hkpeperazzi's Profile

元朗友應該對呢條村唔陌生，因為村水都有好多食肆，但係非元朗人既我真係第1次黎！呢間餐廳係做鐵板燒，特色當然係高質素既生猛海鮮🦞同埋日本食材！今次同朋友叫左個鮑魚鵝肝2人餐，隻鮑真係勁大隻！大過手掌啊✋🏻師傅將佢切片燒到好爽口，由於鮑魚太大隻，佢仲好細心將鮑魚分2次煮，因為怕我地食到一半會凍左超貼心！而鮑魚亦有2食，除左切片外，仲會切粒，配一個鮑魚膽汁，以為膽汁會好苦，但原來係好似蟹膏咁既味！另一主角鵝肝配多士食，師傅煎完之後，d鵝肝一路漏出黎，脆卜卜既多士吸晒d油一齊食返唔好㗰左d精華！其實套餐仲有第3個主角就係A5和牛！我地揀左厚燒，如果薄燒既話會配葱。揀左5成熟和牛，真係燒得岩岩好，入口既溶，油香四溢！除左幾位主角，其實個餐仲有帆立貝、金鯛、炒飯、炒雜菜、魚湯同甜品🍮食到捧肚走啊！雖然地點看似偏遠，但其實當晚餐廳真係座無虛席，搞到有d焗促🤣所以想食既話都係訂位穩陣d！…Read More

荔枝角自從有D2Place之後，高質素既餐廳都唔少呢間主要食日本菜鐵板燒，門面已經好有日本feel！入到黎service仲好好，有籃比我地放手袋、有熱毛巾先擦手、侍應自動自覺不停斟茶refill。我地2個人可以叫個抵食既龍蝦鐵板燒2人餐，有前菜、帆立貝、響螺、龍蝦、銀鱈魚、A5和牛、炒飯/烏冬、炒雜菜、魚湯同甜品，起初仲擔心會唔會唔夠飽，點知食到炒飯已經飽到上心口！前菜有海葡萄沙律同田螺，沙律均匀地沾上芝麻醬，田螺個汁亦好甜帆立貝係用返個殼裝住，入面仲有個紫菜清湯要飲埋！店方仲好細心用個爐熱住，唔怕d湯變凍。響螺湯就飲得多，鐵板燒響螺就係第1次食，原來好爽口！呢條銀鱈魚平時出街食都要賣200幾啦！真係燒得好嫩好juicy！食完海鮮就到和牛啦有厚燒同薄切揀，厚燒就係切成粒粒咁燒，一咬開就爆晒d油花出黎！果然係A5！唔好睇個樣好似好熟，其實咬開係岩岩好medium！雖然食炒飯好飽，但都忍唔住要全清！因為真係炒到粒粒都好香口最後甜品揀左芝麻雪糕，個人覺得唔夠濃味，無乜特別。…Read More

到店後，招待我地既係個台灣人，加上店內牆身畫滿畫，好有台灣味道。簡單叫左d台式食物，當中包括3色餃，唔同色唔同餡既，但重點不在於餡，而係個麻辣汁！辣得惹味又唔會太嗆，點到即止，剛剛好！當然唔少得台灣地道小食鹽酥雞啦！不過呢個就無乜特別，亮點係加左上面2條芝士醬，令整體味道有返d層次。旁邊係肉躁時菜，菜都幾新鮮，肉躁唔會太鹹。呢個麵都幾比到驚喜我地！以為只係普通拌麵，但個麵身原來勁彈牙勁厚身勁好嚼！可惜只係撈芝麻醬就無乜自己既特色，如果係撈返水餃個麻辣汁就勁完美啦！叫左呢杯玩味十足既野飲用支ovaltine冰條倒插入豆漿，等佢慢慢融返做一杯ovaltine。不過豆漿味太淡，會沖淡左ovaltine既味，我覺得支雪條就咁食仲正…Read More

裝修光鮮亮麗，無走傳統中菜路線，反而係有玩味，好吸引到年輕人。就連器皿都唔馬虎，除左每人既碗上有肉麻字句，仲用茶壺裝湯、用擔挑外表既碗裝炒飯，呢d都係驚喜位！當然味道都好唔錯啦！個燉湯勁濃味足料，八卦打開個茶壺睇睇，入面係塞滿晒豬肉、響螺等材料，難怪咁濃味！個炒飯加左d脆米飯焦入去，口感上好有層次，而且都唔油膩，但就有d偏鹹。清少少就揀個蕃茄雜菇煲，果然係清新之選，無乜其他調味，主要都係食返蕃茄同菇既原味。點心方面，揀左個名好特別既老鼠愛大米！賣相好可愛！老鼠外層係西米做，好煙韌，入面就係鹹肉餡，就好似無炸過既鹹水角咁，都幾好食！甜品呢副麻雀簡直係吸引我黎既原因！因為想知其實係咩黎？點解可以食！原來係椰汁糕，上面加左塊印左字既食用米紙，旁邊d錢都係用食用米紙做，即係大白兔糖味塊紙。椰汁糕食落就無乜特別，椰汁味唔夠重，但造型100分！…Read More

朋友話之前係旺角店食過火鍋撚好好食,再帶我黎一次!果然冇介紹錯,一黎到叫左個湯底,雖然只係一個素湯,但都好出味,平時係屋企煲湯,點都要加舊瘦肉先會有味,但呢個冇肉都咁清甜,真係夠晒老火!同埋個湯本身都有4件粟米,所以慳返唔洗叫一碟啦!哈哈!每枱都會有呢個免費既夜明珠,好搞笑!上枱果陣有D乾冰,出晒煙咁,其實就係6粒水晶包,冇得揀味嫁!有鹹有甜,我覺得甜既同鹹湯底唔係太夾,反而鹹會好食D,但個水晶皮做得好煙韌,都幾好食!呢度有得揀普通牛柏葉同黑柏葉,雖然黑柏葉貴$10,但係冇飄過健康D都抵啦!然後叫左芝士丸,其實係墨魚丸包住少少芝士醬,好彈牙!仲有即炸響鈴真心驚喜!朋友話佢上次食過好正,叫我地今次一定要食!真係正喎!佢係即炸,所以口感好鬆脆,食落係感受到佢一層層既口感,真係浸3秒就岩岩好!好彩1碟有8條,我同朋友每人4條岩岩好唔洗爭!如果多人建議叫多D,因為真係會食到停唔到口!蝦滑、墨魚滑就食得多,菇滑係第1次食。都幾濃香菇味,一大舊滑真係食到飽!呢度D野食份量唔細,食完仲有甜品送,好似我地咁2個人黎,就唔好叫太多野食住,唔夠先加啦!…Read More

舖頭雖然唔係大街，但夜晚黎到都坐滿人，而且店內只有幾張枱，所以有可能要等位。因為當日唔想食生冷野，但朋友又話呢間出名又好食，所以我黎到唯有揀熟食－二重鰻魚飯！份量都幾驚喜！係出面既鰻魚飯價錢，但就有2條，而且1條都好大！影完相條鰻魚凍左，但都食到d醬汁好濃味，如果即刻熱食一定更好！而星鰻就更有明顯魚鮮味。食到最後淨返d鰻魚，飯就無晒，但好彩可以免費添飯，抵！個定食其實都幾豐富，有埋關東煮蘿蔔、麻醬豆腐、麵豉湯，實夠飽！食完趕住急急腳走，費時門外既人等位等太耐。…Read More

次次經過都好想食，因為成條都聞到d燒野食既香味！今次終於約朋友黎試下。燒野食咁dry，一定要叫d野飲先！叫左下火既竹蔗茅根同腐竹糖水沙冰。竹蔗茅根好足料咁喎！就算只係一杯，都有齊馬蹄、竹蔗、紅蘿蔔，飲落幾清甜。真係超愛呢個腐竹糖水沙冰！第2度冇飲過！想飲一定要返黎呢度飲，估唔到佢白雪雪好普通既樣，原來腐竹味係超級濃嫁！金菇肥牛卷係平時燒好既，有3大札，但就冇咩味，比較淡。芝士獅子狗都係本身就炸左，但原來都係用黎打邊爐會夾d，炸過之後有d油味同較乾。呢個竹筒飯夠晒特別啊！要自己燒，燒足佢14分鍾（都幾耐），跟住店員會幫我地剪開佢，再自己淋埋d椰汁就食得。椰汁佢比好多我地，多到可以變椰汁紫米露添啦！d紫米燒完幾爽口，又帶d香味，都唔錯。燒鰻魚係超級大條！勁厚肉，正啊！同埋可以自己搽d醬落去，一定唔洗驚d汁唔夠啦！搽完醬再燒兩燒，入晒味！呢個玉子燒幾搞笑，佢係比一塊塊既玉子你燒左兩面金黃先，再自己加入菜脯同蛋漿，好似平時炒蛋咁，不過d蛋漿未撈勻就加左入去，熟左之後見到有d蛋白。而玉子就甜甜地好好味。不過呢度有樣唔好，就係比較逼，你經過就會望到呢度其實好細，坐唔到幾多人，唔太舒適，所以快d燒完食完快d走就岩。…Read More

一入到黎，最吸引既係3層牛肉架，平日3層架裝既係tea set，呢度裝既係3款牛肉！好可惜我地2丁友就食唔到呢個咁大既牛魔王拼盤下次要叫多d朋友一齊黎食先得！不過我地都叫左一碟普通既肥牛，雖然係最普通既美國肥牛，但又唔會話肥到冇肉，都幾均勻，而且有牛味，＄88係幾抵！呢度湯底有好多選擇好難揀！麻辣湯同其他幾款都想試，不過有d特底湯底係冇得雙拼，所以最後揀左杏汁豬肺。都冇揀錯，個湯好多豬肺好足料，一黎到就聞到好似杏霜咁既味啦！打邊爐要叫d芝士乜乜乜，呢度除左基本既芝士腸，都有芝士竹輪同芝士手打牛肉丸。開頭以為芝士手打牛肉丸係牛丸咁既size，點知成個拳頭咁大，我地2個人有4粒，每人食2個都飽左所以叫個烏冬都晒氣，係食唔晒既。粟米好甜！響鈴就唔夠新鮮鬆化。呢個丸個樣好似芝士丸，其實係蟹籽丸，入面會爆汁出黎嫁！整體係環境上比較逼d，食物冇咩特別，但係湯底幾有誠意！…Read More

如果唔係睇過雜誌介紹,都唔會識黎呢間餐廳,因為個位都有少少隱蔽,要入左商廈再上樓梯。一上到黎就見到有得夾糖,係免費既,不過得棉花糖揀咋,夾幾粒個袋就滿左HAHA雖然店員就冇話限住夾幾多袋既,但自己都唔好意思夾人地咁多,所以夾左1袋仔就算啦。差唔多餐牌上隨便叫樣野都可以加$10要杯野飲或者湯,又或者加$25轉特飲。呢個就係佢平既地方啦,平日D CAFÉ飲杯野都$50啦!抹茶鮮奶係特飲,抹茶味幾突出,雖然唔係D咩宇治出品,但加左鮮奶都好滑,冇比奶味搶過。另外就叫左杯凍檸茶。呢個小食拼盤全部都係炸!好熱氣!不過都炸得幾好食,唔會太油,又夠脆,腸仔仲有成2大條!仲有炸蠔、薯格、雞翼,重點一定係個泰式辣醬!酸酸辣辣咁同D炸野係勁夾!蟹肉牛油果沙律都只係$65,真係平到笑,平日呢道菜係其他CAFÉ都收$98,或者高級餐廳仲會收你$158,不過呢度質素冇因為平而妥協!蟹肉好鮮味,牛油果都好CREAMY好甜!呢個海膽飯又係好抵,因為做緊優惠所以抵,$98有成板海膽,同埋唔係細細粒果D海膽,呢款大大隻,1D都唔腥!撈飯食曬左,識食一定係一粒粒咁擺入口,享受!呢款墨西哥脆片味道好似薯片咁,所以好好食,平時果D似粟米片會好DRY,呢款唔會,個牛油果醬仲冇乜草青味,幾岩我!呢度係抵得再黎,淨係為左海膽都抵黎多次!不過唔知個優惠做到幾時,因為佢原價係$198,如果變左原價就食唔起啦!…Read More

最近突然好想食韓燒,可能係因為太耐冇食掛,次次食親都係最多分店果2間,今次試下呢間新開分店既熨烤達人。見到個熨斗覺得好新奇有趣,原來係用黎燒肉果時放係舊肉上面壓住佢,但係我地冇叫到豬肉,就冇用武之地!早知叫D豬肉啦!見人地隔離台用佢黎燒五花腩燒到著晒火,好似好好玩咁haha講返食左D咩,有呢個牛肩胛肉,肩胛肉唔會太肥,有返D牛味,不過如果唔小心燒耐左就會好韌。另一份牛係已經燒好左既,係韓牛!即刻食到同牛肩胛個分別,肉肥好多,個鮮味都突出D!不過話就話半生熟,但都好生,好似得2-3成熟咁,所以我都係再燒燒佢。仲有呢個鰻魚飯,好似食韓燒既時候食鰻魚飯有D 9唔搭8,但貪佢夠飽肚啊麻!淨係食肉好難食得飽。鰻魚超大條!不過唔夠汁,所以個魚味好重好明顯,魚同飯中間夾住半熟蛋,好似人地D日式蛋包飯咁,都做得唔錯既,但都係食返韓燒會同個環境襯D既。…Read More

突然想食下D高質少少既日本野,但又怕太貴,所以就揀左呢間人唔多,又唔太貴既旺角樓上日本菜。簡簡單單叫左個鰻魚卷、銀鱈魚同安格斯牛肉壽喜燒,先講講鰻魚卷,個鰻魚味好出,不過唔係好夠滑,一條都有幾多件,如果1個人食晒會好飽haha銀鱈魚西京燒一食就知係靚野，條魚真係好滑，冇雪味，入口即溶，d油脂係口入面爆發！超正！而安格斯牛肉壽喜燒同平日食SHABUSHABU果D唔同,係煎左D料先,跟住先落湯,最後先烚下D牛就食得。入面仲有芋絲、菜、金菇,簡簡單單唔算好豐富,但個湯底好香濃又夠甜,所以都好滿足啦!…Read More

係呢間酒店食TEA有個好處,就係夠靜,枱同枱之間既距離夠遠,所以唔會比隔離枱傾計嘈到自己,好有空間感。同埋雪糕、WAFFLE,雪糕蛋糕果D可以任食!就好似1個甜品BUFFET咁,所以都唔算太貴。個TEA SET本身都好多野食,加埋D任何既甜品,真係好飽!可以唔洗食午餐就黎,然後晚餐都會飽到食唔落啦HAHA個TEA SET既鹹點有成杯鵝肝醬、龍蝦牛油果撻、MINI BURGER、蘑菇蛋批、蟹肉青瓜多士，用料唔CHEAP嫁!BURGER果塊牛肉估唔到都幾夠味又唔乾喎!而甜點就有CUPCAKE、MACARONS、朱古力撻、綠茶紅豆捲蛋、檸檬椰子忌廉、鬆餅。檸檬椰子忌廉個名聽落好肥膩,但食落清清地又幾清新,唔會太濃太甜。大愛朱古力撻濃濃既朱古力味啊!1D都唔甜!而任食既WAFFLE我只係食左一份咋,幾鬆軟,好香蛋味,加左花生醬朱古力雪糕、咖啡雪糕同椰子味雪糕,花生醬朱古力雪糕比想似中淡味,椰子味雪糕入面真係有片片椰子肉,好真材實料啊!…Read More

呢間雪糕店係黎自日本既百年老店!即係中村、京林果D FRD啦!但呢間就專食雪糕既,我果日去到,IFC限定既雪糕窩夫尾經賣晒啦!唯有食呢個普通D既芭菲啦…..之前係日本都食過呢間既雪糕,同日本一樣,香港店都做得唔錯,我鍾意奶味同抹茶味之間既BALANCE,大家相輔相乘,就算是但一隻味蓋過左對方都唔好!所以呢間既雪糕就岩我口味,同埋佢用8.0牛乳,所以一定夠滑啦!入面有好多紅豆、玄米,幾豐富,但係白玉得一粒,唔夠喉啊!…Read More

黎到長洲,當然唔會想次次都食雜誌介紹果D GIMMICK野,係時候幫襯下D老店啦!通記係個大排檔入面,黎呢度完全係因為我鍾意食米通粉啊!但係香港唔多地方有得食。呢度既米通粉都煮得幾滑,但個湯好淡,所以要加D辣椒油先夠味,不過可能叫沙嗲牛肉果類濃味D既配料會夠味D。…Read More

次次去台灣都要狂打邊爐,但最近冇時間去,好彩香港都開左間同台灣無老鍋好似既火鍋店,仲係旺角咁方便,一於試試佢!湯底可以揀鴛鴦,揀左一個唔辣既滋潤湯同一個麻辣湯。麻辣湯真係好正啊!小辣既辣度都好夠,佢真係幾麻,但又唔會太油,入面好多花椒,完全唔會偷工減料!仲可以叫個紅薯粉,同麻辣係絕配啦!但點心就有D怪,估唔到D點心會係凍上,要自己再放落鍋度煮,煮完其實會變晒味,就好似呢個水晶奶皇包咁,本身係甜既,放入鹹既湯度煮,完全唔夾!牛肉一塊塊咁掛係度好吸引,呢隻安格斯牛雖然話係肥牛,但又唔係太肥喎!而且牛味夠濃!LIKE!鹹蛋蒸肉餅就食得多,但鹹蛋豬肉丸就第1次食,豬肉丸入面有鹹蛋黃,食起上黎真係幾似鹹蛋蒸肉餅,搞笑得黎又幾好食!食到最後,每個客人都會有杯「毒酒」,次次都唔同,有時係糖水,我地果晚就係五花茶,岩晒打完邊爐清清熱。…Read More