hazelhuihuihui
可一,不可再
hazelhuihuihui
Level 2
2018-06-20
485 views
Follow
今日夜晚去左淘大商場,呀媽同吾姊話想食pizza,又唔想食連鎖店,所以就揀左呢間。可惜,食完之後真係覺得「可一,不可再。」

餐牌方面,主要有兩份,一份係主餐牌:有Pizza、意粉、沙律、前菜小食、蛋包飯、大阪燒以及各種特色飲品;另一份係套餐餐牌:有鐵板扒餐同$168的2人套餐。留意返:呢個2人套餐其實Fix左你可以食嘅嘢(包括:西班牙辣雞肉番茄米pizza、溫泉蛋肉醬意大利麵、北海道牛油果沙律),如果要轉其他Pizza、飯、意粉、沙律,就需要加錢(大概加$28-38左右)。

環境和衛生方面,可能因為地理位置嘅問題(喺2/F嘅篤篤位置),晚餐時段,鋪內仍然好多吉枱,店內客人寥寥無幾。正當我同吾姊睇餐牌睇到興起之際,突然有隻長達1.5cm的小強出現喺枱上嘅餐碟上,嚇得吾姊飛撲在我身上,此時心裏已經暗暗扣左10分。

食物方面,我地最後叫左$168呢個2人套餐,首先黎到嘅係北海道牛油果沙律。賣相唔錯,牛油果同蔬菜都夠新鮮,但一齊上枱嘅沙律醋嘅味道唔係我哋一般食到嘅酸甜味,而係好似豉油咁嘅鹹味,感覺有啲奇怪,雖然係咁,但怕且呢個沙律係全餐飯最好食嘅一道菜。
北海道牛油果沙律
北海道牛油果沙律

然後上枱嘅係溫泉蛋肉醬意大利麵(左上角),正當我想將溫泉蛋嘅蛋汁同意大利麵撈埋嘅時候,我發現呢隻溫泉蛋原來得蛋白,並冇蛋黃汁,有啲被騙嘅感覺。將蛋白撈勻之後,試咗一啖,兩隻字:「極鹹!」意粉嘅味道雖然同大X樂/大X活嘅肉醬意粉味道差唔多,但鹹幾倍。
溫泉蛋肉醬意大利麵
溫泉蛋肉醬意大利麵

最後上枱嘅係西班牙辣雞肉米pizza,都怪我地睇餐牌嘅時候睇漏左個「米」字,呢個其實都稱唔上係一個Pizza,「批底」只係一啲用飯焦整成嘅餅底,脆脆地咁,但同Pizza口感大纜都扯唔埋。雖然雞肉好大舊,亦都可以玩芝士拉絲,但其實雞肉唔辣,整體材料唔夠豐富。
西班牙辣雞肉米比薩
西班牙辣雞肉米比薩
另外,餐牌上話有「無限添加汽水」,但落單嘅時候店員問都冇問過我地要咩汽水,跟住就比左一罐百事可樂,分別倒入兩隻杯serve上枱,我個人唔鍾意飲可樂,仲要係「百事」,大失所望。

總括來講,$168加埋一,即係$185,三個人來講算唔貴,但質素咁樣真係好失望,再加上比隻小強嚇一嚇,成餐飯即刻冇晒食慾,水準有待改善。
The above review is the personal opinion of a user which does not represent OpenRice's point of view.
Like
Share
Report
Ratings
1
Taste
1
Decor
3
Service
1
Hygiene
1
Value