ft907's Profile

當晚同人慶祝生日,預約6:30, 我6:18  ,已經到達,  安排入座去行到最尾間房仔   裏面其中一張細枱.  入座前侍應生已經提醒本人,  用餐時間為兩小時. 之後還將2030 (八點半) 這個數字, 寫在我點餐的QR Code 紙上面, 生怕客人會忘記, 以免客人遲咗埋單,  會引起爭拗, 服務真是細心!  好了,  之後落單, 食物好快來到, 先來飲品兩杯, 之後好快嚟埋沙律, 沙律食咗少少已經跟手嚟埋意粉 ,  同埋豬鞍, 上菜速度非快如茶餐廳,  真是佩服師傅能夠這麼快送上食物, 一定覺得人客好肚餓. 盡快弄好,  解決人客飢餓之急. 結果食咗小半碟沙律嘅時候, 枱面上總共有:  兩隻玻璃水杯, 兩隻飲品杯, 兩隻餐碟, 一樽水, 一個大碟沙律, 一個大碟意粉,  同埋一盤豬鞍放響蠟燭架上面!! 真的可以畀我感受返, 喺大排檔同人搭枱, 嗰種擠逼親密感覺!  真的可以用盡枱面每一寸地方!   進餐時更加要額外小心, 訓練我手腳活動能力, 避免過大動作, 會把擺近枱邊碟豬鞍推落地下!   既然咁多食物喺度,  我哋好快就將佢食曬,   食完都未到7:40! 之後再叫起雪糕梳乎厘.食埋梳乎厘都係8: 05分,  真幸運啊,   還有許多時間 ,  才到8:30 ,   估計應該不會過時, 被趕走了吧?食物質素是好的,   有高級餐廳嘅水準,  沙律比想像之中要大碟, 意粉軟硬程度恰到好處, 醬汁也很美味, 豬鞍生熟程度剛剛好, 唔會過熟, 變咗柴皮. 肉質鮮嫩亦都好淋.  整體嚟講,  食物質質素是有水準之作.  梳乎厘亦相當美味, 但美中不足之處, , 就是連同梳乎厘額外落單的雪糕, 竟然成盒給予客人, 而並非把雪糕畢出黎擺在碟上面.  要知道  那是"雪糕梳乎厘"   並不是"雪糕+梳乎厘" , 客人應該不會 用那個附設的小匙羹 , 揸住杯雪糕嚟食呱?好了, 埋單的時候,  向店員反映檯面擠迫情況,  當時還見到出面大堂,   有些比較大的檯面,   都是坐兩個人,   我就是很奇怪,  我book 6:30枱, 當時都未有其他人, 餐廳內面只得幾枱人,   為何點解我會被安排在房仔裏面的一張細枱?  相信那些細枱,   只適合用作食甜品使用. 另外也反映了上菜速度, 正常高級餐廳, 應該是逐度菜上, 至少也應該食完頭盤,  才上其他意粉及主食吧! 但店員的回應是: 因為用餐時間是2小畤.........啊!  聽到如此的答案回應, 真是令我大開耳界, 茅塞頓開! 原來餐廳是為客人著想,  知道每枱人客只有兩小時用餐時間, 所以才一次過攞曬咁多樣嘢上嚟,   等人客可以快啲食完,   避免過時, 引起尷尬! 如此細心服務, 我真的無話反駁!最後總結, 這間餐廳食物美味,  對客人招呼,  無微不至 , 時刻提醒客人用餐時間,  仲要寫低畀你睇到, 避免過時。上菜速度飛快,  令客人可以在肚餓之時,  盡快享受美食之餘, 又不會因為要遷就上菜次序,  而引致食唔切, 搞到超越用餐時間限制, 到時便會引起爭詏,  引起客人不爽, 真的是用心良苦.  用小枱的高級西餐, 營造茶餐廳那種香港地小人多, 親密的特色..真是極具創意......不過這種體貼服務, 本人真是受不起了! 還是留畀其他懂得欣賞嘅人士吧! …Read More

喺灣仔唔知食乜，亂打亂撞，搵到呢間台式食肆，心諗都係一般嘢冇乜特別，一時之下，原來都有驚喜！入到去先睇睇餐牌，價錢正常價，70零蚊一碗牛肉麵，蛋餅,海苔魷魚鬚都係四五十蚊，跟餐，可以叫台式飲品，都係加8-12蚊,呢樣嘢真係收得平.先黎香辣牛肉麵，一時之下…嘩！啲湯香味濃郁，真係食過最好嘅牛肉麵，真係台灣食都未食過咁好味。當中白蘿蔔同紅蘿蔔入曬味，牛肉牛筋有數件，都幾大嚿而且唔韌，非常有牛肉味。麵質方面似乎淥得淋咗少少，如果硬返啲，就口感更加好。之後再食芝士肉鬆蛋餅，餡料豐富，裏面啲蛋質到滿，絕無欺場，餅皮做得都幾薄，唔會成嚿太厚。海苔魷魚鬚稍為差啲，似乎因為炸得太耐，剛剛過火，有少少燶燶地。呢一樣嘢希望店主可以留意一下。飲品就係小麥胚芽奶綠，都係一般台式飲品嘅水準。不過店員有主動問要唔要小糖小冰嗰啲，呢個值得一讚。店舖管理方面，我行入去已經見到有灘水喺地下，直到我食完走，攤水都冇人抹，呢個真係需要改善一下，否則跣親人就有麻煩。…Read More

因為喺附近做嘢，先至會走到過嚟呢邊食。一般茶記裝修，再加埋有燒臘，見佢掛出嚟啲燒臘都幾靚。於時乎叫咗個午餐。午餐大概有十款，有燒臘有即炒粉麵飯等等。等候期間已經聽到不少人話落錯單，或者甚至乎落漏單。唔係嗰樣嘢拿咗另一樣嘢嚟！我叫咗個燒腩仔拼燒鵝，等咗好耐，人哋隔離嗰台枱都食緊，佢仲遲過我嚟。叫阿姐跟返單，咁就好快出到。其實燒臘嘅嘢斬好就出街，又唔使煮。跟住原來嚟到係變咗叉燒併燒鵝！不過見佢啲叉燒都幾靚，有少少肥肉係好食嘅，咁就算啦 費事叫佢換。整體嚟講食物質素係ok。起碼燒臘係似樣。其他嘢唔知。不過見啲嘢未到就最好叫佢跟一跟單，否則等極啲嘢都唔會嚟！…Read More

結業前幾年食過一次，印象唔係太好，舊式茶餐廳咁黑蚊蚊，到佢結業嗰時，見人排曬隊更加唔會去。早幾日啱啱行過見佢重開，六點鐘到，畀佢吸引咗入去，其實170蚊一個餐都唔係平,不過見話重開又睇下佢有咩改善。結果入到去一坐低，即刻埋嚟好似好趕咁叫你嗌嘢！飲乜嘢湯。跟住我話睇下先已經有少少唔like。之後我叫T骨扒，佢又話冇！喂 ！大佬，你冇，出面你就劃咗佢啦！結果叫咗羊扒同埋普通牛扒。牛扒話五成熟，其實都係六七成！味道…同花園餐廳嗰啲差唔多，冇乜牛味，仲有少少梳打粉味。總括黎講係屬中下級數。蒜蓉汁黑椒汁都係一般舊式茶餐廳扒類嘅醬汁。羊扒有四件，份量好大，都係好一般嘅嘢，冇乜特別唔再多講。食得飽你，又唔係難食嗰種囉。跟黎嘅沙律同田螺都係一樣，基本嘢。好啦，最講返最重要一部分，就係服務，份扒我未食到三分一，佢已經埋黎問我飲乜嘢！跟住我話稍後先，又唔Like,成餐飯d侍應不斷喺你坐位側邊行來行去，每一枱都係咁，擺低啲嘢就好大聲話…奶茶，凍咖啡，牛扒…真係好怕佢揸住啲嘢會倒落嚟:(！有個侍應仲要好快咁喺度跑！食餐飯啫，好大壓力囉！食嘢咁大壓力，我真係食咗背脊骨落！唔消化兼夾胃痛！使唔使咁趕呀！總之成餐飯畀壓力你，就係想你快啲食完快啲走！既然係咁，我直情下次唔入嚟啦，多謝曬你！…Read More

星期三晚去，叫咗個豐盛二人套餐，其中羊架喺399元，埋單後發現收咗409， 收多咗10蚊.同侍應生講話唔啱數，跟住佢check咗一輪就同另一位侍應講話假期之後冇改返減10蚊呀！(因為佢星期六日會收多10蚊），我估計應該係忘記改返電腦，引致收多咗錢！但成程係冇同我解釋,點解會收多10元！唔好意思都冇一句！跟住就叫另一位侍應畀返10蚊我。我話唔係10蚊喎，因為有加一,所以應該係11蚊！於是又黑起塊面同畀錢我嗰位侍應講："畀返11蚊佢啦!" 嘩！阿姐，家陣我欠你嘅咩？？我攞返錢之後同朋友講，乜佢哋收多人錢，完全唔使同個客解釋點解嘅咩？阿姐聽到，才好勉為其難咁講話“唔好意思"! 咁嘅服務態度,想我返嚟再幫襯都幾難囉！講返食物先，套餐包咗頭盤，兩個main,一個飯或意粉,飲品,甜品,湯. 份量好足夠，先講個蘑菇湯，少少淡唔係太濃味。頭盤係蜜瓜火腿，好食嘅。但係蜜瓜冇整走啲核，細節唔夠囉。再嚟羊架三件，我叫medium 有水準嘅，切開冇流血，亦都幾好食。之後黎個意大利飯，份量比一般大。味道唔錯，好味，呢個要讚！再嚟西班牙黑毛豬，面頭煎得好脆，都係水準之上，都係要讚。但係兩碟main嘅配菜都係凍嘅!! 呢啲細節嘢真係要改善下囉, 冇理由拎啲嘢出嚟，畀人食係凍㗎嘛, 估計啲配菜應該係預先整好咗，擺咗好耐，然後夾上去嗰碟出餐就算數！咁樣做高級西餐係唔得嘅！加咗15蚊要杯朱古力沙冰，呢個又係唔得！雖然好似下面有一位師兄講，打到真係冇冰粒，好綿，但係唔多夠味囉，好淡下。甜品要咗雪糕，雪糕要加8蚊,但只係好一般嘅嘢,唔多抵食囉.總括嚟講，食物係ok嘅，（抱歉啲相，都係食食下先記得影)。裝修都係好過茶餐廳，叫做高級少少。但係侍應表現認真麻麻！極度需要改善，否則只會趕客。…Read More

大概6點3上到去,唔使等位,但已座無虛席。地方淺窄，有啲逼夾。因為我買咗一大袋野，所以我褪後張凳大概佔咗半條走廊，準備把袋嘢塞入枱底嘅時候，即刻畀阿姐喝住話：你唔好咁樣坐！塞住條走廊㗎！使唔使咁大反應呀？應該係人都知道我唔會咁樣坐啦，距離張枱成兩尺遠，我點申個頭埋張枱度食嘢呀？禮貌欠奉，態度認真麻麻！叫咗兩碗麵，其中一個係煎餃子，但啲餃子唔係煎嘅，係炸！炸到好硬，其實幾難食。餃子冇乜特別，另外一碗係淥餃子，都係正常嘅，冇乜特別。又叫咗皮蛋，都係好一般嘅嘢，老實講，譚仔好食過佢。千祈唔好叫佢嗰啲豆漿飲，淡到好似水咁！真係有被搵笨嘅感覺！見到嗰兩個阿姐不停監視啲食客，一見佢食完，幾乎筷子都未放低，就收走曬啲碗碟。收咗啲碗碟之後又繼續監視你！問你啲嘢齊曬未呀咁(淨係想你走咁)。有一枱更加直接叫佢哋埋單！可能過咗40分鐘掛……知你出面有人等位，但都唔需要咁嘅態度趕人，人哋真係有權坐足你限時的40分鐘㗎！總括而言，如果大家係有被監視嘅辟好，就可以去幫襯下，不過我就唔會再去了！食物又唔係有咩咁特別，都係好一般嘅嘢，無謂貼錢買難受！…Read More

見佢開咗一排，日日大排長龍，我今日六點幾去食，叫咗一份兩餸飯，一份三餸，堂食。結果完全失望！叫咗蒸倉魚(當兩份餸)，涼瓜牛肉，四季豆，蜆，但係啲嘢只係暖暖地，係唔熱嘅！我認為已經係一個最大失敗！份量有幾多，大家可以自己睇下，我真係覺得少囉！！畢左一格蜆畀我,我數過十幾隻蜆,得四隻有肉,其餘都係殼！跟住我成兜拎返出去，同阿姐講成兜蜆得四粒肉。跟住佢又話因為啲肉跌曬落盤下面，指示另一個員工，畢返一兜畀我，（個員工有少少黑面)蒸倉魚估計是雪藏嘢，(我只係憑味道估計，大家食過自行判斷）。不過味道都過得去，不過始終唔夠熱，食食下會有腥味。其餘兩味都係好普通嘅味道，冇乜特別。我覺得呢間嘢名大於實，啲嘢味道都唔係咁突出，價錢又貴過人幾蚊，俾我揀，真係一次就夠了！以上全是個人感受，好唔好食，夠唔夠熱，請自己去食過自行判斷。…Read More

環宇海鮮珍饈自助晚餐,  海鮮只得有龍蝦，琵琶蝦，麵包蟹，小龍蝦，翡翠螺，生蝦同埋兩款青口，( 竟然沒有長腳蟹! 但不知為何 2024年4月27號那篇食評裏會有長腳蟹??? )龍蝦琵琶蝦冇乜鮮味，麵包蟹殼冇乜膏，肉質也沒鮮甜味。剌身大概有七至八種，其中幾種來自中國！熱盤9款，都係一啲大路嘢.其中蒸多寶魚不好吃。Grill有羊架，牛柳同雞。我只吃了羊及牛，好一般。還有出面街邊買緊18蚊兩條的台灣腸！粉麵檔有豬骨湯拉麵同蜆喇沙。都係一般正常大路嘢。甜品幾款蛋糕楊枝甘露燉蛋白葡撻，朱古力噴泉等等。楊枝甘露好重奶味，勁甜，但沒有材料的(例如應該有柚子吧，但撈不到)。生果得三款，菠蘿哈密瓜西瓜，但質素不好，唔甜的。飲品有咖啡，檸茶，紅茶，橙汁同可樂，但可樂不是正常那種味道，不知是什麼牌子。裝在玻璃瓶裏面斟出來，所以沒什麼氣。movenpick雪糕有三種味道。目測，入場大概頂盡五至六成。成晚坐唔滿，六點開始，八點零鐘大部分人已經走曬。可能冇嘢好食。因為酒店餐廳比較遠，如果從市區入去每人大概來回車費要50元。(進出馬灣兩程車已經要30元）380元的自助餐叫做食得你飽，但請不要期望過高。嚟呢度食嘢，預計係食景觀多過食食物質素。…Read More

尋晚行過觀塘，想去附近食咖哩，突然見到呢間餐廳，同埋隔離有間專做燒鵝嘅，心大心細之下，行去睇下有咩食，都係一般茶記嘢，有固定晚市套餐，都係六七十蚊既野，但又唔多啱食，望下見七十幾蚊有小菜套餐，加上門口阿叔係咁推介話入去試下，即管入去試下。有一款未見過，叫做奇妙骨，就即管試下佢有幾奇妙。嚟到啦……原來係類似生炒骨嘅嘢， 只不過用咗豆豉，汁係極甜，可能用咗蜜糖，不過都算係幾好食嘅。72蚊有飯有湯，不過冇送熱飲，如果加埋送飲品，(畀多幾蚊都ok）咁就完美啦。…Read More

呢間嘢以前都食過，份量同味道都可以，但昨晚再入去就有啲失望。叫咗脆肉班蘭麵，四隻聖子(每隻18蚊，都預咗佢細隻㗎喇）同埋軟殼蟹農夫包，先嚟個麵，一食落去…啲湯暖暖哋咁樣…唔熱嘅！懷疑啲料擺入碗裏面再加湯上去，本身湯唔係滾，啲料又係凍，所以搞到成碗嘢只係暖暖地。之後再上聖子，又係暖暖哋唔熱嘅！農夫包係正常，不過啲軟殼蟹冇搣蟹腮。仲有少少苦苦地味。席間發生咗啲事都想講講。我哋下午6點05分入到去，佢話執緊枱，叫我哋坐埋一邊先，坐咗大概都幾分鐘先至叫我哋埋去另外一邊坐，好奇怪。之後落單想叫檸檬茶，佢竟然話冇！只有檸蜜同檸水，但個餐牌明明有檸檬茶……不過算了。 食食下阿姐走埋黎問啲嘢得唔得？我話兩碟嘢都係唔夠熱嘅，阿姐話你出聲吖嘛…換畀你。(我當時諗，咁樣質素，都唔知仲有冇下次，都費事換）就叫佢同廚房單聲，啲嘢唔夠熱，要注意一下。後來到差唔多食完，就嚟咗兩件椰汁糕，話送嘅，又無端端攞多一杯檸蜜過嚟，叫我飲埋佢！(可能我話啲嘢唔夠熱卦，所以送啲嘢畀我食畀我飲），總之呢間嘢奇奇怪怪咁…觀塘咁多食肆，應該仲有大把選擇。要返桌機會真係微乎其微。…Read More

今日年初四,見到佢有開,但要收加一,冇問題呀,正常.店舖內都係多人,入到去等佢安排座位，坐低拿拿林叫嘢食，叫咗蠔仔粥，章魚肉餅飯，豉汁鳳爪同埋金錢肚，其中肉餅飯及兩點點心就好快送咗嚟。咁我照食啦，到我食完，個蠔仔粥仲未到，於是問阿姐幾時有，跟住應左我，話廚房努力整緊……席間已經聽到後面枱喺度投訴，話叫咗嘢好耐都未嚟。於是等咗十分鐘又仲未見佢嚟，再問多一次幾時有，(跟住好似聽到佢同廚房講話爭咗蠔仔粥)於是我再問佢你整咗未？未整嘅就唔好整啦！我哋走了，竟然間了2次都冇人答我。一怒之下埋單走人！見到後面排隊埋單嗰個都係話喺度食嘢好難唔令人燥底！佢都等咗好耐，食就食十分鐘！食物方面,點心,章魚飯係正常嘅。茶記格局,冇嘢投訴,只係服務態度九流！漏單又唔去追單！呢間嘢唔會有下次！！…Read More

好似係新開張，以前呢個位唔係呢間嘢，仲要兩個鋪位打通，打算入去試下新嘢啦，反正大圍附近都冇咩好食。 見佢門口冇餐牌，諗住都係一般好少少的茶記價錢啦，入到去……嘩！一個小菜成八十幾九十蚊，接近100蚊！不過入咗嚟就費事走啦。 中伏！原來價錢只係小菜，仲唔包飯，唔包湯又唔包野飲！飯另外畀錢5元！叫咗個海味粉絲雜菜煲，支竹炆火腩煲，味道冇乜特別，一般茶記貨色。 咁既價錢，我使鬼喺度食？唔怪得知冇人光顧啦。大家小心。…Read More

一行四人，六點幾去到已經要排隊。安排入座後叫咗四個小菜，黃金苦瓜，豉椒炒蜆，椒鹽鮮魷，焗魚腸。好一般嘅嘢，試曬佢啲水準。豉椒炒蜆非常一般，同出面茶記冇乜大分別，鑊氣欠奉。椒鹽鮮魷完全不合格！個脆漿係淋嘅！之前我哋坐低，未落order,佢已經拎埋嚟，估計應該係拎錯咗，隔咗一陣，我哋落order，佢又拎返黎！估計係拎返同一碟黎！所以應該唔係新鮮炸起，變到淋曬！焗魚腸係合格嘅，起碼魚腸冇腥味，正常味道。黃金苦瓜又係唔掂，濕立立咁，唔夠乾身！四碟小菜，三罐汽水一支啤酒，埋單520。收得人百幾蚊碟小菜，應該都唔係咁嘅水準囉！！所以絕對冇下次！俾得起咁嘅錢，一定有其他更好選擇。奇怪對面嗰間天X冇乜人排隊，下次都想去試下先。…Read More

呢家嘢縮咗去駱駝漆大廈後面一條後巷嗰度，隔離仲有兩間食店。對住開源道擺咗易拉架，見到先會行入去。店前有幾張枱坐露天位，如果去大熱天時都幾難頂，而且後巷仲有陣味……原來行前少少可以上樓上，有冷氣嘅地方，三間鋪共用一個進食空間。原來係落柯打畀錢後，上樓上坐，佢會送上嚟。全部都係用即棄食具及餐具，有點不環保，不過冇辦法，睇嚟佢哋都係主力做外賣。叫咗一個蝦湯紅薯粉配豬扒，台灣腸(加十元)蝦湯好濃郁，好好味！豬扒炸得恰到好處，表面鬆脆又唔會太多油，價錢都唔算係平，六十幾蚊，不過做到應有水準。台灣腸好似冇燒過，就咁擺落湯裏面烚熟，咁樣做法真係唔得！另一個係牛展撈紅薯粉。牛展好淋，都非常好食。另外叫咗牛肉角25蚊一隻，老婆就話冇乜牛肉味。我自己就覺得ok，不過有少少偏貴囉。兩個餐都包括紙包飲品一盒。 餐牌上面另外見到有焗豬扒飯，好多人話好食，都想試下。又有錫紙兜嘅煲仔飯，下次都會再嚟一試。…Read More

之前食過一次，但食咗乜嘢就唔記得。今次就試咗個兩人shabu shabu套餐，(掛住食，連相都冇影，不過睇返其他板友都有貼)。加咗廿蚊叫牛肉，兩個人得一兜shabu shabu，預咗佢份量少㗎喇。所以叫多一份豬肉。味道不過不失，冇乜大驚喜。不過要提一提，佢啲烏冬真係好好食，又夠滑，應該唔係一般平價嘢，而且冇嗰陣酸味，可能用上湯淥過下，呢樣嘢要讚。套餐內包串燒，有豬肉串，雞軟骨，南瓜，同埋茄子，都好好食。茶碗蒸內得一隻蜆，都係一般貨色都係好食的。唔知係咪蒸得耐咗，啲蛋比較硬，呢樣可能要改善一下。總括嚟講，呢間餐廳都可以翻兜嘅。下次再試下第二樣。…Read More