Eric Po's Profile

好耐冇黎食，今日平日一個人黎食早lunch，十二點正到，咁早黎都差唔多Full晒咁滯，好彩唔駛等，因為五分鐘之後已經開始出現排隊嘅人龍⋯Order左咖喱魚蛋、豬紅同五香牛腩河粉，要多蔥，多腩汁及咖喱汁。食落湯底濃，咖喱夠辣，同之前一樣咁出色。本身我係豬紅控，對豬紅有要求，今次佢嘅豬紅就冇之前咁好食，硬係覺得有少少腥味🤥，不過都唔差嘅。五香牛腩同咖喱魚蛋都係十二蚊，牛腩夠入味，份量多，不過切成一片片唔係一舊舊🤔，相反魚蛋只係得三粒，雖然夠大粒同彈牙，但性價比就相對低好多。買單$60有找，銅鑼灣地帶，又夠飽，都真係抵嘅！…Read More

朋友想食居酒屋，前兩日已經book咗呢間，好似話幾出名，於是黎試吓⋯同兩條女嚟，佢哋都係「細胃」組織，食少少就話飽，所以order得唔多：磯燒雞泡魚乾：唔特別鍾意食雞泡魚乾，係朋友嗌嘅，同其他居酒屋比較冇乜特別。厚燒牛舌心：利申我係牛舌控，但係呢個真心係好出色嘅，厚切得嚟燒得一啲都唔靭，勁香牛味，所以encore左。汁燒雞脾菇/蒜蓉牛油炒雜菜：冇特別。蟹肉燒飯團：燒到熱辣辣嘅飯團，加埋蟹肉，好食。法式鮮蟹肉虎蝦烤多士：唔好食，完全食唔到蟹肉，隻蝦唔似係虎蝦，配咗千島醬，完全唔係嗰樣嘢，失望。鹽燒鮮雞腎：最唔好食係佢，一大浸內臟味。鹽燒雞中翼/鹽燒雞軟骨 (二本入)：我個friend話雞軟骨好食，我就覺得冇乜特別。燒盲曹：最好食係條魚，好大條，燒得啱啱好，完全唔乾身，啖啖肉，配泰式醬汁，好好食。燒蟶子：有啲令人失望，普遍都係細隻，同埋唔夠味。總結來講OK嘅，三個人大概$1300左右，以居酒屋嘅價位唔算貴，坐得都舒服唔會好迫，全晚full book冇得walk in。…Read More

今日同成班朋友去咗東薈城，六個人book左Banchan & Cook，本身唔特別好Korean food，book哩間純粹係因為假期怕其他食肆會好full，所以冇乜期望，反而又幾ok喎⋯Order左以下食物：部隊鍋拉麵：咁多樣食物當中，部隊鍋拉麵係最令我失望嘅，話晒部隊鍋都係Korean food入面嘅signature dish，雖然唔係齋部隊鍋，而係部隊鍋拉麵，但係個portion俾人嘅感覺都係偏少，除咗拉麵，只係得芝士、泡菜同午餐肉，而且湯底偏淡，賣相麻麻。黑毛豬面肉卡邦尼意粉：個意粉係好食嘅，不過卡邦尼係我嘅飛佛，煮得好普通我已經覺得好好食，所以不能作準。反而我冇乜點留意到個黑毛豬面肉，只係記得食咗啲好似煙肉咁嘅嘢，anyway都係好食嘅。韓式炸雞雙拼無骨一份：叫咗蜜糖同芝士雙拼，無骨平$10，仲有薯條同韓式年糕做配菜。我冇食到芝士炸雞，但係個蜜糖炸雞係好食嘅，不過可以再大嚿啲。意外驚喜係個炒年糕配蜜糖同芝士嘅醬汁係超級好食。烤牛肉蛋包飯：我本身麻麻哋蛋包飯，但係佢嘅蛋包飯加埋烤牛肉嘅汁又真係幾好食，最緊要係唔係好漏。海鮮煎蔥餅及韓式辣炒年糕：冇乜特別，煎餅就係煎餅，炒年糕就係炒年糕，都煙靭嘅，不過唔辣，下次哩兩樣可以skip。啲嘢飲唔comment lu，因為我只係飲咗杯mocha。六個人盛惠$960，唔貴而且食得好飽。 -完-…Read More

知道有呢間嘢好耐，但係唔就腳，一直都冇試過，今朝一早行過太古城廣場food court竟然見到新開左間九頭鳥，害我坐咗超過半個鐘等到11點等佢開⋯我嗌咗雲南酸辣米線，五少辣，三餸炸醬、豬紅、牛肉，再加杯凍奶茶。結論係不枉我等佢超過半個鐘，係啱我口味嘅米線。首先講個湯底，多酸菜所以略帶酸（我鍾意），加咗好多花生（我鍾意），唔太油（我鍾意），唔係會肚痾嘅辣（我鍾意）。米線偏幼，唔係啲粗身同煮到發發地漲嘅米線（我鍾意）。炸醬同另一間出名米缐差唔多但辣少少（我鍾意）。D餸就一般，其中豬紅最令人失望，因為冇乜味，不過食米缐我覺得都係個湯底同米線重要啲。價錢都唔貴，六十零蚊連凍飲，不過啲服務就真係好一般⋯…Read More

依家好多茶餐廳又貴啲嘢又唔好食，但係呢間嘢我真係要表揚下佢，平民價錢，款式多，而且高水準。今日同同事嚟，order左星洲炒米，佢嘅星洲炒米係我嘅第一推介，好少有茶餐廳整得好食過佢。佢係用銀絲米粉炒嘅，夠鑊氣，唔油膩，啲米粉唔會黐埋一株株，又上色又濃味，料又多，堅係好食嘅，而且每次都保持到一定水準，所以好多時候我哋黎榮發都會嗌星米。另外上次嗌左個瑤柱蛋白炒飯，出奇地好食，賣相同味道同酒樓有得揮，可惜唔記得影相。中午食人均五十幾蚊，抵到爛啦⋯…Read More

前兩日個friend book枱，竟然book到琴晚銅鑼灣食無老鍋，可能而家通晒關啲人要食都飛晒去台灣食，anyway，之前喺台灣食過幾次，所以今次喺香港第一次食都有啲期待。首先係湯底，我哋揀咗個麻辣湯底，冇揀鴛鴦鍋，因為要相倍價錢，覺得有啲唔抵，個麻辣湯底係好食嘅，但係就好似冇台灣咁辣，不過用嚟送飯一流。鴨血同豆腐係任食嘅，完全係台灣嗰隻味，我認我係鴨血迷，所以好好食。肥牛得十二舊，不過係厚切嘅，都好飽肚，不過要成三舊幾水，響台灣食應該平一半。至於蝦滑、油炸鬼、午餐肉就一般般。我哋嗌咗皇帝菜，菜就係菜啦，冇乜嘢好講，不過通常食麻辣鍋，啲菜塑晒啲汁，都會好辣，不過我食落又唔係好覺，所以其實個麻辣湯底都真係唔係好辣。響鈴我哋冇嗌，但係我哋見隔離台有嗌，好似新鮮炸出嚟，好大舊，味道就唔知，但係都好吸引。嘢飲我哋嗌咗一揸金橘檸檬，一揸一舊水，一杯都$58，所以一揸抵飲D。For大家information，一罐可樂都成$38，好lan搶錢。同台灣一樣，埋單送一細揸沙冰，琴晚係鳳梨味，都幾好味不過偏甜。最後差啲唔記得講佢D醬料，選擇唔多，而且個豉油係秘製豉油，同台灣一樣，個waitress話略帶酸味，不過我同我個frd就覺得好酸，結果個waiter俾左普通豉油我哋，其實啲waiter都serve得好好，時不時走過嚟問我哋使唔使加鴨血同豆腐，不過成晚全場得五成満，有唔少吉檯，話就話食個半鐘，不過夠鐘都冇俾人趕走。最後埋單九百幾，我個frd話響台灣食應該平一半，鬼唔知咩⋯…Read More

朋友推介嚟食，個幾星期前已經book左今個星期六晚食，星期一開始已經勁期待，星期六早餐後餓住個肚，諗住夜晚食到佢執笠⋯未講食物質素前，先講價錢，$580一位，5個鐘，下午5點到夜晚10點，時間長到離晒譜，大閘蟹同打邊爐都係任食，海鮮有琵琶蝦、大頭蝦、鮑魚、扇貝同各式各樣蜆類，仲有炸物、點心、雪糕、飲品⋯全部都係任食。大閘蟹唔算大隻，全晚只提供蟹乸，我本身唔好大閘蟹，亦唔係好識食，但係我D大閘蟹friends似乎唔太鍾意食蟹乸，所以第一round大閘蟹環節未能盡興。向我推介黎食個friend話上次個幾星期前黎，蟹公蟹乸都有，但琴晚我哋向店員求證，只有蟹乸，sad…所以第二個鐘開始已經轉戰打邊爐，海鮮方面最好食係鮑魚同琵琶蝦，鮑魚非常新鮮彈牙，至於琵琶蝦同大頭蝦，食落似係冰鮮貨，梗係啦，新鮮琵琶蝦咁貴，無可能做到，anyway，琵琶蝦口感似喺街市預先湯定百零蚊份嗰D貨色（死左冇耐），所以都唔差嘅。蠔我冇食，但我D friend話ok。大頭蝦就有少少梅。肥牛除左牛小排全部都係任食，整體肉類質素唔錯。炸物非常值得推介，當中首推炸雞皮，非常非常非常好食，有日本當地居酒屋水準，雞翼，蝦多士，金菇肥牛卷也相當不錯。雞翼有5-6款口味選擇。點心如蝦餃、奶皇包就一般。雪糕有多種款式，亦出奇地好食。總括來講性價比高，可以encore！…Read More

新開張，朋友又勁推介，所以今日紅日中午黎食。前兩日已經買外賣試左佢嘅醉雞同炸魚皮，我唔知佢用花雕定係槽滷，隻醉雞醉到過咗龍，食幾舊ok嘅，食成半隻就愈食愈覺得苦，可能我唔識食，哩D先至係正野。至於炸魚皮，學蘇絲黃話齋，係硬嘅，一D都唔脆。講返中午黎食哩餐，兩個人叫左兩碗河粉，一碗係魚皮餃、墨魚丸、鮮牛柏葉拼紐西蘭羊片，另一碗係豬大腸、鮮牛肉拼墨魚頭。兩碗都係胡椒豬肚湯底。小食叫咗麻辣豬耳。仲叫多兩罐汽水。我哋中午兩點黎食，炸魚皮同一字骨已經賣晒，所以一字骨試唔到。河粉係好食嘅，湯底亦好正，唔飲埋有D嘥，但所有自選嘅食材就份量少質素亦麻麻，當中比較好食係魚皮餃，但係得兩粒。墨魚頭同墨魚蘇就淥過龍，縮左水又有D韌。鮮牛肉就有一浸豬潤味。羊片就係佳寶D肉。至於麻辣豬耳份量一樣係少，成$38，得幾舊，唔知係唔係新鮮豬耳，顏色比較淺，食落口感介乎爽脆同硬之間，但就夠辣。縂結，埋單$180，推介係辣椒油同胡椒豬肚湯，佢哋自己話個湯係冇味精，如果係真，應該貴就貴在煲湯度。…Read More

今晚同friend老遠黎到旺角食湊湊煱，叫左個湊湊節日二人套餐，聼我個friend講唔係間間shop都有哩個餐，比較抵又夠飽⋯湯底叫左台式麻辣煱拼蕃茄牛膝骨煱，麻辣湯底唔麻亦唔辣，蕃茄湯底偏淡。肉方面係美國特級牛小排及伊比利亞黑豬肉，肉方面質素本來冇問題，但$700個餐，俾兩碟咁嘅肉就真係麻麻。基圍蝦八隻，普通size，新鮮嘅。企鵝丸，可能我唔鍾意D整到懶可愛嘅食材，放落個煱度係就係浮浮下，放入口咪又係普通嘢，仲要我唔覺得彈牙喎。油炸鬼，我鍾意食，但佢嘅油炸鬼，又厚又唔脆，咬落去似炸麵包咁，勁失望囉。皇帝菜，冇comment。野飲，叫左一杯凍珍奶（大杯/半糖），同一杯冰檸檬紅茶（小杯/無糖），小杯都好大杯，抵飲。全晚最好食係任攞嘅炸波波，入面係芋蓉卦，好好食。另一個亮點係任食鴨血，不過就唔係我鍾意食嗰種，唔夠淋身得黎又好煙韌⋯我地book左6-8時段，個waitress到7:55就趕我哋走，話有客等緊，但我見仲有空枱s，全晚一D都唔full，有D可疑。全單八百幾，只係滿足左我未食過好想食嘅意欲，下次不了。…Read More

人生嘅第一碗米線，係响雲貴香食嘅，所以或多或少都有一種情意結，雖然而家佢已經唔係最好食嗰間。經過將軍澳，見到有雲貴香，二話不說即刻衝左入去叫咗碗小窩米線，小辣，加肥牛炸醬豬紅⋯等咗20分鐘碗野先黎，齋講米線，米線係好食嘅，軟硬適中，不過個湯底就令人非常失望，話明小窩米線係有芫荽、酸菜、芽菜、蔥等等，但係成碗米線一片芫荽都冇，酸菜份量極少，而且切到好碎，一啲酸味都冇，叫咗小辣，但係連埋炸醬，都只係微辣，湯底亦比以前淡左好多。我平時習慣叫炸醬分上，但哩間嘅姐姐話唔得（之前食開旺角、沙田、銅鑼灣分店都可以，不過已經係好耐之前嘅事），算係一個令我幾失望嘅位。豬紅係好食嘅，又甜又彈牙，但衰在個湯底偏淡，嘥咗個豬紅。肥牛就真係最差，好似烚咗成個鐘咁又韌又硬。炸醬就真係點評唔到，因為都撈晒入個湯底度，溝淡晒。齋講今日我食呢碗米線，就真係比另外三間本地好出名嘅米線舖失色好多。如果只係比較雲貴香嘅分店，似乎銅鑼灣店係最好食，將軍澳店就真係最麻麻啦。仲有，好多雲貴香姐姐都好串，擺到明唔sell服務態度⋯…Read More

又係黎左春水堂，每個月坐底都一兩次，無計，太古城中心真係選擇唔多。兩個人晚餐order左麻辣牛肉麵、紅燒牛肉麵、麻辣青瓜、椒鹽雞翼同茶香肉燥生菜。麻辣牛肉麵：半筋半肉，都好大舊，湯底唔錯，但係BB辣，麵亦偏林，我自己ok，但我個friend麻麻地林麵。紅燒牛肉麵：基本上同麻辣牛肉麵一樣，湯底很濃很甜，甚至比麻辣的更出色。椒鹽雞翼：中等size，唔算好大隻，但個皮炸得好鬆脆，比鹽酥雞更好食，個人認為係encore之選。麻辣青瓜：夠大舊厚身，夠凍夠酸，非常爽口，麻辣只係普通辣度，賣相一般但係意外地好食。茶香肉燥生菜：花椒八角味重，肉燥不特別好食，只屬一般。埋單三百零蚊，仲要㩒住唔叫野飲，真心係貴。…Read More

N午前食過哩度嘅lunch buffet，無期望反而有驚喜，覺得唔錯，一直想encore，又俾我今日book到即日dinner buffet，結果中伏係劣食，所以乜都係整定⋯入正題，盡量逐樣食物點評（此終個胃容量有限）：龍蝦：睇個樣已經知道有D乾身，點知食落，簡直係完全風乾左咁，而且超級韌同無味（全埸最難食no.1），攞咗一round共4隻，淨係食咗兩隻，無辦法都要放棄淨返個2隻，做左大嘥鬼。生蠔：種類偏細隻，中規中矩，蠔味ok。長腳蟹：average size，唔細隻，但味淡同乾身，第二round再拎，明顯係多汁同甜D（有一半係甜嘅），咁你哋明啦⋯刺身：全部都係麻麻地，得三文魚同劍魚比較好，帶子有D腥，八爪魚好似咬緊舊擦子膠咁。片皮鴨：有水準，好食，拎左三round。西冷扒：第一round拎左D頭頭尾尾返黎食，硬到似石頭，一啖就放棄，諗住俾多個機會佢，今次拎左中間，算係林嘅，有牛味，不過凍凍地⋯台式蚵仔煎：蚵仔丁屎咁細粒，又少，香菜冚過晒蚵仔味，又係衰乾身。煎鵝肝：中規中矩，可以煎得燶D。鹵水墨魚：兩個字「無味」。煎雞髀菇：無特別，但因為我鍾意食菇，所以點整都好食。蝦片：唔香唔脆，又硬又實，建議佢哋直接入「明輝蝦片」。天婦羅：個炸粉好有問題。點心（素粉果及燒賣）：個皮又粉又濕，非常之難食。甜品：k buffet甜品質素。都明嘅，即book即有，同要等幾個月嘅，梗係有好大嘅分別。講下D好野，有三小時免泊（代泊），任飲，雪糕多選擇，龍蝦同長腳蟹位冇人排任你攞，個場D侍應同廚師係大年紀D（冇歧視），但服務質素一流，好快手收碗碟。…Read More

今日黎食tea，全舖得兩三枱客，勁冷清。哩間野剛開業嘅時候唔錯，價錢唔平，但食物勝在有質素，尤其係炸魚著條，之後整整下愈黎愈細碟。Anyway, 今日叫左XO醬豬扒炒公仔麵and凍奶茶。首先講個XO醬炒公仔麵，份量係細嘅，可能因為係tea set，但真係冇鑊氣，似用煎pan炒，而且落得唔夠XO醬，味道偏淡，不過就唔油唔咸囉，至於個豬扒就真係大件事，又薄又梅，似冇乜醃過嘅肉片咁。凍奶茶就大杯嘅，不過不嬲佢嘅水吧唔係好掂，杯奶茶冇茶味，一味得個甜字。最後埋單$62，真心希望佢做返好D，因為佢都曾經有D我覺得好食嘅野⋯…Read More

今晚一人前，貢左去敏華食扒。Order左西冷牛扒，5成熟，跟意粉，羅宋湯同凍0樂。講返個西冷扒，舊牛扒勝在夠厚，夠啖啖肉，黑椒汁份量多，夠淋有凸，塊鉄板亦好夠熱，上左枱灘左成分鐘先淋汁，都勁多煙，D汁周圍噴，但係塊扒明顯就有D乾身同少少鞋口，我叫五成熟，其實都差唔多熟晒，不過又真係冇理由要求快餐式鐵板達到咁嘅要求，人哋又唔係扒房，都係一分錢一分貨啦。另外，因為我對鬆肉粉敏感，落左少少我都會即刻唔舒服，佢嘅牛扒我證實係冇落嘅。意粉普通質素，有D唔夠熱。羅宋湯最最最最最出色，夠酸夠辣又有果皮香，係市面上食肆難搵到嘅質素，不過唔知佢其他嘅分店係唔係一樣咁出色⋯（我已經係同一間店encore過無數次）…Read More

話說今日中午同朋友兩個人食敏華，因為係星期日中午時段，所以都要排隊等位。等左大概5-10 分鐘，伙記先一下子安排3至4枱客入座（包括我哋），當時已經覺得佢哋好似唔夠人手咁⋯anyway，都order左蔥油豬扒煎雙蛋飯、沙茶醬牛肉公仔麵（連煎熟蛋加多士）、熱檸茶同凍奶茶。講番哩間敏華，係新開分店，所以我或多或少會同太古城中心嗰間舊店做比較。蔥油豬扒煎雙蛋飯係我嘅favorite，十次去太古城舊店七、八次order佢，豬扒好tender好食，不過會有D滯，味道黎講兩間冇乜分別，唯一分別係康怡新店得好少蔥油，所以扣左分。牛肉公仔麵個沙茶醬湯底就真係比舊店淡。兩杯野飲都唔夠茶味，奶茶亦唔滑。至於份多士煎熟蛋就漏左單，叫左伙記幾次，等左三十分鐘先黎，但因為某D不快原因，我哋cancel左order。另一樣係，因為之前哩個舖位係酒樓，宜家變成三間連著一起的食肆，一入去係敏華，之後係亞參，最入係食好D，有D想去亞參嘅客唔知，就照排門口敏華條隊，又冇侍應提佢哋，浪費左D客嘅時候，有D混亂。…Read More