Levistoneks's Profile

疫情關係已經好耐冇出過油尖旺區啦， 現今日出開去佐敦，疫情又已經開始冇咁勁，好想打下邊爐，就book上黎呢間咁多好評嘅邊爐串燒食~雖然係樓上舖，不過招牌都好顯眼，好易搵。  填完個人資料紙仔，聽住rubberband 嘅歌，睇住有線新聞台黎睇menu。舖頭真係唔算大，但都仲有個海鮮缸，星期六日都真係好有需要book定枱。 呢度啲湯底好有特色，唔係出面普通嘅沙爹湯芫荽皮蛋湯咁，款款都好有特色，唔少都用海鮮做底料，不過今日想睇吓食材靚唔靚，點咗相對清但鮮味嘅“98三高茶什菌湯”同“姬松茸冬瓜湯”。 湯底真係鮮味足料，就咁當湯飲都好好飲。 調味料都好充足，不過食完晒成餐邊爐後發現其實唔洗要太多調味，因為本身啲材料同湯底已經好好。  火鍋料方面點咗二人海鮮盛，鮮打蝦丸同墨魚丸，黑豚肉片，生菜，同小食炸響鈴。  海鮮盛有聖子皇，大花甲，大蝦，蟮片，蠔，估唔到，全部都好新鮮，而且係好高質，海鮮本身夠大隻，滾過更加食得出鮮甜，而鱔片更加係好彈牙。 鮮蝦丸同墨魚丸真係估佢唔到咁鮮味，真係爽口彈牙，用料好足，而且有少許蝦粒同墨魚粒，當然食得出蝦嘅鮮味同墨魚味，真心推介。  黑豚肉用料都係靚料黎，食得出無平價豬嘅豬腥味，亦都食得出幾厚嘅口感，唔錯。 炸響鈴都係新鮮炸出黎，非常脆口，配啤酒飲一流~ 整體上呢度用料非常新鮮，湯底煮過海鮮就更加鮮味，我地差唔多飲晒個湯底添呀~值得推介。下次有機會再試串燒。 …Read More

襯仲可以出街嘅時間周圍搵下野食，行完黃金見到門口姐姐好落力介紹就入黎試下。睇menu，選擇都唔少，價錢以越南嘢計非常抵食，講緊1人餐係59蚊，有一碗粉，一個前菜，仲有一個小食，再加杯熱柑桔蜜。見到隔籠碗粉都幾大碗，所以我地決定兩個人要一個一個餐再加幾個小食試下。首先係主食越南粉，湯底有幾個選擇，餸雙拼咗豬扎肉加豬軟骨，賣樣非常唔錯呀，除咗餸之外仲有蘿蔔葱蒜，而且配芽菜，九層塔，辣椒，青檸，自由揀落邊樣。碗粉真係好大碗，一個男人係一定夠食，金邊粉煮得好淋身係我鍾意嘅口感黎。豬軟骨同平時出面食到嘅都有啲分別，煮得好淋，入口即溶。前菜鳳爪都唔錯，有兩三隻，加埋少少菜絲芝麻。小食要咗雞翼，重點係上面果pat 蒜頭，同滿隻雞翼都係嘅牛油。加咗個份豬肉串燒，配沙爹醬加花生。仲有蝦多士，呢度係用法包做蝦多士，食嘅除咗蝦膠就係油感豐富嘅法包。呢個馬拉盞炒通菜係正嘅，馬拉盞嘅香味一上碟就聞到好香，而且以$24 黎講份量都非常多。另外點咗杯椰青特飲，基本上係椰青水加椰肉加糖漿，鍾意飲椰青飲品嘅會鍾意，又有得食，又有得飲，好味。整體上呢度係抵食嘅，兩個人食咁多野先係$155，想平食越南野又係深水埗嘅係唔錯嘅。…Read More

木船對大埔人黎講唔係新餐廳啦，可能佢地開左新分店，原店就轉咗menu，而家無咗單點餸，專做泰式粉麵同飯，但濃濃嘅泰式味道同依舊咁抵食好食。 餐牌唔同咗，但菜式一樣豐富，但今次都叫做第一次幫襯新menu，睇價錢算好抵食，不過實在花多眼亂，一於點個門口餐牌推介各點一個，再加多三份小食。  個黑豚腩肉丼真係好正，好香燒烤汁嘅味，啲肉片又烤得少許燶邊唔韌，加上成座山咁滿嘅青木瓜絲，開胃得黎配合埋個肉黎食唔油膩。肉量唔少，而且係肉堆中間仲埋藏咗隻流心蛋，除咗極度邪惡，仲極度滿足。 小食方面點咗炸魚餅，雞槌同芝士蘑菇雞翼。 炸魚餅同平時係超市買到嘅魚餅唔同，佢地呢度嘅係比較淋身煙韌，而且新鮮炸起都幾好食。 雞槌都比想像中好，唔係炸好晒夾出黎嘅，都係新鮮炸，唔會炸得乾。 芝士蘑菇雞翼就比較特別，係無骨雞中翼黎，內裡釀咗蘑菇芝士落去，小食之中最推介。 值得一提佢地小食嘅墊底菜都好乾淨好靚，係可以食埋嘅沙律菜黎。 另外點咗嘅推介就係木船雜錦湯河，就咁睇已經知佢大堆頭。 換個角度睇，勁多餸，多到連啲粉係邊都睇唔到。 食咗一陣之後終於有位整理一下，肉方面有齊晒無骨雞肉，豬肉片，牛腩，丸方面咁多粒丸，唔好計漏後面嘅扎肉，另外我已經食咗啲丸，所以原本真係好多，係超多。 粉面佢地都係不計成本大手落去。湯方面用咗牛肉湯，好香，但唔會太咸。 如果呢碗雜錦湯河一個普通女生食一定食唔晒，記得要少粉，我覺得甚至分兩碗都夠食。男生都要食量偏多嘅人先食得晒。 兩個人食到飽飽先啱岩好二百蚊，真係又抵食又好食，下次可以再試其他野。 去食嘅記得問下份量，如果自己細食嘅最好叫細份或者自己帶定個碗打包好啲。 同埋約人嘅唔好去錯呀，晚飯時間已經見到有幾個人約咗係新果間但黎咗舊嘅位置啦。 …Read More

今日經過大角咀，一個人望住個地圖諗住搵下食咩，抬頭就見到呢間仲未係地圖出現既泰國菜，望個午餐餐牌，價錢合理吖，既然係咁，就入去試下。叫左個海南雞飯，連埋個湯，都只係HK$42。D雞都幾滑，無乜骨既，雖然無平時食海南雞既三款醬，得一款酸酸辣辣既醬，但個醬味道都唔錯，份量剛剛，除左配雞食之外，仲可以畀我配下飯食，唔浪費又好味，正！而且個黃油飯都幾香，份量其實都唔少。食食下見到餐牌上寫住一個拼盤都係HK$108，好抵喎，下次晚市可以再黎試下。店面可以容納既人數唔算好多，大約十個左右。唔想堂食，外賣都係唔錯既選擇。不過因為大廚暫時得一位，所以多人既時候可能要有耐性吖～好味既食物係值得等耐～以後行開呢頭，食飯又多一個選擇呢！…Read More

我個人對威靈頓牛柳情有獨鍾，喜愛非常。今日去大埔食晚餐時發現到呢間餐廳既晚餐Menu上居然有威靈頓，而且只需要$138。就抱住試下無壞既心情入去。店裡擺設裝修用左唔少綠色既植物，令人有放鬆既感覺。晚餐Menu豬牛海鮮都有，選擇都多，不過我眼裡只有威靈頓牛柳。先黎個龍蝦湯，雖然龍蝦味唔算好濃，但作為餐湯，配埋個好香既蒜蓉包都唔錯。主菜出現喇！外相都唔錯，酥皮包住既牛柳，本身以為$138應該都係得過且過，又唔係喎，牛柳幾嫩，幾入味，係個黑椒味濃左少少姐。呢個價錢食到咁既質素既威靈頓牛柳，我覺得係性價比高。最後飲埋本用心沖出黎既Mocha，呢餐都係㘣滿～…Read More

之前試過一鳴拉麵，覺得唔錯，而今日又想食下丼飯，所以就試埋係一鳴拉麵旁既一嗚丼食堂。好好彩今日早左少少去唔駛等位，入坐之後已經有2台人等緊。裝修都係一般日本餐廳既設計，感覺都幾光亮整潔，餐廳有做足消毒清潔，某程度上令食客都安心不少。餐牌同埋落Order既紙係同一張，直接寫要邊一款，係好方便既。今日好想食丼飯，而我最愛既係海膽同三文魚子，所以就叫左個北海五品盛，呢個盛有牡丹蝦，帶子，油甘魚，三文魚，海膽同三文魚子。一眼望落去就知呢個盛既主角係牡丹蝦，真係好大隻，新鮮好味。但我眼中既主角係海膽，第一口梗係要食佢啦。大大啖，鮮甜到呢。其實呢個北海五品盛真係好大碗，而D魚生真係幾新鮮下，份量又多，呢個價錢有咁既質素同份量，都算抵食。食完個丼飯已經勁飽，但個炙燒饅魚壽司賣相太吸引，其實味道都相當唔錯，個醬做得唔錯。…Read More

今日唔駛返工就諗住搵間酒吧餐廳好Chill咁食D野~ 行過Noc Noc見到有Brunch Set, 咁就入去試下啦。呢度樓底都幾高，裝修幾靚，最重要係坐底之後店員就即刻拿消毒紙巾畀我地，抹完手仲可以抹下張枱添，夠哂乾淨！叫左個Brunch Set辣肉醬芝士餡餅配薯條，跟餐飲凍檸茶，一個小食，雞翼三重奏。個芝士焗餡餅焗得剛剛好，外面脆脆地但又唔乾，初初都擔心個辣肉醬係好辣，不過店員話香多過辣，確實係喎，真係好香好有墨西哥風味，呢個真係唔錯，幾好味！雞翼三重奏D雞中翼好大隻，係Buffalo，牛油，蜜糖芥末，呢碟小食落足料，無論雞中翼既size定醬既量，都係有番咁上下既份量。雖然大大隻，都係炸得透架，熱辣辣好好味！如果可以用黎配啤酒一流呢！食完野飲番杯冰凍既凍檸茶，確實滿足～…Read More

今次試荃灣呢間銘陽車仔麵。入到去裡面環境都OK，可以容納廿到三十個人左右啦。而店員會要求大家都要清潔雙手，佢地亦都有預備左酒精畀客人噴手。算幾乾淨。我點既係三餸：豬大腸，雞翼尖，牛筋配米粉。我地額外叫左個炸豆腐。D湯同埋米粉都係咁，無乜特別。至於佢個牛筋就係爽身既質地，唔係林滋滋煙煙unun果款。不過都算入味既。我至愛既豬大腸呢，望落去洗得好乾淨，仲好厚實添。口敢係林中帶爽既，味道唔算好濃，係輕食版既豬大腸。翼尖係瑞士汁整，甜甜地，好入味，正。食左舊蘿蔔，炆得都夠淋，食落甜甜地，幾入味之餘仲保留到少少蘿蔔既原味，無乜筋。炸豆腐真係外脆內非常滑，新鮮炸出黎，勁香，點埋個甜甜地既醬食，真係超正!…Read More

以為屋村無好野食？我食左幾次既大飯糖都無令我失望過。今次呢個朱古力雪糕拼焦糖燉蛋，雪糕係好濃嘅朱古力味，個焦糖燉蛋好滑，裡面仲有雲尼拿籽，絕對有質素。除左甜品，大飯糖都有提供主食，之前午餐晚餐都試過個咖哩，佢個咖哩豬頸肉飯，甜甜地少少辣好好味，真係必食首選。今次食下午茶，以為燒賣拼雞翼好普通，燒賣係炸架，脆卜卜非常香口，配埋雞醬一齊食，其實一打都食得哂。雞翼又甜又脆，加埋芝麻一齊食，正！餐飲我一定㨂黑糖薑茶，勁薑但唔算好甜，飲完好爽～…Read More

以前成日去大埔，但宜家就好少可，今次咁啱可以入黎兼食好野。佢地有抵食午餐，但知道平時夜晚有排位，入門前都問過都可以食a la carta 咁就可以食openrice 上果啲人氣野食。 Menu 係有寫泰文翻譯，有啲都熟口熟面，跟住黎讀都幾得意。食物選擇都好多，有部份菜式比起傳統嘅泰菜佢地會加多一點新意。 最後點咗個木瓜沙律（$62）、細嘅泰式拼盤（$52）、必點嘅菠蘿炒飯配虎蝦（$158）、店員仲推介原本只係晚市先有嘅椰子雞煲（$98），同加咗杯泰式奶茶（$32）。  先上咗木瓜沙律，木瓜絲同紅蘿蔔絲當然係唔少得嘅材料，而且仲有提子，番茄仔，花生，腰果，配埋酸辣汁，而且份量好足，係好正嘅醒胃前菜。 細小食拼盤有4款小食各有2件，啱晒2個人share一人一件。八爪魚餅咬落好香八爪魚味，而䉀蝦嘅蝦膠唔係打到爛晒，除咗有彈性之餘仲有蝦肉咬到，另外果件唔肯定係咩黎，但入面有啲粉絲，幾好食。仲有米卷，佢地係用嘅係米網，炸得非常看香脆好味。 主食黎啦，菠蘿炒飯上菜果陣非常有睇頭，首先個菠蘿非常大個，加上一大串燒菠蘿夠誇張 like，而兩隻虎蝦都非常大隻。味道上燒菠蘿香甜無得輸，飯底有足菠蘿嘅甜味，記得記得，雖然成個食感覺良好，但菠蘿汁會聚係底，最好一開始倒晒出黎味道會平均啲，而虎蝦值得一讚佢無整乾晒，仲好爽口彈牙。 另一樣就係椰子雞，呢個都係不得了，喜歡食椰子嘅呢個真係必點，一上菜果陣椰香味出晒黎，雞煮得啱啱好，唔韌入晒味，雖然menu 無寫幾大份量，但估計都有半隻雞。 泰式奶茶唔同港式奶茶嘅，顏色上係偏深色啲，而且係甜啲重煉奶味，加上肥肥的忌廉一齊飲，邪惡之餘果陣香甜味道真係好正。 呢次日頭黎唔洗等位就可以食到大埔名店，而且樣樣野都好食真係無揀錯時間黎！～值得再黎～ …Read More

係呢頭開會早啲收工索性係附近搵食，一上openrice 就見到呢間舖頭係頭幾位，咁啱想食burger 就過黎啦，呢度地方唔算大，但因為時間尚早都未有其他客住，裝修比較歐式但又加咗啲好得意嘅Pizza poster 畫係度。睇返食物，大大張餐牌寫住終極漢堡，仲唔係必食？其他食物都好似唔錯，Pizza都係出名嘅，但一個人食一份Pizza又好似太飽。點Burger嘅時間職員仲會問想個burger 幾成熟，第一次食burger 有得揀，食扒食好三成熟，今次叫個7成熟試下先～Burger 上碟真係好大份呀，而且牛肉好厚，包係軟包但有焗過，所以個包面係少少脆口，有芝士、洋蔥、煙肉、生菜，咬落好豐富嘅口感。值得一提嘅係薯條，炸到好香脆，非常好食。而且佢地有自己嘅醬，除咗茄汁之外仲有辣汁、mayonnaise，仲有最特別嘅松露醬，要黎點薯條唔錯，相入面左邊果支就係松露醬，明顯都係俾人用得最多嘅。食飽咁啱見到店員攞咗盤新嘅Tiramisu 出黎突然好想食就叫埋，味道唔錯，咖啡味唔重，餅底係我鍾意嘅消化餅餅底，配埋杯熱Mocha 就perfetto啦～呢度杯Mocha好得意，平時係打奶泡拉花，呢度係用朱古力黎拉花架～…Read More

太耐無食過日本野，book 咗黎呢度食返夠本先，估唔到平日呢度都會幾full，好在有book 定枱。呢間琥酌無論舖外舖內裝修都好有日本味道，而且仲幾靚。  見openrice 呢度主打係吉列牛，梗係要點，另外其他菜色都多選擇，同價錢合理，點咗角切魚生飯同名古屋雞翼。 最先上嘅係角切魚生飯，份量都唔少，而店員亦好細心，見我地兩個人點一個飯就攞埋碗同木匙。魚生係切碎嘅，但撈埋之後仲食到同分到各種魚生嘅味道，而加咗菜係飯度加多一重口感，另一樣值得提嘅店家係用磨蓉嘅芥辣，味道比一般膏狀嘅芥辣入口鮮味。  名古屋雞翼，初時只係以為係普通炸雞翼，咬開先知原來雞中翼係去骨嘅，而且落咗少少辣味，而且仲有魚子，變咗似明太子咁，好味。  最後梗係唔少得吉列牛，吉列牛會先上個爐，然後再另外黎一碟排得好靚嘅牛， 有少少配菜有南瓜同翠玉瓜同埋日本番薯仔，仲有一碟醬料。  真係忍唔住食牛肉啦，第一次食吉列牛，第一塊整熟咗少少，但都食得出肉質係靚嘅同埋唔韌，再食就真係兩邊輕輕辣一辣就已經足夠，醬料有三種，一種係鹽燒汁，一種係岩鹽，一種係芥辣醬，如果喜歡食原味嘅加好少量嘅岩鹽吊起肉味已經好夠，個人覺得鹽燒汁有啲麻油味，好香，不過就有少少蓋過咗牛嘅香味，芥辣就啱重口味嘅人。  食咗三四塊牛之後想抖一抖，又唔想燒住個爐咁油煙嘅嘅時間最好就係燒蔬菜，不得不提下小番薯，因為已經整熟咗，燒多一陣就已經食得，而且好甜好好味。  美國安格斯牛已經咁好味，唔知去到再靚嘅A5和牛又會係點嘅呢。…Read More

又黎九龍灣搵晚餐食，但又唔太肚餓，唔想去幫襯德褔淘大，就過黎沿德寶方向睇下，因為間中都會係呢度買早餐，佢地門口好多面包賣架，而且都幾好食，但晚餐就真係一次都未食過就走入黎試下先。平時經過以為呢度好細，入到黎原來都幾大，而且成個舖好深，都幾多二人四人或者再多人嘅都方便搵位。餐牌方面就好多選擇，飯餐不少得，仲有鐵板小炒小食，基本上茶餐廳有出現嘅野呢度都叫得度，價錢算平。 特登唔叫餐叫咗三樣野食。 鐵板豬扒炒公仔面份量好足夠，唔似有啲舖頭咁好慳皮咩配料都唔落，有芽菜絲椰菜豐富口感，豬扒都幾多，而且唔乾身。另外枱面有潮州辣椒醬，加埋落去係神來之筆，1+1=3 嘅感覺，香辣嘅味道加落炒公仔面係好夾。蒜蓉炒雜菜有唔同嘅菜同菇菌，菜菇都幾新鮮唔會老，唔會見到爛，炒得唔咸，唔錯多選擇街坊晚餐炸雞原本見佢$38 以為得三幾粒，上到枱原來都有成八粒，用雞髀肉黎整，份量都好足，話雖韓式，但炸出黎比較似港式味道，而且比較乾身有趙頭，佢地嘅炸雞醬都唔係用純韓國辣醬，似加咗少少海鮮醬，滿滿嘅香港味道。另外值得一提嘅係員工都好好笑容好主動，而且主動攞碗俾我地分餸食，走果陣原來全場爆滿要等位添，似乎街坊都幾鍾意黎呢度食野。…Read More

新蒲崗雖然無地鐵到，其實入面收埋咗好多好好食嘅食肆，有啲係你唔試過原來係可以咁好食。誤打誤撞黎到呢間醉標，熟路嘅人都知錦榮街同衍慶街都係搵食嘅好地方，泊車又方便，只係呢度門面望落去唔太起眼而且係內街度，上菜就即刻知道係深藏不露。同一般嘅食肆唔同，呢度唔只做一類菜式，舖仔細細但包羅萬有，有泰菜，港式小炒，雞煲，煲仔菜，老闆娘話黎緊仲有酸菜魚同串燒添，睇黎老闆同老闆娘都係老饕黎。睇返餐牌，第一次食就先黎套餐唔洗諗，二至三人餐都只係$198，好抵食，已經有半隻雞，一個泰式前菜，一個餸到飯嘅煲仔菜，加$30仲有個炒菜，其實夠3-4個人食添啦。我地點咗老闆娘推介嘅海南雞，燒豬頸肉，魚香茄子煲，同加埋個馬拉盞通菜。呢份無骨海南雞係必食推介。套餐入面半隻海南雞，去晒骨，齊晒雞翼，上下髀，胸肉，都仲幾大份，老闆娘介紹話海南雞最重要係浸雞嘅步驟，用上湯分幾次浸，咁先可以令到雞肉唔鞋口之餘保持香味，去骨亦都去走啲難熟嘅部份，整體上靚仔啖啖肉。食落就算平時好韌嘅胸肉都真係唔鞋，而且好少肥膏，平時唔太食皮嘅我地都食埋皮，雞肉味都非常好，唔會食到雪味之餘仲有返雞肉味，唔點醬都已經好味。點埋舖頭自家製嘅泰式海南雞醬就更上一層樓，雞醬酸酸甜甜，就咁攞黎餸飯都仲得。就算出面嘅貴價海南雞都做唔到到咁高質素。燒豬頸肉又係另一樣好味菜式。原本我地以為跟餐嘅小食份量會無咁大，上菜嘅時候都係大大份好足量，豬頸肉係有香茅調過味，切得薄身得黎保持爽口彈牙，配埋係泰國舖頭會食到嘅調味醬，酸酸辣辣，好味好味。魚香茄子煲，茄子肉碎又帶點辣，熱辣辣送飯又一流，剩係呢個魚香茄子都已經送到多過一個飯。最後係馬拉盞炒通菜，一道係其他人眼中普通嘅炒菜，事實呢度炒得非常惹味，有用到蒜頭，蝦米，辣椒，蝦醬，有啲餐廳會炒到偏咸，但佢地就岩岩好唔咸但又夠香夠辣味，連菜都唔老又爽脆，為呢餐中泰式嘅晚飯帶黎完美結尾。我地兩個人因為呢餐實在好好味，清晒枱呀，好似好耐未食過咁好味嘅小菜咁，好誇張😂另外一定要講嘅係老闆娘非常親切，笑容滿面，同我地介紹黎緊仲會有比太二更好食嘅酸菜魚，同埋遲下有佢地以前係大埔做開串燒，似乎串燒先係最出色嘅，下次再黎就可以帶朋友同屋企人黎食！咁岩隔離枱食緊雞煲，睇佢地啲材料仲好新鮮添，下下次叫多啲人再黎又可以再試下！…Read More

住係沙田區咁多年，真係都無好好試下沙田區內嘅餐廳食肆，今日想食下西式野又唔想係新城市同人迫，最好就過黎大圍搵食，大圍有好多出名嘅小食同中式食肆，但其實西式都有啲唔錯嘅選擇。 呢度室內裝修有啲古堡式感覺，樓底好高，容得下一盞好大嘅吊燈，而且人唔多，可以靜靜地傾下計，幾舒服下。 Menu 有套餐，計過條數都抵過散叫，如果點二人餐會仲抵食啲，但今日中午先食完意粉就唔要意粉了，就一人一個餐。點咗蟹肉他他、釀薯棒、乳豬同肉眼扒。 先上頭盤蟹肉他他，面包底下就係滿滿嘅蟹肉，對於鍾意食蟹嘅人應該會好滿足，同埋釀薯棒比較似有混咗蝦膠嘅口感，雖然睇唔到又唔太食得出係咩，唔係齋炸薯蓉咁簡單。 終於上埋主菜，牛扒medium rare 都做到，以呢個價錢食到呢個質素嘅牛扒算唔錯啦，反而豐富嘅配菜好似仲吸引過主角咁，好多西蘭花同椰菜花，仲有岩岩炸出黎熱辣辣嘅薯角，加埋食完牛扒可以消膩嘅菠蘿，加埋晒一齊就好豐富。 另一份主菜係西班牙乳豬，乳豬除咗有中式乳豬成日用嘅乳豬醬，仲配個好特別嘅彩椒醬(紅色果啲)，有三色椒嘅味道之餘入口重有一種刺激但又唔係辣椒嘅味道，文字比較難形容，要親身食過先知，值得一試。 埋單一人唔洗三百，價錢合理，始終香港想搵間可以靜靜地嘅餐廳唔易搵。加上食物配菜質素同份量，仲有埋甜品，唔錯。或者過黎飲杯酒，食下新鮮炸薯角或者其他香口野下酒又係個唔錯嘅選擇。 …Read More