸pizza 俾我哋試食，係新產品，好新奇，幾好味，但好辣。服務好好，服務員十分之有禮貌，笑容可掬，環境寬敞，十分舒適。…Read More

之前見朋友食完晚飯大讚, 尋日一行十人去食 Lunch 和同事慶祝生日, 五個前菜, 一個湯, 六個主菜, 加生果. 每位 $380+10%. 一開始已經吩咐侍應我們趕時間, 但上菜速度都係太慢了, 不停催促都食咗成兩個鐘. 頭盤冷菜：怪味松板肉 – 無咩肉汁, 有D乾燒椒醬花螺 – 無咩味, 好似白灼花螺咁巴旦木蜜烤南瓜 – 南瓜好甜豆豉鯪魚油麥菜 – 十個人呢個份量大少了, 每人只分到一茶匙, 豆豉鯪魚和油麥菜都不是貴價食材, 建議大方D 俾多小小雕皇醉香蝦 – 賣相好靚, 但剥走蝦殼之後 D 蝦肉好霉, 質感怪怪的, 好似浸酒浸過龍湯：芹香紫菜丸子燉雞湯 – 個湯好清, 肉丸彈牙, 將烘乾的紫菜俾客人自己浸落湯一齊食, 好食主菜：雞油狀元紅蒸馬友柳 – 十個人入面有三個話鯹, 我覺得還可以大少酥薑蔥脆皮雞 – 皮脆肉嫩, 仲去埋骨, 好食脆皮咕嚕肉 – 同前菜的 “怪味松板肉” 差不多, 加咗 D 酸酸甜甜的脆糖, 幾得意金沙蒸豚肉餅 – 個樣唔好睇, 味道是可以的, 叫白飯不用另外加錢映水芙蓉 – 蒸水蛋好滑, 好鮮味春菜煮肉丸子配一口米粉 – 一上檯就發現同頭先個湯咁似樣嘅, 都係果 D 肉丸, 加咗D菜, 寫菜單的要打手板, 不過個湯撈米粉係幾好食的時令鮮果盤 – 個蜜瓜係好爽甜, 藍莓係好大粒, 但是得兩種生果稱不上是果盤吧 整體來講有D失望, 呢個價錢可以有好多其他選擇, 應該無下次了.…Read More

喺銅鑼灣返咗咁耐工, 都唔知原來呢度有間咁正嘅餐廳, 環境舒適, 樓底好高, 好 spacious, 同幾個閨蜜食飯傾偈就最啱. 食物方面更加係出乎意料之外咁好食, 完全可以媲美米芝蓮星級餐廳. 我地今日試咗六道菜式的 “主廚嚐味餐單”, 超豐富, 十分驚喜. 用來熱身的餐前小食, 在切成幼粒的蝦肉刺身上鋪滿魚子醬, 份量都唔少, 十分開胃. 第一道前菜是秘魯式香料油甘魚生薄片, 油脂豐腴的新鮮油甘魚刺身, 伴以油封番紅花蘋果, 檸檬青瓜和鱒魚子, 賣相超吸睛, 好食到不得了.第二道菜是我最愛的法式鵝肝凍批配煙燻鰻魚, 鵝肝凍批幼滑味濃, 放上烘得脆脆的多士上一齊食, 再醮小小芹菜根醬, 絕配.開始上主菜了, 是阿拉斯加黑鱈魚, 釀羊肚菌配法式黃酒汁, 件鱈魚扒煎到金黃色, 外脆內嫩, 幼幼的羊肚菌入面仲釀咗小小肉, 好似係雞肉, 好特別. 再來另一個肉類主菜, 是澳洲和牛柳, 服務員建議五成熟, 我本來都怕會太生, 驚會血淋淋, 一刀切落去已經感受到塊牛肉係幾咁優質, 超級軟熟, 肉味濃郁, 口感一流, 配菜的味噌迷你紅蘿蔔和法式千層薯簡直係錦上添花, 從來未食過咁好味嘅牛扒. 最後甜品點咗好似做 show 的即席藝術甜品畫 “Jackson Pollock”. 服務員在黑色玻璃畫板上用不同汁醬畫黎畫去，放上多款精緻甜點，最後再撒上乾冰，煙霧離漫，好有意思。…Read More

澳門新商場, 新餐廳, 這次先試試泰國菜, 下次再試樓上的淮揚菜.點咗幾個招牌菜, 青木瓜沙律 - 酸甜開胃, 充滿泰式風味; 泰北燒雞 - 連埋個炭爐上枱, 皮脆肉嫩, 燒得香口; 黃咖喱軟殼蟹配蒜蓉包 - 黃咖喱偏甜, 最啱我呢種怕辣人士, 配蒜蓉包一絕, 麵包超鬆軟, 蒜香澎湃, 醮咖喱汁好食到唔停得口; 斑蘭千層糕 - 清香軟糯, 賣相精緻; 椰汁西米糕 - 我最愛的泰式甜品, 一個人可以清晒成碟。餐廳設計時尚, 寬敞舒適, 另設室外露天雅座, 而家呢啲天氣真係最啱坐室外, 邊飲邊傾, 心曠神怡!…Read More

呢間 café 好近我公司, lunch time 成日都好多人, tea time 行過見到有幾隻狗仔喺入面, 原來係寵物友善餐廳. 餐廳樓底好高, 中間有梳化位, 我一個人就揀咗埋邊的 table, 點咗一件 $48的芝士蛋糕, 加 $18 追加兩小塊迷你薯餅, 無點飲品, 可以自己裝水飲. 件芝士蛋糕真係好好食, 上面灑咗小小朱古力碎, 蛋糕軟硬適中, 質感軟棉, 芝士味濃, 好想 encore. 追加的薯餅的的骰骰, 新鮮炸起, 熱辣辣. 隔咗兩日再去幫襯, 今次食下午茶 menu (3pm 後供應), 點咗牛油果煙三文魚三文治, 餡料尚算OK, 但塊麵包真係太令人失望, 又乾又硬, 微暖但硬嘅程度應該係預先焗好, 放咗一段時間再翻焗, 真係食到脷都損埋, 不推薦.…Read More

朋友請我食生日飯，梗係要食好啲，呢間鐵板燒裝修得好靚，仲以為好貴，點知原來而家做緊買一送一，午餐有鮑魚、鵝肝、大蝦、牛肉、炒飯等等，幾百蚊一位就有交易，真係好抵。鵝肝煎得焦香，配生果食可以解油膩，墊喺鵝肝下面嗰塊麵包都咁好味。個鮑魚係成個餐嘅主角，好生猛，仲郁的，好鮮甜又爽脆彈牙，個鮑魚肝醬先係一絕，好想問師傅攞啖白飯，撈埋個醬食。隻大蝦超巨型，其他鐵板燒餐廳會就咁煎蝦，呢度配埋一塊蝦膏多士，好濃郁，好特別，就算膽固醇超標都一定要食。牛肉薄燒五成熟最啱，連伴碟嘅炸蒜片都超好味。我哋六個人，啱啱坐滿一間房，餐廳樓底好高，十分舒適，抽氣又好，食完唔會成身一陣味。…Read More

呢個日式下午茶，真係超級抵食，勁飽，份量十足，足夠二人午餐的份量，仲有無敵海景，$498有咸、有甜、有壽喜燒，仲包兩杯嘢飲，冇得輸！壽喜燒兩塊日本和牛好大塊，雪花油脂分布均勻，睇個樣就知好味，鹹點有沙律、大蝦壽司卷、有燒物、有炸物，仲有兩壺茶壺雞湯，飽到甜點都食唔晒。飲品仲可以揀果汁、汽水、清酒、燒酌或者紅白酒，我哋唔飲酒，所以揀咗柚子梳打同提子梳打，一樣咁好飲。呢個 tea set 真係抵到冇朋友，一邊食一邊欣賞維多利亞海港美景，超值！…Read More

之前鍾意食Mango Fever （$70），最近轉左食Banana Split （$56），因為平好多。佢啲Yogurt真係好香好滑，唔同材料配搭得好好，香蕉乾脆卜卜，香蕉果蓉酸酸地配合Yogurt 好夾，連淋喺上面嘅朱古力都食得出係靚嘢，中間仲有啲餅碎，最底下層有啲生果粒（蘋果、蜜瓜等等），層次豐富，回味無窮。地方雖然唔係好大，但有太陽光照射，好舒服，我通常下午茶時間嚟，冇乜人，可以慢慢食，慢慢坐，真係日日都想黎。…Read More

星期六晚的沙田新城市廣場人頭湧湧，呢間新開的泰國菜門口排晒長龍，好彩朋友一早訂咗枱。坐低之後一路揭餐牌，樣樣都好吸引，仲好抵食添，賣相精緻，價錢實惠，睇相已經流晒口水。我哋五個人，叫咗好多嘢食，全部都好有特色，連飲品都有個好靚嘅籃仔包住。幾款小食都好出色，最鍾意個蟹棗，外面好脆，入面啖啖蟹肉，醮椰漿食好好味。蝦多士配蟹膏，賣相一流，又香又脆。豬頸肉沙律，風味地道，清新開胃。最特別係個冬陰功湯，竟然用咖啡壺喺你面前煮，新鮮滾熱辣，湯頭好濃，大蝦新鮮，滿足晒視覺、嗅覺和味覺的享受。甜品方面，有我最鍾意嘅泰國街頭小食 - 香蕉薄餅，煎得十分香口，餡料豐富，超讚！…Read More

想搵個地方同媽咪慶祝生日，平時同老人家食飯多數食中菜，今次帶佢食西餐。呢間餐廳喺屋企附近，開咗冇幾耐，估唔到有驚喜喎！餐廳唔算好大，都坐得幾舒服，大部份嘢食都好味，價錢仲好抵添，性價比好高。一坐低，侍應就送上一兜炸芋頭脆片，好薄好脆，鹹鹹地，超好味。藍青口份量好足，但唔夠鮮味。Beef burger百幾蚊，好抵食，薯條熱辣辣，脆卜卜。Carbonara意粉個樣麻麻哋，但味道十分好，媽咪最愛。個 Classic Shepherd’s Pie 估唔到咁大份，不過都幾heavy，食唔晒，打包返屋企再食。中間仲發生咗一個小插曲，我細佬唔小心整跌咗杯酒，成杯倒瀉晒落地下，個侍應好快咁埋嚟抹乾淨個地，之後仲重新斟過一杯俾佢，超貼心服務，大讚。最後甜品點咗朱古力心太軟，同埋橙酒班㦸，侍應喺你面前點火，好有儀式感。我同侍應講媽咪生日，叫佢幫我插支蠟燭，佢仲喺上面寫埋Happy birthday，原來個朱古力心太軟冇收我哋錢，話係請我媽咪食嘅，好開心，下次一定會再嚟。…Read More

平時唔太喜歡食拉麵, 因為覺得一般的豬骨湯拉麵個湯底好肥好油, 早排經過奧海城見到呢間新開的日本過江龍鹿兒島拉麵店係用雞湯做湯底, 個樣都幾吸引, 就入去試下啦. 我點咗一碗檸檬牛油雞白湯拉麵 ($98), 再加幾個小食同老公 share.我都係第一次食拉麵加檸檬, 估唔到又幾夾喎, 酸酸地有陣陣清香的味道, 個雞湯底打到起泡, 好濃郁, 又滑溜, 兩片慢煮日本雞肉軟腍入味, 仲有成隻溏心蛋, 麵質彈牙, 好食!另外幾個小食都有驚喜, 尤其是個雞皮餃子 ($48), 酥脆香口, 好特別. 日式香酥雞珍 ($58) 份量都幾多, 好爽口, 調味恰到好處, 一口接一口追住食. 月揚庵魚餅 ($48) 係鹿兒島名物, 我之前去鹿兒島旅行都有買返黎做手信, 一路食D回憶返晒黎, 攪到我好想即刻飛返轉添.…Read More

想試好耐，次次經過都要排隊，今日晏咗食 lunch，去到終於唔洗排隊，一個人坐低，睇 menu，叫咗碗砂鍋鮮牛肉粥，個侍應好識 upsell，每一個點粥嘅客人，個侍應都會問客人加唔加皮蛋，我加咗，另外想食埋魚蛋蘿蔔，我問個侍應可唔可以雙拼，佢話冇，要分開點，佢話份量唔多，可以叫幾款，我驚一個人食唔晒，只點咗蘿蔔，上枱時見到個份量，真係極細兜，得五小件蘿蔔，細碟都算啦，物價高漲，但一啲都唔好食，太淋 pat pat，輕輕一夾都爛晒，個牛肉粥更加係超級難食，又係好細碗，隻皮蛋幾靚，但係啲牛肉真係勁唔掂，「拿」到一啲味都冇，質地好似擦膠，完全冇牛肉味的，好似食橡根咁，冇下次。 …Read More

見到網上咁多好評，同屋企人黎試下，但係食完之後有啲失望，啲芡汁太濃，全部嘢都好鹹。飛天通菜 - 勁鹹，個蝦膏醬浸住晒啲通菜，要撈白飯一齊食先無咁鹹。啫啫雞煲 - 份量好少，個汁杰撻撻咁，又係好鹹。避風塘鮮魷 - 炸漿好厚粉，炸到過咗火，有少少燶味。脆皮炸豬手 - 呢味最好食，起晒肉，砌得好靚，皮夠脆，切到一條條，方便食。芝士琵琶豆腐 - 好創新嘅食法，但味道麻麻地，又係好鹹。好爆場，晚上十點幾入座，限時90分鐘，有夜鳥優惠 88折，係幾抵食嘅。…Read More

就算天氣幾熱都好，一年四季日日都可以打邊爐，最近去咗挑戰呢間在銅鑼灣新開的四川火鍋店。開爐之前熱熱身，先來幾道四川小食，招牌辣子雞、雷椒皮蛋、夫妻肺片、紅油蒜泥白肉、四川臘腸… 是正宗川菜的味道。人多可以開兩個爐，一辣一唔辣，今晚試咗四川麻辣鍋和椰子雞鍋。先來一個超級海鮮拼盆，有蟶子皇、鮑魚、海蝦，美侖美奐，震撼眼球。再來鱔片、手切牛肉、手打三寶丸… 令人目不暇給之際出現了一般火鍋店少有的熊本天草大王雞，塊塊手掌咁大的雞柳，可想而知呢隻大王雞的真身有多大，再來一碟鮮嫩滑溜雞頸肉，超有驚喜。食得津津有味突然來了一道騰雲駕霧的「冰川鵝腸」，用冰彫成的冰壺盛載爽脆鵝腸，連本身平平無奇的薯仔和蒿筍都變得非同凡響，精細刀功堆砌成藝術品一樣！最后奉上的甜點紅糖流心糍粑令人留下甜蜜蜜的深刻印象。…Read More

呢度好近我公司，啲嘢又幾好食，所以老細成日都請我哋去呢度食 lunch。今日五個人叫咗好多嘢，食唔晒要打包。我最鍾意食香口嘢，叫咗蝦多士同椒鹽白飯魚，蝦多士係幾好食的，夠脆，唔會油淋淋，不過成 $40 一件，我覺得都幾貴。佢啲蒸點心都好食，蝦餃燒賣大大粒，皮薄饀靚，啲蝦又新鮮，個黑松露帶子餃用料十足，配搭得宜，超讚。炒粉麵都好正，亁炒本地牛河好夠鑊氣，啲牛肉好腍好軟熟，懷舊肉絲炒麵啲麵脆卜卜，掂！奶黃煎堆仔圓轆轆，好飽滿，流心奶黃爆晒饀，外脆內軟。…Read More