chiuden的個人專頁

晏咗少少起身，又唔係想食一個full lunch，經過呢間，2pm就有下午茶，諗住求其食啲嘢，點知有驚喜！叫咗個叉燒蛋包、熱檸茶走甜。見到個廚會先搽D牛油上包煎熱，係好有心機慢慢煎好兩面，跟住落叉燒，炒蛋，最後夾好個包落紙袋。見有位，就即刻坐低食，新鮮整出嚟真係好正！個包微脆，蛋唔太乾，有埋叉燒粒豐富咗個口感！ 十分值得推薦！😋😋😋個檸茶係正常茶記檸茶，ok 啦⋯⋯ 不過大家記住如果要走糖，就算係熱飲都要預先叫走甜，佢default係有糖。雖然我係下午茶時間嚟食，但其他時段都可以單買個包（$19）。提一提星期六佢哋係休息唔開㗎！…查看更多

突然想食撈麵，經過呢間港式外賣小食店，得一張枱同兩張膠櫈，以為唔俾堂食，但聽到呀姐問排我前面嘅客人堂食定外賣，依，可以堂食喎，就試試啦⋯⋯叫咗個鹵水雞扒撈麵，個menu話‘必食’吖嘛，鹵水雞翼成日都會見有，鹵水雞扒就真係少，+$3仲有罐汽水。佢擺出嚟有普通可樂，Fanta橙etc, 原來都有Coke zero... 講返個撈麵，塊雞扒真係有鹵水味，肉質ok, 正常，都算嫩滑，唔錯，仲有少少菜👍🏻 但係個麵好油吓，D麵漿著咁，雖然個味係ok嘅，但個麵質唔多掂⋯ 不過$33連汽水堂食，算係咁啦！見到都有好多街嚟幫襯買腸粉、魚旦、鹵水雞髀咁，下次可以試吓其他嘢嘅…查看更多

今次輕食者嚟到荃灣，睇中呢間冇飯冰室，撩起條筋想試。立心想試吓佢哋個蒜香芝蔴包餐，見個menu推介日式芥末蟹籽吞拿魚餐，好似好特別咁，就叫咗一份。個餐已包一個迷你蕃茄蛋螺絲粉，個包我例牌叫少醬，嘢飲叫咗熱茉香綠茶走甜。餐具已在枱上，有紙包住一份份，自己攞，感覺衛生，無錯，只係‘感覺’🤣，當佢係啦！先上嘢飲，係囉，點解我杯綠咁多泡㗎呢?!我估佢哋賣開台式飲品，搵機搖過嚟啦⋯⋯飲落都係台式綠茶味，味道正常。個飽同個粉嚟到，賣相唔錯，大細識中。個飽軟熟好食，但唔太食得出蒜香味，料足，有齊生菜、蕃茄、吞拿魚、蟹籽，口感十分豐富，亦好夾，但D吞拿魚有啲凍，明顯就咁係雪櫃攞出來，叮一叮都好呀... 個番茄蛋湯粉卻十分不錯喎，湯唔太甜，粉又唔會淋哂咁，炒蛋算幾滑...👍🏻👍🏻👍🏻 好多其他餐廳話出名番茄湯底個湯底都太甜🙈$45成個餐都真係抵食嘅，不過下次我會試其他款式嘅飽囉⋯⋯…查看更多

成日喺呢間外賣店對出嘅巴士站等車，睇佢哋個menu都想試吓，不過呢間小店星期日唔開，終於揾到個星期六有機會試吓佢哋個下午茶餐啦⋯⋯最初想試豬扒鴛鴦漢堡包餐，不過佢哋話依家冇‘鴛鴦’，只有豬扒漢堡包，我又再問塊豬扒係煎定炸，佢哋話係炸，我又唔太好炸嘢，結果叫咗個珍寶雙腸熱狗少醬，加熱檸茶走甜。兩條腸煎過嚟，個包有烘過，都算軟熟，唔錯喎！檸檬茶正常港式有輕微澀味，正！$25喺銅鑼灣嚟講係超值！ 👍🏻 不過要注意佢哋個熱檸茶default已落糖，並不是另外俾包糖，所以order時要提早講定走甜啦⋯⋯…查看更多

上網睇到有好多Foodie都推介呢度嘅生炸雞脾，搵咗一日平日lunch過嚟睇睇... 見到餐牌有全日茶餐-炸/鹵水雞脾+腿治，平時呢啲配搭只限下午茶時段，呢度可全日供應最啱我呢啲輕食者食個輕便lunch👏🏻👏🏻👏🏻。見咁多人都只係介紹炸脾，咁我就幫大家試吓個鹵水雞脾啦🤣⋯⋯ 首先好快就嚟咗杯熱檸茶，夠大杯，正宗港式檸茶，有些少苦澀味，但又有足夠嘅檸檬去平衡👍🏻，跟住就係要等....等咗差不多10分鐘有多，終於有嘢食啦⋯⋯ 腿治都冇咩expectation, 正常普通腿治，隻脾就真係好大，大過我隻手掌，伙記亦提供膠手套以方便食用👍🏻 。味道不錯，好有鹵水味，肉質十分嫩滑，食得出係即整，所以等耐啲係值得嘅😋至於環境方面，佢哋係做港式外賣快餐為主，得兩張枱，多人時可開多兩張枱，完全冇嘢可講究，我只係有幸咁啱有位可堂食，都甚有風味，一定會再嚟！…查看更多

每次去親土瓜灣唔太肚餓又想食少少嘢，就一定會諗起呢間街坊餃子店。呢間有齊湯餃、煎餃、蒸餃任君選擇。我通常都會揀蒸餃，因唔係好多餃子店都有。今次我點咗6隻蒸椰菜雲耳豬肉餃，點知老闆話淨返5隻，另外俾隻粟米豬肉餃我，又好啊... 一如已往皮薄喊靚，足料，D皮仲係有少少al dent 嘅感覺⋯⋯粟米豬肉餃真係見到有一粒粒嘅粟米，正！D醬料如醋、豆瓣醬、辣椒油，豉油已喺枱面，請自便...我就一隻落醋、一隻落豆瓣醬咁食，雖然D醬料冇咩特別，不過已經好正! 價錢又親民，一定會再encore！…查看更多

近排工作好忙，壓力唔少，難得可以放半日假，想揾間有輕食嘅餐廳慢慢嘆，見到呢間《慢活工業》，就試吓啦！位處於啲五金舖隔離，由太子地鐵站行過嚟大概10分鐘，我weekday大約2:15嚟到唔洗等位。呢度係要自己搵位坐，先去Cashier叫嘢食同俾錢，之後就有人會送上食物。餐具醬汁要水就自己去水吧度自己攞。我點咗三文魚青蘋果沙律，慢活嘛，就唔好expect咁快上菜吧🤣⋯⋯ 慢慢享受吓放空嘅時光🙂 嘢食方面慢工出細貨，沙律菜都尚算新鮮，煙三文魚約有4大片，配有多士，多士上有些少蜜糖，都幾香脆👍🏻。$58連汽水唔洗加一，價錢十分親民！就係咁過咗一個休閑嘅下午😊…查看更多

對於我呢啲輕食者，呢間喺太古坊嘅外賣店係我嘅恩物。老闆好好人，每樣食物都好有heart去做，價錢親民，服務態度非常好，搞到我每個禮拜都最少幫襯一兩次...位置比較隱蔽，要喺糖廠街7仔側邊行入去再轉右條巷仔就會見到... 三文治任你配搭，我通常都叫青瓜鴨胸麥包，青瓜新鮮，鴨胸片唔算薄，即叫即做，$13冇得輸。仲有，佢哋唔係用透明三文治膠盒，而係用食物紙包住，十分環保，又加分👍🏻 佢哋唔只有三文治，其他食物配搭都好啱我哋呢啲輕食者。有次叫咗個豉油雞髀加雜菜，份量唔算少，雞髀滑嫩，不過D菜係油咗少少... 同埋如果可以唔用發泡膠盒就更好啦...值得一提老闆真係好好人，有次等嘢食其間落大雨，借咗把‘七彩遮’俾我，話我遲啲還都可以... 跟住疫情下有一排冇返公司，幾個禮拜之後我先去還，都冇乍我型，我極唔好意思囉⋯⋯🙇🏼‍♀️…查看更多

今日唔太肚餓，兩點半左右嚟到都有下午茶餐食。食lunch D人都未走，等咗5分鐘先有位。鋪頭細細，枱唔多，女仕坐都算ok，不過男仕坐可能就會覺得有啲迫。叫咗個三文魚芝脆蛋多士、熱檸茶。杯嘢飲真係細咗啲，不過個多士好味喎⋯ 脆口，唔會淋哂，食得出係焗過嚟👍🏻 食落好香蛋味，但芝士就唔太夠，不過三文魚鬆粒都唔算少... 預計之內，下午茶細細份，男仕都應該唔會夠飽，女仕輕食都還可以，以咁嘅價錢來講，喺灣仔，都算唔錯！下次試吓其他先😆…查看更多

Weekday喺銅鑼灣想食個有些少質素又唔太貴嘅set lunch, 都真係要搵搵。一路bookmark咗呢間，又咁多個，就試吓啦⋯⋯兩個人冇book位，12:45到，一入去，見到大概已有八、九張枱已入座但係全部都未有嘢食，心驚驚會唔會放完lunch都未有嘢食，不過出面落大雨費事再搵，就入啦⋯⋯我叫咗個沙律，medium cook 嘅Steak, 我個friend 叫咗個湯（是日係粟米湯），Chicken Thigh 。望住個open kitchen 都知道唔會快上菜，因為只見到一個廚，好淸楚見到佢好忙... 十幾分鐘之後前菜到，個沙律雖則冇咩驚喜，但啲菜都好爽脆，好新鮮，我個friend話湯唔錯，飲到有好濃郁嘅粟米，食到有粟米蓉，好homemade👍🏻之後終於有多一兩廚幫手，出菜亦快番啲... 十幾分鐘後上主菜，個steak 肉質幼嫩，有肉汁，仲要係好有grill 味、炭燒味，再配上新鮮炸嘅番薯條，正👍🏻。個friend嘅chicken thigh肉質就冇想像中咁滑，好一般。我以為餐飲喺topup要加錢先有，但原來都包埋，咁嘅價錢，OK 喎！整體來講唔算，不過因為open kitchen, 抽風又唔夠勁，係有D油煙囉⋯⋯…查看更多

想來一個輕怡下午茶，粉麵絕對唔啱我，見到有下午茶包餐，親民價，就試吓啦⋯⋯叫咗個瑞士汁雞脾配蒜蓉厚多士，熱檸茶。隻雞脾比我想像中細隻咗啲，食落唔係好食到瑞士汁，似普通鹵水多啲，肉質亦十分普通，唔夠滑，一路食一路幻想緊北角祥發嘅瑞士汁雞脾⋯⋯🤣 不過塊多士係出奇地好味喎！好有蒜蓉香味，又脆口，真係唔錯喎！檸茶就中規中矩啦⋯⋯整體來講都算ok。…查看更多

喺佐敦嘅呢間飲品店，一啲都唔起眼，舖頭個樣似係跟風賣hea飲，店員只得一個，但幫襯後覺得其實好有heart!想飲又fresh又唔甜嘅嘢飲，見到‘招牌檸檬茶’大杯都只係$20，又試吓佢有幾招牌先...，就叫咗杯走甜。我見到店員真係用檸檬同青檸人手壓榨出檸汁，堅有heart👍🏻。以咁嘅價錢，用真檸檬加青檸來做檸茶，冇得輸！茶有少少澀，以我唔鐘甜飲嘅人嚟講，正！個杯蓋邊有窿，有塞可以冚番，大家可以直接飲，走飲管！…查看更多

作為輕食者，出街食飯都唔吓吓可以搵到light 啲嘅午餐... 有沙律餐嘅lunch可能都要上七八十蚊，又唔想食茶記四五十蚊碟頭飯，常餐都食到極悶... 去開筲箕灣行過見到呢間小店，有沙律跟法包多士，價錢三十幾蚊好似好扺，一於入去試試。入坐時間大概2點鐘，已剩返兩枱客，我一條友，都安排我坐4人枱 👍🏻， 不過如果真係4個人坐係會有啲迫嘅... 我叫咗份煙三文魚蟹籽溫泉蛋沙律，慣性地叫埋少醬。侍應有推薦+$10自家製檸檬薏米水，不過我驚住會甜（我係好怕甜嘅人），就冇加lu。等緊時，佢哋係咁播Twins啲歌，好耐冇聽啦，好有學生年代回憶 ，自己啲歌都擺底唔聽住🤣嘢食嚟到，呢個價錢嚟講都唔算細份，法包多士脆口，係D煙三文魚得幾條⋯⋯不過啲沙律菜係新鮮嘅，撈埋溫泉蛋嘅蛋汁，再加蟹籽少少咸咸地嘅味，都真係唔錯喎！我只覺得係D麻醬多咗少少，好彩我叫咗少醬啫，如果唔係我會覺得啲醬太多... 整體來講都👍🏻 …查看更多

去完律敦治覆診，搵個地方食個輕便下午茶。行到去春園街，見到個舖名叫‘我杯茶’ ，似係啲新式茶記，就入去試吓。 本來諗住要雙黃鴛鴦三文治，好似好特別咁，不過又驚炒蛋+鹹蛋黃太‘漏’， 結果要咗個黯然銷魂叉燒皇蛋脆脆豬，見有位，就堂食。攞張單寫大大隻字‘外賣’，跟著又寫‘堂食’，我有啲confuse，心諗其實佢哋唔confuse就得啦⋯⋯地方唔太大，自己揾位，自己聽號碼攞嘢食，我坐bar枱，張bar枱係有啲窄，還可以啦⋯⋯ 要讚嘅係張bar枱凳有得‘挨’，又可以轉，算唔錯。嘢食到，個賣相幾好，脆豬都幾脆，叉燒半肥瘦，個脆豬同舊叉燒已預先切開一半👍🏻，不過大家記住要先自己預備好濕紙巾，因為你一定會用手食，而個脆豬唔知係咪有啲叉燒蜜汁，笠笠哋。整體來講係好食嘅 最唔好嘅係我明明係堂食，都俾支膠叉我，好唔環保囉 😤…查看更多

Lunch淨係飲咗抔咖啡，到3點有啲肚餓，又唔想食太飽，行到去克街，見到有下午茶包餐，一於試吓。平時茶記豬扒包就見得多，雞扒包比較少見，就叫咗個懷舊雞扒包（走醬）、熱檸茶。個包個樣唔錯，有少少生菜同半塊番茄。個包唔太脆，但都熱嘅，係塊雞扒有些少‘鞋’，又未去到‘檫子膠’，廿八蚊個餐，ok 啦！…查看更多