hy04's Profile

由於琴日食咗個好伏嘅吉列豬，今日都冇乜心情食飯。所以簡食西嘢，係冇嘢嘅時候去CAFE坐下都係唔錯嘅選擇。呢間餐廳係門面比較細，位置都比較偏。大約二十個位左右，一個侍應一個大廚，冇乜特別裝修，簡簡單單。同時亦都冇乜客坐係度，一個幾寧靜嘅空間。餐牌都冇乜特色食品，都係意粉同All day呢啲大路嘢。落單：番茄雞肉扁意粉+熱朱古力先上左個熱朱古力，雖然拉花好似有啲歪但完全可以接受。味道唔會太甜，朱古力味亦唔係好濃烈，我個人比較鐘意種呢種程度，唔會好似7仔個啲咁驚死你唔知係乜飲緊乜。所有餐都係即叫即煮，但由於人唔多，又唔需要特別煮法，所以都好快上枱。賣相雖然有啲亂，但都唔差。番茄食唔出罐頭味，唔酸，唔濃郁但亦非淡而無味。面頭個幾片芝士用於裝飾多於提升味道。雞肉撳落質感比較結實，入口首先係煎過嘅焦香，調味適中唔太鹹，雖然質感比較硬但食落中間並唔粗嚡。總結：環境舒服，好寧靜，Hea下或者同朋友吹下水都唔錯。味道偏淡，選擇少咗啲，整體不俗。…Read More

補13/11好耐冇食過西餐，食個湯，主菜，甜品再飲杯咖啡。趁冇乜嘢趕交貨，仲唔食等幾時？樓面得二十個位左右，唔爆位。本人就比較偏向中午要飯，所以多數會簡意大利飯。不過今次呢個要配羊扒。牛扒煮唔好最多過熟乾身，如果本身塊肉靚，味道影響唔大。羊扒煮唔好，係最地獄。食紫不但止，個陣膻味好似火山爆發咁成碟飯都係，想硬食都唔得。但人總是犯賤。先有個湯同多士。湯係粟米忌廉湯。等左大約15分鐘。個飯望落都幾古怪，洋蔥加西蘭花。個汁好似食緊中式嘢咁。飯粒唔太生，中間冇晒白色，但依然係有咬口。羊扒望落都比較熟，只係面層落咗少少胡椒。入口第一啖唔覺好大陣羶味，咬多幾下就開始湧出黎，濃郁但唔過份，亦都好快就散發咗。甜口係兩小舊芒果味嘅蛋糕，極淡芒果味，亦冇朱古力味。我只能形容為一舊甜嘅蛋糕。都幾今人失望。總結: 雖然配撘有啲奇怪，但味道唔錯，甜品有啲失望。價錢可接受範圍內，可以返轉頭再食。…Read More

補 12/11車仔麵大家都熟悉，腩汁小辣再配啲簡單餸，咁就係最地道嘅車仔麵。不過今次呢間餐廳嘗試將馬來西亞嘅風味融入車仔麵，咁特別就梗係試下啦。車仔麵有咩簡都係一個幾重要嘅指標。望落餐牌，其實都算少嘢簡，不過就有啲特別嘢。首先個麵底除左最普遍嘅油麵同米線之外仲有啲馬來西亞嘅粉麵。湯底就冇腩汁個啲，係自家制嘅湯底。餸方面，老實講都係啲普通嘢冇乜需要花幾多功夫。落單：魚蛋，雞翼，豬紅，蘿蔔，蝦湯底上餐都算快，車仔麵嘛唔慢得㗎，一慢就唔係車仔麵。望落湯底好似好濃，喝落比想像少，雖然係蝦湯底，但其實冇乜蝦味。只係一個濃湯湯底加小辣。蘿蔔，甜，小部分有渣。魚蛋，高級超市貨，正常。雞翼，煮太耐所以淋晒，當然梗係入晒味啦。豬紅，冇腥味，但味道偏淡。油麵同平時嘅唔同，唔係粗身黃色嗰隻。呢隻比較似上海麵嘅口感。總結: 有特色嘅車仔麵，價錢夠平，食慣腩汁嘅可以一試，但選擇較少，味道正常水平。…Read More

補 08/11突然間好想食越南撈檬嘅酸味，所以揾下附近有咩越南餐廳。落單：香茅豬扒撈檬+椰汁冰望落有啲奇怪，平時食開都係青瓜絲+紅蘿蔔絲+花生。但今次呢個竟然落椰菜，加多舊唔知做咩嘅番茄。例牌落啲酸汁先，個汁都係冇特別。豬扒都算唔錯，有煎到乾晒，同埋都算入味。個粉由於啲配菜比較少，冇咗個種爽口清新嘅感覺。花生碎極差，冇少許異味，但由於太細粒好難分開，夾埋一齊食嘅時候根本係折磨自己。椰汁冰，一入口好濃，好似開唔夠粉嘅粉漿咁，黏住個口好唔舒服。搞一搞個底，再一望個匙羹，真係有粉粒。總結：極度失望，不可一不可再…Read More

補 08/11附近好似冇乜台灣嘢食，難得揾到間就去試下。台灣嘢最出名嘅都係牛肉麵，鹽酥雞同珍珠奶茶等等。落單：牛腩牛筋麵+凍豆漿上餐都算快。望落同之前食開嘅鐵牛比好似有啲輸蝕。牛腩好腍，腍到好似煲咗十幾個鐘咁，根本唔洗用牙咬，完全冇食嘅牛腩嘅感覺。牛筋同樣，完全冇咗應有嘅彈牙口感，好似食緊啫哩咁。湯不濃不淡。豆漿一般餐廳質素。總結：一般質素，不過不失分數：🌝🌝🌚🌚🌚地址：北角和富道21-53號和富薈地庫B51號舖#鯽魚涌 #放飯 #鯽魚涌的午餐日記 #獨食 #食評 #foodie #台灣麵 #不過不失 …Read More

補 07/10因為揾唔到想食嗰間( 原來執咗 )，行嚟行去最後隨便簡咗間茶餐廳。潮洲菜，對佢嘅印象一向唔錯，有時屋企加餸都會買啲潮洲冷盤，酸酸辣辣幾開胃。但作為午餐，上次試過一次都唔係特別好食。希望今次可以改變我嘅睇法。落單：雙拼( 鵝片+豬耳 )，本身加底有鹵水豆腐，同一碗紫菜湯。紫菜湯冇乜其他料，紫菜+水，臨上枱先加一小執蔥花，不過味道絕對唔淡，蔥花有調味過，完提升咗個味道。但呢個鵝片鹵水味唔夠，唔係好入味。豬耳都算爽口豆腐直頭冇乜味甚至有啲苦味。總結：一般質素，不過不失…Read More

補 02/11同上一間餐廳同一條街。大約1310左右到，入面已經爆左人，等左5分鐘左右先有位。價錢有平有貴。落單：L05 （西班牙香腸秘製醬汁炒意粉）+ 餐湯個湯好快就上抬，正常味道。樓面得一個人負責晒，落單，收銀，執抬，但講緊間餐廳有二十幾人食飯。所經常見到佢執執下抬又要去收銀。等左近30分鐘左右，個餐都未到，同時又聽到隔離都開始催單（ 佢哋早過我入坐 ）。我就都同樓面講我個餐未到，然後我見到佢係收銀機到拎張單入廚房。即係冇幫我落單啦。果然隔咗唔洗10分鐘個餐就上抬。其實已經心情麻麻，好死唔死個意粉又唔係好食過人。個秘製醬汁係咩？食唔出，因為個意粉係極多蒜頭，多到’乸喉’。香腸，瘦臘腸質地但更乾，味道仲衰，可能我唔識食西班牙嘢。拿拿臨食飽個肚就走左人。總結：體驗極差，味道亦是。不去也罷。…Read More

原本其實唔係打算食呢間，點知行錯路。經過嘅時候見到入面個設計幾特別，再望望個價錢都唔算貴。所以試咗呢間先。鋪面唔算大，二十個位左右。可能位置比較偏，人少，唔洗等位。餐牌都係一般cafe嘅嘢。落單：番茄焗豬扒飯，餐湯（ 菠菜忌廉 ），特濃朱古力。湯就落單冇耐已經上抬，隔左5分鐘左右就上埋朱古力。睇得出啲餐具都有用過心思。朱古力都係粉沖，冇乜特別。焗扒飯到。望落個觀感都唔差但頂頭個啲配菜有點多餘。值得一讚嘅係塊豬扒係預先切好嘅。咁食嘅時候我地就唔洗再用刀叉咁麻煩，同時佢地焗嘅時候都可以慳返啲時間。塊扒唔算大塊，不過時間控制得唔錯，肉唔嚡。味道偏鹹，番茄味除咗個汁之外都冇乜。食落先發覺原來有塊䒦士，但完全食唔出。總結： 普普通通 ，唔加其他飲品都係60蚊左右。質素唔係特別差。冇乜人，又唔趕客，hea下吹水都唔錯。…Read More

今日簡咗食日本嘢。門面比較細，入面都係得二十個位左右。餐牌都係正常日本餐，唯獨有個自家製漢堡排放到半版紙咁大。如果連招牌菜都唔好食，其他嘢都唔會好得去邊啦。上餐速到正常，十五分鐘左右。飯+餸+面鼓湯+沙津正常應該由應食沙津先嘅，不過冇理由仼個主角凍晒先食掛。份量有啲細，汁冇水浸。夾落唔太結實，夾多下就開始有分裂。個汁酸中帶微甜，但味太濃。完全蓋過晒肉味，似係食緊個汁多過食肉。如果個汁好味都可以接受嘅，不過呢個唔係。加上其實本身肉味都近乎零。開頭個幾淡的確有啲開胃，但食完一個之後已經有啲厭，同埋覺得太酸。食完個飯，飲個湯。面鼓味偏淡，湯亦是。望落好似好多料，其實冇用，又唔入味，冇點多餘。尤其是啲蔥，太多，幾乎每啖都食到。我本身唔討厭食蔥，但都唔洗咁多掛，加埋生蔥嘅辣味，破壞咗個湯。食都一半就放棄。個沙津，望落都知太多醬啦。總結：唔係太難食，但只能評為普通茶記級數。完全唔值86蚊，唔會再去。…Read More

今日試下行到最遠睇下有咩食，除此之外順便計埋係限定時間之內可唔可以準時返到公司。北上至炮台山前嘅一個轉彎位為界。指定動作：開OP睇下有冇餐廳先。睇中呢間燒味茶餐廳，係咁依GOOGLE下，好似唔錯喎，又隱世又荔枝柴煙熏燒鵝。路程都算遠，由公司行過去都要15分鐘。轉個彎，上個斜路。由於冇招牌，其實都幾唔顯眼，隔離又車房又花店，平時行過都未必知。睇一睇個餐牌，正常茶記野。但呢個黯然銷魂飯擺明就係叫人食佢啦。落單：黯然銷魂飯+油菜+凍檸茶+例湯油菜極速上抬，蠔油生菜，分開上係好事，否則碟菜就咸到腎虧。唔係特別新鮮，正常嘢。唔洗3分鐘，碟飯就上抬。賣相都係一般茶記嘅擺位。厚切叉燒，望落都有肥有瘦 ( 冇特別叫半肥瘦 ) 。蜜糖味唔係其他茶記嘅死甜，適中嘅蜜糖味冇搶晒叉燒嘅肉味同燒過嘅香味，叉燒嘅調味都過咸，兩者中和，相得益彰。厚切叉燒口感一流，份量都唔少，食肉獸岩晒。
肉質依然嫩滑，即使全瘦都完全唔覺得嚡。煎雙蛋望落好似熟咗啲，不過爆開都仲有蛋汁流出，但點都稱不得上太陽蛋。撘單個條菜心，簡直失敗，晒咗碟叉燒。唔知擺得耐定點，腥嘅。例湯：眼見有節瓜陳皮其他唔知，但飲得出唔係超級味精湯。凍檸茶：應該係用返燒叉燒嘅蜜糖，因為冇叫少甜都唔覺得飲緊糖水。總結：64蚊埋單有咁嘅質素仲想點？貴多十蚊都低食啦。環境乾淨企理，上菜又快。雖然路遠，但值得。…Read More

補返琴日既午餐先。隨便係op揾開餐廳，眼見地址要上樓上，個格局又似cafe，諗住細鋪應該冇乜人，hea下都唔錯。所以。位置都比較難揾，因為呢間野係喺私樓商場入面。3樓基本上得兩間餐廳，只要直行就到。間餐廳原來喺一個角落嘅open area。睇餐牌好多都係素食😂唯有簡個 香菇忌廉雜菌扁意粉。餐飲：cafe 梗係飲咖啡啦，見到有侍應用咖啡機即沖，應該唔差嘅。所以，一杯latte。環境：雖然喺商場入面，但其實好少人，由於接近角落，冇乜景觀可言。但的確比較寧靜，同感覺好舒服。等咗唔耐，就上餐。賣相：簡單，但唔係求其。忌廉冇水浸，配料同香草擺位都有心思。香味：有陣淡淡既香味，如果坐隔離應該已經聞唔到。味道：由於冇水浸，食落唔膩之餘仲可以食到忌廉味。火腿粒並唔係廚師腸既垃圾，加上應該有再翻炒過，應有既香同味都有。香菇冇草青味，但冇調味過，其他同樣。成碟意粉雖然簡單，但完全唔單調。飲品：Latte （本人對咖啡認識甚少，用字可能直覺啲）現場並冇即炒咖啡豆，所以冇個陣驚死你唔知有咖啡飲既味道。但送到上嚟嘅時候，都聞到咖啡個陣燶味。仲有個拉花添。落咗半包糖，比較入口，過一秒後，咖啡嘅苦澀味開始湧出嚟，但唔強烈。飲完之後，由於杯Latte 唔係勁濃郁，味道嘅停留時間好少，大一個鐘左右（有飲水）就幾乎冇咗。個人嚟講感覺唔錯，對於我呢啲唔太鐘情咖啡嘅人都覺得好飲。…Read More

呢間餐廳上星期五爆哂位，搞到我走鬼咗去食茶記。今日特燈遲半個錯去，咁岩又落微微雨，今次實冇死啦。去到，個然得幾抬客。叫咗番薯肉丸意大利飯，凍檸茶。唔洗十分鐘，杯餐飲就到。梗係啦，冇人仲唔快咩。跟手又上沙律同蒜容包，個包比較軟熟而唔係脆嘅，沙律醋味搶咗菜嘅味。又唔夠十分鐘，個飯就上咗。賣相：
老實講，麻麻地，好似就咁舀上碟然後放啲香草上去咁。
整體上都唔錯嘅。味道：
番茄味冇想像中咁濃郁，可能平時都係落忌廉所以感覺有差別。飯粒唔太硬，基本上全熟。個人比較喜歡咁樣好過裏面有啲生生地。肉丸比較咸，但質感唔錯。飯裏面有香葉係入面，雖然細但係成塊葉，如果咁啱舀埋飯一齊食的話，就變左食緊塊葉，感覺十分奇怪。別外，叫咗個黃金炸薯條，招牌菜嚟，即叫即製。十分鐘左右。因為時間所限，所以只好外賣。對於炸物嚟講，係有啲唔公平，但冇計。其實拎著走嘅時候，隔著個袋都聞到咸蛋黃嘅香味。大約十五分鐘路程。食落都已經唔脆，但的確每條薯條都沾晒咸蛋黃。食得多都比較咸。其他都冇乜特別，可能近期都好多食物都用類似方法去做所謂創新。但其實都只係聽落新奇，食落無奇。總結：不過不失，價錢偏貴。如果唔趕時間，又想hea下吹下水，都唔錯嘅。…Read More

行過見到間印度餐廳幾突別，於是就去試一試佢。門面貼住話米芝連推薦，成世人都未去過呢啲咁把炮嘅餐廳。今鋪仲唔輪到我。入門口已經見到個外籍侍應，應該係印度人掛。然後用佢半咸半淡嘅廣東話問我幾多個人。樓面都唔算多人，十幾個左右，仲有好多空位。餐牌都係大路嘢，印度薄餅/咖哩等等。又諗住叫個咖哩牛肉實冇死啦。落單全程 this this this都冇問題。等咗唔係好耐就上餐。賣相：定全冇，ok，汁醬食物冇撈埋都可以啦。咖哩：完全冇香味，汁稀近水，微辣冇feel，淡到極點。飯：並非平時食開嘅泰國米，比較長身同較為鬆散。牛肉：其實即係牛腩，個量少到癡線，得知4舊細過我隻手指嘅牛腩，加一舊湯匙咁大，高2cm嘅薯仔。唯一係牛腩仲係好嫩同入味，但都唔係咖哩味。我完全唔覺得我係食緊咖哩牛肉飯。我仲加多咗個咖哩角，望落都唔錯，起碼冇炸燶。咬開入面仲熱既，陣咖哩香味即係飄出嚟。可惜，皮好厚得小部分係脆，接口位仲要係硬嘅。辣味同樣少得可憐，但香料味可補上一二。杯奶茶喺我食完都未嚟，我冇等冇催，冇期望。米芝連原來係咁。…Read More

店面唔大，二十個位左右。如果你同一班同事一齊去(😭)，可能要等一陣。我孤身一人好快就有撘抬位。一坐低就上左前菜先：冬瓜湯（例湯），一小碟毛豆。講明例湯，其實都冇乜其望，只要唔係勁多味精都可以接受。呢碗湯又的確冇辜負例湯個名，冇冬瓜嘅清甜，同茶記既味精湯比較只係冇咁咸，冇乜特別。例湯呀嘛同人生一樣，都係整定嘅，唔太差啦。小食：毛豆，係少㗎啦。不過仲有陣小小嘅青腥味咁囉。叫咗個午市套餐，獅子頭配飯。上海菜嘛，實冇死啦。賣相都可以啦，食個晏姐，冇乜要求。小棠菜，大家都唔陌生啦，滾兩滾就得，簡單。不過都算佢有心機，落返啲麻油先送嚟。主角：獅子頭有啲燶，唔影響。夾落都算實淨，冇一夾即散。味道有啲淡，一入口就散晒，好似食咗一啖肉醬咁。肉味欠奉，肉質粗糙，口感麻麻。餐飲：熱奶茶。普普通通，不說也擺。總結：五十幾蚊，呢個質素，可以接受，未致於難食，中中庭庭。…Read More