hazelhuihuihui's Profile

呢間已經係我第二次食，見我食過返尋味就知道係好野啦！鋪頭位置都算易搵，鋪面設計好特別，好多手繪嘅漫畫公仔。如果想食沾麵嘅朋友就要留意， 沾麵嘅供應時間係12:00-15:30，所以要食沾麵，就要揀lunch time黎啦。Menu共有三款沾麵，可以比客人揀麵嘅分量（普通為200g，已經好飽）、凍/熱麵、汁嘅分量同埋蔥。首先上枱嘅係焙煎黑芝麻沾麵，拉麵有舊檸檬、一塊紫菜（如果揀熱麵，塊紫菜可能會林左）同一隻吾流心嘅溏心蛋，見到隻蛋唔流心，有少少失望，但係都幾好食，如果要半熟蛋，可以另外再加錢。沾麵最緊要係果汁，呢個焙煎黑芝蔴汁裏面有豬肉、蔥花同埋筍，試咗淡個湯底，以為自己食緊芝麻糊，感覺有少少奇怪，但係飲完之後個餘韻就好重魚湯味。雖然個配搭有啲奇怪，但整體來講都ok，食到最後有啲膩。之後就要介紹重頭戲！呢個就係魚介豚骨沾麵！汁嘅配料同上面都差唔多，但個汁真係好深刻！個汁好濃郁，每一啖都係鮮甜嘅魚湯味，鹹鹹香香，鹹得黎唔會令你想瘋狂飲水，同d麵夾到不得了！如果食食吓發現d汁凍左，可以叫員工幫你翻熱，而翻熱嘅方法就係加兩粒熱石入碗汁到 一加落去就聽到「za za」聲，令人好振奮雖然吾會令啲汁變到好似啱啱上枱咁熱，但令碗汁熱返d，食落冇咁膩，兩粒熱石係成餐飯嘅小插曲，好特別。雖然有少少貴，但都好值得一試再試！…Read More

之前喺大陸都食過錫紙花蛤粉，佢地係成個錫紙攞去電磁爐度煮，辣辣地幾好味。之前見網上有介紹紅磡開咗呢間專食花蛤粉嘅鋪頭，所以就心思思走去試吓。由於鋪頭位於工廠區，所以位置比較難搵，大熱天時真係行到身水身汗先搵到。我去嗰陣係中午12點，可能因為打工仔未放lunch，鋪頭仲未有人。整體來講，店內嘅燈光比較暗，座位比較窄，坐得唔係幾舒服，但係估唔到佢啲花蛤粉真係幾好食。呢杯係隨餐附送嘅菜蜜，好飲。等左大概10分鐘，期待已久嘅招牌錫紙貝殼粉絲終於上枱啦。我記得之前睇大陸食果個錫紙係熱既，因為佢哋係連埋一齊嚟煮。但呢張錫紙吾係熱既，所以應該唔係連埋一齊煮。材料包括有花蛤、粉絲、木耳、少量生菜、芫荽、蔥，個湯底好鮮甜，成碗粉大概有10隻花蛤，其中一、兩隻有啲沙，但都無影響成碗粉嘅口感，好好味，值得試！跟住上枱嘅係排骨熱拌麵，個面底有少少似粗版嘅上海麵，配料有好脆嘅豆（係炸過的，但我唔知係咩豆）、排骨同肉鬆，幾種配菜夾埋一齊食好有風味！另外我仲叫咗老麻抄手，menu上好細心咁分開「麻」同「辣」供客人選擇，各分咗三個度數，客人可以根據自己喜好選擇，我就揀咗一半一半，每隻雲吞都好飽滿，唯獨係個汁太鹹，扣左d分。食到1:00左右，啲打工仔開始放lunch，鋪頭都開始人頭湧湧。價錢合理，菜式獨特，難怪打工仔都咁捧場。…Read More

有朋友之前推介呢間晚飯吾錯，今次想去試下佢嘅午餐，餐廳係位於巷仔大廈嘅樓上鋪，有少少難搵。呢個係午餐menu，得呢張menu同一張特色飲品嘅menu，午餐無小食果d，選擇少左d。我叫左雞肉石鍋伴飯同韓式芝麻醬冷麵，等左大概7分鐘就有野食啦，餐牌上並無詳細寫明呢個係套餐有d咩，我以為淨係得個飯同麵，上枱嘅時候見到有6個前菜同伴碟都幾驚喜。呢個係雞肉石鍋伴飯，配料同味道都同普通嘅石鍋飯無咩分別，不過出面d石鍋伴飯一撈就見到個底成層油，但呢個又吾會好油，扺讚雞肉分量好多，配料同飯嘅比例剛剛好，都算扺食。前菜同伴碟方面，有海帶湯、沙律、炸紫菜粉絲卷、餃子一隻、芽菜、生果。海帶湯飲得出有味精，但我想特別讚下個沙律，沙津係用左柚子醋做醬汁，酸酸甜甜，好清新，好開胃。另外的韓式芝麻醬冷麵，為左方便進食，員店會將d麵剪開一半。話就話係「芝麻醬」，但係我覺得佢都係用左柚子醋黎伴冷麵。Anyway，我覺得柚子醋配冷麵感覺好清新，第一次試柚子醋已經愛上，強烈建議大家試下呢個「柚子醋冷麵」！環境方面，座位夠闊落，午餐時段都唔算太多人，坐得幾舒服。但係！員工態度有待改善我啱啱入到餐廳，得三枱客，佢安排左我地坐二人位，但眼見店內仍有唔少空位，而且吾想對住洗手間，所以要求坐較闊落嘅梳化位（二人座），但店員竟然藉口話「果個位好焗」、又話果個吾係廁所，我臨走前就係去左果個佢話吾係廁所嘅廁所。另外，當我完成左八成食物時，有個店員行過黎想收走我個餐盤，我表示我未食完，吾需要收，但佢好似聽吾明我講野咁照收，直至我再揮多幾下手，佢先吾收，我懷疑佢聽吾明中文🤔總括黎講，食物有水準，但店員質量有待改善，至少吾好欺騙顧客。…Read More

「宇治園」喺海港城開左半年有多，聽講佢出名賣抹茶，於是走左去試下佢d飲品同雪糕，睇下有幾濃郁。溫馨小提示：呢間宇治園分開左堂食同外賣兩邊，兩邊嘅menu 係吾同嫁，所以大家去到要睇清楚兩邊嘅menu，先決定堂食or外賣。我點左兩杯野，分別係凍抹茶豆乳同抹茶飄浮。呢杯係抹茶豆乳，攞野飲嘅時候，店員同我講：「如果覺得太苦，可以加糖漿。」我試左一啖，就覺得抹茶味好濃郁，濃到有陣茶嘅澀味，而佢嘅豆乳本身又吾甜，所以怕苦嘅朋友真係要加糖漿。個人覺得抹茶味佔左70%，而豆乳佔左20%，淨返10%就係糖漿味，抹茶同豆乳味稍為平均d會更佳。而另一杯就係抹茶飄浮，一杯裏面有抹茶、冰、抹茶朱古力兩粒同抹茶雪糕，都幾豐富。抹茶雪糕好濃郁，吾係有冰粒果d雪芭，而係軟綿綿嘅抹茶雪糕，真係好香抹茶味！可能因為抹茶雪糕已經好夠甜，所以呢杯吾需要落太多糖漿都好夠味。有兩粒（我估係）抹茶朱古力，齋食都幾香抹茶味，但整體黎講無咩特別，個人認為同杯野吾係好夾，有d可有可無嘅感覺。飲到最後有d冰可以篤黎食，d冰都有d抹茶味，咬咬下都幾過癮。P.S. 店員好nice，好有禮貌，原本我想走冰，但店員好有耐性咁解釋，抹茶飄浮嘅雪糕需要靠冰黎「飄浮」，所以建議我少冰，但我最後都係無走到冰，美味加倍。…Read More

前一排souffle pancake、空氣感pancake掀起一場狂熱，天仁茗茶都不甘示弱推出呢一款珍珠奶茶pancake。鍾意飲珍珠奶茶嘅我，又點會錯過呢個機會，用另外一個方法品嚐珍珠奶茶呢。環境方面，呢間café形式嘅天仁茗茶設有座位比客人坐喺度食嘢同飲野，大概有六張枱左右，地方比較淺窄，但張凳都幾舒服、幾好坐。可能因為下午5,6點去食，客人唔算好多，好易搵位。買完嘢食坐咗5分鐘，都冇店員黎清潔枱面，枱面上面係上一手同上上手食完嘅食物同飲品，店內亦都冇標示話要求客人自行清理垃圾，所以見幾張枱上面都有上一手客人剩返嘅食物同飲品，衛生情況有待改善。食物方面，可能唔係peak，所以唔使排隊就好快可以買到野食，但係等嘅時間真係比較耐，雖然店內有標示話要等10至20分鐘，怕等嘅朋友可能會等到唔耐煩。落左單過左15分鐘後，螢光幕就顯示我嘅Number，食得！因為枱面有上一手嘅食物，所以要捧住黎影相。Pancake總共有兩塊，空氣感爆燈！啲醬汁有淡淡的奶茶味，唔算好濃郁，珍珠夠彈牙，同平時飲天仁茗茶嘅珍珠奶茶d珍珠一樣，不過士多啤梨有啲酸。口感方面，我嘗試將pancake、珍珠同醬一齊食，我發現我吞左d pancake，d珍珠仲係我個口裏面未咬完。由於兩種食物嘅質感好唔同，所以會有呢種「時差」。總括黎講，呢個pancake都值得一試，尤其係鍾意珍珠奶茶嘅朋友，但味道都唔係特別深刻，因為d醬嘅奶茶味唔濃，如果咁岩行過淘大商場，就試吓啦，兩個人share一個都唔會太膩。…Read More

今日夜晚去左淘大商場，呀媽同吾姊話想食pizza，又唔想食連鎖店，所以就揀左呢間。可惜，食完之後真係覺得「可一，不可再。」餐牌方面，主要有兩份，一份係主餐牌：有Pizza、意粉、沙律、前菜小食、蛋包飯、大阪燒以及各種特色飲品；另一份係套餐餐牌：有鐵板扒餐同$168的2人套餐。留意返：呢個2人套餐其實Fix左你可以食嘅嘢（包括：西班牙辣雞肉番茄米pizza、溫泉蛋肉醬意大利麵、北海道牛油果沙律），如果要轉其他Pizza、飯、意粉、沙律，就需要加錢（大概加$28-38左右）。環境和衛生方面，可能因為地理位置嘅問題（喺2/F嘅篤篤位置），晚餐時段，鋪內仍然好多吉枱，店內客人寥寥無幾。正當我同吾姊睇餐牌睇到興起之際，突然有隻長達1.5cm的小強出現喺枱上嘅餐碟上，嚇得吾姊飛撲在我身上，此時心裏已經暗暗扣左10分。食物方面，我地最後叫左$168呢個2人套餐，首先黎到嘅係北海道牛油果沙律。賣相唔錯，牛油果同蔬菜都夠新鮮，但一齊上枱嘅沙律醋嘅味道唔係我哋一般食到嘅酸甜味，而係好似豉油咁嘅鹹味，感覺有啲奇怪，雖然係咁，但怕且呢個沙律係全餐飯最好食嘅一道菜。然後上枱嘅係溫泉蛋肉醬意大利麵（左上角），正當我想將溫泉蛋嘅蛋汁同意大利麵撈埋嘅時候，我發現呢隻溫泉蛋原來得蛋白，並冇蛋黃汁，有啲被騙嘅感覺。將蛋白撈勻之後，試咗一啖，兩隻字：「極鹹！」意粉嘅味道雖然同大X樂/大X活嘅肉醬意粉味道差唔多，但鹹幾倍。最後上枱嘅係西班牙辣雞肉米pizza，都怪我地睇餐牌嘅時候睇漏左個「米」字，呢個其實都稱唔上係一個Pizza，「批底」只係一啲用飯焦整成嘅餅底，脆脆地咁，但同Pizza口感大纜都扯唔埋。雖然雞肉好大舊，亦都可以玩芝士拉絲，但其實雞肉唔辣，整體材料唔夠豐富。另外，餐牌上話有「無限添加汽水」，但落單嘅時候店員問都冇問過我地要咩汽水，跟住就比左一罐百事可樂，分別倒入兩隻杯serve上枱，我個人唔鍾意飲可樂，仲要係「百事」，大失所望。總括來講，$168加埋一，即係$185，三個人來講算唔貴，但質素咁樣真係好失望，再加上比隻小強嚇一嚇，成餐飯即刻冇晒食慾，水準有待改善。…Read More