Maire Siu's Profile

發現元朗呢排開左好幾間新西餐廳，星期日晚上諗住試一試。由於係星期日，怕太多人唔想等位，所以碰碰運氣打電話卜位。可能小店係元朗區都仲係新，即日中午打電話去卜晚上8點兩位都卜到。晚上於用餐時間跟住openrice既地址去搵，原來JC Room 係承接了Chef's Stage 舊鋪位。去過Chef's Stage既都知道鋪仔細細，只容納到12人。不過好在晚市用埋格離茶記個鋪位，叫做多番d位。格局裝修同舊chef 無咩大分別，如果爆場都會坐得幾迫。唔講以為餐廳只係改左名做jc room, 係同一個老闆營運XD經過好奇心查證後，唔係同一個老闆黎咖!! 職員都好NICE, 第一時間比MENU同水。麵包籃落左單之後會有麵包籃送上。有脆脆麵包條同小方包，小方包有少少莓乾，兩者一脆一軟熟，配上咸咸地既芝士醬，喚醒味覺。食完個二人份量麵包籃，職員會主動問你要唔要refill麵包，麵包係好味，不過要留肚食main course。餐湯點主菜加 $35可配餐飲+餐湯/沙律，加$20可配menu上各甜品一客。是日餐湯有兩款，我地加左一個煙肉豆蓉湯。湯比較厚身，有質感，啖啖都食到煙肉碎同豆蓉夾雜其中，味道唔會偏咸，亦唔會似一般忌廉湯太膩，兩個人share一碗份量岩岩好,因此個碗都幾大。沙律$88menu上有3款沙律，除左基本既凱撒沙律，仲有jc chef special salad & daily salad。jc chef special salad $88 ；daily salad $40。 我問職員兩者分別，前者用料比較豐富，亦用上了house dressing，份量亦較多。既然第一次光顧，當然要試house salad。果然不失house salad的期望。用料的確很多，香橙柳係成個沙律帶酸既食材，非常refresh。數得出既食材仲有松子仁，日本蘿蔔，芝士粒，車厘茄，青瓜，黑橄欖，沙律菜等等。dressing微酸，質地較為流質。份量足以滿足比較鍾意食沙律既我倆，其實都夠一般3-4人普通量。餐牌上有打星星既廚師推薦食物，而每類食物都有一款素食，包括burger，非常user friendly。第一次麻，當然食下打星星既廚師推薦食物。薯蓉伴羊架$188甘多款肉類之中，我最喜歡食羊。伴碟可選焗薯/薯條/薯蓉，而醬汁可選黑椒/蘑菇/燒汁。我地點左7成熟，蘑菇汁薯蓉羊架。一上菜已經暗暗地讚，因為除左點選既蘑菇汁，廚師仲比埋薄荷jelly。出面好多餐廳跟左點選既汁就skip左無比薄荷jelly，要再問先有...不過如果有埋英/法芥末就更加豐富。薯蓉的確出色，奶白既顏色，好creamy好細滑，份量少少，唔會用薯蓉黎塞飽你。一碟主菜既羊架，有4支骨，份量十足。廚師以每兩支骨甘煎。表面煎得香口，切開有微微血水滲透整件羊架。兩支骨既羊肉有一定厚度，但廚師很出色地展現了7成熟。不得不讚，肉質很嫰，把扒刀亦非常好切。意大利飯$148另一個主菜都係點左打星星既廚師推薦 -- 北海道帶子紫薯意大利飯。jc room 既主食 (飯/薯蓉) 普遍偏少，如果食澱粉質為主既朋友可能覺得唔夠食。但我晚餐食澱粉質既份量比較少，個人覺得份量倘可接受。顏色非常奪目! 加上兩大顆珍寶size既帶子，未食先赢得掌聲!! 老實講，紫色既意大利飯唔係太食到紫薯味道，個人認為紫薯應該帶甜，如果飯可以再甜少少會更好。飯混合左d菇類，比較爽口，同飯既口感形成對比。但飯質稍為偏硬。珍寶帶子煎得非常好食，表面香口，內裡係半熟既感覺，鮮甜。即磨熱咖啡餐飲無轉特飲，只係點左即磨熱咖啡。有即磨咖啡既水準，但個比較喜歡有熱奶泡的咖啡。老師娘解說奶係咖啡專用奶，唔係普遍鮮奶，打成熱奶泡無甘好飲。然而奶係幾滑既。伯爵茶焦糖布丁跟餐加$20可選餐牌上既甜品。伯爵茶焦糖布丁，布丁好滑，唯茶味可以更濃。是晚共$527/2人…Read More

預上了8號風球，新世紀廣場在8號風球正式掛起既30分鐘內差不多全部商店都關上，只好無奈地往東鐵站走，踏上歸家的道路。作為抹茶控的我，對東海堂的抹茶卷蛋及抹茶芝士評價相當之高。在其他店舖都關上的時候，東海堂仍然開著。前幾日經過其他門市得知東海堂推出了幾款抹茶新產品，今天在歸途上決定把它們帶回家點綴一下號風球的晚上。其他抹茶蛋糕款式要不預訂，要不己售罄。只餘下抹茶芝士杯。$22/杯,買3杯有85折，便一口氣帶了3杯回家與家人一起品嚐。小小既芝士杯，驚喜地帶出4個味道。第一層，抹茶JELLY，甘香既抹茶味道，沒有被甜味蓋過。第二層，抹茶海綿蛋糕，與第一層JELLY質感很大對比。第三層，芝士，帶少少甜度既芝士，不算很幼滑，但配上第一、二層一起吃，香濃美味。最驚喜的竟然是底層!! 底層配上了蔓越莓果醬，把上面3層的甜膩感一掃而清。這小小的一杯子，味道真的不簡單!! 讚!!…Read More

渡過了忙碌的一週，打算找個舒適地方和老公來一頓晚餐。在"開飯"遊走時，發現了一間新開的Cafe，由於我倆都偏愛西餐，二話不說便致電訂座。店舖一如其他Cafe般設計簡約，以灰及白為主色，店舖雖小，但對顧客都照顧周到，門外有數張椅供客人坐著等候。訂座關係，到店便即安排入座。當晚雖未至於人頭湧湧，但店內都接近滿座，而店員安排我們坐四人枱，所以都十分舒適。店員為我們遞上餐牌時，會介紹今日餐湯及當天進貨海鮮，相比其他小店需要客人自行查問，倍覺細心。當晚我倆點了兩款前菜，一款主菜，主菜加28元可以配餐湯及飲品/甜品。餐湯及面包：甘荀薑湯配甜麥包 - 薑味濃而不辣，甘荀清甜配合薑味，是一個令人甚有驚喜的配搭；                                                    雖然我們只點了一份主菜，都仍給我們跟上兩份餐包，毫不計較，                                              甜麥包十分鬆軟，沒有令人口乾之感。前菜1：燒菠蘿雞胸肉沙律 $68- 菠蘿經過處理，外脆內甜而多汁，開胃一流；雞肉也煎得香口，惹味非常。大量車厘茄、黑橄欖、青瓜粒與沙律菜，實屬誠意之作。前菜2：烤原條"魚立"魚$98- 魚皮烤到十分香脆。切開魚身，魚肚位置放了四片檸檬，用作去腥，魚油由裏                                       面流出，香氣四溢。火候控制一流，魚肉剛熟，入口十分鮮嫩，再配以黑橄                                     欖蓉調製既醬料、海鹽及新鮮香草，令魚肉入口更加鮮味十足，店員所推介                                     當日新鮮到貨實在並無虛言，食後回味無窮。主菜：芝士焗豬仔骨配洋蔥圈$158- 豬仔骨以芝士焗，兩種較濃味道走在一起，本以為是其中一種味道被蓋                                               過，誰知燒汁配芝士一醎一甜，反而令豬仔骨更有風味，再加上時間控                                           制得非常準確，肉質十分嫩滑，肉汁十足，加上搭配久違既洋蔥圈及生                                           菜令整碟主菜搭配得非常完美。甜品：伯爵茶奶凍- 奶凍是分開兩層的。伯爵茶在上層，奶在下層。平常的奶凍都有很濃的奶騷味，這個並沒有，因此淡淡的伯爵茶味沒有被奶味蓋過。在碟旁有一小堆忌廉，眼見與平時即食忌廉唔同，小嚐一口，原來是新鮮打的鮮忌廉，果然毫不馬虎。甜品整體不會太甜，作為餐後一個味覺上的緩和點實在不錯。本店不設加一，是晚兩口子共點了$352。walk-in晚餐有九折，我們在openrice用了八折coupon，折實後共$282. 由於Set Dinner 選了甜品所以沒有餐飲，我們翌日再次光顧小店，使用了openrice mobile coupon "flat white買一送一優惠"。星期六的下午5:15pm到達，不用等位，場內座了4、5台客。星期一至日都有tea set，5:45pm開始換晚市餐牌。小店在餐牌強調咖啡豆是新鮮磨制，我們的flat white都點了skimmed milk，要是能提供soy milk就更好了。可能未有太多客人點咖啡，沖咖啡時店內並沒有彌漫著咖啡的香氣。喝下去咖啡味道倘算濃郁，沒有酸味。咖啡師實屬小店的水吧/甜品師傅。拉出來的心形也十分像樣。其他下一次嚐試小店其他的甜品及咖啡。…Read More

尖沙咀區既自助餐多不勝數，柏景長期都做唔同既優惠，黎呢到之前都考慮過唔少同區既酒店，但睇到其他食評話柏景屬尖咀區未比自由行人士攻陷，我好怕食自助餐要勁排隊，所以我就決定黎試試。6點半準時入座， weekday既人流唔算多，拎野食完全無要排隊既情況，而座位亦非常寬敞。一開始就去食沙律同冷盤。沙律菜都幾fresh，款式都唔少，紅菜頭、紅腰豆等都應有盡有，仲有d凍肉。而冷盤最出色可說係prama ham同海鮮。 Prama ham 一d都唔孤寒，原隻放係到有專人現切，可能唔洗排隊既關係，要幾多有幾多，當然有哈蜜瓜伴食，旁邊仲有4、5款芝士同crackers，岩曬鍾意食芝士既朋友。我對芝士無咩研究，食完都講唔出佢地既種類，但都試左3款，味道濃至淡都有，可以一嚐唔同層次既滋味。柏景無生蠔，我本人唔太食生蠔，有鮮甜既海鮮已經大為滿足。海鮮有大蝦、蜆、翡翠螺、長蟹腳。長蟹腳很鮮甜，唔沾醬料都甜味十足。十隻手指有長短，長蟹腳有肥有瘦，通常比人夾曬D肥既，瘦既無人問津。我好欣賞柏景refill得好快，即使得番d瘦既未比人拎，職員都會好快甘refill番d肥蟹腳落去。食完冷盤，就到side dish。糖心蛋煮得唔錯，糖心橙黃色，半液體狀，小小的半隻份量，不怕吃膩。精緻既鵝肝燉蛋，連蛋殼上，一粒粒既鵝肝粒伴細滑清香既燉蛋，是不錯的配搭。向來好少於自助餐飲中湯，都怕飲得肚脹食唔落其他野。不過媽媽極力推薦之下就試左是晚燉湯 –蟲草杞子圓肉老雞燉湯。燉湯放在蒸汽彌漫既蒸爐內，熱辣辣。經過專業主婦試味，認為真材實料，並非味精雞湯一滴香之作。熱盤最為吸引必定係松露著蓉伴鴨肝! 鴨肝每碟比一至兩塊，視乎大少。鴨肝面層煎得很香口，油份充份由內滲透出黎，與細滑既薯蓉混合，加上松露香味，實在難以抗拒，不自覺地要安哥再安哥，食左3、4次。另一吸引熱盤就係慢煮羊架。第一輪出既羊架最岩我口味，因為第一輪的SET場既時候已經拎左出黎，慢煮本身得3-4成熟，SET場至開場開始食都有一段時間，所以羊架被烤至5-7成熟。羊肉肥瘦分明，唔騷唔好味。但之後再出既羊架因為短時間內refill，都只有3-4成熟，我吃唔慣太生，查問之下，經理友善甘話可以叫廚師大哥把指定羊架為我加烤至5-7成熟。服務真是一流!讚!烤牛肉也不錯! 但因為一大舊甘燒，肉既外圍同中心既肉質相當唔同。外圍烤得比較乾身較熟，中心粉色多汁。建議大家因為自己個人喜好睇岩切到邊一part再去拎。熱盤仲有一般既咖哩、麵飯、中式蔬菜，由於我後勁仲要攻甜品，所有未有多吃，不能盡錄。我揀柏景，除左得知未被自由行攻陷之外，movenpick雪糕亦係我既挑選條件之一。雖然甜品都有數十款蛋糕果凍，但我主要係食雪糕及即制系列。雪糕有齊曬三大品牌，movenpick, haagen dazs 及dryers。Movenpick有6款口味， haagen dazs 及dryers則各有2、3個口味。雪糕可以就甘食又得，伴脆筒又得，即制pancake又得，伴華夫餅又得!! 總有一款岩你口味。我就款款都甘岩!食曬甘多款!! Pancake仲可以揀香蕉/藍莓。華夫餅新鮮熱辣，外脆內軟，加埋一口雪糕，冰火交溶既感覺出黎啦!!! 仲有另一款即制甜品，光波爐梳乎里。可能我地係一批點梳乎里，粉開得唔係甘好，梳乎里內有一粒粒既粉粒，味道亦麻麻。其實有光波爐整梳乎里係好好既即制甜品選擇，希望可以多加改善，下次再來臨既時候可以整到好吃既梳乎里吧。總括而言，柏景係一個地點方便 (西鐵柯士甸站/地鐵尖沙咀站可行到)，環境舒適，食物質素與種類亦能一晚滿足我海鮮、鴨肝、羊架及甜品既食欲。用左openrice 7折coupon，埋單每人400元左右，性價比相當高!! 不久將來我會再來=] …Read More

星期六, 下午茶時間玩完水上活動, 之前經過見到PAN DA CAFE好似佈置得幾靚幾有心機, 所以今次無睇食評就 "深入虎穴"了@@由於本人有輕微既 選擇困難証, 雖然係星期六, 但4PM既時候餐廳只坐了一半, 老闆用不著追魂call甘係甘問我地落得單未..... 黎得cafe就係想輕輕鬆鬆慢慢黎, 要快既我去食快餐啦!!好啦, 到我終於諗到食咩啦~ 叫窩夫無窩夫, 叫牛角包無牛角包星期六既4pm就咩都無, 我想像唔到weekday會係咩境況囉呢間餐廳。點完食物，我話要諗諗飲咩， 個目無表情既老闆又走後催我問我寫得未! 你問唔緊要, 如果態度好少少會無甘令人討厭囉。成個service我只係覺得比人催緊,而唔係比人關心我想食d咩!! 呢間餐廳無service可言!講番食物質素:我本來想點  "鮮果窩夫", 鮮果自選一款, 要芒果。佢話我知無窩夫得pancake....但黎到既係一份芒果醬凍pancake 不如你話埋比我知無"鮮果", 甘我就一定會放棄唔叫,而好過黎到甘失望。另一個tea set 本來想點"蛋沙律+煙三文魚"牛角包...無蛋沙律,無牛角包.....結果點了"煙三文魚芝士意大利包"當我見識少, 即使意大利包係凍食的, 塊芝士都唔會原封係拆開個膠紙一片甘款呱? 加少少工烘下佢得唔得先?!兩杯餐飲都叫左mocha, 一熱一凍。味道普遍，咖啡同朱古力味都係淡味...是次用餐經驗兩個字講曬 = 中伏成個西貢無曬餐廳我都唔會再黎食…Read More

係到食過下午茶，覺得呢間鋪仔整野食都幾有心機, 幾有誠意，所以今晚就黎試下晚餐。選擇都有好多, 選一個PASTA/PIZZA/MAIN COURSE加$28可轉套餐.我地2個人, 分別點了一個意粉跟套餐, 多一個例湯,蒜蓉多士,同埋一杯飲品.跟餐既蒜蓉多士都好香，不過唔係太夠脆。呢個例湯(粟米忌廉)唔係難飲, 不過就好普通, 本身唔係甘好忌廉湯既我, 下次會選擇單點一杯餐飲, 都只係$13. 另外再點了一個set dinner。開頭都覺得set dinner 既價錢比較貴, 由頭盤,湯,沙律,主菜,甜品及餐飲完整一set, 但當食物上場既時候, 試埋個味道, 我地都覺的呢個價位, 係值得既.先講頭盤,今日係食韓式炸雞. 個韓式醬汁好味, 係食開炒年糕果款辣醬.set dinner雖然係一人份量, 但其實夠2個人share. 炸雞都有兩件, 炸得好香. 個肉身仲好滑, 之後黎個set dinner的餐湯無得選擇, 係蘑菇湯, 食落口啖啖蘑菇蓉,好香, 讚! 例湯同佢係無的比, 此外menu上還有其他款式既湯. set dinner的鴨胸沙律, 比想像中大碟, 因為平時出去食開既西餐, set dinner 既沙律都只係兩啖, 呢到既拍得住單點沙律既份量. 而且佢係用幾款沙律菜, 三色椒仲要好有心機甘切粒, overall 個沙律係新鮮, 賣相亦好大方得睇，唔係是是旦旦既西生菜同粟米粒交行貨, 配上黑醋汁, 絕無欺場。之所以我話個鴨胸沙律拍得住單點沙律既份量, 因為我地仲加左個廚師推薦既"炸蘑菇沙律"$48. 呢到既炸蘑菇唔係outback果d, 呢到個皮好厚, d粉厚到好似章魚小丸子甘厚@@真係食皮都食飽, 雖然我唔係甘欣賞佢個厚皮炸法, 但皮入面既蘑菇仍然係juicy的main course我地點了烤羊扒, menu上還有單點的煎羊架。羊扒份量又係出乎意料之外，共有4件厚厚的。薯菜亦係另一個加分位, 有茄子, 翠玉瓜同秀珍菇.不過略為煎得多左少少油. 著仔係片上, 面層鋪有芝士焗過。羊扒點了七成熟, 廚師handle得好好,扒外煎熟鎖住水份,內在既肉仲係粉紅色, 但無流血水。肉質肥美,好有羊香=]PASTA點了拿破崙意粉, 非常普通。意粉質地如果可以再煙UN少少就比較好. 但份量也是多的一大碟.最後set dinner的甜品是鮮奶布甸, 很滑, 軟硬適中. 整體黎講, 呢間餐廳個格局有d似茶記, 但佢d食物又整得好有心機, 餐廳內有個黑板畫上menu, 都幾靚.羊扒set dinner $268, 都值既. 有機回會再黎試其他食物.…Read More

King Ludwig 洪水橋同尖東都食過，今日剛巧係胡忠大廈，難得黎到，當然要試下灣仔分店既lunch set$95 Salad Bar，都可以夠你食飽熱食有兩款腸，類別我唔係太識分，但皮脆肉熱，唔會太咸，如果main course甘點一碟腸黎食，我覺得太膩了，除非4，5個人share啦，而家salad bar雖然得兩款腸食，不過可以小食多滋味嘛。仲有迷你pizza，同埋quiche, quiche同pizza一樣已經切開左一小塊一小塊甘，熱盤溫度都夠暖，味道不俗。麵包有好多款任君選擇，本人就鐘意長條形的咸包條同薄脆片。後者弄碎放入湯，浸林左再食都好好味。熱食仲有烤粟米段。冷盤方面，有沙律菜，有蛋沙律，有紅腰豆粟米，蓮藕撈瓜，冷麵，茄子撈青瓜，同四款凍肉片。四款都唔係好咸，即使單獨食都好味。是日餐湯係海鮮周打魚湯，入面好足料，有蜆肉蝦仔薯仔紅蘿蔔。另外點了一個紅酒汁羊肉，反而個main dish 就麻麻地，羊肉有啲老，不過伴碟既薯格幾好味。跟餐有甜品，不太甜，櫻桃醬出奇地無藥水味lunch time都 full house. salad bar直得再食，反而main course 留番晚市散叫好味啲。…Read More

今日係平日既關係，無咩人食早場早場係1800食到2000hr雖然地方細細，係酒店lobby既一角，座位唔太多，不過每枱既空間都好充足，坐得好舒適。每人包一杯食飲，樽裝可樂同忌廉就任飲基本既冷盤有 parma ham 同 沙律菜， 不過無紅菜頭就差甘啲野甘由於今期係泰式，冷盤有泰式生牛肉，柚子海鮮沙律，酸辣鳳爪等等特色啲既牛油果蟹肉餅冷盤最值得推薦，食完上述一系列辣既沙律，食番啲牛油果中和下相當唔錯魚生亦係自助餐基本食品，所以今晚主題雖然係泰式，但都有三文魚，八爪魚同油金魚。只試左三文魚同八爪魚兩款，都倘算新鮮而冷盤主角就係生蠔同凍蟹腳早場生蠔得兩款，8點半果場就有三款。早場既兩款係南非同美國蠔。兩款都好鮮甜，不過南非比較好味，但食到後期有少少沙凍蟹腳都有兩款，阿拉斯加蟹腳係出面比較少食到，好肥大，啖啖肉。另外果款就係一般食到無尖角既蟹腳，兩款都比較偏咸水味，但都算新鮮。凍海鮮仲有翡翠螺，青口，蝦同龍蝦仔。龍蝦仔因為怕麻煩，所以只試了螺同青口。翡翠螺都好甜，無沙。熱盤款式唔太多選擇，不過好難得泰式都有燒羊鞍同羊架。泰式羊鞍係成支骨甘食，醬汁炆到啲肉好林，好入味，亦唔需要再沾任何醬汁甘食。羊鞍好大支，同人share食先食得落羊架有咖哩汁，薄荷醬同芥末任君選擇。只有兩三件係5成熟，大部份都over7成熟。肉汁比較少，但仍然好有羊既so味，反而個即切烤牛肉就5成熟其他熱盤仲有蔗蝦，青咖哩雜菜，咖哩炒蟹，蒜蓉焗青口，炒蜆等。串燒一早燒好曬，涼左唔好食了甜品熱盤既甜品迷你葡撻熱辣辣，個皮酥得黎唔會太油膩。燕窩燉蛋，味道淡淡地有蛋香，係一個清清地唔太甜既熱甜品仲有紫米露，不過真係食唔落。即煎pancake有藍莓士多啤梨香蕉燕麥揀，pancake皮薄薄的，都是水準之作另外仲有個甜品櫃，蕉糖布丁同檸檬cheesecake最好味! 不過蕉糖布丁得匙羹甘細，一啖就食完，不過cafe都堅強每次點每次先即時灑糖用火槍燒，誠意十足!仲有自助軟雪糕機同朱古力火煱，反而for火煱既士多啤梨好大粒，又甜基於今晚半數入座都唔夠，所以所有生蠔，即煎pancake都唔洗排隊openrice仲有二人同行優惠tim環境好，食品都盤有質素，又有優惠，都值得一試不過甜品款式較少，愛好甜吃者可能未必甘鐘意…Read More

聞名已久既清真牛肉館, 因為地理位置係九龍城唔係甘就腳,所以一直都冇去試,直至上星期食到此店外賣的咖哩羊腩..... 外賣翻熱都好有羊味, 所以決定長途跋涉去店舖一試訂了晚上7時, 要人齊先比入座, 當時人唔算太多, 座了6,7成位左右.地方亦唔係太迫, 5個人座6人座倘算舒適.我地分左3輪點菜,第一輪點了雞絲海蜇$78海蜇彈牙爽口,青瓜切條亦十分爽口清甜, 雞肉絲不"粗鞋",加上少量的麻醬同芝麻, 青甜中和番芝麻味,成碟食物溫度涼涼的, 好吃! 雞食我地點了兩款, 另一味就係麻油雞(例)$74麻油雞並沒有油淋淋既感覺, 點了一份例牌, 一小份也包含了雞腿在內. 肉質滑滑的, 可惜例牌份量太少, 5個人, 我只吃到一件就比同台的吃清!!上菜神速, 只是包點需時比較耐點了一客炸銀絲卷$19送咖哩羊腩銀絲卷炸得很干身, 內裏一絲絲很軟熟.沾上咖哩汁吃很不錯咖哩羊腩($69)的咖哩是香港人的口味, 唔太辣, 羊味很出, 肉質好林, 肉同脂肪既比例岩岩好, 食落口啖啖肉之餘亦有羊油香! 一碟小小的, 當中只有一兩舊薯仔, 羊腩很足. 推!!牛利濃茄湯年糕$52"濃茄湯" 令我期望真的是質地杰杰既蕃茄湯....事真係同普通的蕃茄薯仔湯差不多, 只是湯料換了是牛利及年糕. 牛利薄薄一片片, 年糕煮湯不粘口, 味道一般, 年糕不太入味, 不特別推介.干燒四季豆$66,很有鑊氣,味道很香很濃郁, 拌飯之選黃金蝦球($111), 價錢的確有點貴, 件數不是特別多, 但炸得很干身, 不油膩, 炸完蝦肉仍然彈牙鮮甜, 推!鎮店牛肉餅($16/件), 兩個朋友一咬入口, 牛肉汁就爆出. 餅的表面是干身的, 皮厚薄合適, 能夠包鎖住很多的肉汁, 但又唔會食到一口粉.  咬開完全是肉汁跟牛肉, 果然名不虛傳的多汁好吃! 之後蒸點餃子來了羊肉餃子是羊愛好者另一必吃. ($38/5件)  皮不算很薄, 但羊肉的確很重味道. 反而羊肉小籠包皮做得比較好, 無倫係羊或清真小籠包($36/4), 包中都有很多精華肉汁. 小籠包的價位亦比其他上海鋪的價高. 但始終用的肉比較好, 沒有多餘的脂肪, 也是值得的牛肉湯水餃($33/10件), 牛肉味道跟之前幾味的相似, 就是比較清蝦子鍋塔豆腐 ($64), 醬汁配上煎豆腐, 口感味道都恰到好處, 也是拌飯之選.最後點了甜品-桂花糕, ($15/件), 全晚最唔好食既算係呢樣. 無桂花, 淡味, 質地唔夠硬. 九龍城甘多食甜品既地方, 絕對唔建議係到食埋甜點. …Read More

今晚卜左同老公慶祝生日，有兩個時段，其實食2個鐘都夠既，所以食515至715pm人頭平一百蚊係抵早啲黎食既未夠5點已經到左餐廳，餐廳都好好可以比我地早啲入座好準時5點12分已經有侍應通知我地自助餐已經開始一開始就食凍盤呢到無常見既翡翠螺同龍蝦仔，不過有我最鐘意既長蟹腳。蟹腳好凍好新鮮，食用工具都一套套放好係凍櫃格離方便食家門取用。每一隻都好肥美，好鮮甜，一隻都無海水過鹹既味道。青口就一般水準。如果好食生蠔既朋友呢個自助餐就真係好抵真，有幾個國家既生蠔即開任食，我同老公都唔係甘好生蠔，因為怕腥，所以都係一隻起兩隻止。老公去排，同開蠔職員講兩個人，佢都好人性化甘一碟比左美國同法國各兩隻。雖然我怕腥，但呢到既生蠔唔係點腥，反而仲幾清甜，可能係夠新鮮既關係?現烤既有一啲和食，例如墨魚丸，大板燒，燒雞亦，最好味當然係和牛同埋鴨肝!即煎既和牛片片都薄薄的，唔會好肥，入口成陣濃郁既牛味充斥成個口腔。而鴨肝亦非常肥美，鴨油慢慢甘流出黎，最欣賞既係呢到地方細細，食物款式唔算多，特色即點制即制食品基本上唔洗點等就有，讚!!卜位時唔知道呢到既心太軟可以即時係memo紙寫低心思字句比甜品師傅即時寫，所以一早安排了餐廳在甜品碟上寫"Benny happy birthday", 餐廳選了芒果慕思蛋糕作為我卜位時預訂的生日甜品。呢到除左生蠔，和牛，長腳蟹，鴨肝出色外，甜品真是令人喜出望外。每一款甜品都係水準之作，味道唔會偏甜，食多幾款都唔會覺得膩。我係心太軟環節留了一張memo寫了4個字，"臭足一世"，甜品師傅就好有心機甘幫你構思成個方碟既sweetsweet圖案，我另外要求畫多豬頭上去都無問題，真係好貼心既服務。而預先訂既生日甜品，職員亦細心觀察到我地開始拎甜品食就送上。生日仲送多左張100蚊coupon下次可以用。p.s.值得一提既係餐廳既服務, 雖然二人台空間有限, 但佢地好窩心甘有個籃係台底比你放袋, 唔怕出街既大包包迫住自己坐=]…Read More

星期五放假，諗住中午去試下呢間得到甘多個好評既茶檔。以為午餐時間會有好多人要等位，甘好彩去到有位，雖然餐廳keep住坐滿人，但人流去得好快，餐廳既空間感都唔會太辛苦，可能係圓枱，坐落比荃灣好出名，無論咩時間都大排長龍既茶記坐卡位來得舒服。食物好快就上左。第一次黎就試試佢啲招牌野豬手麵豬手好林身，一碗兩三舊左右，皮比較多，南乳都夠入味，不過就唔係粉嶺群記果款啖啖肉既豬手。麵底比較細，麵身煙un爽口，好味蛋牛治烘底牛肉加埋蛋一齊煎成一個蛋餅甘夾係兩塊麵包中間，雖然蛋係無蛋汁，但幾香口，加埋牛肉個味道唔太鹹，味道剛好。烘底麵包令到塗係兩邊既牛油溶化，連埋蛋牛一齊咬，配搭整體不錯。$17也不算太貴。奶茶茶味很濃，很香，溫度夠熱，沒有被凍奶溝低了茶的溫度。讚，反而咖啡就較遜色，味道偏酸。兩個人當早餐甘食，都唔係好夠飽，所以追加左碗牛腩撈粗。牛腩汁味道濃郁，都唔捨得用湯撈淡啲腩汁黎食，而本身都比左好多腩汁，唔撈湯都夠食牛腩係坑腩，入味，肉質亦就林。粗麵同樣出色，爽口彈牙。地點近地鐵站口，亦接近西九龍廣場，好多街坊都會買外賣。有機會經過呢頭，都想試埋佢既西多士同紅豆冰…Read More

每次到lamma都會經過shelly cake express, 但唔係timing唔岩食唔落, 就係爆滿無位坐本身23/11/2013 黎lamma fun day想食tea, 不過又係weekend tea time 無曬位. 好在今次卜左渡假屋住一晚, 又怕星期日tea time都一樣好爆, 所以星期日係洪勝爺灣食完早餐就慢慢行出黎. lunch time 12點1點左右係無咩人食cake飲咖啡, 店內一客人都冇, 我地就好自由甘揀左個角落頭黎坐.每一張台都有好靚既花花台布同糖樽, 睇得出店主好有心思, 作為客人感覺好warm不但cake 係homemade, 連個cake menu 都係手寫, 可能因為每天都因應材料而決定整咩cake啦不過cake既款式真係多, 有9款, 仲係set 可以配一杯regular coffee or tea, 價錢都合理, 有小店經營既感覺, 唔會好似d high class coffee shop甘整得唔好食又set到價格高一高老闆仲介紹, d cake 係由淡味到濃味由上至下甘寫係個menu到, 者係set a 個cake 就味道最淡, set i 個cake 味道就最濃set drink upgrade左rose latte, 既有咖啡味, 又有好香既花味. 甜度適中配上一件baked banana cheese cake. 本身喜愛食banana product 既我,有少少失望.因為banana cheese cake 根據老闆話, 佢係個menu最底, 應該係最濃味, 所以我就期待住好濃郁既香蕉味可能希望愈大,失望愈大啦. 雖然香味不夠濃郁, 但cake身偏微硬帶少少軟熟, 甜度岩岩好, 唔會食完好溜好濟.另外個set 叫左熱既 fresh apple pie呢個真係好fresh 同 熱騰騰!! pie 底一d都唔甜, 完全食到蘋果夾肉桂粉既味道.再有一小球ｃream, 一冷一熱既配搭很不錯.整體小很有家的感覺，　味道是家的，　態度是家的．下次一定會再就岩時間，　黎試埋其他款…Read More

女人街食肆林立，但每間既空間都非常細小。今次用tablemap訂位，試一試Fine Pasta水準。   一餐稱心滿意既晚餐除左食物質素外，餐廳既環境同氣氛都好影響。意料之內環境一如女人街其他食肆，迫迫迫@@ 二人座位連袋都無位放，同格離2人枱只係微微拉開，相距3cm，真係格離講咩我都聽到曬。如果一家大細親子甘黎，小朋友活動空間真係未必夠，建議3，4個朋友一齊黎就好過兩個人，因為有啲靠牆既4人位，獨立唔洗同人迫。除左個環境有待改善，其實啲食物絕對係水準之作。 本身想食羊架，但無貨，所以叫左$398既2人餐，用tablemap訂位呢個餐有8折。 頭盤既 炸蘑菇外表一般，用似麵包槺黎炸，但咬落去就出乎意料之外，出面既麵包槺炸得乾身，但咬入口竟然多汁到漏，非常juicy!好香蘑菇味呢！同碟既炸洋蔥圈就比較失色，皮炸得較硬，無咩洋蔥味。而凱撒沙律亦普通之作。 每人一杯蕃茄湯同一件蒜蓉包。呢個係誠意之作！！讚！個包係用心塗左啲蒜蓉牛油上去一齊焗，焗到個蒜蓉面金黃香脆，浸落個蕃茄湯番林黎食，味道一流！食曬個包，齋飲個蕃茄湯，就發現個湯有啲偏酸，但湯身好杰，似一杯茄蓉湯！雖然齋飲酸左啲，但配落美味既蒜蓉包黎食就唔覺得酸。如果可以追加蒜蓉包去飲埋杯蕃茄湯就一流啦！ 主菜之一係BBQ豬肋骨，超級長同大份。兩個人食真係夠曬皮。個BBQ醬都幾甜鹹適中，唔會烤到太燶。啲肉有少少痴骨，肉身唔夠林，勝在夠大份。 而另一份主菜我地無叫pasta,反而叫左薯蓉伴盧魚。唔知係唔係兩main course4選2，我地要曬肉類無叫pasta，而肉類貴過pasta, 所以我望到我地份魚係比格離枱散叫既細，而單點既薯蓉係有香草我地無。件魚都烤得唔錯，魚皮烤到金黃，肉質有口感，連皮食都唔會腥。個薯蓉就做得更出色。個質地好滑，一啲粒粒都無，第一下撩起好“漿”既感覺嚇我一跳@@原因係撈左芝士既薯蓉！！薯蓉本身唔係好鹹，用黎伴魚就剛剛好。 食完2個主菜都開始飽，最後甜品係tiramisu. 個杯好靚，好grand既感覺。杯tiramisu有三層，cream cake cream, 個cream做得好creamy,好滑，整體唔會太甜，好味！ 唯一失色既係杯凍檸茶，茶味同檸檬味都無mud. 下次黎唔會再飲檸茶，反而會試下散叫炸蘑菇，跟餐得3粒唔夠喉。 下次會早啲黎食晚餐，食物味道不俗，唔想甘多人甘迫，坐得太辛苦啦@@希望下次羊架有貨啦。…Read More

想試左好耐既咖啡小店，今日終於試左。 由於假日關係，下午茶時間係keep住滿座。老闆都好有心機，如果滿座會留低客人電話，一有位就打番電話比客，幫佢留座。  今日試左Ice mocha 同 ice latte in green tea flavour 。兩杯野飲既咖啡味道都超乎想像既濃郁，特別之處係兩杯既咖啡都好唔同。各自都有一陣不同既咖啡香。Mocha既咖啡味比較沉實，而latte既咖啡味比較清香,但重申兩杯既咖啡味都係超過濃。反而綠茶味道就比較少，可以比濃厚既咖啡味遮蓋左。而同starbucks比較，呢到既咖啡味仲比較特別添。 cake方面，試左熱情果芝士餅同益力多藍莓乳酪餅。熱情果個味道好香，芝士好滑，一啲都唔會過甜，而芝士餅身硬度岩岩好，唔會雪得太硬難以進食。而個益力多餅就比較軟身，乳酪加上藍莓，甜中帶酸，兩件餅食落一啲都唔溜。濃郁既咖啡，配上清香不溜既芝士餅及乳酪餅，係一件賞心樂事。一set$60。   如果閒日黎仲抵，續飲同款飲品加$10！！下次真係要再試！…Read More

第一次食甜牙牙既時候，係食bailyes牛乳黑糯米布丁。牛乳布丁又香又滑，加上bailyes既咖啡酒味，牛奶同咖啡味互相襯托，而黑糯米煮得好有口感，係軟軟既布丁之中，煙un既糯米帶出多一層既口感，對比之下令布丁顥得更細滑。而糯米同酒亦都係非常夾既朋友，酒味亦帶出糯米香。今次男友都點左，不過佢要mocha牛乳布丁，但上枱既時候唔係mocha布丁，問到出口先話mocha味賣曬。但係你賣曬係唔係應該係落單，或廚房發現賣曬既時間同客人講呢？而唔係“博大務”甘等人問到出口先講。等左15分鐘先有野食，而家上枱貨不對版你先話唔岩既再同我換，客人有冇甘多時間去等你？！   而我今次試宇治抹茶綿花冰。隻碟係凍既，碟上既食物都係凍既，但何解一上枱既時候個綿花冰同球雪糕都已經溶左啲？我相信係廚房整起左，侍應出唔切，放到溶左。如果因為係繁忙時間而keep唔到水準，我覺得呢間食店仲有好大既進步空間。 講番呢個綿花冰既味道。個冰既抹茶味好淡，雪糕球既抹茶味比較濃。個冰既份量適中，但配菜既紅豆，布丁同雪糕球size太細了。當所有野配埋一齊食既時候，我食唔出布丁既牛奶味道。對於此冰有啲失望。   甜牙牙最出色應該係佢既窩夫。窩夫等左30分鐘先有得食，好在都無令人失望。呢到既窩夫同出面既唔同，佢係好脆口，入面唔會有太多粉食到你好濟，本身唔會太甜，配上雪糕球一冷一熱既感覺就岩岩好. 以後黎甜牙牙都係食窩夫好啦…Read More