KK_dayday's Profile

午餐又食我最鍾意嘅韭菜煎餃今次買咗第二間嘅外賣，睇落煎到金黃色，賣相幾好。食落味道都唔錯，但係外皮比較硬，應該係煎得太耐，又或者中午時間人多，煎定擺得耐。下次都係等非繁忙時間先食好啲。…Read More

中午又諗住支持下小店，哩間未食過。真係好似店名甘，餃子特別大隻。叫左6隻韭菜煎餃，覺得都煎得好好，餃子又有肉汁。食到第三隻，一咬就見到一條人嘅毛髪，短而曲，好核突。我叫左短頭髮嘅店員睇，打算提佢地以後注意下衛生，估唔到佢態度好差，吾好意思都冇句。淨係求求其其講左句換俾你。我話食唔到，埋單走人。店員收錢都粗聲粗氣，好似發我脾氣咁。佢哋除咗衛生，服務態度都要改善…Read More

時間，都係支持下小店想食沙爹牛，話已經賣晒。最後叫咗炸雞脾沙律，又話沙律冇晒，唯有食邪惡嘅炸薯條。話要即炸，要等陣。果然係出晒煙，即叫即炸。又係我喜愛嘅粗薯條，雞脾香脆多汁，吾太咸，正…Read More

食過幾次，今次餃於記得影返張相。試過幾隻吾同嘅口味，今次食嘅鮮蝦韭黃我最鍾意。其實隻隻口味都好味，尤其是冰花煎餃，煎到外脆內軟又多汁。皮簿又足料，有時想食少少野，最岩就係叫佢小份嘅，有5隻，但佢哋啲餃子足料又大隻，都幾飽。小店價錢都唔貴，即叫即煎，新鮮好味。大滿足…Read More

今日又試吓熟食中心泰菜，中午見到都幾多人。睇吓餐牌，又真係好平。午餐$45送凍飲糖水，又係打工仔恩物。叫咗個炒金邊粉，賣相都幾靚，食落金邊粉炒得太濕，口感差少少。調味就偏甜，見到佢加左太多嘅泰式甜辣醬。配料芽菜，花生碎，豆乾，雞肉都好足料。但係雞肉可能雪太耐，有陣腥味。總體黎講，咁嘅價錢已經交足貨，冇乜好彈。如果要求高嘅人士，就要諗下會唔會試其他菜式啦。…Read More

買咗個車仔麵，食到一半，忍唔住要幫佢嘅超大隻冬菇影返張相。每次買外賣，我都係為咗哩隻冬菇，大隻肉厚，食落又好軟。叫咗3餸，都係$29,真係平靚正。蘿蔔又軟又甜，咖喱魚蛋又係小時候嘅味道。咁嘅價錢真係冇得彈。有時見到佢哋有生菜魚肉碗仔翅，都會買黎食，$20大大碗好足料。老闆咁平嘅價錢益街坊，對於附近返工嘅人都係一個好選擇。香港其實仲有好多抵食嘅良心小店。見到小店嘅員工有啲係殘疾人士，老闆應該都係善心之人。希望多啲公司可以提供就業機會俾殘疾人士。…Read More

本人好中意食潮州手打魚蛋，但係好多都話手打魚蛋，一食好大陣魚腥味，又多粉，口感好似橡筋。唯有自己慢慢逐間試，好多都係冇下次。見到哩間，又試吓魚蛋河，之後都買過幾次外賣。一碗魚蛋河$36，價錢好合理，亦都跟一包潮州辣椒油。魚蛋彈牙，冇腥味，就係我中意嘅味道，加埋辣椒油，更加冇得頂。雖然簡簡單單，食完覺得好滿足。雖然簡單，但係要用適合嘅魚，慢慢打到彈牙，全部都係心機。哩啲街坊小店都值得支持，希望香港繼續有小店。…Read More

今晚朋友話帶我食一間平靚正意粉，去到見到係一間小店，布置都係簡單，十幾個位，不過已經坐滿，要等位，等左10分鐘度先有位。見佢餐牌意粉價錢40幾蚊起，餐具同水都要自己去拎。我覺得差唔多嘅餐廳出面好多，冇乜特別。我哋叫咗個香辣海鮮意粉，黎到既時候，真係嚇親，原來個份量真係好多，比平時食嘅意粉多兩倍，真係要三個人先食到。味道甜甜辣辣，好似屋企自己煮嘅意粉，哩個價錢，老闆會唔會蝕錢。之後再叫左三個小食，玫瑰雞翼，墨魚餅，牛肉墨西哥卷，最中意雞翼，夠香口，又配沙律菜。推介大胃王去食意粉…Read More

最近咁多人拍片介紹熟食中心，我又突然想食瑞和街街市熟食中心嘅扺食泰菜，之前食過午餐炒粉𢇁$48仲包飲品，睇住泰國廚師用個大排檔嘅大獲即炒，夠晒獲氣，咁平但絕對唔係hea 炒，落足料，所以都有返去再食炒粉絲。咁嘅午餐，性價比好過好多連鎖快餐店。岩晒返工一族。今日再試吓我最鍾意嘅豬肉生菜包，又係一叫即炒，豬肉肥瘦適中，微辣，好有泰式風味。見佢哋都係一家人，廚師侍應一手包辦，有心機又抵食嘅小店，真係要多啲支持。…Read More

第一次黎食，因為見到有7折，試吓新嘢。餐廳環境舒適，服務都幾好。見佢哋推介今期新菜式苦瓜，咁啱我又好中意食苦瓜，試左話梅苦瓜，苦瓜凍糕，微微嘅苦味，先係苦瓜嘅精髓，清新又開胃。小食炸山藥，蟲草花，香脆可口，食到停唔到口。再試埋傳統菜式燻雞，雞滑得黎啖啖有煙燻香味。欖角骨，酸酸甜甜，肉質鮮嫩。最後食埋甜品蛋白杏仁茶，紅豆沙，芒果布甸，三個之中我最愛杏仁茶，因為食到自家製的味道。酒店嘅中菜果然有啲水準。如果長期有7折就真係好抵食。酒樓既價錢食到酒店嘅質素。下次可以再試埋其他菜式。…Read More

星期日同朋友食午餐，吾想去商場同人逼。所以行左去附近工廈，之前去過哩棟大廈其他餐廳，都覺得好一般。所以都冇乜期望，求其開OpenRice 搵左間未試過嘅cafe. 去到見到成間餐廳都坐滿人，我哋帶咗個小朋友，職員主動搵左張大枱俾我哋。叫左招牌翠玉瓜麵，好清新，好岩夏天食。開心果蛋糕香濃得黎吾太甜。已經覺得好驚喜。叫左兩杯咖啡，仲問我地要咩味嘅豆，估唔到咁專業，味道亦都好過好多連鎖咖啡店。絕對值得再次去…Read More