nams008's Profile

同姊妹嚟啟德體育館附近行，參觀吓新運動場，跟住你零售館食下午茶，本來喺food court度搵嘢食，但係見food court嘅又貴，又唔係咁吸引，於是喺敏華冰廳搵食，之前幫襯過一次，印象唔係咁理想，但今次令我大大改觀，叫咗四個茶餐，每一個都好出色，啲麵軟硬合度，沙茶牛肉好夠味，冬陰功湯都唔錯，咖吔西多士雖然邪惡，但係都好好食，奶茶同咖啡都唔錯，只係個杯稍為細咗啲，總括而言，值得推介，加之價錢理想，絕對會再返嚟。…Read More

見到社交媒體介紹呢間上海菜，影出嚟又幾吸引，於是特登摸車出城試吓，呢度地點都算偏，雖然近地鐵站，但食客應該俾之前幾條街嘅食店吸引左，所以晚飯時間都唔多人。點左小菜加包點：孜然羊肉、小籠包、胡椒包、雞湯燉雲吞、糖醋排骨、擔擔麵，食物味道不錯，肉有些來不及影相，已通知煞清，只是糖醋骨切太細，大塊啲先似樣，少見的胡椒包，似炸銀絲卷夾叉燒，原本期望同台灣胡椒包差不多，有些落差，但味道唔太差。價錢平民，所以座位較平民，清潔度一般，最扣分是訂座服務，之前一日打咗三次電話，一係冇人聽，一係噏完一輪就收線，完全無奈。…Read More

同閨密行完山專登坐車嚟食晚飯，星期日晚6點，5、6枱客，唔多人，點左烏頭、咕嚕肉、蠔餅，同煲仔生菜。最好係咕嚕肉，脆皮甜酸，仲有新鮮菠蘿，一流。烏頭本人覺得一般，有少少噏味，反而黃豆醬好味。蠔餅同個人期望有落差，雖然蠔仔新鮮，蛋味夠，但冇落木薯粉，少左煙韌咬口，唔似真正潮州菜。最後係啫啫生菜，菜新鮮好味，但收費唔平。環境方面就真係地道，碗碟自己要洗多幾次，油花甚多，清潔真係差啲，整體而言、小菜可以再試。…Read More

呢間茶餐廳，睇外表就知求其地踎是但共冶一爐，只不過因為以前住開呢一區，今日睇早場，順路就懷舊一下。呢度早餐嘅價錢都得上經濟實惠，見到兩餸麵餐$38，竟然配菠蘿包夾牛油，勁想試，但卡路里熱量太高，肯定食唔晒，於是轉頭去試香煎牛扒配餐肉煎蛋，上碟一睇牛扒超大件，成隻碟佔咗一半咁滯，牛扒煎到金黃色，雖然明知道係雪藏牛扒，但係醃肉味道都可以，無話用鬆肉粉搞到冧pay pat 無味死肉，配左煎蛋都可以，但餐肉就麻麻哋，最美中不足嘅係扒餐竟然冇跟餐包/方包，不過如果生酮飲食，就真係啱啱好。奶茶就一般般，俾一般餐廳算OK，雖然唔係好香茶味，但飲落都算滑口，唔會搞到又苦又澀，都算飲得㗎。總言之， $38早餐，確實係對得住價錢啦。…Read More

今日去咗博物館，行咗三個鐘，於是去佐敦站附近睇吓搵唔搵到好嘢食，係橫街見到呢一間貌似屋村茶餐廳嘅樂滿，想食啲地道風味，係門口睇吓餐牌，見到下午茶餐都係廿零三十蚊 ，今時今日香港，仲可以去邊度搵到呢個價錢嘅茶餐，望吓仲有吉列豬扒/魚柳拼沙律：薯條，當然入去試吓啦。坐低叫咗吉列魚柳拼沙律，等咗5至10分鐘，上枱見到碟吉列魚柳，當堂話一聲，大件夾抵食，魚柳啱啱乍起，卜卜脆，香噴噴，切開入邊仲好juice,沙律都唔錯，雖然用罐頭雜果做沙律，但係成本都唔平，因為唔會加咗大量薯仔紅蘿蔔入去，伴碟仲有塊新鮮嘅蕃茄同幾條生菜絲，有啲高級餐廳嘅擺盤， $32可以食到好食又抵嘅茶餐，真係要俾個5⭐️⭐️佢。…Read More

阿妹上次已經嚟食過一次，仲帶咗外賣返屋企，有韭菜粿、芋頭粿、椰菜粿俾我，三種粿都係兒時回憶中的美好，失傳左嘅潮州味道。阿妹聽日搭飛機走，所以特登再嚟返桌，順便買外賣運到加拿大。一嚟到見到老闆，即刻同佢打招呼，老闆都好熱情，因為上次食過蠔餅，老闆就介紹試吓水瓜烙，仲叫咗潮州炒粿，同埋韭菜餅。先嚟水瓜烙，一吃入口，不得了，有蝦肉嘅鮮味，水瓜嘅清甜，仲有樁菜嘅鹹香，入面仲加咗豬肉，多重味道，煎到又香脆、又煙靭，一試難忘。蠔餅都冇失禮，蠔仔非常新鮮，超正。潮州炒粿略嫌甜味重啲，但係都好有特色。食到咁上下，老闆又過嚟招呼，問吓我哋要唔要飲茶，親自爭加左熱茶拎埋嚟，仲話不如試吓牛丸，牛丸係一定要試，相信啲牛丸係佢哋自己打嘅，有牛肉嘅香味，湯底又冇味精，所以做到鮮香彈牙。最後食埋個清心丸綠豆爽白果，真係甜蜜嘅句號。臨走話要買埋外賣，因為知道阿妹要帶返加拿大慰藉屋企嗰「架己冷」，老闆又親自揀啲靚嘅冇穿嘅潮州粿俾我哋，再教我哋如果返到去要搭飛機，唔使放入冰格，放入雪櫃冷藏，再加個雪種冰袋保持溫度，帶到過去可以放一兩日。呢間曾記粿品，食品味道已經一流，更難得係體會到香港越來越少見嘅人情味。…Read More

今日約咗阿妹同朋友一齊去上環海味街逛逛，行到攰攰哋，想搵個地方坐低飲杯茶，係斜路見到「興記咖啡」四個大字，諗住咖啡咁出名，可以坐低抖抖嘆咖啡。行到門口見到貼滿食評介紹嘅神級西多士，當然唔可以錯過啦。三個師奶仔坐低，淨係叫咗一般份西多士、一杯奶茶、一杯鴛鴦，非常唔好意思，但係招呼嘅姐姐絕無鄙視眼神，仲好醒目，咁拎咗三隻叉出嚟，呢個真係要加分。西多士先上枱，隔住個口罩都聞到蛋香味。上面有牛油加煉奶，同一般落糖漿嘅做法唔同，入口脆皮加煉奶香滑，再加埋麵包嘅鬆軟，師父煎法令到西多唔油膩，呢度先係功夫，真係神級享受。至於奶茶，略為遜色，唔算香滑，再加啲奶應該會滑啲，同招呼嘅姐姐講，轉頭佢成罐花奶放咗枱面，今時今日，咁嘅服務態度真係不得了，即刻俾隻手指公👍🏻，佢話叫我同老細講，我梗係大大聲同老細再講多次讚吓佢啦。…Read More

四朵金花又出動，今次揀咗馬鞍山泰菜，餐廳係啇場角落，真係要識路先搵到，裝璜唔錯，幾骨子，坐得舒服。點左椒鹽軟殼蟹、海鮮南瓜飯、串燒、香茅魚，轉頭有音樂聲，嚟左個機械人送餐，又幾得意嘅！試吓椒鹽軟殼蟹，炸得唔夠脆，有鹹味，冇香味；海鮮南瓜飯，飯底本身整得幾好，可惜南瓜唔靚，唔夠粉又唔夠稔；串燒牛比豬好，但沙爹醬都係少咗啲又唔夠味；最後香茅魚都算有心機，起肉脆炸賣相唔錯，但魚肉本身嘅味唔夠，亦冇香茅味。食過就算，唔算貴，但又唔會諗住再嚟囉！…Read More

妹妹從加拿大回港，一直想試呢間牛舌，一直忙到臨走之前，終於捉住佢嚟食，去到下午1點，前面排隊都有7、8人，等左差不多25分鐘先入座，但最終係值得嘅！入座每人至少order 一客單點，我哋叫左一客單點鐵板牛舌芯，另外一個牛板腱+牛舌尖，套餐+$18有湯、沙律同汽水。牛舌芯上枱，鐵板燒到滋滋聲，切開中間一食，又香又冧，非常正斗。牛板腱就略硬身，伴碟洋蔥都好甜，沙律菜都新鮮，但以價錢來講，絕對無失禮，值得再試。…Read More

隔離日子期間，食咗幾日酒店嘅飯餐，菜無味，粥無味，雞肉諧霎霎，食到冇晒人生樂趣。卒之的起心肝叫外賣，第一餐叫咗60年代嘅喇沙海南雞米線，蔥油豬扒撈公仔麵，一打開蓋成間房香氣撲面，個人好似回到陽間。第二日點左土炮咖喱雞球飯，咖喱汁非常之正，簡直可以撈飯食三碗。下次要試吓咖喱牛腩。食品水準非常之好，喇沙湯有蝦味，海南雞滑嘟嘟，蔥油豬扒雖然送錯咗蔥油雞扒，但係都一樣咁好味，跟住第二日再encore左一次，呢間小店值得推介。係我哋喺隔離日子入邊，覺得非常重要嘅精神支柱。有機會會去餐廳糖食再試吓是真啲味道。…Read More

今日出旺角，想食個下午茶，見到先達對面有間風味園，單拼下午茶麵餐係$26，啱晒我咁專一嘅人，淨係想食沙爹牛肉麵，送埋餐飲，都真係好抵。見麵後見到牛肉份量不少，覺得唔會因為下午茶而減量，頗有好感。先試牛肉，點知差啲要lur 返出嚟，點解有酸味嘅，想試真啲究竟係餿左，定係落左醋，於是好勇敢再試多嚿，用湯洗走醬汁再試牛肉，牛肉雖然都泡過，但唔算死肉，係嗰沙爹汁出事，點解有酸味？！自問試過不下百零碗沙爹麵，未試過有酸味，自己真係食唔慣。最後雖然杯奶茶唔錯，但係全日胃口都破壞晒，我自己以後就唔好亂敢再試。…Read More

今日出九龍城一心去食清真牛肉餅，點知原來搬鋪暫停營業，再想試樂園奶茶紅豆冰，點知一樣休息摸門釘，本來罷食，見到呢間西貢越南真味下午茶餐有法包，即刻醒神，雖然$39貴少少，都想試。落單後要等足15分鐘，雖然耐左啲，但係上枱個包俾熱嘅，一啖咬落去，脆卜卜，都值返，只係酸菜可以再酸少少，解左啲豬扒肥膩感就更好。包嘅份量細，啱女士多啲，如果有肝醬加埋落去，俾多$10都冇問題呀，咁成件事真係好似係西貢發生啦！…Read More

光榮試食今日觀塘，一早search 下有咩可以試，見到有光榮冰室，應該可以一試，順便支持下小店。餐廳真係細，一枱4人中間有隔板，都算安全。雖然常餐有沙爹牛肉麵，但係真係會食唔晒，於是叫左下午茶嘅沙爹牛肉包餐，沙爹牛肉份量唔少，塞滿長餐包，牛肉唔算太咸，肉質都冧，冇泡打粉嘅感覺，但就少咗沙爹嘅香味，嗰長餐包有烘過，不過唔夠硬身，好容易俾啲汁浸淋左，如果改用熱狗包或者硬豬仔包就會好好多。不過包埋餐飲，經濟抵食，可以接受。…Read More

今日難得姊妹得閒又約咗一齊出嚟T1T,鬆一鬆兼避開辣身嘅太陽。見第一城開咗一間新嘅茶餐廳，於是約埋去試吓，下午茶時間去到門口，見有幾個人排隊，個心期望即刻提高，心諗應該好食所以咁吸引。等咗5分鐘便可以入座，下午茶時間，茶餐選擇不多，得嗰六種，唔係好啱，瞥見餐單角落紅色大字寫住「沙牛最強」，夠膽咁寫應該係撚手名菜，於是揀咗常餐潮式沙茶牛肉麵配腸仔滑蛋歐式多士，配左杯鴛鴦添。兩個家姐就點左勁薑豬膶牛肉米線同埋脆炸雞中翼。上菜速度非常快，沙茶牛肉有五六片，薄獻汁麵嘅份量偏少，女士還可以，男士就一定唔夠食，但以常餐價錢$57 ，價錢貴得來份量又細，心諗如果味道好都值嘅我，試片牛肉唔靭，但味道偏淡，沙茶冇香味只係少少辣味嗲，有啲失望，如果自稱沙茶最強，就真係名過其實，返屋企自己煮可能仲好食啲。滑蛋同腸仔就一般貨色，同大X X差唔多，餐飲鴛鴦有啲澀，而且個杯好細，似玩具杯，份量少，有啲搵笨。至於勁薑豬潤牛肉公仔麵，勁薑嗰陣味都覺得幾香，豬膶淥過咗少少，但未至於「鞋」，都有6分，牛肉就一般啦。最後係炸雞中翼，不過不失，味道同大X X快餐店差不多啲。整體而言，呢餐係貴夾唔飽，味道普通，論性價比就有啲失望，應該唔會再返轉頭啊。…Read More

兩個家姐幫我慶祝生日，選左上海街618號，那裏由一座唐樓保育改建而成，銀之冰室在二樓，未食已經好興奮，對面一間舊文具鋪，陳列嘅墨水筆、太空喼書包、筆盒、字典⋯⋯好多都係兒時擁有，勾起好多童年回憶。因為閒日午餐，基本上唔使等位，仲可以揀窗邊卡位，廳枱玻璃下有展品，今期係懷舊書籤，總有幾張係曾經送過比人，又或者收過嘅，好有意思。言歸正傳，講返食物，午餐有中西東南亞各種特色食品，唔怕揀唔到，反而係樣樣都想試。三姊妹揀左黑松露什菌煙肉意粉、鹽酥雞馬來叻沙、蝦多士。意粉味濃醬汁濃淡適宜、叻沙有魚片豆泡，味道稍辣，鹽酥雞一流，外皮酥脆雞肉juicy,去台灣都未必食到咁好味，蝦多士係特色，新鮮熱辣，蝦肉彈牙，出面真係唔會食到。食物份量對女士嚟講係啱啱好。跟餐加左一個甜品係法式焦糖燉蛋，唔夠滑，稍嫌失色，但只係$15，唔可以太腌尖。餐飲叫左杯「嫩細鴛鴦」真係滑嫩順口，起名嗰個都好有心思，讀出嚟另有一種意境。整體來說非常滿意，每人消費唔使$100，多謝家姐s介紹咗一個好地方，一定搵機會再嚟。而家巿道唔好，當日一半都坐唔滿，希望鋪頭撐住，一定再幫襯。…Read More