澱粉質小花's Profile

疫情無得出街堂食，見佢外賣自取有折就去旁襯一下，上次叫等左差唔多一個鐘，估唔到今次仲耐，下晝未夠5點半打電話落單，叫左一個炆伊麵，半隻炸子雞同5碗白飯，落單時明明話15-20分鐘攞得，點知企喺門口等勁耐都未有，有啲單號後過我嘅仲早過我哋有得拎，最後等到7點先拎得，叫個咁簡單嘅外賣嘅都等成個幾鐘，聽到隔離叫碟义燒都要企喺度等一個鐘，上次後加白飯都要另外等多半個鐘，返到屋企啲白飯同伊麵仲暖嘅但隻雞已經凍晒，唔知廚房點做，好心做唔切就唔好接單啦！下次都唔再旁襯佢地外賣自取啦😒…Read More

有日放工比較遲，成差唔多九點半，諗住去魚尚買個飯團簡單充饑算。去到魚尚㨂飯團，無晒牛肉所以我㨂左鰻魚飯團，後來見佢貼住個牌寫任何惠顧可以$10買一盒大卷或小卷，我見咁抵就買左一盒鰻魚小卷。食嘅時候覺得鰻魚飯團一般，同平時食開嘅鰻魚味有啲唔同，但都接受到，到食小卷嘅時候發現唔對路，啲鰻魚腥嘅，仲要係點左豉油同wasabi 都好明顯嘅腥味，只係食左一件就刻掉左落垃圾桶無食到，唔知係咪佢擺左成日變壞左🙄…Read More

今日黎左天瑞呢條街掃街買晚餐，因為有朋友介紹，食辣辣薯粉，我唔係太食得辣，所以決定買定杯野飲送薯粉。由於太多選擇，我企左喺度望住餐牌諗左一陣。。諗緊嘅時候傳出陣陣雞蛋仔嘅香味，澱粉質小花當刻勁想叫一底黎食，可惜已經叫左薯粉，夏天要減肥唔可以食太多，唯有留番下次先黎食啦！諗左一陣飲咩可以幫到解辣，本身諗住叫西瓜汁，但我怕好甜（平時嘅我係覺得所有紙包飲品都勁甜），雖然$25唔算貴，但我第一次幫襯飲啲穩陣中價嘅啦，最後諗緊提子乳酸特飲定草莓特飲，諗諗下草莓唔知會唔會有藥水味，都係㨂提子啦～好快就有得飲啦，雖然唔係好大杯，飲落有驚喜！一來唔太甜，二黎底部有啲好似柚食下，仲有乳酸味飲得出！多重口感，好好飲丫！多得呢杯野我先食得晒碗薯粉，下次要再其他飲品同糖水先！…Read More

當新界人約港島人，尖沙咀通常都係常約嘅區域。今次見一個好耐無見嘅朋友，食飯為名吹水為實，當然㨂啲環境舒適，又坐得耐嘅地方啦！睇openrice睇睇下就見到呢間SPICE，見地點喺諾士佛臺價錢又相宜，就喺openrice book枱。上到去見到個環境唔錯噃，枱與枱之間唔會好近，由於我地上去嘅時間尚早，仲有Happy hour wine 同cocktail 㨂， 我同朋友都點左杯～之後就點野食啦，我地兩個都唔係大食所以點左串燒同埋椰青海鮮焗飯，然後留肚食甜點。碟串燒無咩特別，我想講下個海鮮飯。碟海鮮飯一拎出黎我心裡嘩一聲，好正丫～～真係用個椰青上！ 個飯面啲椰漿好濃郁，但味道唔會太甜，食嘅時候熱騰騰，整個飯口感好好，超好味丫！食完飯同串燒，大家都想食下甜品，就點左去泰國餐廳必點嘅芒果糯米飯同椰汁布甸～芒果糯米飯個汁味道唔太甜，啲芒果唔會酸，飯有黑白兩款，夾埋一齊食簡直perfect match! 個椰汁布甸好煙韌，醬比較多所以略甜，但整體黎講係好食嘅～呢啲質素埋單兩人唔駛四百蚊，喺尖沙咀黎講真係好抵食～下次一定會再幫襯！提提大家，呢間餐廳點菜同訂枱都主要講英文架～…Read More

今日因為等藥所以去左朝聖食意粉，叫左意粉等緊嘅時候覺得天氣有啲熱，又好耐無食生果，就叫左杯超級水果茶黎試下～落單嘅時候問收銀哥哥咩係四季春，佢話係烏龍+綠茶，味道比茉莉茶清少少，叫我可以試下，我見收銀哥哥咁誠意拳拳，就㨂四季茶啦！收銀哥哥仲好貼心咁問駛唔駛少甜少冰，我當然無拒絕，答「要」啦～等左一陣就有得拎，好欣賞佢好貼心咁問要唔要袋裝杯茶，唔駛加錢當然又係「要」啦！另外佢跟杯茶比埋隻义用黎义生果食，加分！仲有佢地包裝飲管嘅係環保紙包裝，為飲品加上一點環保呢！我飲第一㗳嘅第一個感覺係：好甜丫🙊可能因為自己一向唔係受得太甜，後來先發現原來可以㨂半糖😅 攪勻啲再飲，都係覺得甜，直至啲冰溶左先啱番飲。。。我呷一口茶，茶底不是特別濃，但加上水果令飲品口感豐富，味道有多種層次，幾特別！ 飲到尾發現原來都幾足料噃！杯茶底部有啲野咬下咬下，唔知係咩黎架呢？🤔下次再幫襯嘅時候問下先～…Read More

今日出開尖沙咀做facial, 同朋友順便食埋晚飯，由於呢間Cafe喺附近，menu又好似ok咁，就去試下啦！上到去我地2個人被安排坐卡位，好闊落呢，私隱度都幾高，仲望到街景，環境唔錯！然後就開始睇下食咩好，餐廳有一個大大menu睇芭菲，佢有好多唔同配搭嘅芭菲，真係好吸引😍可惜我地去嗰日係超級凍嘅日子所以放棄左芭菲呢個甜品，轉左㨂熱食先！我一見到個menu意粉可以加$38轉餐包沙律同酥皮湯，即刻同個friend講要飲酥皮湯！以前細細個嗰陣好鍾意星期日同屋企人去附近連鎖快餐店食扒餐飲酥皮湯，雖然飲完個酥皮湯都飽左大半，不過作為澱粉質愛好者，食酥皮重要過件扒！宜家人大左，多左太多餐廳選擇，好耐都無再旁襯過快餐店嘅酥皮湯，今日咁啱見到就點都要叫黎飲下回味一下兒時感覺！好順理成章地，為左個酥皮湯，我地點左個拿破崙意粉，見有鐵板意粉幾特別，咁凍嘅天氣又會夠熱，上枱嘅時候‘炸炸’聲好正啊！個意粉味道唔錯，不過記得要盡快食，如果凍左感覺會比較油膩 。個酥皮湯唔駛講緊係正啦😋，酥皮焗得啱啱好，配埋個湯好味道～喺用餐嘅最後段，澱粉質小花當然唔放過澱粉質嘅甜品啦！我地㨂左法式焦糖香蕉吐司，上枱覺得都幾大件，同埋賣相都好吸引，食落件吐司外邊係脆嘅，配雪糕食簡直一流！遲啲無咁凍再黎試下芭菲先！～…Read More

聖誕日下晝突然有人話想出街食晚飯，要求係唔好太貴。。。諗緊：嘩咩日子仲要無book枱，仲要食西餐但要唔貴，難度都幾高噃，好彩最後都搵到呢間西餐廳！ 下晝二點幾打去，問晚餐價錢，聖誕日一個2人餐竟然唔駛$400有一個2人餐，咁就緊係即刻book，我地訂六位，職員好好咁話因爲得張六人枱，如果七點前到都可以，我地本身都無節目所以都無問題。夜晚去到，點左3個聖誕二人餐，每個餐有沙律或湯2客、小食一款、大蝦意粉或意大利飯一款、燒雞或德國豬手一款及甜品和餐飲。其實真係好抵食！講下食物質素，食物質素係幾好架，大蝦意粉幾好食，味道啱啱好，薯條有幾款醬比你㨂，包括茄汁、蜜糖芥末同黑松露醬。燒雞係原隻上，啲肉好嫩，伴個醬係蜜糖溝黑醋，好惹味！ 最後仲有甜品，本來想㨂cheese cake，但佢已經賣晒，得番朱古力雲石蛋糕，個雲石蛋糕都幾好味噃，唔會太甜。野飲方面我加左錢要花茶，花茶係一壺上有蠟燭保持住溫度，如果平日tea time黎食野飲呢個花茶，感覺都幾寫意！雖然間餐廳唔大，座位唔算寬闊，不過食物質素好得黎價錢又親民，呢啲小本經營嘅小店真心會再黎支持！ p.s. 其實間餐廳聖誕當日唔係只做聖誕餐，散叫menu上嘅食物都可以，但我地懶得諗再加上覺得叫餐都好多野食所以無散叫，只係另外叫左薯皮同蒜容包。 另外因為當日食唔晒嘅關係，我地打包左個大菇意大利飯，第二日叮番熱黎食都仲好好味，個飯唔會太硬，味道又好，呢間餐廳真係要encore!…Read More

今日喺洪水橋食完辣車仔麵想買野黎飲（突然想飲下珍珠奶茶），因為隔離嗰個人要去天水圍剪頭髮，要我等佢，所以中間嘅時間行左去新北江買野飲。本身諗住飲珍珠奶茶，行行下見到呢間果夫子，一向都鍾意支持下非連鎖式食肆嘅我，決定放棄同一商場另外兩間連鎖店，試下呢一間新野！ 我掙扎左好耐飲咩好，心入面好想飲珍珠奶茶或者奶蓋茶品但覺得喺呢間主打生果嘅舖又好似無理由唔㨂水果系列。本身有問過可唔可以㨂桂花奶蓋烏龍加珍珠，可惜無得咁加法。。。最後我心大心細之下㨂左藍莓草莓奶昔！（我諗緊㨂咩嘅時候聽到有個啱啱整好開始飲嘅客話杯黃水晶好味，下次等我試下鑽石珍奶先）我見住佢係用鮮奶而唔係奶精/奶粉整，加上鮮果，個味道好fresh，唔會好甜。我開頭諗緊用鮮果會唔會有好多果糖杯野好甜，點知又唔會喎！不過本身以為奶昔會係好似啲漢堡飽店嘅奶昔咁嘅texture， 原來都幾唔同，飲完好飽啊！總括黎講，用鮮奶+鮮果整$28我覺得係抵嘅！下次經過會再試其他！…Read More

星期六放假有人話要食好啲，無食晏嘅佢又話要打邊爐，但繼上星期五雞煲同星期六火鍋後，我要休息一下（唔知點解啲男人咁鍾意打邊爐😑），於是比佢帶左我去食放題。我地無book枱，五點八去到好在都有位，職員話做緊每位228，第二位半價，埋單$371兩個人，食到七點半，幾抵噃😲。我地坐低左之後睇左一次有咩食，都分左好多類野食，壽司、刺身、沙津、天婦羅、一品料理、煮物、小食、炸物、甜品及飲品等等，不過每類入面嘅選擇唔算多，基本野都有嘅。飲品除左罐裝同紙包裝嘅野飲外，仲有熱嘅薑蜜同柑桔蜜，喺咁凍嘅天氣有即整熱飲飲都算唔錯。啲野食上得好快，不過壽司同刺身size偏細，正常應該會叫幾轉，但由於我唔知點解無乜胃口（可能天氣太凍我想食熱野多啲），我食左一round就停左，最後有叫到牛肉壽喜鍋同蟹粥食下，味道都ok嘅！甜品得三款㨂，有迷你雪糕杯、大腳板同埋一款唔記得左係咩，迷你雪糕杯係雀巢仲要無味㨂😩見到隔離枱有心太軟食但張紙又唔見有，問職員原來要預早一日預訂的😲結果其他食客仲努力密密食，但我地七點到就埋單走人lu~ 呢個價錢下次有胃口嘅時候可以再黎試多次！…Read More

尋日夜左收工，返到元朗都過左十二點，天寒地冬想搵啲熱野食，就諗住食點心啦，去到教育路見到有2間點心舖，因為之前食過另一間所以今次試呢間「一哥」。我諗住唔好咁夜返屋企所以叫外賣，㨂完點心比完錢，佢話要即整所以叫我地十分鐘後黎拎，因為天氣凍所以就去左對面seven睇左陣野再返去拎。返到屋企食嘅時候竟然係仲熱架！無諗過咁凍嘅天氣都可以食到咁熱嘅外賣！我地2個人叫左一籠鳳爪排骨飯、鹹水角、蒸牛肉、鵪春蛋燒賣。食鹹水角嘅時候嘩左一聲，我未試過食鹹水角係熱架！！以前去親酒樓食都係唔熱嘅，食熱嘅鹹水角真係第一次，重點係我係買外賣返屋企食，由拎外賣到返到屋企食嘅時間都起碼超過15分鐘，件鹹水角竟然仲係熱同脆嘅！所以真係好好食！個牛肉球係叫牛肝菌湯牛肉球，啲湯係可以飲埋架，都幾好飲添，而鵪春蛋燒賣入面竟然有蝦，勁驚喜！2款本身都好味，味道正常，質感正常。唯一相比之下無咁好食嘅就係個原籠鳳爪排骨飯，本身個鳳爪同排骨都好食嘅，但個飯底麻麻地，無咩味同埋唔夠軟。總括黎講，呢間野嘅點心係值得推介嘅👍🏻…Read More

平時工作時又忙又辛苦，星期五打算食好啲，今次想食上海野，放工搵下大埔嗰頭，睇openrice就見到呢間北京人家啦！片皮鴨一向都鍾意食，但宜家好食嘅好似無乜邊間，好多間都退左步... 今次叫左個餐 （唔知係咪平日先有呢個餐），有個小食（煎鍋貼）+片皮鴨+一個餸（生菜包），片皮鴨係新鮮整，見住個職員喺我地枱旁邊即切，佢比嘅薄皮又好多，整體黎講都好足料，因為我地只係2個人食，所以食完都勁滿足，仲要拎外賣盒打包添！下次有機會會再黎食丫！…Read More

上網睇到葵芳有間賣鞋店搬遷大減價，於是新界人就約左港島之友一齊去新都會廣場大出血。正所謂贏人先要贏自己，出血都需要力氣，所以我地決定食飽左先，咁就㨂左呢間拉麵店，因為食拉麵可以速戰速決，快啲去達陣掃貨！落完電梯見到要排隊，好在唔駛等好耐啫（可能因為我訓晏左遲左出門口，去到都過左高峰嘅午飯時間😝）我地坐低左之後就睇下有咩食，本來以為呢間拉麵店同好多新界西嘅拉麵店一樣，只有拉麵食，點知原來唔只嘅，仲有啲小食可以配黎食下，最啱好鍾意試新野嘅我，因為可以叫多幾款share又唔會過份地飽。跟住我地就叫左一個期間限定拉麵同俺流特製撈麵，一個豆腐野菜沙律，明太子芝士餃子同埋玉子大板燒，一齊share黎食。落單嘅時候女侍應話期間限定拉麵已經賣晒，我朋友話想試下芝士辛辣濃湯拉麵，咁就改左辣拉麵。明太子芝士餃子係第一碟上枱，醬汁夠多好足夠，餃子喺上枱嘅時候仲有啲脆，加分！餃子嘅size係一口size,啱晒我地（特別係扮斯文口細細）女仔食。食完餃子啱啱好玉子大板燒就到啦！本來打算order一隻share黎食，咁啱玉子大板燒上枱嘅時候我朋友有電話要講，叫我食先，我先嘗試用筷子分一半，但隻筷子一吉入去，啲蛋黃就開始係咁流出黎，原來玉子大板燒就係流心蛋加大板燒嘅醬，朋友示意我咬一半，我咬一半之後發現個流心黃已經不受控制啦，所以我就同朋友講不如我食晒成隻啦（因為太好食，所以我咬完一㗳都好想繼續食，其實食完成隻好有衝動encore,不過我要留quota比拉麵，所以忍住左口😝）然後屬於我嘅澱粉質食物-拉麵上場啦！ 本來我地打算一齊share2個麵，但我試左一㗳辛辣拉麵之後，即刻問朋友可唔可以比晒個辛辣拉麵佢食，我食番個撈麵🙊 我地2個一食拉麵，都異口同聲話'個拉麵好食啊！' 我地㨂左軟硬度係普通，我本身都有啲擔心，（因為我唔鍛意食啲太硬嘅麵，但我試過喺元朗食拉麵㨂普通硬度但結果我覺得係偏硬嘅），但今次呢間個拉麵係啱啱好嘅，而且彈牙，所以好好食！食飽飽，充滿力量就即係走去掃貨啦！…Read More

下晝喺尖沙咀做完臉打算搵啲野食下再返工，因為返幾粒鐘就放工，放工之後又會返屋企食野，所以諗住搵啲light啲嘅野食下。我由彌敦道向尖東方向行，行行下誤打誤撞入左呢條巷，勁鍾意食澱粉質食物嘅我見到呢間舖有人排緊隊，就諗住試下啦！排緊隊嘅時候search下openrice睇下其他食評有咩推介好食先！睇睇下發現原來呢間野係賣捷克好出名嘅煙𠧧包，跟住諗番起之前去布拉格旅行嘅時候喺旅遊區都食過呢款cone， 不過我喺布拉格食嘅時候係無雪糕嘅，而香港呢款有雪糕。唔知嗰日係咪之後要返工嘅關係，心情有啲急，見到女職員喺幾個客落完order之後先開始整，期間試過同另外兩個職員停晒手喺度談笑風生，唔知係咪因爲賣嘅係歐洲食物，工作文化上及速度都跟番歐洲嘅模式，所以大家幫襯嘅時候記住預留等嘅時間😝不過佢地都nice嘅，我等緊嘅時候發現原來雪糕可以㨂扭紋，咁我就即刻問下職員可唔可以轉扭紋，女職員好好笑容咁答我可以😚講番食物嘅味道，我㨂左爆谷同焦糖汁，個雪糕係滑嘅，爆谷同汁都好夾，好味道！至於個cone, 我食落感覺無喺布拉格食嘅軟，唔知係咪要夾番雪糕，當雪糕溶溶地嘅時候個包會淋啲呢🤔但食呢個真係完全唔可以顧儀態，因為啲雪糕都幾快咁從各邊漏落黎，雖然佢有匙羹仔提供，但當時真係無可能可以用匙羹逐㗳勺黎食。同埋食晒整個之後其實都幾飽，建議女仔可以幾個人夾份食，咁又可以食快啲，喺雪糕溶晒之前食晒 ！…Read More