love_feed's Profile

今日經過耀華街搵野食，見到呢間Shining Star Bar & Restaurant, 就同朋友試下，一出電梯就覺得好似去左party room 咁，又有得玩飛標，又有得玩桌球，而且周圍都有大電視播緊演唱會，氣氛幾唔錯，感覺可以比人食完又可以玩下，幾有趣！我地兩個人就試左食時令生豪串燒放題，120分鐘任食，每位438，以又有生豪，又有串燒重要任食黎講，我地都覺得幾抵，所以決定一試。🦪生豪🦪賣相真係好吸引，用一個好似寶箱既盒成盤咁上，而且有冰鋪左係底保持新鮮，非常適合打卡，生豪都幾大隻，有海水味，我本人就唔太好生豪，食左兩隻就夠，朋友就幫我掃晒其他。侍應哥哥非常細心，佢重準備左每人一個細桶比我地放生豪殼添。🐑紐西蘭羊架🐑份量十足，一碟有兩大塊，而且相當厚身，兩邊都有煎到金金黃黃，表面香火但肉質細嫩，有少少羊羶味但可以接受，伴有薯蓉做配菜，都好夠飽🐂澳洲M2 牛肩胛🐂朋友點既呢個牛肩胛就叫左5成熟，略微過左少少火，但都算唔錯，一樣咁厚肉，肥瘦都好平均，口感豐富，👍👍🍢串燒🍢我最鐘意都係佢地既串燒，我地叫左秋葵，鴨胸，雞軟骨，雞翼，蒜香炒雜菇，全部都好夠熱，好野味，雖然細細份，但可以encore ,唔夠再點，唔怕浪費食物，幾唔錯👍唔記得講，個餐重有前菜三文魚刺身，火腿，風乾牛肉同個蘑菇湯🥣其實真係好夠飽，每人500蚊有找就食到咁多野，又有得玩，好岩一大班朋友收工黎放鬆一下。…Read More

呢期突然想食下d重口味野醒一醒神, 所以就揾到呢間係尖沙咀厚福街H8大廈既大樹燒烤啦.🍡餐單既食物種類都算多,有串燒肉類,鍋鍋燒,海鮮,丸串類,素類,連小食甜品都有添,見佢價錢又好親民喎，👍所以就決定同朋友試一下.我地一共點左15款野食, 有幾款係特別出色想大家有機會都試一下.🦐青椒釀蝦滑🦐有少少似平時食既煎釀三寶, 但因為佢係燒,所以就無左果一層油膩感,青椒🫑燒得好淋,而蝦滑又保持到爽口彈牙,加上面頭有芝麻, 好香口.🍆大大大茄子🍆食串燒一定一定必點既其中一樣就係🍆燒茄子,呢度既燒茄子超級有份量, 重大過我隻手,蒜粒分布好平均,確保每一啖都充滿蒜香,而且有蔥花同辣椒粒,有多種味覺享受,大推🫶🍄金菇肥牛卷🍄呢個組合又係無敵之選,牛肉油脂充足,肉質幼嫩,食得出唔係cheap cheap 肉,包埋金菇,吸收晒肉汁既精華,又可以平衡一下個肉肉感.🐑紐西蘭羊骨扒🐏呢個羊骨扒十分野味, 羊味濃但又唔會過羶,加上孜然同辣椒粉既加持,完全有一種帶領你去左草原同羚羊奔馳一樣.不得不提一下, 店舖大分貼心, 食串燒🍡最緊要夠熱,🫕所以每枱都有一個爐可以一路熱住d食物,就算掛住傾計都唔驚啦,如果你係超級重口味既話, 重可以自己加孜然同辣椒粉添.我地食左咁多野連野飲同加一費, 埋單💳5百鬆d,為返每人只係2百幾, 我覺得以食物質素黎講好抵食,會回頭幫襯😋。📍地點:尖沙咀厚福街8號H8 12樓…Read More

呢排心癢癢想食日本野🇯🇵朋友就介紹左一間係尖沙咀綿登徑既黑門水產🍤地點好方便,N1 出口行2分鐘就到,十分就腳。🐟北海道密柑鯛魚刺身🐟擺盤相當精美，鯛魚刺身色澤晶瑩禿透，而且厚度適中，唔會好似紙咁薄，食落口感爽甜，食得出好新鮮，每人大概有4-5塊，以頭盤黎講，份量岩岩好。👍🐡鱈魚白子🐡比個名吸引左想試，第一啖感覺好特別，佢係比較鹹香，而且口感爽得黎又有微微既粉感，可能因為味較濃，所以得兩啖，一人一啖就可以食晒😂。🐚赤鬼蟹味增甲羅燒🐚呢個可以話係重頭戲，員店細心會比我地影完相打下卡先拎去燒，蟹子同魚子都大大粒，中間有粒鵪鶉蛋，蟹膏鋪滿係底度，感覺好豐富，果然燒完出黎後，配上梳打餅食，絕配，蟹膏味好濃，有少少傑身，每一啖都有魚子粒粒係口度，口感十足，兩塊梳打餅唔係好夠，可以的話加多兩塊就perfect 🤘🤘🤘🦀蟹油蒜燒帆立貝🦀帆立貝大大粒，配有金菇同魚子同大量蒜粒鋪面，燒出嚟好香，而且帆立貝新鮮鮮甜，連汁都忍唔住想飲埋佢😍🍣黑門三文魚加州反卷🍣分量十足，有成6塊，每塊都足料，大大塊三文魚包住飯團，入面有蛋同蟹柳，夠晒飽。🍽️三文魚牛油炒雜菌🍽️牛油味相當濃，伴隨有煮熟左既三文魚粒同雜菇，我覺得如果可以炒得乾身少少會更好。🥚黑門鰻魚玉子燒🥚呢個鰻魚玉子燒，入面既蛋卷包住左一小塊鰻魚，比一般既玉子燒特別，味道都相當唔錯🌯🫔鐵火卷🫔吞拿魚小壽司🍣，每件都係一小口size ,一啖過好方便，入面既飯似係醃製過，所以味道比一般既壽司特別，層次豐富。今次兩個人食到好滿足，而且餐廳裝修十有風格，令人置身於日本，性價比甚高，值得再次光顧。❣️❣️❣️📍尖沙咀棉登徑8號地下3-4號舖…Read More

今日收工約左朋友係K11 附近搵野食,意外地比呢間叫Jagger既餐廳外表吸引左,佢門口有大大個紅色燈招牌,🚦好搶眼, 而且重係落地玻璃摺門周圍有好多🪴植物🌴擺設, 門口造左幾個cushion 位可以比人坐係度打下卡,好有心思, 而餐廳入面就以黑白▫️▪️為主調,感覺好光猛,好似去左外國d café 咁.其實佢重有一個outdoor area 🍽️,一樣咁chill,好適合食水煙既朋友仔.我地兩個女仔揀左3樣野食,🍴一人一杯野飲.🦀️軟殼蟹牛油果沙律🦀️沙律菜同小蕃茄都十分新鮮,而且重好有心思地配上鮮花做點綴,視覺效果滿分,而炸既軟殼蟹食得出係現炸, 好脆身又唔會過份油膩,配合牛油果感覺好清新,以呢個作為前菜真係最適合不過.🐙避風塘風味䙺墨魚麵面🐙平時食開既墨魚面係好易食到成口黑蚊蚊,又好驚d墨汁滴到衫同裙, 而今次呢個就好大驚喜,因為面條已經吸收晒墨魚汁同上色,省卻晒以上既煩惱,䙺肉份量十足,又夠大隻, 食得出海鮮既鮮味,而且有脆脆鋪係面,每一啖都食到面既彈牙,口感十足, 兩個人食份量岩岩好.🐷炭燒加拿大有骨豬鞍扒🐷今晚最欣賞既就係呢個主菜,一上碟就已然感受到佢有返咁上下重量,店員好細心咁已經切好一份份方便客人享用,廚師輕輕燒過扒身兩邊, 食到少少炭燒味, 同時又鎖緊到肉汁, 依然保持到肉質既嫩滑,絕對唔鞋口,我同朋友都一啖一啖咁 , 唔覺意就清左碟, 另外佢重有一個焗薯,食埋就岩岩好.我同朋友今晚都唔想飲酒, 所以就叫左mocktails, Sick leave 🍹同 Jumbo Jungle🧋兩杯都係用水果同果汁soda🥝🍓做base,飲落好fresh 好開胃.我地不經不覺就咁傾左2個鍾,大家都對今次呢間餐廳大分滿意,下次天氣無咁熱,重想試下坐出面感受下唔同氣氛添.📍地址：📍尖沙咀麼地道31-41號FHP購物中心26-30號鋪…Read More

今日早半日收工，無帶lunch ，唸住就腳係樓下買個外賣返屋企慢慢嘆🍜，經過樂園，就入左去睇下有咩好食。之後我就揀左個魚片，韭菜餃湯河，加一杯熱奶茶啦。店員好好，會主動問我需唔需要分湯，好細心👍。外賣份量都唔會比堂食細份，有成3粒韭菜餃同4塊大魚片，韭菜餃🥟好大粒，而且好足料，豬肉同韭菜既比例好平均，皮又夠薄，食落好有口感，食到豬肉豬肉既鮮味，韭菜又夠香。而魚片既厚度適中，都算幾大塊，配埋個清湯底完全帶出埋魚肉既鮮味，會令人想飲多兩啖湯🍜。河粉就係比較幼同滑身，配合埋附送既辣椒油就可以添加多兩份野味，注意，佢個辣椒油🌶️都真係幾辣，唔食得辣既朋友就要唸清楚先好加。奶茶就正常水準，茶味比較濃，整體黎講都算香滑，成個餐53蚊好抵食丫，食完都真係幾飽😋😋😋，可以再幫襯。…Read More

尋晚有朋友生日, 一行7個人就相約左去食小魚兒, 因為見到佢有得食雞煲,烤魚同串燒, 一次過可以滿足晒三個願望.我地就叫左半隻雞煲 , 同揀左凌波魚(爆醬鳳梨香辣豆花)口味,兩款都揀左BB辣.雞煲一黎就好香, 有一大埋香菜鋪左係面, 入面重有大量洋蔥,雖然只係叫左半隻, 但都好大份量,而且雞肉好嫩滑入味,我地重叫左豬肉片, 肥牛,蔬菜拼盤,午餐肉,做配料每樣都好足料, 特別係個豬肉片同肥牛片相當出色, 肥瘦平均,色澤粉嫩,食得出係高檔肉質。而烤魚都非常大條, 凌波魚第一次試, 魚肉比平時食開既海鱸魚肉積更加厚身同結實, 而且油份比較重,相對魚骨都多, 食既時候要花少少時間去骨, 都唔會太大困難,問題不大.本身條魚上面已經有幾塊新鮮既菠蘿, 感覺好新奇既組合,但估唔到菠蘿放入去煮熱左後, 佢既酸甜味同炸魚既辣味係咁夾,而且煮林左既菠蘿一咬就溶係口, 感覺好得意.加上少少已經有既寬粉,煙煙un un 真係口感一流.我地重叫左幾款小食, 有炸魷魚, 炸豆腐,拍青瓜,燒茄子, 全部都好好食,我地另外重有叫野飲同啤酒,叫到全桌都係, 睇到都好開心, 我地準備左個蛋糕比朋友, 佢地係會收切餅費50蚊, 不過又無幫我地切餅,可能因為佢要趕住清場收工, 原來佢地收10點架, 我地8點先開始黎講係有少少趕囉,不過佢地都算幾好, 無開口趕我地, 我地都識做既,總結黎講, 野食係好食既,如果可以收晏少少會更好,經openrice 訂位係有9折既, 今晚平均每人都係350蚊, 食晒雞煲,烤魚同小食係非常抵,我會想約其他朋友再食既.…Read More

經過上次同事既散水餅之後 , 今次我就決定要試埋佢其他甜品,見佢有成六款唔同水味既法式葡撻,我就揀左藍莓葡撻,草莓葡撻同肉桂蘋果葡撻啦沛藍莓帶有少少酸酸甜甜既味道,感覺清新開胃, 而且食得出佢既撻皮係好有層次, 每一啖都感受到佢既鬆脆, 一咬落去直頭有脆裂既聲音,而且入面既蛋漿比教厚身同偏向甜, 但又未至於會令你覺得膩既感覺.而肉桂蘋果相對地就無藍莓味咁突出, 但係淡淡既肉桂味配合面頭幾粒蘋果肉,顯得份外清新,我本人就比較鐘意肉桂撻多少少啦, 而個草莓撻我就請左同事食, 聽佢講返佢都讚口不絕咁話.以20蚊一個黎講,價錢唔算好平民 , 但我覺得佢對得住呢個價既,值得一試.…Read More

今日無帶lunch , 又趕唔切叫外賣, 唯有急急腳落公司樓下揾野食, 見到間間鋪頭都好多人等入座同拎外賣,我就唔想同人迫,所以轉左入starbucks 睇下有咩岩,無意中比我見到呢個蕎麥面配烤雞沙律, 賣相都好似唔錯, 決定買返公司慢慢食.呢個沙律有火箭菜鋪係底,菜都算新鮮,另外重有少量蕃茄仔同秋葵,蕃茄仔好甜好清爽,食左一啖菜後, 雞肉份量可以接受 , 有4大塊, 雖然係凍食, 但都食得到佢既雞似係好厚實,唔算鞋口,而且表面有少少日式酱汁,增加左唔少日式既味道.我好欣賞佢唔單只有菜,佢重伴有蕎麥面做主食, 健康得黎又岩擔心唔夠飽既朋友, 另外重有一隻流心蛋添, 食晒成盒沙律都咪話唔夠飽,雖然呢個沙律要58蚊, 價錢算中上, 但我覺得間唔中食下呢d都唔錯.…Read More

今日打8號風球，但出面暫時都好風平浪靜，樓下食肆好多都重做緊生意，係超市買左少少餸準備聽日可能掛10號風球後，就唸住買個外賣返去做午餐。我今次揀堅信號既上海排骨菜飯跟一杯綠茶（51蚊），另外叫多份堅信生煎包兩隻（14蚊）。排骨炸得有少少過火，而且肉質比較鞋口，無晒水份，味道可以接受，份量都算多，而菜飯就無咩特別，正正常常，菜同飯既比例平均。而生煎包就做得唔錯，外皮有少少脆口，咬一少啖，先吸左入面既湯汁，湯味唔會過鹹，而家湯汁好充足又夠熱，再食到入面既餡料，有豬肉同少量蔬菜，以14蚊有兩粒都算幾抵食。…Read More

葵涌廣場出名多野食，今晚整完甲就唸住食埋野先返屋企，行過見到呢間係後巷既細妹姐餃子，就試下。由於我好餓，所以點左一碗豬肉餃子雙併配滷豬耳大碗面（63蚊），+7 可以加配冷熱飲。不得不說，一上桌，有少少驚訝，好大碗，因為一共有6大粒好似乒乓波咁大粒既餃子，併有少量肉燥。單單呢6粒餃子已經夠震撼我眼球。雙併餃子分別係九菜豬肉同椰菜豬肉餃，皮係薄既，入面既料係多既，肉同菜既比例平均，但味道一般，可能豬肉唔夠入味，好清淡，淡到我需要點一點辣椒油先得，米線分量係好多，面質可以中規中矩，湯底無咩特別，豬耳切得比較粗身，無麥滷水味，口感粗糙，總結，如果要求食得飽，佢係可以滿足到你，但味道黎講就略為遜色左少少。…Read More

繼上次係尖沙咀食左個唔多滿意既銘興山西刀削面之後,今日係大角咀就要食多次幫佢一洗罪名.我今日點既同上次一樣係醉雞刀削面餐加一個薑蔥炒牛肉.果然大角咀呢間無令我失望,醉雞份量好大份, 花雕酒味濃好入味, 雞肉鮮嫩滑溜,溏心多好有誠意,個蛋黃真係流心架, 同埋蛋黃味濃, 個人好鍾意食佢地既溏心蛋. 麵條煙韌彈口,大碗又夠飽,湯頭清得黎又有少少鮮味,配合雞肉一流.碟牛肉就正常水準, 但就好大份, 兩個人share 都無問題,呢間分店真係好值得大家黎試一下.…Read More

懶洋洋既星期日,又係時候揾食,有張80蚊coupon可以用,當然唔好浪費啦, 今次揀到呢間意樂餐廳,我點左個慢煮秘製咖哩焗烤雞配珍珠飯跟熱香滑奶茶(72 蚊),而老公督點左個香脆魚柳滑蛋蓋飯配西西里茄汁跟熱即磨咖啡(70蚊).我個飯同主菜分別使用唔同既餐盒,一打開盒雞見有有少量蔬菜係面,而且嗅到好香既咖哩味加少少其他香料既味道, 感覺好似幾好送飯, 食第一啖既感覺係, 雞肉表面烤得少少脆身, 而入面又保持到雞肉既嫩滑,咖哩汁係偏向甜身,唔會好辣, 但可能有其他香料,食得出應該有少少孜然醃製過,所以又有帶少少野味,食一啖雞我可以食多兩啖飯,珍珠米好大粒, 不過感覺唔係好夠水, 有少少硬身,不過問題唔大,奶茶以賣黎講算好大杯, 而且夠香滑添.我老公個餐都唔差, 我見佢個滑雞重係濕身既, 唔係全熟, 而且色澤都金黃, 而塊魚柳都佔左餐盒一半, 好有睇頭, 我試食左幾啖,滑蛋係正常水準, 不過不失, 而魚柳表面炸得都好夠脆,又唔會過份厚身影響口感, 魚柳味道比較淡身左少少, 但因為有個蕃茄汁伴隨既關係, 茄汁偏向少少酸,所以感覺好開胃,而且佢杯咖啡飲得出係真即磨,呢點要加分.5粒星滿分, 我會比3.5粒星, 會回頭幫襯下次試食意粉.值得推薦.…Read More

夜晚去完街返屋企,老公話口淡淡想買碗糖水返屋企食滋養潤一下,我就提議食金滿堂品,因為呢間野長期坐滿人, 而等堂食同外賣既人都唔少, 有信心保證丫.老公係芋圓愛好者 ,所以今次我就幫佢揀左個叫杏花村(凍)既糖水,入面有小丸子,芋圓,芒果, 豆花同杏仁露,一碗42蚊,入面既材料豐富,每一匙都佔滿各款既材料, 芋圓同小丸子夠煙靭彈牙,芒果今次略酸, 如果可以笨返少少會更好,而豆花同杏仁露出奇地夾, 兩者味道合而為一,有豆味既嫩滑之餘更帶有淡淡既杏仁香甜,每一口都係滿滿既幸福感,我地好欣賞佢既甜品唔會過甜,令人食得好無負擔而且感覺好清新,唔會有罪惡感,更加令人想去完又再去.唯一可以改善既地方就係唔夠凍, 可能天氣熱, 外賣拎到返屋企已經無左冰凍既感覺,如果可以提供小塊dry ice 作冰震作用,我相信會更加好.絕對會再幫襯試其他野, 大推.…Read More

老公拍板，今次佢揀左呢間大勝豬排清湯腩（九龍灣名物）外賣，個名就好似好勁，食過先知。的確，一打開既感覺係，好大份😂😂😂，老公點左個大勝豬扒煎蛋飯（64蚊），帶兩大塊烤豬扒同一隻煎蛋，有少少鼓油伴飯，如果有埋少少蔥花就更理想，不過唔緊要，勝在豬排真係炸得好鬆軟，而肉質又保持到嫩滑，加上少少鼓油配埋個煎蛋送飯真係一流。我就叫左個香煎雞排米線配酸辣湯（56蚊），雞排切件完都有成8大塊，雞排兩邊煎得金黃，唔會過火，雞扒一d都唔會鞋口，重好嫩滑，唔會有雪藏味，但個湯就比較失色少少，雖然佢有大量既酸菜，但欠缺左辣味，呢樣扣左少少分，但整體黎講好算滿意收貨，可以回頭幫襯既。…Read More

收工趕住返企湊小朋友，就唸住係樓下買碗雲吞魚蛋河外賣返去快食，落完單，5分鐘就拎得，好有效率，外賣份量都唔少，有3粒大雲吞同3粒大白魚蛋。雲吞皮好薄，好滑，入面有原隻新鮮大蝦同少少豬肉做內餡，食得出蝦既鮮味同肉質爽口，豬肉碎切得好細緻，每一啖都好豐富多汁，而白魚蛋就非常彈牙，有到淡淡既魚香味，配合清湯更加帶出魚既鮮甜，河粉係比較幼身，但份量好多，一個人份量黎講算好大方，另外會送一包自家制辣椒油，我落左少少，好夠辣，令到碗湯粉又多一種層次既享受，以47蚊黎講，我覺得好抵食，又夠飽，認真唔錯👍。…Read More