Cheer cheer's Profile

如果要食燒肉，一定揀日式唔揀韓式，一來肉高質啲，二來係食到肉嘅鮮味而唔係醃肉味道。上個月嚟咗呢間牛襌，質素唔錯，至於扺唔扺就睇下你揀乜。原本睇食評，就覺得一定要叫近江牛排。不過睇餐牌先發現100g要成差不多$600，仲要一叫叫200g，即係已經成$1200，仲要我哋得兩個人，叫完呢個都食唔到太多其他嘢食，所以就放棄咗，叫多啲不同部分食仲好。叫咗兩個和牛一人set，一個有牛柳牛肩牛小排，另一個有牛舌牛胸腹同尾龍扒，另外仲叫咗刺身，其他蔬菜同埋豬腩燒。刺身先上，帶子同油甘魚，幾好唔錯，新鮮肥美。之後就一次過上晒所有牛啦，擺盤幾精緻，再加上餐廳燈光睇起上嚟即刻好靚。個人最鍾意係牛柳牛小排同牛舌，最多油份，食落牛味好濃，記住叫白飯，齋食會好膩！其他部位比較瘦，食落即刻比下去，下次都唔會再叫。不過食過咁多種和牛，我依然最喜歡佐賀牛，大家有機會記住試下。總括嚟講，舖面夠大，坐得舒服。食物質素幾好，邊燒邊傾計，可以渡過一個愉快嘅晚上。…Read More

我每次去澳門，除咗喜蓮冰室嘅豬扒包之外，必食嘅就係阿曼諾嘅葡國餐。第一次去都十年前，之後每次去嘅指定晚餐就係呢度，所以可以話係忠實顧客😂店舖面積唔大，大概有六張枱，佈置得好有葡國特色，上面仲有把古雅吊扇，情調不錯(順帶一提，老闆係葡國人) 咁多味餸，我最鍾意就係檸檬蜆。蜆新鮮，個汁酸酸甜甜好開胃，一定要用佢餐前送嘅蒜蓉麵包點汁，配搭一絕。我上星期去就叫咗馬介休炒飯，不過不失，我覺得之前食過嘅墨魚汁炒飯更好，味濃但不膩，不過要小心食到個咀黑晒。另外仲叫咗個燒牛肋骨。有炭燒味，肉味濃，再用鹽燒，簡簡單單已經好正。總括嚟講，食物質素中上，有情調氣氛，傾計談心都一流。如果叫埋Sangria邊飲邊食，都真係不亦樂乎。不過一定要訂位，座位太有限了。…Read More

如果對魚生要求唔高，其實元氣都已經足夠。不過如果真係有要求，但又唔想千千聲落樓，其實魚鮮生係不錯嘅選擇。 其實我已經食過幾次，每次都試唔同嘅嘢食，連佢哋嘅Omesaki 都試過，所以對呢間餐廳都算熟悉。首先係魚生，刺身係厚切嘅，肥美鮮甜，油金魚同鱆紅魚係我嘅心水。但係佢刺身係逐片計，約廿幾三十幾一片，所以算係幾貴，反而壽司嘅價格上比較划算。生蠔三十幾蚊隻，印象中有三個產地可以揀，都好鮮甜。除咗魚生外都有丼飯都唔錯，丼飯嘅份量係非常夠份量，而且包一個麵豉湯，係一定夠飽嘅。雖然佢哋話牛舌飯係推介，但我試過覺得鰻魚飯更可取，鰻魚肥美之餘又有炭燒味道，另外仲有紫菜比你包住當壽司食，係一飯兩食。而牛舌飯對我嚟講最大嘅敗筆係牛舌唔係燒而係汁煮，所以始終爭啲。食物質素係有保證同埋穩定嘅，不過上菜時間有時看好慢，試過隔差不多半個鐘先上下一道菜。另外，佢哋有兩層，即使下面有幾張空檯，都會叫你上樓上，而且語氣也不算有善。服務態度有待改善。…Read More

喺element正正經經食餐晚飯，都閒閒地每位三四百。不過竟然比我誤打誤撞入咗night market，喂有驚喜喎！首先間餐廳好大好多位，所以就算係正常晚飯時間去到，都唔使等位。裝潢幾好，燈光偏暗，幾有情調。我哋兩個人叫咗一個燉湯、牛肉湯包、麻油雞、肉燥飯，都係典型嘅台灣菜。先上燉湯，味道好清好純。跟住另外幾味餸一次過到，上菜時間計得好準。每味餸嘅水準都係中上，麻油雞雖然偏淡，不過夠嫩多汁，對於唔好重口味嘅我非常啱口味。但我最推介係牛肉包，個皮烘到好香好趣，入面勁多肉汁，我直情食到成手都係汁，所以食嘅時候要小心啲。如果去到element無咩口緒食咩，可以試下呢間，食物質素好，價錢中價，又坐得舒服！…Read More

博物館或藝術館內總有一間獨市生意嘅cafe，賣嘅嘢通常普普通通，甚至我喺日本都試過食一碟勁難食用微波爐就咁翻熱嘅意粉。而呢間牧羊咖啡店不過不失，係可預計嘅質素。當日下午我要睇文化博物館嘅展覽，所以預早入去附近睇下有啲咩嘢食，點知周圍都冇嘢食，就係得呢間，所以先入去一試。侍應安排我坐高枱，我得自己一個人就冇所謂，結果我就點了個牛肉芝士牛角包會配薯條，約$80，冇嘢飲。不過呢度可以自助斟水，所以唔叫嘢飲都okay!等咗約十分鐘，食物就送到。賣相唔錯，薯條份量都夠。先食薯條，都夠脆，可惜唔夠熱。個包味道不錯，入面啲菜都新鮮，如果個包烘熱點會更好。如果喜歡食cafe類食物，都可以一試，再加上環境舒適，就算貴一點也可以。否則最好食完飯先入去睇展覽，因為方圓幾里都無餐廳。…Read More

近年香港熱捧隱世小店，可惜很多都名過於實，不過新記卻係一等一嘅小店。我由讀書時期已經開始幫襯，至今都有十年，不過每逢想食雞粥我都只會諗起呢間又新街嘅小舖，而唔會諗起沙田。近日我都再次幫襯，除咗點咗必食嘅雞粥，仲有送粥一流嘅蝦腸同埋炒麵。隔了約十分鐘，已上齊菜，時間快速，但絕不馬虎。先講雞粥，粥底綿，仲要見到有啲黃色嘅雞油，視覺上已經好吸引。食落啲粥都入味，唔知道會唔會落咗些少雞精，不過都有雞嘅鮮味。同我十年前第一次食，沒有相差太遠。反而最令我有驚喜嘅係嗰碟炒麵，表面脆脆地，但係食落又唔會好乾。其實我好怕食炒麵， 因為通常都好鹹，食完又口乾，不過呢碟真係唔會，可以話係我咁多年食過嘅炒麵之中最正嘅。嗱，不過我見隔籬枱果一碟係冇我嗰一碟咁靚，所以水準未必太穩定。而碟蝦腸不過不失，用料都新鮮，味道不錯。食嘢期間見到隔籬叫乳鴿，好香，所以我最後加單叫多一隻乳鴿。新鮮即炸，要等一陣先食到，因為剛出油鑊太熱。皮脆肉嫩，味道夠濃，唔需要淮鹽都已經夠味，如果有碗白飯就實在太好。總括而言，食物質素好，性價比超高，晚餐食飽兩個人都唔使$150，今時今日去邊度搵？…Read More

聽說發哥喜歡星期日喺大嶼山行山後，會到此處食番茄蟹檬。民間特首嘅喜好喎，梗係吸引到好多人慕名而來。我第一次嚟津津食店唔係星期六，所以食唔到蟹檬轉戰茄腩檬。番茄味濃，牛腩幾鬆軟，檬粉就比較碎。我幾欣賞個湯底，無味精，最後會想飲埋個湯。一碗粉四十幾蚊，無包嘢飲，要另叫。不過感受梅窩街坊融洽嘅氣氛，都值得嘅！我第二次就選擇了星期日去，因為希望試吓鼎鼎大名嘅番茄蟹檬。我滿心觀喜餐牌都唔睇就叫餐，然後等咗約十分鐘，一碗蟹檬就熱辣辣喺我面前。第一眼見到個蟹蓋，係我想像中嘅畫面。我再翻一翻碗中的粉，有幾粒肉丸，有點芽菜，蟹呢？蟹呢？蟹呢？最後喺碗底發現有一舊蟹肉附帶三隻蟹腳，就係咁樣。味道方面其實幾好，湯底都很有蟹味，而嗰一舊蟹肉，就普通啦，肉質也不算太新鮮。講真，真有點失望。碗粉叫蟹檬，但蟹肉真係少之有少，我甚至覺得叫番茄肉丸檬都不為過。所以如果對蟹檬有太大希望，你是注定要失望，反而我覺得茄腩檬比較實際。…Read More

生日臨近，好友帶我吃好西。從來都不用懷疑金牛座的推介，因為金牛座是最識食嘅星座。當天是星期六晚，book了檯都要等約十分鐘。一入到餐廳，座無虛席，氣氛非常熱鬧，感覺突然置身日本，以為去了大阪東京一趟。我與友人點了一個刺身拼盤，燒蟹蓋，燒貝類海鮮拼盤。刺身先上，有五款，每種刺身都係厚切，非常肥美新鮮，唯獨海膽嘅味道一般。然後燒嘅材料一次過奉上，放喺檯面嘅畫面非常豐富，未食都已經覺得好滿足。貝殼類嘅拼盤有鮑魚帶子生蠔大蜆，每樣都大大件兼好新鮮。侍應會幫手燒，唔使自己落手。味道方面，鮑魚與蠔最鮮味可口，扇貝則有點令人失望。到我最期待嘅燒蟹蓋，入面除咗蟹膏蟹子，仲有一隻鵪春蛋。香氣越來越濃郁，未食已經感興奮。嚐第一啖後，我只係慨嘆點解無一碗白飯！因為味道太濃，配上飯就會平衡得好好，齋食就會覺得太膩，不過味道的確不錯。最後由於未飽，就點了個牛肉鍋配烏冬。非常普通，份量又少，烏冬只係俾一小撮，性價比極低。總括而言，味道很好，份量略少，但氣氛很好。如果較大食嘅人，可能會覺得貴夾唔飽。不過我認為可以一試。…Read More

朋友推介，當然一試。一行三人，被安排至四人卡位，空間放大舒適。叫了一個四人份量的鮮斬後奏的海鮮餐，原本每位$298(不用加一)，但我們只有三個人，所以最後每位$398。這個餐送刺身拼盤，想不到火鍋店的刺身也不錯，我推介甜蝦，肥美鮮甜。到了主菜海鮮餐，一上個鍋已經令人興奮，因為佈滿了約10種海鮮(小龍蝦、鮑魚、蟶子、扇貝、大蜆等)，而且仲識郁，非常新鮮生猛！俾你過目完後，侍應先倒上湯，然後蒸十數分鐘就食得。除咗海鮮，仲有五款火鍋配料揀。味道不錯，份量略嫌不太多，我們三個女仔只是剛剛飽。另外這個餐限時兩個半鐘，不過無人等都會比你繼續坐。總括而言，食物新鮮，份量略嫌少。服務態度很好，座位舒服，價錢則見人見智…Read More