Lad Cheung's Profile

自疫情開始到而家都無返過內地, 最後一次食太二既時候, KEEP起左包紙巾, 提醒自己有機會一定要返去再食, 但過左一年、兩年, 開始忘記了太二酸菜魚既味道, 中途曾經食過掛太二名號的廚十三, 但完全唔係個回事.今次知道真係係香港開太二分店喇, 即刻去回憶回味當年情, 不過...可能唔係多人知道新開左, 所以唔駛等好耐, 亦都唔需要齊人先可以入座環境真係同內地分店差唔多, 例牌可以自己沖陳皮同洛神花飲枱面有個幸運籤筒, 不過入面好似都係吉同大吉既, 會有少少潮語去氹人開心主菜終於出場喇, 上菜位哥哥真係用正宗國語黎講上菜文可能因為要符合返香港人既口味, 所以固定既辣度, 始終會比內地減低, 但係魚質、酸菜、油香都幾乎神還原以前我地2個人去食, 面盆既份量都食得晒, 而家要4人分, 就算叫左碗白飯都未必一定飽, 不過發現左白飯撈埋湯, 份外食得出滋味用手機下單點菜前, 出現開業推廣活動, 只要穿著紅色元素既服飾, 做指定動作同口號, 就可以免費獲贈小菜一碟雖然看似好多料, 但其實普通, 只係個汁有少少麻, 免費黎講算係幾好, 正價的話就要考慮下食完主菜, 點少得紅糖糍粑, 不過有D失望, 完全做唔倒糯米既拉絲煙韌綿滑, 感覺似溝左少少奶, 咬口比較鬆散(慾知相片故事, 請見題外話)…Read More

無寫食評一年, 今次我真係忍唔住要講, 哩間食肆真係...好到不得了!先唔講嘢食好唔好味, 因為今次我推埋BB車去, 入餐廳前, 已經有2名店員招待我地,話樓上無咁嘈, 闊落D, 本身因為推住BB車, 費時搬上搬落, 點知店員話可以幫我係地下個層泊埋一邊先,咁又唔驅喎, 最多都係抱住BB上一樓啫.嘢食都係陣間先講, 我地食完野之後, 諗住揸返架車走, 臨走前多口問一問店員, 附近有冇幫BB換片既地方.因為出發黎西貢前已經做好資料, 附近應該得公立診所有得換片, 其餘要去球場更衣室換.點知店員非常熱心, 直頭比我地入地下個層既女洗手間換, 仲比埋條新枱布我地墊住個梳妝枱位.咁鑑於我係男仔唔方便既關係, 店員仲幫我確保女廁內係無人, 我地都唔好意思, 拿拿聲幫BB換左片先.好, 講返嘢食先, 因為西貢太多間海鮮坊, 所以預先問定朋友邊間好食又抵食2個大人加個BB, 都係叫個二人餐快靚正香蒜椒鹽墨魚 - 炸得剛剛好, 炸漿亦好薄, 墨魚肉好淋, 因為要睇住BB, 就算凍左, 都仲KEEP倒好淋身, 但就唔太覺有蒜香味, 不過食下食下, 係有少少咸既古法椒鹽鮑魚 - 雖然係跟人頭每位上一隻, 原本無乜期待, 點知喜出望外, 個面椒鹽左, 鮑魚都仲係淋既, 各自唔會搶左大家既味道, 不過2隻真係少左D特濃之士焗龍蝦伊麵底 - 顧名思義, 真係特濃, 看似伊麵好少, 但2位食絕對夠晒, 因為都幾漏, 龍蝦肉多到, 我太太話食極都有, 叫我食D, 但其實我已經食唔少豉椒炒蜆 - 咪諗住佢平平無奇, 上枱後, 一望居然隻隻都大隻肥美, 全部炒到開晒口, 咬落去仲juicy有鮮味, 豉椒炒平時應該係偏咸或醬油味, 但哩碟係甜甜地, 更加突顯左蜆既鮮味最尾會送一碟郊外油菜, 是日油菜係生菜, 有幾粒杞子伴下碟, 連蠔油都冇比, 咁諗住普通菜啫, 影都冇影, 留黎食唔飽先食, 點知菜都比倒驚喜人咬落去非常清甜爽脆, 連我平時唔多食菜既, 都爭住食, 唔知係咪因為郊外地方, 來貨既菜係有機架呢最尾BB開始唔耐煩, 拿拿聲上埋糖水就走人, 所以無特別品嘗碗紅荳沙, 印象只係D紅荳好大粒, 好似無起沙或者好淋之類唔能夠話餐廳色香味俱全, 但服務、味道, 絕對係首選. (以上食評, 絕無誇張成份, 真的喜出望外)…Read More

難得趁閒日下午, 可以無咁多人既情況下, 係合成糖水嗌外賣而唔駛等, 真係非常有感.剛剛開門, 職員叔叔都淨係做緊前提工作, 就要招呼我地外賣.糖水款其實唔多, 但左拼右拼, 可以化出好多種變化.我個人就最鍾意佢既清心丸, 煙煙靭靭咁, 再加埋馬碲砂做底, 清甜之餘, 仲有少少馬碲粒既咬口.蓮子紅荳沙既甜之餘, 仲真係做倒起晒砂, 完全釋放紅荳既味道, 唔會好似十勝紅荳咁, 甜得太過份. 再加上蓮子亦帶出另一份清甜, 兩種甜加埋唔會有違和感.…Read More

屯馬開通後, 聽聞九龍城部份商舖變天, 有D老店遷走, 引入新食肆. 黎得都係主要食泰菜多, 屹立不倒既食店, 應該都唔會差. 之前睇過套泰片, 見昭拍耶係一個銜頭黎, 就試下會唔會比一般唔同.門面同內在環境都好骨只, 入面仲係一班正宗泰國人做職員.Set Lunch款式都好多, 價錢亦都算中價.見咖哩可以配薄餅, 即刻唔駛諗, 叫個黎試下, 仲有特色野飲送添. 不過食落薄餅好似未焗得透, 仲濕濕淋淋麵粉糊咁, 而咖哩比較普通, 有椰香既, 但無乜辣味, 好在送杯青檸柚子蜜, 都幾好飲.海南雞飯雖然比雞翼我, 但都淋身又有雞味, 油飯夠油, 不過就硬左少少, 但係都要醮個辣汁先送倒飯. 個湯幾特別, 胡椒味好重, 比辣針更加辣, 應該做倒袪濕既功效. 仲送平常出面要加錢既龍眼冰, 雖然偏甜, 但剛好中和倒辣味.最尾食食下突然奉送埋糖水添, 完全無留意餐牌有冇講, 初時以為係楊枝金露, 但原來係蕃薯西米露, 仲要係熱架添. 不過已經食得好飽下, 食左兩啖, 蕃薯味都重. 不過整體就中規中舉啦, 唔會好好味, 但亦唔會好差.…Read More

雖然美心MX唔係海南雞飯專門店, 但佢出既SIR滑雞, 都真係唔惹少既.雞肉無骨之餘唔會太油, 配菜有時都會變動下, 今次配既係醃青瓜, 酸得黎帶點甜味, 都幾開胃.油飯油份足夠, 唔會太過份, 令到少少硬既飯, 可以軟返少少.重點係佢既醬汁, 黑豉油永遠都係最匹配既味道.再加上蓮藕章魚湯, 入面仲有幾舊蓮藕可以咬下, 成件事係非常套餐化.因為食夠某個數先用倒優惠券, 所以加多左杯芒果冰紅茶, 最特別既係, 入面既芒果, 似新鮮切落去既, 唔似係機器切出黎既方角形, 反而係有根既不規則形狀, 加上紅茶既少少茶澀味, 芒果既甜味剛好登返渾.…Read More

每次食唔飽, 都會諗起食碗糖水滿足下.中式糖水唔太多選擇, 要做得精, 亦唔係間間做得到.既有西式, 亦有中式既糖水甜品供應. 通常我都係會叫個幾款, 外賣拎返屋企先食既.石磨芝麻糊完全唔係溝粉整出黎既, 所以唔會做到一舊舊, 甜得黎亦好重黑芝麻香味, 重點入面係加左飯, 應該係米糊, 所以令到成碗有杰身既口感.另外黑珍珠涼粉亦都係我常叫既, 以前見倒黑珍珠會覺得好肉酸, 但原來食落去都特別, 同埋纖維高好有益既, 再加上唔係成日食既紅毛丹, 雖然無荔枝咁甜, 但無咁燥, 而且都夠清甜, 再配埋涼粉, 3樣野好夾.…Read More

第一次係下午茶時段黎第尾牛扒食, 原來都唔少人, 價錢仲比平常餐牌抵食, 咁當然, 唔一定有平時想食既野啦, 但都好吸引既.防疫措施做得好好, 我地入座後, 就接二連三越黎越多人入座.哩度既羅宋湯真係數一數二咁好味, 濃得黎帶少少辣味, 配菜亦索晒所有湯既味道, 所以都會係食晒佢既.但紅荳冰就有少少失望, 仲以為會好似茶餐廳咁, 已經倒走D冰, 不過味道都係淡左少少, 同埋紅荳唔算淋, 無荳蓉既感覺, 所以撈唔埋成杯冰.黎到扒房, 梗係要叫塊扒食下啦, 鐵板午餐係牛仔扒, 每次上枱, 都煙霧彌漫係佢既特色, 牛仔肉入面全熟得黎, 咬落去淋, 再加上蒜蓉汁, 兩種味混和一齊, 真係絕配. 波浪薯條雖然硬左少少, 但仍然出色. 最尾係飽到, 食唔晒D三色豆添.另外係叫左芝士焗吞拿魚天使麵, 比塊扒係遲上枱, 應該係即叫即焗, 因為撈開, 入面真係熱到非常. 個汁好特別, 唔係芝士汁黎, 只係係汁上面舖左層芝士, 勉強解釋, 應該係吞拿魚D汁? 份量好多, 每一啖天使麵都可以食倒吞拿魚同汁, 但最有特色既係, 佢加左青椒入去, 唔知係因為想顏色豐富D, 定係同吞拿魚真係夾呢, 因為食落去, 唔會覺得青椒係有苦澀味.雖然員工們都好有性格, 但第尾牛扒, 絕對唔會係第尾之選.…Read More

同好耐無見既舊同事見面, 難得佢主動話食哩間西餐, 其實都想試好耐, 但感覺好似彼高級咁, 但原來價錢又唔係話十分貴咋喎.忌廉洋蔥湯, 外觀上好似蘑菇湯咁, 但食落有淡淡既洋蔥味, 唔會太搶味, 配上香濃而幼滑既忌廉, 完全改變左一般洋蔥湯既感覺.煙三文魚沙律, 雖然話係煙三文魚, 但係食落去, 反而覺得似三文魚刺身咁, 唔會有咸身同煙靭左既感覺. 配菜粒橙仔有時食西餐都見倒, 到底本身係無白色根, 定係餐廳用方法整走左架呢?鮮茄扁意粉, 雖然無特別既肉類做佐料, 但打蓉左既蕃茄, 非常濃郁, 意粉唔會太硬身, 雖然唔脆口, 但都咬口剛好.3成既燒牛肉, 無落鹽, 其至連黑椒都無落, 但食落係充滿牛味, 軟淋既牛身, 加上外面煎得剛剛好, 可以話咬口係剛剛適中. 同伴話靈魂所在, 其實係抽蕃茄仔, 伴碟之下, 互相輝映大家既鮮紅色, 應該係煎過, 所以令蕃茄既甜味, 更加釋放出黎.最後點少得甜品清清個口, 牛乳布甸再配上士多啤梨同醬, 雖然牛奶味唔濃, 不過連埋士多啤梨醬食, 甜得黎又幼滑.我見好多外國人都叫杯啤酒傾計, 甚至仲有人叫pizza食添, 仲有bar枱位, 下次都可以試下係度食晚餐.…Read More

黎到沙田, 真係好多野食, 但係都真係好多人. 睇open rice有咩岩食, 發現左個芝士通粉好吸引, 唔駛諗咁多啦.舖內裝修都幾靚, 特別係周圍都有豬既公仔, 就連牆上面, 都有好似動物大遷徒既豬係度, 不過坐得遠睇得唔清楚, 下次試下坐個邊先.Business Lunch Set係有餐湯或者沙律既, 是日餐湯係椰菜花湯, 味道黎講, 可以用特別黎形容, 食落係偏向似粥既感覺, 有淡淡既椰菜花味.再發現盤碟都係有隻豬既切割圖係度, 到底老闆有幾鍾意豬呢?焗煙肉芝士通心粉、車打芝士汁, 淨係見倒個味, 就知道邪惡啦. 佢既煙肉唔會煎到好乾身, 偏向似肉條既感覺, 芝士汁濃得黎唔會太漏, 同埋通心粉肥大彈口,  可以話係完美既配搭.3成既安格斯肉眼扒, 通常3成黎講, 點都會有少少血水流出黎, 但係哩塊係煎到完全鎖晒D肉汁係入面, 生得黎仲好淋身, 非常juice嫩滑, 係我食過既牛扒頭幾位好食既. 薯條唔會炸得太乾身, 都唔錯既.…Read More

成日路過壹匯, 都見倒好多人等緊位, 今日早左起身, 即管試下等位.去到拎飛已經104, 但仲叫緊60, 不過D位原來都快走, 可能有部份拎左飛不在場, 同埋搭枱可以先入.哩個舖位前身都係酒樓, 所以位置都好大, 同埋抗疫版都做得好好.腸粉皮唔算厚, 但有D鞋身, 反而叉燒唔鞋, 豉油都咸甜適中, 中規中舉啦鳳爪夠味同夠淋身, 但係就偏油左D.薄餅煎唔透, 食落去仲係麵漿咁, 只有條邊先煎得夠, 隻蝦夠味既, 不過食完先發現, 個底都幾油.菜肉包個皮又厚又鞋, 又欠缺一般既甜味, 肉饀完全無味, 平常酒樓唔夠味的話, 會落多D胡椒粉蓋一蓋個味, 不過哩個除左少少菜味, 係食唔倒其他味喇.燒賣皮唔知係蒸過龍定未蒸淋, 係有D乾身既, 雖然剛蒸出黎, 但蟹子同皮既顏色比較暗啞, 味道係夠味既, 蝦都切得細粒左, 所以感覺都偏多.牛肉球唔硬, 雖然落左好多芫茜, 但係都係無乜味.我諗多人排既原因, 可能真係D老人家鍾意食淡口D卦, 我就一般喇.…Read More

難得馬鞍山區開左間酸菜魚專門店, 一定要試下咩料子啦, 去到原來仲試業中.外賣袋偏大, 膠碗會側埋一邊, 所以拎個陣要小心, 可能試業中, 佢仲放埋張外賣紙係入面.我見openrice內, 其他分店既評語, 話青花椒酸菜湯係最推薦, 而外賣紙都有兩個叻叻公仔.有幾款魚片揀既, 先揀最滑既鱸魚片試, 應該無得輸啦. 魚片數量係夠既, 都有成10片左右, 魚肉醃過, 所以偏咸, 食落似無用蛋白加強滑度, 有少少似用左生粉水代替, 所以滑度稍為降低左. 辣度揀左大辣, 剛好夠辣, 但係除左咬中左粒花椒有麻味之外, 幾乎係無青花椒既麻香味, 酸菜都偏咸, 同埋酸味唔夠, 令到成個湯都比較咸. 有兩款小食可以附加, 因為比較吸引既鴨血同肥腸都要額外加錢, 係諗唔倒既情況下, 揀左2份都係金針菇, 但係無奈越食越咸.最終我食完D飯, 要將D金菇夾落去, 再用食水沖淡佢先食得倒. 所以唔食得太咸既朋友要留意下.…Read More

由我初初入職到而家, 四季經歷過裝修, 餐牌都好多變遷, 但依然屹立不倒, 可見其實力.同以前一樣, 餐廳分左2部份, 一邊係自己搵位堂食, 另一邊就係訂位入座, 食既野當然係好有分別.今次食簡易定食個邊, 12點半起行等位, 都要等20分鐘先有位坐, 再加上排隊買餐, 都要預返一段時間.好耐以前有味叫做芝麻汁吞拿魚蓉飯, 由當時$45, 不斷變遷, 加價至$100, 最終係餐牌上消失, 真係非常可惜.不過為解刺身之癮, 叫個角切魚生丼, 刺身量都算多, 有三文魚、吞拿魚同劍魚, 不得不提既係佢既甜蛋, 個心居然係比較軟滑, 唔會全粒又老又鞋咁, 但青瓜既量都好似多左D, 可能想保持清新既味道. 飯既量唔算多, 但配埋沙律同麵豉湯, 就剛好夠飽.咖喱豬扒飯, 每一樣野都係主角, 唔會有一樣野獨大, 咖喱微辣之餘, 帶點日式咖喱常有既甜, 仲有好淋既紅蘿蔔. 豬扒雖然稍為乾身, 但係外層炸得好脆口. 白飯既量相對較少, 所以最後反而咖喱汁係有淨.…Read More

有時食輕食又唔夠, 食太多又唔想既時候, 可以選擇下食隻熱狗.少少一間店舖, 入面容納左5-6個員工, 就係為左做出一隻好味既熱狗. 熱狗既種類非常多, 暫時都未試晒咁多款, 仲有小食, 每次都係一大班人先敢叫, 因為份量都幾大, 一齊分黎食就最岩.雖然可以電話先下單, 不過店員話其實都好快, 唔駛等太耐, 所以主張到場先即整. 今次叫左澳式風情熱狗試, 醬汁係千島醬, 上面鋪滿厚厚既芝士, 鬆軟既麵包, 加上多汁既雞肉腸, 非常完美既配搭.…Read More

金鐘區想搵間粉麵食下已經難, 搵間好食既車仔麵, 就係難上加難, 剛好有外賣速遞app推九折優惠.正好試下外賣明明, 之前夜晚試過堂食, 都係時候重溫一下個味道.與一般車仔餸唔同, 有自家製既蒜辣雞翼尖、甜酸齋、糖心滷蛋同南乳豬手, 哩D都係比較少見, 當然都要試返車仔麵既常客, 豬大腸同蘿蔔. 大腸既通乾淨左, 亦都醃得好夠味又淋身.,蘿蔔居然係清甜既, 唔似出面用糖水浸到入味, 完全係自身既味道, 既無渣, 淡口得黎, 帶少許清甜味. 蒜辣雞翼尖有少少辣, 蒜味亦好濃, 唔食得辣既就可能會頂唔住. 糖心滷蛋唔會滷得好咸, 仍然保有蛋香味, 重點入面仲係流心. 甜酸齋真係齋舖入面既味道, 因為某間車仔麵舖亦有哩款餸提供, 但係就會似炸過龍既豆卜咁, 食落較油膩, 但係明明既就唔會, 酸味令胃口更好.平時唔會食咖喱魷魚既我, 久聞明明製既係好好味, 所以我都嘗試下, 果然係整得非常淋, 咖喱好入味, 唔會有水魷既味道.…Read More

夜晚係炮台山區搵食, 原來經openrice搵倒麻王, 一個咁霸氣既名, 應該都無死卦.去到門口, 居然係無堂食位, 右手邊有2張櫈既, 不過咁樣坐, 好似有D尷尬. 所以決定揀外賣, 中途都有4-5台外賣客自取, 都唔見有人揀堂食.見倒牆上面貼左廣告, 應該係招牌菜啦, 仲發現原來銅鑼灣同灣仔都有分店, 可能個邊分行有堂食位呢.店員煮好酸菜魚, 跟住話我知白飯未煮好, 係咁肚餓既情況下, 唯有轉粗薯粉先. 雖然第一次試, 係唔怕辣既情況下, 叫個大辣試下.面頭雖然好多辣椒, 但係完全無辣味, 真係只能叫佢做, 只有酸味的酸菜魚, 令人非常失望, 真係揹得起麻王哩個名號?魚片係用石班, 所以唔及其他用剝皮魚或者鱸魚既舖頭咁滑.下面好多配菜, 娃娃菜, 蓮耦, 竹枝等...但真係好多...薯粉都算滑既, 但係索唔倒D湯既味道, 整體都令人強差人意.…Read More